သတင်းနှင့် လှုပ်ရှားမှုများ

      မြန်မာနိုင်ငံဆန်စပါးအသင်းချုပ်သည် ပြည်တွင်းဆန်စပါးဈေးကွက်တည်ငြိမ်စေပြီး စိုက်ပျိုးတောင်သူများ၊ ဆန်စက်လုပ်ငန်းရှင်များ၊ ဖြန့်ဖြူးရောင်းချသူများနှင့် စားသုံးပြည်သူများအတွက် သင့်တင့်မျှတသော ဆန်ဈေးနှုန်းများဖြစ်ပေါ်စေရန်ရည်ရွယ်၍ ပြည်တွင်း၌ သတ်မှတ်ရည်ညွှန်းဈေးနှုန်းများဖြင့်ရောင်းချနိုင်ရေး လစဉ်ထုတ်ပြန်ပေးလျက်ရှိရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စာသုံးသူရေးရာဦးစီးဌာန၏လမ်းညွှန်မှုအရ ရန်ကုန်တိုင်းဒေသကြီးအတွင်းမြို့နယ်များရှိ ဈေးအရောင်းစင်တာများနှင့် ဒေသဈေးကွက်များတွင် မြန်မာနိုင်ငံဆန်စပါးအသင်းချုပ်မှ ထုတ်ပြန်ထားသည့် သတ်မှတ်ရည်ညွှန်းဈေးနှုန်းအတိုင်းရောင်းချနိုင်ရေး၊ မြို့သက်ဆိုင်ရာနယ်များရှိ အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးကော်မတီ၊ မြန်မာနိုင်ငံရဲတပ်ဖွဲ့ဝင်များ၊ မြို့နယ်ရပ်ကွက်အုပ်ချုပ်ရေးမှူးနှင့် စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးနှင့် တာဝန်ရှိသူများပူးပေါင်း၍ ၁၆-၈-၂၀၂၄ ရက်နေ့တွင်  မြောက်ဒဂုံမြို့နယ်၊ (၃၅) ရပ်ကွက်အတွင်းရှိ ဆန်ဆိုင် (၄)ဆိုင်အား ကွင်းဆင်းဆောင်ရွက်ခဲ့ကြောင်း သတင်းရရှိပါသည်။ 

DOCA(ရန်ကုန်)

      လူမှုကွန်ရက်ပေါ်တွင် ဖြစ်ပေါ်လျက်ရှိသော စျေးကွက်အတွင်း စားသုံးရန်မသင့်သော ဆီများရောင်းချနေမှုအပေါ် တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနသည် ၂၀၂၄ခုနှစ်၊ သြဂုတ်လ(၁၈) ရက်နေ့၊ နံနက်(၀၈း၃၀)နာရီအချိန်၌ ဗဟိုစာရင်းအင်းဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မြိတ်မြို့ပေါ်ရှိ စားအုန်းဆီအရောင်းဆိုင်(၆)ဆိုင်သို့သွားရောက်၍ ကွင်းဆင်းစစ်ဆေးခဲ့ကြောင်း သတင်းရရှိပါသည်။

        အဆိုပါဆိုင်များသို့ ကွင်းဆင်းစစ်ဆေးရာတွင် ကြော်ပြီးသောဆီ (ဝက်ဆီ၊ ဝက်ဆီဖတ်ဆီ၊ အာလူးကြော်ဆီ၊ ကြက်ကြော်ဆီ) စသော သုံးစွဲပြီးသည့် စားသုံးဆီများ ပြန်လည်ရောင်းချနေခြင်းရှိ/မရှိကိုစစ်ဆေးခဲ့ပြီး စားသုံးဆီရောင်းချရာတွင် ဘေးအန္တရာယ်ကင်းသော ဆီများသာရောင်းချကြရန်နှင့် စားသုံးသူများထိခိုက်နစ်နာမှုရှိစေမည့် စားသုံးရန်မသင့်သောဆီများအား ရောင်းချခြင်းမပြုရန် ပြောကြားခဲ့ကြောင်း သတင်းရရှိပါသည်။

DOCA(တနင်္သာရီ)

      ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်တွင် ဩဂုတ်လ ပထမပတ်တွင် ဓာတ်မြေဩဇာရောင်းချသည့် ဓာတ်မြေဩဇာဆိုင်များသို့ ရည်ညွှန်းဈေးထက် ဈေးနှုန်းမြင့်တင်ရောင်းချမှုမရှိစေရေး၊ ဝယ်ယူစရိတ်နှင့် အမြတ်ရာခိုင်နှုန်းဖြင့်သာရောင်းချပြီး စိုက်ပျိုးတောင်သူများ၏ သွင်းအားစုဈေးနှုန်းများမြင့်တက်မှုမှ ကာကွယ်နိုင်ရေး၊ မြို့နယ်မိတ်ဖက်ဌာနအဖွဲ့အစည်းများဖြစ်သော အထွေထွေအုပ်ချုပ်ရေးဦးစီးဌာန၊ စိုက်ပျိုးရေးဦးစီးဌာန၊ စားသုံးသူရေးရာဦးစီးဌာန၊ စည်ပင်သာယာရေးအဖွဲ့၊ စီမံကိန်းဦးစီးဌာနများနှင့်ပူးပေါင်းကာ သွားရောက်ကွင်းဆင်းစစ်ဆေးခဲ့ပါသည်။

      ထိုသို့ကွင်းဆင်းစစ်ဆေးရာ၌ ဈေးကွက်အတွင်းရှိ စိုက်ပျိုးရေးဆေး၊ ဓာတ်မြေဩဇာဆိုင်များတွင် သွင်းအားစုဖြစ်သော ဓာတ်မြေဩဇာအမျိုးအမည်အလိုက်ရောင်းချကြရန်၊ လက်ကျန်နည်းပါးမှုများရှိနေပြီး စိုက်ပျိုးတောင်သူများအနေဖြင့် ဇွန်လ နောက်ဆုံးပတ်မှစတင်ပြီး ကြိုတင်ဝယ်ယူထားမှုများရှိရာ ၂၀၂၄ခုနှစ်၊ ဩဂုတ်လ၊ ဒုတိယအပတ်တွင် ရောင်းချနေသောဈေးနှုန်းများမှာ  ကွန်ပေါင်း(Complex)  ဓာတ်မြေဩဇာ 15:15:15 ပတ်လည် 50g  တစ်အိတ်လျှင် (၁၆၀၀၀၀)ကျပ်၊ နွားခေါင်းတံဆိပ် 10:10:5 ကွန်ပေါင်းဓာတ်မြေဩဇာ 50g တစ်အိတ်လျှင် (၁၂၂၀၀၀မှ ၁၃၀၀၀၀)ကျပ်ဖြစ်ပြီး အခြားအာမို၊ ဩဘာနှင့် ကောမတ်တံဆိပ် ကွန်ပေါင်းဓာတ်မြေဩဇာများမှာ လက်ကျန်မရှိကြောင်းတွေ့ရှိရပြီး ယူရီးယား (၄၆%) SU SAN အမှတ်တံဆိပ် ဓာတ်မြေဩဇာတစ်အိတ်လျှင်  (၉၅၀၀၀မှ ၁၁၀၀၀၀)ကျပ်နှုန်းဖြစ်ကြောင်းသိရပြီး တောင်သူများသွင်းအားစုအသုံးပြုကာလအပေါ် သယ်ယူစရိတ်၊ အမြတ်ရာခိုင်နှုန်းအပေါ်မူတည်ပြီး အခြားယူရီးယားအမှတ်တံဆိပ်များကိုလည်း ဈေးနှုန်းမြှင့်တင်ရောင်းချမှုမရှိသည်ကိုတွေ့ရှိကြောင်းသိရပါသည်။

DOCA(ပဲခူး)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၌ ခရိုင်စီမံအုပ်ချုပ်ရေးအဖွဲ့၏ အစီအမံဖြင့် နိုင်ငံ့ဝန်ထမ်းများ၊ ပြည်သူများဈေးနှုန်းသက်သာစွာဖြင့် ဝယ်ယူနိုင်ရေးအတွက်  ၂၀၂၄ ခုနှစ် ဩဂုတ်လ ၁၇ ရက် နံနက် (၀၇:၃၀) နာရီအချိန်က ကန့်ဘလူခရိုင်စုပေါင်းရုံးတွင် နိုင်ငံ့ဝန်ထမ်းများကို ရောင်းချပေးခဲ့ရာ ခရိုင်စီမံအုပ်ချုပ်ရေးအဖွဲ့ဥက္ကဌ၊ မြို့နယ်စီမံအုပ်ချုပ်ရေးအဖွဲ့ဥက္ကဌနှင့် စားသုံးသူရေးရာဦးစီးဌာနမှ မြို့နယ်တာဝန်ခံ ဦးမျိုးဝင်းသန်းတို့က သတ်မှတ်ဈေးနှုန်းအတိုင်း ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြောင်း သိရသည်။

    ထိုသို့ရောင်းချပေးရာတွင် ကန့်ဘလူခရိုင်ဆီလုပ်ငန်းရှင်များအသင်းက လာရောက်ဝယ်ယူ ကြသည့် နိုင်ငံ့ဝန်ထမ်းများအလွယ်တကူဝယ်ယူနိုင်ရေး စီစဉ်ဆောင်ရွက်ပေးကာ စားအုန်းဆီ တစ်ပိဿာလျှင် ၆၇၀၀ကျပ် ဝန်ထမ်းတစ်ဦးလျှင် (၅၀)ကျပ်သားနှုန်းဖြင့် စားအုန်းဆီ ၄၄၀ ပိဿာကို ဈေးနှုန်း သက်သာစွာဖြင့် ရောင်းချပေးခဲ့ကြောင်း သိရသည်။

DOCA(စစ်ကိုင်း)

      စားသုံးသူရေးဦးစီးဌာန၊ ပဲခူးတိုင်းဒေသကြီး၊ ညောင်လေးပင်ခရိုင်၊ ကျောက်တံခါးမြို့ဦးစီးမှူးနှင့် တာဝန်ရှိသူများသည် (၁၅-၈-၂၀၂၄)ရက်နေ့၊ နံနက် (၁၀:၀၀) နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်အတူ စားသုံးသူအသိပညာပေးဟောပြောပွဲနှင့် စာဖတ်ရှိန်မြှင့်တင်ရေးအသိပညာပေးဟော‌ပြောပွဲတို့အား အခြေခံပညာမူလတန်း(လွန်) (ဥတ္တမ္မာရုံ)ကျောင်း၌ ကျင်းပပြုလုပ်ခဲ့ပါသည်။

    ရှေးဦးစွာ ဟောပြောပွဲတွင် ကျောင်းအုပ်ဆရာကြီး ဦးအေးလွင်က အဖွင့်အမှာစကားပြောကြားခဲ့ပြီး ကျောက်တံခါးမြို့နယ်၊ စားသုံးသူရေးရာဦးစီးဌာန၊ ဒု-ဦးစီးမှူး ဒေါ်ဇင်မာထွေးက စားသုံးသူအခွင့်အရေးနှင့်တာဝန်များ၊ ကုန်ညွှန်းအမှတ်အသားဖော်ပြခြင်းနှင့် ဆိုးဆေးအန္တရာယ်အကြောင်းသိကောင်းစရာများအား ဟောပြောဆွေးနွေးခဲ့ပါသည်။

       ထို့နောက် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒု-ဦးစီးမှူး ဒေါ်သန်းသန်းစိုးက ကျောင်းသား/ ကျောင်းသူများအား စက္ကူပြဇာတ်၊ ရုပ်ပုံပါပုံပြင်စာအုပ်ဖြင့် ပုံပြင်ဟောပြောခြင်း၊ စာဖတ်ခြင်းများဆောင်ရွက်ပြီး မူးယစ်ဆေးအကြောင်းသိကောင်းစရာ၊ ကလေးအလုပ်သမားအခွင့်အရေးဆိုင်ရာနှင့် ရေဘေးအန္တရာယ်ကြိုတင်ကာကွယ်ရေးဆိုင်ရာသိ‌ကောင်းစရာတို့ကို နံရံကပ်စာစောင်များဖြင့် ပြသခဲ့ကြောင်းသိရပါသည်။

DOCA(ပဲခူး)