သတင်းနှင့် လှုပ်ရှားမှုများ

       ဒေသတွင်းစားသုံးဆီဖူလုံရေးအတွက် နေကြာတိုးချဲ့စိုက်ပျိုးနိုင်ရေး၊ ထွက်ရှိလာသောနေကြာများ ဈေးကွက်ပိုမိုရရှိရေး၊ စိုက်ပျိုးရေး ၊မွေးမြူရေးနှင့် ကုန်ထုတ်လုပ်ငန်းများ ဖွံ့ဖြိုးတိုးတက်ရေးနှင့် ပုဂ္ဂလိကကဏ္ဍဖွံ့ဖြိုးတိုးတက်ရေးများကို ရည်ရွယ်၍ နေကြာစိုက်ပျိုးသူ တောင်သူများအစုအဖွဲ့စနစ်ဖြင့် ဆောင်ရွက်နိုင်ရန် စားသုံးသူရေးရာဦးစီးဌာနသည် အစုအဖွဲ့ဖွဲ့စည်းနိုင်ရေး စည်းရုံးဆောင်ရွက်လျက်ရှိပါသည်။

          စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူသည် (၂၀.၃.၂၀၂၃) ရက်နေ့တွင် တောင်ငူမြို့နယ်၊ အရှေ့ဆင်ကျေးရွာအုပ်စု ဘာနောင်းကျေးရွာ၌ နေကြာစိုက်တောင်သူများနှင့် တွေ့ဆုံဆွေးနွေးပြီး ဘာနောင်းနေကြာစိုက်ပျိုးထုတ်လုပ်သူများ အစုအဖွဲ့ကို အမှုဆောင် ၇ ဦး၊ အဖွဲ့ ဝင် ၁၆ ဦးဖြင့် ဖွဲ့စည်းပေးခဲ့ပါသည်။

            အလားတူ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် (၂၁.၃.၂၀၂၃) ရက်နေ့တွင် ဖြူးမြို့နယ်၊ ဖြူးအရှေ့ကျေးရွာအုပ်စု အုပ်ချုပ်ရေးမှူးရုံး၌ ဖြူးအရှေ့ကျေးရွာအုပ်စုမှ နေကြာ စိုက် တောင်သူလယ်သမားများနှင့် တွေ့ဆုံဆွေးနွေးပြီး ဖြူးအရှေ့ နေကြာစိုက်ပျိုးထုတ်လုပ်သူများ အစုအဖွဲ့ကို အမှုဆောင် ၇ ဦး၊ အဖွဲ့ဝင် ၁၀ ဦးဖြင့်လည်းကောင်း၊ (၂၂.၃.၂၀၂၃) ရက်နေ့တွင် သာဓုကန် ကျေးရွာအုပ်စု အုပ်ချုပ်ရေးမှူးရုံး၍ နေကြာစိုက်တောင်သူများနှင့် တွေ့ဆုံဆွေးနွေးပြီး သာဓုကန် နေကြာစိုက်ပျိုးထုတ်လုပ်သူများ အစုအဖွဲ့ကို အမှုဆောင် ၇ ဦး၊ အဖွဲ့ဝင် ၁၀ ဦးဖြင့်လည်းကောင်း ဖွဲ့စည်းပေးခဲ့ပါသည်။

              တောင်ငူခရိုင်အတွင်း နေကြာအစုအဖွဲ့များဖွဲ့စည်းနိုင်ရေး စည်းရုံးဆောင်ရွက်လျက်ရှိရာ တောင်ငူမြို့နယ်တွင် နေကြာအစုအဖွဲ့ ၄ ဖွဲ့၊ ရေတာရှည်မြို့နယ်တွင် နေကြာအစုအဖွဲ့ ၁ ဖွဲ့၊ အုတ်တွင်းမြို့နယ်တွင် နေကြာအစုအဖွဲ့ ၂ ဖွဲ့နှင့် ဖြူးမြို့နယ်တွင် နေကြာအစုအဖွဲ့ ၅ ဖွဲ့ဖြင့် စုစုပေါင်း နေကြာအစုအဖွဲ့ ၁၂ ဖွဲ့ ဖွဲ့စည်းထားရှိပြီးကြောင်း သိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ ညောင်လေးပင်ခရိုင်၊ ကျောက်တံခါးမြို့နယ်၊ စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ ကုန်အညွှန်းအမှတ်အသားနှင့်စပ်လျဉ်း၍ လုပ်ငန်းရှင်များအား အသိပညာပေးခြင်းကို (၁၈-၃-၂၀၂၃) ရက်နေ့၊ နေ့လယ်ပိုင်းတွင် Talk Show အစီအစဉ်ဖြင့် ကျင်းပပြုလုပ်ခဲ့ပါသည်။

   စားသုံးသူရေးရာဦးစီးဌာန၊ ကျောက်တံခါးမြို့နယ်တာဝန်ခံက စားသုံးသူကာကွယ်ရေးဥပဒေ ၂၀၁၉၊ အခန်း (၁၈)ပါ ကုန်စည်များပေါ်တွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ထုတ်လုပ်ဖြန့်ဖြူးရောင်းချရန်၊ ဥပဒေ ၂၀၁၉၊ အခန်း (၁၀)ပါ စီးပွားရေးလုပ်ငန်းရှင်၏တာဝန်များကို သိရှိလိုက်နာရန် အခန်း (၁၁) ပါ ကုန်စည်နှင့်စပ်လျဉ်း၍ အာမခံချက်ပေးရန်နှင့် စားသုံးသူပြည်သူများအတွက် သန့်ရှင်းလတ်ဆတ်၍ အန္တရာယ်ကင်းသောစားသောက်ကုန်ဖြစ်စေရေး အထူးအလေးထားဆောင်ရွက်ရန်၊ ဌာနမှ ပြည်တွင်းကုန်သွယ်မှုဈေးကွက်ချဲ့ထွင်နိုင်ရေးအတွက် ချိတ်ဆက်ဆောင်ရွက်ပေးနေမှုအခြေအနေများကို သိရှိစေရန်ရည်ရွယ်၍ အသိပညာပေးဆွေးနွေးဟောပြောခဲ့ကြောင်း သိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၃ခုနှစ်၊ မတ်လ (၂၃) ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့၊ ရွှေတောင်ရပ်ကွက်ရှိ မြင့်မြတ်စံဆေးဆိုင်၊ ပုလဲထွန်းဆေးဆိုင်၊ ကျော်ရတနာဆေးဆိုင်နှင့် ရှမ်းပိုင်းရပ်ကွက်ရှိ ပြည်ဝဟိဏ်းဆေးဆိုင်၊ မန္တလေးပင်ရင်းဆေးဆိုင်၊ချမ်းမြေ့ဆေးဆိုင်များတွင် အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ၏ထောက်ခံချက်မပါရှိဘဲ Parbisure ဆေးရောင်းချနေမှုရှိ/မရှိအား မြို့နယ်ရဲတပ်ဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ အစားသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာနတို့နှင့်ပူးပေါင်း၍ ဈေးကွက်စောင့်ကြည့်စစ်ဆေးမှုဆောင်ရွက်ခဲ့ပါသည်။

      ထိုသို့ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ ဆေးဆိုင်များတွင်ရောင်းချနေသော ဆေးဝါးများမှာ ရန်ကုန်မြို့၊ မန္တလေးမြို့နှင့် တောင်ကြီးမြို့များမှ အများဆုံးတင်သွင်းရောင်းချလျက်ရှိပြီး တရားဝင်မှတ်ပုံတင်ထားသောဆေးဝါးများကိုသာ ရောင်းချဖြန့်ဖြူးလျက်ရှိကြောင်းနှင့် Parbisure ဆေးရောင်းချနေမှုမရှိကြောင်း စစ်ဆေးတွေ့ရှိရ၍ ဆေးဆိုင်ပိုင်ရှင်များအနေဖြင့် အစားအသောက်နှင့်ဆေးဝါးကွပ်ကဲရေးဦးစီးဌာနတွင် တရားဝင်မှတ်ပုံတင်ထား သောဆေးဝါးများသာ တင်သွင်းရောင်းချဖြန့်ဖြူးကြရန်၊  တရားဝင်မှတ်ပုံတင်ထားခြင်းမရှိသော Parbisure ဆေးအား ဈေးကွက်အတွင်း ရောင်းချနေမှုများတွေ့ရှိပါက   သက်ဆိုင်ရာဌာန၏ဥပဒေအရ အရေးယူခံရမည်ဖြစ်ကြောင်း ဆေးဆိုင်(၆)ဆိုင်အား ကွင်းဆင်းအသိပေးဆောင်ရွက်ခဲ့မှုများကို အစီရင်ခံတင်ပြအပ်ပါသည်။

DOCA(ကယား)

   စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့၊ မြို့နယ်တာဝန်ခံသည် ဌာနဆိုင်ရာများနှင့်ပူးပေါင်း၍ (၂၁.၃.၂၀၂၃)ရက်နေ့ နံနက်(၀၉:၀၀)နာရီ အချိန်တွင် ရွာသစ်ရပ်ကွက်ရှိ စတိုးဆိုင်များနှင့် ကုန်စုံဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြခြင်းရှိ/မရှိတို့ကို စစ်ဆေးခဲ့ပြီးနောက် စားသုံးသူကာကွယ်ရေးဥပဒေ(၂၀၁၉) အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁)ပုဒ်မခွဲ (ခ)နှင့် (ဆ)တို့အရ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြကြရန်၊ တရားမဝင်ကုန်စည်များ တင်သွင်းရောင်းချခြင်းမပြုရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးဆောင်ရွက်ရန်နှင့် သတ်မှတ်အရည်အသွေးပြည့်မီသောကုန်စည်များကိုသာ ရောင်းချရန်၊ စားသုံးသူကာကွယ်ရေးဥပဒေ(၂၀၁၉)ပါ စီးပွားရေးလုပ်ငန်းရှင်၏ တာဝန်များနှင့် တားမြစ်ချက်များကို သိရှိလိုက်နာဆောင်ရွက်ကြရန် စသည်တို့ကို အသိပညာပေးဆွေးနွေးခဲ့ကာ ကုန်မျိုးစုံအရောင်းဆိုင်(၄)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ အိမ်မဲမြို့နယ်တာဝန်ခံ ဦးလေးလွင်သည် (၂၃.၃.၂၀၂၃)ရက်နေ့၊နံနက်(၁၂:၀၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့် ပူးပေါင်းကာ စားသုံးသူပြည်သူများအား အိမ်မဲမြို့နယ်၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမတွင် စားသုံးသူအသိပညာပေး  Talk  Show  ပြုလုပ်ခဲ့ပါသည်။

          ထိုသို့ပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးမှ  စားသုံးသူအသိပညာပေး Talk Show ပြုလုပ်ရခြင်း၏ရည်ရွယ်ချက်အား ရှင်းလင်းပြောကြားပြီးနောက် စားသုံးသူရေးရာဦးစီးဌာန မြို့နယ်တာဝန်ခံမှ ဌာန၏မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေ(၂၀၁၉)၊ အခန်း(၉)ပါ စားသုံးသူ၏အခွင့်အရေးနှင့် တာဝန်များအား သိရှိစေရန် ဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များနှင့် ပြစ်မှုပြစ်ဒဏ်များ၊ တားမြစ်ချက်များ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ-၄၁ ပုဒ်မခွဲ(ခ) နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရန် ကုန်စည်အမျိုးအစားအလိုက် သတ်မှတ်ထားသည့် ဥပဒေများနှင့်အညီလိုက်နာဆောင်ရွက်ကြရန်တို့ကို အသိပညာပေးဆွေးနွေးကာ  ဥပဒေတားမြစ်ချက်များအား လိုက်နာဆောင်ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များသိရှိလိုပါက မြို့နယ်စားသုံးသူတာဝန်ခံရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca.gov.mm website တွင် ဝင်ရောက်လေ့လာနိုင်ပါကြောင်း၊ စားသုံးသူများနစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီဖုန်းဖြင့် ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)