သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူး၏ လမ်းညွှန်ချက်၊ ကန့်ဘလူခရိုင်ဦးစီးမှူး၏ကြီးကြပ်မှုတို့ဖြင့် ကျွန်းလှမြို့နယ်တာဝန်ခံသည် အွန်လိုင်းရောင်းချခြင်း၊ Online Sale လုပ်ငန်းများ မှတ်ပုံတင်လျှောက်ထားခြင်းနှင့်ပတ်သက်၍ ရှင်းလင်းပြောကြားဆွေးနွေးခြင်းကို (၂၃-၉-၂၀၂၄)ရက်နေ့၊ နံနက် (၀၉:၀၀) နာရီအချိန်တွင်  ကျွန်းလှမြို့၊ သစ်ရာမြိုင်ရပ်ကွက်ရှိ ဆီစက်/ဆန်စက်လုပ်ငန်းရှင်များအသင်းဥက္ကဋ္ဌအိမ်တွင် ကျင်းပပြုလုပ်ခဲ့ပါသည်။

          အဆိုပါဆွေးနွေးပွဲကို စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံ ဒေါ်ဝေဝေအောင်က Online Sale လုပ်ငန်းများ မှတ်ပုံတင်လျှောက်ထားခြင်းနှင့်ပတ်သက်၍ ရှင်းလင်းပြောကြားဆွေးနွေးခဲ့ရာ အွန်လိုင်းစနစ်ရောင်းချခြင်းလုပ်ငန်းကို  အရေးကြီးဝန်ဆောင်မှုလုပ်ငန်းအဖြစ်သတ်မှတ်သည့် အမိန့် အကြောင်း၊ ကုန်စည်နှင့်ဝန်ဆောင်မှုလုပ်ငန်းကို အွန်လိုင်းစနစ်ဖြင့် အရောင်းအဝယ်လုပ်ကိုင်နေသူ မည်သူမဆို မှတ်ပုံတင်လျှောက်ထားရရှိပြီးမှသာ လုပ်ကိုင်ရမည်ဖြစ်ကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းကို ဆောင်ရွက်လိုသူများအနေဖြင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနက သတ်မှတ်ထားသော လျှောက်လွှာပုံစံများတွင် ဖြည့်သွင်းပြီး အွန်လိုင်း(Online)စနစ်ဖြင့် ဦးစီးဌာနသို့ လျှောက်ထားရမည်ဖြစ်ကြောင်း၊ အွန်လိုင်း(Online) မှတ်ပုံတင်လျှောက်ထားရာတွင် အမျိုးအစား (၂)မျိုးရှိပြီး အမျိုးအစား(၁)ကုမ္ပဏီ(သို့မဟုတ်)စီးပွားရေးအဖွဲ့အစည်းအတွက်ဖြစ်ပြီး၊ အမျိုးအစား (၂)မှာ လူပုဂ္ဂိုလ်တစ်ဦးချင်းအတွက်ဖြစ်ကြောင်း၊ မှတ်ပုံတင်လျှောက်ထားရာတွင် ပေးသွင်းရမည့် မှတ်ပုံတင်ကြေးများ၊ လိုအပ်သည့်အချက်အလက်များ၊ လိုက်နာဆောင်ရွက်ရမည့် စည်းကမ်းချက်များ၊ သက်တမ်းတိုးကြေးများ၊ ပြင်ဆင်ချက်တစ်ချက်ပြင်ဆင်လိုလျှင် သတ်မှတ်ထားသည့် ပြင်ဆင်ကြေးများအကြောင်းနှင့် မှတ်ပုံတင်လက်မှတ်ရရှိထားပြီး ရောင်းချနေသူများအတွက် ရရှိနိုင်မည့်အခွင့်အရေးများအကြောင်းတို့ကို အွန်လိုင်း ရောင်းချသူများနှင့် ဆန်စက်/ဆီစက်လုပ်ငန်းရှင်စုစုပေါင်း(၁၅)ဦးတို့အား အကျယ်တဝင့်ရှင်းလင်းပြောကြားခဲ့ပြီး ဆီစက်လုပ်ငန်းရှင်များက ကုန်အညွှန်းအမှတ်အသား လျှောက်ထားလိုသူများအား  ကုန်အညွှန်းအမှတ်အသားလျှောက်ထားရန် ကူညီဆောင်ရွက်ပေးခဲ့ပြီး ကုန်အညွှန်းအမှတ်အသားများဖော်ပြပါရှိသည့် (၂/၂၀၁၉) ညွန်ကြားချက်ပါ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)       

    စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ညောင်လေးပင်ခရိုင်ဦးစီးမှူးရုံးရှိ ထုတ်ကုန်လုံခြုံစိတ်ချရမှု ဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ဝန်ထမ်းများသည် (၂၃.၉.၂၀၂၄) ရက်နေ့၊ နံနက် (၁၀:၀၀)နာရီအချိန်တွင် ညောင်လေးပင်မြို့ပေါ်ရှိ စားအုန်းဆီ လက်လီ/လက်ကား ရောင်းချနေသော ကုန်စုံဆိုင်များအား သွားရောက်ကာကွင်းဆင်းစစ်ဆေးခြင်းများ ပြုလုပ်ဆောင်ရွက် ခဲ့ပါသည်။

    ကွင်းဆင်းစစ်ဆေးခြင်းများ ဆောင်ရွက်ရာတွင် စားအုန်းဆီလက်လီ/ လက်ကား ရောင်းချ လျက်ရှိသော လုပ်ငန်းရှင်များအနေဖြင့် သက်ဆိုင်ရာဌာနများမှ ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ ရောင်းချဖြန့်ဖြူးကြရန်တို့ကို ရှင်းလင်းပြောကြားခဲ့၍ စားအုန်းဆီခွဲတမ်းများကို သတ်မှတ် စည်းမျဉ်းစည်းကမ်းများနှင့်အညီ စနစ်တကျဖြန့်ဖြူးရောင်းချရန်၊ အချိန်အတွယ်မှန်ကန်စွာ ရောင်းချကြရန်နှင့် ခွဲတမ်းရရှိသည့်ဆိုင်များအနေဖြင့် ဈေးနှုန်းကို အများမြင်သာသောနေရာများတွင် မြင်သာသော စာလုံးအရွယ်အစားများဖြင့် Vinyl ချိတ်ဆွဲထားရှိရန် အသိပညာပေးပြောကြားခဲ့၍ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ ဆောင်ပုဒ်ဖြစ်သည့် “စားသုံးသူအခွင့်အရေးဦးစားပေး” ဆိုသည့်အတိုင်း စားသုံးသူပြည်သူများသည် စားသုံးသူအခွင့်အရေးနှင့်ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ရပ်ကွက်၊ ကျေးရွာများ၊ ဌာနဆိုင်ရာရုံးများ၊ တက္ကသိုလ်/ကောလိပ်များ၊ တပ်ရင်းတပ်ဖွဲ့များကို စားသုံးသူကာကွယ်ရေးအသိပညာပေးဟောပြောပွဲများဆောင်ရွက်ခြင်း၊ ဈေးကွက်အတွင်း စားသုံးသူများအနေဖြင့် ကုန်စည်နှင့်ဝန်ဆောင်မှုများကိုအသုံးပြုရာတွင် ဘေးအန္တရာယ်ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန် ဈေးကွက်မရောက်မီနှင့် ဈေးကွက်ရောက်ပြီးသောကုန်စည်များကို ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိရာ စားသုံးသူများ၏အခွင့်အရေး (၈)ချက်အနက် ကုန်စည် (သို့မဟုတ်) ဝန်ဆောင်မှုများနှင့်ပတ်သက်သည့် အသိပညာဗဟုသုတများနှင့် လိုအပ်သောအချက်အလက်များကို သိရှိလေ့လာနိုင်ရန်၊ နစ်နာဆုံးရှုံးမှုများကို ရှင်းလင်းတင်ပြနိုင်ရန်၊ တိုင်ကြားနိုင်ခြင်းကို သိရှိစေရန်ရည်ရွယ်၍ ရွှေဘိုမြို့ နယ်အတွင်းရှိ ပြည်သူများအား စားသုံးသူကာကွယ်ရေးဥပဒေ ၂၀၁၉ ပါ အကြောင်းများကို သိရှိလေ့လာနိုင်စေရန် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်၍ ၂၀၂၄ခုနှစ်၊ စက်တင်ဘာလအတွင်း စားသုံးသူကာကွယ်ရေးအသိပညာပေးဆွေးနွေးပွဲ (၁) ကြိမ် ဆောင်ရွက်ခဲ့ပါသည်။

          (၂၀-၉-၂၀၂၄)ရက်နေ့တွင် ရွှေဘိုမြို့၊ အမှတ်(၁၀)ရပ်ကွက်၊  ဂေါက်ကွင်းလမ်းရှိ မြို့ပြနှင့်အိမ်ရာဖွံ့ဖြိုးရေးဦးစီးဌာန၊ ဝန်ထမ်းအိမ်ယာတွင် အသေးစားစက်မှုလက်မှုလုပ်ငန်းဦးစီးဌာနမှကျင်းပသော လူသုံးကုန်ထုတ်လုပ်မှုနည်းပညာသင်တန်းတွင်း စားသုံးသူကာကွယ်ရေးဥပဒေနှင့် ကုန်အညွှန်းအမှတ်အသားအ‌ကြောင်းများ၊ စားသုံးသူများသည် ကုန်စည်နှင့်ဝန်ဆောင်မှုများကိုသုံးစွဲရာတွင် နစ်နာဆုံးရှုံးမှုများရှိလျှင် တိုင်ကြားနိုင်ကြောင်းနှင့် တိုင်ကြားနိုင်သည့်နေရာများအကြောင်း၊ Online Shoppingများ ဝယ်ယူသုံးစွဲရာတွင် သတိပြုဆောင်ရွက်သင့်သည့်အချက်များ၊ အွန်လိုင်းငွေကြေးဝန်‌ဆောင်မှုလုပ်ငန်းများသုံးစွဲရာတွင် သတိပြုလိုက်နာသင့်သည့်အချက်များကို အသိပညာပေးဆွေးနွေးခဲ့ပြီး လက်ကမ်းစာစောင် (၂၀) စောင်ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

     ဧရာဝတီတိုင်း၊ စားသုံးသူရေးရာဦးစီးဌာနမှ ပန်းတနော်မြို့နယ်တာဝန်ခံနှင့်ဝန်ထမ်းများသည် (၂၀-၉-၂၀၂၄) ရက်နေ့တွင် မိတ်ဖက်ဌာနများဖြစ်သော မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ကျန်းမာရေးဦးစီးဌာနတို့နှင့်ပူးပေါင်းကာ  ပန်းတနော်မြို့ပေါ်ရှိ ကုန်မျိုးစုံဆိုင်နှင့် စတိုးဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြပါသည်။

    ကုန်မျိုးစုံဆိုင်နှင့်စတိုးဆိုင်များ၌ ရောင်းချလျက်ရှိသော အသင့်သောက်ကော်ဖီအမျိုးမျိုးတွင် မြန်မာစာ ကုန်အညွှန်းအမှတ်အသားပြည့်စုံစွာဖော်ပြပါရှိမှုရှိ/မရှိကို ဈေးကွက်စောင့်ကြည့်စစ် ဆေးခဲ့ ရာ  မြန်မာဘာသာဖြင့် ကုန်အညွှန်းအမှတ်အသားပြည့်စုံစွာပါရှိသော အသင့်သောက်ကော်ဖီ အမျိုးမျိုးကိုသာ ရောင်းချလျက်ရှိကြောင်းသိရှိရပါသည်။ စားသုံးသူရေးရာဦးစီးဌာနသည် ၂၀၂၄-၂၀၂၅ ခုနှစ်တွင် ဦးစားပေးကုန်စည်ဖြစ်သည့် ကုန်စည် ၁၀မျိုးကို ဈေးကွက်စောင့်ကြည့်စစ်ဆေးရန် ထုတ်ပြန်ထားသဖြင့် အသင့်သောက် ကော်ဖီမစ်ပါဝင်သောကြောင့် ညွှန်ကြားချက်အမှတ် (၂/၂၀၁၉) အရ ရောင်းချမယ့် ကုန်စည်မှာ မြန်မာလို ကုန်အညွှန်းအမှတ်အသားဖော်ပြရာတွင် လွယ်ကူအဆင်ပြေစေရန်အတွက် ထုတ်ပြန်ထားသည့်အတိုင်း ကိုက်ညီသော ကုန်စည်များကိုသာ လုပ်ငန်းရှင်များက ရောင်းချရန် သတ်မှတ်ချက်များကို လိုက်နာဆောင်ရွက်ခြင်းမရှိပါက ထိရောက်စွာ အရေးယူဆောင်ရွက်သွားမည်ဖြစ်ကြောင်း အသိပေး ဈေးကွက်စောင့်ကြည့်စစ်ဆေးဆောင်ရွက်ခဲ့ကြောင်း သိရသည်။

DOCA(ဧရာဝတီ)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ဓနုဖြူမြို့နယ်ဦးစီးမှူးရုံးမှ ဦးခိုင်လွမ်းမိုး (အငယ်တန်းစာရေး)သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ စားသုံး သူကာကွယ်ရေးအသိ ပညာပေး Talk Show ကို ၂၀၂၄ခုနှစ် စက်တင်ဘာလ ၂၀ရက်နေ့ ၊နံနက်(၁၀:၃၀) နာရီ အချိန်တွင် ဓနုဖြူလူထု အခြေပြုဗဟိုဌာန Communit Center ခန်းမ၌ ကျင်းပပြုလုပ်ခဲ့ကြပါသည်။

    အသိပညာပေး ဆွေးနွေးရာတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ မေးမြန်းရာ စားသုံးသူကာကွယ်ရေးဥပဒေနှင့် ရည်ရွယ်ချက်အကြောင်းကို ရှင်းလင်းပေးပါရန်တင်ပြလာ၍  မြို့နယ်ဦးစီးမှူး ဦးဝင်းမင်းစိုးက စားသုံးသူကာကွယ်ရေးဥပဒေ၏ ရည်ရွယ်ချက် (၈)ချက်ရှိကြောင်း၊ စားသုံးသူကာကွယ်ရေး လုပ်ငန်းစဉ်အကြောင်း၊ စားသုံးသူအခွင့်အရေး(၈)ချက်ကိုလည်းကောင်း စားသုံးသူများ အွန်လိုင်းဖြင့်ကုန်စည် ဝန်ဆောင်မှုကို ဝယ်ယူအသုံးပြုရာတွင် အွန်လိုင်းမှတ်ပုံတင်ပြီးသော လုပ်ငန်းများတွင်သာ ဝယ်ယူပြီး အွန်လိုင်းစနစ်ဖြင့် ဝယ်ယူအသုံးပြုခြင်း၏ အားသာချက်၊ အားနည်းချက်များအကြောင်းကိုလည်းကောင်း၊ Ecom Reg System ၏ Report နှင့်ပတ်သက်၍ အသုံးပြုနည်းစနစ်အကြောင်းကိုလည်းကောင်းရှင်းလင်းဆွေးနွေးပြီး အွန်လိုင်းမှတ်ပုံတင်ခြင်းဖြင့် လုံခြုံစိတ်ချရသော အာမခံချက်ရှိသည့် ဆိုရှယ်မီဒီယာသုံးသော အကောင့်များကိုသာ မှာယူအသုံးပြုကြရန်၊ အွန်လိုင်းဖြင့် ဝယ်ယူမှုကြောင့် စားသုံးသူအခွင့်အရေး နစ်နာမှုရှိလာပါကလည်း တိုင်းကြားရှင်းလင်းတင်ပြခွင့်ရှိကြောင်း ပြောကြားခဲ့သည်။ ဆက်လက်၍ မေးမြန်းရာ စားသုံးသူများနစ်နာ ဆုံးရှုံးမှုများနှင့် ကြုံတွေ့ရတဲ့အခါ တိုင်ကြားနိုင်သည့် နည်းလမ်းများကို ပြည်သူများသိရှိနိုင်ရန် ရှင်းလင်းပေးရန် မေးမြန်းလာသဖြင့် စားသုံးသူများ နစ်နာဆုံးရှုံးမှုကြုံတွေ့ရတဲ့အခါ တိုင်ကြားနိုင်တဲ့နည်းလမ်းများအနေနဲ့ကတော့ စားသုံးသူကာကွယ်ရေးလုပ်ငန်းစဉ် လှုပ်ရှားမှုများကို doca.gov.mm website တွင်ဝင်ရောက်လေ့ လာနိုင်ကြောင်းနှင့် Consumer Call Center 1535 သို့တိုင်ကြားနိုင်ကြောင်း၊ စားသုံးသူရေးရာဦးစီးဌာန၏ Facebook Page၊ Play Store တွင် Mobile App၊ Download ရယူပြီး တိုင်ကြားနိုင်ကြောင်း၊ တိုင်း/ပြည်နယ်၊ ခရိုင်၊ မြို့နယ် အသီးသီးတွင် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေး စင်တာများဖွင့်လှစ်ထားပြီး လူကိုယ်တိုင်ဖြစ်စေ၊ စာဖြင့်ဖြစ်စေ၊ ဖုန်းဖြင့်ဖြစ်စေ ဆက်သွယ်တိုင်ကြားနိုင်ပါကြောင်း ရှင်းလင်းပြောကြားခဲ့ပါသည်၊ ဆက်လက်၍ ဘယ်လိုအခြေအနေမျိုးမှာ တိုင်ကြားရမည်လဲဟု မေးမြန်းရာ ဘယ်လိုအခြေအနေမျိုးမှာ တိုင်ကြားရမည်ဆိုလျှင် ကုန်စည်/ ဝန်ဆောင်မှုနှင့် စပ်လျဉ်း၍ စားသုံးသူတွေဟာ ရုပ်ပိုင်းဆိုင်ရာ၊ စိတ်ပိုင်းဆိုင်ရာဖြစ်စေ၊ ဂုဏ်သိက္ခါ ဖြစ်စေ၊ အမည်ဂုဏ်သတင်း ပိုင်ဆိုင်မှု တစ်ရပ်ရပ်ကိုဖြစ်စေ၊ ဥပဒေနှင့် မညီသည့် ထိခိုက်နစ်နာမှုဖြစ်ပေါ်လာပါက တိုင်ကြားနိုင်ပါကြောင်း ပြည်သူများသိရှိရန် ရှင်းလင်းပြော ကြားခဲ့ပါသည်။

     ယခုခေတ်ကာလအနေဖြင့် ပြည်သူများသည် အင်တာနက်အသုံးများလာ၍ Online Shop ကုန်စည် ဝယ်မှုများလာကြပြီး၊ ကြော်ငြာထားသော ကုန်စည်သည် အမှန်တကယ်မှာယူသည့်အခါ  ကုန်ပစ္စည်းအရည် အသွေးကွဲလွဲနေ၍ Online Shop ပစ္စည်းများကို အထူးသတိပြု၍ဝယ်ယူအသုံးပြုကြပါရန် သတိပေးပြောကြား ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)