ပြည်တွင်းကုန်သွယ်မှုသတင်း

             မိတ္ထီလာမြို့မဈေးကြီးအတွင်းရှိ ငါးရံ့ခြောက်ဈေးကွက်မှာ နိုဝင်ဘာလ၌အရောင်းအဝယ်ပုံမှန် ဖြင့်ဈေးငြိမ်နေကြောင်းသိရသည်။ ဈေးကွက်တွင် ငါးပုတ်သင်၊ ငါးထောပတ်၊ ငါးဆားနယ်၊ ငါးဖောင်ရိုး၊ ငါးရံ့ခြောက်၊ ငါးရောင်ခြောက်စသဖြင့် ငါးခြောက်များစွာရှိသည့်အနက်မှ ငါးရံ့ခြောက် မှာငါးခြောက်ဆိုသော်လည်း အငန်ဓာတ်နည်းပြီး အသားများသည့်အတွက် ဈေးကောင်းရသော  ငါးခြောက်ဖြစ်ပါသည်။ ငါးရံ့ခြောက်ကိုမီးဖုတ်၍ဆီဆမ်းကာလည်းကောင်း၊ ကြော်ချက်၍ လည်းကောင်း၊ အမျိုးမျိုးချက်ပြုတ်စားသုံးကြပါသည်။ မိတ္ထီလာဈေးကွက်သို့ ငါးခြောက်များကို မြန်မာနိုင်ငံအောက်ပိုင်းမှအများဆုံးဝင်ရောက်ရာ ငါးရံ့ခြောက်မှာ ဧရာဝတီ  တိုင်းဒေသကြီး ပန်းတနော်မှအများဆုံးဝင်ရောက်ကြောင်းသိရသည်။ ငါးရံ့ခြောက်တစ်ပိဿာလျှင် အကောင်အကြီး/အသေးအပေါ်မူတည်ပြီး(၆၀၀၀၀-၈၀၀၀၀)ကျပ်ဈေးဖြင့် ဈေးငြိမ်နေကာ အရောင်းအဝယ်  ပုံမှန်ဖြစ်ကြောင်းသိရသည်။

DOCA(မန္တ‌လေး)

                 မိတ္ထီလာဈေးကွက်တွင် နိုဝင်ဘာလ၌ ထန်းလျက်ဈေးမှာ အရောင်းအဝယ်ပုံမှန် ရှိကြောင်း သိရသည်။ မိတ္ထီလာဈေးကွက်သို့ ထန်းလျက်မှာ မလှိုင်မြို့နယ်မှ အများဆုံးဝင်ရောက်ပြီး မြို့ပေါ် ပွဲရုံများမှ တစ်ဆင့် လက်လီ/လက်က္ကားပြန်လည်ရောင်းချ များ၊ မုန့်လုပ်ငန်းများပြန်လည် ရောင်းချကြပါသည်။ ဗမာမုန့်အများစုမှာ ထန်းလျက်ဖြင့်အများဆုံး ပြုလုပ်သည့်အပြင် တိုင်းရင်းဆေး ဝါးအချို့တွင်လည်း ထည့်သွင်းဖော်စပ်ခြင်း၊ နယ်ဝေးလက်ဆောင်ပေးပို့ခြင်းတို့ကြောင့် အရောင်း အဝယ်ပုံမှန်ရှိကြောင်း သိရသည်။ ထန်းလျက်မှာပြာသို၊ တပို့တွဲလများ မှစ၍ တက်ရသဖြင့် လက်ရှိအချိန်တွင် ထန်းလျက်အဟောင်းများနှင့် သာအရောင်းအဝယ်ဖြစ်ကြောင်း ဈေးနှုန်းအနေဖြင့် အသစ်ပေါ်ချိန်က တစ်ပိဿာလျှင်(၅၀၀၀-၆၀၀၀)ကျပ် ရှိခဲ့ပြီး လက်ရှိဈေးကွက်တွင် တစ်ပိဿာလျှင် (၆၀၀၀-၈၀၀၀)ကျပ်ဈေးရှိကြောင်း ဈေးကွက်မှသိရသည်။

DOCA(မန္တ‌လေး)

                  မိတ္ထီလာဈေးကွက်ရှိ ဟင်းသီးဟင်းရွက် ဈေးကွက်တွင် နံနံပင်မှာ ဈေးကောင်းလျက်ရှိပါသည်။ ဈေးကွက်သို့ နံနံပင်မှာ ရမည်းသင်း(ရွှေဒါး) မှ ဝင်ရောက်နေရာ လက်ကားဈေး တစ်ပိဿာလျှင် (၃၅၀၀၀-၄၀၀၀၀) ကျပ်ရှိပြီး လက်လီရောင်းချရာတွင် တစ်စည်းလျှင် (၅၀၀) ကျပ်ဖြင့် ပြန်လည်ရောင်းချလျက်ရှိရာ မိတ္ထီလာမြို့အနီးတစ်ဝိုက်ရှိ ကျေးရွာများမှနံနံပင်ကိုသီးညှက်စိုက်ပျိုးကြသော်လည်းဒေသတွင်းထွက်ရှိချိန်မဟုတ်၍ဈေးကွက်အဝင်နည်းသည့်အတွက်ဈေးမြင့်နေခြင်းဖြစ်ကြောင်းသိရပါသည်။ ဟင်းသီး ဟင်း ရွက်များတွင် မုန်လာဥ၊ ပန်းဂေါ်ဖီ၊ ပဲစိမ်း၊ မုန်ညှင်း၊ နံနံပင်တို့မှာ ဆောင်းရာသီတွင် ဈေးကွက်အဝင်လှိုင်သည့်အတွက် ဈေးနှုန်းကျဆင်းလေ့ရှိကြောင်း သိရှိရပါသည်။

DOCA(မန္တ‌လေး)

                     မိတ္ထီလာမြို့၊ ပေါက်ချောင်းဈေးကွက်တွင် နိုဝင်ဘာလ၌ အာဆီယမ်သပြေ များဝင်ရောက် လာကြောင်းသိရသည်။ ဘုရားပန်းဈေးကွက်တွင် သပြေပန်းကို အာဆီယမ်သပြေ၊ အောင်သပြေ၊ ကျောက်စိမ်းသပြေ၊ သပြေငုတ်တို့ရှိပြီး သပြေငုတ်တွင်လည်း ကျောက်ဆည်သပြေငုတ်၊ နေပြည်တော်သပြေငုတ်ဟူ၍လည်း ခွဲခြားရောင်းချကြပြသည်။ သပြေပန်းကို ဘုရားပန်းကပ်လှူရာ၌ ညောင်ရေးအိုး၊ အောင်အိုးများအပြင် အုန်းငှက်ပျော ကန်တော့ပွဲများတွင်လည်း ထည့်သွင်းကပ်လှူလေ့ရှိပါသည်။ ၎င်းသပြေပန်းများအနက် အာဆီယမ်သပြေမှာ အရွက်တွင် အနီရောင်အညွှန့်များဖြင့် ဝေဆာစွာပါရှိခြင်းကြောင့် အမြင်အားဖြင့် ပိုမိုလှပသည်ကိုတွေ့ရပါသည်။ မိတ္ထီလာဈေးကွက်သို့ အာဆီယမ်သပြေကိုနေပြည်တော်မှအများဆုံးဝင်ရောက်ကာပေါက်ချောင်းဈေးကတော့မြို့မဈေးနှင့်ဘဲကန်ဈေးတို့မှတဆင့်ဝယ်ယူရောင်းချကြပါသည်။ပေါက်ချောင်းဈေးကွက်သို့ အောက်တို ဘာလကုန်ပိုင်းမှ စတင်ဝင်ရောက်လာရာ တစ်စီးလျှင် (၅၀၀)ကျပ်ဖြင့် အရောင်းသွက် ကြောင်းသိရသည်။

DOCA(မန္တ‌လေး)

      ကင်းပုံပင်သည် အပူပိုင်းဒေသများတွင် ပေါက်ရောက်တတ်သော နွယ်ပင်မျိုးဖြစ်ပြီး၊ ၎င်း၏အသီးကို ဟင်းလျာအဖြစ် တွင်ကျယ်စွာ စားသုံးကြသည်။ ကင်းပုံသီးသည် အပြင်ဘက်တွင် အဖုအထစ်များ ပါရှိတတ်ပြီး အစိမ်းရောင် သို့မဟုတ် အဝါရောင်ရှိသည်။ အရသာမှာ ခါးသက် သော်လည်း မြန်မာ့ဟင်းလျာများတွင် ၎င်း၏ထူးခြားသော အရသာကြောင့် လူကြိုက်များသည်။

    ကင်းပုံသီးကို အများအားဖြင့် ကြော်ချက်ခြင်း၊ ပြုတ်၍ တို့စားခြင်း၊ သို့မဟုတ် ဟင်းချိုချက်သောက်ခြင်းဖြင့် စားသုံးကြသည်။ အရသာခါးသော်လည်း ကျန်းမာရေးအတွက် အလွန်ကောင်းမွန်သည်ဟု ယူဆကြသည်။ အသီးသာမက ကင်းပုံညွန့်များကိုပါ ပြုတ်၍ တို့စားနိုင် သလို၊ ဟင်းချိုချက်သောက်နိုင်သည်။

    ကင်းပုံသီးတွင် ကိုယ်တွင်းဇီဝဖြစ်စဉ်ကို တိုးတက်စေခြင်း၊ သွေးတွင်းသကြားဓာတ်ကို ထိန်းညှိပေးခြင်း၊ ဆီးချိုရောဂါ ကာကွယ်ခြင်းစသည့် ဆေးဖက်ဝင် အာနိသင်များ ပါရှိသည်။ ထို့ပြင် နှလုံးနှင့် အာရုံကြောစနစ်အတွက်လည်း ကောင်းမွန်သည်ဟု ဆိုကြသည်။

     ကင်းပုံသီးသည် ဈေးကွက်တွင် လွယ်လင့်တကူ ဝယ်ယူရရှိနိုင်ပြီး မြန်မာ့အစားအစာ တစ်ခုဖြစ်သည်။ ၎င်း၏ခါးသက်သောအရသာကို နှစ်သက်သူများအတွက် ထမင်းစားမြိန်စေသည့် အရံဟင်းတစ်ခွက်အဖြစ် အသုံးဝင်လှသည်။ ကင်းပုံသီးဈေးနှုန်းမှာ တစ်ပိဿာလျှင် (၀၀၀၀) ကျပ်နှုန်းခန့် ရှိကြောင်း လားရှိူးမြို့၊ မြို့မဈေးရှိ ရောင်းချသူများထံမှသိရှိရပါသည်။

DOCA(ရှမ်း)