သတင်းနှင့် လှုပ်ရှားမှုများ

     မြို့နယ်စီမံအုပ်ချုပ်ရေးကောင်စီ၏ မစီအစဉ် လမ်းညွှန်မှုဖြင့်   ညောင်တုန်း မြို့နယ်အတွင်းရှိ ဒေသခံပြည်သူများ ကြက်ဥ၊ ဘဲဥ နှင့် ဆန်၊ ဆီ၊ ကြက်သား၊ ဝက်သား၊ ငါးများကို သက်သာသော ဈေးဖြင့် ဝယ်ယူနိုင်ရန်  ၁၄.၅.၂၀၂၅ မှ ယနေ့ ၁၅-၅-၂၀၂၅ရက်နေ့အထိ နံနက်ပိုင်းက ကုန်ဈေးနှုန်းတည်ငြိမ်ရေးလူပ်ငန်းအဖွဲ့များဖြင့် (၃)ရပ်ကွက်၊ (၄)ရပ်ကွက်၊ (၇)ရပ်ကွက်၊ (၉)ရပ်ကွက်နှင့် ဆားမလောက်ဈေး၊ တာကွေ့ဈေး၊ ကြိမ်ပင်ဆယ်ကျေးရွာ၊ မဲဇလီကျေးရွာများတွင် အဖွဲ့စုံခွဲ  စုပေါင်း၍ ရောင်းချလျက်ရှိကြောင်း သိရသည်။

      ထိုသို့ရောင်းချရာတွင် ကြက်ဥတစ်လုံး(၃၅၀-၄၅၀)၊ ဘဲဥတစ်လုံးလျှင် ၄၅၀-၅၀၀ ကျပ်နှုန်းဖြင့်လည်းကောင်း၊ ကြက်ဥအလုံးရေ (၁၆၄၀၀)၊ ဘဲဥအလုံးရေ (၂၂၅၀)ဖြင့် ၁၅.၅.၂၀၂၅ ရက်နေ့ကလည်း ကြက်ဥအလုံးရေ (၁၆၄၀၀)နှင့် ဘဲဥအလုံးရေ (၂၂၅၀)ကို Social Distancing နှင့်အညီ ရောင်းချပေးခြင်းဖြစ်ကြောင်းသိရသည်။

      ဆန် ၁၀ပြည်ကို လူတစ်ဦး လျှင် ၁ပြည်နှုန်း ဆန်ဈေး  ၁ပြည် (၃၀၀၀)ကျပ်၊ ဆီ ၃၀ပိဿာ လူတစ်ဦး ၅၀ကျပ်သား၊ ဆီဈေး ၁ပိဿာ ၇၁၈၀ ကျပ်၊ ဝက်သား၁၅ပိဿာ လူတစ်ဦး ၂၀ ကျပ်သားဖြင့် ၁ပိဿာ ၁၉၀၀၀ကျပ်ဈေးဖြင့်လည်းကောင်း၊ ကြက်သား ၁၀ပိဿာ လူတစ်ဦးလျှင်  ၃၀ကျပ်သားဖြင့် ကြက်သားဈေးနှုန်း ၁ပိဿာ ၁၈၀၀၀ကျပ်ဖြင့် လည်းကောင်း၊ ငါး ၁၅ပိဿာ လူတစ်ဦး ၃၀ကျပ်သားဖြင့် ငါးဈေး ၁ပိဿာ ၆၀၀၀ကျပ်ဖြင့်လည်းကောင်း ရောင်းချပေးလျက်ရှိကြောင်း သိရပါသည်။

DOCA(ဧရာဝတီ)

        ၂၀၂၅ ခုနှစ်၊ မေလ ၁၆ ရက်နေ့၊ (၁၃း၀၀) နာရီအချိန်တွင် တနင်္သာရီတိုင်းဒေသကြီး အစိုးရအဖွဲ့၊ စီးပွားရေးရာဝန်ကြီးအခန်းတွင် မြန်မာ့လယ်ယာဖွံ့ဖြိုးရေးဘဏ်၊ တနင်္သာရီတိုင်းဒေသကြီးမှ တာဝန်ယူကျင်းပမည့် ၂၀၂၅ မိုးရာသီစိုက်ပျိုးစရိတ်ချေးငွေထုတ်ချေးရေးနှင့် အချိန်စေ့ လွန်ကြွေးကျန်များ ပြန်လည်ကောက်ခံရေးဆိုင်ရာ တိုင်းဒေသကြီးချေးငွေအကြံပေးအဖွဲ့ အစည်း အဝေးသို့ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးမှ တက်ရောက်ခဲ့ပါသည်။

          အစည်းအဝေးတွင် တိုင်းဒေသကြီးချေးငွေအကြံပေးအဖွဲ့ ဥက္ကဋ္ဌ၊ တိုင်းဒေသကြီးအစိုးရအဖွဲ့၊ စီးပွားရေးရာဝန်ကြီးမှ အဖွင့်အမှာစကား ပြောကြားခြင်း၊ တိုင်းဒေသကြီးချေး ငွေအကြံပေးအဖွဲ့၊ အတွင်းရေးမှူး၊ မြန်မာ့လယ်ယာဖွံ့ဖြိုးရေးဘဏ်၊ တိုင်းဒေသကြီးမန်နေဂျာမှ ၂၀၂၅ မိုးရာသီ စိုက်ပျိုး စရိတ်ချေးငွေထုတ်ချေးရေးနှင့် အချိန်စေ့လွန်ကြွေးကျန်များ ပြန်လည်ကောက်ခံရေးဆိုင်ရာ ကိစ္စရပ် များနှင့်စပ်လျဥ်း၍ ရှင်းလင်းဆွေးနွေးခြင်း၊ တက်ရောက်လာကြသော တိုင်းဒေသကြီးချေးငွေအကြံ ပေးအဖွဲ့မှ အဖွဲ့ဝင်များမှ အသီးသီးဆွေးနွေးတင်ပြခြင်းများဆောင်ရွက်ခဲ့ကာ တိုင်းဒေသကြီးချေးငွေ အကြံပေးအဖွဲ့ ဥက္ကဋ္ဌ၊ တိုင်းဒေသကြီးအစိုးရအဖွဲ့၊ စီးပွားရေးရာဝန်ကြီးမှ နိဂုံးချုပ်အမှာစကား ပြောကြားခဲ့ကာ အစည်းအဝေးအား (၁၄း၄၅)နာရီ အချိန်တွင် ‌အောင်မြင်စွာပြီးမြောက်ခဲ့ကြောင်း သိရှိရပါသည်။

DOCA(တနင်္သာရီ)

     ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်ရှိ ကမ်းနားဈေးအတွင်း (၇.၅.၂၀၂၅) ရက်နေ့၊ နံနက် (၀၈:၀၀)နာရီအချိန်တွင် တိုင်းဒေသကြီးအစားအသောက်နှင့် ဆေးဝါးကွပ်ကဲရေး ဦးစီးဌာနမှ ဦးဆောင်၍ ပုသိမ်မြို့နယ် အစားအသောက်နှင့်ဆေးဝါးကြီးကြပ်ကွပ်ကဲရေးကော်မတီ နှင့်အတူ ပူးပေါင်းအဖွဲ့ဖြင့် ချဉ်ဖတ်မျိုးစုံနှင့် ပဲပြားများတွင် ဓာတုဆေးဝါးများ ပါဝင်မှုရှိ/မရှိ ရှောင်တခင် ဝင်ရောက်စစ်ဆေး၍ ဈေးကွက်နမူနာကောက်ယူစစ်ဆေး၍ ဈေးကွက်စောင့်ကြည့် စစ်ဆေးခဲ့ကြောင်း သိရှိရသည်။

DOCA (ဧရာဝတီ)

    ၂၀၂၅ ခုနှစ်၊ မေလ (၁၃)ရက်နေ့၊ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး ဦးအောင်လင်းဦး (ဦးစီးမှူး) ဦးစီး၍ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ကျန်းမာရေးဦးစီးဌာနတို့နှင့်ပူးပေါင်းကာ ကျိုင်းတုံမြို့၊ နောင်တုံကုန်ပတ်လမ်းရှိ “အောင်နိုင်” စားသောက်ဆိုင်နှင့် “Iron Cross” စားသောက်ဆိုင် (၂)ဆိုင်အား စားသုံးသူများအနေဖြင့် အစားအသောက်များ ဝယ်ယူစားသုံးရာ၌ ဘေးကင်း လုံခြုံမှုရရှိစေရန် ကွင်းဆင်းစစ်ဆေးခြင်းလုပ်ငန်း ဆောင်ရွက်ခဲ့ပါသည်။

    ထိုသို့ ကွင်းဆင်းစစ်ဆေးခြင်းလုပ်ငန်း ဆောင်ရွက်ရာတွင် “အောင်နိုင်” စားသောက်ဆိုင်နှင့် “Iron Cross” စားသောက်ဆိုင်အနေဖြင့် သက်ဆိုင်ရာဌာန၏ ထောက်ခံချက်များပါသော မီးဖိုချောင် သုံးကုန်ပစ္စည်းများကိုသာ အသုံးပြုပြီး အစားအသောက်များအား သန့်ရှင်းသပ်ရပ်စွာ ချက်ပြုတ် ရောင်းချသည်ကို တွေ့ရှိရပါသည်။

      ဆက်လက်၍ စစ်ဆေးရေးမှူးနှင့် တာဝန်ရှိသူများသည် စားသောက်ဆိုင်ဖွင့်လှစ်ရောင်းချ သည့် လုပ်ငန်းရှင်များအား အစားအသောက်များ ချက်ပြုတ်ရာတွင် သက်ဆိုင်သည့် အထောက် အကူပြုပစ္စည်းများ၊ စားသောက်ကုန်ကြမ်းများအား သန့်ရှင်းသပ်ရပ်စွာထားရန်၊ ချက်ပြုတ်သည့် စားဖိုမှူးများ၏ တစ်ကိုယ်ရည်သန့်ရှင်းရေးအား အလေးထားဆောင်ရွက်ရန်၊ စားသောက်ဆိုင်၏ မီနူးတွင် ဈေးနှုန်းများ ဖော်ပြထားရန်နှင့် စားသုံးသူကာကွယ်ရေးဥပဒေ အခန်း (၁၀)ပါ “စီးပွားရေး လုပ်ငန်းရှင်၏တာဝန်များ”ကို သိရှိလိုက်နာဆောင်ရွက်စေရန် အသိပညာပေးခြင်းလုပ်ငန်း ဆောင်ရွက်ခဲ့ပါသည်။         

DOCA(ရှမ်း)

     ၂၀၂၅ခုနှစ်၊ မေလ (၁၂)ရက်နေ့၊ နေ့လယ် (၁၄:၀၀)နာရီအချိန်တွင် ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး ဦးအောင်လင်းဦး (ဦးစီးမှူး) ဦးစီး၍ အသေးစားစက်မှုလက်မှုလုပ်ငန်းဦးစီးဌာနနှင့် ပူးပေါင်းကာ ကျိုင်းတုံမြို့၊ ရပ်ကွက် (၄)၊ ပေါက်ထိုက်ရပ်အတွင်းရှိ “မြင်းဖြူ” အမှတ်တံဆိပ် မုန့်တီခြောက်ထုတ်လုပ်သည့် လုပ်ငန်းအား ထုတ်ကုန်များလုံခြုံစိတ်ချရမှုရှိစေရန် ဈေးကွက်စောင့်ကြည့်စစ်ဆေးခြင်းလုပ်ငန်း ဆောင်ရွက်ခဲ့ပါသည်။

    ထိုသို့စစ်ဆေးရာတွင် “မြင်းဖြူ” အမှတ်တံဆိပ် (မုန့်တီခြောက်)လုပ်ငန်းသည် စားသုံးသူကာကွယ်ရေးဥပဒေ အခန်း (၁၈)ပါ “ကုန်အညွှန်းအမှတ်အသားဖော်ပြခြင်း”နှင့် ပတ်သက်၍ ပြည့်စုံ စွာ ဖော်ပြထားပြီး ထုတ်ကုန်များကိုလည်း သန့်ရှင်းသပ်ရပ်စွာ ထုတ်လုပ်ဖြန့်ချိသည်ကို စစ်ဆေးတွေ့ ရှိရပါသည်။

   ထို့နောက် စစ်ဆေးရေးမှူးနှင့် တာဝန်ရှိသူများသည် “မြင်းဖြူ” အမှတ်တံဆိပ် မုန့်တီခြောက်ထုတ်လုပ်သည့် လုပ်ငန်းရှင်အား စားသုံးသူဘေးအန္တရာယ်ကင်းရှင်းစေရေး အလေးထားဆောင်ရွက်ရန်၊ ကုန်ကြမ်းများစနစ်တကျ သိုလှောင်ရန်နှင့် စားသုံးသူကာကွယ်ရေးဥပဒေ အခန်း (၁၀)ပါ “စီးပွားရေးလုပ်ငန်းရှင်၏တာဝန်များ”ကို လိုက်နာဆောင်ရွက်ရန် ဆွေးနွေးခဲ့ကြပါသည်။

DOCA(ရှမ်း)