သတင်းနှင့် လှုပ်ရှားမှုများ

       ၂၀၂၀ပြည့်နှစ်၊ မတ်လ (၃) ရက်နေ့တွင် ကရင်ပြည်နယ်အတွင်းရှိ စီးပွားရေးလုပ်ငန်းရှင်များကို စားသုံးသူကာကွယ်ရေးဉပဒေနှင့်အညီ ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြခြင်းဆိုင်ရာ  ရှင်းလင်းဆွေးနွေးပွဲကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် ကျင်းပပြုလုပ်ရာ ကရင်ပြည်နယ် အတွင်းရှိ စီးပွားရေးလုပ်ငန်းရှင် (၃၆)ဦး တက်ရောက်ခဲ့ကြပါသည်။

     ဆွေးနွေးပွဲတွင် ညွှန်ကြားရေးမှူး ဦးရဲထွဋ်နိုင်က စားသုံးသူကာကွယ်ရေးဉပဒေနှင့်အညီ ကုန်စည်အမျိုးအစားအလိုက် ကုန်အညွန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေး လုပ်ငန်းရှင်များ လိုက်နာဆောင်ရွက်ရမည့် အကြောင်းအရာများအား အသေးစိတ် ဆွေးနွေးရှင်းလင်းခဲ့ပြီး တက်ရောက်လာသူလုပ်ငန်းရှင်များက သိလိုသည်များကို မေးမြန်းခဲ့ရာ ညွှန်ကြားရေးမှူး ဦးရဲထွဋ်နိုင်က ပြန်လည်ရှင်းလင်းဆွေးနွေးခဲ့ပါသည်။ ထို့နောက် လုပ်ငန်းရှင်များအနေဖြင့် အခက်အခဲများရှိပါက စားသုံးသူရေးရာဦးစီးဌာနသို့ တင်ပြကြရန်နှင့် ဉပဒေနှင့်အညီ ကူညီဆောင်ရွက်ပေးသွားမည်ဖြစ်ကြောင်း ပြောကြားခဲ့ပါသည်။

          ဆက်လက်၍ စားသုံးသူကာကွယ်ရေးနည်းဉပဒေ(မူကြမ်း)နှင့်စပ်လျဉ်းသည့် ရှင်းလင်းဆွေးနွေးပွဲကို ကျင်းပခဲ့ရာ ညွှန်ကြားရေးမှူး ဦးရဲထွဋ်နိုင်နှင့်ဝန်ထမ်းများ၊ စားသုံးသူရေးရာဦးစီးဌာန၊ ကရင်ပြည်နယ်အတွင်းရှိ စစ်ဆေးရေးအရာရှိများ၊ ကရင်ပြည်နယ်ဦးစီးမှူးရုံးနှင့် ခရိုင်ဦးစီးမှူးရုံးရှိ ဝန်ထမ်းများ၊ ကော့ကရိတ်၊ ကြာအင်းဆိပ်ကြီး၊ ဖာပွန်၊ လှိုင်းဘွဲ့၊ သံတောင်ကြီး မြို့နယ် တာဝန်ခံများ တက်ရောက်ခဲ့ကြပါသည်။

        ညွှန်ကြားရေးမှူး ဦးရဲထွဋ်နိုင်က ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များနှင့်စပ်လျဉ်း၍ ဆက်လက်ဆောင်ရွက်ရမည့်လုပ်ငန်းစဉ်များကို ဝန်ထမ်းများအား ရှင်းလင်းဆွေးနွေးခဲ့ပြီး  လက်ထောက်ညွှန်ကြားရေးမှူး ဦးထက်ဝင်းအောင်က စားသုံးသူကာကွယ်ရေးနည်းဉပဒေ(မူကြမ်း)နှင့်စပ်လျဉ်း၍ ရှင်းလင်းဆွေးနွေးခြင်း၊  ဦးစီးအရာရှိ ဒေါ်ကေဇင်ယုက စားသုံးသူကာကွယ်ရေးဉပဒေနှင့်အညီ ဈေးကွက်စုံစမ်းစစ်ဆေးခြင်းလုပ်ငန်း များနှင့် စပ်လျဉ်း၍ အသေးစိတ်ရှင်းလင်းဆွေးနွေးခဲ့ပြီး ကရင်ပြည်နယ်ဦးစီးမှူးရုံးမှ ဝန်ထမ်းများ က သိလိုသည်များ မေးမြန်းဆွေးနွေးခဲ့ခြင်းနှင့် တာဝန်ရှိသူများက ပြန်လည်ဆွေးနွေးခြင်းများ ဆောင်ရွက်ခဲ့ကြကြောင်း သိရှိရပါသည်။

ကရင်ပြည်နယ်

စားသုံးသူရေးရာဦးစီးဌာန

           ကရင်ပြည်နယ်၊ မြဝတီမြို့တွင် ပြောင်းလုပ်ငန်းရှင်များအသင်း ဖွဲ့စည်းနိုင်ရေးနှင့် ပြောင်းကုန်စည်ဒိုင် ဖွင့်လှစ်နိုင်ရေး ညှိနှိုင်းအစည်းအဝေးကို မြဝတီမြို့၊   ၂၀၂၀ ပြည့်နှစ်၊ မတ်လ(၂)ရက်နေ့ ၊ နေ့လယ် (၁)နာရီအချိန်၌ ကျင်းပခဲ့ပါသည်။ အဆိုပါ အခမ်းအနားသို့ ကရင်ပြည်နယ်၊ ပြည်သူ့လွတ်တော်ကိုယ်စားလှယ် ဦးသန့်ဇင်အောင်၊ မြန်မာနိုင်ငံပြောင်း လုပ်ငန်းရှင်များအသင်းမှ ဉက္ကဌ ဦးမင်းခိုင်နှင့် အဖွဲ့ဝင်များ၊ မြဝတီမြို့ နယ်စပ်ကုန် သည်ကြီးများအသင်းမှ ဉက္ကဌ ဒေါ်သင်းသင်းမြတ်၊ မြဝတီမြို့ရှိ ပြောင်းကုန်သည်လုပ်ငန်း ရှင်များ၊ ဌာနဆိုင်ရာမှ တာဝန်ရှိသူများ၊ စုစုပေါင်း (၅၀)ဦး တက်ရောက်ခဲ့ကြပါသည်။

        ရှေ့ဦးစွာ ဆွေးနွေးပွဲတွင် ပြည်နယ် လွှတ်တော်ကိုယ်စားလှယ် ဦးသန့်ဇင်အောင်နှင့် ခရိုင်အုပ်ချုပ်ရေးမှူး ဦးတေဇာအောင်တို့က နှုတ်ခွန်းဆက် အဖွင့်အမှှာစကား ပြောကြား ခဲ့ပြီး မြန်မာနိင်ငံ ပြောင်းလုပ်ငန်းရှင်များအသင်း ဉက္ကဌ ဦးမင်းခိုင်မှ ကရင်ပြည်နယ် ပြောင်းလုပ်ငန်းအသင်းနှင့် ပြောင်းကုန်စည်ဒိုင် ဖွင့်လှစ်ရခြင်း၏ ရည်ရွယ်ချက်များကို လည်းကောင်း၊ မြဝတီမြို့ နယ်စပ်ကုန်သည်ကြီးများအသင်းမှ ဉက္ကဌ ဒေါ်သင်းသင်းမြတ် က မြန်မာ-ထိုင်း နယ်စပ် မြဝတီမြို့မှ တစ်ဖက်ထိုင်းနိုင်ငံသို့ ပြောင်းဆံတင်ပို့နေမှု အခြေအနေများကိုလည်းကောင်း၊ ကုန်သွယ်ရေးဦးစီးဌာန၊ မြဝတီကုန်သွယ်ရေးဇုံမှ ညွှန်ကြားရေးမှူး ဦးမင်းအောင်အေးက ပြောင်းကုန်စည်နှင့် ပတ်သတ်၍ ကုန်သွယ်ရေး ဆိုင်ရာ ဖြေလျော့ပေးမှု အခြေအနေများကိုလည်းကောင်း၊ စိုက်ပျိုးရေးဦးစီးဌာန၊ မြဝတီ ခရိုင်ဦးစီးမှူး ဦးစောလှကြည်က အစေ့ထုတ်ပြောင်းနှင့် ပတ်သက်၍ စိုက်ပျိုးရေးဆိုင်ရာ ဆောင်ရွက်ရမည့် သီးနှံဆိုင်ရာ အသိပညာအကြောင်းအားလည်းကောင်း၊ မြဝတီမြို့နယ် အကောက်ခွန်ဦးစီးဌာနမှ လက်ထောက် ညွှန်ကြားရေးမှူး ဦးလှမျိုးအောင်က အစေ့ထုတ်ပြောင်းနှင့် ပတ်သက်၍ အကောက်ခွန်ဆိုင်ရာ ကျသင့်ကောက်ခံမှု အခြေအနေများကို လည်းကောင်း၊ စားသုံးသူရေးရာ ဦးစီးဌာန၊ မြဝတီခရိုင်ရုံးမှ ဦးစီးမှူး ဦးမျိုးဝင်းနိုင်က ကုန်စည်ဒိုင်တွင် လိုက်နာရမည့် မှန်လေးမှန်ဖြစ်သည့် ပစ္စည်းမှန်၊ ဈေးနှုန်းမှန်၊ အလေးချိန်မှန်၊ အရောင်းအဝယ်မှန်ဖြစ်ရမည့် အကြောင်းအရာများ၊ ကုန်စည်ဒိုင်၏ စည်းမျဉ်းစည်းကမ်းများ၊ အသင်းဖွဲ့စည်းရာတွင် လိုက်နာရမည့် စည်းမျဉ်းစည်းကမ်းများ အကြောင်း သိကောင်းစရာများ ကိုလည်းကောင်း အသီးသီး ဆွေးနွေးခဲ့ကြပါသည်။

ဆက်လက်၍ မြဝတီမြို့နယ် ပြောင်းလုပ်ငန်းရှင်များအသင်း ဖွဲ့စည်းနိုင်ရေးနှင့် ပြောင်းကုန်စည်ဒိုင် ဖွင့်လှစ်နိုင်ရေးတို့အား မူအားဖြင့် သဘောတူဆုံးဖြတ်ချက်ချမှတ်နိုင် ခဲ့ပြီး မြဝတီပြောင်းကုန်စည်ဒိုင် ဖွင့်လှစ်နိုင်ရေးအတွက် ဦးဆောင်ကော်မတီကို ပုဂ္ဂိုလ် (၅) ဦးဖြင့် ဖွဲ့စည်းပြီး မြဝတီကုန်စည်ဒိုင်ဖြစ်မြောက်ရေးကော်မတီကို ပုဂ္ဂိုလ်(၁၄)ဦးဖြင့် ဖွဲ့စည်းဆောင်ရွက် ခဲ့ကြောင်း သတင်းရရှိခဲ့ပါသည်။

ကရင်ပြည်နယ်

စားသုံးသူရေးရာဦးစီးဌာန

       ၄.၃.၂၀၂၀ ရက်နေ့တွင် မွန်ပြည်နယ်စားသုံးသူရေးရာဦးစီးဌာနမှ ဦးစီးအရာရှိ ဒေါ်ဝါဝါမြိုင်         နှင့် အဖွဲ့သည် ပြည်နယ် FDA နှင့် ပူးပေါင်း၍ မုဒုံမြို့နယ်၊ မေတ္တာဆန်သောက်ရေသန့် လုပ်ငန်းသို့  ဈေးကွက်စောင့်ကြည့်လေ့လာခြင်းများကို ဆောင်ရွက်ခဲ့ပြီး ရေသန့်လုပ်ငန်းရှင်အား FDA ၏ ခွင့်ပြု ထောက်ခံချက်ရရှိမှသာ ထုတ်လုပ်ဖြန့်ဖြူးရောင်းချရန်၊ သက်ဆိုင်ရာဌာနများ၏ ခွင့်ပြုချက်နှင့်အညီ ဆောင်ရွက်ရန်၊ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ စားသုံးသူကာကွယ်ရေးဥပဒေ ၂၀၁၉ အခန်း (၁၈) ပြဌာန်းချက်နှင့်အညီ လိုက်နာ ဆောင်ရွက်သွားရန် အသိပညာပေးဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ညွှန်ကြားချက်အမှတ် (၂/၂၀၁၉) လက်ကမ်းစာစောင်များအား ဖြန့်ဝေပေးခဲ့ပါသည်။

မွန်ပြည်နယ်

စားသုံးသူရေးရာဦးစီးဌာန

        မကွေးတိုင်းဒေသကြီး၊ စားသုံးသူရေးရာဦးစီးဌာနရုံး အစည်းအဝေးခန်းမတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦရဲထွဋ်နိုင် ဦးဆောင်သော အဖွဲ့က ၂၀၂၀ ပြည့်နှစ်၊ မတ်လ(၁၁) ရက်နေ့တွင် စားသုံးသူကာကွယ်ရေးဥပဒေအရ ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြ ခြင်းနှင့် စပ်လျဉ်း၍ စီးပွားရေးလုပ်ငန်းရှင်များအား ရှင်းလင်ဆွေးနွေးပွဲနှင့် တိုင်းဒေသကြီးအတွင်းရှိ အရာထမ်း/ အမှုထမ်းများ၊ စစ်ဆေးရေးအရာရှိများကို စားသုံးသူကာကွယ်ရေးနည်းဥပဒေ (မူကြမ်း) အား ရှင်းလင်းဆွေးနွေးပွဲ အခမ်းအနားကို မနက်ပိုင်းနှင့် နေ့လည်ပိုင်းခွဲ၍ ကျင်းပပြုလုပ်ခဲ့ရာ ရေသန့်လုပ်ငန်းရှင်များအသင်း၊ လက်လီရောင်းချသူများအသင်း၊ ဒေသတွင်း မုန့်ထုတ်လုပ်သူ လုပ်ငန်းရှင်းများ၊ ကုန်သည်ကြီးများအသင်း၊ ဆီစက်နှင့် လက်လီရောင်းချသူများ၊ တင်သွင်း/ ထုတ်လုပ်/ ဖြန့်ဖြူးရောင်းချသူ လုပ်ငန်းရှင်များ စုစုပေါင်း (၉၀)ဦးခန့်နှင့် သတင်းမီဒီယာများ၊ အရာထမ်း/အမှုထမ်းများ/ စစ်ဆေးရေးအရာရှိများ တက်ရောက်ခဲ့ကြပါသည်။

     ရှေးဦးစွာ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးမှ နှုတ်ခွန်းဆက်စကား ပြောကြားရာတွင် ယခုလို စီးပွားရေးလုပ်ငန်းရှင်များ စုံညီစွာ တက်ရောက်လာကြတဲ့အတွက် အထူး ကျေးဇူးတင်ကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦးရဲထွဋ်နိုင်နှင့်အဖွဲ့က တိုင်းဒေသကြီးအလိုက် စားသုံးသူကာကွယ်ရေးဥပဒေအခန်း(၁၈)အရ ကုန်စည်အမျိုးအစားအလိုက် ကုန်အညွှန်း အမှတ် အသား ဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များအား သိရှိအောင် လာရောက်ဆွေးနွေး ပေးနေခြင်းဖြစ်ပါကြောင်း၊ စားသုံးသူကာကွယ်ရေးဥပဒေသစ်နှင့် ပတ်သက်၍ အခန်းအားလုံးသည် ဥပဒေထွက်ရှိသည့်နေ့မှစ၍ အကျုံးဝင်သော်လည်း အခန်း (၁၈)၊ ကုန်အညွှန်းအမှတ်အသားဖော်ပြ မှုနှင့် စပ်လျဉ်း၍ ၂၀၂၀ ပြည့်နှစ်၊ မတ်လ (၁၆) ရက်မှစ၍ စတင်အာဏာသက်ရောက်မည်ဖြစ်သဖြင့် စီးပွားရေးလုပ်ငန်းရှင်များအားလုံး သိရှိလိုက်နာနိုင်ရေး လာရောက်ဆွေးနွေးပေးတာဖြစ်ပါကြောင်း၊ လုပ်ငန်းရှင်များအနေဖြင့်လည်း အလွန်အကျိုးရှိပါကြောင်း၊ ကုန်အညွှန်းအမှတ်အသား ဖော်ပြခြင်း နှင့်ပတ်သက်၍ ရေသန့်လုပ်ငန်းရှင်များ၊ ဆီစက်လုပ်ငန်းရှင်များ၊ မုန့်လုပ်ငန်းရှင်များ၏ ကုန်စည် များတွင် ကုန်အညွှန်းအမှတ်အသားဖော်ပြမှုနှင့် ပတ်သက်၍ တိုင်းမှ စိစစ်ပြီး ရုံးချုပ်သို့ အတည်ပြု ပေးလျက်ရှိပါကြောင်း၊ ၂၀၂၀ ပြည့်နှစ်၊ မတ်လ (၁၅) ရက်နေ့တွင် World Consumer Rights Days အခမ်းအနားကို The Sutainable Consumer (စားသုံးသူအရေး စဉ်ဆက်မပြတ်ဆောင်ရွက်ပေး) ဆောင်ပုဒ်ဖြင့် မိမိတို့ တိုင်း/ခရိုင်/မြို့နယ်အလိုက် အများပြည်သူသွားလာလှုပ်ရှားသည့် လမ်းမများ တွင် ကမ္ဘာ့စားသုံးသူအခွင့်အရေးများနေ့ သီချင်းများဖွင့်ခြင်း၊စားသုံးသူအခွင့်အရေးနှင့်ကာကွယ်ရေး ဆိုင်ရာ ဗီနိုင်း၊ ပိုစတာများစိုက်ထူခြင်း၊ လက်ကမ်းစာစောင်များ ဖြန့်ဝေခြင်း၊ မီဒီယာကမ်ပိန်းများကို တစ်ပြိုင်နက် ကျင်းပပြုလုပ်သွားမည်ဖြစ်ပါကြောင်း၊ ကုန်အညွှန်းအမှတ်အသားများ ပြည့်စုံစွာ ဖော်ပြခြင်းဖြင့် စားသုံးသူများဘက်မှလည်း စီးပွားရေးလုပ်ငန်းရှင်များ၏ ကုန်စည်များအပေါ်တွင် စိတ်ချယုံကြည်မှုများတိုးလာစေပြီး လုပ်ငန်းရှင်များဘက်မှလည်း မိမိတို့၏ ထုတ်ကုန်တန်ဖိုးများ မြင့်တက်လာစေမည်ဖြစ်သည့်အတွက် အကျိုးရှိလာစေမည်ဖြစ်ပါကြောင်း ဆွေးနွေးခဲ့ပါသည်။

          ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦးရဲထွဋ်နိုင်မှ စားသုံးသူကာကွယ်ရေးဥပဒေနှင့် အညီ ကုန်စည် အမျိုးအစားအလိုက် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ရှင်းလင်း ဆွေးနွေးရာတွင် ၂၀၂၀ ပြည့်နှစ်၊ မတ်လ (၁၅) ရက်နေ့ နောက်ပိုင်း မြန်မာလိုဖော်ပြရမည့်ကိစ္စမှာ လုပ်ငန်းရှင် အခက်အခဲများစွာရှိမည်ကို သိရှိပါကြောင်း၊ မိမိတို့အနေဖြင့် လုပ်ငန်းရှင်များ၏ အခက်အခဲတွေကို ဝိုင်းဝန်းဖြေရှင်းပေးရန်အတွက် လာရောက်ခြင်းဖြစ်ပါကြောင်း၊ မတ်လ(၁၆)ရက် နောက်ပိုင်း ဈေးကွက်တွင် စစ်ဆေးသွားမည့် အခြေအနေတွေကိုလည်း လုပ်ငန်းရှင်များကို အကြမ်းဖျင်းရှင်းလင်းတင်ပြလိုပါကြောင်း၊ ကုန်စည်များတွင် မြန်မာလိုဖော်ပြရန်နှင့် စပ်လျဉ်း၍ ၂၀၁၄ ခုနှစ်၊ စားသုံးသူအကာအကွယ်ပေးရေးဥပဒေတွင် မြန်မာစာသားဖြင့် ဖော်ပြလာရေး စားသုံးသူအကာအကွယ်ပေးရေးဗဟိုကော်မတီမှ အမိန့်ကြော်ငြာစာ ထုတ်ပြန်ရမည်ဖြစ်ကြောင်း၊ မိမိတို့အနေဖြင့် ကုန်စည်များတွင် ကုန်အညွှန်းအမှတ်အသားများကို မြန်မာစာသားဖြင့် ဖော်ပြရေး စားသုံးသူအကာအကွယ်ပေးရေးဗဟိုကော်မတီမှ ၂၀၁၈ တွင် အမိန့်ကြော်ငြာစာ ထုတ်ပြန်၍ (၆)လ အချိန်ပေးခဲ့ပါကြောင်း၊ အမိန့်ကြော်ငြာစာမထုတ်ခင် လုပ်ငန်းရှင်များ၏ အခက်အခဲကို သိ၍ (၃)လ ကြိုတင်၍ ကုန်စည်များတွင် မြန်မာစာသားဖြင့် ထည့်သွင်းဖော်ပြရမည်ဖြစ်ကြောင်းကို နိုင်ငံပိုင် သတင်းစာများမှ အသိပေးခဲ့ပါကြောင်း၊ ဗဟိုကော်မတီမှ မြန်မာလိုဖော်ပြရမည့် ရက်ကိုသတ်မှတ် ပေးဖြစ်ပြီး စီးပွားရေးလုပ်ငန်းရှင်တို့အား တဖြည်းဖြည်းစောင့်ဆိုင်းပေးနေရာမှ ၂၀၁၆ ခုနှစ်တွင် မန္တလေးတိုင်းဘက်မှာ တရုတ်မှလာသည့် ခွေးကျွေးသည့် ဇူကာဗင်အားဆေးကို ကျောင်းမုန့်ဈေး တန်းတွင် ရောင်းချလျက်ရှိရာ မိမိတို့လို စစ်ဆေးသည့် ဌာနဆိုင်ရာများပင် နိုင်ငံခြားဘာသာဖြင့် ဖော်ပြထားသည့်အတွက် မသိရှိသော်လည်း နားလည်သည့် ကျောင်းသားမိဘတစ်ဦးမှ ခွေးကျွေး သည့် အားဆေးကို ကလေးများ စားသုံးနေရသည်ဟု တိုင်ကြားမှုများရှိလာသည့်အတွက် ဌာနဆိုင်ရာ များဖြင့် သွားရောက်စစ်ဆေးရာ ၎င်းတို့ဘာသာဖြင့် ခွေးများစားသုံးရန်အတွက်ဟု ရေးသားထား သည်ကို တွေ့ရှိခဲ့ရပါကြောင်း၊ ၎င်းဖြစ်စဉ်ဖြစ်ပွားပြီးနောက် ကုန်စည်များတွင် မြန်မာစာသားဖြင့် ထည့်သွင်းဖော်ပြရန် အမိန့်ကြော်ငြာစာ ထုတ်ပြန်ခဲ့ရပါကြောင်း၊ ထိုအတောအတွင်း လွှတ်တော်တွင် ဥပဒေကို ပြင်ဆင်ခဲ့ရာ ၂၀၁၉ ခုနှစ်၊ မတ်လ (၁၅) ရက်နေ့တွင် စားသုံးသူကာကွယ်ရေးဥပဒေကို ထုတ်ပြန်ခဲ့ပါကြောင်း၊ ဥပဒေရေးဆွဲရာတွင် စီးပွားရေးလုပ်ငန်းရှင်များကိုလည်း ဖိတ်ကြား၍ ချပြရှင်းလင်းဆောင်ရွက်ခဲ့ရာ ပြည်တွင်းထုတ်လုပ်သည့် လုပ်ငန်းရှင်များမှ (၆)လအတွင်း မြန်မာ စားသားဖြင့် ထည့်သွင်းနိုင်ရေး ဆောင်ရွက်နိုင်သော်လည်း နိုင်ငံခြားမှ တင်သွင်းသည့် ကုန်စည်များ မှာ အဆင်သင့်မဖြစ်သည့်အတွက် ဥပဒေထုတ်ပြန်ပြီး ထပ်မံ၍ အချိန်(၁)နှစ်ပေးခဲ့ပါကြောင်း၊ သတင်းမီဒီယာများမှတဆင့် အားလုံးသိရှိအောင်ကြော်ငြာခဲ့သော်လည်း အားလုံးကျယ်ကျယ်ပြန့်ပြန့် သိရှိလာနိုင်ရေး ရှေးဦးစွာ ကုန်စည်အုပ်စုအလိုက် ထုတ်ပြန်ပေးခဲ့ပါကြောင်း၊ စားသုံးသူသိရှိအောင် ဆောင်ရွက်တာဖြစ်သည့်အတွက် အရောင်သတ်မှတ်ချက်၊ ဖောင့်ဆိုဒ် သတ်မှတ်ချက်မရှိပါကြောင်း၊ နိုင်ငံခြားမှတင်သွင်းသည့် ကုန်စည်များတွင် မြန်မာစာသားဖြင့် ဖော်ပြလာရေး စတစ်ကာပဲကပ်ကပ်၊ ပန်းဖလက်ပဲပေးပေး၊ လက်ကမ်းစာစောင်နဲ့ပဲဖြစ်ဖြစ် ဆောင်ရွက်ခွင့်ပြုပါကြောင်း၊ ဥပမာ- ရေသန့် ဆိုလျှင် FDA မှ အင်္ဂလိပ်စာသားဖြင့် ဖော်ပြရေးခွင့်ပြုထားသော်လည်း စားသုံးသူကာကွယ်ရေး ဥပဒေအရ မြန်မာလိုလည်း ထပ်မံဖော်ပြရမှာဖြစ်ပါကြောင်း၊ စားသုံးသူကာကွယ်ရေးဥပဒေအခန်း (၁၈)၊ ပုဒ်မ ၄၁ (ခ)နှင့် (ဆ)မှာ မြန်မာလို မဖြစ်မနေ ဖော်ပြရမည့် အချက်တွေဖြစ်ပြီး ၎င်းတို့ အနက်မှ အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းပုံ အညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဓါတ်မတည့်ကြောင်းဖော်ပြချက်၊ ကြိုတင် သတိပေး ချက်တို့မှ မဖြစ်မနေထည့်ရမည့် အချက်များကို  ကုန်စည်အုပ်စုအလိုက် စားသုံးသူ ကာကွယ်ရေး ကော်မရှင်မှ ထုတ်ပြန်ကြေညာပေးထားပါကြောင်း၊ စားသုံးသူဘက်မှ တိုင်ကြားမှု ရှိလာရင်တော့ လုပ်ငန်းရှင်ဘက်မှာ ဖြေရှင်းရမည့်တာဝန်ရှိပါကြောင်း၊ ပြစ်မှုပြစ်ဒဏ်အရ အမြင့်ဆုံး ထောင်ဒဏ် (၂)နှစ်၊ ငွေသိန်း (၂၀၀)ထက်မပိုသော ငွေဒဏ်ဟုပါသော်လည်း တရားရုံးမှ ချမှတ်သည့်အတိုင်း လိုက်နာရမှာဖြစ်ကြောင်း၊ ဌာနအနေဖြင့် စီမံခန့်ခွဲမှုနည်းလမ်းအရ အရေးယူဆောင်ရွက်လို့ ရသော် လည်း နောက်တစ်ဆင့်မှာ ရဲအရေးပိုင်ဖြစ်၍ အမှုဖွင့်ပါက တရားရုံးမှ ကိုင်တွယ်သွားမှာဖြစ်ကြောင်း၊ လုပ်ငန်းရှင်များ အခက်အခဲရှိပါက မိမိတို့ဌာန၏ E-mail, Website နှင့် မိုဘိုင်းဖုန်းနံပါတ်များသို့ ဆက်သွယ်မေးမြန်း နိုင်ပါကြောင်း၊ ၂၀၂၀ ပြည့်နှစ်၊ မတ်လ (၁၆) ရက်မှာ အလွန်နီးကပ် လာပြီဖြစ်သည့် အတွက် အခက်အခဲ တွေ့ရှိရင် ဌာနကို တင်ပြဆွေးနွေးလို့ရပါကြောင်း၊ ပထမအဆင့် အနေဖြင့် ကုန်စည်များတွင် ကုန်အညွှန်း အမှတ်အသားများ၌ မြန်မာစာသားများ ထည့်သွင်း လာအောင် လုပ်ဆောင်သွားမှာဖြစ်ကြောင်း၊ ဒုတိယအဆင့်အနေဖြင့် ကုန်အညွှန်းအမှတ်အသားတွင် ဖော်ပြထားသည့်အတိုင်း မှန်ကန်အောင်ဆောင်ရွက်သွားမှာဖြစ်ကြောင်း၊ စတစ်ကာကပ်ဖို့ကိုလည်း အချို့ကုန်စည်တွေကိုကပ်ဖို့ ခွင့်ပြုနိုင်သော်လည်း အချို့ကုန်စည်တွေကို ခွင့်မပြုနိုင်တာတွေလည်း ရှိပါကြောင်း၊ ၂၀၂၀ ပြည့်နှစ်၊ မတ်လ (၁၆) ရက်နောက်ပိုင်းမှာလည်း ကုန်စည်အားလုံးကို ချက်ချင်း အရေးယူသွားတာမျိုးမဟုတ်ဘဲ ကုန်ပစ္စည်း အမယ်တစ်မျိုးချင်းအလိုက် တိုင်းဒေသကြီးအစိုးရအဖွဲ့ မှ သတ်မှတ်ပေးထားသည့် ကုန်ပစ္စည်း အမယ်တစ်မျိုး (သို့) နှစ်မျိုးကို ဈေးကွက်မှ စတင်ဖယ်ရှား သွားမှာဖြစ်ကြောင်း၊ ဥပဒေအသစ်မှာ ဥပဒေပါ အခန်းအားလုံးသည် ဥပဒေစတင်ပြဌာန်းသည့်နေ့မှ အာဏာတည်ပြီး ကုန်အညွှန်းအမှတ်အသားဖော်ပြမှုနှင့် စပ်လျဉ်းသည့် ဥပဒေအခန်း(၁၈)မှာ ဥပဒေ ပြဌာန်းပြီး တစ်နှစ်ပြည့်မြောက်မှသာ အာဏာတည်မည်ဟု သမ္မတမှ လက်မှတ်ရေးထိုး ထုတ်ပြန် ထားသည့်အတွက် မြန်မာစာသားဖြင့် ဖော်ပြလာရေး ထပ်မံ၍ ရက်တိုးပေး၍ရမည်မဟုတ် ပါကြောင်း၊ လုပ်ငန်းရှင်တို့အနေဖြင့်လည်း သိလိုသမျှ ပွင့်လင်းစွာ မေးမြန်းနိုင်ပါကြောင်း ဆွေးနွေး ခဲ့ပါသည်။

            ထို့နောက် တက်ရောက်လာသည့် စီးပွားရေးလုပ်ငန်းရှင်များ၊ လက်လီအသင်းအဖွဲ့အစည်း များ၊ သတင်းမီဒီယာများမှ သိလိုသည်များ မေးမြန်းမှုအပေါ် အသေးစိတ် ရှင်းလင်းဆွေးနွေး ခဲ့ပါကြောင်း သိရှိရပါသည်။ နေ့လည်ပိုင်းတွင် အရာထမ်း/ အမှုထမ်းနှင့် စစ်ဆေးရေးအရာရှိများကို စားသုံးသူကာကွယ် ရေးနည်းဥပဒေ (မူကြမ်း)နှင့် စပ်လျဉ်း၍ ရှင်းလင်းဆွေးနွေးခဲ့ရာ စားသုံးသူကာကွယ်ရေးဥပဒေ၊ ကုန်အညွှန်းအမှတ်အသား ဖော်ပြခြင်းဆိုင်ရာ ပြဌာန်းချက်များနှင့် စပ်လျဉ်း၍ ဆက်လက်ဆောင် ရွက်မည့် လုပ်ငန်းစဉ်များကို စားသုံးသူရေးရာဦးစီးဌာန (ရုံးချုပ်)မှ ညွှန်ကြားရေးမှူး ဦးရဲထွဋ်နိုင်မှ  လည်းကောင်း၊ ဈေးကွက်စုံစမ်းစစ်ဆေးခြင်းလုပ်ငန်းများနှင့် စပ်လျဉ်း၍ စားသုံးသူရေးရာဦးစီးဌာန (ရုံးချုပ်)မှ ဦးစီးအရာရှိ ဒေါ်ကေဇင်ယုမှလည်းကောင်း၊ စားသုံးသူကာကွယ်ရေးနည်းဥပဒေ (မူကြမ်း)နှင့် စပ်လျဉ်း၍ စားသုံးသူရေးရာဦးစီးဌာန (ရုံးချုပ်)မှ လက်ထောက်ညွှန်ကြားရေးမှူး ဦးထက်ဝင်းအောင်မှလည်းကောင်း ရှင်းလင်းဆွေးနွေးခဲ့ပါကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန

       ၂၀၂၀ ပြည့်နှစ် မတ်လ  ၁၆ ရက်နေ့တွင် လယ်ယာထုတ်ကုန်စီမံခန့်ခွဲရေးအဖွဲ့၏ ညှိနှိုင်းအစည်းအဝေးကို နေပြည်တော်၊ ရုံးအမှတ်(၃) စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံးခန်းမ၌ ကျင်းပပြုလုပ်ရာ လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး၊ ပဲခူးတိုင်းဒေသကြီး စီမံဘဏ္ဍာဝန်ကြီး၊ စပါး၊ ဆန် ဝယ်ယူရေးကြီးကြပ်မှုလုပ်ငန်းအဖွဲ့များ၊ ဌာနဆိုင်ရာအသီးသီးမှ တာဝန်ရှိသူများနှင့် မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံဆန်စပါးအသင်းချုပ်၊ မွေးမြူ​ရေးည်းအဝေး ဌာနများသို့ အစည်းအဝေးဖိတ်ကြားစာများ ပေးပို့ပြီးဖြစ်ပါကြောင်းနှင့် အစည်းအဝေးကျင်းပပြုလုပ်နိုင်ရေးအတွက် လုပ်ငန်းအဖွဲ့ချုပ်၊ မြန်မာ နိုင်ငံဆန်စက်လုပ်ငန်းရှင်များအသင်း၊ မြန်မာ့ကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်တို့မှ တာဝန်ရှိ သူများ တက်ရောက်ခဲ့ကြပြီး ၂၀၁၉-၂၀၂၀ခုနှစ်အတွက် ရန်ကုန်တိုင်းဒေသကြီး၊ ပဲခူးတိုင်းဒေသကြီးနှင့် ဧရာဝတီ တိုင်းဒေသကြီးတို့တွင် အခြေခံရည်ညွှန်းစပါးစျေးနှုန်းဖြင့် မိုးစပါးဝယ်ယူရေးဆောင်ရွက်ပြီးစီးမှု အခြေအနေများအား အသေးစိတ်ညှိနှိုင်းဆွေးနွေး ခဲ့ကြောင်း သတင်းရရှိပါသည်။

            လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယ ဝန်ကြီး ဦးအောင်ထူးက အမှာစကားပြောကြားရာတွင် လယ်ယာထုတ်ကုန်စီမံခန့်ခွဲရေးအဖွဲ့အနေဖြင့် မိုးစပါး တင်းပေါင်း (၁၇၄,၀၀၀) ဝယ်ယူရန် စီစဉ်ဆောင်ရွက်ခဲ့ပါကြောင်း၊ ဝယ်ယူပြီးစပါးများမှ ကြိတ်ခွဲထားသည့် ဆန်များကို ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်နှင့် ရွှေပြည်သာမြို့နယ်ရှိ သိုလှောင်ရုံများသို့ ဆန်ပြန် လည်အပ်နှံမှုများ ဆောင်ရွက်လျက်ရှိရာ  ကြိတ်ခွဲထားသည့်ဆန်များ၏ ၁၇.၂၄ % ခန့် ပြန်လည်ပေးသွင်းခဲ့ပြီး ဖြစ်ပါကြောင်း၊ သက်ဆိုင်ရာ စပါး၊ ဆန် ဝယ်ယူရေးကြီးကြပ်မှုလုပ်ငန်းအဖွဲ့များအနေဖြင့် ၃၁-၃-၂၀၂၀ ရက်နေ့ မတိုင်မီ အမြန်ဆုံးပြန်လည်အပ်နှံနိုင်ရေး  ကြီးကြပ်ဆောင်ရွက်ပေးရန် လိုအပ်ကြောင်း၊ အပ်နှံရရှိသည့်ဆန်များ ကိုလည်း တင်ဒါစနစ်ဖြင့် ပြန်လည်ရောင်းချနိုင်ရေး ဝိုင်းဝန်းဆွေးနွေး ပေးစေလိုကြောင်း၊ ဝယ်ယူထားသည့် ဆန်များအနက် တရုတ်ပြည်သူ့သမ္မတနိုင်ငံသို့ ဆန်တန်ချိန် (၂၀၀) လှူဒါန်းနိုင်ခဲ့ပါကြောင်း၊ အဖွဲ့မှ ဆန်ဝယ်ယူ ထားနိုင်ခဲ့သည့်အတွက်  ဈေးကွက်တည်ငြိမ်မှုကို ဖော်ဆောင်နိုင်ခဲ့ပါကြေင်း၊ နွေစပါးကိုလည်း အခြေခံဈေးနှုန်း ဖြင့်ဝယ်ယူနိုင်ရေးဆက်လက်ညှိနှိုင်းဆောင်ရွက်သွားမည်ဖြစ်ကြောင်း၊ မိမိတို့အဖွဲ့၏ စပါးဝယ်ယူသည့် အစီ အစဉ်သည် စားသုံးသူနှင့် တောင်သူများ ကိုလည်း အကျိုးရှိစေသည့်အပြင် တရုတ်ပြည်သူ့သမ္မတနိုင်ငံသို့လည်း ကူညီထောက်ပံ့နိုင်ခဲ့သည့်အတွက် အောင်မြင်မှုများရရှိခဲ့ပါကြောင်း၊ အခြားတစ်ဖက်ကလည်း လက်ရှိစပါး ဈေးသည် အခြေခံဈေးနှုန်းထက် ပိုမို မြင့်မားလာသည့်အတွက် လုပ်ငန်းစဉ်အောင်မြင်သည်ဟု ယူဆပါကြောင်း ပြောကြားပါသည်။

      ထို့နောက် အစည်းအဝေးသို့ တက်ရောက်လာသည့် တိုင်းဒေသကြီး စပါးဆန်ဝယ်ယူရေး ကြီးကြပ်မှု လုပ်ငန်းအဖွဲ့ဝင်များက မိုးစပါးဝယ်​ယူရေး ဆောင်ရွက်ပြီးစီးမှုအခြေအနေများနှင့် ပတ်သက်၍ လည်းကောင်း၊ အသင်းအဖွဲ့များနှင့် ဌာနဆိုင်ရာတာဝန်ရှိသူများက တင်ဒါစနစ်ဖြင့် ဆန်ပြန်လည်ရောင်းချရေးအတွက် တင်ဒါ စည်းမျဉ်းစည်းကမ်းများ သတ်မှတ်နိုင်ရေးနှင့်ပတ်သက်၍လည်းကောင်း ဝိုင်းဝန်းအကြံပြုဆွေးနွေးတင်ပြခဲ့ကြောင်း သတင်းရရှိပါသည်။

မူဝါဒ