ပြည်တွင်းကုန်သွယ်မှုသတင်း

 မြင်းခြံမြို့နယ်သည်  ဆည်ရေသောက်အသင့်အတင့်ရှိ၍ ဟင်းသီးဟင်း ရွက်မျိုးစုံစိုက်ပျိုးလျက်ရှိ ကြောင်း၊ အာလူးသီးနှံသည် အေး၍သမရာသီဥတုကို နှစ်သက်သောကြောင့် အပူပိုင်း‌ဒေသဖြစ်သော မြင်းခြံမြို့နယ်တွင် အာလူးသီးသီးနှံ စိုက်ဧကစိုက်ပျိုးမှု မရှိကြောင်းသိရှိရသည်။

     မြင်းခြံမြို့၊ အေးမြသီတာဈေးတွင် ရောင်းချနေသော အာလူးသီးများကို ရှမ်းပြည်နယ်တောင်ပိုင်း ‌အောင်ပန်းမြို့နှင့် မန္တလေးမြို့တို့မှ ဝယ်ယူရောင်းချကြောင်းသိရှိရသည်။ ၂၀၂၅ ခုနှစ်၊ ဇူလိုင်လစတုတ္ထပတ်တွင် ရောင်းချနေသော အာလူသီး မားကစ် S1 တစ်ပိဿာလျှင် (၆၀၀၀)ကျပ်၊မျက်နီ OK တစ်ပိဿာလျှင်(၅၀၀၀) ကျပ်၊ ဂေါ်လီဆိုဒ် တစ်ပိဿာလျှင် (၄၀၀၀) ကျပ် ပေါက်ဈေးများဖြင့်ရောင်းချလျက်ရှိကြောင်း၊  အာလူးသီးများကိုဒေသတွင်း ဟင်းလျာအဖြစ် စားသုံး ကြကြောင်း၊ MSME လုပ်ငန်းဖြစ်သော  အာလူးကြော်ရာတွင် လည်း အသုံး ပြုကြကြောင်း၊ ပွဲရုံများတွင် နေ့စဉ် အာလူးပိဿာကုန်ချိန် (၆၀-၁၂၀) ခန့်အရောင်းအဝယ်ဖြစ်လျက်ရှိကြောင်း ပွဲရုံလုပ်ငန်း လုပ်ကိုင်သူ၏ပြောပြချက်အရ သိရှိရသည်။ အာလူးသီးနှံသည် လူကြိုက်အများဆုံးဟင်းသီးဟင်းရွက် တစ်မျိုးဖြစ်ပြီး အာဟာရကြွယ်ဝ၍ အမျှင်ဓာတ်၊ ကာဗိုဟိုက်ဒရိတ်၊ ပရိုတင်းဓာတ်နှင့် ဗီတာမင်စီတို့ကြွယ်ဝကြောင်း၊ အမျှင်ဓာတ်ကြွယ်ဝသောကြောင့် ဗိုက်ပြည့်စေပြီး အစာစားချင် စိတ်ကိုလျော့ချ၍ ကိုယ်အလေးချိန်ထိန်းချုပ်ရာတွင် စားသုံးကြကြောင်းလည်းသိရှိရသည်။

 DOCA(မန္တလေး)

   စံပယ်ပန်း၏ ရနံ့ကစိတ်ကိုကြည်လင်အေးမြစေပြီး စိတ်ဖိစီးမှုကို လျော့နည်းစေပါသည်။ စံပယ်ပန်း၏ အဓိပ္ပာယ်သည် “ချစ်ခြင်းမေတ္တာ” ကို ကိုယ်စားပြုပါသည်။ ကျေးဇူးတင်ကြောင်း ဖော်ပြရန်နှင့် ကံကောင်းစေဖို့တောင်းဆုပြုရန် စံပယ်ပန်းကိုရွေးချယ်ကြသည်။ စံပယ်ပန်း၏ နှင်းလိုဖြူဆွတ်တဲ့ အရောင်၊ မွှေးပျံ့ချိုမြိ်န်တဲ့ရနံ့၊ လှပတဲ့ ပန်းပွင့်ပုံစံတွေကြောင့် “Jasmine” ဘုရားသခင်ထံမှ လက်ဆောင်တော်ဆု အဓိပ္ပာယ်ရပါသည်။ အဖြူစင်ဆုံးပန်းစံပယ်ကုံးလေးတွေရဲ့ ရနံ့က မွှေးပြန့်သင်းကြိုင်လှပါသည်။ ပန်းလေးတွေက အလွန်လှပတင့်တယ်လှပေသည်။ အဖြူရောင်အဆင်းရှိပြီး ရနံ့မွှေး၍ ဂုဏ်သတင်းကြီးသောပန်းမျိုးဖြစ်ပါသည်။ စံပယ်ကြက်ရုံး၊ စံပယ်အိုးပုတ်၊ အပွင့်ကြီး ဆိတ်စံပယ် ဟူ၍ ရှိပါသည်။ စံပယ်ပန်းသည် တန်ခူးလလောက်ကတည်းက ပန်းစပွင့်တတ်ပြီး (၂)ပြန်(၃)ပြန်ပွင့်သောကြောင့် ယခုအချိန်ထိ  ဈေးကွက်ရှိဆဲဖြစ်ပါသည်။ စံပယ်ပန်းကလေးများကို သီကုံး၍ ဈေးကွက်သို့တင်ပို့ရောင်းချကြပြီး လူကြိုက်များ၍ ဝယ်ယူမှုများသော ပန်းကလေးများဖြစ်ပါသည်။ ဘုရားလှူရန်နှင့် အမျိုးသမီးများ ခေါင်းတွင် ပန်ဆင်ရန်အတွက် အရောင်းသွက်လှပါသည်။ စံပယ်ပန်းပင်သည် တခါစိုက်ထားလျှင် အခါခါခူးယူရသော ကြာရှည်ခံအပင်တစ်မျိုးဖြစ်သည်။ မိမိအိမ်ခြံဝင်းတွင် ပန်းအိုးနှင့် စိုက်ပျိုးကြသလို စီးပွားဖြစ်ခြံနှင့် စိုက်ပျိုးသူများလည်း ရှိပါသည်။ တိုးတက်လာတဲ့ခေတ်နှင့်အညီ ဖုန်းနှင့်တစ်ချက်ဆက်လိုက်ရုံဖြင့်အိမ်တိုင်ရာရောက်ပို့ဆောင်ရောင်းချမှုများလည်း ရှိလာပါသည်။ စံပယ်ပန်းပျိုးပင်တစ်ပင်လျှင် (၁၀၀၀/၂၀၀၀/၃၀၀၀) ကျပ်ဖြင့် ရောင်းချလျှက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။

DOCA(မန္တလေး)

   မန္တလေးတိုင်းဒေသကြီး ၊မိတ္ထီလာခရိုင်အတွင်း မြို့နယ်များရှိ ကျေးရွာများတွင်  လယ်ယာ စိုက်ပျိုး ရေးလုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ သာစည်မြို့နယ်၊ ဟံဇားကျေးရွာ၌ စက်မှုကုန်ကြမ်းသီးနှံတစ်မျိုးဖြစ်သည့် ကြံကိုလည်းစိုက်ပျိုးလာကြကြောင်း သိရှိရပါ သည်။

  သာစည်မြို့နယ်တွင် ကြံစိုက်ဧက( ၂၄ )ဧကရှိပြီး ကြံသည် နုန်းမြေ၊သဲနှုန်းမြေ၊နုန်းမြေစေး အမျိုးအစားမှာ အထွက်နှုန်းနှင့်အပင်ကြီးထွားမှု အကောင်းဆုံးဖြစ်ကြောင်း၊ စိုက်ပျိုးမှုအနေဖြင့် အနက် (၆-၁၂)လက်မတွင် မြောင်းအတွင်း၌အလျားလိုက်ချ၍ စိုက်ပျိုးရပြီး ကြံကို ဇန်နဝါရီလတွင်စိုက်ပျိုးပြီး တစ်နှစ်ခန့်အကြာတွင်ရိတ်သိမ်းရကြောင်း၊ ကုန်ကျစရိတ်အနေဖြင့် မျိုး၊မြေပြုပြင်ခ၊ သွင်းအားစု၊ လုပ်သားခ အပါအဝင် တစ်ဧကစုစုပေါင်း ငွေကျပ် သိန်း(၄၀) ခန့် ကုန်ကျကြောင်း၊  အထွက်နှုန်းမှာ ရေရ ရှိမှု ၊သွင်းအားစုထည့်သွင်းနိုင်မှု၊ မြေပေါ်မူတည်၍ စိုက်သားတစ်နှစ်လျှင် (၃၀)တန်မှ(၄၀)တန်ထိ ထွက်ရှိကြောင်း၊ လမိုင်းခင်း တစ်နှစ်လျှင်(၂၅) တန်မှ(၃၀) တန်နှင့် လမက်ခင်းတစ်နှစ်လျှင် တန်(၂၀) ခန့်ထွက်ရှိကြောင်း၊ ဈေးကွက် အနေဖြင့် တပ်ကုန်းမြို့ရှိ သကြားစက်ရုံများသို့ တိုက်ရိုက်ရောင်းချကြ ကြောင်း၊ယခုနှစ်တွင် ကြံစိုက်ခင်းများအောင်မြင်ဖြစ်ထွန်း၍ အထွက်နှုန်းနှင့်ဈေးနှုန်းကောင်းမွန်ပါက အကျိုးအမြတ်များစွာရှိ ကြောင်း ကြံစိုက်တောင်သူတစ်ဦီးထံမှ သိရပါသည်။

DOCA(မန္တလေး)

   ရမည်းသင်းခရိုင်၊ပျော်ဘွယ်ဈေးကွက်၌ ပျော်ဘွယ်မြို့နယ်အတွင်းရှိ ဥသျှစ်ပင်၊မိုးကောင်း၊ တောင်နီကျေးရွာများမှ  ပြည်ပပို့ကုန် သီးနှံတစ်မျိုးဖြစ်သည့် မိုးပဲတီစိမ်းများလှိုင်လှိုင်ထွက်ရှိပြီး နေ့စဉ် အရောင်းအဝယ်ဖြစ်လျက်ရှိပါသည်။

     ပျော်ဘွယ်မြို့ဈေးကွက်တွင် ပွဲရုံများ၌နေ့စဉ် ပဲတီစိမ်းအိတ်(၁၀၀)မှ (၁၅၀) အထိဝင်ရောက် လျက်ရှိကြောင်း၊ ယခုနှစ်ဇူလိုင်လစတုတ္ထပတ်တွင် ပဲတီစိမ်းတစ်တင်းလျှင် (၁၂၅၀၀၀)ကျပ်ဈေးဖြင့် အရောင်းအဝယ်ဖြစ်လျက်ရှိကြောင်း၊ ယခင်နှစ်နှင့်ကာလတူနှိုင်းယှဉ်လျှင်  ပဲတီစိမ်း တစ်တင်းလျှင် (၅၇၀၀၀)ထိဈေးနှုန်းမြှင့်တက်လာကြောင်း၊ ဈေးနှုန်းမြှင့်တက်လာရခြင်းမှာ အထွက်နည်းပြီး ပြည်ပ အဝယ်လိုက်ခြင်းကြောင့်ဖြစ်ကြောင်း၊ ဈေးကွက်အနေဖြင့် မိတ္ထီလာမြို့ပေါ်ရှိသီးနှံပွဲရုံများမှ တစ်ဆင့် မန္တလေးမြို့သို့တင်ပို့ရောင်းချကြကြောင်း သိရပါသည်။

DOCA(မန္တလေး)

   မိတ္ထီလာမြို့နယ်ရှိ ကျေးရွာတွင် မိသားစုအပိုဝင်ငွေရရှိစေရန် တောင်သူလုပ်ငန်းများတွင် အသုံး ပြုရန် ဝါးဖြင့်ပြုလုပ်သော တောင်း၊ ဇကော၊ ဇကာများယက်လုပ်ကြသည့်အပြင် တစ်နိုင်တပိုင် ပလပ် စတစ်ခြင်း၊ တောင်းယက်လုပ်ခြင်းလုပ်ငန်းများကို ယခင်ကအနည်းငယ်သာရှိခဲ့သော်လည်း ယခုအခါ ပလပ်စတစ်ခြင်း၊ တောင်းယက်လုပ်ခြင်းလုပ်ငန်းများတွင်ကျယ်လာစွာလုပ်ကိုင်လာကြပါသည်။

   ပလပ်စတစ်ခြင်းတောင်းယက်လုပ်ခြင်းလုပ်ငန်းသည် အသက်မွေးဝမ်းကျောင်း လက်မှုပညာ တစ်မျိုးဖြစ်၍ သက်ဆိုင်ရာအစိုးရဌာနအဖွဲ့အစည်းများကလည်း သင်တန်းများပို့ချပေးခြင်းကို မိတ္ထီလာ မြို့သစ်၊ အိုင့်ကျေးရွာတို့တွင် ပလပ်စတစ်ခြင်းတောင်းယက်လုပ်ခြင်းလုပ်ငန်းလုပ်ကိုင်သူ( ၁၀ )ဦီးရှိ ကြောင်း၊ လိုအပ်သောကုန်ကြမ်းကို မန္တလေးမြို့မှဝယ်ယူရကြောင်း  ပလပ်စတစ်ကြိုးခွေ တစ်ခွေလျှင် (၄၅၀၀၀)ကျပ်ဝယ်ယူရကြောင်း၊ကိုင်းပြုလုပ်ရသည့်ပလပ်စတစ်အမာ တစ်ပိဿာလျှင်(၅၀၀၀) ကျပ်ရှိ ကြောင်း၊ (၃) ပိဿာကြိုးခွေ(၄)ခွေယက်လုပ်လျှင် ခြင်းတောင်းဆိုဒ် ကြီး/လတ်/သေး အလုံး(၆၀) ခန့်ရရှိကြောင်း၊ ခြင်းတောင်းအကြီးတစ်လုံးလျှင်(၈၀၀၀)ကျပ်၊ ခြင်းတောင်းအလတ်တစ်လုံးလျှင်    ( ၇၅၀၀ )ကျပ်၊ အသေးတစ်လုံးလျှင်( ၆၀၀၀-၆၅၀၀  )ကျပ်ရောင်းချရ ကြောင်း၊ ဈေးကွက်အနေဖြင့် မိတ္ထီလာမြို့သို့‌တင်ပို့ရောင်းချကြကြောင်း၊ ပလပ်စတစ်ခြင်းတောင်းယက်လုပ်ခြင်းလုပ်ငန်းသည် မိသားစုအပိုဝင်ငွေရရှိသည့်အပြင် ကျေးလက်နေပြည်သူများ အလုပ်အကိုင်အခွင့်အလမ်းများစွာ ရရှိကြောင်း သိရပါသည်။

DOCA(မန္တလေး)