သတင်းနှင့် လှုပ်ရှားမှုများ

   ပြည်ထောင်စုဝန်ကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူးဦးလှစိုးဦးဆောင်၍  မြို့နယ်ပြည်သူ့ကျန်းမာရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန(ရန်ကုန်)၊ စသည့် ဌာနများပူးပေါင်း၍ (၂၈-၅-၂၀၂၄) ရက်နေ့၊ နေ့လယ် (၁၃:၃၀) နာရီတွင်  အမှတ် (1၆၇) ဗဟိုရ်လမ်း၊ စမ်းချောင်းမြို့နယ်ရှိ ဆေးကမ္ဘာဆေးဆိုင်အား စစ်ဆေးမှုများပြုလုပ်ခဲ့ကြောင်း သိရှိရပါသည်။

     ထိုသို့စစ်ဆေးရာတွင် ဆေးဆိုင်တွင်ဆေးနှင့်ဆေးပစ္စည်းအမျိုးပေါင်း(၂၀၀)မျိုးကျော်ရှိသည့်အနက် သွေးကျဆေး၊ သွေးကျဲဆေး၊ အကိုက်ခဲပျောက်ဆေး၊ နှာစေးပျောက်ဆေး၊ ဆီးချိုဆေး၊ လေဆေး၊ အားဆေး၊ ပိုးသတ်ဆေး၊ ဓာတ်ဆားထုပ် စသည့်တို့မှာ အများဆုံးရောင်းရကြောင်း၊ ပစ္စည်းပြတ်လပ်မှုမရှိ၊ ဖြစ်သင့်ဖြစ်ထိုက်သည့်‌ ဈေးနှုန်းဖြင့်သာရောင်းချပေးပါကြောင်း ဆိုင်တာဝန်ခံဒေါ်မိုးမမငြိမ်းထံမှ စုံစမ်းသိရှိခဲ့ကြောင်းသတင်းရရှိပါသည်။

DOCA(ရန်ကုန်)

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့ခရိုင်ဦးစီးမှူးရုံး၌(၂၄.၅.၂၀၂၄) ရက်နေ့၊ နံနက်(၁၀:၀၀)နာရီအချိန်တွင် ခရိုင်ဦးစီးမှူးဦးသန်းစိုး၊ စားသုံး/ထုတ်လုံတာဝန်ခံ ဒေါ်ခိုင်ခိုင်ရီတို့သည် စားသုံးဆီဖြန့်ဖြူးရောင်းချနေသည့် လုပ်ငန်းရှင်များနှင့် တွေ့ဆုံ၍ စားသုံးဆီ ထုတ်လုပ်ရောင်းချသည့် လုပ်ငန်းရှင်များအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်၏ (၃.၁၂.၂၀၁၉)ရက်စွဲပါညွှန်ကြားချက်အမှတ်၂/၂၀၁၉နှင့်စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏(၂၀.၁၂.၂၀၂၁)ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များလိုက်နာဆောင်ရွက်ရန် ညွှန်ကြားချက်အမှတ်၁/၂၀၂၁ဖြင့် ထုတ်ပြန် ခဲ့ပြီးဖြစ်ပါကြောင်း၊ စားသုံးသူကာကွယ်ရေးဥပဒေ အခန်း(၁၈)ပါကုန်စည်များအပေါ်တွင် ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ထုတ်လုပ်ထားသည့်ကုန်စည်များကိုသာရောင်ချရန်၊ ဥပဒေအခန်း(၁၀)ပါစီးပွားရေး လုပ်ငန်းရှင်၏တာဝန်များနှင့် အခန်း(၁၁)ပါကုန်စည်နှင့်စပ်လျဉ်း၍ အာမခံချက်ပေးရန်နှင့် စားသုံးသူပြည်သူများအတွက် သန့်ရှင်းလတ်ဆတ်၍ အန္တရာယ်ကင်းသော စားသောက်ကုန်ဖြစ်စေရေး အထူးအလေးထားဆောင်ရွက်ပေးရန် အသိပညာပေး ဆွေးနွေးဆောင်ရွက်ခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။

DOCA(ပဲခူး)

       စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးမှ စားသုံးဆီ ထုတ်လုပ်ဖြန့်ဖြူး ရောင်းချနေသော လုပ်ငန်းရှင်များအနေဖြင့် ဟင်းသီးဟင်းရွက်ဆီများကို ရောနှောဆီ (Blended Oil) အဖြစ် ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ လုပ်ငန်းများပြုလုပ်ရာ၌ မြန်မာနိုင်ငံစားသုံးသူကာကွယ်ရေးကော်မရှင်၏ (၃.၁၂.၂၀၁၉)နှင့် စီးပွား/ ကူးသန်းဝန်ကြီးဌာန၏ ညွှန်ကြားချက်အမှတ် (၁/၂၀၂၁)တို့ကို လိုက်နာဆောင်ရွက်ရမည့်အပြင် မြန်မာနိုင်ငံအစားအသောက်နှင့် ဆေးဝါးအာဏာပိုင်အဖွဲ့မှ ထုတ်ပြန်ထားသည့် အမိန့်အမှတ် (၂/၂၀၂၄)တို့အား လိုက်နာဆောင်ရွက်သွားရန်နှင့် လိုက်နာဆောင်ရွက်ခြင်းမရှိပါက သက်ဆိုင်ရာ ဥပဒေများနှင့် အရေးယူဆောင်ရွက်သွားမည်ဖြစ်ကြောင်းကို အသိပညာပေးဆောင်ရွက်ရန် လမ်းညွှန်ချက်အရ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနနှင့်ပူးပေါင်း၍ (၂၄.၅.၂၀၂၄)ရက်နေ့၊ နံနက် (၁၀:၀၀)နာရီတွင် ပြည်ခရိုင်ဦးစီးမှူးရုံး အစည်းအဝေးခန်းမ၌ ပြည်ခရိုင်အတွင်း စားသုံးဆီထုတ်လုပ် ဖြန့်ဖြူးရောင်းချနေသော စီးပွားရေးလုပ်ငန်းရှင်များအား ခေါ်ယူတွေ့ဆုံ၍ အသိပညာပေး ဟောပြော ဆွေးနွေးခြင်း ဆောင်ရွက်ခဲ့ရာ လုပ်ငန်းရှင် (၃၀)ဦး တက်ရောက်ခဲ့ပါသည်။

     ယင်းသို့ဆောင်ရွက်ရာတွင် ပြည်ခရိုင်စားသုံးသူရေးရာဦးစီးဌာန၏ ဒုခရိုင်ဦးစီးမှူးနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့မှ ကုန်စည်များတွင် သုံးစွဲပုံနှင့် ပတ်သက်သော သတင်းအချက်အလက် (သို့) ညွှန်ကြားချက်များကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက် ဖြစ်စေ ဖေါ်ပြရမည့် ညွှန်ကြားချက် (၂/၂၀၁၉)နှင့် ဟင်းသီးဟင်းရွက် ဆီများနှင့်စပ်လျဉ်း၍ အမျိုးအမည်ဖော်ပြရာတွင် မြန်မာဘာသာဖြင့် ဖေါ်ပြရမည်ဖြစ်ပြီး ဥပမာ - ဟင်းသီးဟင်းရွက်ဆီ (စားအုန်းဆီ)၊ ဟင်းသီးဟင်းရွက်ဆီ (အဆင့်မြင့်စားအုန်းဆီ)စသည်ဖြင့် ဖော်ပြရမည်ဖြစ်ကာ အသားတင်ပမာဏနှင့် အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့်‌ဖော်ပြရမည့် ညွှန်ကြားချက်(၁/၂၀၂၁)တို့အကြောင်းကို အသိပညာပေး ဆွေးနွေးဟောပြောခဲ့ပါသည်။

    ဆက်လက်၍ ပြည်ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၏ အစားအသောက်တာဝန်ခံမှ ဟင်းသီးဟင်းရွက်ဆီများကို ရောနှောဆီ (Blended Oil) အဖြစ် ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့်အမိန့်အမှတ် (၂/၂၀၂၄)အား အသေးစိတ်ရှင်းလင်း အသိပညာပေး ဆောင်ရွက်ခဲ့ပြီး တက်ရောက်လာသော လုပ်ငန်းရှင်များမှ အသိပညာပေးခြင်းနှင့်ပတ်သက်၍ ပြန်လည်မေးမြန်းဆွေးနွေးခြင်းများဆောင်ရွက်ခဲ့ကြောင်း သတင်းရရှိပါသည်။

DOCA(ပဲခူး)

        စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော ကျောင်းသား/ ကျောင်းသူများအား စားသုံးသူကာကွယ်ရေးဆိုင်ရာအသိပညာများ ကျယ်ကျယ် ပြန့်ပြန့်သိရှိနိုင်စေရေး ရည်ရွယ်၍ ခရိုင်အတွင်း မြို့နယ်များရှိ ရပ်ကွက်/ ကျေးရွာများနှင့် အခြေခံပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက် လုပ်ဆောင်လျက်ရှိရာ ပြည်ခရိုင်အတွင်း ၂၀၂၄ ခုနှစ်၊ မေလ (၁)ရက်နေ့မှ (၁၅)ရက်နေ့အတွင်း ပြည်မြို့နယ်၊ ရွှေတောင်မြို့နယ်၊ ပေါက်ခေါင်းမြို့နယ်တို့တွင် မြို့နယ်တာဝန်ခံများနှင့် ဝန်ထမ်းများသည်  မြို့နယ်ပြန်ဆက်ရုံးနှင့်ပူးပေါင်း၍ စားသုံးသူ အသိပညာပေး (Talk Show) ပြုလုပ်ခြင်း စားသုံးသူကာကွယ်ရေးဆိုင်ရာ အသိပညာပေး ဟောပြောခြင်းများ ဆောင်ရွက်ခဲ့ပါသည်။

       အဆိုပါ အသိပညာပေး ဟောပြောခြင်းများ ဆောင်ရွက်ရာတွင် သက်ဆိုင်ရာ မြို့နယ်တာဝန်ခံများမှ စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖေါ်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများ၊ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေး ဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ် ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန် ကုန်အညွှန်းအမှတ်အသား ပြည့်စုံစွာပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများ ဆောင်ရွက်ခဲ့ကြောင်း သိရပါသည်။

DOCA(ပဲခူး)

     ကျောက်ဆည်ခရိုင်၊ စားသုံးသူရေးရာဉီးစီးဌာနမှဦးဆောင်၍ စဉ့်ကိုင်မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့ ၊ မြို့နယ်ပြည်သူ့ကျန်းမာ‌‌ရေးဦးစီးဌာန၊ မြန်မာနိုင်ငံရဲတပ်ဖွဲ့နှင့် မြန်မာနိုင်ငံမီးသတ်ဦးစီးဌာနတို့မှ တာဝန်ရှိသူများနှင့် ပူးပေါင်း၍(၂၇-၅-၂၀၂၄)ရက်နေ့တွင် စဉ့်ကိုင်မြို့၊မြို့မစျေးအတွင်းရှိ လူသုံးကုန်နှင့်စားသောက်ကုန်များရောင်းချသည့်အရောင်းဆိုင်များအား စျေးကွက်စောင့်ကြည့်စစ်ဆေးခဲ့ပါသည်။ ထိုသို့စစ်ဆေးရာတွင်စဉ့်ကိုင် မြို့နယ်တာဝန်ခံစစ်ဆေးရေးအရာရှိမှ ကုန်ပစ္စည်းထုတ်လုပ်သည့်လုပ်ငန်းရှင်များနှင့် လူသုံးကုန်နှင့် စားသောက်ကုန်များရောင်းချသည့်အရောင်းဆိုင်ပိုင်ရှင်များအနေဖြင့်၂၀၁၉ခုနှစ်၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်းပြီး လိုက်နာဆောင်ရွက်ရမည့်အချက်များနှင့် စားသုံးသူကာကွယ်ရေးကော်မရှင်မှထုတ်ပြန်ထားသော(၂/၂၀၁၉)ပါ ကုန်စည်အမျိုးအစားအလိုက်ဖော်ပြရမည့်ညွှန်ကြားချက်များကိုပြည့်စုံမှန်ကန်စွာဖော်ပြလိုက်နာ ဆောင်ရွက်သွားရန် လူသုံးကုန်နှင့်စားသောက်ကုန်ရောင်းချသည့်အရောင်းဆိုင်များမှလည်း ကုန်အညွှန်းအမှတ်အသားပြည့်စုံမှန်ကန်စွာဖော်ပြထားသော ကုန်စည်များကိုသာရောင်းချသွားရန်၊ စားသုံဆီ အရောင်းဆိုင်များအနေဖြင့် စားသုံးဆီများရောင်းချရာတွင် စျေးနှုန်းမြှင့်တင်ရောင်းချခြင်းများမပြုလုပ်ရန်နှင့် သတ်မှတ်ရည်ညွှန်းစျေးအတိုင်းရောင်းချကြရန် ဘူးသွပ်ဆီများရောင်းချရာတွင် FDA ထောက်ခံချက်ရရှိသော ဘူးသွပ်ဆီများကိုသာ‌ရောင်းချသွားရန်နှင့် ရောနှောဆီများကိုရောင်းချသည်ကိုစစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေဖြင့် အရေးယူဆောင်ရွက်သွားမည်ဖြစ်ကြောင်းပြောကြားခဲ့ပြီး အဖွဲ့ဝင်အဖြစ်လိုက်ပါလာသည့် သက်ဆိုင်ရာဌာနများမှလည်း လုပ်ငန်းရှင်များအနေဖြင့် သက်ဆိုင်ရာဝန်ကြီးဌာန၊ ဦးစီးဌာနများ၏ စည်းကမ်းသတ်မှတ်ချက်များနှင့်အညီထုတ်လုပ်ရောင်းချသွားရန် မှာကြားခဲ့ကြောင်းသတင်းရရှိပါသည်။

DOCA(မန္တလေး)