ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ ပခုက္ကူမြို့  ကုန်စိမ်းသီးနှံဈေးကွက်တွင် စားသုံးသူများ နေ့စဉ်နှင့်အမျှ ဝယ်ယူသုံးစွဲလျက်ရှိသည့် ကြက်သွန်ဖြူသီးနှံများလည်း နေ့စဉ်အရောင်းအဝယ်ဖြစ်လျက်ရှိပြီး မတ်လ (ပထမ)ပတ်တွင် ဈေးတက်ပြီး အရောင်းအဝယ်ဖြစ်ကြောင်း သိရှိရသည်။ ကြက်သွန်ဖြူ သီးနှံကို ပြည်တွင်းဒေသထွက်အပြင် စားသုံးမှုမလုံလောက်၍ ပြည်ပနိုင်ငံများမှလည်း ဝယ်ယူ တင်သွင်းလျက်ရှိသည်။ စိုက်ပျိုးမှုအနေဖြင့် မကွေးတိုင်းဒေသကြီး အအေးပိုင်းဒေသများဖြစ်သည့် ဆော၊ ကျောက်ထု၊ ပေါက်ဒေသများတွင် အများဆုံးစိုက်ပျိုး စိုက်ပျိုးကြောင်း၊ ယခုအချိန်တွင် ပခုက္ကူဈေးကွက်သို့  ကြက်သွန်ဖြူ(အသစ်)များဝင်ရောက်ပြီး ဈေးအနည်းငယ်ကျဆင်း အရောင်းအဝယ်ဖြစ်ကြောင်း  သိရှိရ သည်။

           ဈေးနှုန်းအနေဖြင့် ၂၀၂၅ခုနှစ်၊ မတ်လ(ပထမ)ပတ်တွင် ဗမာကြက်သွန်ဖြူ အလုံး အကြီးအသေးနှင့် အရည်အသွေး လိုက်၍ တစ်ပိဿာလျှင် ကျပ်(၁၆၀၀၀-၈၀၀၀)၊ ကြူကုတ်(ရှမ်းပြည်) တစ်ပိဿာလျှင် ကျပ်(၁၇၀၀၀-၉၀၀၀) ဈေးဖြင့် အရောင်းအဝယ်ဖြစ်ကြောင်း၊ ယခင် ဖေဖော်ဝါရီ (ပထမ)ပတ်တွင် ဗမာကြက်သွန်ဖြူ အလုံး အကြီးအသေးနှင့် အရည်အသွေး လိုက်၍ တစ်ပိဿာလျှင် ကျပ်(၂၀၀၀၀-၈၀၀၀)၊ ကြူကုတ်(ရှမ်းပြည်) တစ်ပိဿာလျှင် ကျပ်(၂၁၀၀၀-၉၀၀၀) ဈေးဖြင့် အရောင်းအဝယ်ဖြစ် ကြောင်း၊ ယခင်ဖေဖော်ဝါရီလ(ပထမ)ပတ်နှင့် ဈေးနှုန်း နှိုင်းယှဉ်ပါက ကြက်သွန်ဖြူ တစ်ပိဿာလျှင် ကျပ်(၄၀၀၀)ခန့် ဈေးကျပြီး အရောင်းအဝယ်ဖြစ်ကြောင်း၊ ဈေးနှုန်းကျဆင်းရခြင်းမှာ ကြက်သွန်ဖြူ သီးနှံ(အသစ်)များဈေးကွက်သို့ ဝင်ရောက်မှုများ၍ ဈေးကျဆင်းကြောင်း သိရှိရပါသည်။

DOCA(မကွေး)

         မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့တွင် ဥစားကြက်မွေးမြူရေးလုပ်ငန်း လုပ်ကိုင် မှုနည်းပါးခြင်းကြောင့် ဒေသတွင်း စားသုံးမှုမလုံလောက်၍ မန္တလေးတိုင်းဒေသကြီး၊ ပြင်ဦးလွင်မြို့နှင့် ရှမ်းပြည်နယ် တောင်ကြီးမြို့တို့မှ ဝယ်ယူ၍ အရောင်းအဝယ်ဖြစ်လျက်ရှိပါသည်။ 

              ဈေးနှုန်းများအနေဖြင့်၂၀၂၅ခုနှစ်၊  မတ်လ(ဒုတိယပတ်)တွင် ကြက်ဥများ ဈေးအနည်းငယ် မြင့်တက်၍ အရောင်းအဝယ်ဖြစ်လျက်ရှိသည်။ ကြက်ဥအကြီးအသေးမူတည်၍ ကြက်ဥ(၁၀)လုံးလျှင် ကျပ်(၃၈၀၀၊ ၄၀၀၀၊ ၄၂၀၀)ဈေးရှိပြီး တစ်ပိဿာလျှင် ကျပ်(၁၀၃၀၀)၊ ယခင်ဖေဖော်ဝါရီလ (ဒုတိယပတ်)တွင် ကြက်ဥတစ်ပိဿာလျှင် ကျပ်(၁၀၀၀၀)ဈေးဖြင့် အရောင်းအဝယ်ဖြစ်လျက်ရှိပြီး ယခင်ဖေဖော်ဝါရီလ(ဒုတိယပတ်)နှင့် ဈေးနှုန်းနှိုင်းယှဉ်ပါက တစ်လအတွင်း ကြက်ဥတစ်ပိဿာလျှင် ကျပ်(၃၀၀)ခန့် ဈေးမြင့်တက်ပြီး အရောင်းအဝယ် ဖြစ်လျက်ရှိကြောင်း၊ သယ်ယူစရိတ် ကြီးမြင့်၍ ဈေးအနည်းငယ်မြင့်တက်ကြောင်း သိရှိရသည်။

              ကြက်ဥသည် ကျန်းမာရေးနှင့် ညီညွတ်ပြီး အာဟာရ ပြည့်ဝသော အစားအစာတစ်မျိုးဖြစ်ပြီး စားသုံးပြည်သူများအနေဖြင့် လူတန်းစားမရွေး ဝယ်ယူစားသုံးနိုင်ပြီး အလွယ်တကူစားသုံးရသော အစားအစာတစ်မျိုးဖြစ်ခြင်းအပြင် စားသောက်ဆိုင်လုပ်ငန်းရှင်များမှလည်း ဝယ်ယူမှုများခြင်းကြောင့် အရောင်းအဝယ် သွက်ကြောင်း ကြက်ဥ ရောင်းဝယ်ရေး လုပ်ငန်းရှင်ထံမှ သိရှိရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ် ဧရာဝတီမြစ်ရိုးတစ်လျှောက်ရှိ ဆိပ်ဖြူ၊ ရွာသစ်၊ အနောက်ပိုင်းရပ်ကွက်နှင့် ကိုးတောင့်၊ ချင်တောင်၊ မြင်ကဝ အုပ်စုအတွင်းရှိ ကျေးရွာများ၌ ယခုနှစ်တွင် ကြက်သွန်နီ၊ မြေပဲ၊ နေကြာ ၊ ကုလားပဲ၊ ပဲယင်း၊ ပဲနီကြား၊ ပြောင်းဖူးနှင့် ကုန်စိမ်းသီးနှံများ စိုက်ပျိုးပြီး ဆီထွက်သီးနှံ ဆောင်းမြေပဲ ကို အဓိကထားစိုက်ပျိုးကြပြီး ၂၀၂၅ ခုနှစ်၊ အောက်တိုဘာလကုန် နိုဝင်ဘာလဆန်းတွင် စတင်စိုက်ပျိုးကြောင်း၊ စိုက်ဧက(၁၀၀၀)ခန့် စိုက်ပျိုးပြီး မြေပဲအတောင့်ကြီး လုံဆံဖြူ (၃)လပဲ S1မျိုးကို စိုက်ပျိုးကြောင်း သိရှိရသည်။

          ယခုနှစ်တွင်ဆောင်းစိုက်မြေပဲမှာ တစ်ဧကအထွက်နှုန်း မြေပဲတင်း(၅၀-၅၅)တင်းခန့် ထွက်ရှိ ပြီး ကုန်ကျစရိတ်ကျပ်(၁၀)သိန်းခန့် ကုန်ကျကြောင်း၊ သီးနှံပေါ်ချိန် ဒေသပေါက်ဈေး မြေပဲတောင့် အခြောက်တစ်တင်းလျှင် ကျပ်(၃၂၀၀၀-၃၅၀၀၀)၊ မြေပဲလုံးဆံ (ရှယ်) တစ်ပြည်လျှင် ကျပ်(၁၀၀၀၀)၊ လုံးဆံ(ရိုးရိုး) တစ်ပြည်လျှင် ကျပ်(၉၂၀၀-၉၀၀၀)၊ ဆီဆံ တစ်ပြည်လျှင် ကျပ်(၈၅၀၀-၈၆၀၀)ခန့် ပေါက်ဈေးရှိသောကြောင့်ငွေကျပ်(၁၀)သိန်းခန့်  အကျိုးအမြတ်ရရှိကြောင်း၊ ရွာသစ်ရပ်ကွက်ရှိ စိုက် တောင်သူထံမှ သိရှိရပါသည်။

          ဈေးကွက်အနေဖြင့် ထွက်ရှိသော မြေပဲများကို ဒေသတွင်း ဆီစက်လုပ်ငန်းရှင်များအပြင် ပဲကြော်၊ မြေပဲဆားလှော် လုပ်ငန်းရှင်များမှ ဝယ်ယူပြီး ချောက်မြို့ အေဝမ်းပွဲရုံသို့လည်း တင်ပို့ ရောင်းချ ကြောင်း၊ ယခုအချိန်တွင် ကျန်းမာရေးနှင့် ညီညွှတ်သော မြေပဲဆီသန့်ကို ဝယ်ယူစားသုံးမှု မြင့်မားလျက် ရှိပြီး မြို့ပေါ်ရှိ ဆီစက်များတွင်တွင်ကျယ်ကျယ် လည်ပတ်လျက်ရှိ၍ မြေပဲအဝယ်လိုက်၍ ဈေးကွက်ကောင်းကြောင်း၊ သီးနှံပေါ်စမှ ကုန်ဆုံးချိန်အထိ မြေပဲဈေးကွက်ခိုင်မာမှုရှိကြောင်း၊  တောင်သူများအနေဖြင့်လည်း ဆီထွက်သီးနှံမြေပဲ စိုက်ပျိုးခြင်းကြောင့် မိသားစုစားသုံးဆီဖူလုံမှု ရရှိသည့်အပြင် အကျိုး အမြတ်ရရှိခြင်းကြောင့် မြေနုကျွန်းစိုက် ဆောင်းသီးနှံမြေပဲကို နှစ်စဉ်မပြတ် တိုးချဲ့စိုက်ပျိုးကြောင်း သိရှိရပါသည်။

DOCA(မကွေး)

           မကွေးတိုင်းဒေသကြီး၊ ပခုက္ကူခရိုင်အတွင်းထောပတ်ပဲ စိုက်ပျိုးရာဒေသများဖြစ်သော ပခုက္ကူကျွန်း၊  ရေစကြိုကျွန်းနယ်များ၊ မြင်းကျွန်း၊ လေးလံကျွန်းနှင့် ဂန့်ဂေါခရိုင်အတွင်းရှိ ထီးလင်း၊ ဆော၊ ကျောက်ထု၊ မောက်၊ ကျွဲနန်းကျေးရွာများတွင် အများဆုံးစိုက်ပျိုးကြပြီး ဖေဖေါ်ဝါရီလ(စတုတ္ထပတ်) မှစ၍ ထောပတ်ပဲများ စတင်ရိတ်သိမ်းကြပါသည်။ ပခုက္ကူကုန်စည်ဒိုင်သို့ ထောပတ်ပဲဖြူများ အခြား မြို့နယ်များမှလည်းဝင်ရောက် အရောင်းအဝယ်ဖြစ်လျက်ရှိကြောင်း ကုန်သည်ပွဲစားများမှထံမှ သိရှိရပါ သည်။

           ၂၀၂၅ခုနှစ်၊ ဖေဖေါ်ဝါရီလ(စတုတ္ထပတ်)မှစ၍  ပခုက္ကူကုန်စည်ဒိုင်သာမက မြို့ပေါ်ရှိ ပွဲရုံများသို့လည်း ဝင်ရောက်အရောင်းအဝယ်ဖြစ်လျက်ရှိကြောင်း၊ ဖေဖေါ်ဝါရီလ(စတုတ္ထပတ်)တွင် အရောင်းအဝယ်ဖြစ်ခဲ့သော ထောပတ်ပဲဖြူဈေးနှုန်းမှာ  တစ်တင်းလျှင် ကျပ်(၈၇၅၀၀)ဖြစ်၍ မတ်လ(ပထမပတ်)တွင် ထောပတ်ပဲဖြူ(ကျွန်း) တစ်တင်းလျှင်ကျပ်(၈၈၀၀၀)ဖြစ်ပြီး ဖေဖေါ်ဝါရီ (စတုတ္ထပတ်)နှင့်နှိုင်းယှဉ်ပါက တစ်တင်းလျှင်ကျပ် (၅၀၀)ခန့် ဈေးတက်နေပြီး အရောင်းအဝယ်ဖြစ်မှု အိတ်ရေမှာ တစ်နေ့လျှင် အိတ်ရေ (၅၀) မှ (၅၀၀) ထိ ဖြစ်နေကြောင်း ကုန်စည်ဒိုင်မှသိရှိရပါသည်။

DOCA(မကွေး)

              မကွေးတိုင်းဒေသကြီး၊ ပခုက္ကူခရိုင်တွင် သီးနှံမျိုးစုံစိုက်ပျိုးရာမှ အစေ့ထုတ်ပြောင်း(CP) သီးနှံ ကိုလည်း ဒေသစီးပွားဖြစ် စိုက်ပျိုးလျက်ရှိသည်။ ပခုက္ကူ၊ မြစ်ခြေ၊ ကမ္မ၊ ပေါက်၊ ရေစကြိုမြို့များတွင် စိုက်ဧကအများဆုံးစိုက်ပျိုးထွက်ရှိသော မြို့နယ်များဖြစ်သည်။ နှစ်စဉ်စိုက်ဧက(၁၅၀၀၀)ခန့် စိုက်ပျိုးကြောင်း သိရှိရသည်။

              အစေ့ထုတ်ပြောင်း(CP)ကို ပြည်တွင်းမွေးမြူရေးလုပ်ငန်းများမှ ကုန်ကြမ်းတိရိစ္ဆာန် အစား အစာအဖြစ်အသုံးပြုပြီး အပင်များကိုလည်း ကျွဲနွားများအတွက် အစာအဖြစ် အသုံးဝင်သည့်အပြင် ပြည်ပပို့ကုန်အဖြစ် ထိုင်း၊ တရုတ်နိုင်ငံများသို့လည်း နှစ်စဉ်တင်ပို့နိုင်၍ ပြည်တွင်းဈေးကွက်ခိုင်မာပြီး အရောင်းအဝယ်ဖြစ်လျက်ရှိကြောင်း သိရှိရသည်။ ပခုက္ကူဈေးကွက်၌လည်း နေ့စဉ်အရောင်းအဝယ်ဖြစ် လျက်ရှိသည်။ ၂၀၂၅ခုနှစ်၊ မတ်လ(ဒုတိယပတ်)တွင် အစေ့ထုတ်ပြောင်း(CP)ဝင်ရောက်မှုအနေဖြင့် နေ့စဉ်တစ်ရက်လျှင် ပိဿာ(၃၀)ဝင်အိတ်(၃၀၀-၅၀၀) တစ်ပတ်အတွင်း အိတ်ရေ(၃၀၀၀)ခန့် အရောင်း အဝယ်ဖြစ်ကြောင်း သိရှိရသည်။ ယခုအချိန်တွင် ဒေသတွင်း သီးနှံပေါ်ချိန်ဖြစ်၍ ဈေးကွက်သို့ ကုန်ဝင်ရောက်မှု များ၍ ဈေးအေးပြီး အရောင်းအဝယ်ဖြစ်ကြောင်း သိရှိရသည်။

              ဈေးနှုန်းအနေဖြင့် သီးနှံပေါ်စ ဖေဖော်ဝါရီလတွင် ဒေသပေါက်ဈေး အစေ့ထုတ်ပြောင်း(CP) တစ်တင်းလျှင် ကျပ်(၂၅၀၀၀-၂၆၀၀၀)ဈေးဖြင့် အရောင်းအဝယ်ဖြစ်ခဲ့ရာမှ မတ်လ(ပထမပတ်)တွင် ပြည်ပဝယ်လိုအားကောင်း၍ တစ်တင်းလျှင် ကျပ်(၂၇၀၀၀)ဈေးဖြင့် အရောင်းအဝယ်ဖြစ်ပြီး မတ်လ (ဒုတိယပတ်)တွင် တစ်တင်းလျှင် ကျပ်(၂၅၀၀၀)ဖြင့် ဈေးပြန်လည်ကျဆင်း အရောင်းအဝယ်ဖြစ်ကြောင်း၊ အစေ့ထုတ်ပြောင်း(CP)ကို ပြည်တွင်းသုံးစွဲမှုနည်းသော်လည်း ပြည်ပပို့ကုန်အဖြစ် အများဆုံးတင်ပို့ပြီး ထိုင်း၊ တရုတ်နိုင်ငံမှ တိရိစ္ဆာန်အစားအစာကုန်ကြမ်းအဖြစ် ဝယ်ယူမှုများ၍ ဈေးကွက်ခိုင်မာမှုရှိကြောင်း သိရှိရသည်။

              စိုက်ပျိုးမှုအနေဖြင့် အစေ့ထုတ်ပြောင်း(CP) တစ်ဧကလျှင် ကုန်ကျစရိတ် ကျပ်(၁၁)သိန်းခန့် ကုန်ကျကြောင်း၊ အထွက်နှုန်းမှာ ပျမ်းမျှတင်း(၈၀)ခန့် ထွက်ရှိ၍ တစ်တင်းလျှင်ပျမ်းမျှဈေး ကျပ် (၂၅၀၀၀) ဖြင့် ရောင်းချရ ပါကတစ်ဧကဝင်ငွေမှာ ကျပ်သိန်း(၂၀)ခန့်ရရှိပြီး အကျိုးအမြတ်အနေဖြင့် ကျပ်(၉)သိန်းခန့်ရရှိကြောင်း၊ ယခင်နှစ်သီးနှံပေါ်ချိန်တွင် တစ်တင်းလျှင်ကျပ်(၂၀၀၀၀)ဈေးဖြင့် ရောင်းချ ရ၍ ယခုနှစ်တွင် သီးနှံပေါ်စ ဒေသပေါက်ဈေး ကျပ် (၂၅၀၀၀-၂၇၀၀၀) ဈေးဖြင့် ရောင်းချရခြင်းကြောင့် ယခင်နှစ်ထက် ဈေးပိုရရှိကြောင်း စိုက်တောင်သူများ အဆင်ပြေလျက်ရှိကြောင်း သိရှိရသည်။

              ပြည်ပပို့ကုန်သီးနှံတစ်မျိုးဖြစ်သည့် အစေ့ထုတ်ပြောင်း(CP)သည် ပြည်တွင်းသုံးစွဲမှုနည်းသော်လည်း ပြည်ပပို့ကုန်သီးနှံတစ်မျိုးဖြစ်၍ ဈေးကွက်ခိုင်မာခြင်းကြောင့် စိုက်တောင်သူများမှ အကျိုးအမြတ်ရရှိ၍ နှစ်စဉ်မပြတ် ဒေသစီးပွားဖြစ် စိုက်ပျိုးကြောင်း သိရှိရပါသည်။

DOCA(မကွေး)