သတင်းနှင့် လှုပ်ရှားမှုများ

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်/ညွှန်မှူး)သည် (၁-၇-၂၀၂၄)ရက်နေ့၊ နေ့လယ် ၁၄:၃၀ နာရီအချိန်တွင် ခရိုင်ရုံးအစည်းအဝေးခန်းမ၌ ညောင်ဦးမြို့နယ်ရှိ ဆန်လက်လီ/ လက္ကားရောင်းချသောလုပ်ငန်းရှင်များနှင့်တွေ့ဆုံပြီး ဆန်ရောင်းဝယ်မှုများနှင့်ပတ်သက်၍ လုပ်ငန်းရှင်များသိသင့်သိထိုက်သည့် စည်းမျဉ်းစည်းကမ်းများ၊ ညွှန်ကြားချက်များအားသိရှိလိုက်နာစေရန် အသိပေးဆွေးနွေးမှုများဆောင်ရွက်ခဲ့ပါသည်။

     အဆိုပါတွေ့ဆုံဟောပြောပွဲတွင် ဆန်စက်လုပ်ငန်းရှင်များအနေဖြင့် ဆန်စက်များပုံမှန်လည်ပတ်ကြိတ်ခွဲနိုင်စေရေး၊ ဆန်များပုံမှန်တင်ပို့နိုင်စေရေး၊ ဆန်တန်ချိန်(၅၀)နှင့်အထက်၊ စပါးတင်း (၅၀၀၀)နှင့်အထက် သိုလှောင်ထားပါက မှတ်ပုံတင်နိုင်ရေးနှင့်ဆန်ဆိုင်များပုံမှန်ဖွင့်လှစ်၍ သတ်မှတ်ဈေးနှုန်းဖြင့်ရောင်းချစေရေး၊ ဈေးကွက်များအတွင်း ဆန်များရောင်းချရာတွင် ဈေးနှုန်းမြှင့်တင်ရောင်းချမှုမရှိစေရေး၊ သတ်မှတ်ရည်ညွှန်းဈေးများနှင့်အညီရောင်းချစေရေး၊ ဈေးကစားရန်ရည်ရွယ်၍ သိုလှောင်ခြင်းများမပြုလုပ်စေရေးနှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ အဓိပ္ပါယ်နှင့်တာဝန်များ၊ တားမြစ်ချက်များကိုရှင်းလင်းဟောပြောခဲ့ရာ ဆွေးနွေးပွဲသို့ ဆန် လက်လီ/ လက္ကားရောင်းချသူလုပ်ငန်းရှင် (၂၆)ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

    စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးဝင်းသိန်းဦး(ရုံးအုပ်)သည် ၄.၇.၂၀၂၄ ရက်နေ့တွင် မိုးညှင်းခရိုင်ဦးစီးမှူးရုံး၌ အိမ်ဆောက်ပစ္စည်းရောင်းဝယ်ရေးလုပ်ငန်းရှင်များနှင့် တွေ့ဆုံ ဆွေးနွေးခဲ့ပါသည်။

     ထိုသို့ဆွေးနွေးရာတွင် စားသုံးသူကာကွယ်ရေးဥပဒေတွင် ပါရှိသော စီးပွားရေးလုပ်ငန်းရှင် ဆိုသည်မှာကုန်စည်ကို ထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည် ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာ လုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်၏ တာဝန်များ၊ ကုန်စည်နှင့်စပ်လျဉ်း၍ အာမခံချက်ပေးခြင်းများဖြစ်သော စားသုံးသူကလက်ခံသုံးစွဲနိုင်သော အရည်အသွေးရှိခြင်း၊ ကုန်စည်၏အရည် အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိခြင်း၊ ဘေးအန္တရာယ်ကင်းရှင်းစေခြင်း၊ သုံးစွဲသူ၏ လိုအပ်ချက်အတွက်သင့်လျော်မှုရှိခြင်း၊ နမူနာပစ္စည်းတွင်ဖော်ပြထားသည့်အတိုင်း တူညီစွာ ပါရှိခြင်း၊အာမခံချက်ပေးထားသည့်ကာလ သို့မဟုတ်အသုံးပြုနိုင်မည့်ကာလအတွင်း အပိုပစ္စည်းရရှိနိုင် ခြင်း၊ ပြန်လည်ပြုပြင်နိုင်ခြင်း သို့မဟုတ် လဲလှယ်နိုင်ခြင်း၊ ကုန်အညွှန်းအမှတ်အသားပါအချက်အလက်၊ ကြော်ငြာ၊ ကမ်းလှမ်းချက် သို့မဟုတ် အရောင်းမြှင့်တင်ခြင်းတွင် ပါဝင်သော ဖော်ပြချက်နှင့်ကိုက်ညီမှု ရှိခြင်း၊ ဝန်ဆောင်မှုနှင့်စပ်လျဉ်း၍အာမခံချက်ပေးခြင်း၊ ကုန်စည်သို့မဟုတ်ဝန်ဆောင်မှုအပေါ် တာဝန်ရှိမှု၊ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ သိသာထင်ရှားစွာ ဖော်ပြရမည့်အချက်တို့အား ရှင်းလင်းဆွေးနွေးခဲ့ပါသည်။ 

DOCA(ကချင်)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူး ဦးမောင်မောင်ခိုင်သည် ၃.၇.၂၀၂၄ ရက်နေ့တွင် ဗန်းမော်ခရိုင် ကုန်ဈေးနှုန်းတည်ငြိမ်ရေးအဖွဲ့၊ စည်ပင်သာယာရေးအဖွဲ့တို့နှင့် ပူးပေါင်း၍ ဗန်းမော်မြို့အတွင်းရှိ ဆန်ဆိုင်များနှင့် ဆန်စက်များသို့ သွားရောက်၍ ဗန်းမော်မြို့အတွင်း ဈေးနှုန်းကြီးမြင့်စွာရောင်းချမှုမရှိစေရေး ဖြစ်သင့်ဖြစ်ထိုက်သော ဈေးနှုန်းများဖြင့် ရောင်းချနိုင်ရေးအတွက် ကွင်းဆင်းစစ်ဆေးဆောင်ရွက်ခဲ့ပါသည်။

   ထိုသို့ကွင်းဆင်းစစ်ဆေးရာ၌ ဆန်ဆိုင်ကြီးများတွင် ရွှေဘိုပေါ်ဆန်းမွှေး၊ မဂျမ်းတော၊ ဆင်းဧကရီ (၃)၊ ဧရာပဒေသာ၊ လုံးသွယ်မွှေး၊ မနောသုခ စသောဆန်အမျိုးအစားများကို ဖြစ်သင့်ဖြစ်ထိုက်သော ဈေးနှုန်းဖြင့် ရောင်းချလျက်ရှိကြောင်း၊ ဆန်လက်ကျန်အခြေအနေ၊ ဆန်ဈေးနှုန်းဈေးကွက်၊ ဆန်သိုလှောင်ထားရှိမှုတို့ကိုမေးမြန်းခဲ့ပြီး၊ ဈေးနှုန်းမြင့်တင်ရောင်ချရန်အတွက် ဆန်များအား သိုလှောင်ထား ခြင်းမပြုရန်၊ ဆန်စက်ကြီးများတွင်ဆန်စပါးသိုလှောင်ထားရှိနိုင်မှု၊ တစ်ရက်ကြိတ်ခွဲနှုန်းထားများတို့ကို သွားရောက် မေးမြန်းဆွေးနွေးခဲ့ပါသည်။

DOCA(ကချင်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ပခုက္ကူခရိုင်ဦးစီးမှူး၏ ကြီးကြပ်မှုဖြင့် ဒုတိယခရိုင် ဦးစီးမှူး ဦးဇော်ထွန်းဦး၊ ဦးစီးမှူး ဒေါ်စန်းမြင့်ရီနှင့် ဝန်ထမ်းများသည် (၂၈.၆.၂၀၂၄)ရက်နေ့၊ နေ့လယ်(၁၄:ဝဝ) အချိန်တွင် ပခုက္ကူမြို့ ကုန်သည်များနှင့်စက်မှုလက်မှုလုပ်ငန်းရှင်များအသင်းခန်းမတွင် ဆန်စက်များ၊ စပါး/ဆန်ရောင်းချမည့် လုပ်ငန်းရှင်များအား ဖိတ်ကြား၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးဦးဆောင် ကျင်းပပြုလုပ်သည့် ပြည်တွင်းစားသုံးဆန်များ သင့်တင့်မျှတသောဈေး ဖြင့် ရောင်းချနိုင်ရေးအတွက် လုပ်ငန်းရှင်များအား ဖိတ်ကြား၍ ညှိနှိုင်းဆွေးနွေးခြင်းများ ဆောင်ရွက်ခဲ့ပါသည်။ အဆိုပါ ပြည်တွင်းစားဆန်ဈေးနှုန်းများ သင့်တင့်မျှတစွာ တည်ငြိမ်မှန်ကန်ရေးနှင့် MyRO စနစ်တွင် သိုလှောင်ရုံ မှတ်ပုံတင်ဆောင်ရွက်ရေး ဆွေးနွေးပွဲတွင် စားသုံးသူရေးရာဦးစီးဌာနမှ ဝန်ထမ်း (၃)ဦး၊ ဆန်စက်လုပ်ငန်းရှင်များနှင့် စပါး/ဆန်ရောင်းဝယ်ရေးလုပ်ငန်းရှင် (၅၃)ဦး၊ စုစုပေါင်း(၅၆)ဦး တက်ရောက်ခဲ့ပါသည်။

     အခမ်းအနားတွင် ဒုတိယခရိုင်ဦးစီးမှူး ဦးဇော်ထွန်းဦးက အဖွင့်အမှာစကားပြောကြားပြီး အစည်း အဝေးကျင်းပရခြင်း ရည်ရွယ်ချက်နှင့် ပြည်တွင်းစားဆန်ဈေးနှုန်းများ တည်ငြိမ်မှန်ကန်စေရေး၊ သင့်တင့် မျှတသောဈေးဖြင့် ရောင်းချနိုင်ရေး၊ Myamar Rice Oline (MyRO)စနစ်ဖြင့် သိုလှောင်ရုံ မှတ်ပုံတင်ရေး၊ ပေါ်ဆန်းမွှေး၊ ဧည့်မထနှင့် အခြားအများသုံးဆန်များ သတ်မှတ်ဈေးဖြင့် ရောင်းချနိုင်ရေး၊ ရောင်းချ ရာတွင် ဆန်အမျိုးအစားနှင့် ဈေးနှုန်းများကို ဗွီနိုင်းများဖြင့် ပြုလုပ်ပြီး ပြည်သူများ သိသာမြင်သာအောင် ရောင်းချနိုင်ရေးတို့ကို ဟောပြောဆွေးနွေးခဲ့ပါသည်။ ထို့နောက် ဦးစီးမှူး ဒေါ်စန်းမြင့်ရီက ဆန်သို လှောင်ရုံ မှတ်ပုံတင်လုပ်ဆောင်ပုံအဆင့်ဆင့် စသည့်အချက်များကို ဆွေးနွေးခဲ့ပြီး တက်ရောက်လာ သည့် ဆန်ရောင်းဝယ်ရေးလုပ်ငန်းရှင်များက သိရှိလိုသည်များကို မေးမြန်းဆွေးနွေးခြင်း၊ ပြန်လည် ရှင်းလင်းဖြေကြားခြင်းများပြုလုပ်ခဲ့ကြပြီး အစည်းအဝေးကို ညနေ(၁၆:ဝဝ)နာရီအချိန်တွင် အောင်မြင်စွာရုပ်သိမ်းခဲ့ကြောင်း သတင်းရရှိပါသည်။   

DOCA(မကွေး)

    မန္တလေးတိုင်းဒေသကြီး၊ ငါန်းဇွန်မြို့စည်ပင်သာယာနယ်နိမိတ်အတွင်းရှိ အလှကုန်ပစ္စည်းအရောင်းဆိုင်များအား (၂၇-၆-၂၀၂၄)ရက်နေ့၊ နံနက် ၀၈:၀၀ နာရီအချိန်၌ မြို့နယ်အစားအသောက်၊ ဆေးဝါးနှင့်အလှကုန်ပစ္စည်းကြီးကြပ်ကွပ်ကဲရေးကော်မတီမှ တာဝန်ရှိသူများက ကွင်းဆင်းစစ်ဆေးမှုများဆောင်ရွက်ခဲ့ကြပါသည်။

         ငါန်းဇွန်မြို့နယ်အတွင်းရှိ အများပြည်သူများအတွက် သုံးစွဲရန်မသင့်သော အလှကုန်ပစ္စည်းများ ရောင်းချမှုမရှိစေရေး၊ အစားအသောက်နှင့်ဆေးဝါးကွပ်ကဲရေးဦးစီးဌာန(FDA)တွင် မှတ်ပုံတင်ထားခြင်းမရှိသည့်အပြင် နေပြည်တော်ဓာတ်ခွဲဌာန၌ အတည်ပြုစစ်ဆေးရာ တားမြစ်ဓာတုပစ္စည်းများပါဝင်မှုရှိ၍ သုံးစွဲရန်မသင့်သည့် အလှကုန်ပစ္စည်း(၄၂)မျိုးအား ရောင်းချမှုမရှိစေရေးတို့အတွက် ကွင်းဆင်းစစ်ဆေးဆောင်ရွက်ခဲ့ကြပြီး အရောင်းဆိုင်များမှ တာဝန်ရှိသူများအား ပူးပေါင်းအဖွဲ့က သက်ဆိုင်ရာဌာနများ၏ ဥပဒေများ၊ နည်းဥပဒေများပါ ပြဋ္ဌာန်းချက်များ၊ သတ်မှတ်ချက်များ၊ စည်းကမ်းချက်များ၊ ထောက်ခံချက်များပြည့်စုံမှန်ကန်စွာပါရှိပြီး အရည်အသွေးစစ်မှန်ကောင်းမွန်၍ ကျန်းမာရေးအတွက် ဘေးအန္တရာယ်ကင်းရှင်းသော အလှကုန်များကိုသာရောင်းချကြရန်နှင့် တရားမဝင်ကုန်ပစ္စည်းများ၊ သက်ဆိုင်ရာဌာနများ၏ သုံးစွဲရန်မသင့်ကြောင်း သတ်မှတ်ထုတ်ပြန်ထားသောကုန်ပစ္စည်းများ၊ ဥပဒေများပါအချက်အလက်များနှင့်ကိုက်ညီမှုမရှိသော ကုန်ပစ္စည်းများရောင်းချနေမှုများကို စစ်ဆေးတွေ့ရှိရပါက ဥပဒေများနှင့်အညီအရေးယူခံရမည်ဖြစ်ကြောင်း ရှင်းလင်းပြောကြားခဲ့ကြပါသည်။ အဆိုပါကွင်းဆင်းစစ်ဆေးမှုတွင် မြို့နယ်အထွေထွေအုပ်ချုပ်ရေးဦးစီးဌာ၊ မြို့နယ်စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာန၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်ရဲတပ်ဖွဲ့ စသည့်ဌာနများမှ တာဝန်ရှိသူများပါဝင်ဆောင်ရွက်ခဲ့ကြကြောင်းသိရှိရပါသည်။

DOCA(မန္တလေး)