သတင်းနှင့် လှုပ်ရှားမှုများ

     ၁၄.၈.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံသည် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ချောင်းဆုံမြို့နယ်၊ အ.မ.က (ကုလားတို့) ကျောင်း၌ စားသုံးသူကာကွယ်ရေး အသိပညာပေး ဟောပြောပွဲပြုလုပ်ခဲ့ကြောင်း သိရှိရပါသည်။

     အဆိုပါ ဟောပြောပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ စာဖတ်ရှိန်မြှင့်တင်ရေးအကြောင်းကို ဟောပြောဆွေးနွေးခဲ့ပါသည်။ ထို့နောက် စားသုံးသူရေးရာဦးစီးဌာနမှ ချောင်းဆုံမြို့နယ်တာဝန်ခံ ဒေါ်ထက်ထက်နွေဦးက ဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဆိုင်ရာဥပဒေများအကြောင်း၊ စားသုံးသူအခွင့်အရေး နှင့်တာဝန်များအကြောင်း၊ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖော်ပြထားသော ကုန်စည်များကိုသာ ရွေးချယ်ဝယ်ယူသင့်ကြောင်း၊ ကျန်းမာရေးနှင့် ညီညွတ်သော အစားအစာများကို ရွေးချယ်ဝယ်ယူ စားသုံးကြရန်နှင့် ကုန်စည်၊ ဝန်ဆောင်မှုများ ကြောင့် စားသုံးသူများနစ်နာဆုံးရှုံးမှုများရှိလာပါက  အရေးဆိုတိုင်ကြားနိုင်သည့် Consumer Call Center No. (1535) သို့ ဆက်သွယ်မေးမြန်းတိုင်ကြားနိုင်ကြောင်း၊ စားသုံးသူရေးရာကိစ္စရပ်များနှင့် သိလိုသည်များကိုလည်း Call Center No. (1535) ဆက်သွယ်မေးမြန်းနိုင်ကြောင်း ဟောပြောခဲ့ပြီး ကျောင်းသား/ကျောင်းသူများမှ သိလိုသည်များကို အပြန်အလှန် မေးမြန်းခြင်းများ ဆောင်ရွက်ခဲ့ကြောင်း သိရှိရပါသည်။

          အဆိုပါဟောပြောပွဲသို့ ဆရာ၊ ဆရာမ၊ ကျောင်းသား၊ ကျောင်းသူ စုစုပေါင်း (၁၄၉) ဦးတက်ရောက်ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မွန်)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏လမ်းညွှန်မှု၊ ပဲခူးတိုင်းဒေသကြီးအစိုးရအဖွဲ့၏ ကြီးကြပ်မှုဖြင့် မြန်မာနိုင်ငံဆေးနှင့်ဆေးလုပ်ငန်းရှင်များအသင်းကဦးဆောင်၍ ပဲခူးမြို့တွင် ဆေးဝါးပြတ်လပ်မှုမရှိစေရေးနှင့် စျေးနှုန်းကြီးမြင့်မှုမရှိစေရေးရည်ရွယ်၍ ပြည်သူများသုံးစွဲလျက်ရှိသည့်ဆေးဝါးများကို ဆေးဝါးကုမ္ပဏီများမှ သုံးစွဲသူပြည်သူများသို့ တိုက်ရိုက်ရောင်းချပွဲအား ပဲခူးတိုင်းဒေသကြီး၊ ပဲခူးမြို့၊ သီရိဉဿာစျေးကြီးအပေါ်ထပ်တွင်  ၂၉-၇-၂၀၂၄ ရက်နေ့မှ ၃-၈-၂၀၂၄ ရက်နေ့အထိဖွင့်လှစ်၍ စားသုံးသူပြည်သူများကို ဆေးဝါးကုမ္ပဏီများမှဆေးဝါးများအား သက်သာသောဈေးနှုန်းဖြင့် တိုက်ရိုက်ရောင်းချဆောင်ရွက်ပေးနိုင်ခဲ့သည့်အပြင် ပဲခူးမြို့ရှိ ဆေးဝါးအရောင်းဆိုင်လုပ်ငန်းရှင်များအား ဆေးဝါးကုမ္ပဏီကြီးများနှင့် တိုက်ရိုက်ဝယ်ယူရရှိရေး ဆောင်ရွက်နိုင်ရန် ချိတ်ဆက်ပေးနိုင်ခဲ့ကြောင်းသိရပါသည်။

DOCA(ပဲခူး)  

     ၂၀၂၄ ခုနှစ် သြဂုတ်လ ၁၈ ရက်နေ့  နံနက် (၀၉:၀၀)အချိန်တွင် ကော့သောင်းခရိုင် စားသုံးသူ‌‌‌ရေးရာဦးစီးဌာနှင့် မြို့နယ်စည်ပင်သာယာ‌ရေးအဖွဲ့နှင့်ပူးပေါင်း၍ ကော့သောင်းမြို့ပေါ်ရှိ စားသုံးဆီရောင်းချနေသည့် ကုန်စုံဆိုင်များကို မြေပြင်ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

     အဆိုပါ ကွင်းဆင်းစစ်ဆေးရာ ကော့သောင်းမြို့ပေါ်ရှိ စားသုံးဆီရောင်းချနေသည့် ကုန်စုံဆိုင်များအား လူမှုကွန်ရက်စာမျက်နှာပေါ်တွင် ဖော်ပြထားသော ဆီများဖြစ်သည့် ဝက်ဆီဖတ် ကြော်ဆီ၊ ဆီအသန့်ကြော် ကြော်ပြီးသားဆီ၊ အာလူးကြော်ဆီ၊ ကြက်ကြော်ဆီစသည်များ ရောင်းချနေခြင်းရှိ/မရှိအား မြေပြင်ကွင်းဆင်းစစ်ဆေးရာတွင် ဆီများရောင်းချနေခြင်း မရှိပါကြောင်း သိရှိခဲ့ရပါသည်။

DOCA(တနင်္သာရီ)

     ၂၀၂၄ ခုနှစ်၊ သြဂုတ်လ ၁၆ ရက်နေ့ နံနက် (၁၀:၀၀) နာရီအချိန်တွင်  ကော့သောင်းမြို့ တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင်များဖြစ်သော မြို့နယ်စီမံအုပ်ချူပ်ရေးအဖွဲ့၊ ခရိုင်စားသုံးသူရေးရာဦးစီးဌာန၊ မြို့နယ်အကောက်ခွန်ဦးစီးဌာန၊ မြန်မာနိုင်ငံရေကြောင်းရဲတပ်ဖွဲ့တို့ ပူးပေါင်း၍ ကော့သောင်းမြို့နယ်ရှိ လှေဆိပ်များ၊ အဝေးပြေးကားဝင်းများတို့တွင် ရှောင်တခင် စစ်ဆေးခြင်းများဆောင်ရွက်ခဲ့ကြောင်း သိရှိရပါသည်။

    အဆိုပါ မြို့နယ်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင်များသည် ကွင်းဆင်းစစ်ဆေးရာတွင် ကော့သောင်းမြို့ အေးရိပ်ငြိမ်ရပ်ကွက် ရေခဲစက်လမ်းထိပ်ရှိ ဒေသငါးဖမ်းလှေဆိပ်တွင် တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသော Energy Drink (1×24)(1×250ml) Brand Carabao(Thai)(102)Pkgs တန်ဖိုးငွေ ကျပ် ၂၀၉၁၀၀၀/- ပစ္စည်းများ အား တွေ့ရှိသဖြင့် ထိုပစ္စည်းတင်သွင်းလာခြင်းသည် ပင်လယ်ရေကြောင်းမှ ကျူးလွန်ရာရောက်သဖြင့် အကောက်ခွန်ဦးစီးဌာနအက်ဥပဒေအရ အမှုဖွင့်လှစ်ပြီး အရေးယူဆောင်ရွက်ခဲ့ကြောင်း သိရှိရပါသည်။

DOCA(တနင်္သာရီ)

    တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနသည် ၂၀၂၄ခုနှစ်၊ သြဂုတ်လ (၁၆) ရက်နေ့၊ နံနက်(၁၀း၀၀)နာရီအချိန်တွင် ဆန်လုပ်ငန်းရှင်များကို မြိတ်မြို့၊ ဆိပ်ငယ်ရပ်ရှိ စားသုံးသူရေးရာဦးစီးဌာနသို့ ခေါ်ယူကာ စားသုံးသူကာကွယ်ရေးဆိုင်ရာ သိကောင်းစရာနှင့် အွန်လိုင်းမှတ်ပုံတင်နှင့် ပတ်သက်သည့်အကြောင်းအရာများအား အသိပညာပေးဟောပြောဆွေးနွေးခဲ့ကြပါသည်။

     အသိပညာပေးဟောပြောဆွေးနွေးရာတွင် စားသုံးသူများဘေးအန္တရာယ်ကင်းစေရန်နှင့် အွန်လိုင်းစနစ်ဖြင့် ရောင်းချမည်ဆိုပါက မှတ်ပုံတင်ရန်၊  Online  Sale လုပ်ငန်းများ မှတ်ပုံတင်လျှောက်ထားခြင်းနှင့်ပတ်သက်သည့်အကြောင်းအရာများ၊ လိုအပ်သည့်အချက်အလက်များ၊ မှတ်ပုံမတင်ခြင်းကြောင့် ဖြစ်ပေါ်လာနိုင်သည့်အခြေအနေများအား ဟောပြောဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရရှိပါသည်။

DOCA(တနင်္သာရီ)