ပြည်တွင်းကုန်သွယ်မှုသတင်း

   မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ဆီထွက်သီးနှံ တစ်မျိုးဖြစ်သော နှမ်းသီးနှံကို ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၄၆၀၇)ဧက၊ စဉ့်ကိုင်မြို့နယ်တွင်(၃၅၆)ဧက ၊ မြစ်သားမြို့နယ်တွင် (၄၈၀၀)ဧက ၊ စုစုပေါင်း(၉၇၆၃)ဧက စိုက်ပျိုးထားရှိကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ ဆောင်းနှမ်း(၁)ဧက စိုက်ပျိုးလျှင် မျိုးအနေဖြင့်(၂-၃)ပြည် စိုက်ပျိုးရကြောင်း (၁)ပြည်လျှင်(၈၀၀၀/-) ကျပ်စျေးနှုန်းဖြင့် ဝယ်ယူစိုက်ပျိုးရကြောင်း ၊ ဆောင်းနှမ်းစိုက်ပျိုးမှု (၁)ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခအပါအဝင် စုစုပေါင်း (၄၅၀၀၀၀/-)ကျပ်ခန့်ကုန်ကျကြောင်း ၊ စိုက်ပျိုးသော မျိုးများမှာ နှမ်းဖြူ၊ နှမ်းညို နှင့် နှမ်းနက်မျိုးများကို အများဆုံးစိုက်ပျိုးကြကြောင်း ၊  ယခုအချိန်တွင် နှမ်းစျေးနှုန်းအနေဖြင့် နှမ်းဖြူတစ်တင်းလျှင် (၉၃၀၀၀/-) ကျပ် ၊ နှမ်းညိုတစ်တင်းလျှင်(၉၂၀၀၀/-)ကျပ် ၊ နှမ်းနက်တစ်တင်းလျှင်(၉၂၀၀၀/-)ကျပ် စျေးနှုန်းများဖြင့်  အရောင်း အဝယ်ဖြစ်နေကြောင်း ၊ ပွဲရုံများမှတဆင့် ရန်ကုန် ၊ မန္တလေးမြို့များသို့ တင်ပို့ရောင်းချလျက်ရှိကြောင်း သိရှိရပါသည်။

DOCA(မန္တလေး)

      ဝါးပင်သည် သစ်ပင်မျိုးနွယ်ဝင် အပင်မျိုးဖြစ်၍ ဝါးသည် မြန်မာနိုင်ငံအတွင်း နေရာ အနှံ့အပြားတွေ့ရသော အရေးပါသည့် အပင်တစ်မျိုးဖြစ်သည်။ ကြီးထွားနှုန်းမြန်ပြီး သဘာဝ ပတ်ဝန်းကျင်နှင့်ကိုက်ညီစွာ ကြီးထွားနိုင်သောကြောင့် လူသားဘဝတွင် အကျိုးကျေးဇူး များစွာ ပေးစွမ်းနိုင်သည်။ ဝါးကို အိမ်/အဆောက်အဦးဆောက်လုပ်ရာတွင် အသုံးများပြီး တံတားများ၊ အမိုး/အကာအရံများ ပြုလုပ်ရာတွင်လည်း အသုံးဝင်သည်။ ထို့အပြင် ဝါးဖြင့် ပရိဘောဂများ၊ တောင်းခြင်းများ၊ ခြံစည်းရိုးများပြုလုပ်နိုင်သည်။ ကျေးလက်ဒေသများတွင် ဝါးသည် နေ့စဥ် အသုံးအဆောင်ပစ္စည်းအဖြစ် အရေးပါလှပါသည်။

          မွန်ပြည်နယ်၊ ဘီးလင်းမြို့နယ်အတွင်းရှိ အလူးလေးကျေးရွာ၊ အလူးကြီးကျေးရွာ၊ ပိုင်ဒဝယ်ကျေးရွာများသည် ဝါးအများဆုံးထွက်ရှိသော ဒေသများဖြစ်ကြသည်။ ထို‌ဒေသ များမှ ထွက်ရှိသော ဝါးများသည်‌ ‌‌ဒေသခံပြည်သူများ၏ နေ့စဥ်အသုံးအဆောင်နှင့် အခြေခံ စီးပွားရေးလုပ်ငန်းများအတွက် အရေးပါသော သဘာဝအရင်းအမြစ်တစ်ရပ်ဖြစ်သည်။ ထို‌ဒေသတွင်းထွက်ရှိသော ဝါးများတွင် ဝါးပိုးဝါးနှင့် သိုက်ဝါးကို အများဆုံးတွေ့ရသည်။ ထိုဒေသရှိ ဝါးပင်များသည် သဘာဝအလျောက် ပေါက်နေသော အပင်များအများဆုံးဖြစ်ပြီး ထိုဝါးပင်အား မျိုးတုံးပျောက်ကွက်မသွားစေရန် ဒေသခံများမှ ဆက်လက်ထိန်သိမ်းခြင်း၊ ပြုပြင်စိုက်ပျိုးခြင်းတို့ပြုလုပ်ကြသည်။ ဝါးပင်များသည် မိုးရာသီတွင် မျှစ်စို့ငုတ်လေးများ စတင်ထွက်ရှိပြီး သက်တမ်းခုနစ်ခန့်တွင် အသုံးပြုရန် သင့်တော်သည့် ဝါးရင့်များဖြစ်လာပြီး ဒေသခံများမှ ခုတ်ယူ၍ အသုံးပြုခြင်း၊ ရောင်းချခြင်းများ ပြုလုပ်ကြသည်။

          ဝါးပိုးဝါးပင်သည် လုံးပတ်ကြီးမား၍ ခိုင်ခန့်သောကြောင့် အဆောက်အဦးများ ဆောက်လုပ်ရာတွင် အဓိကတိုင်အဖြစ် အသုံးများသည်။ ၎င်း၏ အချင်းမှာ ၆လက်မ/ ၇လက်မ ဝန်းကျင်ခန့်ရှိသည်။ သိုက်ဝါးမှာ သေးငယ်သော်လည်း ခိုင်ခန့်မာကြောပြီး အသုံးပြုရ လွယ်ကူသဖြင့် အဆောက်အဦး၊ လမ်း၊ တံတားများ ဆောက်လုပ်ရာတွင် များစွာ အထောက်အကူဖြစ်စေသည်။ ဒေသတွင်းထွက်ရှိသော ဝါးများအား ‌ဒေသအတွင်း အသုံးပြုရန် ဝါးအလုံးများအတိုင်းရောင်းချခြင်း၊ ဝါးဖြင့်ပြုလုပ်၍ရသော ဝါးကုလားထိုင်၊ ဝါးကုတင်များ၊ ဝါးတောင်း၊ ဝါးခြင်းများ ပြုလုပ်ရောင်းချကြပြီး၊ အများအားဖြင့် ဒေသတွင်း ထွက်ရှိသော တောင်းထန်းရွက်များနှင့် တွဲဖက်အသုံးပြုရသော ဝါးသက်ကယ်တံပြုလုပ်၍ အိမ်ခေါင်မိုး မိုးရန် ရောင်းချကြသည်။ အဆိုပါတောင်ထန်းအမိုးလုပ်ငန်းသည် ၎င်း‌ဒေသ၏ မိရိုးဖလာ လုပ်ငန်းဖြစ်သည့်အတွက် ဒေသနေကျေးလက်ပြည်သူများ၏ အလုပ်အကိုင် ဖန်တီးနိုင်သည့် အရေးပါသော လုပ်ငန်းတစ်ရပ်ဖြစ်သည်။

          ထိုသို့ ဒေသတွင်းထွက်ရှိသောဝါးများအား ဒေသတွင်းအသုံးပြုပြီး ပိုလျှံသော ဝါးများအား ပဲခူးတိုင်းဒေသကြီးသို့ အများဆုံးတင်ပို့ရောင်းချကြ၍ ဒေသအပြင်ဘက် စျေးကွက်နှင့်လည်း ချိတ်ဆက်နိုင်လျက်ရှိသည်။ လက်ရှိဒေသတွင်းစျေးကွက်တွင် ဝါးပိုးဝါး အရှည် (၂၅/၂၇)ပေ တစ်လုံးလျှင် (၈၀၀၀)ကျပ်၊ သိုက်ဝါးရှည် (၂၅/၂၇)ပေ တစ်လုံးလျှင် (၃၅၀၀)ကျပ်တို့ဖြင့် အရောင်းအဝယ်ဖြစ်လျက်ရှိသည်။ ထို့ပြင် ဝါးကုလားထိုင် (တစ်ယောက်ထိုင်)တစ်လုံးလျှင် (၁၀၀၀၀) ကျပ်၊ နှစ်ယောက်ထိုင်တစ်လုံးလျှင် (၁၅၀၀၀) ကျပ်၊ ဝါးကုတင်အသေးတစ်လုံးလျှင် (၃၀၀၀၀) ကျပ်၊ ဝါးကုတင်အကြီးတစ်လုံးလျှင် (၄၀၀၀၀) ကျပ်ဖြင့် ရောင်းချရာ ဒေသနေပြည်သူများနှင့် ဘုရားဖူးလာခရီးသွားများမှ ဝယ်ယူကြကြောင်း သိရှိရသည်။ အဆိုပါ လုပ်ငန်းများမှ ရရှိသောဝင်ငွေများသည် ဒေသခံ ပြည်သူများ၏ အသက်မွေးဝမ်းကျောင်း အတွက် များစွာအထောက်အကူဖြစ်သကဲ့သို့ ‌ဒေသစီးပွားလည်ပတ်မှုကိုလည်း အထောက်အပံ့ များစွာ ဖြစ်လျက်ရှိသည်။

          ထိုကဲ့သို့သော ဝါးထုတ်လုပ်မှုနှင့်ရောင်းဝယ်မှုလုပ်ငန်းသည် ဘီးလင်းမြို့နယ်အတွင်း ကျေးလက်ဒေသ စီးပွားရေးဖွံ့ဖြိုးတိုးတက်ရေးအတွက် အရေးပါသောအခန်းကဏ္ဍ တစ်ရပ် အဖြစ် တည်ရှိနေပြီး ‌‌ဒေသနေကျေးလက်ပြည်သူများ၏ လူမှုဘဝနှင့် စီးပွားရေးအတွက် အရေးပါသော သဘာဝအရင်းအမြစ်တစ်ရပ်ဖြစ်သည့် ဝါးပင်များအား ထိန်းသိမ်း၊ စိုက်ပျိုး၊ အသုံးချနိုင်ပါက ရေရှည်တည်တံ့သောဒေသ၏ အရေးပါသည့် စီးပွားရေး လုပ်ငန်းတစ်ရပ် အဖြစ် ပိုမိုဖွံ့ဖြိုးလာနိုင်မည်ဖြစ်ပါသည်။

DOCA (မွန်)

          တောင်ငူမြို့ ဈေးများသို့ မြို့၏အနီးရှိ ကျေးရွာများဖြစ်သော ဆိတ်ဖူးတောင်၊ ဒိုးသောင်၊ ရှမ်းဝတီးနှင့် ဗမာဝတီးစသည့်ကျေးရွာများမှ စိုက်ပျိုးထားသည့် ဆောင်းသီးနှံပြောင်းဖူးများ ဈေးကွက်အတွင်း ရောင်းချလျက်ရှိရာ ဈေးနှုန်းအနေဖြင့် မိုးရာသီကာလတွင် ရောင်းချခဲ့သော ပြောင်းဖူးများထက် ဈေးပိုရရှိကြောင်း သိရှိရသည်။

         ပြောင်းဖူးမှာ အဖြူနှင့် အဝါ ဟူ၍ နှစ်မျိုးရှိပြီး ပြောင်းဖူးကိုပြုတ်စားခြင်း၊ မီးကင်စားခြင်း၊ ကြော်စားခြင်းတို့ဖြင့် စားသုံးကြပြီး ပြောင်းဖူးအဝါကို ကော်ပြန့်ဖတ်နှင့် လိပ်၍ ပြောင်းဖူးကော်ပြန့်လိပ် ပြုလုပ်စားသုံးခြင်းအပြင် လူငယ်များကြိုက်နှစ်သက်သော မာလာရှမ်းကောစားစရာ ထဲတွင်လည်း ပါဝင်အသုံးပြုကြသည်။

         ဈေးနှုန်းများအနေဖြင့် ပြောင်းဖူးအဖြူ အသေးတစ်ဖူးလျှင် ၆၀၀ ကျပ်၊ ၁၀ ဖူးလျှင် ၅၀၀၀ကျပ်၊ အလတ်၁ဖူးလျှင် ၈၀၀ ကျပ်၊ ၁၀ ဖူး လျှင် ၇၀၀၀ ကျပ်၊ အကြီး ၁ ဖူးလျှင် ၁၀၀၀ ကျပ်၊ ၁၀ ဖူးလျှင် ၉၀၀၀ ကျပ် ဖြင့် အဖူးအရွယ်အစားပေါ်မူတည်၍ ရောင်းချလျက်ရှိရာ ပြောင်းဖူးအဝါ အသေး ၁ ဖူးလျှင် ၇၀၀ ကျပ်၊ ၁၀ ဖူးလျှင် ၆၀၀၀ ကျပ်၊ အလတ် ၁ဖူးလျှင် ၉၀၀ ကျပ်၊ ၁၀ ဖူးလျှင် ၈၀၀၀ ကျပ်၊ အကြီး ၁ဖူးလျှင် ၁၂၀၀ ကျပ်၊ ၁၀ ဖူးလျှင် ၁၀၀၀၀ ကျပ်မှ ၁၁၀၀၀ ကျပ်ထိ ဈေးနှုန်းအသီးသီးရှိပြီး ပြောင်းဖူး အဖူး (၁၀၀)ဝယ်ယူမှသာ ဈေးနှုန်းအပြောင်းအလဲရှိကြောင်းကို ပြောင်းဖူးရောင်းချသူများထံမှ သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ခရိုင်အနေဖြင့် ဆီထွက်သီးနှံများဖြစ်ကြသော နှမ်းနှင့် မြေပဲသီးနှံများအား အဓိကထား၍စိုက်ပျိုးကြပြီး နေကြာကို  ယခင်က နေကြာကို အနည်းငယ်သာစိုက်ပျိုးကြပြီး ယခုနောက်ပိုင်းကာလများတွင် ပြည်တွင်းစားသုံးဆီ ဖူလှုံမှုရှိစေရန်အတွက် စမ်းသပ်စိုက်ပျိုးလာကြပါသည်။ နေကြာကို ဧကပြတ်စိုက်ပျိုးကြသလို ပဲမျိုးစုံ စိုက်ခင်းများထဲတွင်လည်း သီးထပ် သီးညှပ်စိုက်ပျိုးကြကြောင်း သိရပါသည်။  နေကြာထွက် ရှိမှုနည်းသဖြင့် ပြည်မြို့ရှိ ဆီစက်များအနေဖြင့် နေကြာဆီကြိတ်ခွဲထုတ်လုပ်မှုမှာလည်း မရှိသလောက်နည်းပါးကြပါသည်။ ၂၀၂၅ခုနှစ် နှစ်ကုန်ခါနီးဖြစ်၍ တစ်နှစ်လုံးတွင် အရောင်းအဝယ်ဖြစ်ခဲ့သော ဆီထွက်သီးနှံ နှမ်းနှင့် မြေပဲ၏ ဈေးနှုန်းများကို အောက်ပါအတိုင်း ဖော်ပြလိုက် ရပါသည်-

          ၂၀၂၅ခုနှစ်တွင်ဖြစ်ပေါ်ခဲ့သော နှမ်းဈေးနှုန်းများမှာ နှမ်းနီဈေးမှာ နှစ်စဖြစ်သော ဇန်နဝါရီလ မှစ၍ တစ်တင်းလျှင် (၁၂၀၀၀၀)ကျပ်ဖြင့် စက်တင်ဘာလအထိ ဈေးပြောင်းလဲမှုမရှိဘဲ ဈေးငြိမ်နေခဲ့ပါသည်။ အောက်တိုဘာလမှစ၍ ဒီဇင်ဘာလအထိ တစ်တင်းလျှင် (၁၁၀၀၀၀)ကျပ်ဖြင့် ဈေးကျဆင်း လာခဲ့ပါသည်။ နှမ်းနက်ဈေးမှာလည်း ဇန်နဝါရီလနှင့် ဖေဖော်ဝါရီလတွင် တစ်တင်း လျှင် (၁၇၃၀၀၀)ကျပ်ဈေးဖြင့် အရောင်းအဝယ်ဖြစ်ခဲ့ပြီး မတ်လမှ ဇွန်လအထိ တစ်တင်းလျှင် (၁၇၀၀၀၀)ကျပ်ဖြင့် ဈေးအနည်းငယ်ကျဆင်းလာခဲ့ပါသည်။ ဇူလိုင်လမှ စက်တင်ဘာလအထိ တစ်တင်းလျှင်း (၂၂၀၀၀၀)ကျပ်ဖြင့် နှမ်းနက်ဈေးများပြန်လည်မြင့်တက်လာပြီး အောက်တိုဘာလတွင် တစ်တင်းကို (၂၀၀၀၀၀)ကျပ်ဖြင့် ဈေးအနည်းငယ်ပြန်ကျလာပြီး နိုဝင်ဘာလနှင့် ဒီဇင်ဘာလတို့တွင် တစ်တင်းကို (၁၇၀၀၀၀)ကျပ်ဖြင့် ဝယ်လိုအားပေါ်မူတည်၍ ဈေးများကျဆင်းလာခဲ့ပါသည်။ စမုံနက်နှမ်းဈေးများမှာလည်း နှစ်စဖြစ်သော ဇန်နဝါရီလနှင့် ဖေဖော်ဝါရီလတွင် တစ်တင်းကို (၂၁၆၀၀၀)ကျပ်ဖြင့် ဈေးဖွင့်ခဲ့ပြီး မတ်လမှ ဇွန်လအထိ တစ်တင်းလျှင် (၂၀၀၀၀၀)ကျပ်ဖြင့် ဈေးငြိမ်ပြီး ဈေးကျလာခဲ့ပါသည်။ ဇူလိုင်၊ ဩဂုတ်နှင့် စက်တင်ဘာလများတွင် တစ်တင်းလျှင် (၂၅၀၀၀၀)ကျပ်ဖြင့် ဈေးအမြင့်ဆုံးထိမြင့်တက်လာခဲ့ပြီး အောက်တိုဘာလတွင် တစ်တင်းကို (၂၃၀၀၀၀)ကျပ်ဖြင့် ဈေးပြန်ကျလာပြီး၊ နိုဝင်ဘာလတွင် (၂၃၃၀၀၀)ကျပ်ဖြင့် အနည်းငယ် ပြန်မြင့်သရောင်ဖြစ်လာပြီး ဒီဇင်ဘာလတွင် တစ်တင်းကို (၂၂၀၀၀၀)ကျပ်ဖြင့် များပြန်လည်ကျဆင်းလာတာ တွေ့ရပါသည်။

          မြေပဲဈေးနှုန်းများအနေဖြင့်လည်း ပုံမှန်မရှိဘဲ အတက်အကျ အနည်းငယ်ရှိတာ တွေ့ရပါသည်။ မြေပဲဆီကြိတ်ဆန် ဈေးနှုန်းများအနေဖြင့် ဇန်နဝါရီလနှင့် ဖေဖော်ဝါရီလတွင် တစ်ပိဿာကို (၈၀၀၀)ကျပ်ကျော်ဖြင့် အရောင်းအဝယ်ဖြစ်ခဲ့ပြီး မတ်လတွင် တစ်ပိဿာကို (၇၀၀၀)ကျပ်ကျော်ဖြင့် ဈေးအနည်းငယ်ကျဆင်းသွားခဲ့ပါသည်။ ထို့နောက် ဧပြီလမှ စက်တင်ဘာလအထိ တစ်ပိဿာကို (၈၀၀၀)ကျပ်ကျော်ဖြင့် ရောင်းဝယ်လျှက်ရှိခဲ့ပြီး အောက်တိုဘာလတွင် ဈေးပြန်လည်ကျဆင်းလာပြီး တစ်ပိဿာကို (၆၀၀၀)ကျပ်ကျော် ထိရောင်းချခဲ့ပါသည်။ နိုဝင်ဘာလ နှင့်ဒီဇင်ဘာလတို့တွင် တစ်ပိဿာလျှင် (၇၀၀၀)ကျပ်ကျော် ဈေးနှုန်းများပြန်လည်မြင့်တက်လာခဲ့ပါသည်။  ထို့အတူ မြေပဲလုံးဆန်ဈေးမှာလည်း ဇန်နဝါရီလ မှမတ်လအထိ တစ်ပိဿာလျှင် (၈၀၀၀)ကျပ်ကျော်၊ ဧပြီလတွင် (၉၀၀၀)ကျပ် မှ မေလတွင် တစ်ပိဿာကို (၁၀၀၀၀)ကျပ်အထိ ဈေးနှုန်းများ မြင့်တက်လာခဲ့ပါသည်။ ဇွန်လမှ စက်တင်ဘာလတွင် တစ်ပိဿာကို (၉၀၀၀)ကျပ်ကျော် ပြန်ဖြစ်သွားပြီး၊ အောက်တိုဘာလတွင် (၇၀၀၀)ကျပ်ကျော်၊ နိုဝင်ဘာလနှင့် ဒီဇင်ဘာလတို့တွင် တစ်ပိဿာကို (၈၀၀၀)ကျပ်ကျော်ဖြင့် ဈေးအနည်းငယ်ပြန်မြင့်လာပြီး အရောင်းအဝယ်ဖြစ်လျက်ရှိပါသည်။

          ပြည်ခရိုင်၊ ပြည်ဈေးကွက်တွင် ၂၀၂၅ခုနှစ် (၁)နှစ်လုံးတွင် အရောင်းအဝယ်ဖြစ်ခဲ့သော ဆီထွက်သီးနှံ နှမ်းနှင့် မြေပဲဈေးနှုန်းများကို လေ့လာကြည့်ခြင်းအားဖြင့် ဝယ်လိုအားများလျှင် များသလိုအရောင်းအဝယ်ဖြစ်ပြီး ဈေးမြင့်တက်လာခဲ့တာတွေ့ရပါသည်။ စမုံနက်နှမ်းကို မန္တလေး၊ ရန်ကုန်ဝယ်လက်များက အဝယ်ရှိခြင်း၊ နှမ်းနက်ကို ဒေသတွင်းသာ ဝယ်ယူမှုရှိခြင်း၊ နှမ်းနီကို ဆီစက်သမားများကိ ဆီကြိတ်ရန်ဝယ်ယူမှုရှိကြပါသည်။ မြေပဲဆန်ကိုလည်း အောင်လံနှင့် မကွေးဘက်မှ ပြန်လည်ဝယ်ယူတာတွေ့ရပါသည်။ ထို့ကြောင့် ပြည်တွင်း သုတေသနဖွံ့ဖြိုးရေးလုပ်ငန်းများ တိုးတက်စေရန်အတွက် မြေပဲနှင့် နှမ်းကိုမျိုးကောင်းမျိုးသန့်များစိုက်ပျိုးခြင်းဖြင့် အထွက်နှုန်းကောင်း၊ အရေအသွေးကောင်းသော ဆီထွက်သီးနှံများရရှိလာနိုင်မှာဖြစ်ကြောင်း သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်တွင် ယခင်နှစ် စားသုံးဆီဖူလုံမှု (၅၈.၄၀) ရာခိုင်နှုန်းသာရှိခဲ့ပြီး ယခုနှစ် ၂၀၂၅-၂၀၂၆ ဘဏ္ဍာနှစ်တွင် စားသုံးဆီဖူလုံမှု (၁၀၅.၀၃) ရာခိုင်နှုန်းရရှိရေးအတွက် နွေ၊ မိုး၊ ဆောင်းဆီထွက်သီးနှံများဖြစ်သည့် မြေပဲ၊ နှမ်း၊ နေကြာများတိုးချဲ့စိုက်ပျိုးနိုင်ရေး၊ လယ်ယာကိုင်းကျွန်း စိုက်ပျိုးသူများ၊ သမဝါယမကဏ္ဍစိုက်ခြင်းများအား စည်းရုံးဆောင်ရွက်လျက်ရှိကြောင်း မြို့နယ်စိုက်ပျိုးရေး လုပ်ငန်းညှိနှိုင်းကြီးကြပ်မှုကော်မတီမှ သိရသည်။

        “ကျွန်တော်တို့ သမဝါယမကဏ္ဍအနေဖြင့် ဒီနှစ်ဆောင်းမြေပဲဗီယက်နမ်မျိုး (၂၀) ဧကစိုက်ပျိုးဖို့စီစဉ်ထားပြီး အစေ့ချစက်နဲ့စတင်စိုက်ပျိုးနေပါပြီအခြားအနေနဲ့ မတ်ပဲ (၃၄၂)ဧက၊ ပဲတီစိမ်း (၂၀)ဧက၊ ပိုက်ဆံလျှော် (မျိုးစေ့ထုတ်) (၃၀)ဧကနှင့်နွေစပါး(၁၀၀)ဧက စိုက်ပျိုးဖို့ရှိပါတယ်” ဟုလူငယ့် အားမာန် စိုက်ပျိုးရေးနှင့်လုပ်ငန်းစုံ သမဝါယမအသင်းဥက္ကဌ ဦးဝင်းလှိုင်ကပြောကြောင်း သိရှိရပါသည်။

DOCA(ပဲခူး)