သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒုတိယဦးစီးမှူးပါ (၂)ဦး၊  မြန်မာနိုင်ငံဆန်စပါးအသင်းချုပ်မှ ဦးညီညီပိုင်ထက် (အလုပ်အမှုဆောင်)၊ ဘုရင့်နောင်ဈေး စည်ပင်ဌာနမှ ဦးဇော်လင်းထက်(နေ့စား)တို့ပူးပေါင်းပါဝင်လျက် ၂၈-၅-၂၀၂၄ ရက်နေ့၊ နံနက် (၁၁:၁၅)နာရီအချိန်တွင် ဘုရင့်နောင်ဈေးအတွင်းရှိ မြကမ္ဘာကျော်ဆန်သိုလှောင်ရုံပိုင်ရှင် ဒေါ်ရတနာရွှေဇင်မြတ်အား အသိပညာပေးဟောပြောပွဲဆွေးနွေးခဲ့ပါသည်။

        ထိုသို့ဆွေးနွေးပြောကြားရာတွင် မြကမ္ဘာကျော်ဆန်သိုလှောင်ရုံပိုင်ရှင်အား ဥပဒေပါ အခန်း (၁၀)တွင်ဖော်ပြထားသော စီးပွားရေးလုပ်ငန်းရှင်၏တာဝန်များဖြစ်သည့် အချက်(၁၁)ချက်ပါဝင်သော မိမိတို့ကုန်စည်နှင့်ပတ်သက်ပြီး ရိုးရှင်းမှန်ကန်သောသတင်းအချက်အလက်ပေးခြင်း၊ စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာ ဆောင်ရွက်ခြင်း၊ သတ်မှတ်ထားသည့် အရည်အသွေးစံသတ်မှတ်ချက်များအပေါ်အခြေခံ၍ အာမခံချက်ပေးခြင်း၊ စမ်းသပ်နိုင်သည့်အခွင့်အရေးပေးခြင်း၊ စားသုံးသူနစ်နာဆုံးရှုံးမှု ဖြစ်သွားစေမည့် ကုန်စည်ကို တိုက်ရိုက်ရောင်းချခြင်း (သို့) သွယ်ဝိုက်ရောင်းခြင်းများကိုရှောင်ကြဉ်ခြင်း၊ ကတိပြုထားသောအာမခံချက်နှင့်ကိုက်ညီမှုမရှိပါက ကတိပြုထားသည့်အတိုင်း တာဝန်ယူဆောင်ရွက်ပေးခြင်း၊ အငြင်းပွားမှုကို ညှိနှိုင်းဖြေရှင်းနေစဉ် စားသုံးအပေါ် ထိခိုက်နစ်နာစေရန်ခြိမ်းခြောက်ခြင်း၊ မဟုတ်မမှန်ပြောဆိုခြင်းများမပြုလုပ်ရန်နှင့် ကုန်စည်တွင် အန္တရာယ်ရှိကြောင်းသိရှိပါက အချိန်နှင့်တပြေးညီ သက်ဆိုင်ရာဌာနနှင့် စားသုံးသူများထံ အကြောင်းကြားရန်တို့ကို ဆွေးနွေးအသိပညာပေးပြောကြားခဲ့ကြောင်းသိရှိရပါသည်။

DOCA(ရန်ကုန်)        

      ၂၀၂၄ ခုနှစ် ၊ မေလ ၂၉ ရက်နေ့၊ နံနက်(၁၀း၀၀)အချိန်တွင် တနင်္သာရီတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ အစည်းအဝေးခန်းမတွင် ကျင်းပပြုလုပ်သော ကောင်းမွန်သော ဆေးဝါးရောင်းချမှုကျင့်စဥ်များနှင့်အညီရောင်းချနိုင်ရေး အသိပညာပေးဆွေးနွေးပွဲတွင် တိုင်းဒေသကြီးစားသုံးသူရေးရာဦးစီးဌာနမှ ဦးစီးအရာရှိ ဒေါ်အေးအေးလွင်မှ စားသုံးသူကာကွယ်ရေးဥပဒေအကြောင်း ဟောပြောဆွေးနွေးခဲ့ပါသည်။

    အဆိုပါဟောပြောပွဲတွင် အစားအသောက်နှင့်ဆေးဝါးကွပ်ကဲရေးဦးစီးဌာနမှ တိုင်းဒေသကြီး တာဝန်ခံ ဒေါ်သဲဦးဗိုလ်မှ ကောင်းမွန်သောဆေးဝါးရောင်းချမှုကျင့်စဥ်များနှင့် အမျိုးသားဆေးဝါး ဥပဒေပါအကြောင်းအရာများ ဟောပြောဆွေးနွေးခြင်း၊ စားသုံးသူရေးရာဦးစီးဌာနမှ ဦးစီးအရာရှိ‌   ဒေါ်အေးအေးလွင်မှ စားသုံးသူကာကွယ်ရေးဥပဒေကို ကျယ်ကျယ်ပြန့်ပြန့် သိရှိနိုင်စေရေးအတွက် စားသုံးသူအခွင့်အရေးနှင့် စားသုံးသူ၏တာဝန်များ၊ စီးပွားရေးလုပ်ငန်းရှင်များ၏ တာဝန်များအကြောင်း၊  ကုန်အညွှန်းအမှတ်အသားဖော်ပြခြင်းဆိုင်ရာများအကြောင်း ‌ဟောပြောဆွေးနွေးခဲ့ပါ သည်။

   အခမ်းအနားသို့ ဆေးဝါးဖြန့်ဖြူးရောင်းချသူများနှင့် ဆေးဆိုင်ပိုင်ရှင်(၁၄)ဦး တက်ရောက်ခဲ့ပြီး အခမ်းအနားကို နေ့လယ် (၁၂း၀၀) နာရီအချိန်တွင်  ရုတ်သိမ်းခဲ့ကြောင်း သိရှိရပါသည်။

DOCA(တနင်္သာရီ)

     ၂၀၂၄ ခုနှစ်၊ မေလ ၂၉ ရက်နေ့၊ နံနက် (၁၀း၀၀) အချိန်တွင် တနင်္သာရီတိုင်းဒေသကြီး ဦးစီးမှူးရုံးမှ ဇွန်လ မူဝါဒသစ်အရ ဆီဖြန့်ဖြူးမည့်ကုမ္ပဏီများဖြစ်ကြသော Kaung Hlyan New Asia Co.,Ltd နှင့် Globle Good Pure Group Co.,Ltd တို့မှ တာဝန်ရှိသူများနှင့် ထားဝယ်၊မြိတ်၊ ကော့သောင်းခရိုင် ဆီကုန်သည်နှင့် ဆီလုပ်ငန်းရှင်များအသင်း ဥက္ကဌများအား Virtual ဖြင့် တွေ့ဆုံ၍ တနင်္သာရီတိုင်းဒေသကြီးအတွင်း ဆီဖြန့်ဖြူးမည့် အစီအမံများအား ထပ်မံပေါင်းစပ် ညှိနှိုင်းဆွေးနွေးခဲ့ပါသည်။

    ဆွေးနွေးမှုအရ ကုမ္ပဏီများမှ ကိုယ်စားလှယ်ရွေးချယ်မှုနှင့် ဆီဖြန့်ဖြူးမည့်အစီအစဉ်များအား ကုမ္ပဏီဥက္ကဌများထံမှ ဆက်လက်တင်ပြပြီး အတည်ပြုချက်ရယူကာ နေ့လယ် (၁၂း၀၀)အချိန်တွင်  အစည်းအဝေးပြီးမြောက်ကြောင်း သိရှိရပါသည်။

DOCA(တနင်္သာရီ)

    မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်၊ မြို့နယ်အားကစား ခန်းမတွင် (၂၄-၅-၂၀၂၄)ရက်နေ့၊ နေ့လယ်(၁၃:၀၀) နာရီအချိန်၌ မြို့နယ်စားသုံးသူရေးရာဦးစီးဌာန၊ မြို့နယ်အားကစားနှင့်ကာယပညာဦးစီးဌာန၊ မြို့နယ်ပြန်ကြားရေနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အားကစားလူငယ်များအား အသိပညာပေးဟောပြောပွဲကိုကျင်းပပြုလုပ်ခဲ့ကြောင်းသိရှိရပါသည်။

  အဆိုပါဟောပြောဆွေးနွေးပွဲတွင် စားသုံးသူရေးရာဦးစီးဌာန၊ ကျောက်ပန်းတောင်းမြို့နယ်တာဝန်ခံ ဒေါ်မြသန္တာထွန်းမှ စားသုံးသူကာကွယ်ရေးနှင့်ပတ်သက်၍ အသိပညာပေးဟောပြောဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူများ၏အခွင့်အရေးများ၊ စားသုံးသူများလိုက်နာရမည့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်မျာနှင့် စားသုံးသူကာကွယ်ရေးဥပဒေအခန်း(၁၈)၊ ပုဒ်မ(၄၁)ပါ အချက်များ၊ စားသုံးသူများနစ်နာဆုံးရှုံးမှုများရှိလာပါက တိုင်းဒေသကြီး၊ ပြည်နယ်နှင့်ခရိုင်ရုံးများတွင်ဖွင့်လှစ်ထားသော စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)ရုံးများတွင်တိုင်ကြားနိုင်သလို၊ Online မှလည်းတိုင်ကြားနိုင်ခြင်း၊ Consumer Call Center နံပါတ်(1535)သို့လည်း ရုံးချိန်အတွင်းဆက်သွယ်မေးမြန်းဆောင်ရွက်နိုင်ပါကြောင်း၊ မိမိတို့စားသုံးသူရေးရာဦးစီးဌာန၏ Websiteမှလည်း တိုင်ကြားနိုင်ပါကြောင်းနှင့်ဦးစီးဌာနအကြောင်း၊ ဌာန၏လုပ်ငန်းဆောင်ရွက်ချက်များ၊ ကုန်သွယ်မှုသတင်းများ၊ ကွင်းဆင်းဆောင်ရွက်မှုသတင်းများနှင့် ဥပဒေအကြောင်းအရာများကိုလည်း ဝင်ရောက်ကြည့်ရှု့လေ့လာနိုင်ပါကြောင်း စသည်ဖြင့်အကျယ်တဝင့်ဆွေးနွေးခဲ့ပါသည်။ ဆက်လက်၍ မြို့နယ်အားကစားနှင့်ကာယပညာဦးစီးဌာန၊ မြို့နယ်ဦးစီးမှူး ဦးအောင်ကိုကိုလတ်မှ လူငယ်ရေးရာအားကစားနှင့်ပတ်သက်၍လည်းကောင်း၊ မြို့နယ်ပြန်ကြားရေနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူးဒေါ်မေသက်နွယ်မှ စာဖတ်ရှိန်မြှင့်တင်ရေးအကြောင်းအားလည်းကောင်း အသီးသီး အသိပညာပေးဆွေးနွေးခဲ့ကြပြီး စားသုံးသူရေးရာဦးစီးဌာနမှ ထုတ်ကုန်လုံခြုံစိတ်ချရမှုရှိစေရန် ပညာပေးခင်းကျင်းပြသမှုအား အားကစားလူငယ်များမှလေ့လာကြည့်ရှု့ခဲ့ကြပါသည်။

       ဆွေးနွေးပွဲသို့ ဌာနဆိုင်ရာဝန်ထမ်း(၁၀)ဦးနှင့် အားကစားလူငယ်၊ မောင်မယ်(၅၅)ဦး၊ စုစုပေါင်း(၆၅)ဦး တက်ရောက်ခဲ့‌ကြောင်းသိရှိရပါသည်။

 DOCA(မန္တလေး)

    မန္တလေးတိုင်းဒေသကြီး၊ ငါန်းဇွန်မြို့၌ (၂၄-၅-၂၀၂၄)ရက်နေ့၊ နံနက် (၀၈:၀၀) နာရီအချိန်တွင် ဌာနဆိုင်ရာပူးပေါင်းအဖွဲ့မှတာဝန်ရှိသူများသည် စည်ပင်သာယာနယ်နိမိတ်အတွင်းရှိ အလှကုန်ပစ္စည်းရောင်းချသောဈေးဆိုင်များသို့ကွင်းဆင်း၍ သုံးစွဲမသင့်သော အလှကုန်ပစ္စည်းများ ရောင်းချခြင်းရှိ/ မရှိကို ဈေးကွက်စောင့်ကြည့်စစ်ဆေးမှုများဆောင်ရွက်ခဲ့ပါသည်။

   ထိုသို့ကွင်းဆင်းစစ်ဆေးရာတွင် မြို့နယ်အထွေထွေအုပ်ချုပ်ရေးဦးစီးဌာန၊ ဒုတိယမြို့နယ်အုပ်ချုပ်ရေးမှူးနှင့် အတူ၊ မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ၊ မြို့နယ်စည်ပင်သာယာရေးအဖွဲ့၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြန်မာနိုင်ငံရဲတပ်ဖွဲ့စသည့်ပူးပေါင်းအဖွဲ့သည် အလှကုန်ပစ္စည်းရောင်းချသောဈေးဆိုင်များ၌ အစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်ပုံတင်ထားခြင်းမရှိသည့်အပြင်၊ တားမြစ်ဓာတုပစ္စည်းများပါဝင်၍ သုံးစွဲရန်မသင့်သည့်အလှကုန်ပစ္စည်းများ ရောင်းချခြင်းရှိ/ မရှိအား ကွင်းဆင်းစစ်ဆေးခဲ့ပြီး၊ စားသုံးသူရေးရာဦးစီးဌာန၊ မြို့နယ်တာဝန်ခံမှဈေးဆိုင်များမှ တာဝန်ရှိသူများအား မိမိတို့ရောင်းချသောကုန်ပစ္စည်းများမှာ သက်ဆိုင်ရာဌာနများ၏ထောက်ခံချက်များ၊ သတ်မှတ်ချက်များနှင့်ကိုက်ညီမှုရှိသော ကုန်ပစ္စည်းများကိုသာ စနစ်တကျထားသိုရောင်းချကြရန်၊ စားသုံးသူကာကွယ်ရေးဥပဒေပါ ကုန်စည်များတွင်ကုန်အညွှန်းအမှတ်အသားနှင့် ပတ်သက်၍မြန်မာဘာသာဖြင့်မဖြစ်မနေ ထည့်သွင်း ဖော်ပြပါရှိရန် သတ်မှတ်ချက်များရှိပါကြောင်းနှင့်၎င်းအချက်များနှင့်လည်းကိုက်ညီရန် လိုအပ်ပါကြောင်း၊ သက်တမ်းလွန်ကုန်ပစ္စည်းများကိုလည်းရောင်းချခြင်းမပြုရန်လိုအပ်ပါကြောင်း၊ အကယ်၍ လုပ်ငန်းရှင်များအနေဖြင့် သက်ဆိုင်ရာဌာနများ၏ ဥပဒေပါသတ်မှတ်ချက်များ၊ စည်းကမ်းချက်များအား ဖောက်ဖျက်ကျူးလွန်ပါက သက်ဆိုင်ရာဥပဒေများအတိုင်းအရေးယူဆောင်ရွက်မှုများခံရမည်ဖြစ်၍ တာဝန်ရှိအရောင်းဆိုင်လုပ်ငန်းရှင်များအနေဖြင့် စီးပွားရေးကျင့်ဝတ်စည်းကမ်းများ၊ ဥပဒေများ၊ နည်းဥပဒေများကိုလည်းသိရှိနားလည် လိုက်နာဆောင်ရွက်ကြရန်လိုအပ်ပါကြောင်း စသည်ဖြင့် အသိပညာပေး၍ စားသုံးသူကာကွယ်ရေးဆိုင်ရာ လက်ကမ်းစာစောင်များပေးဝေခဲ့ကြောင်းသိရှိရပါသည်။

DOCA(မန္တလေး)