သတင်းနှင့် လှုပ်ရှားမှုများ

          ပြည်ထောင်စုနယ်မြေ၊ စားသုံးသူရေးရာဦးစီးဌာန၊ နေပြည်တော်ဦးစီးမှူးရုံး၌ ၂၀-၇-၂၀၂၂ ရက်နေ့၊ နံနက်(၁၀း၀၀)နာရီ အချိန်တွင် နေပြည်တော် ဆီကုန်သည်နှင့် ဆီလုပ်ငန်းရှင်များ လုပ်ငန်းညှိနှိုင်းအစည်းအဝေး ကျင်းပ ဆောင်ရွက်ခဲ့ပါသည်။

          အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီး ဌာန၊ နေပြည်တော်ဦးစီးမှူး ဒေါက်တာဇော်လွင်က ပြည်သူများအနေဖြင့် စားသုံးဆီများကို ဈေးနှုန်းသက်သာ စွာဝယ်ယူနိုင်ရေးအတွက် နေပြည်တော်ဆီကုန်သည်နှင့်ဆီလုပ်ငန်းရှင်များအသင်းနှင့် ပူးပေါင်းပြီး ဆောင်ရွက်လျက်ရှိပါကြောင်း၊ ဆီလုပ်ငန်းရှင်များအနေဖြင့် ရန်ကုန်အထိုင်ဈေးအပေါ်တွင် အထွေထွေကုန်ကျစရိတ်ထပ်ပေါင်းပြီး၊ (၂%)ထက်မပိုသော အမြတ်ဖြင့်ရောင်းချပေးရမှာဖြစ်ကြောင်း၊ လက်လီဆိုင်များအနေဖြင့် ရန်ကုန်အထိုင်ဈေးနှုန်းပေါ်တွင် (၁၀%)ထက်မပိုသောအမြတ်ဖြင့် ရောင်းချ‌ပေးရမှာဖြစ်ကြောင်း၊ လုပ်ငန်းရှင်များအနေဖြင့် ဈေးကားများဖြင့် ရပ်ကွက်၊ ကျေးရွာများအရောက် ရောင်းချပေးစေလိုကြောင်း၊ လုပ်ငန်းရှင်များ၏ ဆီလိုအပ်ချက်များကို ရုံးချုပ်သို့ ဆက်လက် တင်ပြဆောင်ရွက်သွားမှာဖြစ်ကြောင်း၊ မိမိတို့လိုအပ်ချက်များကို အမြန်ဆုံးတွက်ချက် တင်ပြပေးစေလိုကြောင်း၊ စားသုံးသူရေးရာဦးစီးဌာနအနေဖြင့် ဆီလုပ်ငန်းရှင်များအသင်းနှင့် ပူးပေါင်း ကူညီ ဆောင်ရွက်ပေးသွားမှာဖြစ်ကြောင်း ပြောကြားခဲ့ပါသည်။

          ဆီလုပ်ငန်းရှင်အဖွဲ့ဝင်များ၏ ဆီလိုအပ်ချက်ပမာဏကို အထက်ဌာနအဆင့်ဆင့်သို့ ပေးပို့ တင်ပြသွားမှာဖြစ်ပါကြောင်း၊ ဒုတိယတိုင်းဦးစီးမှူး ဦးခင်မောင်ဆွေမှ စားသုံးသူရေးရာဦးစီးဌာန၊ ရုံးချုပ်၏ ညွှန်ကြားချက်၊ လမ်းညွှန်ချက်များအရ နယ်လှည့်အရောင်းဈေးကားများ စီစဥ်ဆောင်ရွက်ကြရမှာဖြစ်ပါကြောင်း၊ အခြေခံလူတန်းစားများအား ဖြန့်ဝေရောင်းချပေးနိုင်ရေး အဖွဲ့ဝင်များအနေဖြင့် ဆောင်ရွက်မည့်အစီအစဥ်များအား ဆွေးနွေးပေးပါရန် ပြောကြားခဲ့ပါသည်။

          စားသုံးဆီဖြန့်ဖြူးရောင်းချရာတွင် နေပြည်တော်မြို့မဈေး၊ အေလာဈေး၊ ပျဥ်းမနားဈေးနှင့် တပ်ကုန်းဈေးများတွင် ရောင်းချမှုအဆင်ပြေသော်လည်း အထူးဈေးနှုန်းဖြင့် (၃)ရက်ထက် ပိုမရောင်း နိုင်ဘဲ အထူးဈေးနှုန်းဖြင့် နေ့စဥ်ပုံမှန်ရောင်းချနိုင်ရေး၊ လူတစ်ဦးလျှင် (၁)ပိဿာနှုန်းဖြင့် ဈေးတစ် ဈေးမှာ (၂)ဆိုင်နှုန်းဖြစ်ဖြစ် လက်လီဈေးနှုန်းမှာ အမြတ်(၁၀%)အထိ လက်ခံလျက်ရှိပါသည်။

          နေပြည်တော် ဆီကုန်သည်နှင့်ဆီလုပ်ငန်းရှင်များအသင်း ဥက္ကဌ ဦးအောင်ကိုထက်မှ မြန်မာ နိုင်ငံ ဆီကုန်သည်နှင့် ဆီလုပ်ငန်းရှင်များအသင်း ၁၇-၇-၂၀၂၂ ရက်နေ့ အစည်းအဝေးဆုံးဖြတ်ချက် အရ မိမိအနေဖြင့် ၁၈-၇-၂၀၂၂ ရက်နေ့၌ နယ်လှည့်ဈေးကား(၄)စီးဖြင့် စားသုံးသူလက်ဝယ်အရောက် တစ်ဦးလျှင် တစ်ပိဿာနှုန်းကို အထူးဈေးနှုန်းဖြင့် ရောင်းချပေးခဲ့ကြောင်း ဆွေးနွေးခဲ့ပါသည်။ ထို့ပြင် အဖွဲ့ဝင်များအနေဖြင့် ဈေးကားများ လှည့်လည်ရောင်းချနိုင်ရေးအတွက် လိုအပ်သော ဆီပမာဏများအား ရရှိနိုင်ရန် အတတ်နိုင်ဆုံး ဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။

          ဒေါက်တာဇော်လွင်မှ ပြည်ထောင်စုနယ်မြေ၊ နေပြည်တော်အတွင်း စားသုံးဆီလိုအပ်ချက် အပြည့်အဝရရှိရေးနှင့် အချိန်မီရောက်ရှိနိုင်ရေး တွန်းအားပေးဆောင်ရွက်သွားမည်ဖြစ်ပါကြောင်းနှင့် အသင်းသူ/သားများအနေဖြင့် စည်းလုံးညီညွတ်စွာ ပူးပေါင်းဆောင်ရွက်သွားကြရန်လိုအပ်ပါကြောင်း တိုက်တွန်းမှာကြား၍ အစည်းအဝေးကို နေ့လယ်(၁၂း၀၀)တွင် ရပ်နားခဲ့ကြောင်း သတင်းရရှိပါသည်။

DOCA(ပြည်ထောင်စုနယ်မြေ)

              မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်သည် မကွေးတိုင်းဒေသကြီး ကုန်သည်များနှင့်စက်မှုလက်မှုလုပ်ငန်းရှင်များအသင်းအား ကျစ်လစ်ခိုင်မာစွာ ပြန်လည်ဖွဲ့စည်းနိုင်ရေး အတွက်စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်း၊ မကွေးခရိုင်ဦးစီးမှူး ဒေါ်တင်တင်လှ တို့နှင့်အတူ(၁၄.၇.၂၀၂၂)ရက်နေ့ နံနက်(၁၁:၀၀)နာရီအချိန်တွင် စားသုံးသူရေးရာဦးစီးဌာန၊ တောင်တွင်းကြီး မြို့နယ်တာဝန်ခံရုံး၌ တောင်တွင်းကြီး၊ နတ်မောက်၊ မြို့သစ်မြို့နယ်များရှိ ကုန်သည်များနှင့်စက်မှုလက်မှု လုပ်ငန်းရှင်များနှင့် လည်းကောင်း၊ (၁၅.၇.၂၀၂၂)ရက်နေ့ နံနက်(၀၉:၀၀)အချိန်တွင် အောင်လံ ကုန်စည်ဒိုင်ခန်းမ၌ သရက်မြို့နယ်၊ အောင်လံမြို့နယ်များမှ ကုန်သည်များနှင့်စက်မှုလက်မှုလုပ်ငန်းရှင်များနှင့်လည်းကောင်း တွေ့ဆုံဆွေးနွေးခြင်းများ ဆောင်ရွက်ခဲ့ကြောင်း သိရှိရပါသည်။

           အဆိုပါတွေ့ဆုံပွဲများတွင် တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်က မကွေးတိုင်းဒေသကြီး ကုန်သည်စက်မှုလက်မှုလုပ်ငန်းရှင်းများအသင်း အလုပ်အမှုဆောင်အဖွဲ့ကို လက်ရှိ သက်တမ်းကာလကုန်ဆုံးပြီဖြစ်၍ အသင်း၏ဖွဲ့စည်းပုံ၊ စည်းမျဉ်းစည်းကမ်းများနှင့်အညီပြန်လည် ဖွဲ့စည်းရမည် ဖြစ်ကြောင်း၊ ယင်းသို့ပြန်လည်ဖွဲ့စည်းရာတွင် တိုင်းအတွင်းရှိ ခရိုင်အလိုက် ဒေသအသီးသီးရှိ သီးနှံ/ ထုတ်ကုန်ကဏ္ဍစုံမှ လုပ်ငန်းရှင်များစုံညီစွာပါဝင်ဖွဲ့စည်းရန်လိုအပ်ကြောင်း၊ အသင်းကျစ်လစ်ခိုင်မာ တောင့်တင်းမှသာလျှင် ဒေသတွင်းရောင်းဝယ်ဖောက်ကားမှု၊ ဒေသဖွံ့ဖြိုးမှုနှင့်ဒေသခံတောင်သူများ၏ လူမှုစီးပွားဘဝ ဘက်စုံဖွံ့ဖြိုး တိုးတက်လာမည်ဖြစ်ကြောင်း ဆွေးနွေးခဲ့ပြီး တောင်တွင်းကြီးကုန်စည်ဒိုင်မှ ကုန်သည်များနှင့်စက်မှုလက်မှုလုပ်ငန်းရှင်(၆၁)ဦး၊ အောင်လံကုန်စည်ဒိုင်မှ  ကုန်သည်များနှင့်စက်မှုလက်မှုလုပ်ငန်းရှင်(၈၂)ဦးတက်ရောက်ခဲ့ကြောင်း သတင်းရရှိပါသည်။

DOCA(မကွေး)

           ချင်းပြည်နယ် စားသုံးသူရေးရာကော်မတီအစည်းအဝေး ဒုတိယအကြိမ်လုပ်ငန်း ညှိနှိုင်းအစည်းအဝေး(၂/၂၀၂၂)ကို (၁၄-၇-၂ ၀၂၂)ရက်နေ့တွင် ချင်းပြည်နယ်အစိုးရအဖွဲ့၊ စီးပွားရေးရာဝန်ကြီးရုံးခန်း၌ ကျင်းပပြုလုပ်ခဲ့ပါသည်။ အစည်းအဝေးတွင် စီးပွားရေးရာဝန်ကြီး ဦးဟန်ကျင့်ဇမ်းက အမှာစကားပြောကြားရာတွင် စားသုံးသူကာကွယ်ရေးလုပ်ငန်းများသည် ဖွံ့ဖြိုးပြီးနိုင်ငံများတွင် ကျယ်ကျယ်ပြန့်ပြန့်ဆောင်ရွက်လျက်ရှိပြီး စားသုံးသူများ၏ အခွင့်အရေးနှင့် အကျိုးစီးပွားများစွာကို အပြည့်အဝခံစားနေရပြီဖြစ်ကြောင်း၊ ထိုနည်းတူ မိမိတို့နိုင်ငံလည်း စားသုံးသူကာကွယ်ရေးလုပ်ငန်းများကို တစိုက်မတ်မတ် အကောင်အထည်ဖော် ဆောင်ရွက်နေသည်ကို တွေ့ရပါကြောင်း၊ ယခင်(၁/၂၀၂၂) အစည်း အဝေးဆုံးဖြတ်ချက် (ခ) အရ ဈေးကွက်စောင့်ကြည့်စစ်ဆေးရန် စစ်ဆေးရေးအရာရှိ(၅)ဦးကို ရုံးချုပ်မှ ခန့်အပ်ခဲ့ပြီးဖြစ်ကြောင်း၊ စားသုံးသူများကို ဘေးအန္တရာယ်ဖြစ်စေနိုင်သည့် ကုန်စည် နှင့်  ဝန်ဆောင်မှုများ ၊ (expire date ) သက်တမ်းကုန်ပစ္စည်းများ ရောင်းချမှု ရှိမရှိ စစ်ဆေးရာတွင် ပိုမိုထိရောက်လာမည်ဖြစ်ပြီး ပြည်သူများ ယုံကြည်စိတ်ချရသော ကုန်စည်နှင့် ဝန်ဆောင်မှုများကို ပိုမိုရရှိလာမည်ဖြစ်ကြောင်း၊ လက်ရှိတွင် သောက်သုံးရေသန့်နှင့် ပတ် သက်၍ ပြည်သူများ လုံခြုံစိတ်ချစွာ သောက်သုံးနိုင်ရန်အတွက် (FDA) ထောက်ခံချက် ရရှိသော သောက်ရေသန့်ဖြန့်ဖြူးရောင်းချသည့် ကုမ္ပဏီများကိုလည်း ထပ်မံ၍ (FDA) နှင့် ဆက်စပ်ဌာနများအနေဖြင့် ရှောင်တခင် ကွင်းဆင်းစစ်ဆေး ဆောင်ရွက်စေလိုကြောင်း၊ လုံခြုံစိတ်ချရသော ကုန်စည်(သို့) ဝန်ဆောင်မှုများရရှိစေရေးအတွက် စားသုံးရေးရာဦးစီး ဌာနအနေဖြင့် ဦးဆောင်၍ အနည်းဆုံး တစ်လ (၁) ကြိမ် ဈေးကွက်စောင့်ကြည့်စစ်ဆေးခြင်းလုပ်ငန်များကို ဆက်စပ်ဌာနများနှင့် ဝိုင်းဝန်းပူးပေါင်းဆောင်ရွက်စေလိုကြောင်း ပြောကြားဆွေးနွေးခဲ့ပါသည်။

          ထို့နောက် ပြည်နယ်ဥပဒေချုပ်ရုံး၊ ပြည်နယ်အထွေထွေချုပ်အုပ်ရေးဦးစီးဌာန၊ ပြည်နယ်ရဲတပ်ဖွဲ့၊ ပြည်နယ်အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်နယ်စည်ပင်သာယာရေးအဖွဲ့များမှ တာဝန်ရှိသူများက စားသူကာကွယ်ရေးရာကော်မတီ၏ လုပ်ငန်းများနှင့် ပတ်သက်၍ ကဏ္ဍအသီးသီးကို ပါဝင်ဆွေးနွေး အကြံပြုခဲ့ကြရာ ချင်းပြည်နယ်၊ စားသုံး သူရေးရာဦးစီးဌာန၊ ချင်းပြည်နယ်ဦစီးမှူးရုံးမှ စားသုံးရေးရာကော်မတီအတွင်းရေးမှူးက လက်ရှိဆောင်ရွက်လျက်ရှိသည့် လုပ်ငန်းစဉ်များ၊ ရှေ့ဆက်လက်ဆောင်ရွက်ရမည့် အစီအစဉ်များနှင့် ပူးပေါင်းဆောင်ရွက်လိုသည့်ကိစ္စများကို တင်ပြခဲ့ရာ ချင်းပြည်နယ် စားသုံးသူရေးရာကော်မတီဥက္ကဋ္ဌ၊ ပြည်နယ်စီးပွားရေးရာဝန်ကြီးက လိုအပ်သည်များကို ပေါင်းစပ်ညှိနှိုင်းပေးခဲ့ကြောင်း သိရပါသည်။

DOCA(ချင်း)

           စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်ချက်ဖြင့် ရမည်းသင်းမြို့နယ်တာဝန်ခံနှင့် ဝန်ထမ်းများသည် စျေးကွက်တွင်းရောင်းချနေသော ဓါတ်ဆီ၊ဒီဇယ်များ စျေးနှုန်းမြင့်တင်ရောင်းချမှု ရှိ/မရှိ၊ အချိန်အတွယ် လီတာ၊ဂါလံများ ပြည့်မီမှုရှိ/မရှိ ကို ရမည်းသင်းမြို့နယ်အတွင်းရှိ OK Energy ၊ PT Power၊ Petro Green၊ Asia Egergy နှင့် MK ဆီဆိုင်များအား ၂၀၂၂ ခုနှစ်၊ ဇူလိုင်လ ၁၁ ရက်နေ့တွင် စျေးကွက်စောင့်ကြည့် ကွင်းဆင်းစစ်ဆေးခဲ့ပါသည်။

          ထိုသို့ ကွင်းဆင်းစစ်ဆေးရာတွင် စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိရမည်ဖြစ်ကြောင်း၊  အရည်အသွးပြည့်မီမှန်ကန်သည့် သတ်မှတ်ချက်နှင့် ကိုက်ညီသော စက်ဆီ၊ချောဆီ များကိုသာတင်သွင်း၊ဖြန့်ဖြူးရောင်းချရစေလိုကြောင်း ၊ သတ်မှတ်ချက်နှင့်မကိုက်ညီသော ပစ္စည်းများ ဖြစ်ပါက ဥပဒေနှင့်အညီဆောင်ရွက်သွားရမည်ဖြစ်ကြောင်း၊ စက်သုံးဆီများကို ပြည်သူများလက်ဝယ်သို့ ရည်ညွှန်းစျေးများအတိုင်း အမှန်တကယ်ရောင်းချပေးစေလိုကြောင်း၊  အသိပညာပေးဆောင်ရွက်ခဲ့ပြီး ဆီဆိုင်များမှ စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကော်မတီမှ သတ်မှတ်ထားသော နှုန်းထားများအတိုင်းသာ ရောင်းချမှုရှိပြီး၊ အချိန်အတွယ် လီတာ၊ဂါလံများကို (၂၀) လီတာစံဝင်ခွက်ဖြင့် တိုက်ဆိုင်စစ်ဆေးခဲ့ရာ ပြည့်မီမှုရှိကြောင်း သိရှိရပါသည်။

DOCA(မန္တလေး)    

            စားသုံးသူရေးရာဦးစီးဌာန ၊ မန္တလေးတိုင်းဒေသကြီး၊ (မိတ္ထီလာ/ရမည်းသင်း) ခရိုင် ၊ ခရိုင် ဦးစီးမှူး ဦးဇော်မင်းနှင့် ဝန်ထမ်းများသည် (မိတ္ထီလာ/ရမည်းသင်း)ခရိုင်အတွင်းရှိ စားသုံးဆီရောင်းချနေသောဆိုင်များသို့ ၂၀၂၂ ခုနှစ်၊ ဇူလိုင် ၁၁ ရက်နေ့တွင်  ကွင်းဆင်းစစ်ဆေးခဲ့ပါသည်။

          စားသုံးသူရေးရာဦးစီးဌာနမှ ကုန်အညွှန်းအမှတ်အသားဖော်ပြရာတွင် စားသုံးဆီများ၌ ဟင်းသီး ဟင်းရွက်ဆီ (Vegetable Oil နှင့် Cooking Oil) ဟူ၍ ဖော်ပြခြင်းမပြုပဲ ပါဝင်ပစ္စည်းများကို အခြေခံ၍ မြန်မာဘာသာြဖင့် တိကျစွာဖော်ပြရန် ကုန်စည်၏ အသားတင်ပမာဏ၊ အရွယ်အစားကိုလည်း မြန်မာ အလေးချိန်ယူနစ်ဖြစ်သော ပိဿာ/ကျပ်သားတို့ဖြင့်ဖော်ပြရမည်ဖြစ်ကြောင်း၊ ဥပမာအနေဖြင့် ဟင်းသီး ဟင်းရွက်ဆီ(စားအုန်းဆီ)၊ ဟင်းသီးဟင်းရွက်ဆီ (အဆင့်မြင့် စားအုန်းဆီ) ဟူ၍ ဖော်ပြရမည် ဖြစ် ကြောင်းကို စီးပွားရေးလုပ်ငန်းရှင်များ လိုက်နာဆောင်ရွက်ရန် ၂၀၂၁ ခုနှစ်၊ ဒီဇင်ဘာလ ၂၀ ရက်နေ့ တွင် ထုတ်ပြန်ခဲ့သော ညွှန်ကြားချက် (၁/၂၀၂၂) နှင့်ပတ်သက်၍ (၂၀.၆.၂၀၂၂) ရက်နေ့တွင် စတင်အာဏာတည်ပြီဖြစ်၍ ညွှန်ကြားချက်အား လိုက်နာမှု ရှိ/မရှိ စျေးကွက်ကွင်းဆင်းစစ်ဆေးခဲ့ပါသည်။ ထိုသို့ စစ်ဆေးရာတွင် ညွှန်ကြားချက်များအား လိုက်နာမှုရှိကြောင်းတွေ့ရှိရပြီး ခရိုင်ဦးစီးမှူးမှ ညွှန်ကြားချက်နှင့် ပတ်သက်၍ ထပ်မံရှင်းလင်းပြောကြားခဲ့ပြီး လိုက်နာမှုမရှိပါက စားသုံးသူကာကွယ်‌ရေးဥပဒေနှင့်အညီ အရေးယူဆောင်ရွက်သွားရမည်ဖြစ်ကြောင်း ရှင်းလင်းဆွေးနွေးခဲ့ပါသည်။

DOCA(မန္တလေး)