ပြည်တွင်းကုန်သွယ်မှုသတင်း

၂၀၂၅ခုနှစ် မတ်လ တတိယပတ်တွင် ထားဝယ်ဒေသထွက် သကြားပြောင်းဖူးများ ဈေးအနည်းငယ်ကျလျက်ရှိကြောင်းသိရသည်။ ဒေသခံတောင်သူများသည် ရာသီပေါ်သီးနှံသကြား ပြောင်းများကို မိသားစုအပိုဝင်ငွေရရှိရန်အတွက် တစ်နိုင်တပိုင် စိုက်ပျိုးကြသည့်အပြင် စီးပွားဖြစ်လည်း စိုက်ပျိုးကြသည်။ သကြားပြောင်းကို ပြုတ်၍လည်းကောင်း၊ မီးဖုတ်၍လည်းကောင်း စားသုံးနိုင်သလို ကြက်ဥဖြင့်လည်းကြော်စားပါက အလွန်စားကောင်းသော သီးနှံတစ်မျိုးဖြစ်သည်။ ယခင်လ သကြား ပြောင်းဈေးနှုန်းမှာ (၁)ဖူးလျှင် (၁၂၀၀)ကျပ်၊ (၁၀)ဖူးလျှင် (၁၁၀၀၀)ကျပ်နှင့် ယခုလ သကြား ဈေးနှုန်းမှာ (၁)ဖူးလျှင် (၈၀၀)ကျပ်၊ (၁၀)ဖူးလျှင် (၇၀၀၀)ကျပ်တို့ဖြင့် အရောင်းအဝယ် ဖြစ်လျက်ရှိ ကြောင်းသိရသည်။

DOCA(တနင်္သာရီ)

          ကြက်သွန်နီသည် နေ့စဥ်စားသုံးနေသော အစားအစာတို့တွင်မပါမဖြစ် အလွန်အရေးပါသော စားဖိုဆောင်သီးနှံတစ်မျိုးဖြစ်သည်။ ကြက်သွန်နီသည် ရေအလွန်လိုအပ်သောသီးနှံဖြစ်သည့်အပြင် မြေအစိုဓာတ်ရှိသော မြေတွင်သာ စိုက်ပျိုးနိုင်ပါသည်။ အလွန်ချဥ်သောမြေကို မနှစ်သက်သော ကြောင့် အောက်မြန်မာပြည်တွင် စိုက်ပျိုးမှုနည်းပါးပြီး အပူအအေးသင့်တင့်သော ရာသီဥတုကိုကြိုက် နှစ်သက်ပါသည်။ မြေပြန့်ဒေသတွင် ကြက်သွန်နီကို အောက်တိုဘာလနှင့် နိုဝင်ဘာလအထိသာ စိုက် ပျိုးပြီး တောင်ပေါ်ဒေသတွင် မတ်လနှင့်ဇွန်လ အထိသာ စိုက်ပျိုးကြောင်းသိရှိရပါသည်။ ထားဝယ် စျေးကွက်တွင် ကြက်သွန်နီစျေးနှုန်းမှာယခင်ပတ်(၃၅၀၀/-)ကျပ်မှ ယခုအပတ် (၃၀၀၀/-)ကျပ်သို့ ကျဆင်းသွားကြောင်းသိရှိရပါသည်။

DOCA(တနင်္သာရီ)

တနင်္သာရီတိုင်းဒေသကြီး၊ ထားဝယ်မြို့တွင် ရာသီပေါ်သီးနှံများဖြစ်သော ရောင်းချလျက်ရှိရာ ယခုအခါ ကင်းပုံပင်များကို  နေအိမ်ခြံဝင်းများတွင်လည်းကောင်း၊ ယာကွက်ခြံစည်းရိုးများတွင် လည်း ကောင်း စိုက်ပျိုး၍ ရောင်းချလျက်ရှိကြောင်း သိရသည်။ ကင်းပုံသီးမှာအချိုမျိုးနှင့် အခါးမျိုး နှစ်မျိုးရှိပြီး၊ အချိုမျိုးသည် အသီးနှင့်အရွက်နှစ်မျိုးစလုံး စားသုံးနိုင်ကြောင်း၊ ကင်းပုံသီးများကို ကြော်စား၊ ချက်စား၊ နှပ်စား အမျိုးမျိုးပြုလုပ်၍ စားသုံးကြကြောင်း သိရသည်။

              ၂၀၂၅ ခုနှစ်၊ မတ်လ ဒုတိယပတ်တွင် ထားဝယ်မြို့စည်ပင်သာယာဈေးနှင့် ကမ်းနားဈေးတို့တွင် ကင်းပုံသီးများကို ကျေးရွာများမှ ဝယ်ယူ၍ရောင်းချလျက်ရှိကြောင်း၊ ကင်းပုံသီး ဆယ်လုံးပါ(၁)ထုပ်လျှင် (၅၀၀)ကျပ်ဖြင့်  အရောင်းအဝယ်ဖြစ်လျက်ရှိကြောင်း ကုန်စိမ်း ရောင်းချသူထံမှ သတင်းရရှိပါသည်။

DOCA(တနင်္သာရီ)

          ‌ကြောင်လျှာသီးပင်သည် သဘာဝအလေ့ကျပေါက်သော အပင်ဖြစ်၍ အပွင့်၊ အသီး၊ အခေါက် နှင့် ရွက်များကလည်း ဆေးဖက်ဝင်သောကြောင့် ဈေးကွက်ဝင်သောအပင်ဖြစ်သည်။ နှစ်စဉ်မိုးရေ ကောင်းစွာရရှိသော အပူပိုင်းဒေသရာသီဥတုကိုကြိုက်နှစ်သက်သည်။

          ယခုအခါ ထားဝယ်ခရိုင်အတွင်းရှိ ကျေးလက်တောရွာများတွင် စီးပွားဖြစ်စိုက်ပျိုးကြပြီး ထိုမှ တဆင့် ထားဝယ်မြို့ပေါ်ရှိ စည်ပင်သာယာဈေးကြီးနှင့် ရပ်ကွက်ဈေးငယ်များတွင် လာရောက်ရောင်း ချလျက်ရှိပြီး ကြောင်လျှာသီးတစ်တောင့်လျှင် (၂၀၀၀ မှ ၂၅၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

          တနင်္သာရီတိုင်းဒေသကြီး၊ ထားဝယ်မြို့တွင် ၂၀၂၅ ခုနှစ်၊ မတ်လ ဒုတိယအပတ်အတွင်း အခြေခံ စားကုန်စျေးနှုန်းအများစုမှာ စျေးနှုန်းတည်ငြိမ်လျက်ရှိပါသည်။ယခင်၂၀၂၅ ခုနှစ်၊ ဖေဖော်ဝါရီလအတွင်း အခြေခံစားကုန်စျေးနှုန်းများနှင့်နှိုင်းယှဥ်ပါက စားအုန်းဆီတစ်ပိဿာလျှင် (၈၂၀၀) ကျပ်မှ (၈၀၀၀) ကျပ်၊ ငရုတ်ခြောက် တစ်ပိဿာလျှင် (၁၆၀၀၀)ကျပ်၊ သကြားတစ်ပိဿာလျှင် (၅၆၀၀)ကျပ် အထိရှိပြီး ထားဝယ်မြို့ စျေးကွက်အတွင်း ရန်ကုန်ပွဲရုံများမှ ကြက်သွန်နီအသစ်များ ဝင်ရောက်လျက်ရှိကာ ကြက် သွန်နီ တစ်ပိဿာလျှင် (၃၅၀၀) ကျပ်မှ (၃၀၀၀)ကျပ်သို့ကျဆင်းလျက်ရှိပြီး   အခြားသောအခြေခံစား ကုန်စျေးနှုန်းများမှာ တည်ငြိမ်လျက်ရှိပါသည်။

DOCA(တနင်္သာရီ)