သတင်းနှင့် လှုပ်ရှားမှုများ

              စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံးမှ တာဝန်ရှိသူများသည် မအူပင်မြို့နယ် စားအုန်းဆီထုတ်ကိုယ်စားလှယ်များနှင့် တွေ့ဆုံ၍ စားသုံးသူ ပြည်သူများဆီဝယ်ယူရာတွင် လုပ်ငန်းအဆင်ပြေချောမွေစေရေး မအူပင်မြို့နယ်အနေဖြင့် ဆီရောင်းချမှုလုပ်ငန်းတည်ငြိမ်အောင် ပူးပေါင်းဆောင်ရွက်နိုင်ရေးလုပ်ငန်းများ အဆင်ပြေချောမွေ့စေရန်အတွက် လုပ်ငန်းရှင်များနှင့် တွေ့ဆုံဆွေးနွေးမှုကို မအူပင်ခရိုင်ဦးစီးမှူးရုံး အစည်းအဝေးခန်းမတွင် ဌာနဆိုင်ရာများကိုပါဖိတ်ကြား၍ တွေ့ဆုံဆွေးနွေးမှုပြုလုပ်ခဲ့ကြသည်။  

            တွေ့ဆုံဆွေးနွေးရာတွင် မအူပင်ဦးစီးမှူးရုံးမှ တာဝန်ရှိသူက စားအုန်းဆီထုတ်ကိုယ်စားလှယ်များကို မအူပင်ခရိုင်အတွက် ဆီဘောက်ဆာကားများ အချိန်နှင့် တပြေးညီရောက်ရှိပြီး စားအုန်းဆီထုတ်ယူခွင့်ခွဲတမ်းများကို စနစ်တကျထုတ်ယူပြီးငွေပေးချေကာ သတ်မှတ်နေရာများတွင် စနစ်တကျထုတ် ယူနိုင်ရန်ကိုလည်းကောင်း၊ ဆီရောင်းချခွင့် ကိုယ်စားလှယ်ဆိုင်များမှ စားသုံးသူပြည်သူများ တစ်လ ၃ကြိမ် တစ်ကြိမ်လျှင် ၅၀ကျပ်သားဖြင့် ၁ပိဿာ ၅၀ကျပ်သားကို သတ်မှတ်ရက်နှင့် သတ်မှတ်ချိန်အတွင်း စနစ်တကျ စားသုံးသူပြည်သူလက်ထဲ ရောက်ရှိအောင်ရောင်းချပေးနိုင်ရန် စီစဉ်ဆောင်ရွက်ရန်လိုအပ်ပါကြောင်း၊ စားသုံးဆီထုတ်ယူခွင့်စာအုပ်နှင့်အတူ လာရောက်ထုတ်ယူသူ ပြည်သူများကိုလည်း သေချာစိစစ်မှတ်သားပြီး ရောင်းချရန်ကိုလည်းကောင်း၊ စားအုန်းဆီထုတ်ယူခွင့် စာအုပ်များပျောက်ဆုံးခြင်း၊ ထားသိုသိမ်းဆည်းမှုမှားယွင်း၍ စုတ်ပြဲခြင်းများဖြစ်ပေါ်လာသည်ကို စိစစ်တွေ့ရှိရ၍ ဆီထုတ်ကိုယ်စားလှယ်နှင့် ဌာနဆိုင်ရာများက သေချာစိစစ်ဆောင်ရွက်ရန် အမှတ်တကယ်ပျောက်ဆုံး၊ ပျက်စီးပါကလည်း  ရပ်ကွက်ထောက်ခံချက်နှင့်အတူ ကိုယ်တိုင်ပျောက်ဆုံးလျောက်ထားရေးစာဖြင့် ဌာနဆိုင်ရာများကစိစစ်ထုတ်ယူနိုင်ရန် စီစဉ်ဆောင်ရွက်ရန်လိုအပ်ကြောင်း၊ မလိုအပ်ပဲ ဆီထုတ်ယူခွင့်စာအုပ်များ ဖောင်းပွမည်ဖြစ်သဖြင့် အားလုံးသေချာစိစစ်ပူးပေါင်းဆောင်ရွက်ပေးနိုင်ရန်တို့ကို ရှင်းလင်းဆွေးနွေးခဲ့ပြီး မအူပင်ဆီရောင်းချသူ ကိုယ်စားလှယ်များမှ မအူပင်ခရိုင်အတွင်း ဆီကုန်ဈေးနှုန်းတည်ငြိမ်နိုင်စေရေး အလေးပေးပူးပေါင်းဆွေးနွေးခဲ့ပြီး လုပ်ငန်းရှင် (၁၀)ဦးတက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

       ပြည်ခရိုင်အတွင်းရှိ ဆန်ဆိုင်၊ ဆန်ပွဲရုံများနှင့် နဝဒေးပွဲရုံတန်းများတွင် ဆန်ဈေးနှုန်းများမြှင့်တင်ရောင်းချခြင်းရှိ/မရှိ၊ သတ်မှတ်ရည်ညွှန်းဈေးနှင့်အညီ ရောင်းချမှုရှိ/မရှိတို့ကို (၂၂-၁၁-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် ခရိုင်ကုန်ဈေးနှုန်းတည်ငြိမ်ရေးအဖွဲ့ဖြင့် ကွင်းဆင်းစစ်ဆေးဆောင်ရွက်ရာတွင် ဈေးကွက်အတွင်း လက်လီ/ လက်ကားရောင်းချလျက်ရှိသော ဆိုင်၊ ပွဲရုံများအနေဖြင့် သတ်မှတ်ရည်ညွှန်းဈေးထက် (၁၀၀၀-၁၅၀၀)ကျပ်နှုန်းသာ အနည်းအများကွာခြားမှုရှိကြောင်း စစ်ဆေးတွေ့ရှိရပါသည်။

         ပြည်ခရိုင်၊ စားသုံးသူရေးရာဦးစီးဌာန၊ အစည်းအဝေးခန်းမ၌ နေ့လယ် (၁၄:၀၀)နာရီအချိန်တွင် ဆန်ဆိုင်နှင့် ဆန်ပွဲရုံလုပ်ငန်းရှင်များအား ခေါ်ယူတွေ့ဆုံ၍ ဆန်ဈေးနှုန်းများမြှင့်တင်ရောင်းချခြင်း မျိုးမပြုလုပ်ရန်နှင့် လစဉ်ထွက်ရှိသော သင့်တင့်မျှတသောဈေးနှုန်း၊ ဈေးကွက် (Reasonable Market Price)ထုတ်ပြန်ချက်နှင့်အညီရောင်းချရေး တွေ့ဆုံဆွေးနွေးဆောင်ရွက်ခဲ့ပြီး ဆွေးနွေးပွဲသို့ ဆန်ဆိုင်၊ ဆန်ပွဲရုံလုပ်ငန်းရှင် (၂၃)ဦးတက်ရောက်ခဲ့ကြောင်းသိရှိရပါသည်။

DOCA(ပဲခူး)

            ၂၆.၁၁.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ပြည်နယ်ဦးစီးမှူးရုံးခန်း၌ “အောင်” အမှတ်တံဆိပ် သဘာဝမြေဩဇာထုတ်လုပ်သည့် လုပ်ငန်းရှင်နှင့် တွေ့ဆုံဆွေးနွေးခဲ့သည်။  

           ထိုသို့ တွေ့ဆုံဆွေးနွေးရာတွင် ပြည်နယ်ဦးစီးမှူးက သဘာဝမြေဩဇာလုပ်ငန်းရှင်အား လုပ်ငန်းလည်ပတ်မှုအခြေအနေ၊ ကုန်ကြမ်းဝယ်ယူစုဆောင်းမှု၊ အသုံးပြုသည့်ကုန်ကြမ်း အမျိုးအစားများ၊ တစ်နေ့ထုတ်လုပ်မှု၊ မြေဩဇာတစ်အိတ်ထုတ်လုပ်ရန်ကုန်ကျစရိတ်၊ အကျိုးအမြတ်၊ ဈေးနှုန်း၊ ဈေးကွက်အခြေအနေများ၊ ကြုံတွေ့ရသောအခက်အခဲများကို ဆွေးနွေးမေးမြန်းရာ လုပ်ငန်းရှင်သည် ကုန်ကြမ်းသုံးစွဲမှုအနေဖြင့် နွားချေး၊ ကြက်ချေး၊ ဝက်ချေး၊ စပါးမှုန်၊ ပဲဖတ်၊ EM(အနုဇီဝပိုးရည်) တို့ကိုအသုံးပြုကြောင်း၊ သဘာဝမြေဩဇာ 50 kg ပါတစ်အိတ်ထုတ်လုပ်ရန် ကုန်ကျစရိတ်မှာ (၁၆၀၀၀)ခန့် ကုန်ကျကြောင်း၊ ရောင်းချရာတွင် တစ်အိတ်လျှင် (၂၀၀၀၀) ကျပ်ဖြင့် ရောင်းချသဖြင့် တစ်အိတ်လျှင် (၄၀၀၀) ကျပ်အမြတ်ကျန်ရှိကြောင်း၊ ထုတ်လုပ်မှုအနေဖြင့် တစ်နေ့လျှင် 50 kg ပါအိတ် (၅၀) ခန့် ထုတ်လုပ်နိုင်ကြောင်း၊ ဈေးကွက်အနေဖြင့် ချောင်းဆုံ၊ မော်လမြိုင်၊ ပေါင်၊ ထားဝယ်မြို့များသို့ တင်ပို့ရောင်းချကြောင်း၊ လုပ်သား (၇) ဦးအား အလုပ်အကိုင်ဖန်တီးပေးနိုင်ကြောင်း၊ အခက်အခဲအနေဖြင့် မတည်ရင်းနှီးငွေအခက်အခဲရှိကြောင်းဆွေးနွေးခဲ့ရာ ပြည်နယ်ဦးစီးမှူးက နိုင်ငံ့စီးပွားမြှင့်တင်ရေးရန်ပုံငွေမှ လုပ်ငန်းရှင်များအား မတည်ရင်းနှီးငွေထုတ်ချေးပေးလျက်ရှိကြောင်း သိရှိရပါသည်။

DOCA(မွန်)

             မွန်ပြည်နယ်၊ သထုံခရိုင်၊ သထုံမြို့နယ်၊ စားသုံးသူရေးရာဦးစီးဌာနမှ ဦးစီးအရာရှိ ဦးအောင်ကျော်မင်း၊ မြို့နယ်တာဝန်ခံ ဦးထိန်လင်းထွန်းနှင့် ဝန်ထမ်းများသည် ၂၂.၁၁.၂၀၂၄ ရက်နေ့ နံနက် (၁၀:၀၀) နာရီအချိန်တွင် သထုံမြို့နယ်၊ အခြေခံပညာမူလတန်းကျောင်း၊ အောင်စိုင် (တမံကြီး)ကျေးရွာ၌ စားသုံးသူကာကွယ်ရေးအသိပညာပေး ဟောပြောဆွေးနွေးခဲ့ပါသည်။

             ထိုဟောပြောပွဲတွင် ကျောင်းအုပ်ဆရာကြီးမှ အဖွင့်အမှာစကားပြောကြားပြီး စားသုံးသူရေးရာဦးစီးဌာနမှ ဦးစီးအရာရှိ ဦးအောင်ကျော်မင်းမှ ဌာန၏မျှော်မှန်းချက်၊ ရည်မှန်းချက်၊ စားသုံးသူအခွင့်အရေး (၈) ချက်နှင့် တာဝန် (၄) ချက်၊ စားသုံးသူကာကွယ်ရေးဥပဒေအကြောင်းသိကောင်းစရာနှင့် ဘေးအန္တရာယ်ဖြစ်စေသော ဆိုးဆေးများအကြောင်းကို ရှင်းလင်းပြောကြားခဲ့ကြောင်းသိရသည်။

            ဆက်လက်၍ သထုံမြို့နယ်တာဝန်ခံ ဦးထိန်လင်းထွန်းမှ စားသုံးသူများနစ်နာဆုံးရှုံးမှုဖြစ်ပေါ်လာပါက တိုင်ကြားနိုင်သည့်နည်းလမ်းများ၊ ကုန်အညွှန်းအမှတ်အသားပြည့်စုံမှုရှိသော ကုန်စည်များကိုသာ ရွေးချယ်ဝယ်ယူအသုံးပြုကြရန် အကျယ်တဝင့်ဟောပြောဆွေးနွေးခဲ့ပြီး အဆိုပါအသိပညာပေးဟောပြောပွဲသို့ ကျောင်းအုပ်ဆရာကြီး ဦးရွှေမောင်သိန်းနှင့် ဆရာ၊ ဆရာမ (၃) ဦး၊ ကျောင်းသား၊ ကျောင်းသူ (၁၅၅) ဦး တက်ရောက်ခဲ့ပြီး မြို့နယ်တာဝန်ခံ ဦးထိန်လင်းထွန်းမှ ကျောင်းအုပ်ဆရာကြီးအား လက်ကမ်းစာစောင်များ ပေးအပ်ခဲ့ကြောင်း သတင်းရရှိပါသည်။

DOCA(မွန်)

           မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံ ဒေါ်ထက်ထက်နွေဦးသည် ၂၆.၁၁.၂၀၂၄ ရက်နေ့တွင် မြို့နယ်ပြန်ကြားရေးနှင့်ပြည်သူ့ ဆက်ဆံရေးဦးစီးဌာနနှင့် ပူးပေါင်း၍ ချောင်းဆုံမြို့နယ်၊ အ.မ.က (ကွမ်လမိုင်း) ကျောင်းမုန့်ဈေးတန်းအား ကွင်းဆင်းစစ်ဆေးခဲ့ကြောင်း သိရှိရပါသည်။

            ထိုသို့ ကွင်းဆင်းစစ်ဆေးရာတွင် စားသုံးသူပြည်သူများ ထုတ်ကုန်လုံခြုံစိတ်ချရမှုရှိစေရေးနှင့် ကျောင်းမုန့်ဈေးတန်းအတွင်းရှိ အသင့်စားမုန့်များမှာ  မြန်မာစာကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/မရှိကို သက်ဆိုင်ရာကျောင်းအကျိုးတော်ဆောင်များနှင့် ဈေးကွက်ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(မွန်)