သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်း ဒေသကြီးဦးစီးမှူးရုံးတွင် ဉာဏ်ရည်တုဆိုင်ရာအသုံးဝင်မှုနှင့် ဆောင်ရန်၊ ရှောင်ရန်အကြောင်း သိကောင်းစရာသင်တန်းအား(၂၈-၁၀-၂၀၂၅)ရက်နေ့မှ (၂၉-၁၀-၂၀၂၅)ရက်နေ့ထိ (၂)ရက်ကို မန္တလေး တိုင်းရုံးရှိ အရာထမ်း၊ အမှုထမ်း(၂၁)ဦးမှ in person ဖြင့်လည်းကောင်း၊  ခရိုင်ဦးစီးမှူးရုံးများရှိ အရာထမ်း၊ အမှုထမ်း(၃၀)ဦးမှ virtualဖြင့်လည်းကောင်း၊ စုစုပေါင်း(၅၁)ဦး တက်ရောက်ခဲ့ကြပါသည်။

      သတင်းအချက်အလက်နည်းပညာများ အချိန်နှင့်တစ်ပြေးညီဖွံ့ဖြိုးနေသော ယနေ့ကမ္ဘာကြီး တွင် နည်းပညာများနေ့စဉ် တိုးတက်လာနေပြီး နေ့စဉ်နှင့်အမျှတိုးတက်နေသော နည်းပညာများကို စဉ်ဆက်မပြတ်လိုက်ပါနိုင်ရန်မှာ အလွန်အရေးကြီးသည့် အကြောင်းအရာတစ်ခုဖြစ်သည်။ AIကဲ့သို့သော နည်းပညာများပေါ်ပေါက်လာပြီး နယ်ပယ်အလိုက်၊ ကဏ္ဍအလိုက်နေ့စဉ်တိုးတက်မှုများ တစ်ရက် နှင့်တစ်ရက်မတူညီအောင်  ပြောင်းလဲတိုးတက်နေသောခေတ်တွင် နည်းပညာအသစ်ဆန်းများနောက် ခေတ်နှင့်အညီ လိုက်ပါနိုင်ရေးကိစ္စမှာ အထူးအရေးပါသော ကိစ္စတစ်ခုဖြစ်လာနေပါသည်။ ထိုကဲ့သို့ တိုးတက်လာသော နည်းပညာခေတ်တွင် နိုင်ငံတော်အစိုးရမှလည်း E-government မဟာဗျူဟာ အစီအမံများဖြင့် နိုင်ငံ့ဝန်ထမ်းများ IT နည်းပညာအရည်အသွေး၊ အရည်အချင်းများ တိုးတက်လာ စေရေး၊ IT နည်းပညာနှင့်အတူ လိုက်ပါနိုင်စေရေး စီမံချက်များဖြင့် အချိန်နှင့်တစ်ပြေးညီ ပြည်နယ် အလိုက်၊ တိုင်းဒေသကြီးအလိုက်၊ ကဏ္ဍအလိုက် ဆောင်ရွက်ပေးလျက်ရှိပါသည်။ ထို့အတူ စီးပွားရေး နှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်လည်း E-government အစီအမံများတွင် လိုက်ပါဆောင်ရွက်နိုင်‌ရေး ဦးစီးဌာနအလိုက် SOP များရေးဆွဲ၍ စီမံချက်များချမှတ်၍ လိုက်ပါဆောင်ရွက်လျက်ရှိပါသည်။ သို့ဖြစ်ရာ မန္တလေးတိုင်းဒေသကြီး၊ စားသုံးသူရေးရာဦးစီးဌာန အနေဖြင့်လည်း မိမိတို့ဌာနမှ အရာထမ်း၊ အမှုထမ်းများ နည်းပညာနှင့် ပိုမိုထိတွေ့မှုရှိစေနိုင်ရေး၊ ရုံးလုပ်ငန်းများကို ပိုမိုလျင်မြန်စွာ ဆောင်ရွက်နိုင်ရေး၊ E-government မဟာဗျူဟာလုပ်ငန်းစဉ်အရ ဝန်ထမ်းများ နည်းပညာအရည်အသွေး၊ အရည်ချင်းများ တိုးတက်လာစေရေးတို့အတွက် ရည်ရွယ်ပြီး ဤသင်တန်းကို ဖွင့်လှစ်ရခြင်းဖြစ်ပါကြောင်း သတင်းရရှိပါသည်။

DOCA(မန္တလေး)

             ကျောက်ပန်းတောင်းမြို့ရှိ ဆေးဆိုင်များတွင် တရားမဝင်ဆေးဝါးများ၊ စံမမီဆေးဝါးများနှင့် သက်ဆိုင်ရာဌာနများမှ ထောက်ခံချက်မပါသောဆေးဝါးများနှင့် ဖော်ပြပါဝင်ရမည့်သတ်မှတ်ချက်များ နှင့် ကိုက်ညီမှမရှိသောဆေးဝါးများ ရောင်းချမှုမရှိစေရေး  (၂၁.၁၀.၂၀၂၅) ရက်နေ့၊ နံနက် ၀၉:၀၀ နာရီအချိန်တွင် မြို့နယ်စားသုံးသူရေးရာဦးစီးဌာန၊ ပြည်သူ့ကျန်းမာရေးဦးစီးဌာန၊ မြို့နယ်တိုင်းရင်း ဆေး၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          ကွင်းဆင်းဆောင်ရွက်မှုတွင် သက်ဆိုင်ရာကျန်းမာရေးဌာန၏ ညွှန်ကြားချက်များနှင့်အညီ ရောင်းချ မှုရှိ/မရှိ၊ တရားမဝင်ဆေးဝါးများရောင်းချမှုရှိ/မရှိ၊ သက်တမ်းလွန်ဆေးဝါးများ ရောင်းချ မှုရှိ/မရှိနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ စစ်ဆေးမှုများဆောင်ရွက်ခဲ့ရာ သတ်မှတ်ချက်များနှင့်အညီ တရားဝင်ဆေးဝါးများကိုသာရောင်းချ ကြောင်း စစ်ဆေးတွေ့ရှိရပြီး၊ ဆေးဆိုင်တာဝန်ရှိသူများအနေဖြင့် မိမိရောင်းချသော ဆေးဝါးများနှင့် စပ်လျဉ်း၍ ပြည့်စုံမှန်ကန်သော သတင်းအချက်အလက်၊ အာမခံချက်များကို စားသုံးသူများအားသိရှိ စေရေး၊ သက်ဆိုင် ရာဌာနများ၏ လမ်းညွှန်ချက်များနှင့်အညီရောင်းချစေရေး၊ စားသုံးသူကာကွယ်ရေး ဥပဒေအခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်းလည်း သိရှိလိုက်နာ ဆောင်ရွက်ရမည်ဖြစ်ပါကြောင်း၊ သက်ဆိုင်ရာဌာနများ၏ ဥပဒေပြဌာန်းချက်များ၊ လုပ်ထုံးလုပ်နည်း၊ ညွှန်ကြားချက်များနှင့်အညီ လိုက်နာ၍ ဖြန့်ဖြူးရောင်းချကြရန် အသိပေး၍ ဈေးကွက်စောင့်ကြည့် စစ်ဆေးခြင်းကို ဆောင်ရွက်ခဲ့ကြောင်း သိရသည်။

DOCA (မန္တလေး)         

       စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံသည် ၂၀၂၅ ခုနှစ် နိုဝင်ဘာလ ၅ ရက်နေ့ နံနက်(၀၉:၃၀)နာရီအချိန်တွင် ဇလွန်မြို့၊ လမ်းမတော်(မ)ရပ်ကွက်ရှိ  “Mytel Mini Wifi” သို့ ဆက်သွယ်ရေးဝန်ဆောင်မှုလုပ်ငန်းနှင့် စပ်လျဉ်း၍ ဈေးကွက်စောင့်ကြည့် စစ်ဆေးခြင်းကို ဆောင်ရွက်ခဲ့ကြောင်း သိရပါသည်။

          ထိုသို့စစ်ဆေးခဲ့ရာတွင်ဆက်သွယ်ရေးဝန်ဆောင်မှုလုပ်ငန်းများ၌ အရည်အသွေးပြည့်မီသော အင်တာနက်ဝန်ဆောင်မှုများရရှိစေရန်၊ စားသုံးသူများစိတ်ကျေနပ်မှုရရှိအောင် ဆောင်ရွက်ပေးနိုင်ရန်၊ သတင်းအချက်အလက်များ ပြည့်စုံမှန်ကန်စွာ ကြိုတင်အသိပေးချက်များရှိ/မရှိ၊ တိုင်ကြားမှုများအား ဖြေရှင်းဆောင်ရွက်ပေးနိုင်ရန်နှင့် စားသုံးသူအခွင့်အရေး ပြည့်ဝစွာရရှိစေရန် ရည်ရွယ်၍ စစ်ဆေးခဲ့ကြောင်း၊ ဆက်သွယ်ရေး ဝန်ဆောင်မှုလုပ်ငန်းတွင် စားသုံးသူအပေါ် အရည်အသွေးပြည့်မီသောကွန်ယက် ချိတ်ဆက်မှုများ ဆောင်ရွက်ထား လျက်ရှိကြောင်း၊ သက်ဆိုင်ရာဌာန ထောက်ခံချက်များရှိကြောင်း၊ တာဝန်ခံလုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း အသိပညာပေး ဆွေးနွေးခဲ့ပြီး စစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

DOCA (ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်း ဒေသကြီးဦးစီးမှူး၏ လမ်းညွှန်မှုဖြင့် သတင်းအချက်အလက်နည်းပညာနှင့် အရည်အသွေး စီမံခန့်ခွဲရေးဌာနခွဲတာဝန်ခံ ဒေါ်အေးငြိမ်းစံ(ဦးစီးအရာရှိ)နှင့် ဒေါ်ချိုမွန်(ဒုတိယဦးစီးမှူး)တို့သည် ၃၀-၁၀-၂၀၂၅ ရက်နေ့တွင် ချမ်မြသာစည်မြို့နယ်၊ မျိုးသိန်းနိုင်ဆန် ရောင်းဝယ်ရေးဆိုင် သို့ ကွင်းဆင်းစစ်ဆေးခြင်း ဆောင်ရွက်ခဲ့ပါသည်။ ထိုသို့ ကွင်းဆင်းစစ်ဆေး ရာတွင် ဆန်၊ စပါး သိုလှောင်ရုံများအနေဖြင့် ဆန်တန်ချိန် ၂၅ နှင့်အထက် သိုလှောင်ရုံ သို့မဟုတ် စပါးတင်း ၂၅၀၀ နှင့်အထက် သိုလှောင်ရုံတစ်မျိုးမျိုးကို ပိုင်ဆိုင်သူ စီးပွားရေးလုပ်ငန်းရှင် များအနေဖြင့် www.myro.com.mm တွင် ဆန်စပါးသိုလှောင်ရုံမှတ်ပုံတင်ခြင်းလုပ်ငန်းကို ဆောင်ရွက်ရမည် ဖြစ်ကြောင်းနှင့် ပြည်တွင်းဆန်ဈေးနှုန်း တည်ငြိမ်မှန်ကန်မှုရှိစေရေး ရှင်းလင်းဆွေးနွေးပြောကြား ခဲ့ပြီး My RO နှင့် ပါတ်သက်သော My RO အကြောင်းသိကောင်းစရာ လက်ကမ်း စာစောင်များ လည်း ဖြန့်ဝေပေးအပ်ခဲ့ကြောင်း သတင်းရရှိပါသည်။

DOCA(မန္တလေး)

          စားသုံးသူရေးရာဦးစီးဌာန၊ဟင်္သာတမြို့နယ်တာဝန်ခံရုံးမှအငယ်တန်းစာရေးသည်(၅.၁၁.၂၀၂၅)ရက်နေ့ နေ့လယ်(၁၃:၄၅) နာရီအချိန်တွင် ဟင်္သာတမြို့နယ်၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန(CommunityCentre)ခန်းမ၌ ကုန်စည် (သို့မဟုတ်) ဝန်ဆောင်မှုနှင့် စပ်လျဉ်း၍ အာမခံခြင်းအကြောင်း အသိပညာပေး Talk Show အစီအစဉ်ကို ဆောင်ရွက်ခဲ့ကြောင်း သိရသည်။

          အဆိုပါအစီအစဉ်တွင် အငယ်တန်းစာရေး ဦးချမ်းငြိမ်းဇော်က ၂၀၁၉ ခုနှစ် မတ်လ(၁၅) ရက်နေ့တွင်  ပြဌာန်းခဲ့သော စားသုံးသူကာကွယ်ရေးဥပဒေပါ ကုန်စည်နှင့် စပ်လျဉ်း၍ အာမခံချက် ပေးရာတွင် စီးပွားရေးလုပ်ငန်းရှင်သည် ရောင်းချသည့် ကုန်စည်တွင် သာမန်အားဖြင့် မမြင်နိုင်သော သဘာဝပြောင်းလဲနိုင်မှုနှင့် စပ်လျဉ်းသည့် အချက်အလက်များကို စားသုံးသူအား ထင်ရှားစွာဖော်ပြ၍ အသိပေးရာတွင် စားသုံးသူက လက်ခံသုံးစွဲနိုင်သော ကုန်စည်၏အရည်အသွေး၊ အချိန်အတွယ် ပမာဏနှင့် အလေးချိန်မှန်ကန်မှုရှိခြင်း၊ ဘေးအန္တရာယ်ကင်းရှင်းစေခြင်း၊ လုပ်ငန်းရှင်များအနေဖြင့် မိမိဝန်‌ဆောင်မှုနှင့် စပ်လျဉ်း၍ အာမခံချက်ပေးရာတွင် မှန်ကန်သော သတင်းအချက်အလက်များကို စားသုံးသူသိရှိစေရန် ကြိုတင်အသိပေးခြင်း၊ စားသုံးသူ၏ လိုအပ်ချက်နှင့် ကိုက်ညီမှုရှိခြင်း၊ အာမခံထားသော အချိန်ကာလအတွင်း ပြီးမြောက်အောင်ဆောင်ရွက်ပေးခြင်း၊ စားသုံးသူနှင့် သဘောတူညီထားသည့် ဝန်ဆောင်မှု တန်ဖိုးအတိုင်းပေးအပ်စေခြင်း စသည်တို့ကို အကျယ်တဝင့်  ရှင်းလင်းဆွေးနွေးခဲ့ကြောင်း သိရှိရပါသည်။

DOCA (ဧရာဝတီ)