ပြည်တွင်းကုန်သွယ်မှုသတင်း

       ရှမ်းတောင်ကြက်သွန်ဖြူမှာလည်း တရုတ်ကြက်သွန်ဖြူ(ကြူကုတ်) ခပ်ပါးပါးအဝင်ရှိသော်လည်း ၁၁၀၀၀ကျပ်ဈေးဖြင့် ဈေးမြှင့်လျက်ရှိပါသည်။ ရှမ်းတောင်ကြက်သွန်ဖြူမှာအ ရည်အသွေးကောင်းသဖြင့် ယမန်နှစ်ကလောက်ဈေးမကောင်းသော်လည်း ထူး၁ (၃၀၀၀) ထူး၂ (၄၀၀၀)၊ ထူး၃(၅၅၀၀)၊ ထူး၄ (၇၀၀၀)ကျပ် ၊ ထူး၅ (၇၀၀၀) နှင့် ထူးလွန် ၈၅၀၀ကျပ်ထိ ဈေးပေါက်နေပါသည်။ပွင့်လင်းရာသီ ကုန်စည်အဝင်များသော်လည်း ဈေးငြိမ်လျက်ရှိပါသည်။ ပွင့်လင်းရာသီ အလှူအတန်းပွဲများကြောင့် ကြက်သွန်ဖြူအသုံးများလာပြီး ကုန်စည်ပါးချိန် ဈေးမြင့်လာဖွယ်ရှိပါသည်။ ဒေါင်းဥတလုံးဈေးမှာ တပိဿာ ၁၅၀၀၀ဈေးပေါက်နေကြောင်း သိရပါသည်။

  ချင်း(ဂျင်း) ဈေးကွက်မှာမူ ပြည်ပဈေးကွက်အေးနေသဖြင့် အဆွဲပါး၍ ဈေးအေးနေပါ သည်။လက်ရှိဈေးကွက်ပေါက်ဈေးအရ အလတ်စ ၂၅၀၀ နှင့် ရှယ်စ ၃၀၀၀ခန့်ဖြင့် ရောင်း ဝယ်နေကြပြီး ပြည်ပဝယ်လက်ကို စောင့်မျှော်နေရကြောင်း သိရပါသည်။

DOCA(ရှမ်း)

        ပန်းနှမ်းပင်သည် သမပိုင်းသီးနှံအမျိုးအစားဖြစ်ပြီး ရေကြမ်း၊ မြေကြမ်း၊ ရာသီဥတုဒဏ် ခံနိုင်သော ဆီထွက်သီးနှံတစ်မျိုးဖြစ်သည်။ ရေငတ်ဒဏ်ခံနိုင်သဖြင့် အပူပိုင်းဒေသများ၊ မြေပြန့်ဒေသ များတွင် စိုက်ပျိုးနိုင်သလို တောင်ပေါ်ဒေသများတွင်လည်း စိုက်ပျိုးဖြစ်ထွန်းနိုင်သည့်  ဆီထွက်သီးနှံ  အမျိုးအစားဖြစ်သည်။ ပြည်တွင်းဒေသအနှံ့အပြား၌ စိုက်ပျိုးနိုင်သော်လည်း ရှမ်းပြည်နယ်၊ စစ်ကိုင်းတိုင်း ဒေသကြီးနှင့် ကချင်ပြည်နယ်တို့တွင် အဓိကစိုက်ပျိုးကြောင်း လေ့လာသိရှိရပါသည်။ ပန်းနှမ်းသည် အလင်းရောင်တုံ့ပြန်သောမျိုးများဖြစ်၍ စိုက်ပျိုးချိန်နောက်ကျပါက ပန်းပွင့်နည်းခြင်း၊ အပင်ကြီးထွားမှု ထိခိုက်နိုင်သည်။  ရှမ်းပြည်နယ် (တောင်ပိုင်း)တွင်  တောင်ကြီး၊ ညောင်ရွှေ၊ ဟိုပုံး၊ ကလော၊ ဟဲဟိုး၊ အောင်ပန်း၊ ပင်းတယ၊ ဆီဆိုင်နှင့် နမ့်စန် မြို့များတွင် အများဆုံး စိုက်ပျိုးထွက်ရှိကြောင်းသိရှိရပါသည်။ ပန်းနှမ်း တစ်ဧကလျှင် (၇)တင်းမှ (၁၂) တင်းခန့် အထိ ထွက်ရှိ၍ အစေ့တစ်တင်းလျှင် ဆီ(၅ ပိဿာခွဲ မှ ၆ ပိဿာခန့်) ကြိတ်ခွဲရရှိနိုင်ပါသည်။ တစ်ဧက စိုက်ပျိုးလျှင် ဆီ(၄၀)ပိဿာခန့် ထုတ်လုပ်ရရှိနိုင်ကြောင်း လေ့လာသိရှိရပါသည်။ လက်ရှိကာလတွင် ဒေသတွင်းဈေးကွက်၌ ဖြစ်ပေါ်နေသော ပန်းနှမ်းရောင်းဝယ်မှုအခြေအနေမှာ ပန်းနှမ်းစေ့ တစ်ပိဿာ   လျှင် ၅၆၀၀ ကျပ်နှင့် ပန်းနှမ်းဆီ တစ်ပိဿာလျှင် ၁၇၀၀၀ ကျပ်ဖြင့် အရောင်းအဝယ်ဖြစ်နေ ကြောင်း စုံစမ်းသိရှိရပါသည်။

DOCA(ရှမ်း)

      ထားဝယ်တွင် ဗုံလုံသီး (ပဲလင်းမြွေသီး)များ စတင်ပေါ်ထွက်လာပြီ ဖြစ်ပါသည်။ ဗုံလုံသီးသည် သခွား၊ ဗူး၊ ဖရုံတို့လို အနွယ်ပင်ဖြစ်၍ မိုးရာသီတွင်ထွက်ပေါ်လေ့ရှိပြီး ယခုအခါ ရေလောင်း၍ စိုက်ပျိုးကြသည်။ ထားဝယ်မြို့အနီးဝိုက်ရှိ ခြံများတွင်စိုက်ပျိုးကြပြီး နီးစပ်ရာ ဈေးများသို့ လာရောက် ရောင်းချကြပါသည်။ ထိုအသီးသည် အပေါ်ယံ အလွှာကို ဓားနှင့်ခြစ်ပြီး အရွယ်တော်အတုံးလေး များတုံး၍ အလယ်အူတိုင်ကိုထုတ်ပြီး ကြက်သား (သို့) ပုစွန်ခြောက်ကို ထောင်းပြီး အစာသွပ်ချက်စားလျှင် အလွန်ကောင်းသည့် ဟင်းလျာတစ်မျိုး ဖြစ်ပါသည်။ ဗုံလုံသီးတွင် ဗီတာမင်နှင့် သတ္တုဓါတ်များပါသဖြင့် စားသုံးပေးသင့်သော သီးနှံတစ်မျိုးဖြစ်ပါသည်။ 

              ဗုံလုံသီး(ပဲလင်းမြွေသီး)ကို တစ်တောင့်လျှင် ၁၀၀၀ ကျပ်ဖြင့် ဈေးကွက်တွင် ရောင်းချလျက်ရှိပြီး ဈေးနှုန်းအနည်းငယ်ကျဆင်းလျက်ရှိကြောင်း သိရပါသည်။

DOCA(တနင်္သာရီ)

    တနင်္သာရီတိုင်းဒေသကြီးအတွင်း မြို့နယ်များတွင် စက်သုံးဆီအရောင်းဆိုင်များ၊ ကုမ္ပဏီများ ဖွင့်လှစ်၍ ရောင်းချလျှက်ရှိရာ စက်သုံးဆီဈေးနှုန်းအနေဖြင့် နိုဝင်ဘာလဒုတိယပတ်တွင် စက်သုံးဆီ တစ်လီတာလျှင် ပရီမီယံဒီဇယ် (၃၁၈၀)ကျပ်၊ ရိုးရိုးဒီဇယ် (၂၆၄၅)ကျပ်၊ ဓာတ်ဆီ 92 (၂၇၄၅)ကျပ်၊ ဓာတ်ဆီ 95 (၂၈၂၀)ကျပ် အသီးသီးဖြစ်ခဲ့ပြီး ယခု နိုဝင်ဘာလဒုတိယပတ်တွင် ပရီမီယံ ဒီဇယ် (၃၂၂၀)ကျပ်၊ ရိုးရိုးဒီဇယ် (၂၆၇၅)ကျပ်၊ ဓာတ်ဆီ 92 (၂၇၂၀)ကျပ် ၊ ဓာတ်ဆီ 95 (၂၇၉၅)ကျပ် အသီးသီးဖြစ်ပေါ်ခဲ့ရာမှ တစ်လီတာလျှင် ပရီမီယံဒီဇယ် (၄၀)ကျပ်၊ ရိုးရိုးဒီဇယ် (၃၀)ကျပ် မြင့်တက် သွားပြီး ဓာတ်ဆီ 92 (၂၅)ကျပ်၊ ဓာတ်ဆီ 95 (၂၅)ကျပ် အသီးသီး ဈေးနှုန်းကျဆင်းခဲ့ကြောင်း လေ့လာ သိရှိခဲ့ရပါသည်။ စက်သုံးဆီများအား စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် မြန်မာ နိုင်ငံ စက်သုံးဆီ တင်သွင်းဖြန့်ဖြူးရောင်းချရေးအသင်းတို့ ပူးပေါင်းအစီအစဉ်ဖြင့် သက်သာသော အထူးဈေးနှုန်းဖြင့် ရောင်းချပေးခဲ့ခြင်းကြောင့် ယခုကဲ့သို့ စက်သုံးဆီ ဈေးနှုန်းများ ကျဆင်းလာခဲ့ခြင်း ဖြစ်ကြောင်း သိရှိရပါသည်။

DOCA(တနင်္သာရီ)

      ထားဝယ်မြို့ရှိ ပတ်ဝန်းကျင်ကျေးရွာများမှ ပြည်သူများသည် မိမိတို့နေအိမ်ခြံဝင်းများနှင့် တောင်ယာများတွင် သီးပင်၊စားပင်များကို တစ်နိုင်တစ်ပိုင် စိုက်ပျိုးထားလျက်ရှိရာ  သခွားသီးပင် များကိုလည်း စိုက်ပျိုးထားပါသည်။ သခွားပင်များသည် ဘူး၊ဖရုံပင်လိုမျိုး နွယ်ပင်အမျိုးအစား တစ်မျိုးဖြစ်ပြီး ပူနွေးသောရာသီတွင် ပိုမိုဖြစ်ထွန်းပြီး ဆီးနှင်းဒဏ်ကိုခံနိုင်ရည်မရှိပေ။ ထို့ကြောင့်နေ ရောင်ခြည်ကောင်းစွာရရှိပြီး စိုထိုင်းဆနည်းသောအရပ်ဒေသများတွင် သခွားပင်စိုက်ပျိုးရန်သင့် တော်သည်။ သခွားသီးများကို စိုက်ပျိုးပြီး (၄၅)ရက်အကြာတွင် စတင်ဆွတ်ခူးနိုင်ပြီး သခွားသီး မှည့်ပါက အောက်ခြေရှိအညှာအက်ကွဲလာကြောင်းသိရပါသည်။

              ယခုအချိန်သည် သီးပင်၊ စားပင်များရောင်းကောင်းလျက်ရှိပြီး ထားဝယ်မြို့တွင် သခွားသီးဈေးနှုန်းမှာ အကြီးတစ်လုံးလျှင်(၇၀၀)ကျပ် နှင့် အသေးတစ်လုံးလျှင်(၅၀၀)ကျပ်ရှိပြီး ဈေးသည်များ တွက်ချေကိုက်လျက်ရှိကြောင်း သိရပါသည်။

DOCA(တနင်္သာရီ)