ပြည်တွင်းကုန်သွယ်မှုသတင်း

          ကျောက်ဆည်မြို့နယ် ၊ ထားဝယ်ကျေးရွာတွင် နေ့စဉ်ဝင်ငွေရရှိပြီး မိသားစုစားဝတ်နေရေး အဆင်ပြေရန်အတွက် ဂန္ဓာမာပန်းမျိုးစုံကို နှစ်ပတ်လည် စိုက်ပျိုးရောင်းချသည့် မိသားစုများ ရှိကြောင်း၊ စိုက်ပျိုးထားသော ဂန္ဓာမာပန်းခင်းများ အောင်မြင်ဖြစ်ထွန်းလျက်ရှိပြီး နေ့စဉ်ခူးဆွတ် ရောင်းချရသဖြင့် မိသားစုစားဝတ်နေရေး အဆင်ပြေလျက်ရှိကြောင်း၊ ပန်းမျိုးအနေဖြင့် ရွှေစိမ်းအနီ၊ ခိုင်ချူး၊ စပယ်အဖြူ၊ စပယ်အဝါ၊ ကျောက်စိမ်း၊ရွှေဝါဝင်းစသည့် ပန်းမျိုးကွဲများစွာရှိကြောင်း၊ ပန်းပျိုး ပင်များကို ပြင်ဦးလွင်မြို့အနီးစခန်းကျေးရွာများမှ တစ်ပင်လျှင်(၂၅-၃၀)ကျပ်အထိ ပန်းအမျိုးအစား အလိုက် ဝယ်ယူစိုက်ပျိုးကြကြောင်း ၊ တစ်ဧက စိုက်ပျိုးမည်ဆိုပါက ပန်းပျိုးပင်ရေ(၆)သောင်းခန့် စိုက်ပျိုးနိုင်ကြောင်း ၊ စတင်စိုက်ပျိုးပြီး (၄)လခန့်အကြာတွင် စတင်ခူးဆွတ်ရောင်းချရကြောင်း ၊ ရောင်းချရာတွင် ပန်းခိုင်(၁၀)ခိုင်ခန့် ပါဝင်သောပန်းတစ်စည်းလျှင် ပန်းလှပမှုနှင့် ပန်းအမျိုးအစား ပေါ်မူတည်၍ လက်လီဈေးနှုန်းအနေဖြင့် (၃၀၀၀)ကျပ်နှုန်းခန့် ရောင်းချရကြောင်း၊ ပန်းစတင် ခူးဆွတ်ချိန်မှ အပြီးရိတ်သိမ်းချိန်အထိ ပန်းအစည်းပေါင်း (၂၅၀၀)ခန့် ထွက်ရှိပြီး၊ လက်ကားဈေး တစ်စည်းကို (၁၉၀၀/-)ကျပ်ဖြင့် ရောင်းချရသောကြောင့် တစ်ဧကကုန်ကျစရိတ်အနေဖြင့် မျိုး၊ သွင်းအားစု၊လုပ်သားခအပါအဝင် (၂၅)သိန်းခန့် ကုန်ကျပြီး အကျိုးအမြတ်အနေဖြင့် (၂၀)သိန်းကျော် ကျပ်ခန့်အမြတ်ရရှိကြောင်း၊ ဂန္ဓာမာပန်းများကို နှစ်ပတ်လည်စိုက်ပျိုး ရောင်းချ သူများ အနေဖြင့် နေ့စဉ်ဝင်ငွေရရှိပြီး အဆင်ပြေလျှက်ရှိကြောင်း သိရှိရပါသည်။

DOCA (မန္တလေး)

            မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိ တောင်သူများသည် စပါး၊ပဲ၊ပြောင်း၊ နှမ်း၊ငရုတ်စသည့် သီးနှံမျိုးစုံစိုက်ပျိုးကြသည့်အပြင် ရုံးပတီသီးကိုလည်း တစ်ပိုင်တစ်နိုင်စိုက်ပျိုးလာ ကြပြီး ယခုအချိန်တွင် တောင်သူများသည် ရုံးပတီသီးကို စီးပွားဖြစ်စိုက်ပျိုး လာကြပါသည်။ ရုံးပတီသီး ကိုရာသီမရွေးစိုက်ပျိုးနိုင်သောကြောင့် တောင်သူများတွက်ခြေကိုက်သောသီးနှံတစ်မျိုးဖြစ်ပါသည်။ ရုံးပတီသီးကို သံချပ်ကုန်း၊ အုတ်ဖို နှင့် ရွာပုလဲကျေးရွာများတွင် အများဆုံး စိုက်ပျိုးကြပါသည်။ စိုက်ပျိုးသောမျိုးများမှာ ပင်ပုမျိုး ၊ ပင်လတ်မျိုး နှင့် ပင်မြင့်မျိုးများကို အများဆုံးစိုက်ပျိုးကြပြီး (၁)ဧကလျှင် မျိုးစေ့(၁၂)ထုပ် စိုက်ပျိုးရပြီး မျိုးစေ့တစ်ထုပ်လျှင် (၂၈၀၀၀/-)ကျပ်ပေးရကြောင်း၊ (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း(၆၃၀၀၀၀/-)ကျပ် ဝန်းကျင်ကုန်ကျကြောင်း၊ စိုက်ပျိုးပြီး(၄၅)ရက်အကြာတွင် စတင်ခူးဆွတ်ရပြီး တစ်ရက်ခြား တစ်ကြိမ် ခူးဆွတ်ပေးရကြောင်း ၊ သက်တမ်းအနေဖြင့်(၂)လအထိ ခူးဆွတ်ရကြောင်း၊ ဈေးနှုန်းအနေဖြင့် ဖောက်သည်ဈေး တစ်ပိဿာလျှင်(၁၈၀၀)ကျပ်၊ လက်လီဈေးနှုန်းအနေဖြင့် တစ်ပိဿာလျှင် (၂၀၀၀/-)ကျပ်ဈေးနှုန်းဖြင့် အရောင်းအဝယ်ဖြစ်နေကြောင်း၊ ယခင်အပတ်ထက် စျေးနှုန်းအနည်းငယ် ကျဆင်းသွားကြောင်း ကုန်စိမ်းသီးနှံ ဖြစ်သည့်အတွက်ဈေးနှုန်းအတက်အကျရှိကြောင်း၊ အကျိုး အမြတ်အနေဖြင့်(၇၀၀၀၀၀/-) ကျပ်ခန့်မြတ်ကြောင်း၊ စိုက်ခင်းသို့လာရောက် ဝယ်ယူသော ကုန်စိမ်း ပွဲစားများအား ရောင်းချသည့်အပြင် မြို့မဈေးနှင့် အေးမြကြည်လင်ဈေးများသို့လည်း တင်ပို့ ရောင်းချကြကြောင်း၊ ရုံးပတီသီးစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA (မန္တလေး)

   သာစည်မြို့ရှိမြို့မဈေးသည် သာစည်မြို့၊အမှတ်(၄)ရပ်ကွက်တွင်ရှိပြီး နေ့စဉ် ဈေးသည်၊ ဈေးဝယ်များ နှင့်စည်ကားလျက်ရှိပါသည်။ မြို့မဈေးတွင် အသားငါး၊ ဟင်းသီးဟင်းရွက်၊ ဘုရားပန်းစသည့် လက်လီဈေးသည် များမှာ ဈေးဝယ်များနှင့် နေ့စဉ်အရောင်းသွက်သည်ကို တွေ့ရသည်။

   ယခုအောက်တိုဘာလဆန်းတွင် မြို့မဈေးရှိ ဘုရားပန်းဆိုင်များတွင်ပန်းတိမ်မနိုင်၊ ကျောက်ဆည်သပြေ ငုတ်  ၊ ဂန္ဓမာ(အဖြူ/အဝါ/ပန်း/ခရမ်း) ပိုက်စွပ်နှင်းဆီပန်း ၊ရေမွှေးပန်းများ ရောင်းချကြောင်းသိရသည်။ ဈေးနှုန်းများအနေနဲ့ ပန်းတိမ်မနိုင်(၁၀ခက်စီး)တစ်စီး (၃၀၀၀)ကျပ်၊ ဂန္ဓမာ(အဖြူပွင့်အကြီး)တစ်စီး (၆၀၀၀)ကျပ်၊ အဝါပွင့်ကြီးတစ်စီး (၅၀၀၀)၊ပန်းခရမ်းရောင်အပွင့်သေး တစ်စီး(၄၀၀၀)၊ ကျောက်ဆည်သပြေငုတ်(သေး)ငါးငုတ်ပါ တစ်စီး(၂၀၀၀)ကျပ် သစ္စာပန်းအဖြူ (၅)ခက် စီးတစ်စီး (၄၀၀၀)ကျပ်၊ ပိုက်စွပ်နှင်းဆီ ရောင်စုံ (၁၀)ပွင့်စီး (၁)စီးလျှင် (၃၀၀၀-၃၅၀၀)ကျပ်၊ ရေမွှေးပန်း(၁၀)ခက်ပါ (၁)စီးလျှင် (၇၀၀)ကျပ်၊ အရောင်းအဝယ် ဖြစ်နေပြီးစက်တင်ဘာလဆန်းနှင့် နှိုင်းယှဉ်ပါက ဈေးနှုန်းတည်ငြိမ်နေကြောင်း သိရသည်။ ဗုဒ္ဓဘာသာ မြန်မာလူမျိုးအနေနှင့် နေအိမ်၊ ဘုန်းကြီးကျောင်း မှာရှိတဲ့ ဘုရားပန်းကိုမညှိုးအောင် ကပ်လှူကြတဲ့အတွက် ဘုရားပန်းဈေးကွက်ကတော့ ရာသီမရွေးအရောင်းသွက်ကြောင်းသိရသည်။

DOCA(မန္တလေး)

      ရှမ်းပြည်နယ်(မြောက်ပိုင်း)၊ လားရှိုးမြို့တွင် အိမ်တွင်းတစ်ပိုင်တစ်နိုင် ငွေနှင်းမှိုစိုက်ပျိုးရေး လုပ်ငန်းများသည် ယခုလများတွင် ပိုမိုတိုးတက်များပြားလာကြောင်း သိရှိရပါသည်။ လက်ရှိ ငွေနှင်းမှိုဈေးကွက်တွင် လက်ကားတစ်ပိဿာလျှင် (၉၀၀၀ ကျပ်မှ ၁၀၀၀၀ကျပ်) ထိရရှိပြီး လက်လီ တစ်ပိဿာလျှင် (၁၂၀၀၀ ကျပ်မှ ၁၃၀၀၀ကျပ်) ထိ ဈေးရရှိကြောင်း သိရှိရပါသည်။

          ငွေနှင်းမှိုပျိုးထုတ်များကို မြန်မာပြည်အနှံ့အပြားမှ မှာယူလျက်ရှိကြသော်လည်း အများအား ဖြင့် ရှမ်းပြည်နယ်(တောင်ပိုင်း)မှ မှာယူစိုက်ပျိုးကြပါသည်။ ရှမ်းပြည်နယ်(တောင်ပိုင်း)မှ (မြောက်ပိုင်း)၊ လားရှိုးမြို့သို့အရောက် တစ်ထုပ်လျှင် (၁၅၀၀ ကျပ်မှ ၂၀၀၀ကျပ်ကြား) ကျသင့်ပြီး ဂရုတစ်စိုက် စနစ်တကျ ပြုစုစိုက်ပျိုးတတ်ပါက တစ်ထုပ်လျှင် (၆) ကြိမ်မှ (၈) ကြိမ်ထိ ခူးဆွတ်၍ ရနိုင်ကြောင်း သိရှိရပါသည်။

          ငွေနှင်းမှိုစားသုံးခြင်းဖြင့် ခန္ဓာကိုယ်တွင်းရှိ ကိုလက်စထရောကျစေခြင်း၊ သွေးတိုးကျစေခြင်း၊ သွေးတွင်းသကြားဓာတ်ပမာဏအားထိန်းညှိပေးနိုင်ခြင်း၊ ကိုယ်ခံအားမြင့်စေခြင်း၊ နှလုံးသွေးကြော များ အားကောင်းစေခြင်း၊ ဝမ်းမှန်စေခြင်းစသည့် အကျိုးအာနိသင်များ ရရှိနိုင်ပါသည်။ သို့သော် “ဆေးလည်းအစာ၊ အစာလည်းဆေး”ဖြစ်သောကြောင့် အလွန်အကျွံစားသုံးခြင်းမှ ရှောင်ကြဉ်သင့်ပြီး ရောဂါအခံရှိသူများနှင့် ဓာတ်မတည့်မှုဖြစ်တတ်သူများအနေဖြင့် ဆရာဝန်နှင့် တိုင်ပင်ဆွေးနွေးပြီး မှသာ စားသုံးသင့်ကြောင်း‌ သိရှိရပါသည်။

DOCA(ရှမ်း)

          မန္တ‌လေးတိုင်းဒေသကြီး ၊ ကျောက်ဆည်မြို့နယ်သည် စပါး၊ပဲ၊ပြောင်း၊နှမ်း၊ငရုတ်၊ကြက်သွန် စသည့်စိုက်ပျိုးရေးလုပ်ငန်းကို အဓိကထားလုပ်ကိုင်ပြီး လယ်ယာထွက်သီးနှံများအပြင် ဥယျာဉ်ခြံ သီးနှံများကိုလည်း တစ်နိုင်တစ်ပိုင် စိုက်ပျိုးလျက်ရှိပါသည်။ ဥယျာဉ်ခြံသီးနှံများမှာ သရက်၊မာလကာ၊ သံပုရာနှင့်နဂါးမောက်သီးကိုအဓိကထားစိုက်ပျိုးကြပါသည်။ နဂါးမောက်သီးကို တောင်နောက် ကျေးရွာနှင့်သင်တောင်းကျေးရွာများတွင် စိုက်ပျိုးကြပါသည်။နဂါးမောက်သီးကို အဖြူသီးနှင့်အနီသီး  ဟူ၍(၂)မျိုးရှိပြီး အဖြူသီးမှာလူကြိုက်များကြောင်း၊ကျောက်ဆည်နယ်မှထွက်သော နဂါးမောက်သီး ကိုကျောက်ဆည်မြို့ရှိ မြို့မစျေး၊အေးမြကြည်လင်စျေးနှင့်သစ်သီးဆိုင်များသို့တင်ပို့ရောင်းချလျက်ရှိ ကြောင်း၊ အောက်တိုဘာလ ပထမပတ်တွင် နဂါးမောက်သီးစျေးနှုန်းမှာ တစ်လုံးလျှင်(၁၅၀၀-၂၀၀၀) ကျပ်စျေးနှုန်းများဖြင့်ရောင်းဝယ်ခဲ့ပြီး  အောက်တိုဘာလ တတိယပတ်တွင်နဂါးမောက်သီးစျေးနှုန်းမှာ တစ်လုံးလျှင်(၈၀၀-၁၀၀၀)ကျပ်စျေးနှုန်းများဖြင့် အလုံးအကြီး၊အသေးပေါ်မူတည်၍ စျေးနှုန်းကွာခြားကြောင်း ၊ စျေးကွက်အတွင်း နဂါးမောက်သီး အဝင်များလာသည့်အတွက် စျေးနှုန်းအနည်းငယ် ကျဆင်းလျက်ရှိကြောင်း ကျောက်ဆည် မြို့ရှိသစ်သီးရောင်းချသည့်ဆိုင်များမှသိရှိရပါသည်။

DOCA (မန္တလေး)