သတင်းနှင့် လှုပ်ရှားမှုများ

       ရခိုင်ပြည်နယ်၊ စားသုံးသူရေးရာဦးစီးဌာန၊ စစ်တွေခရိုင်ဦးစီးမှူး ဦးမောင်လှဝင်း(ဦးစီးအရာရှိ)နှင့် ဝန်ထမ်းများသည် (၁၂-၉-၂၀၂၂)ရက်နေ့ နေ့လယ် (၁:၀၀)နာရီအချိန်တွင် စစ်တွေမြို့၊ မြောက်စံပြရပ်ကွက်ရှိ ဒေါ်ခင်ထွေးဝင်း Prince(မင်းသားလေး) ကိတ်မျိုးစုံ ထုတ်လုပ်ဖြန့်ဖြူးရောင်းချသည့် မုန့်လုပ်ငန်းရှင်အပါအဝင် ဝန်ထမ်း(၄)ဦးတို့အား စားသုံးသူကာကွယ်ရေး အသိပညာပေးဆွေးနွေးခဲ့ပါသည်။

      ထိုသို့ဆွေးနွေးရာတွင် ခရိုင်ဦးစီးမှူး ဦးမောင်လှဝင်းက ၂၀၁၉ စားသုံးသူကာကွယ်ရေးဉပဒေ အခန်း(၁၀)၊ ပုဒ်မ(၂၁) စီးပွားရေးလုပ်ငန်းရှင်၏တာဝန်(၁၁)ချက်၊ အခန်း(၁၁)၊ ပုဒ်မ(၂၂)အရ ရောင်းချသည့်ကုန်စည်တွင် သာမန်အားဖြင့်မမြင်နိုင်သော သဘာဝပြောင်းလဲမှုနှင့်စပ်လျဉ်း၍ စားသုံးသူအား ထင်ရှားစွာဖော်ပြ၍ အသိပေးရမည်ဖြစ်ကြောင်း၊ မြန်မာနိုင်ငံစားသုံးသူရေးရာကော်မရှင်၏ ညွန်ကြားချက်အမှတ်(၂/၂၀၁၉)အရ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာရန်ညွန်ကြားချက်များအား အသေးစိတ်ဟောပြောဆွေးနွေးခဲ့ပြီး လိုက်နာ ဆောင်ရွက်ရာတွင် အခက်အခဲမရှိစေရန် အသေးစိတ်ဇယားပါဝင်သော လက်ကမ်းစာစောင်အား ဖြန့်ဝေပေးခဲ့ကြောင်း သတင်းရရှိပါသည်။

DOCA(ရခိုင်)

        ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ ဝန်ထမ်းများသည် စက်တင်ဘာလ (၁၃) ရက်နေ့ ၊ နံနက် (၁၀:၀၀) နာရီအချိန်တွင် တောင်ကြီးမြို့ အမှတ်(၄) အခြေခံပညာ အထက်တန်းကျောင်း၌ ကျောင်းသား/ ကျောင်းသူများ သိသင့်သိထိုက်သည့် အသိပညာဗဟုသုတများ ရရှိစေရန်အတွက် စားသုံးသူကာကွယ်ရေးဆိုင်ရာ အသိပညာပေး‌ဟောပြောပွဲ ကျင်းပခြင်းနှင့် ကျောင်းမုန့် ဈေးတန်း ဈေးကွက်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

       အဆိုပါ အသိပညာပေးဟောပြောဆွေးနွေးပွဲတွင် အမှတ်(၄) အခြေခံပညာအထက်တန်း ကျောင်းက တာဝန်ခံကျောင်းအုပ်ဆရာမကြီး ဒေါ်ဇာလီနွယ်က အဖွင့်အမှာစာကားပြောကြားပြီး စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ ဦးလွင်ကိုအောင် (အကြီးတန်းစာရေး)က စားသုံးသူ ကာကွယ်ရေးဥပဒေအကြောင်းနှင့် စားသုံးသူအဓိပ္ပာယ်၊ စားသုံးသူကာကွယ်ရေးဥပဒေတွင် ပါရှိသော အခန်း (၉)ပါ စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းနှင့် စားသုံးသူ ထိခိုက်နစ်နာဆုံးရှုံးမှု ဖြစ်ပေါ်လာပါက တိုင်ကြားနိုင်မည့် ပုံစံနည်းစနစ်များအကြောင်းကို ဟောပြော ဆွေးနွေးခဲ့ပြီး  တက်ရောက်လာသော ဆရာ/ ဆရာမများနှင့် ကျောင်းသား/ ကျောင်းသူများက သိရှိလိုသည် များကို အပြန်အလှန်ဆွေးနွေးမေးမြန်းခဲ့ကြောင်းနှင့် အဆိုပါ အခမ်းအနားသို့ ဆရာ/ ဆရာမများနှင့် ကျောင်းသား/ ကျောင်းသူများ (၂၂၄ ) ဦး တက်ရောက်ခဲ့ကြောင်း သိရှိရပါသည်။

       ဆက်လက်၍ ကျောင်းဝင်းအတွင်းရှိ ကျောင်းမုန့် ဈေးတန်းတွင် အစားအသောက်၊ အချိုရည်များနှင့် မုန့်မျိုးစုံတို့ ရောင်းချလျက်ရှိသော ဆိုင်များရှိ ကုန်ပစ္စည်း များကို ဆရာ/ ဆရာမများ၊ ကျောင်းသား/ ကျောင်းသူများ၊ စားသုံးသူပြည်သူများ ဘေးအန္တရာယ်ကင်းရှင်း၍ လုံခြုံစိတ်ချမှုရှိစေရေးအတွက် သက်တမ်းလွန် အစားအသောက်များ ကျောင်းဝင်းအတွင်း ရောင်းချမှု ရှိ/ မရှိ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/ မရှိ တို့ကို ဈေးကွက်စစ်ဆေးခြင်း လုပ်ငန်းများကိုပါ ဆောင်ရွက်ခဲ့ကြောင်း သိရှိရပါသည်။

DOCA(ရှမ်း)

       ရှမ်းပြည်နယ် (တောင်ပိုင်း) စားသုံးသူရေးရာ ဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် ၂၀၂၂ခုနှစ်၊ စက်တင်ဘာလ (၁၂)ရက်နေ့၊ နေ့လယ် (၁၅:၀၀)နာရီအချိန်တွင် ကျိုင်းတုံမြို့၊ ရပ်ကွက် (၂)၊ (၃) အတွင်းရှိ အလှကုန်ပစ္စည်းအရောင်းဆိုင် (၄) ဆိုင်အား ကုန်အညွှန်းအမှတ်အသား နှင့်ပတ်သက်၍ ဈေးကွက်စောင့်ကြည့်စစ်ဆေးခြင်းလုပ်ငန်း ဆောင်ရွက်ခဲ့ပါသည်။

          ထိုသို့ဈေးကွက်စောင့်ကြည့်စစ်ဆေးခြင်း လုပ်ငန်းဆောင်ရွက်ရာ အလှကုန်ပစ္စည်းများတွင် မြန်မာစာနှင့်ကုန်အညွှန်းအမှတ်အသားများ ဖော်ပြပါရှိသည်ကို တွေ့ရှိရပါသည်။ စစ်ဆေးရေးမှူးနှင့် တာဝန်ရှိသူများသည် အလှကုန်ပစ္စည်းရောင်းချသူများကို သက်ဆိုင်ရာဌာနများ၏ ထောက်ခံချက် များနှင့် မြန်မာစာကုန်အညွှန်းအမှတ်အသားပြည့်စုံစွာ ဖော်ပြပါရှိပြီး တရားဝင်တင်သွင်းထားသည့် အလှကုန်ပစ္စည်းများကိုသာ ဖြန့်ဖြူးရောင်းချရန်၊ တရားမဝင်တင်သွင်းထားသည့် အလှကုန်ပစ္စည်း များကို ရောင်းချခြင်းမပြုရန်နှင့် စားသုံးသူကာကွယ်ရေး ဥပဒေအခန်း(၁၈)ပါ “ကုန်အညွှန်းအမှတ် အသားဖော်ပြခြင်း”နှင့် အခန်း(၁၀)ပါ “စီးပွားရေးလုပ်ငန်းရှင်၏တာဝန်များ” ကို သိရှိလိုက်နာ ဆောင်ရွက်စေရန် အသိပညာပေးဆွေးနွေးခြင်းများ ဆောင်ရွက်ခဲ့ပါသည်။

DOCA(ရှမ်း)

       မကွေးမြို့အတွင်း ဆေးဝါးများပြတ်လပ်မှုမရှိစေရေးနှင့် ဈေးနှုန်းအဆမတန် မြှင့်တင်ရောင်းချမှုမရှိ စေရေးအတွက် တိုင်းဒေသကြီးဆေးဝါးနှင့်ဆေးပစ္စည်းများ ဈေးကွက်စောင့်ကြည့် စစ်ဆေးကြပ်မတ်ရေးအဖွဲ့ သည် (၁၁.၉.၂၀၂၂)ရက်နေ့၊ နံနက်(၀၉ : ၄၅)မှ(၁၂ : ၀၀) အချိန်ထိ ဆေးအရောင်းဆိုင်များ၊ Mega ဆေးကုမ္ပဏီနှင့်A.A Medical produstd ltd; များသို့ သွားရောက်၍ ရှောင်တခင်ကွင်းဆင်း စစ်ဆေးခဲ့ပါသည်။

                  အဆိုပါဆေးဆိုင်များနှင့် ဆေးကုမ္ပဏီများတွင်    ဆေးဝါးရောင်းချခွင့်လိုင်စင်နှင့် တရားမဝင် ဆေးဝါးများ၊ သက်တမ်းလွန်ဆေးဝါးများ ရောင်းချမှု ရှိ/မရှိ၊ Lebelling ကုန်အညွှန်းအမှတ်အသားပြည့်စုံစွာ ဖော်ပြထားရှိခြင်း ရှိ/မရှိနှင့် ဆေးဝါးများပြတ်လပ်မှုရှိ/မရှိ ကွင်းဆင်းစစ်ဆေးခဲ့ရာတွင် ဆေးဝါးအများစုမှာ ပစ္စည်းပြတ်လပ် မှုမရှိဘဲအရည်အသွေး တူသော်လည်း တင်သွင်းသည့်ကုမ္ပဏီနှင့် ထုတ်လုပ်သည့်နိုင်ငံ မတူညီမှုကြောင့် ဈေးနှုန်းကွာခြားခြင်းသာရှိကြောင်း၊ ယခုလက်ရှိ အခြေအနေတွင် ပြည်ပမှတင်သွင်းသော  ဆေးဝါးပစ္စည်း များအလုံအလောက်ရှိသော်လည်း ဆေးဈေးနှုန်း များမှာ ဒေါ်လာဈေးမြင့်တက်လာမှုကြောင့် ယခင်နှစ် ကာလတူထက် တစ်ဆခွဲမှ နှစ်ဆခွဲထိ မြင့်တက်သွားခြင်းဖြစ်ကြောင်း၊ ပြည်တွင်းထုတ် ဆေးဝါး များမှာ ဈေးနှုန်းအနည်းငယ်သာမြင့်တက်မှုရှိကြောင်း၊ ဆေးဝါးများ ရောင်းချရာတွင် ကုမ္ပဏီရုံးချုပ်မှသတ်မှတ် ပေးထားသည့် ဈေးနှုန်းအတိုင်းသာရောင်းချကြောင်း A.A Medical produstd ltd အနေဖြင့် ယခင်က 5+1 FOC ဖြင့်ရောင်းချနေရာမှ စက်တင်ဘာလဆန်းမှစ၍   (၁၁ %)ဈေးပြန်ချ၍ ရောင်းချလျက်ရှိကြောင်း သိရှိရပါသည်။

DOCA(မကွေး)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော်မြို့နယ်တာဝန်ခံနှင့် ဝန်ထမ်းများသည် (၉.၉.၂၀၂၂)ရက်နေ့ (၁၁:၀၀)နာရီအချိန်တွင် ပန်းတနော် မြို့ ဆယ်နှစ်ကျေးရွာရှိ သင်ဖြူးဖျာလုပ်ငန်းရှင် (၅)ဦးနှင့်တွေ့ဆုံ၍ စားသုံးသူကာကွယ်ရေးအသိပညာပေး တွေ့ဆုံဆွေးနွေးခဲ့ကြပါသည်။

   ထိုသို့ကွင်းဆင်းဆောင်ရွက်ရာတွင် သင်ဖျာလုပ်ငန်းရှင်များနှင့်  တွေ့ဆုံ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်တို့၏ တာဝန်များအကြောင်း၊ ကုန်စည်နှင့် ပတ်သက်၍ အာမခံချက် ပေးနိုင်ခြင်းနှင့် စပ်လျဉ်းသည့် အချက်များအကြောင်း၊ ကုန်စည် အာမခံထားမှုအပေါ် စားသုံးသူတို့ တောင်းဆိုနိုင်သည့် အခွင့်အရေး များအကြောင်းကို ရှင်းလင်းဆွေးနွေးခဲ့ပါသည်။ လုပ်ငန်းရှင်တို့ထုတ်လုပ်သော သင်ဖျာများတွင် အမှတ်တံဆိပ် နှင့် မည်မျှနှစ်ရှည်ခံနိုင်သည့် အာမခံချက်များ ဖော်ပြနိုင်ပါက ပိုမိုကောင်းမွန်နိုင်ကြောင်း ကုန်အညွှန်းအမှတ်အသား ဖော်ပြခြင်းစပ်လျဉ်းသည့် ကိစ္စရပ်များအကြောင်းကို အကျယ်တဝင့် ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)