ပြည်တွင်းကုန်သွယ်မှုသတင်း

        မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်၊ ပျဉ်းချောင်းအုပ်စုရှိ အောက်ကျင်း၊ ပျဉ်းချောင်း၊ ဆင်သေ၊ ဆယ်ဝ၊ ငမိုးကြီး၊ ငမိုးလေး စသည့်ကျေးရွာများသည် ကြက်သွန်နီ၊ ကြက်သွန်ဖြူ၊ ခရမ်းချဉ်သီး၊ စပါး၊ ငရုတ်၊ ပြောင်း၊ မြေပဲ၊ ကုလားပဲ စသည့်သီးနှံများကိုရာသီအလိုက်စိုက်ပျိုးကြ ကြောင်းသိရှိရပါသည်။

      ယောချောင်းဘေးရှိ အောက်ကျင်းကျေးရွာ၌ ကုလားပဲစိုက်တောင်သူ(၅၀)ဦးခန့်ရှိပြီး စိုက်ဧက (၇၀)ဧကဝန်းကျင်ရှိကြောင်း၊ မိမိအနေဖြင့် ကုလားပဲ(၁)ဧကစိုက်ပျိုးထားကြောင်း၊ စိုက်ပျိုးရာတွင် ကုလားပဲ(မြကြေး)နှင့် ကုလားပဲ (929)မျိုးကိုသာ အဓိကထားစိုက်ပျိုးကြောင်း၊ မိမိအနေဖြင့် မျိုးကို ယခင်နှစ်က ကုလားပဲစိုက်ခင်းမှ ထွက်ရှိသည့်ကုလားပဲစေ့များကို မျိုးအဖြစ်ဖယ်ချန်၍ စိုက်ပျိုး ခြင်းဖြစ်ကြောင်း၊ တချို့ကုလားပဲစိုက်တောင်သူများမှာ ရွာရှိကုလားပဲစိုက်တောင်သူအချင်းချင်းစီမှ မျိုး(၁)တင်းလျှင် ကျပ်(၁၀၀၀၀၀)ဖြင့်ဝယ်ယူ၍ စိုက်ပျိုးကြခြင်းဖြစ်ကြောင်း၊ (၁)ဧကလျှင် မျိုး(၂) တင်းခန့်ကုန်ကျပြီး ကျဲပက်စနစ်ဖြင့်စိုက်ပျိုးကြောင်း၊ ကုလားပဲကို၂၀၂၃ခုနှစ်၊ ဒီဇင်ဘာလ အစောပိုင်း တွင် စတင်စိုက်ပျိုးပါကြောင်း၊ စိုက်ပျိုးပြီး(၃)လခွဲအကြာတွင် ရိတ်သိမ်းကြောင်း၊ မိမိတို့ဒေသမြေ အနေအထားမှာ ခြောက်သွေ့သောကြောင့် စိုက်ပျိုးစဉ်အတွင်း ရေ(၃)ကြိမ် သွင်းပေးရကြောင်း၊ ကုန်ကျစရိတ်အနေဖြင့် မျိုးဖိုးအပါအဝင် (၁)ဧကလျှင် ကျပ်(၅၀၀၀၀၀)ခန့်ကုန်ကျပြီး မိမိမျိုးများ ဖြင့်ပြန်လည်စိုက်ပျိုးလျှင် ကုန်ကျစရိတ်မှာ မြေပြုပြင်ခ၊ ရေတင်ခအပါအဝင် စုစုပေါင်းကုန်ကျ စရိတ်မှာ ကျပ်(၃၅၀၀၀၀)ခန့်သာကုန်ကျပါကြောင်း၊  ယခင်နှစ်ကကုန်ကျစရိတ်အနေဖြင့် မျိုး(၁) တင်းလျှင် ကျပ်(၇၅၀၀၀) ဖြင့်ဝယ်ယူရပြီး သွင်းအားစုစရိတ်အားလုံးအပါအဝင် စုစုပေါင်းကုန်ကျ စရိတ်မှာ ကျပ်(၃၀၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် (၁၅)တင်းမှ တင်း(၂၀)ထွက်ရှိပြီး (၁)တင်းလျှင် ကျပ်(၈၅၀၀၀)ထိဈေးရရှိခဲ့ပါကြောင်း၊ ထွက်ရှိသည့်ကုလားပဲများကို ပခုက္ကူမြို့သို့ တင်ပို့ရောင်းချကြောင်း၊  ယခုနှစ်တွင်မှု အထွက်နှုန်းအနေဖြင့် မသိရှိရသေးပါ ကြောင်း အောက်ကျင်းကျေးရွာနေ ကုလားပဲစိုက်တောင်သူ ဒေါ်အေးချိုထံမှ သိရှိရပါသည်။

DOCA(မကွေး)

   မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကိုအဓိကထား လုပ်ကိုင်ဆောင်ရွက်သောဒေသဖြစ်ရာ ကျေးလက်နေတောင်သူအများစုသည် မိုးစပါးများကိုသာ အဓိကထား အများဆုံးစိုက်ပျိုးကြပါသည်။ ၂၀၂၂-၂၀၂၃ ဘဏ္ဍာနှစ်တွင် မိုးစပါးစိုက်ဧက(၁၄၃၁၆၈)ဧက စိုက်ပျိုး နိုင်ခဲ့ပြီး ယခု ၂၀၂၃-၂၀၂၄ ဘဏ္ဍာနှစ်တွင် မိုးစပါးစိုက်ဧက (၁၄၄၆၈၆)ဧက စိုက်ပျိုးနိုင်ခဲ့၍ ယခင်နှစ်ကထက်(၁၅၁၈)ဧက ပိုမိုစိုက်ပျိုးထားကြောင်း ၊ ယခုနှစ်တွင် မိုးစပါးပျိုးထောင်ချိန်မှာ ရေပိုမိုရရှိသောကြောင့် မိုးစပါးစိုက်ဧက အနည်းငယ်တိုးမြင့်စိုက်ပျိုးကြကြောင်း သိရှိရပါတယ်။ ယခုအချိန်တွင် မိုးစပါးစိုက်ဧကများ အားလုံးနီးပါး ရိတ်သိမ်းပြီးဖြစ်ရာ (၁)ဧကလျှင် အထွက်နှုန်းအနေဖြင့် (၉၅.၄၇) တင်း၊အထွက်စုစုပေါင်း(၁၃၈၁၃၁၇၂)တင်းထွက်ရှိကြောင်း လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏စာရင်းများအရသိရှိရပါသည်။ ယခင်နှစ် ဆန်/စပါးစျေးနှုန်းအနေဖြင့် ဧရာပဒေသာစပါး တင်း(၁၀၀)လျှင်(၁၇၀၀၀၀၀)ကျပ် ၊ မနောသုခစပါးတင်း(၁၀၀)လျှင်(၁၃၀၀၀၀၀)ကျပ် စျေးနှုန်းများ ဖြင့်ရောင်းဝယ်လျက်ရှိပြီး ဧရာပဒေသာဆန် တစ်တင်းခွဲအိတ် တစ်အိတ်လျှင် (၆၁၀၀၀)ကျပ် ၊ မနောသုခဆန် တစ်တင်းခွဲအိတ် တစ်အိတ်လျှင်(၅၂၀၀၀)ကျပ် စျေးနှုန်းများရှိခဲ့ပြီး ယခုနှစ်တွင် ဧရာပဒေသာစပါးတင်း(၁၀၀)လျှင် (၃၃၀၀၀၀၀)ကျပ် ၊ မနောသုခစပါး တင်း(၁၀၀)လျှင် (၂၂၀၀၀၀၀) ကျပ်စျေးနှုန်းများဖြင့် ရောင်းဝယ်လျက်ရှိကြောင်း ၊ ဧရာပဒေသာဆန် တစ်တင်းခွဲအိတ် တစ်အိတ်လျှင် (၁၂၅၀၀၀)ကျပ်စျေးနှုန်း၊မနောသုခဆန် တစ်တင်းခွဲအိတ် တစ်အိတ်လျှင် (၈၈၀၀၀)ကျပ်စျေးနှုန်းများ ရရှိသောကြောင့် ယခုနှစ် စပါးစိုက်တောင်သူများအနေဖြင့် အကျိုးအမြတ်ပိုမိုရရှိကြောင်း ၊ ဆန်/စပါးစျေးကွက်အနေဖြင့် မန္တလေး၊မြင်းခြံ၊နွားထိုးကြီးမြို့များသို့ တင်ပို့ရောင်းချလျက်ရှိကြောင်း ဆန်/စပါး ကုန်သည်ပွဲစားများထံမှ သိရှိရပါသည်။

DOCA(မန္တလေး)

       မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ဘွဲ့ကျေးရွာအုပ်စုရှိ ညှင်းသွန်း၊ ကွန်းသွန်း၊ ဘွဲ့၊ မင်းဂံ၊ ဇီးတော စသည့်ကျေးရွာများသည် စိုက်ပျိုးရေးကိုအဓိကထားလုပ်ကိုင်ကြပြီး ဇီးတောကျေးရွာ၌ ဆောင်းသီးနှံအဖြစ် ပဲကြီးသီးနှံကို စိုက်ပျိုးကြောင်း သိရှိရပါသည်။

          ဇီးတောကျေးရွာ၌ ပဲကြီးစိုက်တောင်သူ(၁၀)ဦးခန့်ရှိပြီး စိုက်ဧကမှာ(၁၀)ဧကဝန်းကျင်ခန့်ရှိ ကြောင်း၊ မိမိအနေဖြင့် ပဲကြီး(၁)ဧကစိုက်ပျိုးထားကြောင်း၊ စိုက်ပျိုးရာတွင် ကျဲပက်စနစ်ဖြင့်စိုက်ပျိုး ပြီး (၁)ဧကလျှင် မျိုး(၃)ပြည်ခန့်ကုန်ကျကြောင်း၊ မျိုးကိုယခင်နှစ်က ပဲကြီးစိုက်ခင်းမှထွက်ရှိသည့် ပဲကြီးစေ့များ ကိုမျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊  ပဲကြီးကို သီတင်းကျွတ်လတွင်စတင် စိုက်ပျိုးပြီး တပို့တွဲလတွင်ခူးဆွတ်ရကြောင်း၊ ပဲကြီးမှာ ပိုးကြိုက်သောသီးနှံဖြစ်၍ စိုက်ပျိုးစဉ် တလျှောက် ပိုးသတ်ဆေး၊ အားဆေး(၃)ကြိမ်စီ ပက်ဖြန်းပေးရကြောင်း၊  ကုန်ကျစရိတ်အနေဖြင့် ယခင်နှစ်က (၁)ဧကလျှင် ကျပ်(၁၅၀၀၀၀)ကုန်ကျပြီး ယခုနှစ်တွင် သွင်းအားစုစရိတ်မြင့်တက်လာ၍ မြေပြုပြင်ခ၊ လုပ်အားခအပါအဝင်စုစုပေါင်း ကုန်ကျစရိတ်မှာ ကျပ်(၂၀၀၀၀၀)ခန့်ကုန်ကျကြောင်း၊ အထွက်နှုန်းနေဖြင့် ယခင်နှစ်က (၁)ဧကလျှင်(၁၅)တင်းခန့်ထွက်ရှိပြီး (၁)တင်းလျှင် ကျပ်(၁၂၀၀၀၀) ထိဈေးရရှိခဲ့ပါကြောင်း၊ ထွက်ရှိသည့်ပဲကြီးများကို အထက်မင်းလှမြို့ပွဲရုံများသို့ တင်ပို့ရောင်းချ ပါကြောင်း၊  ယခုနှစ်တွင်မှု အထွက်နှုန်းအနေဖြင့်မသိရှိရသေးပါကြောင်း ဇီးတောကျေးရွာနေ ပဲကြီး စိုက်တောင်သူ ဦးအောင်ဆန်းထံမှ သိရှိရပါသည်။

DOCA(မကွေး)

     ပခုက္ကူခရိုင်စီမံအုပ်ချုပ်ရေးအဖွဲ့၏ အစီအစဉ်ဖြင့် စားသုံးသူရေးရာဦးစီးဌာန၊ ခရိုင်ဦးစီးမှူး ဦးဝေဠုအောင်က ကြီးကြပ်၍ ၂၀၂၄ခုနှစ်၊ ဇန်နဝါရီလ(၁၆)ရက်နေ့နှင့် (၁၇)ရက်နေ့တို့၌ ပခုက္ကူမြို့ပေါ်တွင် စားအုန်းဆီများကို ဈေးကား/အရောင်းဆိုင်များဖြင့် သတ်မှတ်ရည်ညွှန်းဈေးအတိုင်း ရောင်းချခြင်းရှိ/မရှိ၊ အလေးချိန်၊ အချင်အတွယ်ပြည့်/မပြည့်ကို ကွင်းဆင်းကြပ်မတ်ခဲ့ပါသည်။

     "ကံသာတိုး"ဆီဆိုင်အနေဖြင့် အမှတ်(၃)နှင့် အမှတ်(၄)ရပ်ကွက်ရှိ အိမ်ထောင်စု(၂၇၅၁)စုအား ဆီပေပါ (၅၀) ပေပါကိုလည်းကောင်း၊ "ဆင်မင်း" ဆီဆိုင်မှ အမှတ်(၁)၊ (၇)၊ (၈)၊ (၉)၊(၁၀)ရပ်ကွက်များရှိ အိမ်ထောင်စု(၂၃၉၃)စု အား ဆီပေပါ(၄၄) ပေပါကိုလည်းကောင်း၊ “SSS” ဆီဆိုင်မှ  အမှတ်(၂)၊ (၅)၊ (၆) ရပ်ကွက်များရှိ အိမ်ထောင်စု(၂၄၁၆)စုအား ဆီပေပါ(၄၄) ပေပါကိုလည်းကောင်း၊ “ထွန်း” ဆီဆိုင်မှ အမှတ်(၁၁)၊ (၁၂)ရပ်ကွက်ရှိ အိမ်ထောင်စု(၂၂၈၇)စုအား ဆီပေပါ (၄၂) ပေပါကိုလည်းကောင်း၊ "သော်ဇင်ထွန်း" ဆီဆိုင်မှ အမှတ်(၁၅)ရပ်ကွက်ရှိ အိမ်ထောင်စု (၂၇၁၁) စုအား ဆီပေပါ(၅၀) ပေပါကိုလည်းကောင်း၊  "ဟန်ဇင်ထွဋ်" ဆီဆိုင်မှ အမှတ်(၁၃)၊ (၁၄)ရပ်ကွက်ရှိ အိမ်ထောင်စု (၂၃၄၂)စုအား ဆီပေပါ (၄၂) ပေပါကိုလည်းကောင်း တစ်ပိဿာလျှင် ကျပ်(၅၄၀၀)ဖြင့် အိမ်ထောင်စု(၁)စုလျှင် စားအုန်းဆီ (၁)ပိဿာနှုန်းရောင်းချခဲ့ပြီး စုစုပေါင်းဆီပေပါ (၂၇၂) ပေပါဖြန့်ဖြူးရောင်းချပေးခဲ့ကြောင်းသိရှိရပါ သည်။

DOCA(မကွေး)

        မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ဘွဲ့ကျေးရွာအုပ်စုရှိ ဇီးတောကျေးရွာ၌  ပဲစဉ်းငုံသီးနှံကို သီးညှပ်အဖြစ်စိုက်ပျိုးကြပြီး ယခုနှစ်တွင် အထွက်နှုန်းအနေဖြင့် ပိုမိုထွက်ရှိပြီး ဈေးကောင်းရရှိကာ ပဲစဉ်းငုံစိုက်တောင်သူများအနေဖြင့် အကျိုးအမြတ်များစွာ ရရှိခဲ့ကြောင်းသိရှိရပါသည်။

         ဇီးတောကျေးရွာ၌ ပဲစဉ်းငုံစိုက်တောင်သူ(၅၀)ဦးခန့်ရှိပြီး စိုက်ဧကမှာ (၁၀၀)ဧကဝန်းကျင်ရှိကြောင်း၊ မိမိအနေဖြင့် (၁)ဧကစိုက်ပျိုးခဲ့ကြောင်း၊ စိုက်ပျိုးရာတွင် ထွန်တုံးဖြင့်ကြောင်းဆွဲ၍ စိုက်ပျိုး ကြောင်း၊ မျိုးကို ယခင်နှစ်ကပဲစဉ်းငုံစိုက်ခင်းမှထွက်ရှိသည့် ပဲစဉ်းငုံပဲများကိုမျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ (၁)ဧကလျှင် မျိုး(၄)ပြည်ခန့်ကုန်ကျကြောင်း၊  စိုက်ပျိုးရာတွင် နယုန်လ တွင် စတင်စိုက်ပျိုးပြီး နတ်တော်လတွင် ရိတ်သိမ်းကြောင်း၊ ကုန်ကျစရိတ်အနေဖြင့် ယခင်နှစ်က (၁)ဧကလျှင် ကျပ်(၁၀၀၀၀၀)ခန့်သာကုန်ကျပြီး ယခုနှစ်တွင်မှု သွင်းအားစုစရိတ် မြင့်တက်လာ၍ ကျပ်(၁၅၀၀၀၀)ခန့်ကုန်ကျခဲ့ပါကြောင်း၊ အထွက်နှုန်းအနေဖြင့် ယခင်နှစ်က(၁)ဧကလျှင် တင်း(၂၀) ထွက်ရှိပြီး ယခုနှစ်တွင် (၂၅)တင်းခန့်ထွက်ရှိကြောင်း၊ ယခင်နှစ်က (၁)တင်းလျှင် ကျပ်(၅၅၀၀၀) သာရရှိခဲ့ပြီး ယခုနှစ်တွင် ကျပ်(၁၁၁၀၀၀)ထိရရှိခဲ့ပါကြောင်း၊ တစ်ရွာလုံးစုစုပေါင်း ပဲစဉ်းငုံစိုက်ဧက (၁၀၀)ဧကမှ ပဲစဉ်းငုံတင်း (၃၀၀) ကျော်ထွက်ရှိခဲ့ပါကြောင်း၊ ထွက်ရှိသည့်ပဲစဉ်းငုံ များကို အထက်မင်းလှမြို့ပွဲရုံများသို့ တိုက်ရိုက်တင်ပို့ရောင်းချပါကြောင်း၊ ယခုနှစ်တွင် အထွက်နှုန်းအနေဖြင့် ပိုမိုထွက်ရှိပြီး  ဈေးကောင်းလည်းရရှိသဖြင့် ပဲစဉ်းငုံစိုက်တောင်သူများအနေဖြင့် အကျိုးအမြတ်များ စွာရရှိခဲ့ပါကြောင်း ဇီးတောကျေးရွာနေ ပဲစဉ်းငုံစိုက်တောင်သူ ဦးအောင်ဆန်းထံမှ သိရှိရပါသည်။

DOCA(မကွေး)