သတင်းနှင့် လှုပ်ရှားမှုများ

   ရခိုင်ပြည်နယ်၊ သံတွဲခရိုင်၊ သံတွဲမြို့၌ ဒေသဖွံ့ဖြိုးရေးအတွက် ကွင်းဆင်းဆောင်ရွက်မှု၌ နိုင်ငံတော်မှ ချမှတ်ထားသည့် စစ်ကြောင်း (၅) ကြောင်းပုံသဏ္ဍာန်ဖော်၍ ဟောပြောပွဲကို (၈-၉-၂၀၂၃) ရက်နေ့၊ နေ့လယ်  (၁၃:၃၀) နာရီအချိန်တွင် ငပလီမြို့၊ ဇီးဖြူကုန်းရပ်ကွက်၌ သံတွဲမြို့စစ်ကြောင်း(၅)မှ တာဝန်ရှိသူများသည် ရပ်ကွက်နေပြည်သူများအား အသိပညာပေးအခမ်းအနားကျင်းပခဲ့ပါသည်။

    အဆိုပါ အခမ်းအနားတွင်နိုင်ငံရေးစစ်ကြောင်းမှ ဗိုလ်မှူးကျော်လင်းဦးက အဖွင့်အမှာစကားပြောကြားပြီး အဖွဲ့ဖြင့်လိုက်ပါလာသော အုပ်ချုပ်ရေးစစ်ကြောင်းမှ သံတွဲမြို့အုပ်ချုပ်ရေးမှူး ဦးမောင်သာစိန်၊ ဒေသဖွံ့ဖြိုးရေးစစ်ကြောင်းမှ မြို့နယ်ကျေးလက်ဖွံ့ဖြိုးရေး ဦးစီးဌာနမှူး ဦးမြတ်သူ၊ စည်းရုံးရေးစစ်ကြောင်း၊ ပြည်သူ့အင်အားဦးစီးဌာနမှ မြို့နယ်ဦးစီးမှူး ဦးမြင့်ဇော်နှင့် တာဝန်ရှိသူများက သက်ဆိုင်ရာကဏ္ဍအလိုက် အသီးသီးဆွေးနွေးခဲ့ကြကြောင်း၊ လူမှုရေးစစ်ကြောင်းမှ စားသုံးသူရေးရာဦးစီးဌာန၊ သံတွဲခရိုင်ဦးစီးမှူး ဦးဝင်းနိုင်(ဦးစီးအရာရှိ)က စားသုံးသူရေးရာဦးစီးဌာန၏လုပ်ငန်းဆောင်ရွက်ချက်တို့ကို ရှင်းလင်းပြောကြားပြီးနောက် ဌာန၏စားသုံးသူကာကွယ်ရေးဥပဒေပါ ပြဋ္ဌာန်းချက်များ၊ စားသုံးသူအခွင့်အရေးနှင့်တာဝန်များ၊ ကုန်စည်/ဝန်ဆောင်မှုပေါ်တွင် စားသုံးသူကတောင်းဆိုနိုင်သည့်အခွင့်အရေးများ၊ စားသုံးသူများလုံခြုံစိတ်ချရမှုရှိစေရေးအတွက် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာဖော်ပြရမည့်အကြောင်းအရာများ၊ စားသုံးသူနစ်နာဆုံးရှုံးမှုများအပေါ် အရေးဆိုတောင်းဆိုနိုင်သည့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းဖွင့်လှစ်ဆောင်ရွက်နေမှုအခြေအနေများ၊ Online စနစ်ဖြင့် ရောင်းချသည့်လုပ်ငန်းများအတွက်လည်း မှတ်ပုံတင်လျှောက်ထားပြီးမှသာ လုပ်ဆောင်ရန်လိုအပ်ကြောင်း အကျယ်တဝင့်ရှင်းလင်းဆွေးနွေးခဲ့ပြီး တက်ရောက်လာသူများ၏ မေးမြန်းချက်များအား ပြန်လည်ဖြေကြားခဲ့ကြောင်း သတင်းရရှိပါသည်။       

DOCA(ရခိုင်)                                                          

    စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးအနေဖြင့် ၂၀၂၃ခုနှစ်၊ စက်တင်ဘာလ ၇ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့၊ ရှမ်းပိုင်းရပ်ကွက်၊ နောင်ယား(ခ)ရပ်ကွက်၊ ဒေါနိုးကူးရပ်ကွက်ရှိ ကလေးအာဟာရဖော်စပ်ဖြည့်စွက်စာအမျိုးမျိုးရောင်းချနေသော ကုန်စုံဆိုင်များနှင့်ဆေးဆိုင်များသို့ မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉)ပါ ကုန်အညွှန်းအမှတ်အသားသတ်မှတ်ချက်များနှင့်ကိုက်ညီမှုရှိ/မရှိ၊ မိတ်ဖက်ဌာနများဖြစ်သော မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်နယ်ရဲတပ်ဖွဲ့တို့နှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ပါသည်။

 ကယားပြည်နယ်၏ ကလေးအာဟာရဖြည့်စွက်စာအများစုမှာ လက်ရှိဈေးကွက်အနေအထားအရ တန်ဖိုးကြီးဖော်စပ်စာနှင့် ဖြည့်စွက်စာတချို့မှာ ဝယ်လိုအားနည်းပါးကြောင်း၊ အလယ်အလတ်တန်းစား ကလေးအာဟာရဖြည့်စွက်စာများမှာ အရောင်းပိုသွက်ကြောင်း၊ ဈေးနှုန်းများမှာလည်း မြှင့်တက်လျက်ရှိကြောင်း၊ မိခင်နို့ရည်အစားထိုးအစာဖြင့် အာဟာရပြည့်ဝစွာမရရှိနိုင်သည့် ကလေးငယ်များအတွက် ထုတ်လုပ်ထားသည့် နို့ရည်နှင့်နို့မှုန့်များတွင် အသက်အပိုင်းအခြားတိကျစွာဖော်ပြပါရှိပြီး ဖျော်စပ်သုံးစွဲရန်အညွှန်းများကို မြန်မာဘာသာဖြင့် တိကျစွာဖော်ပြထားကြောင်း၊ ပြည်ပမှတစ်ဆင့် ဝင်ရောက်သောကလေးအာဟာရဖြည့်စွက်စာများတွင် မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉)ပါ ကုန်အညွှန်းအမှတ်အသားသတ်မှတ်ချက်များကို စတစ်ကာများဖြင့် ကပ်နှံဖော်ပြထားရှိပြီး အဆိုပါပစ္စည်းများမှာ  အသစ်ဝင်ရောက်ခြင်းမဟုတ်ဘဲ သက်တမ်းရက်ကျော်လွန်ခြင်းမရှိသေးသောပစ္စည်းလက်ကျန်များဖြစ်ကြောင်း၊ တချို့ကုန်စုံဆိုင်နှင့် ဆေးဆိုင်များ၌ တင်သွင်းရောင်းချမှုမရှိကြောင်းစစ်ဆေးတွေ့ရှိရပါသည်။

   ဆိုင်ရှင်များအနေဖြင့် ကလေးငယ်များနှင့်သက်ကြီးရွယ်အိုများ ကျန်းမာရေးဆိုင်ရာ ထိခိုက်မှုများဖြစ်ပွားစေနိုင်သည့် အာဟာရဖြည့်စွက်စာအမျိုးမျိုးကို နေရောင်ခြည်နှင့်တိုက်ရိုက်မထိတွေ့  သောနေရာတွင် စနစ်တကျထားသိုသိမ်းဆည်းရောင်းချရန်လိုအပ်ကြောင်းနှင့် စားသုံးသူကိုနစ်နာဆုံးရှုံးမှုဖြစ်စေမည့် ကုန်အညွှန်းအမှတ်အသားမပါရှိသောကုန်စည်များ၊ ဘေးအန္တရာယ်ရှိသည်ဟု ထင်မြင်ယူဆရသော ကျန်းမာရေးနှင့်ကိုက်ညီမှုမရှိသည့် ကလေးအာဟာရဖြည့်စွက်စာများ၊ အသက်အရွယ်အလိုက် ရောင်းချသင့်သည့် ကလေးအာဟာရဖြည့်စွက်စာတို့ကို ခွဲခြား၍ရောင်းချရန်လိုအပ်ကြောင်း၊ သတ်မှတ်ချက်နှင့်ကိုက်ညီမှုမရှိသော ကလေးအာဟာရဖြည့်စွက်စာတို့ကို ဈေးကွက်အတွင်း ရောင်းချဖြန့်ဖြူးခြင်းများစစ်ဆေးတွေ့ရှိရပါက သက်ဆိုင်ရာဌာနများ၏ ဥပဒေအရ အရေးယူခြင်းခံရမည်ဖြစ်ကြောင်း၊ ၎င်းနောက် ကလေးအာဟာရဖြည့်စွက်စာများအမျိုးမျိုးရောင်းချသည့် ကုန်စုံဆိုင်နှင့် ဆေးဆိုင်(၁၀)ဆိုင်အား အသိပညာပေး၍ စစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

     (၉.၉.၂၀၂၃) ရက်နေ့တွင် စားသုံးသူရေးရာဦးစီးဌာန၊ သထုံခရိုင်ဦးစီးမှူးသည် သထုံမြို့နယ် ဆန်စက်လုပ်ငန်းရှင်များအသင်း၊ ဆန်ကုန်သည်အသင်းတို့မှ ပြည်သူများသို့ သက်သာသောဈေးနှုန်းဖြင့် ဆန်များရောင်းချရာတွင် ပူးပေါင်းပါဝင်ဆောင်ရွက်ခဲ့သည်။

       ထိုသို့ ဆန်များအား သက်သာသောဈေးနှုန်းဖြင့် ရောင်းချရာတွင် ဧည့်မထဆန် (၁) ပြည်လျှင် (၂၅၀၀) ကျပ်နှုန်းဖြင့် သထုံမြို့၊ ဘင်လှိုင်ရပ်ကွက်တွင် (၁၂၀၀) ပြည်ကိုလည်းကောင်း၊ သထုံမြို့၊ မြို့မဈေးရှေ့တွင် (၆၀၀) ပြည်ကိုလည်းကောင်း ရောင်းချပေးခဲ့ကြောင်း သိရှိရပါသည်။

DOCA(မွန်)

 မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန မြို့နယ်တာဝန်ခံရုံးမှ ဝန်ထမ်းများသည် (၁၀.၉.၂၀၂၃) ရက်နေ့တွင် ဘီးလင်းမြို့နယ် ဆန်စက်လုပ်ငန်းရှင်များအသင်း၊ ဆန်စပါးကုန်သည်များ အသင်းတို့နှင့် ပူးပေါင်း၍ အများပြည်သူများသို့ သက်သာသောဈေးနှုန်းဖြင့် ဆန်ရောင်းချခဲ့ကြောင်း သိရှိရပါသည်။

     အများပြည်သူများ သက်သာချောင်ချိရေးအတွက် အိမ်ထောင်စုတစ်စုလျှင် ဧည့်မထဆန် (၁) ပြည်လျှင် (၂၅၀၀) ကျပ်၊ ဆန်(၄)ပြည်နှုန်းဖြင့် ဘီးလင်းမြို့ မင်္ဂလာဈေးတွင် အခြေခံလူတန်းစား အိမ်ထောင်စု (၁၅၀) သို့ ရောင်းချပေးခဲ့ကြောင်း သတင်းရရှိပါသည်။

DOCA(မွန်)

  စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်ဦးစီးမှူးရုံးမှ မြို့နယ်ဦးစီးမှူး ဦးအောင်ဇော်ဦးနှင့်ဝန်ထမ်းများသည် (၆-၉-၂၀၂၃) ရက်နေ့၊ နံနက် (၀၉:၀၀)နာရီအချိန်တွင် မအူပင်ခရိုင်၊ စားသုံးသူရေးရာဦးစီးဌာန၊ အစည်းအဝေးခန်းမ၌ ဆီလုပ်လုပ်ငန်းရှင်များနှင့်တွေ့ဆုံ၍ စားသုံးသူကာကွယ်ရေးဥပဒေအကြောင်း အသိပညာပေးဟောပြောဆွေးနွေးခဲ့ကြပါသည်။

    အဆိုပါဟောပြောဆွေးနွေးပွဲတွင် စားသုံးသူရေးရာဦးစီးဌာနမှ မအူပင်မြို့နယ်ဦးစီးမှူး ဦးအောင်ဇော်ဦး (ဦးစီးအရာ)ရှိက ဆီလုပ်ငန်းရှင်များအား  စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ ပြည်ပမှတင်သွင်းသည့် စားသုံးဆီများသတ်မှတ်အရည်အသွေးနှင့် စံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများကိုသုံးစွဲနိုင်ရေး၊ ဈေးနှုန်းတည်ငြိမ်စွာဝယ်ယူစားသုံးနိုင်ရေးအတွက် စဉ်ဆက်မပြတ်ဆောင်ရွက်ကြပ်မတ်လျက်ရှိကြောင်း၊ လုပ်ငန်းရှင်များအနေဖြင့် ရည်ညွှန်းဈေးဖြင့် ဖြန့်ဖြူးရောင်းချ ပေးသောစားအုန်းဆီရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂% အမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချခြင်း၊ အလေးချိန်မှန်ကန်စွာရောင်းချပေးခြင်း၊ စနစ်တကျဝယ်ယူ/ ရောင်းချနေခြင်းကိုဆောင်ရွက်ရန်၊ စားအုန်းဆီ ၁ပိဿာလျှင် (၄၆၀၀) ကျပ်ဖြင့် စားသုံးသူပြည်သူများအား တန်းစီစနစ်ဖြင့် ရောင်းချပေးနေနိုင်ရေး ပူးပေါင်းဆောင်ရွက်ကြရန်၊  မအူပင်ဆီရောင်းချသောလုပ်ငန်းရှင်များအနေဖြင့် စီးပွားရေးလုပ်ငန်းရှင်များလိုက်နာရမည့် စားသုံးသူကာကွယ်ဥပဒေပါ တာဝန်များကိုလိုက်နာဆောင်ရွက်ရန် အသိပညာပေးခဲ့ပြီး ဆီလုပ်ငန်းရှင် (၁၂)ဦးတက်ရောက်ခဲ့ကြကြောင်းသိရှိရပါသည်။

DOCA(ဧရာဝတီ)