ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ သာယာဝတီခရိုင်အတွင်း အိမ်ခြံမြေအတွင်း၌ တစ်ပိုင်တစ်နိုင် စိုက်ပျိုးထားရှိသော ကွမ်းသီးပင်များမှာ ယခုအချိန်တွင် ကွမ်းသီးများရင့်မှည့်လာသည့် အချိန်ဖြစ်သည့်အတွက် ကွမ်းသီးမှည့်များကို ခူးဆွတ်ရောင်းချရာ ဈေးကောင်းရလျက်ရှိပါသည်။ ယခင်နှစ်ကွမ်းသီးမှည့်ဈေးမှာ (၁)လုံးလျှင် ၂၀ ကျပ်ခန့်မှ၃၀ကျပ်ခန့်သာ ရရှိလျက် ယခုနှစ်ရာသီ ပေါ်ချိန်မှာတော့ အမှည့်တစ်လုံးလျှင် (၅၀) ကျပ်မှ (၆၀) ကျပ်ခန့်ထိ ဈေးကောင်းရနေပြီး အဆိုပါ ကွမ်းသီးများကို ခွဲ၍နေလှန်းပြီး အခြောက်ခံကာ စိပ်ပြီးကွမ်းသီးများကို ရောင်းချလျှင် ယခင်နှစ်က ကွမ်းသီးခြမ်း(၁)ပိဿာကို (၈၀၀၀) ကျပ်ခန့်မှ (၁၀၀၀၀) ကျပ်ခန့်ထိသာ ရရှိပြီးယခုနှစ်မှာတော့ ကွမ်းသီးခြမ်း(၁)ပိဿာလျှင် (၂၅၀၀၀) ကျပ်မှ (၂၉၀၀၀)ကျပ်ထိ ဈေးကောင်းရရှိပြီး အကျိုးအမြတ် ရရှိနေကြောင်း သိရှိရပါသည်။

DOCA(ပဲခူး)

     ပြည်ခရိုင်အတွင်းရှိ ဒေသများနှင့် ရွှေတောင်မြို့နယ်ဒေသတစ်ဝိုင်အတွင်းတွင် မေမြို့ပန်း (ခ) Aster ပန်းများကို စိုက်ပျိုးကြပါသည်။ ဒေသတွင်းရှိ စိုက်ပျိုးတောင်သူများသည် သီးနှံများကို စိုက်ပျိုးသည့် အပြင် ပန်းပင်များကိုလည်း စိုက်ပျိုးရောင်းချကြပါသည်။

          ဒေသအခေါ် မေမြို့ပန်းအမျိုးအစားများမှာ ကျောက်စိမ်း၊ အက်စတာဟုခေါ်ဝေါ်ကြပါသည်။ ကျောက်စိမ်းမှာ အပင်ရိုးမှာ အစိမ်းရောင်ရှိပြီး အပွင့်မှာ အဖြူရောင်ဖြစ်ပါသည်။ အက်စတာမျိုးမှာ အပင် ရိုးတံမှာ အစိမ်းရောင်ဖြစ်ပြီး အပွင့်မှာ အနီရောင်ဖြစ်ပါသည်။ ပန်းမျိုးပင်များအား မျိုးစေ့ပုလင်းများမှာ ယူ၍ စိုက်ပျိုးခြင်း၊ အပင်ပေါက်ကလေးများအား ဝယ်ယူစိုက်ပျိုးကြပါသည်။

          ပျိုးပန်းဖြင့် ပျိုးလျှင် (၁၅)ရက်ခန့်ကြာလျှင် အပင်ထွက်လာပြီး တစ်လကြာမှ စိုက်ခင်းသို့ စိုက်ပျိုးရပါသည်။ တစ်ဧကလျှင် စိုက်ဘောင် ၄၈၀ ဘောင်စိုက်ပျိုးနိုင်ပါသည်။ပန်းပင်များ အပွင့်မထွက်ခင် ခေါင်နှိမ်ပေးရပါသည်။ ခေါင်နှိမ်ပေးခြင်းအားဖြင့် အပင်မှ အခက်များဘေးသို့ဖြာပြီး အပွင့်များစေပါသည်။

          မေမြို့ပန်းပင်များသည် မိုးရွာသွန်းမှုကို နှစ်သက်သော်လည်း မိုးများလျှင် အပင်များဖြစ်ထွန်းမှု နည်းပါးပါသည်။ မေမြို့ပန်းများအား ဘုရားလှူခြင်း၊ အလှူပွဲ၊ မင်္ဂလာဆောင်ပွဲများတွင် အများဆုံး အသုံးပြုကြသည်။ မေမြို့ပန်းပွင့်များအား အပင်လိုက်နှုတ်ပြီး ဈေးကွက်အတွင်း ရောင်းချကြပါသည်။ အပင်ကြီးထွားမှုနှင့် အပွင့်အရောင်အသွေးပေါ်မူတည်ပြီး ဈေးနှုန်းအနည်းငယ်ကွာခြားကြပါသည်။

          မေမြို့ပန်းများအား တောင်သူများထံမှ ပန်းအဝယ်ဒိုင်များမှ အခင်းပြတ်လာရောက်ဝယ်ယူခြင်း၊ မြို့မဈေး၌ ကိုယ်တိုင်ရောင်းချခြင်း၊ ဖောက်သယ်ပေးခြင်း၊ ရပ်ကွက်အတွင်း လှည့်လည်ရောင်းချကြပါသည်။ မေမြို့ပန်းများအား အခင်းပြတ်ဝယ်လျှင် ပန်းပင် (၁)ပင်လျှင် (၁၇)ကျပ်နှုန်းဖြင့် ဈေးကွက်အတွင်း လက်လီရောင်းချရာတွင် ပန်းပင် (၅)ပင်ပါ တစ်စည်းလျှင် (၁၀၀၀)ကျပ်နှုန်းဖြင့် ဈေးကွက်အတွင်း အရောင်းအဝယ်ဖြစ်နေကြောင်း သိရှိရပါသည်။

DOCA(ပဲခူး)

    ပြည်နှမ်းဈေးကွက်တွင် ယခုအချိန်တွင်ပြည်မြို့နယ်အနေဖြင့် နှမ်းများကုန် သလောက်နဲ သွားပြီး အခြားမြို့နယ်များမှဝင်ရောက်လာသော နှမ်းများဖြင့်သာ ပွဲရုံများတွင် အရောင်းအဝယ်ဖြစ်လျက်ရှိပါသည်။ ပြည်ဈေးကွက်သို့ရောက်ရှိလာသော နှမ်းနီကို မြို့တွင်းဆီစက်သမားများက ဝယ်ယူမှုရှိ၍ တစ်နေ့လျှင် အိတ် (၅၀)ခန့် အရောင်းအဝယ်ဖြစ်လျှက်ရှိပါသည်။ ထိုအတူ နှမ်းနက်နှင့် စမုံနက်နှမ်းကို မန္တလေးဝယ်လက်နှင့် အောင်လံ ဝယ်လက်များက ဝယ်ယူမှုရှိ၍ တစ်နေ့လျှင် အိတ် (၂၀၀)ခန့် အရောင်းအဝယ်ဖြစ်လျက်ရှိပါသည်။ နှမ်းဈေးနှုန်းများအနေဖြင့် ယခုအပတ်ဖြစ်သော စက်တင်ဘာလ တတိယပတ်တွင် နှမ်းနီ(၁)တင်းလျှင် ၁၂၀၀၀၀ကျပ်၊ နှမ်းနက် (၁)တင်းလျှင် ၂၀၀၀၀၀ကျပ်နှင့် စမုံနက်နှမ်း (၁)တင်းလျှင် (၂၃၀၀၀၀)ကျပ်ဖြင့် အရောင်း အဝယ်ဖြစ်လျှက် ရှိပါသည်။ ယခင်အပတ်ကဈေးနှင့်းနှိုင်းယှဉ်လျှင် နှမ်းနီဈေးမှာ ဈေးငြိမ်နေပြီး၊ နှမ်းနက်နှင့် စမုံနက် ဈေးများသာ မြင့်တက်လာခဲ့ပါသည်။

DOCA(ပဲခူး)

      ပြည်မြို့နယ်ရှိ ဈေးများတွင် ဒေသထွက် ပန်းဂေါ်ဖီနှင့် ရှမ်းပြည်နယ်ဒေသထွက် ပန်းဂေါ်ဖီများ ရောင်းချကြ ပါသည်။ ဒေသထွက် ပန်းဂေါ်ဖီကို ပြည်မြို့နယ်ရှိ ကျေးရွာများနှင့် ပြည်မြို့ဒေသတစ်ဝိုက်ရှိ မှော်ဇာ၊ တောင်လုံးညို၊ ပုတီးကုန်းမြို့ရှိ ကျေးရွာများတွင် စိုက်ပျိုးကြပြီး ပြည်မြို့နှင့် ရန်ကုန်မြို့ရှိ ကုန်စိမ်းဈေးကွက်များသို့ တင်ပို့ရောင်းချ ကြပါသည်။ ရှမ်းပြည်ဒေသထွက် ပန်းဂေါ်ဖီများသည် တစ်နှစ်ပတ်လုံးစိုက်ပျိုးပြီး ဈေးကွက်ရောင်းချမှုရှိသော်လည်း ဒေသထွက် ပန်းဂေါ်ဖီများက ဈေးကွက်တွင် စက်တင်ဘာလလောက်မှစ၍ ဈေးကွက်ဝင်ရောက်ရောင်းချမှုရှိပါသည်။ ပန်းဂေါ်ဖီဈေးနှုန်းများမှာ ရှမ်းပန်းဂေါ်ဖီအချော တစ်ပွင့်လျှင် (၂၈၀၀ - ၃၀၀၀)ကျပ်ဖြစ်ပြီး ဒေသထွက်ပန်းဂေါ်ဖီ ဈေးနှုန်းမှာ ပေါ်ဦးပေါ်ဖျားဖြစ်၍ ရှမ်းပြည်ထွက်ပန်းပွင့်ဆိုဒ်လောက် မကြီးပဲ တစ်ပွင့်လျှင် (၂၀၀၀ - ၂၅၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။

DOCA(ပဲခူး)

    ရွှေတောင်မြို့နယ်၊ ကြို့ကုန်းအုပ်စု၊ ကြို့ကုန်းရွာရှိ တောင်သူ ဒေါ်စန်းစန်းအေး၏ မာလကာသီးစိုက်ပျိုး ခြင်းကို (၁၅.၉.၂၀၂၅)နေ့၊ နံနက်(၁၀:၃၀)နာရီတွင် သွားရောက်လေ့လာခဲ့ပါသည်။ မာလကာပင် တစ်ပင်နှင့်တစ်ပင်ကို (၈)ပေခြားစိုက်ပျိုးပြီး စိုက်သည့်အခါ မြေကျင်းတစ်ပေခွဲပတ်လည်အနက် နှစ်ပေတူးပြီး မြေအရင်းနက်ပါက ပိုကောင်း မွန်ပါသည်။ မြေကျင်းကို ပိုးသတ်ထားပြီးမှ အပင်ကို စိုက်ပျိုးရန် စိုက်သည့်အခါ  မြေလုံးကို မကွာစေရန် အသာအယာ ခွဲစိုက်ပါက အောက်ခြေကို ဓါးနှင့်ဖြတ်ပြီး အထုတ်အတိုင်းထည့်ပါ။ မြေကျပ်အောင်လုပ်ပြီးမှ ပလပ်စတစ်ကို အသာ အယာဆွဲထုတ်ရပါသည်။ အမြစ်စွဲစေရန် အပင်အား နို့ဆီဗူး(၂)ခွက် အားဆေးလောင်းပေးရပါသည်။ မာလကာပင်မှ လောက်စလုံးလောက် အသီးများထွက်လာမှ အထုတ် ထုတ်ရပါသည်။(၃)လကြာလျှင် မာလကာသီးများစတင်ခူးဆွတ် ရပြီး ဒိုင်များမှ ခြံထဲသို့လာရောက်၍ တစ်လုံးကို (၂၅၀)ကျပ်ပေးဝယ်ပါသည်။ ခြံရှင်များမှ ဈေးများကို ကိုယ်တိုင်သွား ရောက်ပြီး မာလကာသီးအချောကို တစ်လုံး (၃၅၀)ကျပ်ဖြင့်ရောင်းချပါသည်။ မာလကာသီးအပင်တစ်ပင်ကို (၅၀၀)ကျပ်ဖြင့်ပေးဝယ်ရပြီး အပင်(၁၀၀)စိုက်ပျိုးထားကြောင်းသိရသည်။ မာလကာသီးတစ်ခါခူးလျှင် တစ်ရက်လျှင် အလုံး(၃၀၀)ရရှိကြောင်း သိရသည်။ ကုန်ကျစရိတ်မှာ (၃)သိန်းရှိပြီး နှစ်ရှည်သီးနှံဖြစ်သောကြောင့် အကျိုးအမြတ် များများရရှိကြောင်း သိရှိရပါသည်။

DOCA(ပဲခူး)