ပြည်တွင်းကုန်သွယ်မှုသတင်း

  စားတော်ပဲအပါအဝင် ပဲမျိုးစုံစိုက်ပျိုးမှု  ၁၀၁၉၄၇၇ ဧကဖြစ်ကြောင်း သိ ရပါ သည်။ မန္တလေးပွဲစား၊ကုန်သည်စက်ပိုင်များမဟာကထိန်တော်အသင်းတွင်  ၂၀၂၅ခုနှစ်  ဇူလိုင်လ စတုတ္ထပတ်အတွင်း ဖြစ်ပေါ်သည့်ပေါက်စျေးမှာ  ၃တင်းဝင်တစ်အိတ်လျင် စားတော်ပဲ (ကနေဒါ)    ၅၂၀၀၀၀ကျပ် နှင့် ၅၃၀၀၀၀ကျပ်၊စားတော်ပဲ(ကျွန်း) ၆၀၀၀၀၀ကျပ်၊တစ်ပိဿာလျှင် စားတော်ပဲ (ကနေဒါ) ၈၇၇၆ ကျပ်နှင့် ၈၉၄၅ ကျပ်၊ စားတော်ပဲ (ကျွန်း) ၁၀၁၂၇ ကျပ်တို့ဖြစ်ကြောင်း သိရပါ သည်။ ယခင်နှစ်ကာလတူတစ်ပိဿာပေါက်စေျးမှာစားတော်ပဲ (ကနေဒါ)၆၆၆၇ ကျပ်၊စားတော်ပဲ (ကျွန်း) ၄၅၅၇ ကျပ်နှင့် ၄၇၂၆ ကျပ်ဖြစ်ပြီး၊ယခု နှင့် ယခင်နှစ် ကာလတူ စျေးနှိုင်းယှဉ်ပါက တစ် ပိဿာလျှင်   စားတော်ပဲ (ကနေဒါ) ၂၂၇၈ ကျပ်နှင့် စားတော်ပဲ (ကျွန်း)၅၄၀၁ ကျပ်တို့စျေးပိုမိုရရှိ ကြောင်း သိရပါသည်။

DOCA(မန္တ‌လေး)

     ကျွန်းလှမြို့နယ်အတွင်းရှိ ကျေးရွာများတွင် စပါး၊ ပဲမျိုးစုံနှင့် စားဖိုဆောင် သီးနှံများကို စိုက်ပျိုး ရောင်းချလျက်ရှိရာ ကင်းမုံသီးကို ကျွန်းလှမြို့ပေါ်ရပ်ကွက်များ နှင့် ကျေးရွာများမှ ကင်းမုံသီးပင်ကို စင်ထိုး ပြီး စိုက်ပျိုးကြသလို ခြံစည်းရိုးပေါ် တင်ပြီး စိုက်ပျိုးကြကြောင်း သိရသည်။

     ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း ကျွန်းလှမြို့ပေါ်ရပ်ကွက်များဖြစ်သည့် ပိတောက်မြိုင် ဈေး၊  သစ်ရာမြိုင်ဈေးများအတွင်း ရောင်းချလျက်ရှိသည့် ကင်းမုံသီး ဈေးနှုန်းများမှာ ကင်းမုံသီး တစ်ပြည်လျှင်(၄၀၀၀)ကျပ် နှင့် ကင်းမုံသီး နို့ဆီ(၁)ဘူးလျှင်(၅၀၀)ကျပ် ဈေးနှုန်းဖြင့်လည်းကောင်း ပဲတောင့်ရှည်သီး ဈေးနှုန်းများမှာ ပဲတောင့်ရှည်သီး(၁၀)စီး တစ်ထုံးလျှင်(၃၀၀၀)ကျပ်၊ ပဲတောင့်ရှည်သီး လက်လီဈေး (၇)တောင့်ပါ၁စီးလျှင်(၃၀၀)ကျပ် ဈေးနှုန်းတို့ဖြင့်လည်းကောင်း ခရမ်းကြွပ်သီး ဈေးနှုန်းအနေဖြင့် ခရမ်းကြွပ်သီး တစ်ပိဿာလျှင်(၄၀၀၀)ကျပ်၊ ခရမ်းကြွပ်သီး(၅၀)ကျပ်သားလျှင်(၂၀၀၀)ကျပ် နှင့် ခရမ်းကြွပ်သီး(၂၅)ကျပ်သားလျှင်(၁၀၀၀)ကျပ် ဈေးနှုန်းတို့ဖြင့် အရောင်းအဝယ် ဖြစ်လျက်ရှိကြောင်း ကုန်စိမ်းဈေးသည်ထံမှ သိရသည်။

DOCA(စစ်ကိုင်း)

   ပြည်တွင်းစားဆီကြိတ်ခွဲမှုနှင့် ပြည်ပသို့တင်ပို့သည့်နှမ်းအား မန္တလေးတိုင်းဒေသကြီး အတွင်း ၂၀၂၄-၂၀၂၅ ခုနှစ်တွင် စိုက်ပျိုးမှု ၁၁၀၅၈၀၁ ဧက၊ရိတ်သိမ်းမှု ၁၀၂၃၁၁၀ ဧက၊ အထွက် နှုန်း ၅.၄၀ တင်းနှင့် အထွက်စုစုပေါင်း ၅၅၂၃၅၀၃ တင်းဖြစ်ကြောင်း သိရပါသည်။  မန္တလေးပွဲစား၊ ကုန်သည်စက်ပိုင်များ မဟာကထိန်တော်အသင်းတွင် ၂၀၂၅ ခုနှစ်ဇူလိုင်လစတုတ္ထပတ်အတွင်း နှမ်းအမျိုးအစားအလိုက်ပေါက်စျေးများမှာ ၃တင်းဝင်အိတ် (၄၅ပိဿာပါ) တစ်အိတ်လျှင် နှမ်းဖြူ (ဂျပန်) ၃၆၀၀၀၀ ကျပ်နှင့် ၃၇၀၀၀၀ ကျပ်၊ နှမ်းဖြူ (ဗမာ) ၃၀၀၀၀ဝ ကျပ်နှင့် ၃၀၅၀၀ဝ ကျပ်၊ နှမ်းညို ၂၇၅၀၀၀ ကျပ်နှင့် ၂၈၅၀၀၀ ကျပ်၊ပန်းနှမ်း  ၃၃၀၀၀၀ ကျပ်၊ တစ်ပိဿာစျေးမှာ နှမ်းဖြူ (ဂျပန်) ၈၀၀၀ ကျပ်နှင့် ၈၂၂၂ ကျပ်၊ နှမ်းဖြူ (ဗမာ)၆၆၆၇ ကျပ်နှင့် ၆၇၇၈ ကျပ်၊ နှမ်းညို ၆၁၁၁ ကျပ်နှင့် ၆၃၃၃ ကျပ်၊ပန်းနှမ်း ၇၃၃၃ ကျပ်စျေးတို့ဖြစ်ပေါ်လျက်ရှိကြောင်း သိရပါသည်။ ယခင်နှစ် ကာလတူ ပေါက်စျေးမှာ တစ်ပိဿာလျှင် နှမ်းဖြူ(ဂျပန်) ၉၇၇၈ ကျပ်နှင့် ၁၀၀၀၀ ကျပ်၊ နှမ်းဖြူ (ရိုးရိုး) ၈၅၅၆ ကျပ်နှင့် ၈၇၇၈ ကျပ်၊နှမ်းညို  ၇၃၃၃ကျပ်နှင့် ၇၅၅၆ ကျပ်၊ ပန်းနှမ်း ၄၆၆၆ ကျပ်တို့ဖြစ်ပေါ်ခဲ့ပြီး၊ ယခုနှစ်နှင့်ယခင်နှစ်ကာလတူစျေးနှိုင်းယှဉ်ပါက နှမ်းစျေးမှာ အနည်းငယ် ကျဆင်းသွားကြောင်း သိရပါသည်။

DOCA(မန္တလေး)

   သော်ကပန်းပင်သည် အပင်ကြီးမျိုးဖြစ်သည်။ အရိပ်လည်းရ ပန်းလည်းလှမို့ တချိန်က အိမ်တိုင်းနီးပါး စိုက်ပျိုးလေ့ရှိသည်။ ယခုအခါ အခြားသောမွှေးသောပန်း လှသောပန်းများသည် အပင်ငယ်ဖြင့် ပွင့်ကြသည်အဖြစ် မြန်သည့်ယိုးဒယားကိုင်းကူး မျိုးများ ပန်းပင်မျိုးစုံထွက်ပေါ်လာသောကြောင့် သော်ကပန်းပင်သည် လူသိနည်းသွားပြီး စိုက်ပျိုးမှု နည်းလာသည်။ အချို့ဆို သော်ကပန်းကို မမြင်ဘူးကြတော့ပေ။ ကျွန်မတို့ငယ်ငယ်ကဆိုလျှင် သော်ကပန်းကို ဆံကေသာထက်တွင် အမြတ်တနိုးပန်ဆင်လေ့ရှိသည်။ သော်ကပန်းသည် အနီရောင်ပန်းအုပ်လိုက်ကလေးများ ပွင့်တတ်သည်။ ပန်းတို့၏ သဘောသည် ရာသီအလိုက် ပွင့်တတ်ကြသလို ပန်း၏အဓိပ္ပာယ်မှာလည်း ပန်းတို့၏ သဘာဝသဘောကို ဆောင်ကြဉ်းလေ့ရှိသည်။ သော်ကပန်း၏ အဓိပ္ပာယ်မှာ ကိုယ်ကိုခွင့်လွှတ်ပါ ဟူ၍ ဖြစ်သည်။ သော်ကပန်းသည် မိုးရာသီမှလွဲ၍ ကျန်လများတွင် ပွင့်သော ရာသီပန်းဖြစ်သည်။ သော်ကပန်းသည် တင့်တယ်ခန့်ညားပြီး ကျက်သရေကို ဆောင်သည့် နတ်ပန်းတမျှလှပသည်။သော်ကပန်းပင်ပွင့်နေကျအချိန်တွင် မပွင့်လျှင် ခြေကျင်းဝတ်ထားသော အပျိုချောချောလေးက အပင်ရင်းကို ဖိနင်းပေးရသည် ဟု ဆိုခဲ့ဖူးကြသည်။ မြန်မာနိုင်ငံ၏ မူရင်းသစ်ပင်ပန်းပင်မျိုး ဖြစ်သည်။ အပူပိုင်းဒေသ ပွင့်သောပန်းများအနက်အပွင့် ပွင့်ပုံ ခန့်ညားထယ်ဝါလှသဖြင့် အလှဘုရင်မ သစ်ပင်အဖြစ် တင်စားကြသည်။သော်က ဟူသော ဝေါဟာရသည် အာသောကမှ ဆင်းသက်လာပြီး စိုးရိမ်ကြောင့်ကြမှုကို ပျောက်တတ်သည် ဟု အဓိပ္ပာယ်ရသည်။ သော်ကပန်းသည် မြန်မာနိုင်ငံ၏ မူရင်းဒေသပန်းမျိုးဖြစ်ပြီး အရိပ်လည်းရ ပန်းလည်းလှမို့ မျိုးတုံးပျောက်ကွယ်မသွားအောင် စိုက်ပျိုးသင့်သောပန်းပင်တစ်မျိုး ဖြစ်သည်။ သော်ကပန်းပျိုးပင်မှာ ဝယ်ယူသူနည်းပါးလျှက်ရှိပြီး တစ်ပင်လျှင် (၃၀၀၀/၅၀၀၀) ကျပ်ဖြင့် ရောင်းချလျှက်ရှိကြောင်း ပန်းပျိုးပင် အရောင်းဆိုင်မှ သိရှိရသည်။

DOCA(မန္တလေး)

   ပန်းအိပင်သည် ရနံ့မကြွယ်သော ပန်းပွင့်သည့် ပန်းအလှပင် ချုံပင်ကြီးမျိုးဖြစ်သည်။ ယခုလို မိုးရာသီတွင် ပန်းအိပန်းများ အဆုပ်လိုက်အခိုင်လိုက် အပွင့်များ အူနေအောင် ပွင့်သောပန်းဖြစ်သည်။ ရနံ့မကြွယ်ပေမယ့်လည်း အနည်းငယ်ရနံ့သင်းသင်းတော့ ရှိပါသည်။ ပန်းပွင့်များ၏ ပွင့်ချပ်တို့သည် ဆပ်တွန့်ကဲ့သို့ အတွန့်တွန့်ကလေးများဖြင့် နုနယ်ပါသည်။ အပူပိုင်းဒေသများတွင် အောင်မြင်ဖြစ်ထွန်းနိုင်သော နှစ်ရှည်ပင်ဖြစ်သည်။ ပန်းအိပင်ကို ပန်းဥယျာဉ်များ အိမ်ခြံဝင်း ၊ ဘုရားကျောင်းကန်များတွင် အလှပန်းပင်အဖြစ် စိုက်ပျိုးလေ့ရှိသည်။ အပင်ရင့်သွားလျှင်  အပွင့်နဲ့တက်၍ များများပွင့်ရန် အပွင့်တုံးပြီး နောက်ပိုင်းအကိုင်းအခက်များကို ခုတ်ပေးရသည်။ မိုးဦးကျကာလ အညွှန့်အတက်အသစ်များထွက်လာပြီး အပွင့်များ အူခဲနေအောင် ပွင့်တတ်ပါသည်။ ပန်းအိပန်းပင်များမှာလည်း သပြေဘူတ၊ ပန်းစက္ကူပန်းများကဲ့သို့ ပင်လုံးကျွတ်အများကြီးပွင့်တတ်ပါသည်။ ပန်းအိပန်းရောင်စုံရှိပြီး ပန်းရောင်၊ အဖြူရောင် ၊အနီရောင်၊ခရမ်းရောင်၊ မရမ်းရောင် စသည်ဖြင့် အရောင်မျိုးစုံရှိပြီး ရောင်းအားအသင့်တင့်ရှိသော ပန်းပင်များဖြစ်သည်။ ပန်းကလေးတွေက သူတို့ရဲ့ အရောင်အဆင်းပေါ် မူတည်၍ လည်း ဂုဏ်တင့်စေသည်။ ပန်းရောင်အိပန်းလေးတွေက နူးညံ့သိမ်မွေ့ခြင်း၊နှစ်လိုဖွယ်ကောင်းခြင်း၊ ချစ်ဖို့ကောင်းခြင်း ကို ဆောင်ကြဉ်းပါသည်။ ပန်းရောင်၏ သဘောသည် စိတ်ကိုနူးညံ့စေပြီး ဒေါသပြေလျော့စေသည်။ အဖြူရောင်ပန်းကလေးများသည် သန့်ရှင်းမှု၊ တည်ငြိမ်မှု၊ သဘောထားဖြူစင်မှုကို ကိုယ်စားပြုသည်။ ပန်းအိပန်းကလေးများသည် ရောင်စုံချစ်ပန်းကလေးများဖြစ်သည့်အတွက်ကြောင့်လည်း စိုက်ပျိုးသင့်သော ပန်းပင်ဖြစ်သည်။ ပန်းအိပျိုးပင်တစ်ပင်လျှင် အရောင်နှင့်အပင် အရွယ်အစားပေါ်မူတည်၍ (၃၀၀၀/၅၀၀၀/၈၀၀၀) ကျပ်ဖြင့် ရောင်းချလျှက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။

DOCA(မန္တလေး)