ပြည်တွင်းကုန်သွယ်မှုသတင်း

                 မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက် ဒေသတစ်ခုဖြစ်သော ကြောင့် သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ဈေးကွက်ဝယ်လိုအားရှိသော ငရုတ်သီးနှံကိုလည်း စီးပွားဖြစ်တိုးချဲ့ စိုက်ပျိုးလာကြပါသည် ။ ကျောက်ဆည်ခရိုင်အတွင်းတွင် ငရုတ် စိုက်ပျိုးမှုအနေဖြင့် ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၁၃၁၁)ဧက ၊ စဉ့်ကိုင်မြို့နယ်တွင်(၁၀၀၃)ဧက ၊ မြစ်သားမြို့နယ်တွင် (၂၆၇၆)ဧက ၊ စုစုပေါင်း(၄၉၉၀)ဧက စိုက်ပျိုးထားရှိပြီး ဧကအားလုံး ရိတ်သိမ်းပြီးဖြစ်ကြောင်း သက်ဆိုင်ရာဌာန၏ စာရင်းများအရ သိရှိရ ပါသည် ။ အများဆုံးစိုက်ပျိုးသော မျိုးများမှာ သာမို ၊ဒီမွန် နှင့် (၆၉၂)မျိုးများဖြစ်ပြီး အထွက်နှုန်း ကောင်းသော(၆၉၂)မျိုးကိုပိုမိုစိုက်ပျိုးကြကြောင်း၊ ငရုတ်ဆောင်းကို နိုဝင်ဘာလ နှင့် ဒီဇင်ဘာလ များတွင်စတင်စိုက်ပျိုးခဲ့ကြောင်း ၊ ငရုတ် (၁)ဧက ကုန်ကျစရိတ်အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း (၁၅)သိန်းကျပ်ခန့် ကုန်ကျကြောင်း  ၊ (၁)ဧက အထွက်နှုန်းအနေဖြင့် ငရုတ်အခြောက် ပိဿာ(၃၀၀-၃၅၀)ခန့်ထွက်ရှိကြောင်း၊ စျေးနှုန်းအနေဖြင့် ငရုတ်သီး အညှာပါ အခြောက်(၁)ပိဿာလျှင် (၁၃၀၀၀/-)ကျပ် ၊ ငရုတ်သီး အညှာခြွေ(၁)ပိဿာလျှင်(၂၁၀၀၀/-)ကျပ် စျေးနှုန်းများဖြင့်အရောင်းအဝယ်ဖြစ်နေကြောင်း၊(၁)ဧက အကျိုးအမြတ်အနေဖြင့် သိန်း(၂၀)ဝန်းကျင် ခန့်မြတ်ကြောင်း ၊ ငရုတ်စိုက် တောင်သူများမှ ပွဲရုံများသို့ တိုက်ရိုက် ရောင်းချကြကြောင်း ၊ ပွဲရုံများမှတဆင့် မန္တလေး၊ရန်ကုန်မြို့များသို့တင်ပို့ရောင်းချလျက်ရှိကြောင်း ပွဲရုံများမှသိရှိရပါသည်။ 

DOCA(မန္တလေး)

                 မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ၄င်းသီးနှံများအနက် ပဲတီစိမ်း သီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုး လျက်ရှိပါသည်။ ကျောက်ဆည်ခရိုင်အတွင်းတွင် ပဲတီစိမ်း(မိုး) စိုက်ပျိုးမှုအနေဖြင့် ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၁၇၁၄)ဧက၊ မြစ်သားမြို့နယ်တွင် (၆၃၇)ဧက ၊ စုစုပေါင်း (၂၃၅၁)ဧကစိုက်ပျိုးထားရှိကြောင်း သက်ဆိုင်ရာဌာန၏စာရင်းများအရသိရှိရပါသည်။ပဲတီစိမ်း(မိုး)ကို မတ်လ နှင့် ဧပြီလများတွင် စတင်စိုက်ပျိုးပြီး ယခုအချိန်တွင် မိုးရွာသွန်းမှုကောင်းသောကြောင့် ပဲတီစိမ်းများ ကောင်းမွန်စွာအောင်မြင်ဖြစ်ထွန်းလျက်ရှိပြီး အပွင့်များစတင်ဖူးပွင့်နေပြီဖြစ်ကြောင်း၊ ပဲတီစိမ်းစိုက်ပျိုးမှုမျိုးအနေဖြင့် ကျောက်စိမ်းမျိုနှင့်ရေးဆင်း-၁၁ မျိုးများကိုသာ အများဆုံးစိုက်ပျိုးကြကြောင်း ၊ (၁)ဧက မျိုးစေ့(၅-၆) ပြည်ခန့် ကုန်ကျကြောင်း ၊ ပဲတီစိမ်းမျိုး စျေးနှုန်းအနေဖြင့် (၁)ပြည်လျှင်(၇၀၀၀/-)ကျပ်စျေးနှုန်းဖြင့် ဝယ်ယူစိုက်ပျိုးရကြောင်း၊ ပဲတီစိမ်း စိုက်ပျိုးမှုကုန်ကျစရိတ် အနေဖြင့် မျိုး၊သွင်းအားစု၊ လုပ်သားခ အပါအဝင် စုစုပေါင်း (၅၀၀၀၀၀/-)ကျပ် ခန့်ကုန်ကျကြောင်း ၊ အများဆုံး စိုက်ပျိုးသော ရွာများမှာ ဖျောက်ဆိပ်ပင်၊ ဓါတ်တော်၊ ရေပြားတောရွာများတွင် အများဆုံး စိုက်ပျိုးကြကြောင်း ၊ ပဲတီစိမ်း စိုက်ပျိုးမှုအနေဖြင့် ဘောင်ကြောင်းပေး အတန်းလိုက်စနစ်ဖြင့် အစေ့ချစိုက်ပျိုးကြကြောင်း၊ ပဲတီစိမ်း စျေးနှုန်းအနေဖြင့် တစ်တင်းလျှင်(၁၂၀၀၀၀/-)ကျပ်‌စျေးနှုန်း များဖြင့် ရောင်းဝယ်လျက်ရှိပါသည် ။ တောင်သူများမှ သီးနှံထွက်ပေါ်ချိန်တွင် နီးစပ်ရာ ကျောက်ဆည်မြို့ပေါ်ရှိ ပွဲရုံများသို့ တိုက်ရိုက် သွားရောက်ရောင်းချကြကြောင်း ၊ ပွဲရုံများမှတဆင့် ရန်ကုန် ၊ မန္တ‌လေးမြို့များသို့ တင်ပို့ရောင်းချ လျက်ရှိပါသည်။ပဲတီစိမ်းနှမ်းသီးနှံ ထွက်ပေါ်ချိန်တွင် အထွက်နှုန်းနှင့်စျေးနှုန်းများ ကောင်းမွန်ပါက တောင်သူများ အကျိုး အမြတ် ပိုမိုဖြစ်ထွန်းနိုင်မည် ဖြစ်ကြောင်း ၊ ပဲတီစိမ်းစိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

              မိတ္ထီလာဈေးကွက်အတွင်း ဆီထွက်သီးနှံဈေးနှုန်းများမှာ သီးနှံစိုက်ပျိုးရာသီချိန်နီးသဖြင့် ပွဲရုံများ ၌ အရောင်းအဝယ်ဖြစ်လျက်ရှိကြောင်းသိရပါသည်။

          ယခုဧပြီလစတုတ္ထပတ်တွင် နှမ်းညိုတစ်တင်းလျှင်(၁၂၅၀၀၀) ကျပ်၊ နှမ်းဖြူ တစ်တင်းလျှင် (၁၃၀၀၀၀)ကျပ်၊နှမ်းဆီတစ်ပိဿာလျှင် (၁၆၅၀၀-၂၀၀၀၀)ကျပ်၊ နှမ်းဖတ်တစ်ပိဿာလျှင် (၅၄၀၀) ကျပ်ဖြင့်အရောင်းအဝယ်ဖြစ်လျက်ရှိကြောင်း၊ ယခင်လနှင့်ကာလတူနှိုင်းယှဉ်လျှင် နှမ်းဖတ်ဈေးနှုန်းမှာ တည်ငြိမ်နေပြီး နှမ်းညိုတစ်တင်းလျှင် (၁၀၀၀၀)ကျပ်၊ နှမ်းဖြူတစ်တင်းလျှင်(၁၀၀၀၀)ကျပ်၊ နှမ်းဆီ တစ်ပိဿာလျှင်(၂၀၀၀)ကျပ်ခန့်မြင့်တက်လာကြောင်း၊ ဈေးနှုန်းမြှင့်တက်လာရခြင်းမှာ ကုန်ကြမ်း လက်ကျန်နည်းလာခြင်း၊သယ်ယူစရိတ်မြင့်မားလာခြင်းကြောင့်ဖြစ်သည်ဟုသိရပါသည်။

           ဈေးကွက်အတွင်း၌မြေပဲဆီဆန်တစ်ပိဿာလျှင် (၁၁၀၀၀)ကျပ်၊ မြေပဲဆီတစ်ပိဿာလျှင် (၂၀၀၀၀-၂၁၀၀၀) ကျပ်၊ ပဲဖတ်တစ်ပိဿာလျှင် (၇၉၀၀)ကျပ်ဈေးဖြင့် အရောင်းအဝယ်ဖြစ်လျက်ရှိ ကြောင်း ယခင်လနှင့်ကာလတူနှိုင်းယှဉ်လျှင်  ဆီဆန်တစ်ပိဿာလျှင် (၅၀၀)ကျပ်၊ မြေပဲဆီတစ်ပိဿာ လျှင် (၁၀၀၀) ကျပ်ဈေးနှုန်းမြင့်တက်လာပြီး ပဲဖတ် ဈေးတည်ငြိမ်နေကြောင်းသိရပါသည်။

            ဈေးကွက်အတွင်း၌ နေကြာစေ့တစ်ပိဿာလျှင်  (၈၀၀၀)ကျပ်ရှိပြီး၊ နေကြာဆီ တစ်ပိဿာလျှင် (၂၃၀၀၀)ကျပ်၊ နေကြာဖတ်တစ်ပိဿာလျှင် (၃၈၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ၊ယခင်လနှင့်ကာလတူနှိုင်းယှဉ်လျှင် နေကြာစေ့တစ်ပိဿာလျှင်  (၂၀၀)ကျပ်၊ နေကြာဆီ တစ်ပိဿာ လျှင် (၁၀၀၀)ကျပ် ခန့်ဈေးနှုန်းမြင့်တက်လာပြီး နေကြာဖတ်တစ်ပိဿာလျှင် (၂၀၀)ကျပ်ခန့်ဈေးနှုန်း ကျဆင်းလာကြောင်း သိရှိရပါသည်။

DOCA(မန္တလေး)

                   မြင်းခြံမြို့သည် မြန်မာနိူင်ငံအလယ်ပိုင်းတွင် တည်ရှိပြီးမိုးနည်းရပ်ဝန်းဒေသ ဖြစ်သော် လည်းဧရာဝတီမြစ်ကမ်းဘေးတွင်တည်ရှိ၍ ဆည်မြောင်းများအသင့်အတင့်ရှိပြီး၊   မိုးကောင်းသောက် လယ်ယာမြေများတွင် ရာသီအလိုက်သီးနှံများဖြစ်သော ပဲစဉ်းငုံ ၊ကုလားပဲ၊ နှမ်း၊ မြေပဲ၊ အစေ့ထုတ်ပြောင်းနှင့် ကြက်သွန်နီသီးနှံများ စိုက်ပျိုးကြပါသည်။ မြင်းခြံမြို့ခရိုင်တွင် ကြက်သွန်နီကို နှစ်ရာသီ စိုက်ပျိုးထားရှိပြီး ဆောင်းကြက်သွန်နီကိုအများဆုံးစိုက်ပျိုးကြသည်။ ယခုအချိန်တွင် မိုးကြက်သွန်နီများ ရာသီကုန်၍ ဈေးကွက်မှ ထွက်ခွာချိန်တွင် ဆောင်းကြက်သွန်နီများ မတ်လ ဒုတိယပတ်အတွင်း စတင်ရိပ်သိမ်းကာ ဧပြီလပထမပတ်မှစ၍ ဈေးကွက်အတွင်း လှိုင်လှိုင်ထွက် ပေါ်ခဲ့သည်။  ၂၀၂၆ခုနှစ် ၊ မေလ ဒုတိယပတ်၌ ဆောင်းကြက်သွန်နီ (ခေါ်) နွေကြက်သွန်နီကြီးစ တစ်ပိဿာလျှင် (၂၀၀၀)ကျပ်မှ(၂၅၀၀)ကျပ်၊ အလတ်စတစ်ပိဿာလျှင် (၁၅၀၀)ကျပ်မှ (၁၉၀၀) ကျပ်၊ အသေးစ တစ်ပိဿာလျှင် (၁၀၀၀)ကျပ်မှ(၁၂၀၀) ကျပ်နှုန်းများဖြင့် ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် ကြက်သွန်နီအစစုံတစ်ပိဿာလျှင် ၃၀၀ ကျပ်မှ ၇၀၀ကျပ်အထိ ဈေးနှုန်းမြင့်တက်လာကြောင်း၊ မိုးကြက်သွန်နီများကုန်ဆုံးချိန်ဖြစ်၍  နွေကြက်သွန်နီများသည် အရည်အသွေးကောင်းပြီးတာရှည်ခံသဖြင့် သိုလှောင်ခံသောကြောင့် ဝယ်လိုအားများသဖြင့်  ဈေးနှုန်း မြင့်တက်လာခြင်းဖြစ်ကြောင်း၊ စိုက်ပျိုးထွက်ရှိရာ ကျေးရွာများမှ နေ့စဉ်ကုန်ချိန် ပိဿာ(၅၀၀၀၀)မှ (၇၀၀၀၀)ပိဿာခန့်ကို မြို့ပေါ်ရှိ ပွဲရုံများသို့လာရောက် ရောင်းချလေ့ရှိသည်။  ကြက်သွန်နီ အရွယ်အစား၊ အရည်အသွေးပေါ်မူတည်၍ ဈေးနှုန်းများကွာခြားလျက်ရှိသည်။ အဓိကဈေးကွက် အနေဖြင့် ရန်ကုန်ဘုရင့်နောင်ရှိပွဲရုံ များသို့ အများဆုံးတင်ပို့ပြီး၊ မန္တလေးမြို့၊ နေပြည်တော်၊ မော်လမြိုင်မြို့၊ တောင်ကြီးမြို့နှင့် အောင်ပန်းမြို့ များသို့ အပါတ်စဉ်တင်ပို့ လျှက်ရှိကြောင်း၊ ယခုတစ်ပါတ်တွင် ကုန်ချိန်ပိဿာ(၂၉၁၄၉၇)ပိဿာ၊ တန်ချိန်အားဖြင့် (၄၇၆)တန် တင်ပို့ရောင်းချ ကြောင်း၊ ယခင်တစ်ပတ်ထက် ယခုတစ်ပတ်တွင် နွေကြက်သွန်နီ ကုန်ချိန်ပိဿာ (၂၃၈၈၃)၊ တန်ချိန်(၃၉)တန်ပိုမိုတင်ပို့ခဲ့သည်။

DOCA(မန္တလေး)

             ဧရာဝတီတိုင်းဒေသကြီး၊ မြန်အောင်ခရိုင်တွင် ၂၀၂၅-၂၀၂၆ ဘဏ္ဍာနှစ် နွေစပါးစိုက်ပျိုးမှုမှာ    မြန်အောင်မြို့နယ်တွင် ၁၀၁၇၈ ဧက၊ ကြံခင်းမြို့နယ်တွင် ၁၉၉၅ ဧက၊ အင်္ဂပူမြို့နယ်တွင် ၂၆၂၈၆ ဧကနှင့် စုစုပေါင်း ၃၈၄၅၉ ဧက စိုက်ပျိုးခဲ့ပါသည်။ နွေစပါးစိုက် တောင်သူများအနေဖြင့် မြန်အောင်ခရိုင်တွင် နန်ကသူဆည်၊ ကညင်ဆည်၊ မမြဆည်တို့မှ ဆည်ရေရရှိပြီး အောင်ရေအတွက် လိုအပ်ပါက စက်ရေတွင်းဖြင့် ရေတင်စိုက်ပျိုးကြပါသည်။ ဆင်းသုခ၊ ပခန်းရွှေဝါ၊ ၊ GW 11 နှင့်ထိုင်း ရက် ၉၀၊ ဆာဖိုးသာ(၁)နှင့် ဗီယက်နမ်-၅၄၅၁ စပါးမျိုးများကို အများဆုံးစိုက်ပျိုး‌ကြောင်း သိရသည်။

       ဧပြီလ တတိယသီတင်းပတ်တွင် စတင်ရိတ်သိမ်းကြပြီး တစ်ဧကလျှင် ပျမ်းမျှ တင်း ၁၁၀ မှ ၁၂၀ ကြားထွက်ရှိသည့်အတွက် နွေစပါးစိုက်တောင်သူများ တွက်ခြေကိုက်လျက်ရှိပါသည်။ အစိုဓာတ် ၂၃ ရာနှုန်းဝန်းကျင်ရှိ နွေစပါး ၅၁ ပေါင် တင်း (၁၀၀)လျှင် ကွင်းအထိုင်ဈေး ၁၃သိန်း ကျပ်ခန့်ရှိပြီး၊ ဆန်စက်အရောက်ဈေးမှာ ၁၅ သိန်းကျပ် ဝန်းကျင်ဖြင့် အရောင်းအဝယ်ဖြစ်လျက်ရှိပါသည်။ ၂၀၂၅-၂၀၂၆ ဘဏ္ဍာနှစ် နွေစပါး စိုက်ပျိုးခြင်းအတွက် မျိုး၊ထွန်ယက်ခ၊ စိုက်ခ၊ သွင်းအားစု၊ ရေတင်ခ၊ ရိတ်ခြွေခအပါအဝင် တစ်ဧက စုစုပေါင်း ကုန်ကျ စရိတ်မှာ ကျပ် ကိုးသိန်း ခန့်ရှိပါသည်။ တစ်ဧက ပျမ်းမျှ ထွက်နှုန်းတင်း ၁၁၀ ကို စက်အရောက် စပါးတင်း (၁၀၀)ဈေး ၁၅ သိန်းကျပ်နှင့်တွက်ပါက ၁၆ သိန်း ၅သောင်းကျပ်ခန့် ရရှိသည့်အတွက် ကုန်ကျစရိတ်နှုတ်ပြီး တစ်ဧကလျှင် ၇သိန်း ၅သောင်း ကျပ်ခန့် အကျိုးအမြတ်ရလျက်ရှိကြောင်း သိရသည်။

          နွေစပါးသည် လိုအပ်သော ရေ Level ကို ထိန်းညှိနိုင်ခြင်း၊ သွင်းအားစုကို စနစ်တကျ ထည့်သွင်းခြင်း၊ နေရောင်ခြည်လုံလောက်စွာရရှိခြင်းတို့ကြောင့် တစ်ဧက တင်း (၁၀၀) ကျော်ထွက်ရှိနိုင်သည့်အတွက် တောင်သူတို့ တွက်ချေကိုက် အကျိုးရှိသော စိုက်ပျိုးမှုဖြစ်ကြောင်းလည်း သိရှိရ ပါသည်။

DOCA(ဧရာဝတီ)