ပြည်တွင်းကုန်သွယ်မှုသတင်း

    ဆလပ်ရွက်တွင် ဆလပ်ရွက်အနီရောင်နှင့် ဆလပ်ရွက်အစိမ်းရောင်ဟူ၍ အရောင်အနေဖြင့် နှစ်ရောင်ရှိပြီး၊ ဆလပ်ထုပ်နှင့် ဆလပ်ရွက်ပြန့်ဟူ၍ အမျိုးအစားနှစ်မျိုးရှိကြောင်း သိရှိရပါသည်။  စိုက်ပျိုးရာတွင် ပျိုးဘောင်ပြုလုပ်ပြီး မျိုးစေ့ကိုအပင်ဖောက်ကာ ၆ လက်မ (သို့) ၇ လက်မခန့်ခြား၍ စိုက်ပျိုးကြကြောင်း၊ စိုက်ပျိုးပြီး တစ်လခွဲ နှစ်လခန့်အကြာတွင် စတင်ရောင်းချနိုင်ပြီဖြစ်ကြောင်း သိရှိရပါသည်။

    လက်ကားဈေးအနေဖြင့် တစ်ပင်လျှင် (၅၀၀/- မှ ၈၀၀/-)ကျပ်နှုန်းဖြင့် ရောင်းချလျက် ရှိကြောင်း၊ ဆလပ်ရွက်ထွက်ပေါ်ချိန်တွင် ပွဲစားများမှ အခင်းထဲအရောက် လာရောက်ဝယ်ယူကြသလို၊ တောင်သူများမှလည်း ကုန်စိမ်းပွဲရုံနှင့် ဈေးများသို့ တိုက်ရိုက်တင်ပို့ ရောင်းချလျက်ရှိကြောင်း သိရှိ ရပါသည်။

      ဆလပ်ရွက် စားသုံးခြင်းဖြင့် ရောင်ရမ်းမှုကို သက်သာစေနိုင်ခြင်း၊ သွေးတွင်း အဆီကျ စေခြင်း၊ ဘက်တီးရီးယားများကိုလည်း တိုက်ဖျက်ပေးနိုင်ခြင်း၊ စိတ်ဖိစီးမှုများကို ပြေလျော့စေခြင်း၊ ကိုယ်အလေးချိန်ကို ထိန်းညှိပေးခြင်း၊ အသားအရေလှပစေခြင်း စသည့်အကျိုးကျေးဇူးများ ရရှိစေ ကြောင်း လေ့လာသိရှိရပါသည်။ ဆလပ်ရွက်ကို အသုပ်သုပ်၍စားသုံးကြသလို၊ အတို့အမြှုပ်အဖြစ် လည်းစားသုံးကြကြောင်း၊ အကင်/ Hot potများဖြင့်လည်း တွဲဖက်စားသုံး ကြကြောင်း သိရှိရပါသည်။

DOCA(ရှမ်း)

    ရှမ်းပြည်နယ်တောင်ပိုင်းတွင်စိုက်ပျိုးသောဂေါ်ရခါးသီးများသည် အရည်အသွေးကောင်း၊ အထွက်နှုန်းမြင့်မား သောသီးနှံတစ်မျိုးဖြစ်ပါသည်။ ဂေါ်ရခါးသီနှံဟာစိုက်ပျိုးရလွယ်ကူသောသီနှံဖြစ်၍ စိုက်ခင်းထိန်းသိမ်းမှုလွယ်ကူခြင်း၊ ကုန်ကျစရိတ်နည်းပါးခြင်းရှိကြောင်းသိရှိရပါသည်။ထိုသီးနှံဟာ တောင်တန်းဒေသနှင့် ကိုက်ညီသော သီနှံဖြစ်ပြီး နှစ်ပတ်လည် စီးပွားဖြစ် စိုက်ပျိုးထုတ်လုပ်နိုင်ခြင်းတို့ကြောင့် တိုးချဲ့စိုက်ပျိုးလာကြပါသည်။‌ဂေါ်ရခါးသီးနှံမှာ အသီးဈေးကွက်၊အရွက်အညွှန့်ဈေးကွက်အပေါ်မှီတည်၍ အသီးစား၊အရွက်အညွှန့်စားစိုက်ခင်းအဖြစ်ခွဲခြား စိုက်ပျိုး ကြောင်းသိရှိရပါသည်။ရှမ်းပြည်နယ်တောင်ပိုင်းသည် သဘာဝမြေဆီဩဇာ ကောင်းမွန်မှု၊ ရာသီဥတု ကောင်းမွန်မှု ကြောင့် စိုက်ပျိုးထွက်ရှိသော ဂေါ်ရခါးသီးဟာအရသာ ကောင်းမွန်ပြီး အသီးသန့်အရွယ်အစား ကောင်းမွန်မှုရှိကြောင်း တွေ့ရှိရသည်။

      အထွက်ကောင်းသောသီးနှံဖြစ်၍ ဝယ်လိုအားလည်းမြင့်မားလာမှုကြောင့် ကျယ်ပြန့်လာသော ဈေးကွက်လဲ ပိုင်ဆိုင်ထားပါသည်။စဉ်ဆက်မပြတ်ထွက်ရှိမှုနှင့်ဈေးကွက်လိုအပ်ချက်အရအချိုးညီသီးနှံဖြစ်ကြောင်း သိရှိရပါသည်။ ရှမ်းပြည်နယ်တောင်ပိုင်းထွက် ဂေါ်ရခါးသီးနှံမှာ တွက်ခြေကိုက်၍တိုးချဲ့စိုက်ပျိုးလာမှုတို့ကြောင့် စိုက်ပျိုးရေးနယ်ပယ် တွင် ဒေသထွက်အမှတ်တံဆိပ်ရ သီးနှံဖြစ်လာနိုင်ကြောင်း ခန့်မှန်းသုံးသပ်ရပါသည်။

DOCA(ရှမ်း)

    ရှမ်းပြည်နယ်တောင်ပိုင်း၏အဓိကထွက်ကုန်သီးနှံတစ်မျိုးဖြစ်သော ကြက်သွန်ဖြူသီးနှံမှာ စက်တင်ဘာလ၊အောက်တိုဘာလနှင့်နိုဝင်ဘာလများတွင်ကာလရှည်ကြာဈေးနှုန်းတည်ငြိမ်လျက်ရှိ ပါသည်။ကြက်သွန်ဖြူသီးနှံစိုက်ပျိုးထားဆဲကာလဖြစ်သော်လည်း အဟောင်းလက်ကျန်များထုတ် ရောင်းခြင်း မျိုးစေ့ရောင်းချရသည့်ကာလမဟုတ်ခြင်းနှင့်ယမန်နှစ်ကုန်ထွက်ရှိမှုအားကောင်း၍ကုန် စည်လက်ကျန်ရှိနေသဖြင့်ဈေးတည်ငြိမ်နေသည်ဟုသုံးသပ်ရပါသည်။

      ဈေးငြိမ်ကာလနှင့်ကြုံတွေ့နေရသောကြက်သွန်ဖြူဈေးနှုန်းများမှာ ထူး-၁ တစ်ပိဿာ၂၅၀၀ ကျပ်၊ထူး-၂ တစ်ပိဿာ၃၅၀၀ကျပ်၊ထူး-၃ တစ်ပိဿာ၄၅၀၀ကျပ်၊ထူး-၄ တစ်ပိဿာ၅၅၀၀/၆၀၀၀ ကျပ်၊ထူး-၅ တစ်ပိဿာ၆၅၀၀ကျပ်နှင့်ဥတစ်လုံးတစ်ပိဿာ၁၅၀၀၀၊၂၀၀၀၀၊၂၅၀၀၀ကျပ်များဖြစ် သည်။

     ကြက်သွန်ဖြူအသစ်များထွက်ပေါ်ချိန်ဖြစ်သည့် မတ်လ သို့မရောက်မီ ကြားကာလ(၄)လခန့် တွင်သီးနှံဈေးနှုန်း အနည်းငယ်တက်လာနိုင်ကြောင်းကို အဟောင်းလက်ကျန်နည်းပါးလာခြင်း၊ ပွင့်လင်းရာသီ ဈေးကွက်နှင့်တိုက်ဆိုင်ခြင်းတို့ရှိပါသည်။ ဆေးဝါးအဖြစ်သုံးစွဲခြင်း၊ အကြော်လုပ်ငန်း များ၏ ဝယ်လိုအားမြင့်တက်လာခြင်းများရှိနိုင်သဖြင့် အနည်းအငယ်ဈေးနှုန်းဈေးကွက် လှုပ်ခတ်လာ နိုင်ကြောင်း လေ့လာသုံးသပ်တင်ပြအပ်ပါသည်။

DOCA(ရှမ်း)

      တနင်္သာရီတိုင်းဒေသကြီး၊ မြိတ်မြို့ပေါ်တွင် ကုန်စိမ်းဈေးကြီးနှင့် အခြားသောဈေးများတွင် စိမ်းစားဥများကို အများအပြားရောင်းချနေကြောင်း တွေ့ရှိရပါသည်။ စိမ်းစားဥသည် ချို အေးသောအရသာရှိပြီး အရည်ရွမ်းပြီး စားလို့ကောင်းသော အသီးတစ်မျိုးလည်း ဖြစ်သည်။ စိမ်း စားဥသည် လူကြီး/လူငယ်မ‌‌ရွေး  ကြိုက်နှစ်သက်သော အသီးတစ်မျိုးဖြစ်သည်။ စိမ်းစားဥသည် ရေဓာတ်ကြွယ်ဝပြီး လူတို့၏ ကျန်းမာရေးကို အကျိုးပြုစေသည်။ သဘာဝအရ စိမ်းစားဥသည် မြေကြီးထဲတွင် ဥဥလေ့ရှိသော အသီးဖြစ်သဖြင့် ကပ်ပါးပိုးမွှားများ အန္တရာယ်မှ ကင်းဝေးအောင် အခွံနွာရုံသာမက ရေစင်စင်ဆေးပြီးမှ စားသုံးသင့်သည်။ ယခုလိုဆောင်းဥတုတွင် ခန္ဓာကိုယ်တွင်း ကျန်းမာရေးကင်းဝေးအောင် ရေဓာတ်ကြွယ်ဝကာ အေးမြသော စိမ်းစားဥကို စားပေးသင့်ပါသည်။

     ၂၀၂၅ခုနှစ်၊ နိုဝင်ဘာလတတိယပတ်တွင် မြိတ်မြို့ပေါ်တွင် ရောင်းချနေသော စိမ်းစားဥ ဈေးနှုန်းမှာ တစ်ပိဿာလျှင် (၅၀၀၀)ကျပ်ရှိ ကြောင်း သိရှိရပါသည်။

DOCA(တနင်္ဿာရီ)

          ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့နယ်တွင် ၂၀၂၅ ခုနှစ်၊ အောက်တိုဘာ လကုန်ပိုင်းက အစိုဓာတ် ၂၂%၂၅% စပါးတင်း (၁၀၀)လျှင် ၁၀၄၈၀၀၀ ကျပ်၊ ဆန်တစ်အိတ်လျှင် ၄၆၀၀၀ကျပ်ဈေးဖြင့် အရောင်းအဝယ်ဖြစ်ခဲ့ပြီး ယခုနိုဝင်ဘာလ လယ်တွင် ၂၀% ၂၂% စပါးတင်း ၁၀၀ လျှင် ၁၁၀၄၀၀၀ ကျပ်၊ဆန်တစ်အိတ်လျှင် ၄၈၀၀၀ ကျပ်ဈေးဖြင့် အရောင်းအဝယ်ဖြစ်နေလျက်ရှိပါ သည်။ ယခင်လထက်စပါးဈေး၊ ဆန်ဈေးအနည်းငယ် မြင့်တက်ခဲ့ကြောင်း သတင်းရရှိပါသည်။ စိုက်ပျိုးသည့်စပါးမျိုးများအနက် မနောသုခ၊ ဆင်းသုခ၊ ရတနာတိုး၊ ကရင်မ စပါးမျိုးများမှာ အရောင်းအဝယ် ပိုသွက်လျက်ရှိပါကြောင်း သိရှိရပါသည်။

DOCA(ပဲခူး)