သတင်းနှင့် လှုပ်ရှားမှုများ

     မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် တိုင်းဒေသကြီး ဦးစီးမှူးရုံးနှင့် မကွေး၊ ချောက်၊ မင်းဘူး၊ သရက်၊ အောင်လံ၊ ပခုက္ကူခရိုင်များရှိ အရာထမ်း/ အမှုထမ်းများသည် စားသုံးသူ အခွင့်အရေးနှင့် အကျိုးစီးပွားကိုကာကွယ်ရန် ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေး လုပ်ငန်းများ ကျယ်ကျယ်ပြန့်ပြန့် ဆောင်ရွက်လျှက်ရှိပါသည်။

       မကွေးတိုင်းဒေသကြီးအနေဖြင့် ၂၀၂၂ခုနှစ်၊ ဧပြီလမှ ဩဂုတ်လထိ အသိပညာပေးဟောပြောပွဲ လျာထား (၈၆)ကြိမ်တွင် (၁၁၇)ကြိမ်၊ လုပ်ငန်းရှင်တွေ့ဆုံခြင်း လျာထား(၁၆၀) ကြိမ်တွင် (၂၂၅)ကြိမ်၊ စားသုံးသူရေးရာကော်မတီ အစည်းအဝေး(၃)ကြိမ်နှင့် သင်တန်း(၅)ကြိမ် ဖွင့်လှစ်ဆောင်ရွက်နိုင်ခဲ့ပြီး အသိပညာပေးနိုင်မှု လူဦးရေမှာ စားသုံးသူ ဦးရေ(၅၁၈၈)ဦး၊ စီးပွားရေးလုပ်ငန်းရှင်ဦးရေ(၁၉၂၇)ဦးရှိကြောင်း သိရှိရပါသည်။ နေရာဒေသအလိုက် စားသုံးသူ ကာကွယ်ရေးဆိုင်ရာ အသိပညာပေးဆွေးနွေးခြင်းလုပ်ငန်း ဆောင်ရွက်နိုင်ခဲ့မှုအနေဖြင့် အခြေခံပညာကျောင်းများတွင် (၂၄)ကြိမ်၊ တက္ကသိုလ်/ ကောလိပ်/ အသက်မွေးဝမ်းကျောင်းများတွင် (၂)ကြိမ်၊ ဈေးများတွင် (၁၀)ကြိမ်၊ ကျေးရွာများတွင် (၁၇)ကြိမ်၊ ရပ်ကွက် များတွင် (၄၅)ကြိမ်၊ (တိုင်း၊ ခရိုင်၊ မြို့နယ်အဆင့်) ဌာနဆိုင်ရာများတွင် (၁၅)ကြိမ်၊ Onlineမှ (၄)ကြိမ်၊ စုစုပေါင်း (၁၁၇)ကြိမ် ဆောင်ရွက်နိုင်ခဲ့ကြောင်း သိရှိရပါသည်။

       အဆိုပါစားသုံးသူကာကွယ်ရေးဆိုင်ရာလုပ်ငန်းများ ဆောင်ရွက်ရာတွင် စားသုံးသူကာကွယ်ရေးဥပဒေ (၂၀၁၉)ပါ စားသုံးသူ၏အခွင့် အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များနှင့် ကုန်အညွှန်း အမှတ်အသားဆိုင်ရာ ဖော်ပြချက်များ၊ ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုရာတွင် နစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်သည့် အကြောင်းအရာများ၊ တိုင်ကြားနိုင်သည့် ဦးစီးဌာနအနေနှင့် တိုင်ကြားမှုတွင် ပါဝင်သိရှိရမည့် အချက်အလက်နည်းလမ်းများနှင့် တားမြစ်ချက်များ၊ ပြစ်မှုပြစ်ဒဏ်များအား အသိပညာပေး ဟောပြောဆွေးနွေးခဲ့ပြီး အသိပညာပေး လက်ကမ်းစာစောင်များ၊ ဥပဒေစာအုပ်များ ဖြန့်ဝေပေးခဲ့ကြောင်း သတင်းရရှိပါသည်။

DOCA( မကွေး)

        မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မိတ္ထီလာ ခရိုင်ဦးစီးမှူး ဦးဇော်မင်းသည် (၁၂ . ၉ . ၂၀၂၂)ရက်နေ့ (၁၄း၀၀) နာရီချိန်တွင် မိတ္ထီလာခရိုင် ကုန်စည်ဒိုင်တွင် စီးပွားရေးလုပ်ငန်းရှင်များနှင့် စားသုံးသူအသိပညာပေး ဟောပြောပွဲ ပြုလုပ်ခဲ့ပါသည်။

    အဆိုပါတွေ့ဆုံမှုတွင်စားသုံးသူရေးရာဦးစီးဌာန၏ မျော်မှန်းချက်၊ရည်မှန်းချက်နှင့်တာဝန်များကို ရှင်းလင်းပြောကြားခဲ့ပြီး၊ စီးပွားရေးလုပ်ငန်းရှင်များအနေဖြင့် စားသုံးသူများဘေးအန္တရာယ်ကင်းရှင်း၍ မိမိတို့လုပ်ငန်းများ ထုတ်ကုန်လုံခြုံစိတ်ချမှုရှိပြီး အကျိုးစီးပွားဖြစ်ထွန်းစေရန်အတွက် စားသုံးသူ ကာကွယ်ရေးဥပဒေပါ ပြဌာန်းချက်များအား လိုက်နာစေလိုကြောင်း၊ စားသုံးသူကာကွယ်ရေး ဥပဒေ (၂၀၁၉) အခန်း(၁၈)ပါ ကုန်အညွှန်းအမှတ်အသားဖော်ပြချက်များနှင့် မြန်မာနိုင်ငံ စားသုံးသူကာကွယ် ရေးကော်မရှင်မှ ထုတ်ပြန်ထားသော ညွှန်ကြားချက်ပါ သက်ဆိုင်ရာ ကုန်စည်အုပ်စုအလိုက် မြန်မာဘာသာဖြင့်ထည့်သွင်းဖော်ပြရမည့် အချက်အလက်များနှင့် ပတ်သက်၍ရှင်းလင်းပြောကြားခဲ့ပြီး၊ တားမြစ်ချက်များ၊ ပြစ်မှုပြစ်ဒဏ်များအကြောင်းကို အကျယ်တဝင့်ရှင်းလင်းပြောကြားခဲ့ပြီး၊ မည်သည့် လုပ်ငန်းရှင်မဆို စားသုံးသူကာကွယ်‌ပေးရေးဥပဒေပါ တားမြစ်ချက်များကို ဖောက်ဖျက်ပါက စားသုံးသူကာကွယ်ပေးရေး ဥပဒေအရ အရေးယူခံရမည်ဖြစ်ကြောင်းနှင့် စီးပွားရေးကျင့်ဝတ်နှင့်အညီ လုပ်ကိုင်‌ ဆောင်ရွက်ခြင်းဖြင့် စျေးကွက်များ ပိုမိုရရှိလာနိုင်ပြီး စားသုံးသူများမှလည်း လုံခြုံစိတ်ချရသော ကုန်စည်များအား ရွေးချယ်ဝယ်ယူသုံးစွဲလာနိုင်၍ နှစ်ဦးနှစ်ဖက် အကျိုးကျေးဇူးများရရှိစေလာမည်ကြောင်း၊ သိရှိလိုသည်များ၊ အခက်ခဲများကို ရင်းနှီးပွင့်လင်းစွာ တင်ပြစေလိုကြောင်း ဆွေးနွေးခဲ့ပြီး စီးပွားရေးလုပ်ငန်းရှင်များအနေဖြင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို သိရှိလိုပါက www.doca.gov.mm Websiteတွင်ဝင်ရောက်လေ့လာနိုင်ကြောင်း အသိပညာပေး ဆွေးနွေးခဲ့ပါသည်။

DOCA(မန္တလေး)        

      မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူးရုံးသို့ မိတ္ထီလာမြို့နယ်အတွင်းမှ အလှကုန်လုပ်ငန်း လုပ်ကိုင်သည့် လုပ်ငန်းရှင်တစ်ဦးမှ ကုန်ပစ္စည်းထုတ်လုပ်ရာတွင် ဖော်ပြရမည့် ကုန်အညွှန်းအမှတ်အသားများနှင့် စပ်လျဉ်း၍ သိရှိလိုသည်များကို (၁၂-၉-၂၀၂၂) ရက်နေ့ (၁၄၀၀)ချိန် တွင်   ခရိုင်ဦးစီးမှူးရုံးခန်းတွင် ခရိုင်ဦးစီးမှူး ဦးဇော်မင်းနှင့် လာရောက်တွေ့ဆုံ မေးမြန်းခဲ့ပါသည်။  

      လုပ်ငန်းရှင်သည် မိတ္ထီလာမြို့နယ်ဒေသအတွင်း အလှကုန်များကို ထုတ်လုပ်နေသူတစ်ဦး ဖြစ်ပါကြောင်း၊ ထုတ်လုပ်သည့် ကုန်ပစ္စည်းအပေါ်တွင် ဖော်ပြရမည့် ကုန်အညွှန်းအမှတ် အသားများ အား သိရှိလိုက်နာဆောင်ရွက်နိုင်ရေး ညွှန်ကြားပေးနိုင်ပါရန် လာရောက်တွေ့ဆုံရခြင်းဖြစ် ကြောင်း ပြောကြားရာ ခရိုင်ဦးစီးမှူးမှ စားသုံးသူကာကွယ်‌ရေး ဥပ‌ဒေပါ စီးပွားရေးလုပ်ငန်းရှင်၏ တာဝန်များ၊ အခန်း (၁၅)ပါ ကုန်စည် သို့မဟုတ် ဝန်ဆောင်မှုလုံခြုံစိတ်ချရမှုအကြောင်း၊ အခန်း (၁၇)ပါ ကုန်စည်နှင့် ဝန်ဆောင်မှုအပေါ် တာဝန်ရှိမှအချက်များအကြောင်း၊ အခန်း (၁၉) ပါ တိုင်ကြား ခြင်းနှင့် စိစစ်ညှိနှိုင်း ဖြေရှင်းဆောင်ရွက်ခြင်းများအကြောင်း၊ စားသုံးသူကာကွယ် ရေးဥပဒေ (၁၈) ပါ ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်း ရှင်မဆို ပုဒ်မ (၄၁) ပုဒ်မခွဲ (ခ)နှင့် (ဆ) တို့ပါ ကုန်အညွှန်းအမှတ်အသား ဖော်ပြရာတွင် မြန်မာ ဘာသာဖြင့်ဖြစ်စေ၊ မြန်မာဘာသာနှင့်အခြား ဘာသာတစ်ခု (သို့) တစ်ခုထက် ပို၍တွဲလျှက်ဖြစ်စေ ရေးသားဖော်ပြထားသော ကုန်ပစ္စည်းများကိုသာ စားသုံးသူများ ဘေးကင်းလုံခြုံမှုရှိစေရေးအတွက် ရောင်းချဖြန့်ဖြူးရ မည်ဖြစ်ကြောင်း၊ ကုန်စည်ကြောင့် စားသုံးသူများ ထိခိုက်နစ်နာမှုရှိပါက တာဝန်ယူ ဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှုမရှိပါက စားသုံးသူမှတိုင်ကြားနိုင်သည့် အခွင့်အရေးရှိပြီး ဌာနနှင့် စားသုံးသူကာကွယ် ရေးကော်မတီတို့၏ စီမံခန့်ခွဲရေးနည်းလမ်းအရအရေးယူနိုင်သည့် အချက်အလက်များကို အသေးစိတ် ရှင်းလင်း ဆွေးနွေးခဲ့ပြီး လုပ်ငန်းရှင်ထုတ်လုပ်သည့် ကုန်ပစ္စည်း နမူနာပေါ်တွင်ဖော်ပြထားသည့် ကုန်အညွှန်းအမှတ်အသားများအား ပြည့်စုံမှုရှိစေရေး လိုအပ်သည်များကို ဖြည့်စွက်ပြောကြားခဲ့ပါသည်။

DOCA(မန္တလေး)        

စားသုံးသူကာကွယ်ရေးဆိုင်ရာ ကျပန်းစကားပြောပြိုင်ပွဲတွင် ပထမဆု ဆွတ်ခူးရရှိသော ရန်ကုန်တိုင်းဒေသကြီးဦးစီးမှူးရုံးမှ ဒေါ်ဖြိုးသဉ္ဇာနွယ်(အငယ်တန်းစာရေး)၏ ယှဉ်ပြိုင်မှုအား ကြည့်ရှုနိုင်ပါသည်-

စားသုံးသူကာကွယ်ရေးဆိုင်ရာ ကျပန်းစကားပြောပြိုင်ပွဲတွင် တတိယဆု ရရှိသော မန္တလေးတိုင်းဒေသကြီးဦးစီးမှူးရုံးမှ ဦးဝင်းထွန်းဦး(ဦးစီးမှူး)၏ ယှဉ်ပြိုင်မှုအား ကြည့်ရှုနိုင်ပါသည်-