ပြည်တွင်းကုန်သွယ်မှုသတင်း

       စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ  ခရိုင်ဦးစီးမှူး ဦးမောင်မောင်ခိုင်သည် ၁၂.၇.၂၀၂၄ ရက်နေ့တွင် ဗန်းမော်မြို့၊ မင်းကုန်းရပ်ကွက်ရှိ 2-Star ကုန်စုံဆိုင်သို့ သွားရောက်၍ ကုန်အညွှန်းအမှတ်သားဖော်ပြခြင်းနှင့်ပတ်သက်၍ စားသုံးသူကာကွယ်ရေး ဥပဒေပါပြဌာန်းချက်များနှင့် ကိုက်ညီမှုရှိ/မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ ဈေးကွက်စောင့်ကြည့်စစ်ဆေးခဲ့ရာတွင် အသင့်သောက်အချိုရည်ဖြစ်သည့် VCODE အမှတ်တံဆိပ် (စပါကလင်ကော်ဖီအားဖြည့်အချိုရည်)တွင် ကုန်စည်အမျိုးအစားအလိုက် သတ်မှတ်ချက်နှင့်အညီ မြန်မာဘာသာဖြင့် ပြည့်စုံစွာဖော်ပြရမည့် ကုန်စည်၏ အမျိုးအမည်၊အရွယ်အစား၊အရေအတွက်အသားတင်ပမာဏ၊ထားသိုသိမ်းဆည်းမှု အညွှန်းနှင့်ဓာတ်မတည့်ကြောင်းဖော်ပြချက်တို့ ပြည့်စုံစွာဖော်ပြထားခြင်းရှိ/မရှိ ဈေးကွက်စောင့်ကြည့်စစ်ဆေးရာ ကုန်အညွှန်းအမှတ်အသားပြည့်စုံစွာ ဖော်ပြထားရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသားပြည့်စုံစွာ ပါရှိသောကုန်စည်များကိုသာ ဈေးကွက်အတွင်း ရောင်းချရန် အသိပညာပေးဆွေးနွေးခဲ့ပြီး ကုန်အညွှန်းအမှတ်သားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

       မန္တလေးတိုင်းဒေသကြီး၊ ကျောက်ဆည်ခရိုင်သည် သီးနှံမျိုးစုံစိုက်ပျိုးဖြစ်ထွန်းပြီး စားဖို ဆောင်သီးနှံများအပြင် စပါး၊ပဲ၊ပြောင်း၊ဝါများကိုလည်းစိုက်ပျိုးကြပါသည်။ဆီထွက်သီးနှံတစ်မျိုးဖြစ် သောမိုးမြေပဲသီးနှံကိုလည်းစိုက်ပျိုးကြပါသည်။ ၂၀၂၄-၂၀၂၅ဘဏ္ဍာနှစ်တွင် မိုးမြေပဲစိုက်ဧက(၂၉၁) ဧကကိုဇူလိုင်လပထမပတ်တွင် စိုက်ပျိုးပြီးစီးပြီဖြစ်ကြောင်း ခရိုင်ကြေးတိုင်နှင့်မြေစာရင်းဦးစီးဌာန ၏စာရင်းများအရသိရှိရပါသည်။မြေပဲစိုက်ပျိုးမှုအနေဖြင့် မျိုး(အဆံ)စိုက်ပျိုးပါက (၂၄)ပြည်စိုက်ပျိုး ရကြောင်း၊မြေပဲတောင့်စိုက်ပျိုးမည်ဆိုပါက(၄)တင်းစိုက်ပျိုးရကြောင်း ၊ ကုန်ကျစရိတ်အနေဖြင့် မျိုး၊ သွင်းအားစု ၊ လုပ်သားခအပါအဝင် စုစုပေါင်း(၅၃၀၀၀၀)ကျပ်ခန့် ကုန်ကျကြောင်း ၊ မြေပဲကို ဘောင်ကြောင်းပေးစနစ်ဖြင့် စိုက်ပျိုးကြပါသည်။ မြေပဲစျေးနှုန်းအနေဖြင့် ယခင်နှစ် မြေပဲဆံ (၁)ပိဿာ လျှင်(၆၇၀၀/-) ကျပ်၊မြေပဲတောင့်(၁)တင်းလျှင်(၅၀၂၅၀/-)ကျပ်၊မြေပဲဆီ(၁)ပိဿာလျှင် (၁၃၅၀၀/-) ကျပ်ဖြင့်ရောင်းချခဲ့ပြီး ယခုလက်ရှိ မြေပဲဆံပေါက်စျေးအနေဖြင့်(၁)ပိဿာလျှင် (၇၇၀၀/-) ကျပ် ၊ မြေပဲတောင့်(၁)တင်းလျှင်(၅၇၇၅၀/-)ကျပ်၊ မြေပဲဆီ(၁)ပိဿာလျှင်(၁၈၀၀၀/-) ကျပ် စျေးနှုန်းများ ဖြင့်ရောင်းဝယ်လျှက်ရှိကြောင်း မြို့ပေါ်ပွဲရုံများမှသိရှိရပါသည်။ မြေပဲစျေးနှုန်းများ ကောင်းမွန်ပါက အကျိုးအမြတ်များပိုမိုရရှိမည်ဖြစ်ကြောင်း မြေပဲစိုက်တောင်သူတစ်ဦး၏ ပြောကြား ချက်အရသိရှိရပါ သည်။

DOCA(မန္တလေး)

   တောင်ငူမြို့သို့ နေပြည်တော်၊တပ်ကုန်းမြို့နယ်မှ ဖရဲသီးများလာရောက်ရောင်းချလျက်ရှိရာ ၎င်းဖရဲသီးများမှာ ဒေသဖရဲသီးများထက် အရသာပိုမိုကောင်းမွန်သဖြင့် လူကြိုက်များ၍ ရောင်းအားကောင်းလျက်ရှိကြောင်းသိရှိရပါသည်။

     တပ်ကုန်းမြို့နယ်မှ ဖရဲသီးများကို ကားတစ်စီးလျှင်အလုံး ၃၀၀၀ ခန့်တင်ဆောင်၍ တောင်ငူမြို့ ဘုရင့်နောင်ဈေးအနီးတွင် အထိုင်ဆိုင်ခန်းဖွင့်လှစ်၍လည်းကောင်း၊ မော်တော်ယာဉ်ငယ်ဖြင့် တောင်ငူမြို့တွင်း လူစည်ကားရာနေရာများနှင့် ရေတာရှည်၊ အုတ်တွင်း၊ ဖြူးမြို့နယ်များသို့လည်းကောင်း လှည့်လည်၍ရောင်းချကာ ဈေးကွက်ကောင်းမွန်နေကြောင်းသိရှိရသည်။

     ၂၀၂၄ခုနှစ် ဇူလိုင်လဒုတိယအပတ်တွင် ဖရဲသီးတစ်လုံးလျှင် ၂၅၀၀ ကျပ်မှ ၃၀၀၀ ကျပ်အထိနှင့် ဖရဲသီးအသေးတစ်လုံးလျှင် ၁၅၀၀ ကျပ်မှ ၂၀၀၀ ကျပ်အထိ ရောင်းချရကြောင်းနှင့် လူကြိုက်များ၍ ရောင်းအားကောင်းကြောင်း ဖရဲသီးရောင်းချသူများထံမှ သိရှိရပါသည်။

DOCA(ပဲခူး)

    ယခုနှစ် ၂၀၂၄ ခုနှစ် နှစ်စမှစ၍ ပဲပုပ်ဈေးမြင့်တက်ခဲ့သော်လည်း ပြည်နယ်တွင်း စားသုံးရန်နှင့် လုပ်ငန်းသုံးများအတွက် အသုံးပြုရန်အတွက် ကုန်သည်လက်ကျန် လှောင်ပဲအနည်းငယ်သာ ရှိကြောင်း ဘားအံမြို့၊ ရွှေကံထူးပဲပွဲရုံမှ သိရသည်။

     ကရင်ပြည်နယ်ဒေသထွက် ပဲပုပ်ဈေးမှာ ယခင်နှစ်က တစ်ပိဿာလျှင် ၃၂၀၀ ကျပ်ဖြစ်ပြီး ၂၀၂၄ ခုနှစ် ဝယ်ဈေးအဖွင့်ဈေးနှုန်းမှာ ၃၄၀၀ ကျပ် ဖြစ်ကာ ဇူလိုင်လလယ်တွင် တစ်ပိဿာ ၄၂၀၀ ကျပ်ထိ ဈေးနှုန်းမြင့်တက်ခဲ့ကြောင်းသိရသည်။

    ပဲပုပ်သည် စိုက်ပျိုးရန် လွယ်ကူပြီး စိုက်ပျိုးစရိတ် သက်သာသောကြောင့် ကရင်ပြည်နယ်တွင် တောင်သူများ စိုက်ပျိုးမှုများပြား၍ အထွက်နှုန်းနှင့် ဈေးနှုန်းရရှိမှုသင့်တင်သောကြောင့် တောင်သူ တွက်ခြေကိုက်မှုကောင်းသောသီးနှံဖြစ်ပြီး ကုန်သည်များအနေဖြင့် ဈေးနှုန်းမြင့်တက်ရန် အလား အလာများကို ခန့်မှန်းနိုင်သော်လည်း ပဲပုပ်အား သိုလှောင်ရာတွင် ရိတ်သိမ်းချိန်လွန် နည်းပညာ  (သိုလှောင်မှု) အခက်အခဲရှိသောကြောင့် အရေအတွက်များများစားစား သိုလှောင်ခြင်းမရှိဘဲ ဒေသတွင်း စားသုံးရန်နှင့် လုပ်ငန်းသုံးများအတွက်သာ လိုအပ်သလောက် ခန့်မှန်းသိုလှောင်ကြကြောင်း သိရသည်။

DOCA(ကရင်)

        မိတ္ထီလာကုန်စိမ်းဈေးကွက်တွင်ခရမ်းချဉ်သီးဈေးမှာဈေးကောင်းရနေကြောင်း သိရသည်။ ဈေကွက်၌ ခရမ်းချဉ်မှာ ဒေသထွက် ဗမာခရမ်းချဉ်၊ အင်းသီး၊ ထိုင်ဝမ်သီးဟူ၍ ရောင်းချကြပြီး ယခုနောက်ပိုင်းဒေသတွင်၌ ဗမာခရမ်းချဉ်မျိုးအပြင် နိုင်ငံခြားမျိုးများကိုလည်း စိုက်ပျိုးလာကြကြောင်းသိရသည်။

          မိတ္ထီလာမြို့နယ်၊ ဇောင်ချမ်းကုန်းကျေးရွာရှိ ခရမ်းချဉ်စိုက်တောင်သူတစ်ဦးနှင့် တွေ့ဆုံ၍ ခရမ်းချဉ်သီး စိုက်ပျိုးမှုအခြေအနေကို မေးမြန်းရာ ခရမ်းချဉ်မျိုး ထိုင်းနိုင်ငံ Sungenta ကုမ္ပဏီမှ တင်သွင်းသည့် (တစ်သုံးလုံး) (111) တံဆိပ်မှာ မျိုစေ့ (၅၀၀၀) ပါဝင်ပြီး (၁၅၀၀၀၀) ကျပ်ပေးရကြောင်း၊ ၎င်းမှာ အပင်ပေါက်နှုင်း (၉၀ %) ရှိကြောင်း သိရပါသည်။ စိုက်ပျိုးရာတွင် ပထမဦးစွာ ပျိုးအိတ်ဖြင့် ပျိုး ထောင်ပြီးမှ အပင်ငယ်ကို ရွေ့ပြောင်းစိုက်ပျိုးရကြောင်း၊ စိုက်ပျိုးသည်မှ ထွက်ရှိသည့်အထိ အဆင့်ဆင့် ကုန်ကျစရိတ်များမှာ ပျိုးအိတ် (၅၀၀၀) အတွက် (၂၀၀၀၀) ကျပ်၊ ပျိုးထောင်လုပ်သား (မ) လေးဦး အတွက် တစ်ရက်လုပ်အားခ (၈၀၀၀) ကျပ်ဖြင့် (၃၂၀၀၀) ကျပ်၊ ထယ်ထွန်ခမှာ နွားရှဉ်း (၁) ရှဉ်းလျှင် (၂၀၀၀၀) ကျပ်ဖြင့် (၈၀၀၀၀) ကျပ်၊ အမှိုက်ကောက်ခြင်း၊ အပင်စိုက်ခြင်းတို့အတွက် ကျား/မ လုပ်သားခ စုစုပေါင်းမှာ (၁၅၀၀၀၀) ကျပ် ဝန်းကျင်ရှိကြောင်း၊ မြေဩဇာအနေနှင့် အပင်(၄၀၀၀) စိုက်ခင်း မြေ (၀.၅) ဧကအတွက် ပုလဲ (၈၅၀၀၀) ကျပ်၊ အမြစ်အားဆေး (၁၅၀၀၀) ကျပ်၊ အပင်ဖြစ်ထွန်းလာပြီး နောက် အပင် (၄၀၀၀) အတွက် တိုင်ဝါး (၂၀၀၀) လုံးကို ဝါးတစ်လုံး (၁၅၀) ကျပ်နှုန်းဖြင့် (၃၀၀၀၀၀) ကျပ်၊ ကြိုး (ချည်ကြိုး) သုံးပိဿာအတွက် (၁၀၅၀၀) ကျပ်၊ ရေတင်ဆီမှာ တစ်ကြိမ်လျှင် (၁၀၀၀၀) ကျပ်၊ ပေါင်းသင်ခြင်း ခူးဆွတ်ခြင်းများ အပါအဝင် (၀.၅) ဧက (အပင် ၄၀၀၀) အတွက် (၁၅) သိန်း ဝန်းကျင်ကုန်ကျကြေင်းသိရပါသည်။ ခရမ်းချဉ်သီးပင်မှာ ပျိုးသက် (၂၅) ရက်ကြာမြင့်ပြီး အပင်သက် (၇၀) ကျော်လျှင် ခူးဆွတ်နိုင်ရာ တစ်ပင်လျှင် (၂) ပိဿာနှုန်းဖြင့် ပိဿာ (၈၀၀၀) ဝန်းကျင် ထွက်ရှိ ကြောင်း သိရပါသည်။ ၎င်းခရမ်းချဉ်စိုက်တောင်သူအနေနှင့် ခရမ်းချဉ်သီ တစ်ပိဿာလျှင် (၁၀၀၀) ကျပ် ဖြင့် ရောင်းချရမည်ဆိုလျှင်ပင် အကျိုးအမြတ်များမည်ဟု မျှော်မှန်းထားကြောင်း တောင်သူမှ ပြောကြား ခဲ့ပါသည်။ မိတ္ထီလာဈေးကွက်၌ ခရမ်းချဉ်လက်လီ (၁) ပိဿာလျှင် (၃၀၀၀-၄၀၀၀) ကျပ် ရှိကြောင်း ဈေးကွက်မှသိရပါသည်။      

DOCA(မန္တလေး)