သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ သာယာဝတီ ခရိုင်ဦးစီးမှူးနှင့် မြို့နယ်တာဝန်ခံတို့သည် (၇.၃.၂၀၂၂)ရက်နေ့တွင် သာယာဝတီမြို့နယ်အတွင်း သတ်မှတ်ဈေးနှုန်းဖြင့် ရောင်းချလျက်ရှိသော ရတနာ စက်သုံးဆီဆိုင်နှင့် သုံးဆယ်မြို့ရှိ ရတနာစက်သုံးဆီဆိုင်များအား သွားရောက်၍ ရရှိထားသည့် ခွဲတမ်းဆီများအား သတ်မှတ်ဈေးနှုန်းဖြင့် ရောင်းချမှု ရှိစေရေး အချိန်အတွယ်နှင့် အရည်အသွေး ပြည့်ဝ မှန်ကန်မှုရှိစေရေးတို့ကို ဈေးကွက်စောင့်ကြည့် စစ်ဆေးခဲ့ပါသည်။

           ထို့သို့ ကွင်းဆင်းစစ်ဆေးခြင်းများဆောင်ရွက်ရာတွင် ဆီဆိုင် လုပ်ငန်းရှင်များအနေဖြင့် မိမိတို့ရောင်းချသော စက်သုံးဆီနှင့် ပတ်သက်သောသတင်းအချက်အလက်များကို ပြည့်စုံ မှန်ကန်စွာဖြင့် စားသုံးသူပြည်သူများထံသို့  သတင်းဖြန့်ဝေဆောင်ရွက်သွားရန်၊ သတ်မှတ် အရည်အသွေး မပြည့်မီသော ကုန်စည်များအား အမျိုးအစားတူကုန်စည်များနှင့် ရောနှော ရောင်းချခြင်း မပြုလုပ်ကြရန်၊ မိမိတို့ရောင်းချမည့် ကုန်စည်အား အထူးဈေးနှုန်းဖြင့် သတ်မှတ် အရေအတွက်အတိုင်း ရောင်းချမည်ဆိုပါက သတ်မှတ်ချက်များ၊ ကျင့်ဝတ်စည်းကမ်းများ နှင့်အညီ ရာင်းချရန်နှင့် အချိန်အတွယ်မှန်ကန်မှုရှိစေရေး အသိပညာပေး ပြောကြား စိစစ် ဆောင်ရွက် ခဲ့ကြောင်းသိရှိရပါသည်။

 စားသုံးသူရေးရာဦးစီးဌာန(ပဲခူးတိုင်းဒေသကြီး)        

        စားသုံးသူရေးရာဦးစီးဌာန မှ စားသုံးသူများ လုံခြုံစိတ်ချရမှုရှိစေရန်ဟူသော မျှော်မှန်းချက်နှင့်အညီ  စားသုံးသူများ၏ ပုဂ္ဂိုလ်ရေးဆိုင်ရာ အချက်အလက်များအား လုံခြုံစိတ်ချရစေရန်နှင့် စားသုံးသူအကျိုးစီးပွားကာကွယ်ရန်အတွက် ရုပ်ပိုင်းဆိုင်ရာ၊ စိတ်ပိုင်းဆိုင်ရာနှင့် ငွေကြေးပိုင်းဆိုင်ရာများတွင် ထိခိုက်နစ်နာမှုများ မဖြစ်ပေါ်စေရန် ရည်ရွယ်၍  မတ်လ(၁၁)ရက်နေ့၊ နံနက်(၁၀:၃၀) အချိန်တွင် စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ တိုင်း/ခရိုင် ဦးစီးမှူး၏ လမ်းညွှန်ချက်ဖြင့် ဒုတိယခရိုင်ဦးစီးမှူး ဒေါ်မွန်မွန်စိုး ဦးဆောင်၍ ပခုက္ကူမြို့နယ် တာဝန်ခံ ဦးဇော်မင်းဦး၊  စားသုံးတာဝန်ခံ ဒေါ်နွယ်နွယ်အေးတို့ပါဝင်သောအဖွဲ့သည် ၂၀၂၂ခုနှစ် မတ်လ (၁၅)ရက်နေ့တွင်ကျရောက်သည့် ကမ္ဘာ့စားသုံးသူအခွင့်အရေးများနေ့ကို ကြိုဆိုဂုဏ်ပြုသောအားဖြင့် ပခုက္ကူမြို့ပေါ်ရှိ ငွေကြေးဝန်ဆောင်မှုလုပ်ငန်းများ ဆောင်ရွက်နေသောဆိုင်များသို့ သွားရောက်၍ အသိပညာပေးဆွေးနွေးခဲ့ပါသည်။

          ဒုတိယခရိုင်ဦးစီးမှူးမှ အသိပညာပေးဆွေးနွေးရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ မြန်မာနိုင်ငံတွင် ၂၀၁၅ခုနှစ်မှစ၍ "ကမ္ဘာ့စားသုံးသူ အခွင့်အရေးများနေ့"အား နှစ်စဉ်ကျင်းပလျက်ရှိရာ ၂၀၂၂ ခုနှစ်အတွက် အပြည်ပြည်ဆိုင်ရာ စားသုံးသူများအဖွဲ့က "ကမ္ဘာ့စားသုံးသူအခွင့်အရေးများနေ့" ဆောင်ပုဒ်အဖြစ် "ညီညွတ်မျှတ ဒစ်ဂျစ်တယ်ငွေကြေးကဏ္ဍ"ဟု သတ်မှတ်ထုတ်ပြန်ထားသည်နှင့်အညီ ဒီဂျစ်တယ်ငွေကြေးဝန်ဆောင်မှုနှင့်စပ်လျဉ်းသည့် အချက်အလက်များမှာ (က) စားသုံးသူများ၏ဘဏ်အကောင့် အချက်အလက်များ Debit / Credit Card၊ ဘဏ်ကဒ်နံပါတ်များနှင့် ဒီဂျစ်တယ်ငွေလွှဲဝန်ဆောင်မှုလုပ်ငန်း များ၏ ငွေလွှဲအချက်အလက်များဖြစ်သော လုပ်ငန်းစဉ်နံပါတ်၊ လျှို့ဝှက်နံပါတ်၊ OTP နှင့် PIN တို့ကို မည်သူတစ်ဦးတစ်ယောက်ကိုမှ မျှဝေခြင်းမပြုရန် (ခ)စားသုံးသူများအနေဖြင့် ငွေလွှဲသည့်အခါ လျှို့ဝှက်နံပါတ်(၆)လုံးကို ခန့်မှန်းရလွယ်ကူသည့်နံပါတ်များ အသုံးမပြုစေရေး တိုက်တွန်းပြောဆိုရန် (ဂ) လုပ်ငန်းစဉ်နံပါတ်၊ လျှို့ဝှက်နံပါတ် OTP နှင့် PIN တို့ကို လိမ်လည်သူများက အသုံးချနိုင်သည့်အတွက် လူမှုကွန်ယက်များပေါ်တွင် အသိပေးတင်ပြခြင်းမပြုရန် (ဃ)Digital စနစ်ဖြင့် အသုံးပြုသောဘဏ်လုပ်ငန်းနှင့် ငွေလွှဲဝန်ဆောင်မှုလုပ်ငန်းတို့၏  Call Centerနှင့် အပြာရောင်အမှန်ခြစ် Blue Mark ရရှိထားသည့် Facebook Page တို့တွင်သာ မိမိသိရှိလိုသည့် အကြောင်းအရာများကို မေးမြန်းရန် (င)ဘဏ်လုပ်ငန်း(သို့) ငွေလွှဲဝန်ဆောင်မှုလုပ်ငန်းတို့၏ ဝန်ထမ်းအဖြစ် ဟန်ဆောင်၍ အခြားဖုန်းနံပါတ်များဖြင့်ခေါ်ဆိုလာပါက ကိုယ်ရေးအချက်အလက်များ၊ ငွေလွှဲအချက်အလက်များကို အသိပေးပြောကြားခြင်းမပြုရန်စသည့်အချက်များအား အသေးစိတ်ဆွေးနွေးခဲ့ပါသည်။     

            ဆက်လက်၍ စားသုံးသူရေးရာဌာနခွဲတာဝန်ခံမှ ဆွေးနွေးရာတွင် စားသုံးသူကာကွယ်ရေးဥပဒေ ၂၀၁၉ပါ စားသုံးသူအခွင့်အရေးနှင့်တာဝန်များ၊ငွေကြေးဝန်ဆောင်မှုလုပ်ငန်းလုပ်ကိုင်သည့် လုပ်ငန်းရှင်များမှလည်း မိမိတို့ဆိုင်သို့ စားသုံးသူများမှ လာရောက်ငွေကြေးဝန်ဆောင်မှုရယူသည့်အခါ မိမိတို့ ဆွေးနွေးခဲ့သည့်အကြောင်းအရာများအား ပြန်လည်မျှဝေပေးမှသာ စားသုံးသူများအနေဖြင့် နစ်နာဆုံးရှုံးမှုများ လျော့ပါးနိုင်မည်ဖြစ်ကြောင်း၊ ပြည်သူများစိတ်ကျေနပ်မှုရရှိ၍ စားသုံးသူကာကွယ်ရေး လုပ်ငန်းများအောင်မြင်စေရန်အတွက် မိမိတို့ဌာနဆိုင်ရာဝန်ထမ်းများ၊ စီးပွားရေးလုပ်ငန်းရှင်များ၊ စားသုံးသူများဝိုင်းဝန်းပူးပေါင်း ဆောင်ရွက်မှသာရရှိနိုင်မည်ဖြစ်ကြောင်း အသိပညာပေးဆွေးနွေး ခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များအား ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

          “ကမ္ဘာ့စားသုံးသူအခွင့်အရေးများနေ့”  အခမ်းအနားကို   ၁၅-၃-၂၀၂၂  ရက်နေ့ နံနက် ( ၉ : ၃၀ )နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံး၌ ကျင်းပခဲ့ရာ  ပြည်နယ်ဦးစီးမှူး ဦးသန်းဦးက ဝန်ထမ်းများအားလုံးကို “ကမ္ဘာ့စားသုံးသူအခွင့်အရေးများနေ့”  (World  Consumer Rights Day) ၊ ၂၀၂၂ ခုနှစ် ဆောင်ပုဒ်အဖြစ် ညီညွှတ်မျှတဒီဂျစ်တယ်ငွေကြေးကဏ္ဍ( Fair Digital Finance)ဖြစ်ကြောင်း၊ စားသုံးသူအခွင့်အရေးနေ့ သမိုင်းကြောင်းဆိုင်ရာ သိကောင်းစရာများ အကြောင်းရှင်းလင်းပြောကြားခဲ့ပြီး ဝန်ထမ်းများစွမ်းဆောင်ရည်မြှင့်တင်စေရန်အတွက် စားသုံးသူအခွင့်အရေးများနှင့် ထုတ်ကုန်လုံခြုံစိတ်ချရမှုရှိစေရေး ရှင်းလင်းပြောကြားခဲ့ပါသည်။

          ထို့နောက် ပြည်နယ်ဦးစီးမှူး၊ ဦးသန်းဦးက ဦးဆောင်သည့် ဝန်ထမ်းများသည် မတ်လ(၁၅)ရက်နေ့ ကမ္ဘာ့စားသုံးသူအခွင့်အရေးများနေ့ အထိမ်းအမှတ်အဖြစ် ပို့စကတ်များနှင့် လက်ကမ်းစာစောင်များကို   အစိုးရအဖွဲ့ဝင်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ မိတ်ဖက်ဌာနဆိုင်ရာများ၊ အသင်းအဖွဲ့ဝင်များနှင့် စားသုံးသူပြည်သူများအား ကျယ်ကျယ်ပြန့်ပြန့်သိရှိနိုင်ရန်အတွက် ပို့စကတ်များနှင့် လက်ကမ်းစာများဖြန့်ဝေခဲ့ပြီး ပြည်သူများအနေဖြင့် စားသုံးသူရေးရာကိစ္စရပ်များ လုပ်ငန်းရှင်များအနေဖြင့် ကုန်အညွှန်းအမှတ်အသားဆိုင်ရာကိစ္စရပ်များနှင့် ပတ်သတ်၍ အသိပညာ ဗဟုသုတများ၊ အခွင့်အရေးများနှင့် လိုအပ်သော အချက်အလက်များကို သိရှိလေ့လာနိုင်ရန် Consumer Call Center နံပါတ် 1535 သို့ သိလိုသည်များကို စုံစမ်းမေးမြန်းနိုင်ကြောင်းပြောကြားခဲ့ပြီး၊ ဆက်လက်၍ ကုန်စည်နှင့် ဝန်ဆောင်မှုကို ဝယ်ယူသုံးစွဲခြင်းကြောင့် နစ်နာမှုဆုံးရှံးမှုရှိလျှင် စားသုံးသူရေးရာဦးစီးဌာန၊ ကရင်ပြည်နယ် CICC ရုံးတွင်လည်းကောင်း၊ စားသုံးသူရေးရာဦးစီးဌာန၏ website  www.doca.gov.mm တွင်လည်းကောင်း တိုင်ကြားနိုင်ကြောင်းနှင့် နှောင်လာမည့်နှစ်ပေါင်းများစွာတိုင် “ကမ္ဘာ့စားသုံးသူ အခွင့်အရေးများနေ့” ကို ကြိုဆိုဂုဏ်ပြုပါကြောင်း ပြောကြားခဲ့ပြီး ၂၀၂၂ ခုနှစ်၊ မတ်လ (၁၅) ရက်နေ့ “ကမ္ဘာ့စားသုံးသူ အခွင့်အရေးများနေ့”    အခမ်းအနားကို အောင်မြင်စွာကျင်းပြုလုပ်ခဲ့ကြောင်း သတင်းရရှိပါသည်။

DOCA(ကရင်)

           အမေရိကန်သမ္မတ John F Kennedy က ၁၉၆၂ ခုနှစ် မတ်လ(၁၅)ရက်နေ့တွင် စားသုံးသူများကို အကာအကွယ်ပေးနိုင်မည့် အခွင့်အရေးတစ်ခုကို ကွန်ဂရက်တွင် ကြေငြာခဲ့ပါသည်။ ၁၉၈၅ ခုနှစ် ဧပြီလ(၉)ရက်နေ့တွင် ကျင်းပသော Consumer Conference တွင် စားသုံးသူအခွင့်အရေး (၈) ရပ် ပြဌာန်းရန် သဘောတူညီမှုရရှိခဲ့ပြီး မတ်လ(၁၅)ရက်နေ့ကို ကမ္ဘာ့စားသုံးသူအခွင့်အရေးများနေ့အဖြစ် သတ်မှတ်ကာ နှစ်စဉ်အထိမ်းအမှတ်ဆောင်ပုဒ်များဖော်ဆောင်ပြီး ကမ္ဘာ့နိုင်ငံအသီးသီးတွင် ထိုနေ့ကျရောက်တိုင်း ကမ္ဘာ့စားသုံးသူအခွင့်အရေးများနေ့ အခမ်းအနားများကို စည်ကားသိုက်မြိုက်စွာ ကျင်းပလာကြသည်မှာ ယနေ့ထိပင်ဖြစ်ပါသည်။

          ၂၀၂၂ ခုနှစ် ကမ္ဘာ့စားသုံးသူအခွင့်အရေးများနေ့အထိမ်းအမှတ်ဆောင်ပုဒ်မှာ “Fair Digital Finance” (ညီညွတ်မျှတ ဒီဂျစ်တယ်ငွေကြေးကဏ္ဍ) ဖြစ်ပါသည်။ မြန်မာနိုင်ငံတွင်လည်း ၂၀၁၆ ခုနှစ် ကပင်စတင်၍ ကမ္ဘာ့စားသုံးသူအခွင့်အရေးများနေ့အခမ်းအနားနှင့် Media Campaign များကျင်းပပြုလုပ်လာခဲ့ပြီး တိုင်းဒေသကြီးနှင့်ပြည်နယ်အသီးသီးတွင်လည်း စားသုံးသူအရေးလှုပ်ရှားမှုများပြုလုပ်လာကြပါသည်။

        ၂၀၂၂ ခုနှစ် မတ်လ(၁၅)ရက်နေ့တွင်  ကျရောက်သည့် ကမ္ဘာ့စားသုံးသူအခွင့်အရေးများနေ့ကို ဂုဏ်ပြုသောအားဖြင့် ရခိုင်ပြည်နယ် စားသုံးသူရေးရာဦးစီးဌာန  ပြည်နယ်ဦးစီးမှူး၏ လမ်းညွှန်ချက်အရ ဒုပြည်နယ်ဦးစီးမှူးဦးဆောင်၍ ရခိုင်ပြည်နယ်ဦးစီးမှူးရုံးနှင့် စစ်တွေခရိုင်ဦးစီးမှူးရုံးမှ ဝန်ထမ်းများပါဝင်သောအဖွဲ့သည် မတ်လ(၁၅) ရက်နေ့  နံနက် (၈:၀၀) နာရီအချိန်တွင် စစ်တွေမြို့  မြို့မစျေး၊ မင်းဂံစျေး၊ မကျည်းမြိုင်စျေးများနှင့် မြို့ပေါ်ရပ်ကွက်များရှိ ကုန်စုံဆိုင်များ၊ ဆေးဆိုင်များသို့သွားရောက်ပြီး စားသုံးသူအခွင့်အရေးနှင့် တာဝန်များ၊ စားသုံးသူနစ်နာဆုံးရှုံးမှုများနှင့်စပ်လျဉ်း၍ တိုင်ကြားနိုင်သည့်နည်းလမ်းများ၊ စီးပွားရေးလုပ်ငန်းရှင်များ လိုက်နာဆောင်ရွက်ရမည့်တာဝန်များ၊ တားမြစ်ချက်များ၊ ကုန်စည်များတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာဆောင်ရွက်ရမည့်အချက်များအားသိရှိစေရန် လက်ကမ်းစာစောင်များဖြန့်ဝေပြီး ကမ္ဘာ့စားသုံးသူအခွင့်အရေးများနေ့ လှုပ်ရှားဆောင်ရွက်မှုများပြုလုပ်ခဲ့ကြောင်း သတင်းရရှိပါသည်။

DOCA(ရခိုင်)

          ရှမ်းပြည်နယ်၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဒေါ်လင်းမျိုးသာ (လက်ထောက်ညွှန်ကြားရေးမှူး)နှင့် တာဝန်ရှိသူများ၊ မြို့နယ်အထွေထွေအုပ်ချုပ်ရေးဦးစီးဌာ၊ ခရိုင်ရဲတပ်ဖွဲ့၊ ခရိုင်ကျန်းမာရေးဦးစီးဌာန၊ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနနှင့် မြို့နယ်စည်ပင်ပူးပေါင်းအဖွဲ့များဖြင့် ၂၀၂၂ ခုနှစ် မတ်လ ၁၄ ရက်နေ့ နံနက် (၀၉:၃၀) မှ (၁၁:၀၀)နာရီ အချိန်ထိ ကျိုင်းတုံမြို့ မြို့မဈေးအတွင်းရှိ ဆေးနှင့်ဆက်စပ်ပစ္စည်းအရောင်းဆိုင်များနှင့် အလှကုန်ပစ္စည်း အရောင်းဆိုင်များအား ဈေးကွက်အတွင်း ကွင်းဆင်းစောင့်ကြည့်စစ်ဆေးခြင်း ဆောင်ရွက်ခဲ့ပါသည်။

       ကျိုင်းတုံမြို့ မြို့မဈေးအတွင်းရှိ ဆေးနှင့်ဆက်စပ်ပစ္စည်းအရောင်းဆိုင်ပေါင်း ( ၉ ) ဆိုင်နှင့် အလှကုန်ပစ္စည်းအရောင်းဆိုင်ပေါင်း (၆) ဆိုင်အား ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသည့် စားသုံးသူပြည်သူများ ဘေးအန္တရာယ်ရှိစေနိုင်သည့် မှတ်ပုံတင်ထားခြင်းမရှိသော ဆေးဝါး များနှင့် အလှကုန်ပစ္စည်းများအား ရောင်းချခြင်း ရှိ/မရှိ ပူးပေါင်းအဖွဲ့ဖြင့် ဈေးကွက်စောင့်ကြည့် စစ်ဆေးခဲ့ရာ ရောင်းချခြင်းမရှိကြောင်း စစ်ဆေးတွေ့ရှိရပါသည်။

        လုပ်ငန်းရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ ၂၀၁၉ ခုနှစ် ဥပဒေတွင် ပါရှိသည့် ပြစ်မှု၊ ပြစ်ဒဏ်များနှင့်ပတ်သက်၍ တားမြစ်ကန့်သတ်ထားသည့် ဆေးဝါးများနှင့် အလှကုန်ပစ္စည်းများ ရောင်းချကြောင်း စစ်ဆေးတွေ့ရှိပါက ခြောက်လထက်မပိုသော ထောင်ဒဏ်ဖြစ်စေ၊ ကျပ်သိန်း ၂၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးကိုဖြစ်စေ၊ ထပ်မံကျူးလွန်ကြောင်း ပြစ်မှုထင်ရှားလျှင် တစ်နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း ၁၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးကိုဖြစ်စေ အစရှိသည့် ပြစ်မှုနှင့်ပြစ်ဒဏ်များအပါအဝင် စီးပွားရေးလုပ်ငန်းရှင်များ သိရှိလိုက်နာဆောင်ရွက်သွားနိုင်စေရန် အသိပညာပေးခြင်း ဈေးကွက်စောင့် ကြည့်စစ်ဆေးခြင်းများ ဆောင်ရွက်ခဲ့ပါသည်။

DOCA(ရှမ်း)