စားသုံးသူစွမ်းဆောင်နိုင်မှုကို မြှင့်တင်နိုင်ရေးအတွက် စားသုံးသူကာကွယ်ရေးနှင့်ပတ်သက်၍ အသိပညာဗဟုသုတပြည့်ဝသော စားသုံးသူများ ပြုစုပျိုးထောင်ပေးရန်နှင့် စားသုံးသူများ ဘေးအန္တရာယ် ကင်းရှင်းရေး၊ ကျန်းမာရေး ၊ စိတ်ကျေနပ်မှု ရရှိစေရေးအတွက် အာမခံချက်ပေးနိုင်သော အရည်အသွေး မြင့်မားသည့် ကုန်စည် သို့မဟုတ် ဝန်ဆောင်မှုများကို ဖော်ဆောင်ဖြည့်ဆည်းပေးနိုင်ရန် ရည်ရွယ်လျက် စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ခရိုင်ဦးစီးမှူး ဦးဇေယျာအောင် (လက်ထောက် ညွှန်ကြားရေးမှူး)သည် ၁၆-၇-၂၀၂၆ ရက်နေ့ ၁၁:၀၀ နာရီအချိန်တွင် မြစ်ကြီးနားမြို့နယ် အထွေထွေ အုပ်ချုပ်ရေးဦးစီးဌာန၊ မနောရွှေပြည်ခန်းမ တွင်ကျင်းပပြုလုပ်သည့် ရပ်ကွက်/ ကျေးရွာအုပ်ချုပ်ရေးမှူး များ စွမ်းဆောင်ရည်မြှင့်တင်ရေးသင်တန်းတွင် မြစ်ကြီးနားမြို့နယ်ရှိ ရပ်ကွက်/‌ ကျေးရွာအုပ်ချုပ် ရေးမှူး (၄၀)ဦး အား အသိပညာပေးဟောပြောခဲ့ပါသည်။

          ထိုသို့ အသိပညာပေးဟောပြောခဲ့ရာတွင်‌ စားသုံသူကာကွယ်ရေးဥပဒေပြဋ္ဌာန်းမှုအခြေအနေ၊  စားသုံးသူကာကွယ်ရေး၊ စားသုံးသူနှင့်စီးပွားရေးလုပ်ငန်းရှင်၏ အဓိပ္ပာယ်ဖွင့်ဆိုချက်၊ စားသုံးသူ ကာကွယ်ရေးဥပဒေပါ စားသုံးသူအခွင့်အရေး(၈)ချက်နှင့် တာဝန်(၄)ချက်အကြောင်း၊ စီးပွားရေး လုပ်ငန်းရှင်၏ တာဝန်များအကြောင်း၊ စားသုံးသူအခွင့်အရေးများ ချိုးဖောက်ခြင်းခံရပါက ကုစားခွင့် ရရှိနိုင်ရေးဆောင်ရွက်နိုင်သည့် နည်းလမ်းများနှင့် ဖြေရှင်းဆောင်ရွက်ပေးနေမှု အခြေအနေများ အကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သိသာထင်ရှားစွာ ဖော်ပြရမည့် အချက်များအကြောင်း၊ ဥပဒေပါတားမြစ်ချက်၊ ပြစ်မှုနှင့်ပြစ်ဒဏ်များအကြောင်း၊ စားသုံးသူကာကွယ်ရေး ဆိုင်ရာ လုပ်ငန်းဆောင်ရွက်နိုင်မှုအခြေအနေများ၊ အွန်လိုင်း‌‌ရောင်းချခြင်းနှင့်စပ်လျဉ်း၍ မှတ်ပုံတင် ဆောင်ရွက်ရမည့် လုပ်ငန်းစဉ်များနှင့် အွန်လိုင်းမှ ဝယ်ယူသုံးစွဲရာတွင် မှတ်ပုံတင်ထားခြင်းရှိ/မရှိ စိစစ်ရွေးချယ်ရန်အချက်များအကြောင်း၊ ဆန်စပါးသိုလှောင်ရုံပိုင်ရှင်များအား (My RO)တွင် မှတ်ပုံတင် လျှောက်ထားရာ၌ လိုအပ်သောအချက်များအကြောင်းကို အသိပညာပေး ဟောပြောခဲ့ကြောင်း သတင်းရရှိပါသည်။ 

DOCA(ကချင်)

    စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးဘောမ်ဇုံး (ရုံးအုပ်) ဦးဆောင်သည့် ခရိုင်စားသုံးသူရေးရာဦးစီးဌာနမှဝန်ထမ်းတို့သည် ၁၇-၇-၂၀၂၆ ရက်နေ့တွင် မြစ်ကြီးနားမြို့၊ အင်ဂျန်ဒုံရပ်ကွက်ရှိ လက်လီရောင်းချလျက်ရှိသော ဒေါ်ရွှေတူး(ကုန်စုံဆိုင်)သို့သွားရောက်၍ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ ကိုက်ညီမှု ရှိ၊ မရှိ ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးခဲ့ရာ “Sprite” အမှတ်တံဆိပ်ပါ ရှောက်-သံပုရာသီး အနံ့အရသာအချိုရည် (အသင့်သောက်အချိုရည်အမျိုးမျိုး)တွင် မြန်မာနိုင်ငံစားသုံးသူကာကွယ်ရေး ကော်မရှင်က ထုတ်ပြန်ထားသော ညွှန်ကြားချက်အမှတ်(၂/၂၀၁၉)အရ ကုန်စည်အမျိုးအစားအလိုက် မြန်မာဘာသာဖြင့် ဖော်ပြရမည့်အချက်(၇)ချက်အနက် အစားအသောက်များကုန်စည်အုပ်စုရှိ အသင့် သောက်အချိုရည်အမျိုးမျိုးတွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏနှင့် ထားသိုသိမ်းဆည်းမှုအညွှန်းနှင့် ဓါတ်မတည့်ကြောင်းဖော်ပြချက်တို့ကို မြန်မာဘာသာဖြင့် ကိုက်ညီ ပြည့်စုံစွာဖော်ပြပါရှိကြောင်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲတို့ ဖော်ပြထား ကြောင်း၊ ပြည်တွင်း၌ထုတ်လုပ်သော ကုန်စည်ဖြစ်၍ ထုတ်လုပ်သည့် လုပ်ငန်းအမည်နှင့်လိပ်စာ ပြည်စုံစွာပါရှိကြောင်းနှင့် သက်ဆိုင်ရာအစိုးရဌာနများကဖော်ပြရန် သတ်မှတ်ထားသော အချက် အလက်များ ဖော်ပြထားကြောင်းစစ်ဆေးတွေ့ရှိရပြီး လုပ်ငန်းရှင်အား သက်တမ်းကုန်ဆုံးသည့် ကုန်စည်များ၊ ကုန်အညွှန်းအမှတ်အသားပြည့်စုံမှုမရှိသည့် ကုန်စည်များ ဈေးကွက်အတွင်း ရောင်းချခြင်း မပြုလုပ်ရန်နှင့် ဆင်တူရိုးမှား အတုအပ အမှတ်တံဆိပ်များ ဝယ်ယူရောင်းချခြင်း မပြုကြရန်တို့ကို အသိပညာ ပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(ကချင်)

          ၂၀၂၆ ခုနှစ်၊ ဇူလိုင်လ ၂၀ ရက်နေ့၊ (၁၃း၃၀) နာရီအချိန်တွင် စားသုံးသူရေးရာဦးစီးဌာန၊ မြိတ်ခရိုင် ဦးစီးမှူးရုံးမှ ဒုခရိုင်ဦးစီးမှူးနှင့်ဝန်ထမ်းများသည် မြိတ်မြို့၊ မြစ်ငယ်ရပ်၊ မြစ်ငယ်အခြေခံပညာမူလတန်းကျောင်းတွင် စားသုံးသူကာကွယ်ရေးဥပဒေအကြောင်း သိကောင်းစရာများအသိပညာပေးဟောပြောဆွေးနွေးခဲ့ကြောင်း သိရှိရပါသည်။

          အဆိုပါအသိပညာပေးဟောပြောပွဲတွင် မြိတ်ခရိုင်ဦးစီးမှူးရုံးမှ၊ ဒုခရိုင်ဦးစီးမှူးမှ စားသုံးသူ‌ရေးရာ ဦးစီးဌာန၏ ဆောင်ပုဒ်၊ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေပါ စားသုံးသူအခွင့်အရေး(၈)ချက်နှင့် စားသုံးသူ၏တာဝန်များ၊ ကုန်စည်များ၏ ကုန်အညွှန်းအမှတ်အသားဖော်ပြခြင်းဆိုင်ရာများအကြောင်း၊ စားသုံးသူအခွင့်အရေးများ နစ်နာဆုံးရှုံးမှုများရှိလာပါက တိုင်ကြားနိုင်သည့် နည်းလမ်းများစသည့်သိကောင်းစရာများအကြောင်း အသိပညာပေးဟောပြောဆွေးနွေးခဲ့ကာ ဟောပြောပွဲအား ဆရာ/ ဆရာမနှင့် ကျောင်းသား/ ကျောင်းသူ ၅၀ ဦးခန့်တက်‌ရောက်ခဲ့ပြီး (၁၄း၁၅) နာရီအချိန်တွင် အောင်မြင်စွာပြီးမြောက်ခဲ့ကြောင်း သိရှိရပါသည်။

DOCA(တနင်္သာရီ)

        ၂၀၂၆  ခုနှစ်၊ ဇူလိုင်လ ၂၀ ရက်နေ့၊ နံနက် (၁၁း၀၀) နာရီအချိန်တွင် စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံး၊ မြိတ်မြို့မှ ဒုခရိုင်ဦးစီးမှူးနှင့်ဝန်ထမ်းများသည် ဦးစားပေးဝန်ဆောင်မှုကဏ္ဍ(၃) ရပ်မှ ဧပြီလမှ ဇူလိုင်လအတွင်း စစ်ဆေးဆောင်ရွက်ရမည့် အစားအသောက်ရောင်းချသည့် ဝန်ဆောင် မှုနှင့်ပတ်သက်၍ မြိတ်မြို့၊ ကွက်သစ်ရပ်၊ ရွှေကျင်တိုက်လမ်း၊ Oishi Hot Pot ဆိုင်အား အထွေထွေအုပ်ချုပ်ရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့် ပူးပေါင်း၍ စစ်ဆေးခြင်းဆောင်ရွက်ခဲ့ကြောင်း သိရသည်။

        အဆိုပါ အစားအသောက်ရောင်းချသည့် ဝန်ဆောင်မှုနှင့် ပတ်သက်၍ စစ်ဆေးရာတွင် အစားအသောက်စျေးနှုန်းများနှင့် ပတ်သက်၍ သတင်းအချက်အလက်များ ပွင့်လင်းမြင်သာစွာ ဖော်ပြထားရှိမှုများ ရှိ/ မရှိ၊  အစားအသောက်ပြင်ဆင်ချက်ပြုတ်သည့်နေရာများ သန့်ရှင်းသပ်ရပ်မှုများ ရှိ/မရှိ၊ အစားအသောက်များ လတ်ဆတ်သန့်ရှင်းမှု ရှိ/ မရှိ၊ ဝန်ဆောင်မှုပေးသည့်ဝန်ထမ်းများ တစ်ကိုယ်ရည် သန့်ရှင်းမှု ရှိ/ မရှိနှင့် စွန့်ပစ်ပစ္စည်းများအား စနစ်တကျထုတ်ပိုးသိမ်းဆည်းထားရှိမှုများ ရှိ/မရှိ စစ်ဆေး ခြင်းများဆောင်ရွက်ခဲ့ရာ သတ်မှတ်ချက်များနှင့် ကိုက်ညီစွာရောင်းချလျက်ရှိကြောင်း စစ်ဆေးတွေ့ရှိရသဖြင့် သက်ဆိုင်ရာမိတ်ဖက်ဌာနဆိုင်ရာများ၏ ဥပဒေ၊ ညွှန်ကြားချက်များကိုလည်းလိုက်နာ ဆောင်ရွက်ရန်လိုအပ်ကြောင်း အသိပညာပေးပြောကြားခဲ့ကြောင်း သိရှိရပါသည်။

DOCA(တနင်္သာရီ)

        ၂၀၂၆ ခုနှစ်၊ ဇူလိုင်လ ၂၀ ရက်နေ့၊ နံနက်(၀၉း၀၀)နာရီအချိန်တွင် စားသုံးသူရေးရာဦးစီးဌာနမှ၊ ဒုခရိုင်ဦးစီးမှူးနှင့် ဝန်ထမ်းများသည် မြိတ်မြို့၊ ကွက်သစ်ရပ်နှင့် ထားဝယ်စုရပ်ရှိ ကုန်စုံဆိုင်များသို့ သွားရောက်၍ ဇူလိုင်လအတွင်း စစ်ဆေးဆောင်ရွက်ရမည့် ဦးစားပေးကုန်စည်များမှ အသင့်စားခေါက်ဆွဲ/ ကြာဇံခြောက်များ၊ ဟင်းချိုမှုန့်များတွင် စားသုံးသူကာကွယ်ရေးဥပ‌ဒေပါ ကုန်အညွှန်းအမှတ်အသား ဖော်ပြပါရှိမှုများ ရှိ/မရှိအား ခရိုင်စီမံကိန်းဦးစီးဌာန၊ ခရိုင်စိုက်ပျိုးရေးဦးစီးဌာန၊ ခရိုင်ပြည်သူ့ကျန်းမာ ရေးဦးစီးဌာန၊ ဗဟိုစာရင်းအင်းအဖွဲ့၊ မြို့နယ်စည်ပင်သာယာရေးအဖွဲ့ဖြင့်ပူးပေါင်း၍ စျေးကွက်စောင့်ကြည့် စစ်ဆေးခြင်းဆောင်ရွက်ခဲ့ကြောင်း သိရှိရပါသည်။

     အဆိုပါ စျေးကွက်စောင့်ကြည့်စစ်ဆေးရာတွင် ကုန်စုံဆိုင်များတွင် ရောင်းချလျှက်ရှိသော အသင့်စားခေါက်ဆွဲ/ ကြာဇံခြောက်များတွင် စားသုံးသူကာကွယ်ရေးဥပဒေပါ ကုန်စည်များ၏ ကုန်အညွှန်းအမှတ်အသားဖော်ပြခြင်းနှင့် စပ်လျဥ်း၍ မြန်မာဘာသာဖြင့်ဖော်ပြပါရှိရမည့် အမျိုးအမည်၊ အရွယ်အစား၊ အရေတွက်၊ အသားတင်ပမာဏ၊ ထားသို့သိမ်းဆည်းမှုအညွှန်း၊ ဓါတ်မတည့်ကြောင်း၊ သုံးစွဲပုံနည်းလမ်းစသည့် ဖော်ပြချက်များပါရှိမှု ရှိ/ မရှိ၊ ထုတ်လုပ်သည့် ရက်စွဲ၊ သက်တမ်းကုန်ဆုံး ရက်စွဲ၊ ထုတ်လုပ်/ ဖြန့်ဖြူးသည့်လိပ်စာများ ထည့်သွင်းပါရှိမှု ရှိ/ မရှိနှင့် သက်ဆိုင်ရာဌာနများမှ ထုတ်ပြန်ထားသည့် ဥပဒေ၊ ညွှန်ကြားချက်များနှင့်ကိုက်ညီမှုများ ရှိ/ မရှိနှင့် တရားမဝင် တင်သွင်းရောင်းချလျက်ရှိသော ကုန်စည်များရောင်းချမှုများ မရှိစေရေး စစ်‌ဆေးခြင်းများဆောင်ရွက်ခဲ့ရာ သတ်မှတ်ချက်များနှင့် ပြည့်စုံမှန်ကန်စွာပါရှိသည့် တရားဝင်ကုန်စည်များကိုသာ ရောင်းချလျက်ရှိသည်ကို စစ်ဆေးတွေ့ရှိခဲ့ကြောင်း သိရှိရပါသည်။

DOCA(တနင်္သာရီ)