သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန၊ ပုသိမ်ခရိုင်အတွင်းမြို့နယ်များတွင် ထုတ်ကုန်လုံခြုံစိတ်ချရမှုရှိစေရေးနှင့် စားသုံးသူကာကွယ်ရေးဥပဒေပါ အကြောင်းအရာများကို စီးပွားရေးလုပ်ငန်းရှင်များအနေဖြင့် သိရှိလိုက်နာဆောင်ရွက်စေရန် ရည်ရွယ်၍ (၃.၆.၂၀၂၂)ရက်နေ့ နံနက်(၁၁:၀၀)နာရီ အချိန်တွင် ကျောင်းကုန်းမြို့နယ်၊ မြို့နယ်တာဝန်ခံသည် ကျောင်းကုန်းမြို့နယ်စည်ပင်နှင့်အတူ မြို့မဈေးအတွင်းရှိ ကုန်မျိုးစုံရောင်းချသော လုပ်ငန်းရှင်များအား ဈေးတာဝန်ခံရုံးတွင် တွေ့ဆုံ၍ အသိပညာပေးခဲ့ကြောင်း သိရှိရပါသည်။ အသိပညာပေးပြောကြားရာတွင် စားသုံးသူရေးရာဥပဒေပါ အခန်း(၁၈)တွင်ပြဌာန်းထားသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များနှင့် စီးပွားရေးလုပ်ငန်းရှင်တို့လိုက်နာရမည့် တာဝန်များ၊ပြစ်မှုပြစ်ဒဏ်တို့၏အကြောင်းများအား အသိပညာပေးပြောကြားခဲ့ကြောင်းသိရှိရပါသည်။ တက်ရောက်လာသော ကုန်မျိုးစုံရောင်းချသော လုပ်ငန်းရှင်များကလည်း သိလိုသည်များကို မေးမြန်းခဲ့ရာ စားသုံးသူရေးရာဦးစီးဌာန၊ ကျောင်းကုန်း မြို့နယ်မြို့နယ်တာဝန်ခံ ဦးတင်ကိုမှ ပြန်လည်ရှင်းလင်းပြောကြားခဲ့ကြောင်းသိရှိရပါသည်။

DOCA(ဧရာဝတီ)

             စားသုံးသူရေးရာဦးစီးဌာန၊ မကွေးခရိုင်ရုံးတွင် (၆.၆.၂၀၂၂)ရက်နေ့ နံနက်(၁၀:၀၀)နာရီမှ (၁၁:၀၀)နာရီထိ ခရိုင်ရုံးရှိ ဝန်ထမ်းသစ်များနှင့် မြို့နယ်တာဝန်ခံ တာဝန်ထမ်းဆောင်မည့်ဝန်ထမ်းများ စွမ်းဆောင်ရည်မြင့်မာရေး၊ ဝမ်းစာပြည့်ဝနေစေရေးနှင့် လူအများရှေ့တွင် ဟောပြောတတ်စေရန် ဝန်ထမ်းများ အလှည့်ကျဟောပြောစေခြင်းကို ခရိုင်ဦးစီးမှူးမှဦးဆောင်၍ လေ့ကျင့်ဆောင်ရွက်ခဲ့ပါသည်။

            မကွေးခရိုင်ဦးစီးမှူး ‌ဒေါ်တင်တင်လှ (လ/ ထ ညွှန်ကြားရေးမှူး)မှ စားသုံးသူရေးရာဦးစီးဌာနသည် “စားသုံးသူများ လုံခြုံစိတ်ချရမှုရှိစေရန်” မျှော်မှန်းချက်ထားပြီး ရည်မှန်းချက်များဖြစ်သည့် (၁) စားသုံးသူ အခွင့်အရေးနှင့်အကျိုးစီးပွားကာကွယ်ရေးဆောင်ရွက်ရန်၊ (၂)ထုတ်ကုန်များလုံခြုံစိတ်ချရမှုရှိစေရေး ဆောင်ရွက်ရန် (၃) ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့် သုတေသနဖွံ့ဖြိုးရေး လုပ်ငန်းများဆောင်ရွက်ရန်၊ (၄) ပြည်တွင်းကုန်သွယ်မှုဖွံ့ဖြိုးရေးနှင့် သုတေသနလုပ်ငန်းများဆောင်ရွက်ရန် လုပ်ငန်းတာဝန်များ ချမှတ်ပြီးအကောင်အထည်ဖော်လုပ်ဆောင်နေကြောင်း၊ စားသုံးသူကာကွယ်‌ရေးဥပဒေ ၂၀၁၉ပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏အခွင့်အရေး တာဝန်နှင့် တားမြစ်ချက်များ၊ ပြစ်မှု၊ ပြစ်ဒဏ်များကို ဝန်ထမ်းအားလုံးသိရှိကျွမ်းကျင်နေအောင် ဆောင်ရွက်ဖို့ လိုအပ်ကြောင်း၊ ထို့ကြောင့် ခရိုင်ဦးစီးမှူးရုံးရှိ ဝန်ထမ်းများကို ဝမ်းစာပြည့်ဝဖို့၊ ဗဟုသုတများရရှိဖို့၊ ဟောပြောပွဲအတွေ့အကြုံများရရှိစေဖို့၊ “ပညာရဲရင့်ပွဲလည်တင့်စေရန်” အပတ်စဉ်အလှည့်ကျ ဟောပြောရမည်ဖြစ်၍  ကိုယ့်အလှည့်မရောက်မှီ ကြိုတင်လေ့လာထားဖို့ လိုအပ်ကြောင်း ပြောကြားခဲ့ပါသည်။

            ဒု-ခရိုင်ဦးစီးမှူး ဦးမျိုးဝင်းမှလည်း ဝန်ထမ်းများအား မိတ်ဆက်စကားပြောကြားပုံ၊ ကိုယ်အမှုအရာ၊ လေယူလေသိမ်း၊ ယူနီဖောင်းဝတ်ဆင်ပုံစနစ်တကျရှိစေရေးတို့အား ရှင်းလင်းပြောကြားခဲ့ပြီး  ၂၀၂၂ ခုနှစ်၊ ဇွန်လ(၆)ရက်နေ့ ပထမအပတ်ဟောပြောရန် အလှည့်ကျသည့် ဦးဟာခေါဂေ (ဒု-ဦးစီးမှူး) ရေနံချောင်း မြို့နယ်တာဝန်ခံမှ စားသုံးသူရေးရာဦးစီးဌာန၏ မျှော်မှန်းချက်များ၊ ရည်မှန်းချက်များ၊  စားသုံးသူကာကွယ် ရေးဥပဒေ -၂၀၁၉ ပါ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ အခွင့်အရေး၊ တာဝန်နှင့်တားမြစ်ချက်များ၊ အခန်း(၁၈)ပါ ကုန်အညွှန်းအမှတ် အသားပြည့်စုံစွာဖော်ပြရေး ပါဝင်မည့်အချက်များအား အသေးစိတ်ဆွေးနွေးခဲ့ပြီး ခရိုင်ဦးစီးမှူးရုံးမှ ခရိုင်ဦးစီးမှူး၊ ဒု-ခရိုင်ဦးစီးမှူးတို့က လိုအပ်သည်များအား ဖြည့်စွက်ပြင်ဆင်ပေးခဲ့ကြောင်း သိရှိရပါသည်။

DOCA(မကွေး)

                 မော်လမြိုင်မြို့နယ်တွင် ဆန်စက်လုပ်ငန်းရှင်များအသင်း မြို့နယ်အမှုဆောင်ရွေးချယ်ရေး အခမ်းအနားကို ၃.၆.၂၀၂၂ ရက် နေ့လည် ၂ နာရီက မွန်ပြည်နယ်စားသုံးသူရေးရာဦးစီးဌာန၊ ပြည်နယ် ဦးစီးမှူးရုံး၌ ကျင်းပခဲ့ရာ ဆန်စက်လုပ်ငန်းရှင် (၁၂) ဦး တက်ရောက်ခဲ့ကြောင်း သိရှိရသည်။

            ပထမဦးစွာ မွန်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးဝင်းထွန်းက ဆန်စက်လုပ်ငန်းရှင်များအနေဖြင့် ဆန်စက်များကို အဆင့်မြှင့်တင်၍ ဆန်ရည်အသွေးကောင်းမွန်ပြီး ပြည်ပတင်ပို့နိုင်သည့် အခြေအနေရောက်အောင် ကြိုးစားသင့်ကြောင်း၊ မိမိတို့ဌာနအနေဖြင့်လည်း ဆန်စက်လုပ်ငန်းရှင်အသင်းအား ကူညီပံ့ပိုးပေးသွားမည်ဖြစ်ကြောင်း ပြောကြားခဲ့ပြီး မြို့နယ်အထွေထွေအုပ်ချုပ်ရေးဦးစီးဌာန၊ ဒု-ဦးစီးမှူး ဦးတင်ဝင်းမောင်က နှုတ်ခွန်းဆက် စကားပြောကြားခဲ့ပါသည်။

             ဆက်လက်၍ မွန်ပြည်နယ်ဆန်စက်လုပ်ငန်းရှင်များအသင်း ဥက္ကဌ ဦးခိုင်ဦးက ရှင်းလင်းဆွေးနွေးရာတွင် ကော်မတီရွေးချယ် တင်မြောက်ခြင်းကို (၃)နှစ်လျှင် တစ်ကြိမ် ရွေးချယ် တင်မြောက်ကြောင်း၊ ယခု ရွေးချယ်တင်မြောက်ခြင်းသည် ၂၀၂၂ ခုနှစ်မှ  ၂၀၂၅ နှစ်အထိ သက်တမ်းရှိကြောင်း ရှင်းလင်းပြောကြားပြီး တက်ရောက်လာကြသည့် ဆန်စက်ပိုင်ရှင်များမှ မြို့နယ်အမှုဆောင်များကို ရွေးချယ်တင်မြှောက်ခဲ့ကြရာ ဥက္ကဌအဖြစ် ဦးအောင်နိုင်ဝင်းအား ရွေးချယ်တင်မြှောက်ခဲ့ကြပြီး အဖွဲ့ဝင် (၁၂) ဦးဖြင့် ဖွဲ့စည်းခဲ့ကြောင်း သိရှိရပါသည်။

             ထို့နောက်ကော်မတီဝင်များမှ ရှေ့ဆက်လုပ်ဆောင်သွားမည့် လုပ်ငန်းများကိုရှင်းလင်း ဆွေးနွေးပြီး အခမ်းအနားအား (၁၆:၀၀) ချိန်တွင် ရုပ်သိမ်းခဲ့ကြောင်းသိရှိရသည်။

DOCA(မွန်)

          စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ် တာဝန်ခံဦးအောင်လွင်သည် မဲဇလီဒလကျေးရွာတွင် တောင်သူ (၉၁)ဦးအား ၂.၆.၂၀၂၂ ရက်နေ့ နံနက် (၁၀:၃၀)အချိန်တွင် မိတ်ဖက်ဌာနများဖြစ်သော စိုက်ပျိုးရေးဦးစီးဌာန၊ ကျန်းမာရေးဦးစီးဌာန၊ ပြန်ကြားရေးနှင့် ပြည်သူဆက်ဆံရေးဦးစီးဌာနတို့နှင့်အတူ ပူးပေါင်း၍ တောင်သူများအား စားသုံးသူကာကွယ်ပေးရေးအသိပညာပေး ဟောပြောပွဲ ကျင်းပပြုလုပ်ခဲ့ပါသည်။

          ဟောပြောပွဲတွင် ညောင်တုန်းမြို့နယ် တာဝန်ခံက စားသုံးသူကာကွယ်ရေး ဥပဒေ (၂၀၁၉) ပါ စားသုံးသူများ၏ အခွင့်အရေးနှင့် တာဝန်များအ‌ကြောင်း၊ လုပ်ငန်းရှင်တို့၏ တာဝန်များအကြောင်း၊ စားသုံးသူများသည် မိမိတို့၏အခွင့်အရေးများသိရှိ၍ နစ်နာဆုံးရှုံးမှုများရှိပါက အရေးဆိုတိုင်ကြားနိုင်ရန်နှင့် စီးပွားရေးလုပ်ငန်းရှင်များအနေဖြင့်လည်း စားသုံးသူကာကွယ်ရေးဥပဒေပါ တာဝန်နှင့် တားမြစ်ချက်များကို သိရှိ၍ စီးပွားရေးကျင့်ဝတ်နှင့် အညီ လုပ်ကိုင်ဆောင်ရွက်နိုင်ရန် ရည်ရွယ်၍ အသိပညာပေး ဆောင်ရွက်ချက်များကို Online Media မှတဆင့် အသိပညာပေးခြင်းများ ဆောင်ရွက်လျှက်ရှိပါကြောင်း အသိပညာပေး အကျယ်တဝင့် ဆွေးနွေးပြီး တက်ရောက်လာသူများမှလည်း သိရှိလိုသည်များကို မေးမြန်းသည်ကို ပြန်လည်ဖြေကြားပြီး စားသုံးသူအသိပညာပေး လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(ဧရာဝတီ)

             စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ တောင်ငူခရိုင်ဦးစီးမှူး ဦးမျိုးအောင်ဦးဆောင်၍ တောင်ငူခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံနှင့် တောင်ငူမြို့နယ်တာဝန်ခံတို့ ပါဝင်သောအဖွဲ့ သည် တိုင်းရင်းဆေးပညာဦးစီးဌာန၊ တောင်ငူခရိုင်ဦးစီးမှူး ဦးမြင့်အောင် ဦးဆောင်သော တိုင်းရင်းဆေးပညာဦးစီးဌာနမှ ပူးပေါင်းအဖွဲ့ဝင်များနှင့်အတူ ဇွန်လ ၁ ရက်နေ့ နံနက်ပိုင်းက တောင်ငူမြို့ပေါ် ရှိ တိုင်းရင်းဆေးရောင်းချသော ဆိုင်များသို့ သွားရောက်၍ သုံးစွဲရန်မသင့်သော တိုင်းရင်းဆေးများ ရောင်းချမှုရှိ/မရှိကို ကွင်းဆင်းစစ်ဆေးခဲ့ပါသည်။

              တိုင်းရင်းဆေးပညာဦးစီးဌာန၊ ခရိုင်ဦးစီးမှူးက Online ပေါ်တွင်ရောင်းချသော “ရသေ့ ဆေး(သို့)ထိုင်းတိုင်းရင်းဆေး”သည် မြန်မာနိုင်ငံတွင် ဆေးဝါးမှတ်ပုံတင်ထားခြင်းမရှိကြောင်း၊ “အာရှရွှေကြယ်အမှတ်တံဆိပ်” အဆစ်အမျက်ရောင်ရောဂါသောက်ဆေးသည် အများပြည်သူ အသုံး ပြုရန်မသင့်သောဆေးဝါးဖြစ်ကြောင်း အသိပေးကြေညာထားပြီးဖြစ်သော်လည်း ဈေးကွက်အတွင်း ရောင်းချလျှက်ရှိနေသည်ကို သိရှိရကြောင်း၊ “ဣစ္ဆာသယ”အမှတ်တံဆိပ် အခိုးပွင့်ဆေးနှင့် “ဝင်းပပ” အမှတ်တံဆိပ် ဆင်တုံးမနွယ်အစာကြေလေနိုင်လျက်ဆားတို့သည့် တိုင်းရင်းဆေးပညာဦးစီးဌာနတွင် တိုင်းရင်းဆေးမှတ်ပုံတင်နှင့် ထုတ်လုပ်ခွင့်လိုင်စင် လျှောက်ထားသော်လည်း လာရောက်ထုတ်ယူခြင်းမရှိကြောင်း၊ ၎င်းဆေးဝါးများ ဈေးကွက်အတွင်းရောင်းချခြင်းရှိ/မရှိ ကောက်ယူစစ်ဆေးရန်နှင့် တွေ့ရှိပါက သိမ်းဆည်းရန် တိုင်းရင်းဆေးပညာဦးစီးဌာန၊ ပဲခူးတိုင်းဒေသကြီးဦးစီးမှူးရုံးက ညွှန်ကြားလာပါသဖြင့် ပူးပေါင်းပါဝင်ဆောင်ရွက်ပေးနိုင်ပါရန် ညှိနှိုင်းလာပါသဖြင့် ပူးပေါင်းအဖွဲ့ဖြင့် ကွင်းဆင်းစစ်ဆေးခြင်း ဖြစ်ပါသည်။

              တောင်ငူမြို့ပေါ်ရှိ ဆေးဆိုင်များတွင် အဆိုပါဆေး လေးမျိုးကို ရောင်းချခြင်းမရှိသည်ကို စစ်ဆေးတွေ့ရှိရပါသည်။ စားသုံးသူရေးရာဦးစီးဌာန၊ ခရိုင်ဦးစီးမှူးနှင့် တာဝန်ရှိသူများသည် မြန်မာနိုင်ငံစားသုံးသူကာကွယ်ရေးကော်မရှင်မှ ညွှန်ကြားချက်အမှတ် ၂/၂၀၁၉ ဖြင့် ကုန်စည်များတွင် ကုန်အညွှန်းအမှတ်အသားများအား မြန်မာဘာသာဖြင့်ဖော်ပြရာတွင် လိုက်နာဆောင်ရွက်နိုင်ရန် ညွှန်ကြားထားပါကြောင်း၊ ယင်းညွှန်ကြားချက်တွင် တိုင်းရင်းဆေးဝါးများတွင်လည်း မြန်မာဘာသာဖြင့်ဖော်ပြရမည့်အချက်မျာကို တိကျစွာဖော်ပြထားပါကြောင်း၊ ယင်းညွှန်ကြားချက်ကို ဆေးဆိုင်များသို့ ဖြန့်ဝေထားပြီးဖြစ်ပါကြောင်း၊ သို့ဖြစ်ပါ၍ တိုင်းရင်းဆေးရောင်းချသူများအနေဖြင့် မြန်မာဘာသာဖြင့် ဖော်ပြရမည့်ကုန်အညွှန်းအမှတ်အသားများ တိကျစွာဖော်ပြထားသည့် တိုင်းရင်းဆေးများကိုသာ ရောင်းချကြရန်လိုပါကြောင်း အသိပညာပေးခဲ့ကြောင်း သိရပါသည်။

DOCA(ပဲခူး)