ပြည်တွင်းကုန်သွယ်မှုသတင်း

          မုံရွာမြို့၊ သံလမ်းဈေးတွင် ဂေါ်ရခါးသီးများ ရောင်းချလျက်ရှိရာ ဂေါ်ရခါးသီးသည် ရှမ်းပြည်နယ် တောင်ကြီး၊ အောင်ပန်း၊ ကလောနှင့် ရွာငံ၊ ရေဦးဒေသများမှ အဓိက ဝင်ရောက်လျက်ရှိကြောင်း သိရှိရပါသည်။ ဂေါ်ရခါးပင်သည် နွယ်ပင်ဖြစ်သောကြောင့် အညွန့်များကိုလည်း စားသုံးနိုင်ကြပါသည်။ ဂေါ်ရခါးအညွှန့်ကို ချက်ပြုတ်ကြော်လှော် စားသုံးနိုင်ပြီး၊  အသီးကိုလည်း ဟင်းချိုချက်၍လည်းကောင်း၊ ကြက်ဥနှင့် ကြော်၍လည်းကောင်း၊ ပုံစံအမျိုးမျိုးဖြင့် ချက်ပြုတ်စားသုံးနိုင်ပါသည်။

          ၂၀၂၅ ခုနှစ်၊ ‌အောက်တိုဘာလ စတုတ္ထပတ်တွင်  သံလမ်းဈေးတွင် ဖြစ်ပေါ်နေသော ဂေါ်ရခါးသီဈေးနှုန်းများကို ဂေါ်ရခါးသီးအသေး(၁)လုံးလျှင် (၄၀၀)ကျပ်၊ ဂေါ်ရခါးသီးအလတ် (၁)လုံး လျှင် (၆၀၀) ဂေါ်ရခါးသီးအကြီး(၁)လုံးလျှင် (၈၀၀)ကျပ်နှင့် ဂေါ်ရခါးညွှန့်ဈေးနှုန်း (၃၀၀)ကျပ်မှ (၄၀၀)ကျပ်ထိ  ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

      မြန်မာ့အထည်ချုပ်လုပ်ငန်း တင်ပို့မှုမှာ ဧပြီလ ၁ ရက်မှ စတင်ကာ ၂၀၂၅-၂၀၂၆ ဘဏ္ဍာနှစ် ပထမနှစ်ဝက်တွင် ကိုးရာခိုင်နှုန်း တိုးလာကြောင်း နိုင်ငံပိုင်နေ့စဉ်ထုတ် The Global New Light of Myanmar က အောက်တိုဘာလ ၂၂ ရက်နေ့တွင် ဖော်ပြထားသည်။

      မြန်မာနိုင်ငံ၏ ဝင်ငွေအကောင်းဆုံး ကဏ္ဍများတွင် အထည်ချုပ်နှင့် လယ်ယာထွက်ကုန် များ ပါဝင်ပြီး အထည်ချုပ်လုပ်ငန်းက ပို့ကုန်ကဏ္ဍကို ဦးဆောင်နေကြောင်း သိရသည်။

     မြန်မာနိုင်ငံ၏ အထည်ချုပ်လုပ်ငန်းများသည် ဖြတ်တောက်ခြင်း၊ ထုပ်လုပ်ခြင်းနှင့် ထုပ်ပိုးခြင်း (CMP) စနစ်ဖြင့် လုပ်ကိုင်နေကြောင်း ၎င်းက ဆက်လက်ပြောကြားခဲ့သည်။

အထည်ချုပ်လုပ်ငန်းများအပြင် CMP လုပ်ငန်းများသည် အီလက်ထရွန်းနစ်ပစ္စည်းများ၊ ဖိနပ် များ၊ အိတ်များ၊ ဆံပင်တုများ၊ မှန်ဘီလူးများနှင့် ကင်မရာများကို ထုတ်လုပ်ပေးသည်ဟု အစီရင်ခံစာ က ဆိုသည်။

    မြန်မာနိုင်ငံအထည်ချုပ်လုပ်ငန်းရှင်များအသင်းနှင့် ဆက်စပ်အဖွဲ့အစည်းများသည် CMP စနစ် မှ မြန်မာနိုင်ငံတွင် အပြည့်အဝ ထုတ်လုပ်မှုပုံစံသို့ အသွင်ကူးပြောင်းရန် ကြိုးပမ်းဆောင်ရွက် လျက်s ရှိသည်ဟု ၎င်းကဆိုသည်။ 

DOCA (ရန်ကုန်)

       စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းကို လုပ်ကိုင်စားသောက်ကြရာမှ စားဖိုဆောင်သီးနှံဖြစ်သည့် ခဝဲသီးများနှင့် ကြောင်လျှာသီးပင်များကိုလည်း တစ်နိုင်တစ်ပိုင်စိုက်ပျိုးလျက်ရှိပြီး မုံရွာမြို့၊ သာစည်ဈေးတွင် လာရောက်ရောင်းချလျက်ရှိကြောင်း သိရပါသည်။ ခဝဲသီးအား ခဝဲသီးဟင်းချိုအဖြစ်လည်း ချက်စား၍ရသလို ကြက်ဥနှင့် ကြော်စားပါက အလွန်အရသာရှိသော ဟင်းတစ်ခွက်ဖြစ်ပြီး၊ ကြောင်လျှာသီးမှာ မြေပဲဆံပဲမှုန့်တို့နှင့် သုပ်စားပါက ခံတွင်းမြိန်သော ဟင်းလျာတစ်မျိုးဖြစ်ကြောင်း သိရှိရပါသည်။

        ၂၀၂၅ ခုနှစ်၊ အောက်တိုဘာလ စတုတ္ထပတ်တွင် မုံရွာမြို့၊ သာစည်ဈေးတွင် ခဝဲသီး ဈေးနှုန်းများမှာ လက်ကား တစ်ပိဿာလျှင် (၂၃၀၀/-) ကျပ်၊ လက်လီတစ်ပိဿာလျှင် (၂၅၀၀/-) ကျပ်တို့ဖြင့်လည်းကောင်း၊  ကြောင်လျှာသီးအကြီး တစ်တောင့်လျှင် (၁၃၀၀)ကျပ်၊ ကြောင်လျှာသီး အသေးတစ်တောင့်လျှင် (၉၀၀)ကျပ်နှုန်းတို့ဖြင့် ရောင်းချလျက်ရှိကြောင်း ကုန်စိမ်းရောင်းသူများထံမှ သိရှိရပါသည်။

DOCA(စစ်ကိုင်း)

            စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုး ရောင်းချလျက်ရှိရာ ကြက်ဟင်းခါးပင်၊ ခဆော့ပင်နှင့် ကင်းမုံသီးများကို  မိမိတို့နေအိမ်ခြံဝင်းများတွင် လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင် စိုက်ပျိုး၍ မုံရွာမြို့ပေါ်ရှိ ဈေးဟောင်းနှင့် ရပ်ကွက်ဈေးများတွင် လာရောက်ရောင်းချကြကြောင်း သိရှိရပါသည်။  

          ၂၀၂၅ ခုနှစ်၊ အောက်တိုဘာလ စတုတ္ထပတ်တွင် မုံရွာမြို့၊ ဈေးဟောင်းတွင် ရောင်းချလျက်ရှိသော  ကြက်ဟင်းခါးသီးဈေးနှုန်းများမှာ ကြက်ဟင်းခါးသီး (၂၅)ကျပ်သားလျှင် (၈၀၀) ကျပ်၊ (၅၀)ကျပ်သားလျှင် (၁၅၀၀)ကျပ်၊ (၁)ပိဿာလျှင် (၃၀၀၀)ကျပ်၊ ခဆော့သီးတစ် (၁)ဘူးလျှင် (၃၅၀)ကျပ်နှင့် ကင်းမုံသီ(၁)ပြည်လျှင် (၂၃၀၀)ကျပ် ဖြင့် ရောင်းချလျက်ရှိကြောင်း ကုန်စိမ်းရောင်းချသူများထံမှ  သိရှိရပါသည်။

DOCA(စစ်ကိုင်း)

   မန္တလေးတိုင်းဒေသကြီး၊ ညောင်ဦးခရိုင်သည် လယ်ယာစိုက်ပျိုးရေးနှင့်မွေးမြူရေးလုပ်ငန်းများ ကိုလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာ ဆောင်းနှမ်းကိုလည်း စီးပွားဖြစ်စိုက်ပျိုးလျက်ရှိကြောင်း သိရသည်။ ၂၀၂၄-၂၀၂၅ ခုနှစ်၊ ဆောင်းနှမ်းစိုက်ပျိုးမှုအနေဖြင့် (၂၅၂၃)ဧက လျာထားခဲ့ပြီး (၁၃၇၄)ဧက စိုက်ပျိုးနိုင်ခဲ့ကြောင်း၊ တစ်ဧကပျမ်းမျှအထွက်နှုန်းအနေဖြင့်(၇)တင်းခန့်ထွက်ရှိကြောင်း သက်ဆိုင်ရာ ဌာန စာရင်းများအရသိရသည်။

   ၂၀၂၅-၂၀၂၆ ခုနှစ်၊ စိုက်ပျိုးရာသီတွင် ဆောင်းနှမ်းစိုက်ပျိုးမှုအနေဖြင့် (၂၈၄၂)ဧက လျာထားမှု ရှိကြောင်း၊ ယခုအောက်တိုဘာလ ဒုတိယအပတ်တွင် ဖြစ်ပေါ်နေသောနှမ်းဈေးနှုန်းများအနေဖြင့် နှမ်းညိုတစ်တင်းလျှင်(၉၀၀၀၀)ကျပ်၊ ဂျပန်နှမ်းဖြူတစ်တင်းလျှင်(၁၀၀၀၀၀)ကျပ်၊ စမုံနှမ်းနက်တစ် တင်းလျှင်(၂၄၀၀၀၀)ကျပ်များဖြင့် အရောင်းအဝယ်ဖြစ်လျက်ရှိကြောင်း ညောင်ဦးမြို့ရှိ ပွဲရုံများမှ သိရှိ ရသည်။

DOCA(မန္တလေး)