ပြည်တွင်းကုန်သွယ်မှုသတင်း

              ပြည်မြို့ဈေးကွက်အတွင်း ဖေဖော်ဝါရီလဆန်းပိုင်းတွင် မရမ်းသီးများအနည်းငယ် ရောင်းချ နေကြောင်းတွေ့ရပါသည်။ ပေါ်စတွင် တစ်ဆယ်ကျပ်သားလျှင် ၁၀၀၀၀ကျပ်နှုန်းဖြင့် ဈေးသည် တစ်ဦး နှစ်ဦးသာရောင်းချကြောင်း သိရပါသည်။ ဥယျာဉ်မရမ်းသီးဖြစ်ပြီး ပြည်မြို့အနီးတဝိုက်ရှိ ကျေးရွာများရှိ ဉယျာဉ်များတွင် စိုက်ပျိုးသောမရမ်းသီးများဖြစ်ပါသည်။ မရမ်းသီးမှာ အရွယ်အစားသေးလျှင် ဈေးကောင်းရ၍ ယခုဖေဖော်ဝါရီဒုတိယပတ်တွင် အသီးများမှာ အရွယ်အစားကြီးလာပြီး ဈေးနှုန်းမှာလည်းအနည်းငယ်လျော့နည်းလာပါသည်။ ထို့ကြောင့် ယခုအချိန်တွင် မရမ်းသီးဈေးနှုန်းမှာ တစ်ဆယ်ကျပ်သားလျှင် ၃၀၀၀ကျပ်ဖြင့် ရောင်းချကြပါသည်။ ပေါ်ခါစတွင် စားသုံးမှုအနည်းငယ်ရှိသော်လည်း ယခုအချိန်တွင် မရမ်းသီးများ လှိုင်လှိုင်ထွက်ပေါ်လာသောကြောင့် စားသုံးသူများပြားလာကြောင်း သိရပါသည်။ ယခင်နှစ်တွင် မရမ်းသီးဈေးမှာ လှိုင်လှိုင်ပေါ်ချိန်တွင် တစ်ဆယ်သားလျှင် ၅၀၀ကျပ်နှုန်းဖြင့်ရောင်းချကြောင်းသိရပါသည်။ မရမ်းသီးများကို ပြည်မြို့အနီး ရှိကျေးရွာများနှင့် ရွှေတောင်မြို့နယ်အတွင်းကျေးရွာများမှထွက်ရှိသော မရမ်းသီးများကို အောင်လံ၊ မကွေး၊ ရန်ကုန်မြို့ရှိ သီရိမင်္ဂလာဈေးသို့တင်ပို့ရောင်းချကြောင်း သိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်မြို့နယ်၊ မှော်ဇာအုပ်စု၊ မှော်ဇာရွာနှင့် အနီးတဝိုက်ရှိရွာများတွင် ဥယျာဉ်၊ ခြံမြေလုပ်ငန်းဖြင့် စီးပွားရေးလုပ်ကိုင်စားသောက်နေသောကျေးရွာဖြစ်ကာ တောင်သူ အများစုသည် တစ်နှစ်ပတ်လုံး ပြောင်းဖူးများအား စိုက်ပျိုးကြပါသည်။

           ပြောင်းဖူးသည် မိုးရာသီပြောင်းဖူးစိုက်လျှင် ရက်(၉၀)နှင့် နွေရာသီစိုက်ပျိုး လျှင်(၇၅) ရက် အတွင်း ပြောင်းဖူးပေါ်ကြောင်း သိရှိရပါသည်။ တစ်နှစ်လျှင် ပြောင်းဖူးလေးကြိမ်စိုက်ပျိုးပြီးနိုင်ပြီး ပြောင်ဖူးသည်တစ်နှစ်ပတ်လုံး စိုက်ပျိုးခြင်းဖြင့် ဝင်ငွေကောင်းပြီး စီးပွားရေးတွက်ခြေကိုက်ပါသည်။ စိုက်ပျိုးထားပြီးထွက်ရှိလာသော ပြောင်းဖူးများအား တောင်သူများမှ ကုန်စည်ဒိုင်များသို့ သွားရောက်ရောင်းချခြင်းဖြင့်လည်းကောင်း၊ ရန်ကုန်-ပြည်ကားလမ်းဘေးများတွင် ပြောင်းဖူးများ အား ပုံ၍ရောင်းချခြင်း၊ (၅)ဖူးတွဲပါ အစည်းများစည်းပြီးရောင်းချခြင်းနှင့် ပြောင်းဖူး မီးဖုတ်ရောင်းချခြင်း၊ ပြောင်းဖူးပြုတ်သရေစာအဖြစ်ရောင်းချခြင်းများဖြင့် ရောင်းချကြပါသည်။

         အဝါရောင်သကြားပြောင်း၏ အရသာမှာချိုချိုလေးဖြစ်ပြီး ပြုတ်စားစား၊ ကြော်စားစား အရသာလွန်ကောင်းမွန်ပါသဖြင့် သကြားပြောင်းအားလူအများကြိုက်နှစ်သက်ပါသည်။ ဈေးကွက် အတွင်းရောင်းချနေသည့် သကြားပြောင်းဈေးနှုန်းမှာအစိမ်းတစ်ဖူးလျှင် ၈၀၀ကျပ်ဖြင့်လည်းကောင်း၊ ပြောင်းဖူးပြုတ်များအားရောင်းချရာတွင် တစ်ဖူးလျှင် ၁၀၀၀ကျပ်၊ ပြောင်းဖူး(အဖြူ) အစိမ်းတစ်ဖူး လျှင် ၅၀၀ကျပ် ဖြင့်ရောင်းချကြောင်း သိရပါသည်။ ပြောင်းဖူးအစိမ်းများအားခူးဆွတ်ပြီး ကျန်ရှိသောအပင်များကို နွားစာများအဖြစ် တစ်နိုင်တစ်ပိုင်နွားမွေးမြူသူများမှ ဝယ်ယူကြောင်း သိရှိရပါသည်။ ပြောင်းဖူးပင်သည် တစ်ပင်လုံးအသုံးဝင်သည့်အတွက် စိုက်ပျိုးရာတွင် တွက်ခြေကိုက်ပြီး ဝင်ငွေကောင်းမွန်ကြောင်းသိရှိရပါသည်။

DOCA(ပဲခူး)

               ဒန့်သလွန်သီးနှင့် ဒန့်သလွန်ရွက်ကို မြန်မာလူမျိုးများက နှစ်သက်စွာ ချက်ပြုတ်စားသောက် လေ့ရှိကြပါသည်။ ဒန့်သလွန်သီးသည် နူးညံ့ပြီး အရသာရှိသောကြောင့် တန်ဖိုးထားစားသုံးသော လူကြိုက်များသော အသီးအနှံဖြစ်သကဲ့သို့ အရွက်များကိုလည်း ဟင်းချို၊ အတို့အမြှုပ် စသည်ဖြင့် အမျိုးမျိုးချက်ပြုတ် စားကြသောက်ကြပါသည်။ ဒန့်သလွန်သီးကို ချဉ်ရည်ဟင်း ချက်ပြုတ်လေ့ရှိပြီး ဒန့်သလွန်ရွက်ကို ကြော်လို့ တဖုံ၊ ဟင်းခါး ရည်ချက်လို့တမျိုး စားကြပါသည်။ ဒန့်သလွန်သီး အသီးနုများကို ဟင်းချက်စားကြပြီး ရင့်သော အသီးမှ အစေ့များကို မြေပဲကဲ့သို့ စားကြပါတယ်။ ဒန့်သလွန်သီး အစေ့မှ ဆီထုတ်ယူပြီး စားသုံးဆီ ၊ စက်သုံးဆီ အဖြစ် အသုံးပြုကြကြောင်း သိရပါ သည်။ အပင်တစ်ပင်လုံး အသုံးဝင်သော ဒန့်သလွန်ပင်မှာ အသီး ၊ အရွက်၊ အပွင့်တို့က အရသာ လည်းရှိတာကြောင့် အမျိုးမျိုး စီမံချက်ပြုတ် စားသောက်ခြင်းဖြင့် အစာ လည်းဆေး ၊ ဆေးလည်းအစာ ဖြစ်သောအပင်မျိုး ဖြစ်ပါသည်။ ရှည်လျား၍ အစိမ်းရင့်ရောင်ရှိပြီး အက်ကွဲသီး ဖြစ်သည်။ အမြောင်းပါသည်။ အသီးအတွင်းတွင် အစေ့များ တန်းစီလျက် ၅-၇ စေ့ ခန့် ပါဝင် သည်။ အတွင်းသား ထူသည်။ အစေ့၌ အတောင် ပါသည်။ ကဆုန်၊ နယုန်လတွင် သီး၏။ ချဉ်ရည်ဟင်း ပဲချက်စားစား၊ ငါးနဲ့ပဲချက်ချက်၊ မီးကင်ပြီး ဟင်းခါးပဲချက်သောက်သောက်၊ သီးစုံဟင်းထဲတွင် ထည့်၍ စားသုံးကြသဖြင့် အဆင်ပြေပြီး စားကောင်းတဲ့ သီးနှံတစ်ခုလည်းဖြစ်ပါသည်။ ဟင်းရဲ့ ရနံ့ကိုလည်း တိုးစေလို့ တော်တော်များများ ကြိုက်ကြပါသည်။ ယခုနှစ်ပေါ်ချိန်တွင် ဒန့်သလွန် သီးစျေးနှုန်းမှာ အရင် နှစ်ထက် ဈေးကောင်းရရှိကြောင်း သိရပါသည်။  ယခုနှစ် ဒန့်သလွန်သီး များမှာ ရောင်းလိုအား နည်းနေ သောကြောင့် အရင်နှစ်ကထက် စျေးနှုန်းပိုရကြောင်း သိရပါသည်။ ဒန့်သလွန်သီးက ဒီနှစ်အတွင်းမှာ စိုက်တဲ့သူတွေများလာပြီး ရောင်းလိုအားများလာတာကြောင့် စျေးနှုန်းက အရင်နှစ်ကဆို ဒန့်သလွန်သီး တစ်တောင့်ကို ကျပ် ၃၀၀ ဝန်းကျင်လောက်ရပေမယ့် ယခုနှစ်မှာတော့ ဒန့်သလွန်သီးအချော တစ်တောင့် ကို ကျပ် ၅၀၀၊ အလတ်တစ်တောင့်ကို ကျပ် ၄၀၀၊ အသေးတစ်တောင့်လျှင် ကျပ် ၃၀၀မှ ကျပ်၂၀၀ထိရှိပြီး ရာသီပေါ်သီးနှံဖြစ်၍ ဈေးကောင်း ရနေကြေင်း သိရှိရပါသည်။ ရာသီပေါ် ဒန့်ဒလွန်သီးကို ပြည်မြို့ အနီးတဝှိက်ကျေးရွာများနှင့် တစ်ပိုင်တစ်နိုင် စိုက်ပျိုးသူများမှ ပြည်မြို့မစည်ပင်သာယာဈေးကြီးနှင့် အခြားဈေးများသို့ တင်ပို့ရောင်းချကြပြီး ဈေးကောင်းရသည့်အတွက် ရန်ကုန်သို့လည်း တင်ပို့ကြောင်း သိရှိရပါသည်။

DOCA(ပဲခူး)

            တောင်ငူမြို့နယ်လူဦးရေ၏ ၈၀% ခန့်သုံးစွဲလျှက်ရှိသော မော်တော်ဆိုင်ကယ်များအား ဖြန့်ဖြူးရောင်းချလျက်ရှိရာ လူကြိုက်များပြီး အရောင်းသွက်နေသော မော်တော်ဆိုင်ကယ် အမျိုးအစားမှာ NCX 100 နှင့် CLICK 125 များသည် ဈေးကွက်တွင် ဝယ်လိုအားမြင့်တက်လျက် ရှိပါသည်။

          NCX Wave 100 အမျိုးအစားမော်တော်ဆိုင်ကယ်မှာ ယခင်လကတစ်စီးလျှင် ကျပ်သိန်း(40) ခန့်ရှိရာမှ ယခုလတွင် ကျပ်သိန်း(50)ခန့်ထိ မြင့်တက်သွားပြီး CLICK 125 အမျိုးအစားမော်တော် ဆိုင်ကယ်မှာ ယခင်လကတစ်စီးလျှင် ကျပ်သိန်း(60)ရှိခဲ့ရာမှ ယခုလတွင်ကျပ်သိန်း(70)ခန့်ထိ မြင့်တက်သွားခဲ့ကြောင်းသိရှိရပါသည်။ မော်တော်ဆိုင်ကယ်ဈေးနှုန်းများ မြင့်တက်နေသော်လည်း ယခုလအတွင်း အရောင်းအဝယ်အနည်းငယ်အေးလျက်ရှိပြီး တစ်လအတွင်း မော်တော်ဆိုင်ကယ် (20)စီးခန့်သာရောင်းချရကြောင်း “ထက်” မော်တော်ဆိုင်ကယ်အရောင်းဆိုင်ပိုင်ရှင်၏ ပြောကြားချက်အရသိရှိရပါသည်။

DOCA(ပဲခူး)

ယခုဖေဖော်ဝါရီလအတွင်း ထောပတ်သီးဈေးကွက်အခြေအနေ သုံးသပ်ချက်အရ ယခင်လများကဲ့သို့ ပေါပေါများများ တွင်တွင်ကျယ်ကျယ် ရောင်းလိုအားများပြားသည့် အခြေအနေမျိုးမဟုတ်တော့ဘဲ လက်ကျန်အသီးလှလှများကိုသာ ဈေးကောင်းကောင်းဖြင့် ရောင်းချသည့် ထောပတ်လက်ကျန်ကာလ( ထောပတ်တုံးသည့်ကာလ)သို့ရောက်ရှိလာပြီ ဖြစ်ပါသည်။ ထောပတ်သီး ဈေးမြင့်တက်သွားသော်လည်း ဆောင်းအကုန်နွေအကူးကာလ ဖြစ်သောကြောင့်သစ်သီးဖျော်ရည်ဆိုင်များတွင်ထောပတ်သီးများသည်ထွက်ပေါ်လာသည့် စတော်ဘယ်ရီသီးများနှင့်အပြိုင် ရောင်းတန်းဝင်နေဆဲ ဖျော်ရည်တစ်မျိုးဖြစ်ပါသည်။ ထောပတ်သီးဖျော်ရည် တစ်ခွက်လျှင် ဈေးနှုန်း ၄၀၀၀ ကျပ် မှ ၆၀၀၀ ကျပ်အထိ ရောင်းချ လျက်ရှိနေပြီး  ဝယ်ယူသောက်သုံးမှုများပြားလျက်ရှိပါသည်။

ထောပတ်သီးသည် သွေးတွင်းမှ အကျိုးမပြုကိုလက်စထရောများကို ကျဆင်းစေ နိုင်ခြင်း၊ သွေးတွင်းသကြားဓါတ်ထိန်းညှိပေးခြင်း၊  နှလုံးသွေးကြောဆိုင်ရာရောဂါများကို လျှော့ချပေးခြင်း အစရှိသည့် ကျန်းမာရေးအကျိုးကျေးဇူးများကို ရရှိစေနိုင်သည့်အပြင် ထောပတ်သီးအဆီအနှစ်သည် အသားအရေခြောက်သွေ့အက်ကွဲမှုများကိုပျောက်ကင်းစေ သည့်အတွက် အလှကုန်ပစ္စည်းများတွင်လည်းကောင်း၊ ထောပတ်ဆီသည် ဆံသားများ တောက်ပြောင်စေသောကြောင့်ခေါင်းလျှော်ရည်များတွင်လည်းကောင်းထည့်သွင်းအသုံးပြု လျက်ရှိကြပါသည်။

“ တန်ဆေး၊ လွန်ဘေး ”ဆိုသကဲ့သို့ပင် ထောပတ်သီး ကို အလွန်အကျွံ စားသုံးပါက ကိုယ်အလေးချိန်တက်ခြင်း၊ Latex Allergy ရှိသူတွေအနေနဲ့ ဓါတ်မတည့်ခြင်းများ ဖြစ်ပေါ် နိုင်စေကြောင်းလည်း လေ့လာသိရှိရပါသည်။ ယခုအချိန်သည် ထောပတ်သီးရာသီချိန် ကုန်ဆုံးလုနီးပါးဖြစ်နေ၍ အသီးလှလှ၊ဈေးကောင်းရကာလဖြစ်ကြောင်းတင်ပြအပ်ပါသည်။

DOCA(ရှမ်း)