ပြည်တွင်းကုန်သွယ်မှုသတင်း

    ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီ လက်ကျန် အခြေအနေများအား  အမှန်ကန်ဆုံး သိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှု စာရင်းများအရလည်းကောင်း၊ ကြက်သွန်နီ လက်ကျန် အခြေအနေအား နေ့စဉ် စုံစမ်းလျက်ရှိပါသည်။ ဇန်နဝါရီလ (၁၆) ရက်မှ ဇန်နဝါရီလ (၂၂) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီ ဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ မြစ်သားဒေသတို့မှ ကြက်သွန်နီ (၁၄၁၀၀၀၀) ပိဿာဝင်ရောက်ခဲ့ပြီး (၆၀)ရာခိုင်နှုန်းခန့် ပြန်လည်စီးထွက်မှုရှိကြောင်း သိရှိရပါသည်။ ထို့ကြောင့် ကြက်သွန်နီ လက်ကျန်မှာ (၅၆၄၀၀၀) ကျန်ရှိကြောင်း ကုန်စည်ဒိုင်သတင်းအရ သိရှိရသည်။ မြင်းခြံ ကြက်သွန်နီ(အသစ်) အချော တစ်ပိဿာ ကျပ် ၁၁၀၀၊ အသန့်မှာ တစ်ပိဿာ ကျပ် ၁၆၀၀ ၊ အကြီးမှာ ကျပ် ၂၁၀၀၊ ရှယ်မှာ ကျပ် ၂၁၀၀၊ မြစ်သား ကြက်သွန်နီ(အသစ်) အချော တစ်ပိဿာ ကျပ် ၂၂၀၀၊ အသန့်မှာ တစ်ပိဿာ ကျပ် ၂၅၀၀ ၊ အကြီးမှာ ကျပ် ၃၀၀၀၊ ရှယ်မှာ ကျပ် ၂၈၀၀၊  ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၁၁၀၀၊ အသန့်မှာ တစ်ပိဿာ ကျပ် ၁၅၀၀ ၊ အကြီးမှာ ကျပ် ၂၀၀၀၊ ရှယ်မှာ ကျပ် ၂၁၀၀  ဈေးတို့အသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

      ၂၅.၁.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

  ၂၅.၁.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

   မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ တောင်သူများသည် နှစ်စဉ် ကိုင်းကျွန်းမြေများတွင် ကြက်သွန်နီ(ဥ)စိုက်ကို စိုက်ဧက(၉၀၀)ခန့် ဒေသစီးပွားဖြစ်စိုက်ပျိုးကြသည်။ မိုးကြက်သွန်နီ (ဥ)စိုက်ကို အောက်တိုဘာလလယ်မှ နိုဝင်ဘာလကုန်အထိစိုက်ပျိုးကြပြီး ဇန်နဝါရီလဆန်းပိုင်းမှ ဖေဖော်ဝါရီလအထိတူးဖော်ကြသည်။ ယခုနှစ်တွင် ပြည်တွင်းဈေးကွက်ခိုင်မာမှုရှိသော ကြက်သွန်နီကို စိုက်ဧက(၁၀၀၀)ခန့်အထိ တိုးချဲ့စိုက်ပျိုးကြောင်းသိရှိရသည်။

     မိုးကြက်သွန်နီစိုက်ပျိုးထုတ်လုပ်မှုအနေဖြင့် (၁)ဧကလျှင် မျိုးဥဝယ်ယူခ၊ သွင်းအားစုဝယ်ယူခ၊ လုပ်သားခအပါအဝင် စုစုပေါင်း ကျပ်သိန်း (၃၀)ခန့်ကုန်ကျကြောင်း၊ အထွက်နှုန်းအနေဖြင့် တောင်သူတစ်ဦးချင်း၏ စိုက်ပျိုးချိန်ရာသီနှင့် သွင်းအားစုသုံးစွဲပုံမတူညီ၍ ကွာခြားမှုရှိကြောင်း၊ ယခုနှစ် စိုက်ပျိုးချိန်တွင် ရာသီဥတုကောင်းမွန်၍ (၁)ဧကလျှင် ပိဿာ(၃၅၀၀-၆၀၀၀)အထိ ထွက်ရှိကြောင်း၊ ယခုနှစ် စိုက်ပျိုးချိန်တွင် ရာသီဥတုဖောက်ပြန်၍ အထွက်နှုန်းလျော့နည်းကြောင်း၊ (၁)ဧကလျှင် ပိဿာ (၃၀၀၀-၄၀၀၀) ခန့်အထိသာထွက်ရှိကြောင်း၊ ဈေးနှုန်းအနေဖြင့် သီးနှံပေါ်စ၌ ဒေသပေါက်ဈေးတစ်ပိဿာလျှင် ကျပ်(၂၀၀၀-၂၂၀၀)ဈေးနှုန်းဖြင့်ရောင်းချရကြောင်း၊ (၁)ဧကလျှင် အထွက်နှုန်းပိဿာ (၃၅၀၀) ခန့်ထွက်ရှိ၍ ကျပ်သိန်း(၇၀)ခန့်ဝင်ငွေရရှိပြီး အကျိုးအမြတ်အနေဖြင့် ကျပ်သိန်း(၄၀)ခန့်ရရှိကြောင်း ဆိပ်ဖြူမြို့၊ ရွာသစ်ကျေးရွာရှိ မိုးကြက်သွန်နီ(ဥ)စိုက်တောင်သူတစ်ဦးထံမှသိရှိရသည်။ မိုးကြက်သွန်နီ(ဥ)စိုက်ဈေးကွက်အနေဖြင့် တောင်သူများတူးဖော်ရောင်းချချိန်တွင် အချိန်နှင့်တပြေးညီ နေ့စဉ်နှင့်အမျှ ဝယ်လိုအားအပေါ်မူတည်ပြီး ဈေးနှုန်းပြောင်းလဲမှုရှိ၍ တောင်သူတစ်ဦးချင်းတို့မှာ အကျိုးအမြတ်ရရှိပုံမတူညီကြောင်း ဒေသခံစိုက်တောင်သူက ပြောကြားခဲ့ပါသည်။

     ဆိပ်ဖြူမြို့မှထွက်ရှိသည့် ကြက်သွန်နီများကို ပြည်တွင်းစားသုံးမှုအပြင် ပြည်ပပို့ကုန်အဖြစ် ထိုင်း၊ ဗီယက်နမ်၊ တရုတ်၊ ဘင်္ဂလားဒေရှ်နှင့်  အိန္ဒိယနိုင်ငံများသို့ ပေးပို့လျက်ရှိရာ ဈေးကွက်အခိုင်အမာရရှိသည့်အပြင် မိမိဒေသစီးပွားဖွံ့ဖြိုးရေးနှင့် နိုင်ငံတော်၏စီးပွားရေးကိုပါ အထောက်အပံ့ဖြစ်စေသည့် ကြက်သွန်နီသီးနှံကို ဆိပ်ဖြူမြို့နယ်ရှိ စိုက်တောင်သူများမှာ နှစ်စဉ်မပြတ် ဒေသစီးပွားဖြစ်စိုက်ပျိုးလျက်ရှိကြောင်းသိရှိရပါသည်။

DOCA(မကွေး)         

    မကွေးတိုင်းဒေသကြီး၊ ပခုက္ကူခရိုင်သည် အပူပိုင်းရာသီဥတုရှိပြီး သစ်ပင်ကြီးများ သဘာဝအလျောက်ပေါက်ရောက်လေ့ရှိသော ဒေသတစ်ခုဖြစ်သည်။ သစ်ပင်ကြီးများကိုခုတ်ယူ၍ ထင်းအဖြစ်လည်းကောင်း၊ မီးသွေးဖုတ်၍လည်းကောင်း အသက်မွေးဝမ်းကျောင်းလုပ်ငန်းအများအဖြစ် လုပ်ကိုင်ကြကြောင်းတွေ့ရှိရပါ သည်။

    ပခုက္ကူမြို့အနီးတစ်ဝိုက်ရှိ ကျေးရွာများတွင်  မီးသွေးလုပ်ငန်းကို စီးပွားဖြစ်လုပ်ကိုင်ကြပြီး ပခုက္ကူမြို့ပေါ်သို့ တက်ရောက်ရောင်းချကြောင်းသိရှိရပါသည်။ ယခုအချိန်တွင် လျှပ်စစ်မီးအခက် အခဲကြောင့် ပိုမိုရောင်းချနေရပြီး ဈေးနှုန်းမှာ ယခင်နှစ် ၂၀၂၃ခုနှစ်၊ ဇွန်လတွင် တစ်အိတ်လျှင် ကျပ်(၄၀၀၀-၄၅၀၀)ခန့်ဖြင့် ထူးခြားစွာ အတက်အကျမရှိဘဲ ဈေးငြိမ်နေသော်လည်း ဇူလိုင်လမှ စတင်ကာ ဈေးနှုန်းအနည်းငယ်မြင့်တက်လာခဲ့ကာ တစ်အိတ်လျှင် ကျပ်(၅၅၀၀-၆၅၀၀)ရှိခဲ့ပြီး ဒီဇင်ဘာလ နောက်ဆုံးပတ်တွင် တစ်အိတ်လျှင် ကျပ်(၇၀၀၀ - ၈၀၀၀)ဈေးနှုန်းရှိခဲ့ပါသည်။

     ယခုနှစ် ၂၀၂၄ခုနှစ်၊ ဇန်နဝါရီလဆန်းပိုင်းတွင် တစ်အိတ်လျှင် ကျပ်(၈၀၀၀- ၉၅၀၀) ဈေးနှုန်းအထိမြင့်တက်ခဲ့ပြီး တတိယအပတ်တွင် တစ်အိတ်လျှင် ကျပ်(၁၁၀၀၀-၁၃၅၀၀)ထိဈေးနှုန်းမြင့်လာသည်ကိုတွေ့ရှိရပါသည်။ ရောင်းချသူများအနေဖြင့် ယနေ့အချိန်တွင် လျှပ်စစ်မီးပုံမှန်မရှိခြင်းနှင့် သစ်တော၊ သစ်ပင်ရှားပါးလာမှုကြောင့် ဈေးနှုန်းများဆက်လက်မြင့်တက်လာနိုင်ကြောင်း မီးသွေးရောင်းချသူထံမှသိရှိရပါသည်။

DOCA(မကွေး)