ပြည်တွင်းကုန်သွယ်မှုသတင်း

    ထားဝယ်မြို့တွင် ယခုသီတင်းပတ်အတွင်း ငါး၊ ပုစွန်များ ဈေးကျနေကြောင်း၊ ရေထွက် ကုန်များ အဝင်များပြီး ဈေးဝယ်သူနည်း၍ ဈေးကျခြင်းဖြစ်ကြောင်း ရေထွက်ကုန်များ လက်လီ/ လက်ကား ရောင်းချနေသည့် လုပ်ငန်းရှင်များထံမှ စုံစမ်းသိရှိရပါသည်။

    စက်တင်ဘာလ ၁၆ ရက်က ထားဝယ်မြို့၏ ရေထွက်ကုန်ဈေးကွက်တွင် ငါးဒွန်းခြင်းငါး တစ်ပိဿာ ၁၅၀၀၀ကျပ်မှ ယနေ့ စက်တင်ဘာလ ၂၃ ရက်တွင် တစ်ပိဿာ ၇၀၀၀ ကျပ်၊ ပါလန်းခေါ် (အာဗြဲ) ငါးတစ်ပိဿာ ၁၀၀၀၀ ကျပ်မှ ၅၀၀၀ကျပ်သို့ တစ်ပတ်အတွင်း ဈေးခေါက်ချိုး ကျဆင်း သွားကြောင်း ဈေးကွက်အတွင်းမှ သိရှိရပါသည်။ ထို့အပြင် ငါးကွန်းရှပ်ကြီး တစ်ပိဿာ ၂၉၀၀၀ ကျပ် စျေးရှိရာမှ ယနေ့တွင် ၂၃၀၀၀ ကျပ်၊ ဖိုးထောမဲတစ်ပိဿာ ၁၃၀၀၀ကျပ်မှ ၉၀၀၀ကျပ်၊ ပုစွန်ချောကြီး တစ်ပိဿာ ၄၃၀၀၀ ကျပ်မှ ၄၀၀၀၀ ကျပ်သို့ အသီးသီးဈေးကျသွားကြောင်း လက်လီ/ လက်ကား ဖြန့်ဖြူးရောင်းချနေသည့် လုပ်ငန်းရှင်များထံမှ သိရှိရသည်။

DOCA(တနင်္သာရီ)

   ကျွန်းလှမြို့တွင်  ကုန်မျိုးစုံရောင်းဝယ်ရေးဆိုင်များနှင့် မြို့တွင်းရပ်ကွက်ဈေးများတွင် ကျောက်ဖရုံယိုများကို ရွှေဘိုမြို့နှင့်မန္တလေးမြို့ တို့မှ မှာယူ ရောင်းချလျက်ရှိကြောင်း သိရှိရပါသည်။

    ၂၀၂၅ ခုနှစ်၊ စက်တင်ဘာလ စတုတ္ထပတ်အတွင်း ကျွန်းလှမြို့ပေါ်ရပ်ကွက်ဈေးများအတွင်း ကုန်မျိုး စုံ ရောင်းချသည့်ဆိုင်များတွင် ဖြစ်ပေါ်နေ‌သော ကျောက်ဖရုံယို ဈေးနှုန်းအနေဖြင့် ကျောက်ဖရုံယို တစ်ပိဿာလျှင်(၁၃၀၀၀)ကျပ်၊ (၅၀)ကျပ်သားလျှင်(၆၅၀၀) ကျပ် နှင့် (၂၅)ကျပ်သားလျှင်(၃၅၀၀)ကျပ် ဈေးနှုန်းတို့ဖြင့်လည်းကောင်း ချစ်တီးမုန့် ဈေးနှုန်းအနေဖြင့် ချစ်တီးမုန့် တစ်ပိဿာလျှင်(၂၀၀၀၀)ကျပ်၊ (၅၀)ကျပ်သားလျှင်(၁၀၀၀၀)ကျပ် နှင့် (၂၅)ကျပ်သားလျှင်(၅၀၀၀)ကျပ်ဈေးနှုန်းတို့ဖြင့် အရောင်း အဝယ် ဖြစ်လျက်ရှိကြောင်း ယခင်အပတ်ထက် ချစ်တီးမု့န်ဈေးနှုန်း တစ်ပိဿာလျှင် (၂၀၀၀)ကျပ် မြင့်တက်ပြီး အရောင်းအဝယ်ဖြစ်လျက်ရှိကြောင်း ကျွန်းလှမြို့ ကုန်မျိုးစုံရောင်းချနေသည့် လုပ်ငန်းရှင်များ ထံမှ သတင်း ရရှိပါသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ ပြည်ထောင်စုဈေး၊ ဗန္ဓုလဈေး၊ သာစည်ဈေးနှင့် ဝန်ထမ်းအိမ်ရာရှိ နန္ဒဝန်ဈေးသစ်တို့တွင် စက်တင်ဘာလ စတုတ္ထပတ်တွင် ရောင်းချနေသော ရာသီစာ ဇီးဖြူသီးများနှင့် ဖန်ခါးသီး ဈေးနှုန်း များအနေဖြင့်  ဇီးဖြူသီး ( ၁)ဘူးလျှင် ( ၅၀၀)ကျပ်၊ ဖန်ခါးသီး ( ၁) ဘူးလျှင် ( ၇၀၀)ကျပ်နှင့် တောကြက်ဟင်းခါးသီး( ၁ )ဘူးလျှင် (၁၀၀၀)ကျပ်ဖြစ်ကြောင်းသိရသည်။ အဆိုပါ သီးနှံများသည် ရာသီစာများဖြစ်ပြီး မိုးရာသီတွင် လှိုင်လှိုင်ပေါများလျက်ရှိကြောင်းသိရသည်။

DOCA(စစ်ကိုင်း)

  မန္တလေးစျေးကွက်သို့  မိုးရာသီဖြစ်၍   မန္တလေးတိုင်းဒေသကြီး ၊စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှရှောက်သီး၊သံပုရာသီးနှင့်သံပုယိုသီးများ ဝင်ရောက်မှုများပြား လျက်ရှိကြောင်းသိရှိ ရပါသည်။၂၀၂၅ ခုနှစ် စက်တင်ဘာလ တတိယပတ်အတွင်း ဖြစ်ပေါ်နေသည့်စျေးနှုန်းများမှာ ၁၀လုံး လျှင် ရှောက်သီး ၂၀၀၀ ကျပ်နှင့် ၂၅၀၀ ကျပ်၊သံပုရာသီး ၁၀၀၀ကျပ်နှင့် ၁၂၀၀ ကျပ်၊သံပုယိုသီး ၈၀၀ ကျပ်နှင့် ၉၀၀ကျပ်စျေးတို့ ဖြစ် ပေါ် လျက်ရှိပြီး၊အလုံးအရွယ်အစားအပေါ်မူတည်၍ စျေးအနည်းငယ် ပြောင်းလဲမှုရှိကြောင်းသိရပါသည်။ မိုးရာသီအချိန်ဖြစ်၍ ရှောက်သီး၊ သံပုရာသီးနှင့် သံပုယိုသီးတို့မှာ  ဝင်ရောက်မှုများပြားသည့်အတွက် စျေးအနည်းငယ်လျော့ကျသွားကြောင်း ရေနီမြောင်းစျေးရှိကုန်စိမ်း ရောင်းချသူတစ်ဦး၏ပြောပြချက်အရ သိရှိရပါသည်။   

DOCA(မန္တလေး)

      စစ်ကိုင်းတိုင်းဒေသကြီးအတွင်းရှိ ကျေးရွာများ နှင့် မြို့ပေါ်ရပ်ကွက်များတွင် စိုက်ပျိုးရေး လုပ်ငန်းများကို လုပ်ကိုင်စားသောက်ကြရာမှ နှစ်ရှည်သီးနှံဖြစ်သည့် ဂွေးပင်၊ မာလကာသီးပင်၊ ဩဇာသီးပင်၊ သရက်သီးပင်၊ နဂါးမောက်သီးပင်၊ ပိန္နဲသီးပင်နှင့် မန်ကျည်းသီးပင် များကိုလည်း မိမိတို့ နေအိမ်ခြံစည်းရိုးများနှင့် တောင်ယာများထဲတွင် တစ်ပိုင်တစ်နိုင် စိုက်ပျိုးလျက်ရှိကြပါသည်။ စိုက်ပျိုးရရှိသော သီနှံများထဲမှ  ဩဇာသီး၊ ဂွေးသီးနှင့် မာလကာသီးမျာကို မုံရွာမြို့၊ ချင်းတွင်းရတနာဈေး၊ သံလမ်းဈေးနှင့် ဈေးဟောင်းတို့တွင်  လာရောက်ရောင်းချလျက်ရှိကြောင်း သိရှိရပါသည်။

     ၂၀၂၅ ခုနှစ်၊ စက်တင်ဘာလ စတုတ္ထပတ်တွင် ဩဇာသီးဈေးနှုန်းများမှာ အရွယ်အစား အလိုက်ဈေးအမျိုးမျိုးရှိပြီး အရွယ်ကြီးအလုံးလှ(၁)လုံးလျှင် (၇၀၀)ကျပ်၊ အရွယ်သေး အလုံးသေး (၁)လုံးလျှင်(၅၀၀)ကျပ်ဖြင့်လည်းကောင်း၊  ဂွေးချိုသီး ဈေးနှုန်းမှာ ဂွေးချိုသီး (၁၈)လုံးပါ တစ်ထုပ်လျှင် (၈၀၀)ကျပ်ဖြင့် လည်းကောင်း၊ ကီလိုမာလကာသီးဈေးနှုန်းများ အနေဖြင့် အကြီးတစ်လုံးလျှင် (၆၀၀)ကျပ်၊ အသေးတစ်လုံးလျှင် (၅၀၀) ကျပ်ဖြစ်ပြီး အကြီးအသေး ပေါ်မူတည်ပြီး ရောင်းချလျက်ရှိကြောင်း သိရပါသည်။

DOCA(စစ်ကိုင်း)