သတင်းနှင့် လှုပ်ရှားမှုများ

           ဓနိပင်သည် မြန်မာနိုင်ငံတွင် ပင်လယ်ကမ်းရိုးတမ်းနှင့်မြစ်ကမ်းရိုးတို့တွင် ပေါက်ရောက်သောအပင်ဖြစ်ပါသည်။ အထူးသဖြင့် ပဲခူးမြစ်ကမ်းဘေး၊ ဧရာဝတီတိုင်းဒေသကြီးတို့တွင် ဓနိများထွက်ရှိပြီး ယခုအခါ ဓနိဖူးခြောက်လုပ်ငန်းသည် တွင်တွင်ကျယ်ကျယ်ဖြစ်လာကာ ဈေးကွက်အတွင်း ဓနိဖူးခြောက်(ရေနွေးကြမ်း)သည် အရောင်းသွက်နေသဖြင့် ဖျာပုံခရိုင်၊ စားသုံးသူရေးရာဦးစီးဌာနမှ ခရိုင်ဦးမှူးဦးထွေးသိမ်းနှင့် မြို့နယ်တာဝန်ခံ ဦးမင်းဇော်တို့သည် ခရိုင်အသေးစားစက်မှု လက်မှုလုပ်ငန်းဦးစီးဌာနမှ ခရိုင်ဦးစီးမှူး ဒေါ်ဇင်မာထွေးတို့နှင့်အတူ ဓနိဖူးခြောက်ထုတ်လုပ်သည့် လုပ်ငန်းရှင်များနှင့်တွေ့ဆုံရန် ဖျာပုံမြို့နယ် အမာမြို့သို့ မတ်လ(၁၀)ရက်နေ့ နေ့လည်(၁၂:၀၀)နာရီတွင်အမာ မြို့အထွေထွေအုပ်ချုပ်ရေးမှူးရုံး၌ တွေ့ဆုံ၍ အသိပညာပေးဟောပြောခဲ့ကြောင်းသိရသည်။

          အဆိုပါဟောပြောပွဲတွင် စားသုံးသူရေးရာဦးစီးဌာနမှ ခရိုင်ဦးစီးမှူးက စားသုံးသူကာကွယ်ရေးဥပဒေပါ ပုဒ်မ(၂) ပုဒ်မခွဲ(က)(ခ)(ဇ)နှင့် အခန်း(၁၈)ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက်ဖြစ်စေ ဖော်ပြနိုင်ရေးဆောင်ရွက်သွားရန်နှင့် လုပ်ငန်းရှင်များ လိုက်နာရမည့် ဥပဒေပါအကြောင်းအရာများကို ရှင်းလင်းဆွေးနွေးပါသည်။ ဆက်လက်၍ မြို့နယ်တာဝန်ခံက  ဓနိဖူးခြောက်လုပ်ငန်းသည် တန်ဖိုးမြှင့်ထုတ်ကုန်ဖြစ်၍ ပြည်တွင်းသာမက ပြည်ပဈေးကွက်များသို့လည်း တင်ပို့နိုင်ရန် အားထုတ်ဖို့းလိုကြောင်း၊ ထုပ်ပိုးမှု ကအစ သက်ဆိုင်ရာဌာနများမှလည်း ကူညီဆောင်ရွက်ပေးနေပါကြောင်း၊ ဓနိဖူးခြောက်မှ အလှကုန်ပစ္စည်းများ ထုတ်လုပ်နေသည့်အပြင် စားသောက်ကုန်များကိုလည်း ထုတ်လုပ်သွားမည်ကို ကြားသိရပါကြောင်း၊ ဓနိဖူးခြောက်(ရေနွေးကြမ်း)ရေကို သောက်သုံးခြင်းဖြင့် သွေးတိုး၊ ဆီချို ဖြစ်နေသူများအား ဆက်လက်မဖြစ်စေရန် ထိန်းထားပေးနိုင်ပါကြောင်း၊ ထို့ပြင် ကြက်သွန်ဖြူ၊ ရဲယို၊ သစ်သီးနှင့်  ဂျင်စင်းတို့ထက် လူ၌လိုအပ်သော ဗီတာမင်နှင့် ရောဂါခုခံကာကွယ်မှု အာနိသင်များ ပါဝင်ပြီး ဘေးထွက်ဆိုကျိုးမရှိကြောင်း၊ ဓါတ်ခွဲစမ်းသပ်မှုအရ ကြားသိရပါကြောင်း၊ စားသုံးသူစိတ်ကျေနပ်မှုရှိစေရေး၊ ပတ်ဝန်းကျင်သန့်ရှင်းစေရေး၊ ဈေးနှုန်းဈေးကွက်အခြေအနေနှင့် ထုတ်ကုန်လုံခြုံစိတ်ချရမှုရှိစေရေးတို့ကို ဟောပြောဆွေးနွေးပါသည်။

          ထိုနောက် ခရိုင်အသေးစားစက်မှုလက်မှုလုပ်ငန်းဦးစီးဌာနမှ ခရိုင်ဦးစီးမှူးက လုပ်ငန်းမှတ်တင်ဆိုင်ရာများအသက်မွေးဝမ်းကျောင်းပညာများ လေ့ကျင့်သင်ကြားပေးခြင်းဆိုင်ရာများ၊ထုတ်ကုန်များဓါတ်ခွဲစမ်းသပ်မှုဆိုင်ရာများအား အသိပညာပေးဟောပြောဆွေးနွေးပါသည်။

          အဆိုပါဟောပြောပွဲသို့ဓနိဖူးခြောက်လုပ်ငန်းရှင်များနှင့် အလုပ်သမား(၁၃)ဦးခန့် တက်ရောက်ပြီး တက်ရောက်လာသူများအား စားသုံးသူကာကွယ်ရေးဥပဒေစာအုပ်များနှင့် လက်ကမ်းစာစောင်များ ဖြန့်ဝေပေးခဲ့ကြောင်း းသတင်းရရှိပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ ရှမ်းပြည်နယ်(မြောက်ပိုင်း)၊ ဒုတိယပြည်နယ်ဦးစီးမှူးရုံးမှ ဝန်ထမ်းများ၊ ကျောက်မဲ ခရိုင်ဦးစီးမှူးရုံး၊ မူဆယ်ခရိုင်ဦးစီးမှူးရုံးတို့မှဝန်ထမ်းများသည် ကမ္ဘာ့စားသုံးသူအခွင့်အရေးများနေ့ အခမ်းအနား အထိမ်းအမှတ်(World Consumer Right Day)လှုပ်ရှားမှုအနေဖြင့် ၁၅.၃.၂၀၂၂ရက်နေ့ နံနက်(၁၀)နာရီ အချိန်တွင် ဈေးများအတွင်းရှိ လမ်းသွားလမ်းလာ ဈေးဝယ်ပြည်သူများ၊ ကားဂိတ်များရှိခရီးသွားပြည်သူများနှင့် စတိုးဆိုင် ဈေးဝယ်ပြည်သူများနှင့် အခြားလမ်းသွားလမ်းလာ ပြည်သူများအား မတ်လ ၁၅ ရက်နေ့ သည် ကမ္ဘာ့စားသုံးသူအခွင့်အရေးများနေ့ဖြစ်ကြောင်းနှင့် မိမိတို့၏ အခွင့်အရေးများ၊ စားသုံးသူများအနေဖြင့် မိမိတို့၏ လိုအပ်သည့်ကုန်စည်နှင့် ဝန်ဆောင်မှုများက်ု ဝယ်ယူသုံးစွဲရာတွင် နစ်နာဆုံးရှုံးမှုများရှိပြီး အခွင့်အရေးများ ချိုးဖောက်ခံရပါက လားရှိုးမြို့၊ ဒုတိယပြည်နယ်ဦးစီးမှုးရုံး၊ စားသုံးသူရေးရာဦးစီးဌာနရှိ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ(CICC)တွင်လည်းကောင်း၊ စားသုံးသူရေးရာဦးစီးဌာန၏ website ဖြစ်သော www.doca.gov.mm တွင် လည်းကောင်း၊ ဌာန၏ Facebook Page တွင်လည်းကောင်း သွားရောက်တိုင်ကြားနိုင်ကြောင်း အသိပညာပေးဆွေးနွေးပြီး လက်ကမ်းစာစောင်များနှင့် ပို့စကဒ်များကို လိုက်လံဖြန့်ဝေခဲ့ကြောင်းသိရှိရပါသည်။

            ၎င်းနောက် ဈေးတွင်းရှိ ဈေးသည်များနှင့် စီးပွားရေးလုပ်ငန်းရှင်များကိုလည်း စီးပွားရေးလုပ်ငန်းရှင်များ လိုက်နာရမည့်အချက်အလက်နှင့် ကုန်စည်များတွင်လည်း ကုန်အညွှန်းအမှတ်သားများပြည့်စုံစွာထည့်သွင်းရန်လည်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ရှမ်း)

               ကမ္ဘာ့စားသုံးသူများအခွင့်အရေးများနေ့ကို ဂုဏ်ပြုသောအားဖြင့် Consumer Call Center ဖွင့်လှစ်ခြင်းအထိမ်းအမှတ်အဖြစ် ၁၅.၃.၂၀၂၂ ရက်နေ့ နံနက် ၁၀:၃၀ နာရီတွင် စားသုံးသူရေးရာဦးစီးဌာန၊ မွန်ပြည်နယ်၌ “Consumer Call Center” မီဒီယာကမ်ပိန်း ပြုလုပ်ခဲ့ကြောင်း သိရှိရသည်။

             ထိုသို့ ကမ်ပိန်းပြုလုပ်ရာတွင် စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ် ဦးစီးမှူးရုံးမှ ဝန်ထမ်းများသည် ပြည်နယ်ဦးစီးမှူးရုံးရှေ့၌ ပြည်သူများအား Consumer Call Center နှင့်ပတ်သက်သော သိကောင်းစရာများပါရှိသည့် လက်ကမ်းစာစောင်များ၊ ၂၀၂၂ ခုနှစ် ကမ္ဘာ့စားသုံးသူများအခွင့်အရေးများနေ့အထိမ်းအမှတ်ဆောင်ပုဒ်ဖြစ်သော “ညီညွတ်မျှတ ဒီဂျစ်တယ်ငွေကြေးကဏ္ဍ” ဖော်ပြပါရှိသော ပို့စကဒ်များအား ဖြန့်ဝေပေးခြင်း၊ Consumer Call Center နှင့်ပတ်သက်သော သတင်းအချက်အလက်များအား ဌာန၏ Facebook စာမျက်နှာပေါ်တွင် ဖော်ပြပေးခြင်းများပြုလုပ်ခဲ့ကြောင်း သိရှိရပါသည်။

DOCA(မွန်)

          ပဲခူးတိုင်းဒေသကြီး၊  သာယာဝတီခရိုင်၊  လက်ပံတန်းမြို့နယ်၌ ခရိုင်ဦးစီးမှူး ဦးအောင်သိန်း၊ ဒု-ခရိုင်ဦးစီးမှူး ဦးသန်းစိုး၊ မြို့နယ်တာဝန်ခံ ဦးချစ်ကိုကို၊ စားသုံး/ထုတ်လုံတာဝန်ခံ ဒေါ်ခိုင်ခိုင်ရီ တို့သည် (၉.၃.၂၀၂၂) ရက်နေ့တွင် ပဲမျိုးစုံရောင်းဝယ်တင်ပို့ရောင်းချသူ ပွဲရုံပိုင်ရှင်များနှင့် တွေ့ဆုံ၍ အရည်အသွေးမီ ကုန်ပစ္စည်းများ ရောင်းချရေးနှင့် စားသုံးသူကာကွယ်ရေး ဉပဒေ အခန်း (၁၀) ပါ စီးပွားရေးလုပ်ငန်းရှင်၏ တာဝန်များ၊ အခန်း(၁၁) ပါ ကုန်စည်နှင့်စပ်လျဉ်း၍ အာမခံချက်ပေးခြင်း၊ အခန်း (၂၄) ပါ ပြစ်မှု၊ ပြစ်ဒဏ်များကို အကျယ်တဝင့် အသိပညာပေး ရှင်းလင်းဆွေးနွေးပြီး စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

            ထုတ်ကုန်များလုံခြုံစိတ်ချရမှုရှိစေရန်နှင့် စားသုံးသူများကုန်စည်ကို ဘေးအန္တရာယ်ကင်းရှင်းစွာ အသုံးပြုနိုင်ရန်ရည်ရွယ်၍ စားသုံးသူရေးရာဦးစီးဌာန၊ ကချင်ပြည်နယ်၊  မိုးညှင်းခရိုင်ဦးစီးမှူးရုံးမှ ဦးကျော်မိုးလွင်(ဌာနခွဲစာရေး)နှင့်ဝန်ထမ်းများသည် ၁၄.၃.၂၀၂၂ရက်နေ့တွင် မိုးညှင်းမြို့နယ်၊ နန်းမားမြို့၊ မြို့မရန်အောင်ရပ်ကွက်ရှိမရွေးမုန့်ထုတ်လုပ်သည့် လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသား ပြည့်စုံစွာဖော်ပြနိုင်ရေးအတွက် ဆွေးနွေးခဲ့ပါသည်။

          ထိုသို့ဆွေးနွေးရာတွင် ဦးကျော်မိုးလွင်(ဌာနခွဲစာရေး)က စီးပွားရေးလုပ်ငန်းရှင်များ၏တာဝန်များ၊ ကုန်စည်နှင့်ဝန်ဆောင်မှုစပ်လျဉ်း၍အာမခံချက်ပေးခြင်း၊ ကုန်စည်သို့မဟုတ်ဝန်ဆောင်မှုအပေါ် တာဝန် ရှိမှု၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များ၊ မြန်မာနိုင်ငံစားသုံးသူကာကွယ်ရေးကော်မရှင်မှ ညွှန်ကြားချက်အမှတ်(၂/၂၀၁၉)အရ မရွေးမုန့်သည် ကုန်စည်အုပ်စု(က)တွင်ပါဝင်ပြီး အသင့်စားမုန့် အမျိုးအမျိုးအုပ်စုတွင်ပါဝင်သည့်အတွက် ကုန်စည်၏အမျိုးအမည်၊အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်းဖော်ပြချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေရေးသား ဖော်ပြရမည်ဖြစ်ကြောင်း၊ ကုန်အညွှန်းအမှတ်အသားဖော်ပြရာတွင် ကိုက်ညီမှု ရှိမရှိကို စားသုံးသူ‌ရေးရာဦးစီးဌာနတွင် တင်ပြလျှောက်ထားနိုင်ကြောင်း ရှင်းလင်းဆွေးနွေးခဲ့ပြီး “ကုန်စည်လုံခြုံစိတ်ချ ရမှုအစ၊ ကုန်အညွှန်းအမှတ်အသားက” လက်ကမ်းစာစောင်များဖြန့်ဝေပေးခဲ့ပါသည်။

DOCA(ကချင်)