သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်တာ ဝန်ခံသည် စားသုံးသူများ ဘေးကင်းလုံခြုံစိတ်ချရမှုရှိစေရေးအတွက် ဈေးကွက်မရောက်မီ ကုန်အညွှန်း အမှတ်အသားနှင့် စပ်လျဉ်း၍ စားသုံးသူကာကွယ်ရေးဆိုင်ရာ အသိပညာပေးခြင်း၊ စားသုံးသူကာကွယ် ရေးဥပဒေပါပြဌာန်းချက်များအား သိရှိလိုက်နာဆောင်ရွက်သွားရန် လုပ်ငန်းရှင်နှင့် တွေ့ဆုံဆွေးနွေး အသိပညာပေးခြင်းများဆောင်ရွက်လျက်ရှိပါသည်။

          ထိုသို့ ဆောင်ရွက်ရာတွင် မြို့နယ်တာဝန်ခံ ဒေါ်ဌေးဌေးမှ မိတ်ဖက်ဌာနများဖြစ်သော မြို့နယ် စီမံခန့်ခွဲရေးနှင့် အုပ်ချုပ်ရေးကော်မတီဖြင့် ပူးပေါင်း၍ စားသုံးသူများ ဘေးအန္တရာယ်ကင်းရှင်းစေရန်၊ ထုတ်ကုန်များ လုံခြုံစိတ်ချရမှုရှိစေရန် ဈေးကွက်မရောက်မီ ကုန်အညွှန်းအမှတ်အသား ပြည့်စုံရန် အတွက် ရည်ရွယ်၍ (၁၇.၃.၂၀၂၆)ရက်နေ့၊ နေ့လယ်(၁၃:၀၀)နာရီအချိန်တွင် တောင်တွင်းကြီးမြို့၊ တောင်ပြင်(၁)ရပ်ကွက်ရှိ ကိတ်မုန့်မျိုးစုံထုတ်လုပ်သည့် “ဇင်းနစ်” ကိတ်မုန့်လုပ်ငန်းရှင်နှင့်တွေ့ဆုံ၍ အသိပညာပေးဆောင်ရွက်ခဲ့ကြောင်းသိရှိရသည်။

          မြို့နယ်တာဝန်ခံမှ အသိပညာပေးဆွေးနွေးရာတွင် စီးပွားရေးလုပ်ငန်းရှင်အနေဖြင့် ကုန်စည်များ ထုတ်လုပ်ရောင်းချရာတွင် စီးပွားရေးလုပ်ငန်းရှင်များ သိရှိလိုက်နာစေရန်အတွက် စားသုံးသူကာကွယ် ရေးဥပဒေ(၂၀၁၉)ပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များနှင့် အခန်း(၁၈)ပါ ကုန်အညွှန်းအမှတ်အသားဆိုင်ရာ ပြဌာန်းချက်များ ပုဒ်မ(၄၁) ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာ တစ်ခု(သို့မဟုတ်)တစ်ခုထက်ပို၍  တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသေးစိတ် ရှင်းလင်းဆွေးနွေးခဲ့ပြီး လုပ်ငန်းရှင်အနေဖြင့် မိမိတို့ထုတ်လုပ်သောကုန်ပစ္စည်းများတွင် ကုန်အညွှန်း အမှတ်အသားပြည့်စုံမှန်ကန်စွာဖော်ပြရန်၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန် သည့် ကြေညာစာအမှတ်(၂/၂၀၁၉)နှင့်အညီ ဖော်ပြပေးရမည်ဖြစ်ကြောင်း၊ ကုန်အညွှန်း အမှတ်အသား နှင့်ကိုက်ညီမှုရှိပါက အမှတ်တံဆိပ်စိစစ်ခွင့်ပြုချက်များ ခရိုင်/တိုင်းဒေကြီးဦးစီးမှူးရုံးသို့ ဆက်လက် တင်ပြဆောင်ရွက်ပေးသွားမည်ဖြစ်ကြောင်း၊ အခြားဌာန၏ ခွင့်ပြုချက်လိုင်စင်များ လုပ်ဆောင် ရန်လို အပ်ပါက သက်ဆိုင်ရာဌာနများနှင့် ချိတ်ဆက်၍ ကူညီဆောင်ရွက်ပေး မည်ဖြစ်ကြောင်းရှင်းလင်း ဆွေးနွေးခဲ့ကြောင်း သိရှိရပါသည်။

DOCA(မကွေး)

                စစ်ကိုင်းတိုင်းဒေသကြီး၊ ကန့်ဘလူမြို့နယ်အတွင်းရှိ ဈေးကွက်များတွင် ရောင်းချနေသော ဘူးသွင်းစားသုံးဆီများ၏ အရည်အသွေးနှင့် စားသုံးသူဘေးအန္တရာယ်ကင်းရှင်းမှုရှိစေရန်အတွက် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်းတစ်ဦးတို့သည် ၂၀၂၆ ခုနှစ်၊ မတ်လ ၁၆ ရက်နေ့တွင် ကန့်ဘလူမြို့ပေါ်ရှိ စျေးဆိုင်များနှင့် လက်လီအရောင်းဆိုင်များတွင် ရောင်းချနေသော ဘူးသွင်းစားသုံးဆီများကို ဈေးကွက်စောင့်ကြည့်စစ်ဆေးဆောင်ရွက်ခဲ့ကြောင်း သိရသည်။

              ထိုသို့စစ်ဆေးရာတွင် စားသုံးဆီဘူးများ၏ ထုတ်လုပ်ရက်စွဲ၊ သက်တမ်းကုန်ဆုံးရက်၊ ထုတ်လုပ်သူနှင့် တင်သွင်းသူ အချက်အလက်များ၊ ပိဿာ၊ ကျပ်သား၊ အမှတ်တံဆိပ်နှင့် အရည် အသွေးအာမခံချက်များ ပြည့်စုံမှုရှိမရှိကို အသေးစိတ်စစ်ဆေးခဲ့ကြပြီး စံချိန်စံညွှန်းမပြည့်မီသော ပစ္စည်းများ မရောင်းချရန် ဆိုင်ရှင်များအား အသိပညာပေးညွှန်ကြားခဲ့ကြောင်း သိရသည်။

              ထို့အပြင် စားသုံးသူများ၏ ကျန်းမာရေးကို ထိခိုက်စေနိုင်သည့် အရည်အသွေးမမှန်ကန်သော စားသုံးဆီများ မဖြစ်ပေါ်စေရန် စနစ်တကျ စောင့်ကြည့်စစ်ဆေးမှုများကို ဆက်လက်ပြုလုပ်သွား မည်ဖြစ်ကြောင်း၊ ကန့်ဘလူမြို့နယ်အတွင်းရှိ စျေးကွက်များတွင် စားသုံးဆီများကို စည်းကမ်းတကျ ရောင်းချနိုင်ရေးနှင့် စားသုံးသူအခွင့်အရေးများ ကာကွယ်ပေးနိုင်ရေးအတွက် ယခုကဲ့သို့ ဈေးကွက်စောင့်ကြည့်စစ်ဆေးမှုများကို အစဉ်မပြတ် ဆောင်ရွက်လျက်ရှိကြောင်း သိရသည်။ 

DOCA(စစ်ကိုင်း)

    တနင်္သာရီတိုင်းဒေသကြီး၊  မြိတ်ခရိုင်ကုန်စျေးနှုန်းတည်ငြိမ်ရေးအဖွဲ့များဖြစ်သော စားသုံးသူ ရေးရာဦးစီးဌာန၊ အထူးစုံစမ်းစစ်ဆေး‌ရေးဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ ခရိုင်စီမံကိန်း ဦးစီးဌာန၊ စိုက်ပျိုးရေးဦးစီးဌာန၊ ဗဟိုစာရင်းအင်းအဖွဲ့နှင့် မြို့နယ်စည်ပင်သာယာရေးအဖွဲ့တို့မှ ပူးပေါင်း၍ ၂၀၂၆ခုနှစ်၊ မတ်လ(၂၀)ရက်နေ့တွင် မြိတ်မြို့၊ တောရကျောင်းရပ်၊ ရှမ်းချောင်းလမ်းရှိ ဆန်နှင့်ဆီအရောင်းဆိုင်များအား ကွင်းဆင်းစစ်ဆေးခဲ့ကြကြောင်း သိရှိရပါသည်။

      ကွင်းဆင်းစစ်ဆေးရာတွင် မြိတ်မြို့ဆန်အရောင်ဆိုင်များတွင် ရောင်းချနေသော ဆန်စျေးနှုန်း များအား စစ်ဆေးခဲ့ကြပြီး ဒေသတွင်းဖြစ်သင့်ဖြစ်ထိုက်သော စျေးနှုန်းများဖြင့် ရောင်းချမှုရှိစေရန်၊ စျေးကစားရန်ရည်ရွယ်ချက်ဖြင့် သိုလှောင်ထားခြင်းမျိုးမရှိစေရန် စစ်ဆေးခဲ့ကြပြီး မြိတ်မြို့၊ ရှမ်း ချောင်းရပ်နှင့် တောရကျောင်းရပ်ရှိ ဆီအရောင်းဆိုင်များအား သတ်မှတ်ရည်ညွှန်းစျေးနှုန်းများ အတိုင်း ရောင်းချမှုရှိစေရန်နှင့် အလေးချိန်မှန်ကန်စွာဖြင့်ရောင်းချရန် ပြောကြားခဲ့ကြောင်း သိရှိရ ပါသည်။

DOCA(တနင်္သာရီ)

                            ၂၀၂၆ ခုနှစ်၊ မတ်လ (၁၇)ရက်နေ့၊ နံနက် (၁၁:၀၀)နာရီအချိန်တွင်  ရှမ်းပြည်နယ် (အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး ဦးအောင်လင်းဦး (ဦးစီးမှူး) ဦးစီး၍ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ကျန်းမာရေးဦးစီးဌာန၊ မြို့နယ်စည်ပင်၊ ခရိုင်အထွေထွေအုပ်ချုပ်ရေးဦးစီးဌာနနှင့် မြန်မာနိုင်ငံရဲတပ်ဖွဲတို့ပူးပေါင်း၍ ကျိုင်းတုံမြို့၊ ရပ်ကွက် (၂)နှင့် ရပ်ကွက် (၃)အတွင်းရှိ အလှကုန်ပစ္စည်းအရောင်းဆိုင်များတွင် ရောင်းချနေသော April Hair Tonic အမှတ်တံဆိပ် ဆံပင်ဖြန်းဆေးအား ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

               ထိုသို့ April Hair Tonic အမှတ်တံဆိပ် ဆံပင်ဖြန်းဆေးအား ကွင်းဆင်းစစ်ဆေးခြင်း ဆောင်ရွက်ခဲ့ရာတွင် သက်ဆိုင်ဌာန၏ ထောက်ခံချက်နှင့်  ကုန်အညွှန်းအမှတ်အသားပြည့်စုံစွာ ဖော်ပြထားသည်ကို စစ်ဆေးတွေ့ရှိရပြီး တရားမဝင်တင်သွင်းထားသော အလှကုန်ပစ္စည်းများ ရောင်းချခြင်းမရှိသည်ကို စစ်ဆေးတွေ့ရှိရပါသည်။ ယင်းနောက် စစ်ဆေးရေးမှူးနှင့် တာဝန်ရှိသူများသည် အလှကုန်ပစ္စည်းအရောင်းဆိုင်ပိုင်ရှင်များအား သက်တမ်းလွန် အလှကုန်ပစ္စည်းများ နှင့် သက်ဆိုင်ရာဌာနများမှ တားမြစ်ထားသော အလှကုန်ပစ္စည်းများကို ဈေးကွက်အတွင်း ရောင်းချ ခြင်း မပြုလုပ်ရန်နှင့် ထုတ်လုပ်သည့်နိုင်ငံ၊ ထုတ်လုပ်/တင်သွင်းသည့်ကုမ္ပဏီ၊ မှတ်ပုံတင်အမှတ် Import Registration No.(IR)များ ဖော်ပြထားသော အလှကုန်ပစ္စည်း များကိုသာ ရောင်းချရန်နှင့် စားသုံးသူကာကွယ်ရေးဥပဒေ အခန်း (၁၀)ပါ “စီးပွားရေးလုပ်ငန်းရှင် ၏တာဝန်များ”ကို သိရှိ လိုက်နာဆောင်ရွက်စေရန် ရှင်းလင်းပြောကြားခဲ့ပါသည်။

DOCA(ရှမ်း)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူး ဦးစံကြည်နှင့် မြို့နယ်ဦးစီးမှူး ဦးလှထွဋ်ဦးတို့သည် (၁၇.၃.၂၀၂၆)ရက်နေ့ မွန်းလွှဲ(၁၅း၀၀)နာရီအချိန်တွင် စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံးတွင် စားသုံးဆီ လက်လီ၊ လက္ကားအရောင်းဆိုင်ပိုင်ရှင်များအား ဈေးနှုန်းမြှင့်တင်ရောင်းချခြင်းမရှိစေရေး တွေ့ဆုံရှင်းလင်းဆွေးနွေးခြင်း ဆောင်ရွက်ခဲ့ပါသည်။

          ထိုသို့ဆွေးနွေးရာတွင် စားသုံးသူရေးရာဦးစီးဌာန၊ ခရိုင်ဦးစီးမှူးမှ တက်ရောက်လာသော  စားသုံးဆီလက်လီ၊ လက္ကား ရောင်းချနေသူလုပ်ငန်းရှင်များအား ခရိုင်/မြို့နယ်အတွင်း လက်ရှိဖြစ်ပေါ်နေသော စားသုံးဆီဈေးနှုန်းမြင့်မားခြင်းနှင့် ပတ်သက်၍ စားသုံးဆီရောင်းချသော လုပ်ငန်းရှင်များအနေဖြင့် သတ်မှတ်ရည်ညွှန်းဈေးထက် ပိုမိုရောင်းချခြင်းမပြုလုပ်ကြရန်၊ စားသုံးသူပြည်သူများအား ထင်ယောင်ထင်မှားဖြစ်စေပြီး ရောနှောရောင်းချခြင်းမျိုးမပြုလုပ်ကြရန်၊ သတ်မှတ်ရည်ညွှန်းဈေးထက် ဈေးနှုန်းမြှင့်တင်ရောင်းချခြင်းများ စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပါသည်။ ဆက်လက်ပြီးမြို့နယ်ဦးစီးမှူးမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ၂၀၁၉ပါ ပြဌာန်းချက်များမှအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်အညွှန်းအမှတ်အသားပြည့်စုံစွာဖော်ပြထားသော ကုန်ပစ္စည်းများကိုသာ ရောင်းချကြရန် ကုန်အမှတ်တံဆိပ်အလိုက် ဆီအမျိုးအစား ကွဲပြားခြားနားမှုကို စားသုံးသူပြည်သူများအား ရှင်းလင်းပြောကြား၍ ရောင်းချပေးရန်၊ စားသုံးသူကာကွယ်ရေး ဥပဒေပါပြဌာန်းချက်များမှတားမြစ်ချက်များ၊ ပြစ်မှုပြစ်ဒဏ်များအား ရှင်းလင်းဆွေးနွေးခဲ့ပါသည်။ တက်ရောက်လာသော စားသုံးဆီလုပ်ငန်းရှင်များမှ သိရှိလိုသည့် မေးမြန်းချက်များအား မြို့နယ်ဦးစီးမှူးမှ ပြန်လည်ရှင်းလင်းဆွေးနွေးခဲ့ပါသည်။ ဆွေးနွေးပွဲသို့ စားသုံးဆီလုပ်ငန်းရှင်(၂၆)ဦး တက်ရောက်ခဲ့ကြောင်း သိရှိရပါသည်။

DOCA (ဧရာဝတီ)