သတင်းနှင့် လှုပ်ရှားမှုများ

    ၂၀၂၄ ခုနှစ်၊ သြဂုတ်လ ၂၀ ရက်နေ့၊  နံနက်(၁၀း၀၀) အချိန်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ကျင်းပပြုလုပ်သည့် ပြည်တွင်းဆန်စျေးနှုန်း တည်ငြိမ်စေရေး အစည်းအဝေးသို့ တနင်္သာရီတိုင်းဒေသကြီးဦးစီးမှူးနှင့် ထားဝယ်ခရိုင်ဆန်စပါးကုန်သည်အသင်း ဒုဥက္ကဋ္ဌ တို့မှ Online Virtual စနစ်ဖြင့် တက်ရောက်ခဲ့ပါသည်။

      အစည်းအဝေးတွင် စားသုံးသူရေးရာဦးစီးဌာန၊ ညွှန်ကြားရေးမှူးချုပ်မှ အဖွင့်အမှာစကား ပြောကြား၍ ဒုတိယညွှန်ကြားရေးမှူးချုပ်မှ နိုင်ငံတော်၏ စီးပွားရေးလမ်းညွှန်ချက် ၁၀ ချက်မှ အချက် ၂ ချက်ဖြစ်သည့် လုပ်ငန်းရှင်များအား ထိန်းကျောင်းစေရေးနှင့် အသင်းအဖွဲ့များ ခိုင်မာစွာ ဆောင် ရွက်နိုင်ရေးအား ကူညီဆောင်ရွက်ပေးလျက်ရှိပါကြောင်း၊ တိုင်းဒေသကြီး/ပြည်နယ်ဦးစီးမှူးများမှ အသင်းများအား တစ်လ ၁ ကြိမ် ခေါ်ယူတွေ့ဆုံဆွေးနွေးခြင်း၊ အသင်းအဖွဲ့ စည်းမျဥ်း/ စည်းကမ်း များ၊ အရန်ဆန်ကိစ္စ၊ MyRo ကိစ္စများဆောင်ရွက်ရန် လမ်းညွှန်ထားပါကြောင်း ပြောကြားခဲ့ပါသည်။

      ဆက်လက်၍ မြန်နိုင်ငံဆန်စပါးအသင်းချုပ် ဥက္ကဋ္ဌ၊ မြန်မာနိုင်ငံဆန်စပါးကုန်သည်များအသင်းဥက္ကဋ္ဌ၊ မြန်မာနိုင်ငံဆန်စက်လုပ်ငန်းရှင်များဥက္ကဋ္ဌ၊ ရွှေဘိုပေါ်ဆန်းစိုက်ပျိုးထုတ်လုပ်သူများအသင်းဥက္ကဋ္ဌ၊ မြန်မာနိုင်ငံလက်လီရောင်းချသူများအသင်း၊ ရန်ကုန်တိုင်းဝါးတန်းကုန်စည်ဒိုင်၊ ဘုရင့်နောင်ကုန်စည်ဒိုင်များနှင့် တိုင်းဒေသကြီး/ပြည်နယ် ဆန်စပါးကုန်သည်များအသင်းဥက္ကဋ္ဌများမှ အသီးသီးတင်ပြဆွေးနွေးခဲ့ကြပါသည်။ အထွေထွေဆွေးနွေးမှုအနေဖြင့် ဒုတိယညွှန်ကြားရေးမှူးချုပ်မှ လိုအပ်သည်များကို ဖြည့်စွက်ဆွေးနွေးပြီး ညွှန်ကြားရေးမှူးချုပ်မှ နိဂုံးချုပ်အမှာစကားပြောကြားခဲ့ကာ အစည်းအဝေးအား နေ့လယ် (၁၂း၀၀) နာရီအချိန်တွင် ရုပ်သိမ်းခဲ့ကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ သန်းခေါင်စာရင်းကြီးကြပ်မှုကော်မတီ၏ ၂၀၂၄ ခုနှစ်၊ လူဦးရေနှင့်အိမ်အကြောင်းအရာသန်းခေါင်စာရင်း တိုင်းဒေသကြီးအဆင့်နည်းပြသင်တန်းဖွင့်ပွဲ အခမ်းအနား အား (၁၉.၈.၂၀၂၄)ရက်နေ့၊ နံနက်(၀၉:၀၀)နာရီအချိန်တွင် ထားဝယ်မြို့၊ မြို့တော်ခန်းမ၌ ကျင်းပပြုလုပ်ခဲ့ရာ တနင်္သာရီတိုင်းဒေသကြီးဝန်ကြီးချုပ်၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး အဆင့်ဌာနဆိုင်ရာများနှင့်အတူ တိုင်းဒေသကြီးစားသုံးသူရေးရာဦးစီးဌာနမှ တက်ရောက်ခဲ့ပါသည်။

     အဆိုပါဟောပြောပွဲတွင် တနင်္သာရီတိုင်းဒေသကြီးဝန်ကြီးချုပ်မှ အဖွင့်အမှာစကားပြောကြားခဲ့ပြီး သင်တန်းသား/သင်တန်းသူများက မိတ်ဆက်စကားပြောကြားခဲ့ပါသည်။ ထို့နောက် မှတ်တမ်းတင်ဓါတ်ပုံများ ရိုက်ကူးခဲ့ပြီး နံနက်(၀၉:၃၀)အချိန်တွင် အခမ်းအနားပြီးမြောက်ကြောင်း သတင်းရရှိပါသည်။

DOCA(တနင်္သာရီ)

    မကွေးတိုင်းဒေသကြီး၊ တိုင်းဦးစီးမှူးရုံးမှဝန်ထမ်းများနှင့်  သရက်ခရိုင်ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် စားသုံးသူများအခွင့်အရေးများ သိရှိစေရန်နှင့် ရယူတောင်းဆိုတတ်စေရန်၊ အစားအသောက်များကို ဘေးအန္တရာယ်ကင်းစွာ စားသောက်တတ်စေရန် ရည်ရွယ်၍ (၁၆-၈-၂၀၂၄) ရက်နေ့၊ နေ့လယ်(၁၃း၀၀)နာရီအချိန်တွင် သရက်ခရိုင် အမှတ်(၃)အခြေခံပညာအထက်တန်းကျောင်း၌ စားသုံးသူကာကွယ်ရေး အသိပညာပေးဟောပြောဆွေးနွေးခဲ့ကြောင်း သိရသည်။

     ဒုတိယခရိုင်မှူးမှ ဌာနသမိုင်းကြောင်း၊ ဦးစီးဌာန၏ ရည်မှန်းချက်၊ မျှော်မှန်းချက်များ၊ လက်ရှိဆောင်ရွက်နေသည့် လုပ်ငန်းတာဝန်များနှင့် စားသုံးသူကာကွယ်ရေးဥပဒေပါ ရည်ရွယ်ချက်များအကြောင်းကိုလည်းကောင်း၊ မကွေးတိုင်းဦးစီးမှူးရုံး စားသုံးတာဝန်ခံမှ စားသုံးသူအခွင့်အရေး(၈)ချက်၊ လိုက်နာရမည့်တာဝန်(၄)ချက်၊စားသုံးသူမှနစ်နာဆုံးရှုံးမှုကိုတိုင်ကြားလိုပါက တိုင်ကြားနိုင်ခြင်း၊ဌာနမှ စေ့စပ်ညှိနှိုင်းဖြေရှင်းဆောင်ရွက်မှုအကြောင်းအရာများကိုလည်းကောင်း၊ ထုတ်လုံတာဝန်ခံမှအခန်း (၁၈)ပါကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာဘာသာဖြင့် ပြည့်စုံစွာဖော်ပြပါရှိသော ကုန်စည်များ ဝယ်ယူသုံးစွဲနိုင်စေရေး ကုန်အညွှန်းအမှတ်အသားဆိုင်ရာအချက်(၈)ချက်ကိုလည်း ကောင်း၊ ခရိုင်FDA တာဝန်ခံမှ အစားအသောက်များတွင် ခွင့်မပြုသည့်ဓာတုပစ္စည်းများ၊ ကျန်းမာရေးအန္တရာယ်ဆိုးဝါးစွာထိခိုက်နိုင်သည့် အစားအသောက်များကို အန္တရာယ်ကင်းစွာကျင့်ကြံ စားသောက်ရ မည့်အကြောင်းများကိုလည်းကောင်း အသိပညာပေးဟောပြောခဲ့ကြောင်း သိရှိရပါသည်။

DOCA(မကွေး)

     ၁၉.၈.၂၀၂၄ ရက်နေ့တွင် စားသုံးသူရေးရာဦးစီးဌာန၊ သထုံခရိုင်ဦးစီးမှူးနှင့် ဝန်ထမ်းများသည် သထုံမြို့၊ မြို့မဈေးတွင် ဆန်/စပါးလုပ်ငန်းရှင်အသင်းနှင့် ဆန်စက်လုပ်ငန်းရှင်အသင်းတို့ ပူးပေါင်း၍ ပြည်သူများသို့ သက်သာသော ဈေးနှုန်းဖြင့် ဆန်များရောင်းချရာတွင် စနစ်တကျရှိစေရေး၊ စားသုံးသူပြည်သူများလက်ဝယ် အမှန်တကယ်ရောက်ရှိရေး၊ သင့်တင့်မျှတသော ဈေးနှုန်းဖြစ်စေရေးအတွက် ကြီးကြပ်ဆောင်ရွက်ခဲ့သည်။

     အဆိုပါနေ့တွင် ဧည့်မထဆန် (၁၀) မှတ် တစ်ပြည်လျှင် (၃၀၀၀) ကျပ်၊ ပေါ်ဆန်းဆန် တစ်ပြည်လျှင် (၅၅၀၀) ကျပ်ဖြင့် လူတစ်ဦးလျှင် (၂) ပြည်နှုန်းဖြင့်ရောင်းချခဲ့ရာ ပြည်သူလူထု (၇၀၀) ဦးအား ရောင်းချပေးခဲ့ကြောင်း သိရှိရသည်။

     ထိုကဲ့သို့ ပြည်သူများသို့ သက်သာသော ဈေးနှုန်းဖြင့် ဆန်များရောင်းချခြင်းအား သထုံမြို့နယ်ရှိ မြို့ပေါ်ရပ်ကွက် (၅) ရပ်ကွက်တွင်လည်း အလှည့်ကျစနစ်ဖြင့် ရောင်းချပေးမည်ဖြစ်‌ကြောင်း သိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှုးရုံးအနေဖြင့် ခရိုင်အတွင်းမြို့နယ်များရှိ စက်သုံးဆီအရောင်းဆိုင်များ၏ နေ့စဉ်ရောင်းချနေသော စက်သုံးဆီဈေးနှုန်းများသည် PPRD မှ ထုတ်ပြန်ထားသော ရည်ညွှန်းဈေးအတိုင်း ရောင်းချခြင်းရှိ/ မရှိ၊ စက်သုံးဆီပြတ်လပ်မှုရှိ/မရှိ အခြေအနေများကို တိုင်းဒေသကြီးဦးစီးမှူးရုံးသို့ ပေးပို့တင်ပြလျက်ရှိပါသည်။

      ထိုသို့တင်ပြမှုများဆောင်ရွက်လျက်ရှိရာ (၁၈-၈-၂၀၂၄) ရက်နေ့၊ နံနက် (၁၁:၃၀) နာရီအချိန်တွင် သင်္ဃန်းကျွန်းခရိုင်အတွင်း တာဝန်ကျဝန်ထမ်းများက တာမွေမြို့နယ်ရှိ ၂၀၀၀စက်သုံးဆီဆိုင်၊ သူရိယစွမ်းအင်စက်သုံးဆီဆိုင်၊ တောင်ဥက္ကလာပမြို့နယ်ရှိ Max Energy စက်သုံးဆီဆိုင်များသို့သွားရောက်ကွင်းဆင်း၍ ဆိုင်တာဝန်ခံများနှင့်တွေ့ဆုံပြီး PPRD မှ ထုတ်ပြန်ထားသည့် ရည်ညွှန်းဈေးအတိုင်းရောင်းချခြင်းရှိ/ မရှိ စက်သုံးဆီပြတ်လပ်မှုရှိ/ မရှိ၊ စက်သုံးဆီပြတ်လပ်သည့်အချိန်၊ ဆီကားရောက်ချိန်နှင့် ဆီဈေးနှုန်းတင်ထားသည့် Ledboard များကိုပါစစ်ဆေးခဲ့ပြီး တရားမဝင်စက်သုံးဆီများကိုရောင်းချခြင်းမပြုကြရန်၊ ဈေးကစားရန်ရည်ရွယ်ချက်ဖြင့် သိုလှောင်ထားခြင်းမပြုကြရန်နှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များနှင့်အညီ လုပ်ကိုင်ဆောင်ရွက်စေလိုကြောင်း အသိပညာပေးပြောကြားခဲ့ကြောင်းသိရှိရပါသည်။

DOCA(ရန်ကုန်)