သတင်းနှင့် လှုပ်ရှားမှုများ

    ဧရာဝတီတိုင်းဒေသကြီးအစိုးရအဖွဲ့ရုံး၏ အစည်းအဝေးခန်းမ၌ စားအုန်းဆီတည်ငြိမ်ကျဆင်းရေးအတွက် ဆီကုန်သည်များ၊ ဆီလုပ်ငန်းရှင်များနှင့်တွေ့ဆုံဆွေးနွေးပွဲကို ၂၀၂၃ခုနှစ်၊ စက်တင်ဘာလ ၄ရက်နေ့ နံနက် (၁၀:၃၀) နာရီအချိန်တွင် စီးပွားရေးရာဝန်ကြီး ဦးတင်အေးက ဦးဆောင်ကျင်းပခဲ့ရာ  ဆန်နှင့်ဆီမှာ မရှိမဖြစ်စားသုံးရန်လိုအပ်ပြီး အခြေခံစားသုံးသူပြည်သူများ အခက်အခဲမရှိစေရေးအတွက် သင့်တင့်မျှတသည့် အမြတ်အစွန်းရရှိပြီး ထိုက်သင့်သည့်ဈေးနှုန်းဖြင့် ရောင်းချနိုင်ရေး ဆွေးနွေးညှိနှိုင်းခဲ့ပါသည်၊၊

    စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးစိုးအောင်က အများပြည်သူစားသုံးရန် ခွဲဝေချထားပေးသော စားအုန်းဆီပိဿာ ၃၃၀၀ကို ဈေးကား ၆စီးဖြင့် ခရိုင်အလိုက် ရောင်းချလျက်ရှိကြောင်း၊ မြန်မာနိုင်ငံဆီကုန်သည်များအသင်းမှ ဖြန့်ဖြူးရောင်းချပေးသော စားအုန်းဆီပေပါ ၂၀၀ကို တစ်ခရိုင်လျှင် ၂၅ပေါပါနှုန်းဖြင့် ရောင်းချပေးလျက်ရှိကြောင်း တင်ပြဆွေးနွေးခဲ့ပါသည်၊၊

  ဧရာဝတီတိုင်းဒေသကြီးကုန်သည်များနှင့်စက်မှုလက်မှုလုပ်ငန်းရှင်များအသင်းဥက္ကဋ္ဌက မိမိတို့ခရိုင်အတွင်း ဆီရရှိမှု/ ဖြန့်ဖြူးရောင်းချမှု/ အားသာချက်၊ အားနည်းချက်နှင့်လိုအပ်ချက်များကို ဆွေးနွေးခဲ့ပြီး စီးပွားရေးရာဝန်ကြီးက စားသုံးသူရေးရာဦးစီးဌာန၊ ရုံးချုပ်နှင့် ရန်ကုန်တိုင်းဒေသကြီး၊ စီးပွားရေးရာဝန်ကြီးနှင့် ချိတ်ဆက်ဆောင်ရွက်ရမည့်ကိစ္စရပ်များရှင်းလင်းပြောကြားခဲ့ပါသည်၊၊

DOCA(ဧရာဝတီ)

    စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်းရှိ ပြည်သူတို့အနေဖြင့် စားသုံးသူပြည်သူများ ကုန်စည်နှင့်ဝန်ဆောင်မှုများကို ရယူအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်စေရေး ရည်ရွယ်၍ ဈေးကွက်အတွင်း ရောင်းချနေသောအသင့်စားခေါက်ဆွဲခြောက်အမျိုးမျိုးနှင့် အာဟာရဖြည့်စွက်စာအမျိုးမျိုးတို့၏ ကုန်အညွှန်းအမှတ်အသားပြည့်စုံမှန်ကန်မှုရှိစေရေး ဈေးကွက်စောင့်ကြည့်စစ်ဆေးလျက်ရှိရာ (၂၃-၈-၂၀၂၃) ရက်နေ့တွင် ပြည်မြို့၊ မြို့မဈေးရှိ အသင့်စားခေါက်ဆွဲခြောက်အရောင်းဆိုင်သို့လည်းကောင်း၊ ရွှေတောင်မြို့နယ်၌ (၁၆-၈-၂၀၂၃) ရက်နေ့တွင် ကြာနီကန်ရပ်ကွက်ရှိ အာဟာရဖြည့်စွက်စာရောင်းချသည့်ဆိုင်များနှင့် (၂၂--၈-၂၀၂၃) ရက်နေ့တွင် ရွှေတောင်၊ မြို့မဈေးရှိ အသင့်စားခေါက်ဆွဲခြောက်အရောင်းဆိုင်သို့ လည်းကောင်း၊ ပေါက်ခေါင်းမြို့နယ်၌ (၁၈-၈-၂၀၂၃) ရက်နေ့တွင် ပေါက်ခေါင်းမြို့မဈေးရှိ အသင့်စားခေါက်ဆွဲခြောက်အရောင်းဆိုင်များနှင့် (၄-၉-၂၀၂၃) ရက်နေ့တွင် မြို့ပေါ်ဆေးဆိုင်နှင့် စတိုးဆိုင်များရှိ အာဟာရဖြည့်စွက်စာရောင်းချသည့် ဆိုင်များသို့လည်းကောင်း၊ သက်ဆိုင်ရာမြို့နယ်တာဝန်ခံများဦးဆောင်သော ပူးပေါင်းအဖွဲ့ဖြင့် ဝန်ထမ်းများသည် ကွင်းဆင်းဆောင်ရွက်၍ အသင့်စားခေါက်ဆွဲခြောက်အမျိုးမျိုးနှင့် အာဟာရဖြည့်စွက်စာအမျိုးမျိုးတို့၏ ကုန်အညွှန်းအမှတ်အသားများပြည့်စုံမှန်ကန်စွာဖော်ပြမှုရှိ/ မရှိ ဈေးကွက်စောင့်ကြည့်စစ်ဆေးခဲ့ပါသည်။

    ယင်းသို့ကွင်းဆင်းစစ်ဆေးခြင်းဆောင်ရွက်ခဲ့ရာတွင် အထက်ဖော်ပြပါနေရာများတွင် ရောင်းချနေသော အသင့်စားခေါက်ဆွဲခြောက်အမျိုးမျိုးနှင့် အာဟာရဖြည့်စွက်စာအမျိုးမျိုးတို့တွင် ကုန်အညွှန်းအမှတ်အသားဆိုင်ရာအချက်အလက်များပြည့်စုံမှန်ကန်စွာရှိသော ကုန်စည်များကိုရောင်းချမှုရှိကြောင်း စစ်ဆေးတွေ့ရှိရပြီး ပြည်ခရိုင်အတွင်း ဈေးကွက်များတွင် ရောင်းချနေသောအသင့်စားခေါက်ဆွဲခြောက်အမျိုးမျိုးတွင် ကုန်စည်အုပ်စုအလိုက် မြန်မာဘာသာဖြင့် ကုန်အညွှန်အမှတ်အသားဖော်ပြရမည့် အသေးစိတ်စိစစ်ချက်အရ အသင့်စားခေါက်ဆွဲခြောက်များတွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ သုံးစွဲပုံနည်းလမ်း စသည့်အချက်များကို မြန်မာဘာသာဖြင့် မဖြစ်မနေဖော်ပြရမည်ဖြစ်ပြီး ဈေးကွက်အတွင်းရောင်းချနေသော အာဟာရဖြည့်စွက်စာအမျိုးမျိုးတွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဘေးထွက်ဆိုးကျိုးကြိုတင်သတိပေးချက် စသည့်အချက်များကို မြန်မာဘာသာဖြင့် မဖြစ်မနေဖော်ပြရမည်ဖြစ်ကြောင်းနှင့် ကုန်အညွှန်းအမှတ်အသားဖော်ပြချက်ဆိုင်ရာအချက်များ ပြည့်စုံမှန်ကန်စွာဖော်ပြမှုရှိသော ကုန်စည်များကိုသာရောင်းချကြရန် လုပ်ငန်းရှင်များအား အသိပညာပေးဆွေးနွေးမှုများပြုလုပ်ခဲ့ပြီး အသိပညာပေးလက်ကမ်းစာစောင်များလည်း ဝေငှခြင်းများဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

 စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများပြည့်စုံမှန်ကန်စွာဖော်ပြမှုရှိစေရေး ရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ပန်းတောင်းမြို့နယ်၌ (၂၂-၈-၂၀၂၃) ရက်နေ့တွင် ငါးမျက်နှာရွာရှိ ကောင်းဟိန်းထက်စံဆီစက်၊ (၂၄-၈-၂၀၂၃) ရက်နေ့တွင် ဥသျှစ်ပင်မြို့ရှိ ဘရဏီစက်သုံးဆီဆိုင်၊ (၂၈-၈-၂၀၂၃) ရက်နေ့တွင် လဲရွာရှိ Kyaw San စက်သုံးဆီဆိုင်နှင့် (၂၉-၈-၂၀၂၃) ရက်နေ့တွင် ဥသျှစ်ပင်ရှိ ရွှေမဥ္ဇူဆီစက်တို့သို့လည်းကောင်း၊ ပေါက်ခေါင်းမြို့နယ်၌ (၂၂-၈-၂၀၂၃) ရက်နေ့တွင် အမှတ်(၃)ရပ်ကွက်ရှိ ဦးမင်းနောင်ချိုဆီစက်သို့လည်းကောင်း၊ ပြည်မြို့နယ်၌ (၂၈-၈-၂၀၂၃) ရက်နေ့တွင် အမှတ် (၂)၊ ကျောင်းကြီးအိုးတန်းလမ်းရှိ ဦးသန်းမြင့်ဆီရောင်းဝယ်ရေးလုပ်ငန်းနှင့် (၄-၉-၂၀၂၃) ရက်နေ့တွင် ဆုတောင်းပြည့်ဘုရားလမ်းရှိ ဦးစောထိုက်ဆီရောင်းဝယ်ရေးလုပ်ငန်းသို့လည်းကောင်း၊ သက်ဆိုင်ရာမြို့နယ်တာဝန်ခံနှင့်ဝန်ထမ်းများသွားရောက်၍ မိမိတို့ဖြန့်ဖြူးရောင်းချလျက်ရှိသောကုန်စည်များတွင် အရည်အသွေး၊ အလေးချိန်၊ အချိန်အတွယ်၊ ပမာဏနှင့် အမျိုးအစားများမှန်ကန်စွာဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့်အညီ ထုတ်လုပ်ရောင်းချမှုရှိစေရေး၊ ကုန်စည်အလိုက် ဖော်ပြရမည့်ကုန်အညွှန်းအမှတ်အသားများ၊ ပြည့်စုံမှန်ကန်စွာဖော်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများပြုလုပ်ဆောင်ရွက်သွားမည်ဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်မြို့ရှိ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံး၌ ပဲခူးတိုင်းဒေကြီးဦးစီးမှူး ဦးဇေယျာဆွေက (၂၆-၈-၂၀၂၃) ရက်နေ့၊ နေ့လယ် (၁၃:၃၀) နာရီအချိန်တွင် နွားမွေးမြူရေးလုပ်ကိုင်သူနှင့်တွေ့ဆုံဆွေးနွေးခဲ့ပါသည်။

     အဆိုပါတွေ့ဆုံဆွေးနွေးပွဲသို့ နွားမွေးမြူရေးလုပ်ငန်းလုပ်ကိုင်သူ (၉)ဦး၊ နို့နှင့် နိုထွက်ပစ္စည်းလုပ်ကိုင်သူ (၃)ဦး၊ စုစုပေါင်း (၁၂)ဦးတက်ရောက်ခဲ့ကြပါသည်။ ထို့နောက် ပဲခူးတိုင်းဒေသကြီးဦးစီးမှူးက နွားမွေးမြူရေးလုပ်ငန်းလုပ်ကိုင်သူနှင့် နို့ထွက်ပစ္စည်းထုတ်လုပ်ရောင်းချသူတို့အား တွေ့ကြုံနေသည့်လုပ်ငန်းအခက်အခဲများ၊ လုပ်ငန်းလိုအပ်ချက်များ၊ ဈေးကွက်အခြေအနေနှင့် ရင်းနှီးမြုပ်နှံမှုများအား တွေ့ဆုံဆွေးနွေးခဲ့ပါသည်။ နွားမွေးမြူရေးနှင့် နို့ထွက်ပစ္စည်းလုပ်ကိုင်သူများအနေဖြင့် လုပ်ငန်းများတိုးချဲ့လျှင် နိုင်ငံတော်မှ သက်သာသောအတိုးနှုန်းများဖြင့် ချေးငွေများထုတ်ချေးပေးသွားမည်ဖြစ်ကြောင်း၊ ပြည်မြို့၊ တီတွဒ်(စံပြ)ကျေးရွာအနီးတွင် မွေးမြူရေးဇုန်ဖော်ထုတ်ရန်ရှိကြောင်း၊ မွေးမြူရေးဇုန်လုပ်ကိုင်ရာတွင် ဧက(၈၁)ဧကဖော်ထုတ်၍ မွေးမြူရေးအတွက် လုပ်ကိုင်နေသူများအနေဖြင့် တစ်ဧကလျှင် သိန်း(၁၀၀)ကျပ်ဖြင့် ရောင်းချပေးမည်ဖြစ်ကြောင်း ပြောကြားခဲ့ပါသည်။

    ထို့နောက် နွားမွေးမြူရေးလုပ်ငန်းလုပ်ကိုင်သူနှင့် နို့ထွက်ပစ္စည်းထုတ်လုပ်ရောင်းချသူတစ်ဦးချင်းစီက ပြန်လည်ဆွေးနွေးခဲ့ရာ ယခုအချိန်တွင် နွားစာများဈေးနှုန်းမြင့်တက်နေခြင်း၊ အစာများတွင် အာဟာရဖြစ်စေမည့် အစာများမဟုတ်ဘဲ ရောနှောကာရောင်းချနေခြင်းများကိုစိစစ်ပေးစေလိုကြောင်း၊ ကျပ်သိန်း(၁၀၀)ဖြင့် ရောင်းချမည့်မြေကွက်များကိုလည်း ယခုအချိန်တွင် ဝယ်ယူနိုင်မည်မဟုတ်သေးကြောင်း၊ တိရိစ္ဆာန်အစာများသာဈေးကြီးပေး၍ ဝယ်ယူနေရသော်လည်း အစာရောများပါဝင်သဖြင့် နွားများအတွက် အာဟာရမဖြစ်၍ နို့အထွက်နှုန်းကျဆင်းသဖြင့် တွက်ချေမကိုက်ကြောင်း စသည်ဖြင့် ဆွေးနွေးခဲ့ပြီး တွေ့ဆုံဆွေးနွေးပွဲအား နေ့လယ်( ၁၆:၃၀) နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(ပဲခူး)

          မန်ကျည်းပင်သည် မုတ်သုံရာသီဥတုတွင် ပေါက်ရောက်သောအပင်ဖြစ်ပြီး ဆူဒန်နှင့်မဒါဂတ်စတား၏ မျိုးစိတ်အပိုင်း ရွက်ကြွေတောများအပါအဝင် မုတ်သုံအာဖရိကတွင် စတင်အရင်းခံသည့် စိန်ပန်းပင်၊ ပိတောက်ပင်၊ ကုက္ကိုလ် ပင်စသည့်တို့နှင့်အတူ လီဂူမီနိုးစီးမျိုးရင်းတွင် ပါဝင်ပြီး ရုက္ခဗေဒအမည်မှာ တမ်းမရင်းဒပ်အင်ဒီကာမျိုးဖြစ်သည်။

          မန်ကျည်းပင်သည်အညာဒေသတွင်သာမက အခြားဒေသများမှာလည်း ပေါများစွာပေါက်ရောက်သောကြောင့် လူတိုင်းမြင်ဖူးကြပါသည်။ ထိုအပင်စတင်ပေါက်ရောက်ရာဇာတိဒေသမှာ အာဖရိကတိုက်အရှေ့ပိုင်းဖြစ်ပြီး ထိုမှတဆင့်  ပူအိုက်သောတိုင်းပြည်များဖြစ်သည့် အိန္ဒိယနိုင်ငံနှင့် မြန်မာနိုင်ငံများသို့  ယူဆောင်စိုက်ပျိုးခဲ့ခြင်းဖြစ်သည်။ မန်ကျည်းပင်သည် အမြဲစိမ်းလန်းသောအပင်ဖြစ်၍ မြန်မာနိုင်ငံနေရာအနှံအပြားတွင် စိုက်ပျိုးထားပါသည်။ မြန်မာနိုင်ငံအထက်ပိုင်းတွင် မန်ကျည်းပင်ကို အကြီးအကျယ်စိုက်ပျိုးထားကြရာ ထိုဒေသများတွင် အများဆုံးတွေ့ရပါသည်။ လယ်ကွင်းများ၊ ဥယျာဉ်ခြံမြေများ၊ ကျွဲ၊ နွားစားကျက်များတွင် မန်ကျည်းပင်ပေါက်ကလေးများကို နေရာအနှံ့အပြား မြင်တွေ့ရခြင်းအားဖြင့် အပင်ပေါက်လွယ်သော သစ်ပင်ဖြစ်ကြောင်းသိရှိရပါသည်။

          မန်ကျည်းပင်မှရရှိသောမန်ကျည်း အရွက်၊ အပွင့် ၊အသီးနှင့် အပင်၏ပင်စည်ကစ၍ လူသား တို့ကျန်းမာရေးအတွက် များစွာအကျိုးပြုကြောင်း လေ့လာတွေ့ရှိရပါသည်။

အရွက်

    မန်ကျည်းပင်မှရရှိသောအရွက်များကို ချက်ပြုတ်စားသောက်ရသည့်အပြင် ဟင်းချက်သံဒယ်အိုးများ သံချေးမတက်စေရန်နှင့် သံချေးစော်မနံစေရန်အတွက် မန်ကျည်းရွက်အကြမ်းများကို ဒယ်အိုးထဲသို့ထည့်၍ပြုတ်ပြီး တစ်ညတာထားပြီးမှ အသုံးပြုရပါသည်။ အရွက်နုလေးများကို ဖွယ်ဖွယ်ရာရာ စီမံ၍ ချက်ပြုတ်စားသောက်ရာတွင် မြေပဲဖြင့်သုပ်စားခြင်း၊ ချဉ်ဟင်းချက်စားခြင်း၊ မန်ကျည်းချဉ် သိပ်ခြင်းများဖြင့် စားသောက်ကြပါသည်။

မန်ကျည်းသီး

          မန်ကျည်သီးသည် အမျှင်ဓာတ်ကြွယ်ဝသည့်အသီးဖြစ်သောကြောင့် ဝမ်းမီးကိုမှန်စေပြီး အစာအိမ်အူလမ်းကြောင်းကို သန့်စင်စေရုံသာမက အသည်း၊ အူမကြီးနှင့်အခြားအစာခြေအင်္ဂါအစိတ်အပိုင်းများကိုပါ ကျန်းမာစေသည်။ မန်ကျည်းသီးကိုနေ့စဉ်စားသုံးပေးခြင်းဖြင့် အစာခြေစနစ်ကို တိုးတက်ကောင်းမွန်စေမှာ ဖြစ်ပါသည်။

          မန်ကျည်းသီးမှာ သံဓာတ်ကြွယ်ဝစွာပါဝင်ပြီး သွေးလည်ပတ်မှုကိုကောင်းမွန်စေပါသည်။ မန်ကျည်းသီး နေ့စဉ်စားသုံးသည့်အခါ သံဓာတ်ပမာဏ၏ (၁၀) ရာခိုင်းနှုန်းကိုထောက်ပံ့ပေးပြီး သံဓာတ်သည် သွေးနီဥဆဲလ်များကိုတိုးစေပြီး ဆဲလ်၏အင်္ဂါအစိတ်အပိုင်းများဆီသို့ အောက်ဆီဂျင်ထောက်ပံ့ပေးမှုကိုလည်း အထောက်အပံ့ဖြစ်စေပါသည်။ အသက်အရွယ်ရလာသည်နှင့်အမျှ သိမြင်မှုလုပ်ငန်းစဉ်များ ကောင်းမွန်စေရန် သဘာဝအစားအစာများကို မှီခိုလာကြရပါသည်။ အာရုံကြောစနစ်ကို တိုးမြှင့်ပေးသည့်အစားအစာများထဲတွင် မန်ကျည်းသီးလည်းပါဝင်ပါသည်။ မန်ကျည်းသီးမှာ အာရုံကြော၏ လုပ်ငန်းစဉ်များနှင့်မှတ်ဉာဏ်များကို တိုးတက်စေသည့် သီရာမင်(ဗီတာမင် B6) ကြွယ်ဝစွာ ပါဝင်ပါသည်။ အရသာရှိလှသည့် မန်ကျည်းသီးသည် သွေးတွင်းအဆီဓာတ်ကို ထိန်းညှိခြင်း၊ စောင့်ကြည့်ခြင်းကိုအထောက်အကူဖြစ်စေခြင်း၊ သကြားဓာတ်နှင့်အဆီဓာတ်များဖွဲ့စည်းမှုကို ဖြစ်ပေါ်စေနိုင်သည့် ကာဗိုဟိုက်ဒရိတ်စုပ်ယူမှုကို နှေးကွေးစေနိုင်ပြီး အင်ဆူလင်ပမာဏကိုလည်း တိုးစေနိုင်ပါသည်။ ဆီးချိုဝေဒနာရှင်များအနေဖြင့် မန်ကျည်းသီးကို စားသုံးပေးခြင်းဖြင့် ရောဂါများကိုသက်သာစေပါသည်။

          မန်ကျည်းသီးမှာ ဆဲလ်များနှင့်ကိုယ်တွင်းအင်္ဂါများကို ပြင်ပဓာတုပစ္စည်းများကြောင့် ထိခိုက်မှုမရှိအောင် ကာကွယ်ပေးပြီး ရောဂါအန္တရာယ်များမှ ကာကွယ်ပေးနိုင်သည့် ဓာတ်တိုးဆန့်ကျင် ပစ္စည်းများနှင့် ဗီတာမင်စီကြွယ်ဝစွာပါဝင်ပါသည်။ မန်ကျည်းသီးမှာ ရောင်ရမ်းမှုကိုတိုက်ဖျက်နိုင်သည့်အစွမ်းရှိသကဲ့သို့ ဘက်တီးရီးယားများကို တိုက်ဖျက်နိုင်သည့်အစွမ်း၊ ရောဂါကာကွယ်နိုင်သည့် အစွမ်းလည်းရှိပါသည်။ ကိုယ်ခံအားစနစ်ကို တိုးတက်အောင်လည်း အထောက်အကူပြုပါသည်။ မန်ကျည်းသီးမှာ ခန္ဓကိုယ်အတွက်လိုအပ်သည့် သတ္ထုဓာတ်နေ့စဉ်လိုအပ်သည့် အမျှင်ဓာတ်နှင့်ဗီတာမင်စီတို့ပါဝင်သောကြောင့် သွေးသန့်အောင် လုပ်ဆောင်ပေးနိုင်ပါသည်။ မန်ကျည်းသီးမှာ ဓာတ်တိုးဆန့်ကျင် ပစ္စည်းကြွယ်ဝစွာပါဝင်နေသောကြောင့် free radicals များကို တိုက်ဖျက်ပေးပြီး သွေးသန့်စေပါသည်။ မန်ကျည်းသီးသည် ကိုလက်စထရောကို ထိထိရောက်ရောက်ထိန်းညှိပေးနိုင် ပြီး ခန္ဓာကိုယ်အတွက် အကျိုးမပြုသည့် ကိုလက်စထရော (LDL)ကိုကျဆင်းစေပြီး အကျိုးပြု ကိုလက်စထရော (HDL)ကို တိုးတက်အောင်လုပ်ဆောင်ပေးနိုင်ပါသည်။ ပိုတက်ဆီယမ်ကြွယ်ဝစွာ ပါဝင်သောကြောင့် သွေးပေါင်ချိန်ကိုထိန်းညှိပေးပါသည်။ ဗီတာမင်စီကြွယ်ဝမှုသည်လည်း နှလုံးသွေး ကြောစနစ်အပေါ် ဖိအားသက်ရောက်မှုကိုလည်း ့ာကျစေပါသည်။

မန်ကျည်းစေ့

          မန်ကျည်းစေ့ကိုရေ၌တစ်ညစိမ်၍ နံနက်တွင်နွားနို့နှင့် ကြိတ်သောက်ပါက မီးယပ်ဖြူဆင်း ခြင်း၊ ဆီးလွန်ခြင်းများ ပျောက်ကင်း၏။ မန်ကျည်းစေ့ကို သွေး၍သောက်ခြင်းဖြင့် ဝမ်းသွားခြင်း၊ ဝမ်းကိုက်ခြင်းကို ပျောက်ကင်းစေပါသည်။ ကင်းခြေများ၊ ကင်းမီးကောက်စသည့် အဆ်ိပ်ရှိသောအကောင် များကိုက်လျှင်လည်း ကိုက်သောနေရာကို မကျည်းစေ့ကိုကပ်ထားပါက အဆိပ်ကိုသက်သာစေပါသည်။

ပင်စည်

         မန်ကျည်းပင်မှရရှိသောပင်စည်ကို အမွှေးတိုင်များပြုလုပ်ရာတွင် ခွဲစိတ်ပြီးအသုံးပြုကြပါသည်။ မန်ကျည်းခေါက်ကို သာမန်မျက်စိနာလျှင် အပူဒဏ်ခံနိုင်ရန်အတွက် သနပ်ခါးကဲ့သို့သွေး၍ လိမ်းခြင်း ဖြင့် သက်သာစေပါသည်။

          မြန်မာ့ဆေးကျမ်းများအရ မန်ကျည်းပင်သည် တစ်ပင်လုံးအသုံးဝင်ပြီး ပူခြင်း၊ ချဉ်ခြင်း၊ သည်းခြေကိုဖြစ်စေတတ်ခြင်း၊ သလိပ်ကိုပွစေခြင်း၊ လေကိုနိုင်စေခြင်း၊ သွေးဖောက်ပြန်ခြင်း၊ နားရောဂါ၊ မျက်စိရောဂါ၊ မြွေဆိပ်သင့်ခြင်းများကိုနိုင်စေပြီး အသီးစိမ်းသည် ချဉ်၊ ချို၊ ပူအရသာရှိပြီး သည်းခြေနှင့် သလိပ်ကိုနိုင်စေသည်။ အသီးမှည့်သည်ပူသောကြောင့် ဝမ်းမီးကိုတောက်စေသည့်အပြင် အနည်းငယ်သက်စေ၍ သလိပ်နှင့်လေကို နိုင်စေသည်။ မန်ကျည်းပင်သည် ပဉ္စငါးပါးလုံး အသုံးပြု၍ ကျန်းမာရေးအတွက် အထောက်အကူပြုကြောင်း လေ့လာသိရှိရပါသည်။

DOCA(မကွေး)