သတင်းနှင့် လှုပ်ရှားမှုများ

           စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ စစ်ဆေးရေးမှူး ဦးကျော်မိုးလွင်နှင့် ဝန်ထမ်းများသည် (၄.၃.၂၀၂၂) ရက်နေ့တွင် မိုးညှင်းမြို့နယ်၊ ဟဲလုံကျေးရွာရှိ စပါး၊ ဆန်ကြိတ်ခွဲ ထုတ်လုပ်သော ဆန်စက်လုပ်ငန်းရှင် ဦးအောင်သန်းနှင့်တွေ့ဆုံ၍ စားသုံးသူအခွင့်အရေး အပြည့်အဝရ ရှိစေရန်နှင့် ထုတ်ကုန်များလုံခြုံစိတ်ချရမှုရှိစေရေးအတွက် ကုန်စည်များတွင် ကုန်အညွှန်းအမှတ်အသား ပြည့်စုံမှန်ကန်စွာ ဖော်ပြနိုင်ရေး အသိပညာပေးဆွေးနွေးခဲ့ပါသည်။

         ထိုသို့ဆွေးနွေးရာတွင် စစ်ဆေးရေးမှူး ဦးကျော်မိုးလွင်က ၂၀၁၉ ခုနှစ် စားသုံးသူကာကွယ်ရေး ဥပဒေကိုပြဌာန်းထားပြီး စားသုံးသူများအခွင့်အရေးနှင့် အကျိုးစီးပွားကာကွယ်စောင့်ရှောက်ရန်၊ ထုတ်ကုန်များလုံခြုံစိတ်ချရမှုရှိစေရေးဆောင်ရွက်ရန်၊ ကုန်စည်နှင့်ဝန်ဆောင်မှုများ၏ အရည်အသွေး စီမံခန့်ခွဲမှုနှင့်သုတေသနဖွံဖြိုးရေးဆောင်ရွက်ရန် ရည်မှန်းချက်များချမှတ်ဆောင်ရွက်လျက်ရှိကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာများကို စီးပွားရေးလုပ်ငန်းရှင်အနေဖြင့် မဖြစ်မနေလိုက်နာဆောင်ရွက်သွားရမည်ဖြစ်ကြောင်း၊ ကုန်စည်များတွင် ဖော်ပြရမည့် အသေးစိတ်အချက်အလက်များကို မြန်မာနိုင်ငံစားသုံးသူကာကွယ်ရေးကော်မရှင်မှ ညွှန်ကြားချက်အမှတ်(၂/၂၀၁၉)ဖြင့် ထုတ်ပြန်ထားပြီးဖြစ်ကြောင်းနှင့် ဆန်စက်လုပ်ငန်းရှင်များအနေဖြင့် ထုတ်လုပ်သည့် ဆန်၊ ဆန်ကွဲအမျိုးအစားသည် အစားအသောက်အုပ်စုဝင်အခြားပြုပြင်၊ ထုတ်ပိုးထုတ်လုပ်ထားသော စားသောက်ကုန်အမျိုးမျိုးတွင်ပါဝင်သောကြောင့် ကုန်စည်များတွင် အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မြန်မာဘာသာဖြင့်ဖြစ်စေ၊မြန်မာဘာသာနှင့်အခြားဘာသာတစ်ခု သို့မဟုတ်တစ်ခုထက်ပို၍တွဲလျက်ဖြစ်စေ သိသာထင်ရှားစွာဖော်ပြရမည်ဖြစ်ကြောင်း၊ ကုန်အညွှန်းအမှတ်အသားဖော်ပြရာတွင် ကိုက်ညီမှု ရှိ/မရှိအား စားသုံးသူရေးရာဦးစီးဌာနသို့ တင်ပြလျှောက်ထားနိုင်ကြောင်း ရှင်းလင်းဆွေးနွေးခဲ့ပါသည်။

DOCA(ကချင်)

             စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ တိုင်း/ခရိုင်ဦးစီးမှူး၏ လမ်းညွှန်ချက်ဖြင့် ခရိုင်ဦးစီးမှူးရုံး အစည်းအဝေးခန်းမတွင် ဒု-ခရိုင်ဦးစီးမှူး ဒေါ်မွန်မွန်စိုးနှင့် စားသုံးတာဝန်ခံဒေါ်နွယ်နွယ်အေးတို့သည် (၂၅.၂.၂၀၂၂)ရက်နေ့၊ နံနက်(၁၀:၃၀)အချိန်၌ ပခုက္ကူမြို့ပေါ်ရှိ ကုန်အမှတ်တံဆိပ် စိစစ်ခွင့်ပြုချက်ရရှိသော ရေသန့်လုပ်ငန်းရှင်များအား အသိပညာပေးဆွေးနွေးခဲ့ပါသည်။

            ဒု-ခရိုင်ဦးစီးမှူးမှ သောက်ရေသန့်လုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များ အကြောင်းသိရှိလိုက်နာစေရန် အသေးစိတ်ရှင်းလင်းဆွေးနွေးခဲ့ပြီး ကုန်အမှတ်တံဆိပ်များအား ဈေးကွက်အတွင်းဖြန့်ဖြူးရောင်းချရာတွင် စိစစ်ခွင့်ပြုချက်ရရှိထားသည့်အတိုင်း ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြ ရောင်းချရမည်ဖြစ်ကြောင်း၊ စစ်ဆေးရေးအရာရှိများမှ ဈေးကွက်အတွင်းစောင့်ကြည့်စစ်ဆေးရာတွင် စိစစ်ခွင့်ပြုချက်ရရှိပြီးဖြစ်သော အမှတ်တံဆိပ်များမှာ သတ်မှတ်ချက်များနှင့်အညီ ဖော်ပြထားခြင်းမရှိပါက ကုန်အမှတ်တံဆိပ် စိစစ်ခွင့်ပြုချက်များ ပြန်လည်ရုပ်သိမ်းမည်ဖြစ်ကြောင်း ဆွေးနွေးခဲ့ပါသည်။

             စားသုံးတာဝန်ခံမှ ဆွေးနွေးရာတွင် သောက်ရေသန့်လုပ်ငန်းရှင်များအနေဖြင့် ရရှိထားသော စိစစ်ခွင့်ပြုချက်ကို တန်ဘိုးထားစေချင်ကြောင်း၊ စီးပွားရေးလုပ်ငန်းရှင်များအနေဖြင့် အောင်မြင်မှု၊ ကျော်ကြားမှု၊ နာမည်ကောင်းရရှိမှု ခက်ခဲကြောင်း၊ ရရှိထားသော အောင်မြင်မှုကို ထိန်းသိမ်းရန်မှာ ပို၍ခက်ခဲပါကြောင်း၊ စားသုံးသူကာကွယ်ရေးဥပဒေအရ ကုန်ပစ္စည်းတစ်ခု ဝယ်ယူသုံးစွဲရာတွင် စိတ်ကြိုက်ရွေးချယ်ခွင့်ရှိကြောင်း၊ ရွေးချယ်ရာတွင် အရည်အသွေးကို အလေးထားရွေးချယ် ဝယ်ယူသင့်ကြောင်း၊ ပြည့်စုံမှန်ကန်သည့် သတင်းအချက်အလက်ရရှိမှုသည်လည်း အရေးပါကြောင်း စားဝတ်နေရေးအခြေခံလိုအပ်ချက်များအပေါ် ဘေးအန္တရာယ်ကင်းရှင်းရေးမှာ အရေးကြီးသည့်အပြင် စိတ်ကျေနပ်ခွင့်ရရှိရန်လည်းလိုအပ်ကြောင်း၊ ကုန်စည်ဝန်ဆောင်မှုများ  ရယူအသုံးပြု၍ နစ်နာဆုံးရှုံးမှုများဖြစ်ပေါ်ပါက စားသုံးသူရေးရာဦးစီးဌာနသို့ တင်ပြတိုင်ကြားနိုင်ခွင့်ရှိပြီး ကုန်ပစ္စည်းတစ်ခုဝယ်ယူသုံးစွဲရာတွင် ပြေစာ(သို့)အာမခံကဒ်(သို့)အထောက်အထားများ ပြည့်စုံစွာ ရယူထားမှသာ နစ်နာဆုံးရှုံးမှုများတွင် ပြန်လည်ကုစားခွင့်ရရှိမည်ဖြစ်သောကြောင့် အရေးကြီးပါကြောင်း၊ စားသုံးသူအခွင့်အရေးနှင့် အကျိုးစီးပွားကိုကာကွယ်ခြင်းမှာ မိမိတို့ဌာန၏ ရည်မှန်းချက်ဖြစ်သောကြောင့် ယခုလိုအသိပညာပေးရခြင်းဖြစ်ပါကြောင်း၊ မိမိအခွင့်အရေးကိုသိရှိမှ ရယူနိုင်ပြီး ကောင်းမွန်သောပတ်ဝန်းကျင်တွင် နေထိုင်နိုင်မှာဖြစ်ကြောင်းစသည်ဖြင့် အသေးစိတ် ဆွေးနွေးခဲ့ ပါသည်။

DOCA(မကွေး)

          ရခိုင်ပြည်နယ်၊ သံတွဲမြို့ရှိ ငပလီမြို့ပေါ်ရပ်ကွက်များ၌ ဆေးနှင့်ဆေးဝါးပစ္စည်းများ ရောင်းချသည့် လုပ်ငန်းရှင်များအား ဖိတ်ကြားကာ ဘေးအန္တရာယ်ကင်းရှင်းသော ဆေးနှင့် ဆေးဝါးပစ္စည်းများ ရောင်းချနိုင်ရေးအတွက် သိပညာပေးဟောပြောခြင်းကို (၃-၃-၂၀၂၂) ရက်နေ့တွင် ငပလီမြို့အုပ်ချုပ်ရေးမှူးရုံး၌ ပြုလုပ်ခဲ့ပါသည်။ ဟောပြောပွဲသို့  ရခိုင်ပြည်နယ် သံတွဲခရိုင်၊ စားသုံးသူရေးရာဦးစီးဌာနမှ ဝန်ထမ်းများ၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူများ၊  ငပလီမြို့အုပ်ချုပ်ရေးမှူးရုံးမှ တာဝန်ရှိသူများနှင့် ငပလီမြို့စည်ပင်သာယာရေးအဖွဲ့မှ တာဝန်ရှိသူများ တက်ရောက်ခဲ့ကြပါသည်။

     အခမ်းအနားမစတင်မီ သံတွဲခရိုင် စားသုံးသူရေးရာဦးစီးဌာနက စားသုံးသူကာကွယ်ရေး ဥပဒေပါ  ကောက်နုတ်ချက်လက်ကမ်းစာစောင်များအားလည်းကောင်း၊ ခရိုင်FDAမှ တရားမဝင် အသားတု၊ အသားလုံး၊ အသားပြားများအကြောင်း လက်ကမ်းစာစောင်တို့အား အခမ်းအနား တက်ရောက်လာသူများသို့ ဝေငှပေးပါသည်။

          အခမ်းအနားဖွင့်လှစ်ပြီးနောက် သံတွဲခရိုင် အစားအသောက်နှင့်ဆေးဝါးကွပ်ကဲရေးဦးစီး ဌာနမှ တာဝန်ခံဒေါက်တာရဲမင်းသိန်းက အဖွင့်အမှာစကားပြောကြားပြီး ဆေးဝါး ရောင်းချသူများ လိုက်နာဆောင်ရွက်ရမည့် စည်းကမ်းဥပဒေများအား ရှင်းလင်းပြောကြားခြင်း၊ ခရိုင်အစား အသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူများက တရားဝင်ခွင့်ပြုချက် မရှိဘဲ တင်သွင်းလာသည့် စားသောက်ကုန်များအကြောင်းအား အကျယ်တဝင့် ရှင်းလင်းပြောကြားခြင်း၊ သံတွဲခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး ဦးဝင်းနိုင်က စားသုံးသူကာကွယ်ရေးဉပဒေပါ စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်များ၏ တာဝန်များနှင့် ကုန်စည်များ၌ ဖော်ပြရမည့် ကုန်အညွှန်းအမှတ်အသားများအကြောင်းတို့အား ရှင်းလင်းဟောပြောခဲ့ကြပါသည်။

          ထို့နောက် တက်ရောက်လာသော ဆေးဝါးပစ္စည်းအရောင်းဆိုင်ပိုင်ရှင်များ၏ မေးမြန်းချက် များအား သံတွဲခရိုင် ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနနှင့် သံတွဲခရိုင် စားသုံးသူ ရေးရာဦးစီးဌာနတို့မှ တာဝန်ရှိသူများက ပြန်လည်ရှင်းလင်းဖြေကြားခဲ့ပြီး အခမ်းအနားအား နေ့လယ် (၂:၀၀)နာရီခန့်တွင် အောင်မြင်စွာ ပြီးမြောက်ခဲ့ကြောင်း သိရှိရပါသည်။

DOCA(ရခိုင်)

          မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်၊ စားသုံးသူရေးရာဦးစီးဌာနမှ မြို့နယ်ဦးစီးမှူး ဒေါ်ဌေးဌေးဝင်းသည် (၁.၃.၂၀၂၂)ရက်နေ့ (၁၃:၀၀)နာရီအချိန်၌ ပွင့်ဖြူမြို့နယ်၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာနတို့ပူးပေါင်း၍ စားသုံးသူအသိပညာပေးအစီအစဉ်အရ မိဘပြည်သူများအား စားသောက်ကုန်ပစ္စည်းများ ဝယ်ယူသုံးစွဲရာတွင် ဘေးကင်းလုံခြုံစိတ်ချစေရေး စီးပွားရေးလုပ်ငန်းရှင် များလိုက်နာဆောင်ရွက်ရမည့် အခန်းကဏ္ဍများကိုသိရှိလိုက်နာဆောင်ရွက်နိုင်စေရေးအတွက် ရည်ရွယ်၍ အွန်လိုင်းစနစ်ဖြင့် စားသုံးသူကာကွယ်ရေးအသိပညာပေးဆွေနွေးပွဲ Talk Show အစီအစဉ်အား ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံး လူထုအခြေပြုဗဟိုဌာန Community Centre ခန်းမ တွင်ကျင်းပပြုလုပ်ခဲ့ပါသည်။

          အဆိုပါ Talk Show ဆွေးနွေးပွဲတွင် ပွင့်ဖြူမြို့နယ်ဦးစီးမှူးမှ မြို့နယ်အတွင်းရှိ စားသုံးသူမိဘ ပြည်သူများအနေဖြင့် စားသုံးသူအခွင့်အရေးများ အပြည့်အဝရရှိစေရန်နှင့် အသိပညာဗဟုသုတများ တိုးပွားစေရေးအတွက် စားသုံးသူကာကွယ်ရေးပေါ်ပေါက်လာပုံ၊ စားသုံးသူရေးရာဦးစီးဌာန၏ လုပ်ငန်း အကောင်အထည်ဖော်ဆောင်ရွက်နေမှုများ၊ စားသုံးသူကာကွယ်ရေးဥပဒေပါအခွင့်အရေးနှင့်တာဝန်များ၊ တားမြစ်ချက်များနှင့်ပြစ်မှုပြစ်ဒဏ်များ၊ စားသုံးသူနစ်နာဆုံးရှုံးမှုအတွက် လူကိုယ်တိုင်သော် လည်းကောင်း၊ ဖုန်းဖြင့်သော်လည်းကောင်း တိုင်ကြားနိုင်သည့်နည်းလမ်းများ၊ ဌာနမှတိုင်ကြားလာမှုများ အပေါ်ဖြေရှင်း ဆောင်ရွက်ပေးနေမှုများ၊ စားသောက်ကုန်၊ လူသုံးကုန်၊ အလှကုန်ပစ္စည်းများ ဝယ်ယူသုံးစွဲရာတွင် ဘေးကင်းလုံခြုံမှုရှိစေရေးအတွက် မြန်မာဘာသာဖြင့် ကုန်အညွှန်းအမှတ်အသား ဖော်ပြထားသည့် ပစ္စည်းများကိုသာ ရွေးချယ်ဝယ်ယူသုံးစွဲရန် အသေးစိတ်ရှင်းလင်းဆွေးနွေးခဲ့ပါသည်။

ပွင့်ဖြူမြို့နယ်၊ စားသုံးသူရေးရာဦးစီးဌာန၊ မြို့နယ်ဦးစီးမှူးအနေဖြင့် စားသုံးသူမိဘ/ပြည်သူများ လုံခြုံစိတ်ချမှုရှိစေရေးအတွက် စားသုံးသူကာကွယ်ရေးဆိုင်ရာအသိပညာဗဟုသုတများ၊ သတင်းအချက် အလက်များကို သတင်းမီဒီယာများနှင့်ပူးပေါင်း၍ အွန်လိုင်းမှသော်လည်းကောင်း၊ လူမှုကွန်ယက် စာမျက်နှာမှသော်လည်းကောင်း  စဉ်ဆက်မပြတ်ဖြန့်ဝေခြင်းများဆောင်ရွက်လျှက်ရှိပါသည်။

DOCA(မကွေး)

            ကချင်ပြည်နယ်၊ စားသုံးသူရေးရာဦးစီးဌာနမှ ဗန်းမော်ခရိုင်ဦးစီးမှူး ဦးအောင်ကျော်ဦးနှင့်ဝန်ထမ်းများသည် ၁.၃.၂၀၂၂ ရက်နေ့တွင် စားသုံးသူများလုံခြုံစိတ်ချမှုရှိစေရန်နှင့် စားသုံးသူကာကွယ်ရေးဆိုင်ရာကိစ္စရပ်များ ပိုမိုသိရှိလေ့လာနိုင်ရန်အတွက် ဗန်းမော်မြို့ရှိ အောင်ပြည့်စုံဆန်စက်၊ သုခစံဆန်စက်၊ အောင်ကောင်းဆက်ဆန်စက်၊ ကျော်မေတ္တာဆန်စက်များသို့ သွားရောက်၍ စားသုံးသူကာကွယ်ရေးအသိပညာပေးဟောပြောပွဲကျင်းပခဲ့ရာ ဆန်စက်လုပ်ငန်းရှင် ဝန်ထမ်းများ၊ အလုပ်သမားများ တက်ရောက်ခဲ့ပါသည်။

          အသိပညာပေးဟောပြောပွဲတွင် ခရိုင်ဦးစီးမှူး ဦးအောင်ကျော်ဦးက ၂၀၁၉ခုနှစ်၊ မတ်လ(၁၅) ရက်နေ့တွင် စားသုံးသူကာကွယ်ရေးဥပဒေကို အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ စားသုံးသူကာကွယ်ရေးနည်းဥပဒေကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့် ကြော်ငြာစာအမှတ် ၉/၂၀၂၂ ဖြင့်ပြဌာန်းပြီးဖြစ်ကြောင်း၊ စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်စည်/ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူတောင်းဆိုနိုင်သည့်အခွင့်အရေး၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီသိသာထင်ရှားစွာ ဖော်ပြရမည့်အချက်များ၊ စားသုံးသူနစ်နာဆုံးရှုံးမှုများအတွက် တိုင်ကြားနိုင်သည့်နည်းလမ်းနှင့် တိုင်ကြားမှုများ ဖြေရှင်းဆောင်ရွက်ပေးမှုအခြေအနေကို ရှင်းလင်းဆွေးနွေးခဲ့ပါသည်။

          ဆက်လက်၍ ၂၀၂၂ ခုနှစ်အတွက် ကမ္ဘာ့စားသုံးသူအခွင့်အရေးများနေ့၊ ဆောင်ပုဒ်အဖြစ် “ညီညွှတ်မျှတ၊ ဒီဂျစ်တယ်ငွေကြေး ကဏ္ဍ (Fair Digital Finance)”ဟု သတ်မှတ်ထားသည်နှင့်အညီ စားသုံးသူများအားမျှတမှုရှိသည့် ဒီဂျစ်တယ်ငွေကြေးဝန်ဆောင်မှုများကို ရယူအသုံးပြုနိုင်စေရန်နှင့် စားသုံးသူများပုဂ္ဂိုလ်ရေးဆိုင်ရာ အချက်အလက်များလုံခြုံစိတ်ချရစေရန်အတွက် ဒီဂျစ်တယ်ငွေကြေး ဝန်ဆောင်မှုနှင်စပ်လျဉ်းသည့်အချက်အလက်များကို ရှင်းလင်းဆွေးနွေးခဲ့ပြီး တက်ရောက်လာသူများမှ သိလိုသည်များကို မေးမြန်းခဲ့ရာ ပြန်လည်ရှင်းလင်းဆွေးနွေးခဲ့ပါသည်။

စားသုံးသူရေးရာဦးစီးဌာန                          

ကချင်ပြည်နယ်