ပြည်တွင်းကုန်သွယ်မှုသတင်း

        တနင်္သာရီတိုင်း၊ မြိတ်မြို့တွင် သဘာဝပေါက်ပင်များရှိသလို စီးပွားဖြစ်စိုက်ပျိုးကြသော ဒေသပေါက်ပင်များ လည်းရှိပါသည်။ ဒေသန္တရအပင်များထဲမှ အုန်းပင်သည် စီးပွားရေးလုပ်ငန်း များထဲမှ တစ်ခုအပါအဝင်ဖြစ်ပြီး ၎င်းတို့ကို အသုံးပြု၍ အသုံးအဆောင်ပစ္စည်းနှင့် စားစရာအပါအဝင် အုန်းသီးဂျယ်လီတို့ကိုပြုလုပ်ကြလေ့ရှိသည်။ ဒေသထွက်အုန်းသီးနုကို အုန်းသီးဂျယ်လီအဖြစ် ထုတ်လုပ်ရောင်းချကြလေ့ရှိပြီး ယခုအခါ အုန်းသီးစျေးနှုန်းမြှင့်တက်လာခြင်းနှင့်  ပါဝင်ပစ္စည်းများ စျေးမြှင့်လာခြင်းတို့ကြောင့် အုန်သီးဂျယ်လီပြုလုပ်သူများလုပ်ငန်းရပ်ဆိုင်းထားကြကြောင်း သိရှိရ သည်။ ယခင်က အုန်းသီးဂျယ်လီ တစ်ဘူးလျှင် ၈၀၀- ၁၀၀၀ကျပ်ခန့်ရောင်းချလျက်ရှိရာမှ ယခုအခါ အုန်းသီးဂျယ်လီ တစ်ဘူး ၂၀၀၀ ကျပ်ခန့်အထိရောင်းချလျက်ရှိရာ စျေးနှုန်းမြင့်တက်လာခြင်းကြောင့် ဝယ်ယူသူနည်းပါလာ ကြောင်းသိရှိရပါသည်။ အုန်းသီးဂျယ်လီကို ထားသိုရန်အတွက် ရေခဲအစဉ် မပြတ်လိုအပ်သည့်အပြင် တစ်ရက်၊ နှစ်ရက်ထက်အထားမခံခြင်းများကြောင့် အုန်းသီးဂျယ်လီ လုပ်ငန်းများ တစ်ချို့ရပ်နားထားကြောင်းသိရှိရပါသည်။

DOCA(တနင်္သာရီ)

          ပဲခူးတိုင်းဒေသကြီး၊ တောင်ငူမြို့နယ်အတွင်းရှိ ညောင်ပင်လေးဈေးတွင် ရောင်းချနေသော ငါးပိဆိုင်များသည် လူမျိုးဘာသာမရွေးစားသုံးနိုင်သည့်ဈေးနှုန်းဖြင့် ရောင်းချလျက်ရှိကာ ဝယ်ယူသူများနှင့်မပြတ် စည်ကားလျက်ရှိနေပါသည်။ ထမင်းစားသောက်ရာတွင် ဟင်းကောင်းမပါ သော်လည်း ငါးပိရည်တို့စရာများနှင့်စားပါက ထမင်းစားမြိန်သည့်အတွက် ထမင်းဆိုင်တိုင်းတွင် မရှိမဖြစ်ပါဝင်လျက်ရှိနေပါသည်။ ငါးဇင်ရိုင်း ငါးပိရည်ကျို ၁ ပိဿာလျှင် ၃၀၀၀-၄၀၀၀-၅၀၀၀ ကျပ်အထိ ဈေးနှုန်းအသီးသီးရှိပြီး ငါးပြေမ ငါးပိရည်ကျို ၁ ပိဿာလျှင် ၄၀၀၀ ကျပ်မှစပြီး ၅၀၀၀ ကျပ်၊ ၆၀၀၀ ကျပ်နှင့် ၇၀၀၀ ကျပ်အထိရှိပြီး ငါးရံငါးပိရည်ကျို ၁ ပိဿာလျှင် ၇၀၀၀-၁၀၀၀၀ ကျပ်၊ ၁၅၀၀၀ ကျပ်အထိဈေးနှုန်းအသီးသီးဖြင့် ရောင်းချသဖြင့် ဝယ်သူမပြတ်ရှိနေပြီး ငါးပိရည်ကျိုကို အချိန် ၁၀ ပိဿာနှင့်အထက်ဝယ်ပါက ဈေးနှုန်းအပြောင်းအလဲရှိကြောင်း ရောင်းချသည့်ငါးပိဒိုင်ထံမှ သတင်းရရှိပါသည်။

DOCA(ပဲခူး)

         ပဲခူးတိုင်းဒေသကြီး၊ တောင်ငူမြို့နယ်အတွင်းရှိ ညောင်ပင်လေးဈေးသို့ တောင်ငူမြို့နှင့် အနီးတစ်ဝိုက်ရှိ ကျေးရွာများနှင့် တောင်ပေါ်ဒေသမှထွက်ရှိသော အသီးအနှံများ၊ ဟင်းသီးဟင်းရွက် များလာရောက်ရောင်းချလျက်ရှိရာ ကိုင်းခရမ်းချဉ်သီးလေးများကိုလည်း ရောင်းချလျက်ရှိပါသည်။ ဒေသခံတောင်သူများက ကိုင်းခရမ်းချဉ်သီးလေးများကို ယာခင်းများထဲတွင် စိုက်ပျိုးလေ့ရှိပြီး တောင်ပေါ်ဒေသမှထွက်ရှိသော ဆင်ခရမ်းချဉ်သီးလေးများ ဈေးကွက်အတွင်းရောင်းချရာတွင် အလုံးအရွယ်အစားပေါ်မူတည်ပြီးရောင်းချသဖြင့် အလုံးအကြီး ၁ လုံးလျှင် ၂၀၀ ကျပ်၊ အသေး ၁ လုံးလျှင် ၁၅၀ ကျပ်အသီးသီးရှိပြီး အလုံး ၃၀နှင့်အလုံး ၅၀ အထက်ဝယ်ယူပါက ဈေးနှုန်းအပြောင်းအလဲရှိကြောင်း ပေါ်ဦးပေါ်စအချိန်ဖြစ်သောကြောင့် ဈေးနှုန်းအနည်းငယ်မြင့်တက်သော်လည်း နောက်လများတွင် ဈေးနှုန်းကျဆင်းနိုင်ကြောင်း ရောင်းချသည့်ဈေးသည်များထံမှ သတင်းရရှိပါသည်။

DOCA(ပဲခူး)

       ရှမ်းလူမျိုးတို့၏ရိုးရာအစားအစာများအနက် ဆီတို့ဟူးသည် နာမည်ကြီးသောအစားအစာ တစ်ခုဖြစ်ပြီး ရှမ်းလူမျိုးများအပြင် အခြားလူမျိုးများကလည်း ကြိုက်နှစ်သက်ကြပါသည်။ ဆီတို့ဟူးသည် ရှမ်းပြည်နယ်မှစတင်ခဲ့သော ဟင်းလျာတစ်မျိုးဖြစ်ပြီး ပဲအနှစ်ကို အဓိကထား၍ ပြုလုပ်ထား ခြင်းဖြစ်သည်။ နာမည်တွင် တို့ဟူးပါဝင်သော်လည်း ပုံမှန်တို့ဟူးပဲပြားများကဲ့သို့မဟုတ်ဘဲ နူးညံ့သောပဲအနှစ်သား ပုံစံမျိုးလေးရှိကာ အရသာမှာ သဘာဝပဲအရသာရှိပြီး အနည်းငယ် ချိုမွှေးပါသည်။

     ရှမ်းလူမျိုးများသည် ဆီတို့ဟူးကို ထမင်း၊ ရှမ်းခေါက်ဆွဲ၊ ခေါက်ဆွဲပြုတ်တို့နှင့် တွဲဖက်၍ စားသုံးလေ့ရှိပြီး အဆာပလာများဖြစ်သော ကြက်သွန်ဖြူဆီချက်၊ မြေပဲဆန်လှော်၊ ငရုတ်သီးဆီချက်၊ မုန်ညင်းချဉ်တို့နှင့်လည်း ရောနှော၍ စားသုံးလေ့ရှိပါသည်။ ဆီတို့ဟူးကို မြန်မာနိုင်ငံရှိ ဒေသအများအပြားတွင် ပြုလုပ်ရောင်းချလျက်ရှိသောကြောင့် လွယ်ကူစွာဝယ်ယူနိုင်သော်လည်း ရှမ်းပြည်နယ်ရှိဈေးများမှ မူရင်းအရသာအတိုင်းရောင်းချလျက်ရှိသော ဆီတို့ဟူးအရသာမှာတော့ ပိုမိုကောင်းမွန်လှပါကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ ဈေးများတွင် မုန်လာဥဖြူများရောင်းချ နေကြောင်းသိရသည်။ မုန်လာဥဖြူများသည် ဆောင်းရာသီသီးနှံဖြစ်သဖြင့် အဝယ်လိုက်ကာ အရောင်းသွက်နေကြေင်းသိရသည်။ ပြည်မြို့နယ်၊ မှော်ဇာကျေးရွာတွင် အများဆုံးစိုက်ပျိုးကြောင်း သိရသည်။ ဈေးကွက်အတွင်းသို့ အတွဲ (၅၀၀)ခန့်နေ့စဉ် ဝင်ရောက်ကြောင်း သိရသည်။

          ၂၀၂၅ ခုနှစ်၊ နိုဝင်ဘာလ၊ တတိယပတ်တွင် မုန်လာဥဖြူများမှာ ပေါ်ဦးပေါ်ဖျားဖြစ်သဖြင့် အဝင်ရှိသလောက် အရောင်းအဝယ်လည်းကောင်းမွန်ကြောင်း သိရသည်။ ဈေးနှုန်းများမှာ အလုံးအကြီး၊ အသေးပေါ်မူတည်၍ (၅)လုံးတွဲ တစ်တွဲလျှင် (၈၀၀ - ၁၀၀၀-၁၂၀၀)ကျပ်တို့ဖြင့် ရောင်းချကြောင်း သိရှိရပါသည်။

DOCA(ပဲခူး)