သတင်းနှင့် လှုပ်ရှားမှုများ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီး မှူးရုံးအနေဖြင့် တိုင်းဒေသကြီးဦးစီးမှူး၏ လမ်းညွှန်ချက်၊ ခရိုင်စီမံအုပ်ချုပ်ရေးအဖွဲ့၏ လမ်းညွှန်ချက်၊ ခရိုင်ဦးစီးမှူး၏ ညွှန်ကြားကြီးကြပ်မှုတို့ဖြင့် တာဝန်ထမ်းဆောင်လျက်ရှိသော ဝန်ထမ်းမိသားစုများ စားဝတ်နေရေး အထောက်အကူဖြစ်စေရန်အတွက် ကျွန်းလှမြို့နယ်တာဝန်ခံ ဒေါ်ဝေဝေအောင်က ဆောင်းရာသီ စားဖိုဆောင်သီးနှံများ တစ်ပိုင်တစ်နိုင်အနေဖြင့် စိုက်ပျိုးထားကြောင်း သိရှိပါသည်။           စားဖိုဆောင်သီးနှံများကို ရေ၊ မြေ၊ ရာသီဥတုနှင့် ကိုက်ညီပြီး ရာသီအလိုက် သီးနှံများ ဖြစ်သည့် ခရမ်းပင်၊ ချဉ်ပေါင်ပင်၊ ကင်းမုံပင်၊ ပဲတောင့်ရှည်ပင်၊ ဖရုံပင်၊ ဘူးပင် ငရုတ်ပင်  ဗိုလ်စားပဲပင် ၊ ခရမ်းချဉ်သီးပင်၊ ကြက်သွန်ဖြူ(ကြူကုတ်)၊ ကြက်သွန်နီပင်၊ ကိုက်လန်ပင်၊ မုံညှင်းပင်နှင့် ခဆော့သီးပင် များကို မြေအောက်ရေတင်စနစ်ဖြင့် ကိုယ်တိုင်စိုက်ပျိုးထားရှိကာ ဓါတ်မြေဩဇာ၊ ပိုးသတ်ဆေး သုံးစွဲခြင်း မရှိသည့်အတွက် ဘေးအန္တရာယ်ကင်းရှင်းကာ လတ်လတ် ဆတ်ဆတ် ခူးဆွတ်စားသုံးရပြီး  ဝန်ထမ်း မိသားစုဝင်များ၏ စားဝတ်နေရေးအတွက် အထောက်အကူဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

 စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ မုံရွာမြို့နယ်တာဝန်ခံနှင့် ချောင်းဦးမြို့ တာဝန်ခံ တို့သည်  ဒီဇင်ဘာလ ၁၃ ရက်နေ့ နံနက် ၁၀ နာရီအချိန်တွင် မုံရွာမြို့၊ ချမ်းမြဝတီ ရပ်ကွက်ရှိ “ရှယ်ကောင်း” ကိတ်ခြောက်မုန့်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေ (၂၀၁၉)၊ အခန်း (၁၈) အရကုန် အညွှန်းအမှတ်အသားဆိုင်ရာ ပြဋ္ဌာန်းချက်များ နှင့်ပတ်သက်၍ စီးပွားရေးလုပ်ငန်းရှင်များသိရှိ လိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါ သည်။

ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှု ပြစ်ဒဏ်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ် အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ ရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေး ချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးပြောကြား ခဲ့ကြပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားလက်ကမ်းစာစောင်များ ဖြန့်ဝေ ပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေး တိုင်းဒေသကြီးဦးစီးမှူးရုံးမှ စစ်ဆေးရေးအရာရှိ ဦးမျိုးထွန်း (ဦးစီးအရာရှိ)၊ ဦးဆောင်သည့် စစ်ဆေးရေးအရာရှိများ၊ အထွေထွေအုပ်ချုပ်ရေး ဦးစီးဌာနနှင့် မြို့တော်စည်ပင်သာယာရေး ကော်မတီတို့ ပူးပေါင်းပါဝင်သော အဖွဲ့တို့သည် ၁၂-၁၂-၂၀၂၄ ရက်နေ့ နံနက် (၁၀:၃၀) နာရီအချိန်တွင် ချမ်းအေးသာစံမြို့နယ်အတွင်းရှိ အိမ်သုံးလျှပ်စစ်ပစ္စည်း  အရောင်းဆိုင်များအား ၂၀၂၄ ခုနှစ်၊ ဒီဇင်ဘာလ၌ မန္တလေးတိုင်းဒေသကြီးအတွင်း ဦးစားပေးကုန်စည်အဖြစ် သတ်မှတ်ထားသော အိမ်သုံးလျှပ်စစ်ပစ္စည်း အမျိုးမျိုးအား ‌ဈေးကွက်စောင့်ကြည့် စစ်ဆေးခြင်းများ   ဆောင်ရွက်ခဲ့ကြ ပါသည်။

    ထိုသို့စစ်ဆေးရာတွင် လုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေး လုပ်ငန်းရှင်များ၏ တာဝန်များ၊ တားမြစ်ချက်များနှင့် အခန်း (၁၈) ပါ ကုန်ပစ္စည်းထုပ်ပိုးမှုပေါ်တွင် ကုန်အညွှန်းအမှတ်အသား ဖော်ပြခြင်းဆိုင်ရာ အချက်အလက်များနှင့် မြန်မာနိုင်ငံ စားသုံးသူ ကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) ပါ အချက်အလက်များအား အကျယ် တဝင့် ရှင်းလင်းပြောကြားခဲ့ပြီး ဥပဒေပါပြဋ္ဌာန်းချက်များကိုလည်း သိရှိလိုက်နာ ဆောင်ရွက်ရန် လိုအပ်ကြောင်း အသိပညာပေးဆွေးနွေး၍ လိုက်နာမှုမရှိပါက အရေးယူဆောင်ရွက် သွားမည့် အခြေအနေများအား အသိပေးခဲ့ကာ လက်ကမ်းစာစောင်များလည်း ဖြန့်ဝေခဲ့ကာ ဆက်လက်၍လည်း ဈေးကွက်စောင့်ကြည့်စစ်ဆေးခြင်းများ ဆောင်ရွက်သွားမည်ဖြစ်ကြောင်း သတင်း ရရှိပါသည်။

DOCA(မန္တလေး)

    စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူးနှင့် ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ မီးသတ်ဦးစီးဌာန၊ မြန်မာနိုင်ငံရဲတပ်ဖွဲ့တို့နှင့် ပူးပေါင်း၍ စျေးကွက်တွင်းရောင်းချနေသော စက်သုံးဆီများအား သတ်မှတ်အချိန်အတွယ်နှင့် အရည်အသွေး စံချိန်စံညွှန်းပြည့်မီခြင်းရှိ/မရှိ၊ MSMEနှင့် စက်မှုလုပ်ငန်းများအတွက် စက်သုံးဆီလိုအပ်ချက်များ ဝယ်ယူရာတွင်အဆင်ပြေစေရေးနှင့် စက်သုံးဆီများပြတ်လပ်မှုရှိ/မရှိ ၂၀၂၄ ခုနှစ်၊ ဒီဇင်ဘာလ (၁၆) ရက်နေ့တွင် မိတ္ထီလာမြို့နယ် ၊ မိတ္ထီလာ-ကျောက်ပန်းတောင်းပေါ်ရှိ စက်သုံးဆီဆိုင် (၇) ဆိုင်အား ကွင်းဆင်းစစ်ဆေး ဆောင်ရွက်ခဲ့သည်။

     ထိုသို့ကွင်းဆင်းစစ်ဆေးခဲ့ရာတွင် စက်သုံးဆီဆိုင်များသို့ နေ့စဉ်ဆီဝင်ရောက်မှုအခြေအနေများ၊ ဆီဆိုင် ဖွင့်လှစ်/ပိတ်သိမ်းမှုအခြေအနေများ၊  သတ်မှတ်ရည်ညွှန်းစျေးများအတိုင်း ရောင်းချမှု ရှိ/မရှိ၊ တရားမဝင် စက်သုံးဆီများရောင်ချခြင်းမပြုရန်နှင့် စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏ အရည် အသွေး၊ အချိန်အတွယ်ပမာဏနှင့် အလေးချိန် မှန်ကန်မှုရှိ/မရှိ ၊  အရည်အသွေးပြည့်မီမှန်ကန် သည့် သတ်မှတ်ချက်နှင့် ကိုက်ညီသော စက်ဆီ၊ ချောဆီများကိုသာတင်သွင်း ၊ ဖြန့်ဖြူးရောင်းချခြင်း ရှိ/မရှိ ရှောင်တခင်ဝင်ရောက်စစ်ဆေးခဲ့ပြီး စီပွားရေးလုပ်ငန်းရှင်များနေဖြင့် ကုန်စည်ပတ်သက်၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် စားသုံးသူကာကွယ်‌ရေးဥပ‌ဒေပါ စီးပွားရေးလုပ်ငန်းရှင်၏တာဝန်များအကြောင်း အသိပညာပေးဆွေးနွေးခဲ့ပြီး  ဆီဆိုင်များမှစက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကော်မတီမှ သတ်မှတ်ထားသောနှုန်းထားများအတိုင်းသာ ရောင်းချမှုရှိသိရှိရပါသည်။

DOCA(မန္တလေး)

     စားသုံးသူရေးရာဦးစီးဌာန ၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်မင်းနှင့်ဝန်ထမ်းများသည် ၂၀၂၄ ခုနှစ် ၊ ဒီဇင်ဘာလ ၁၃ ရက်နေ့တွင် နံနက် (၁၀:၀၀) ချိန်တွင် မန္တလေးတိုင်းဒေသကြီး၊မိတ္ထီလာခရိုင်၊ ဝမ်းတွင်း မြို့နယ်၊ အမှတ်(၁)အောင်မင်္ဂလာရပ် သဲတောမြို့ ရှိ Shwe Thedaw Company Limited ၏ ယက္ကန်းစက်ရုံအား ချည်ထည်များသွင်းကုန်လိုင်စင်ရရှိရေးအတွက် လုပ်ငန်းများအမှန်တကယ် ဆောင်ရွက်နေခြင်းရှိ/မရှိ မြေပြင်ကွင်းဆင်းစစ်ဆေးခဲ့ ကြောင်း သိရှိရသည်။

      ထိုသို့ ကွင်းဆင်းရာတွင် Shwe Thedaw Company Limited ၏ ကိန္နရီအမှတ်တံဆိပ် ယက္ကန်းစက်ရုံ ( အောင်ချမ်းမြ အဆင့်မြင့်ချည်ချောအထည်လုပ်ငန်း ) သည် လုပ်သားအင်အား (၁၅၀) ဦးဖြင့် စက်ယက္ကန်းစင် (၂၀)နှင့် လုပ်သားအင်အား (၈၅၀) ဦးခန့်ဖြင့် ဘေးတန်းလုပ်ငန်းခွဲ စက်ယက္ကန်းစင် (၅၁၃) စင်၊ စုစုပေါင်း (၅၃၃) စင်ဖြင့် လည်ပတ်လျက်ရှိရာ တစ်နှစ်လျှင် ကျားဝတ်ပုဆိုးကွင်းပေါင်း (၃၃၆၀၀၀၀) ကွင်းထုတ်လုပ်ပြီး၊ ပြည်တွင်းဈေးကွက်သို့ ဖြန့်ဖြူးရောင်းချလျက်ရှိသော အလားအလာရှိသည့် လုပ်ငန်းတစ်ခုဖြစ်ကြောင်း၊  ယခုအခါ ကုန်ကြမ်းတင်သွင်းခွင့်မရသဖြင့် လုပ်သားများ အလုပ်အကိုင်ရရှိရေးအတွက်သာ ရှေးရှု့၍ ထိန်သိမ်းလည်ပတ်နေရသဖြင့်  လက်ကျန်ကုန်ကြမ်းများဖြင့် စက်ရုံစွမ်းအားပြည့်လည်ပတ်နိုင်ရေး အခက်အခဲဖြစ်လျက်ရှိကြောင်း သိရှိရပါသည်။ 

DOCA(မန္တလေး)