ပြည်တွင်းကုန်သွယ်မှုသတင်း

    ပြည်ခရိုင်၊ ပေါက်ခေါင်းမြို့နယ်၊ မတောင့်တကျေးရွာတွင် နွေစပါးများကို ယခင်ဇွန်လကုန်ပိုင်းမှစ၍ နွေစပါးများရိတ်သိမ်းချွေလှေ့ကြောင်း သိရပါသည်။ ထိုကျေးရွာတွင် ယခုနွေစပါး စိုက်ပျိုးသူတောင်သူများအနေဖြင့် ယခုနွေစပါး ရာသီချိန်တွင် စပါးများအထွက်နှုန်း ကောင်းမွန်သဖြင့် လယ်ကောင်းရင်ကောင်းသလို တစ်ယောက်စိုက်ကို (၅၀)တင်းထွက်ရှိ၍ တစ်ဧကလျှင် တင်း(၂၀၀)ခန့် ထွက်ရှိသည်ဟု သိရပြီး လယ်အနည်းငယ်ညံ့လျှင် တစ်ဧကကို အောက်ထစ် စပါးတင်း (၁၃၀)ခန့်ထွက်သဖြင့် ယခင်နှစ်ထက် စပါးအထွက်နှုန်းကောင်းသည်ဟု နွေစပါးစိုက် တောင်သူတစ်ဦးထံမှ သိရှိရပြီး အကျိုးအမြတ်များစွာရရှိကြောင်း သိရပါသည်။ ယခင်နှစ်တွင် နွေစပါး တစ်ဧက အထွက်နှုန်းမှာ တင်း(၁၀၀)ခန့်သာရရှိခဲ့ပြီး ယခုနှစ်တွင် နွေစပါးပေါ်ခါနီးတွင် မိုးအနည်းငယ်ရွာသွန်း၍ ရာသီဥတု ကောင်းမွန်သဖြင့် နွေစပါးအထွက်နှုန်းကောင်းသည်ဟု သိရပါသည်။ စိုက်ပျိုးသည့် စပါးမျိုးများမှာ ထိုင်းနှံကောက်မျိုး၊ ဗီယက်နန်မျိုးနှင့် GW-11 မျိုးတို့ဖြစ်ပြီး ယခု အချိန် လယ်သမားများအနေဖြင့် စက်များဖြင့်ရိတ်သိမ်းခြွေလှေ့ကြ၍ လူအင်အား ပင်ပန်းခြင်းမရှိဘဲ ရိတ်သိမ်းခြွေလှေ့သည့် လယ်ကွင်းနှင့် ရွာထိပ်တွင် ဧရာဝတီတိုင်းနှင့် ရန်ကုန်ဘက်မှ စပါးကုန်သည်ပွဲစားများက (၁၂)ဘီးကား (၁၆)ဘီးများဖြင့် စပါးအစိုအတိုင်း လာရောက်ဝယ်ယူကြကြောင်း သိရပါသည်။

        စပါးများဝယ်ယူရာတွင် ဈေးနှုန်းအနေဖြင့် စပေါ်ချိန်ဇွန်လကုန်အချိန်က စပါးအစို  ပေါင်(၅၀) တင်း(၁၀၀)လျှင် (၁၁)သိန်း၊ (၁၂)သိန်းအထိဈေးပေါက်နေပြီး ယခုအချိန် ဩဂုတ်လ ပထမပတ်တွင် စပါးအစို ပေါင်(၅၀)တင်း(၁၀၀)လျှင် (၁၅၀၀၀၀၀)ကျပ်ဖြင့် ဝယ်ယူကြကြောင်း သိရပါသည်။ ယခင်နှစ်တွင် နွေစပါးဈေးမှာ ပေါင်(၅၀)တင်း(၁၀၀)လျှင် (၉၈၀၀၀၀)ကျပ်ဖြင့် အရောင်းအဝယ်ဖြစ်ခဲ့သဖြင့် ယခုနှစ်တွင် ထိုကျေးရွာရှိ နွေစပါးစိုက်တောင်သူများအနေဖြင့် အထွက်နှုန်းလည်းကောင်း ဈေးလည်းကောင်းသဖြင့် တောင်သူများနွေစပါးကြောင့် အကျိုးအမြတ်များရရှိကြသဖြင့် နောင်လာ မည့်နှစ်များတွင်လည်း နွေစပါးများကို ထပ်မံတိုးချဲ့၍ စိုက်ပျိုးသွားမည်ဖြစ်ကြောင်း သိရပါသည်။

DOCA(ပဲခူး)

   မွန်ပြည်နယ်၊ စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဦးစီးဌာနတို့နှင့်ပူးပေါင်း၍ (၁၆-၈-၂၀၂၃) ရက်နေ့တွင် ချောင်းဆုံမြို့နယ်၊ ချောင်းဆုံအနောက်ရပ်ကွက်၊ မဟာကန်တော်ကြီးအရှေ့ ပျံကျဈေးဝင်းအတွင်း စားသုံးသူများကို သက်သာသောဈေးနှုန်းဖြင့် အခြေခံစားသောက်ကုန်များရောင်းချပေးခဲ့ကြောင်း သိရှိရပါသည်။

   ထိုသို့ ရောင်းချပေးရာတွင် ဆန်တစ်ပြည်လျှင် (၂၇၀၀) ကျပ်၊ ဝက်သားတစ်ပိဿာလျှင် (၁၃၅၀၀) ကျပ်၊ အမဲသားတစ်ပိဿာလျှင် (၁၅၀၀၀) ကျပ်၊ ကြက်သားတစ်ပိဿာလျှင် (၉၀၀၀) ကျပ်၊ ဆီတစ်ပိဿာလျှင် (၅၀၀၀) ကျပ်၊ ကြက်ဥတစ်လုံးလျှင် (၂၈၀) ကျပ်၊ ပိန်းဥတစ်ပိဿာလျှင် (၃၈၀၀) ကျပ်၊ မုန်လာဥတစ်ပိဿာလျှင် (၈၀၀) ကျပ်၊ ပဲတောင့်တစ်ပိဿာလျှင် (၂၈၀၀) ကျပ်၊ ကန်စွန်းရွက်တစ်ပိဿာလျှင် (၄၀၀) ကျပ်၊ ခဝဲသီးတစ်ပိဿာလျှင် (၈၀၀) ကျပ်၊  ဘူးသီးတစ်လုံးလျှင် (၅၀၀) ကျပ်၊ ရွှေဖရုံသီးတစ်လုံးလျှင် (၆၀၀) ကျပ်တို့ဖြင့်ရောင်းချပေးခဲ့ကြောင်း သိရှိရပါသည်။

DOCA(မွန်)

     ကျောက်ဖရုံသီးပင်သည် နွယ်ပင်အမျိုးအစားဖြစ်ပါသည်။ အသီးနှင့်အညွှန့်(၂) မျိုးလုံး စားသုံး၍ရပါသည်။ အရသာမှာ အချိုနှင့်အခါး(၂)မျိုးရှိပါသည်။ အခါးမျိုးမှာ အလုံးအနည်းငယ် အရွယ် အစားသေးပြီး အချိုမျိုးမှာ အလုံးကြီးပါသည်။ ဒေသထွက်ကျောက်ဖရုံသီးမှာ အများအားဖြင့် အချိုမျိုးဖြစ်ပါသည်။ ကျောက်ဖရုံပင်တစ်ပင်လုံးသည် ဆေးဖက်သောအပင်တစ်မျိုးဖြစ်ပါသည်။ အသီးတွင် ရေဓါတ်၊ အမျှင်ဓါတ်များစွာပါဝင်သောကြောင့် အစာခြေဖျက်မှုကိုအားကောင်းစေပြီး ကျန်းမာရေးအတွက် ကောင်းမွန်စေပါသည်။ ကယ်လိုဓါတ်ပါဝင်မှုနည်းသည့်အတွက် ဆီးချိုသမားများ စားလျှင်သင့်တော်ပါသည်။ အဝလွန်သူများအတွက် ကိုယ်အလေးချိန်လျော့ချရာတွင် အထောက်အကူပြုစေပြီး ကျောက်ကပ်သမားများအတွက်လည်း အထူးသင့်တော်ပါသည်။ အပူကိုငြိမ်းစေပြီး အဆိပ်အတောက်ကိုပြေစေသည့်အတွက် ခန္ဓာကိုယ်အတွင်း အပူဓါတ်များလျှင် ကျောက်ဖရုံသီးကို ဟင်းချိုချက်သောက်ပေးရုံဖြင့် အပူကိုကျစေသည့်အပြင် ဝမ်းချုပ်ရာတွင် ဖျော်ရည်အဖြစ် သောက်သုံးပေးလျှင် သက်သာစေပါသည်။ ကျောက်ဖရုံသီးကို ဟင်းချက်စားသောက်ခြင်း၊ မုန့်နှစ်ဖြင့်ကြော်စားခြင်းနှင့် ကျောက်ဖရုံအရွက်အား ပြုတ်၍သုပ်စားလျှင်လည်း အရသာကောင်းမွန်ပါသည်။

      ကျောက်ဖရုံသီးပင်အားစိုက်ပျိုးရာတွင် လွယ်ကူစေပြီးမြေနေရာဒေသမရွေး စိုက်ပျိုးနိုင်ပါသည်။ တစ်နိုင်တစ်ပိုင်စိုက်ပျိုးရာတွင် မြေပြင်တွင်အစေ့ကို ကျဲပက်၍စိုက်ပျိုးနိုင်သလို စီးပွားဖြစ် စိုက်ပျိုးလျှင် စင်ထိုးပြီး စနစ်တကျစိုက်ပျိူးကြပါသည်။ ထွက်ရှိရာဒေသများမှာ ရွှေတောင်မြို့နယ် တွင်မီးလောင်အုပ်စု၊ မီးလောင်ရွာတွင်လည်းကောင်း၊ ပြည်မြို့နယ်ဒေသ အနီးတဝိုက်ဖြစ်သော သဲကုန်း၊ ပုတီးကုန်းစသည့်ဒေသများတွင် အများအပြားထွက်ရှိပါသည်။ ဒေသထွက်ကုန်ဖြစ်သော ကျောက်ဖရုံသီးများအား ကုန်စိမ်းဒိုင်များမှ တစ်ဆင့် ရန်ကုန် သီရိမင်္ဂလာဈေးသို့ တင်ပို့ရောင်းချကြောင်း သိရပါသည်။ ပြည်မြို့နယ်ဈေးကွက်တွင် ကျောက်ဖရုံသီးတစ်လုံးလျှင် ယခုအပတ်တွင် အကြီးအသေးပေါ်မူတည်ပြီး တစ်လုံးလျှင် (၁၀၀၀ - ၁၅၀၀)ကျပ်ဖြင့် ရောင်းချပြီး အစိပ်စိပ်ပြီးရောင်းချရာတွင် တစ်စိပ်လျှင် (၂၀၀)ကျပ်နှုန်းဖြင့် ဈေးကွက်အတွင်း အရောင်းအဝယ်ဖြစ်ကြောင်း သိရပါသည်။

DOCA(ပဲခူး)

      ဝါးအမျိုးအနွယ်ပင်မျှစ်ကို Bamboo Shoots (Bamboo Sprouts) ဟုခေါ်ပြီး ရုက္ခဗေဒအရ Bambusa Valgaris, Pbyllostachys edulis ဟုခေါ်ပါသည်။ ဝါးအဖြစ်သို့မရောက်မီ ရက်သတ္တပတ် (၂)ပတ်သားမတိုင်မှီမှာပင် ချိုးယူ၍ စားသောက်ကြပါသည်။ ဝါးအမျိုးမျိုးရှိသကဲ့သို့ မျှစ်အမျိုးအစား အမျိုးမျိုးရှိပါသည်။ ပြည်မြို့တွင်ရောင်းချနေသော မျှစ်နုကို ထုံးဖို၊ အကောက်တောင် နှင့်ရခိုင်ရိုးမ တောတို့မှထွက်သော မျှစ်မျိုးဖြစ်ပါသည်။ မျှစ်မျိုးမှာ စိုက်ဝါး၊ ဝါးပိုးဝါးမှရသော မျှစ်မဟုတ်ဘဲ မျှင်ဝါးမှရရှိသောမျှစ်မျိုးမှာ မျှစ်ချိုမျိုးဖြစ်ပါသည်။ မျှင်ဝါးမှရရှိသောမျှစ်မှာ အဆစ်တိုပြီးနုကာ စားသုံးပါကရင်ပြည့် ရင်တောင့်ခြင်းမျိုးမရှိပဲ၊ ချက်စား၍လည်းကောင်း၊ အတို့အမြုပ်အဖြစ် စားသုံးရာတွင် အလွန်ကောင်းပါသည်။ ပြည်မြို့တွင် မျှစ်ဈေးမှာ ဩဂုတ်လ ပထမပတ်တွင် တစ်ပိဿာလျှင် (၁၅၀၀)ကျပ်(အချိန်(၃၀)ပါတစ်အိတ်ဈေး) ရောင်းချလျက်ရှိပါသည်။ တစ်ပတ်လျှင် မျှစ်အပို့ကုန်ချိန်မှာ (၃၇၃၁)ပိဿာခန့် ရောင်းချရကြောင်း သိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် စိုက်ပျိုးသောနွေစပါးအမျိုးအစားများမှာ ထိုင်းနှံကောက်၊ ရတနာတိုး၊ ရက်(၉၀)စပါး၊ GW-11 နှင့် ဗီယက်နမ်အမျိုးအစားများဖြစ်ပါသည်။ နွေစပါးဈေးမှာ ယခု ဩဂုတ်လတွင် စပါးတင်း(၄၆)ပေါင်တင်း(၁၀၀)လျှင် အစိုဓါတ် (၂၃%)ပါရှိ သည်ဈေးမှာ (၁၆၀၀၀၀၀)သိန်းကျပ် ရှိပြီး နွေဆန်တစ်အိတ်လျှင် (၆၃၀၀၀)ကျပ်ဖြင့် အရောင်းအဝယ်ရှိပါသည်။ နွေစပါးဈေးမှာ ယခင်လက တင်း(၁၀၀)လျှင် (၁၄၇၀၀၀၀)ကျပ်သာရှိပြီး ယခုလတွင် စပါးဈေးများမြင့်တက်ခဲ့ပါသည်။ ထိုသို့စပါးဈေးများမြင့်တက်ရခြင်းမှာ စပါးများရှားလာခြင်း၊ ကုန်သည်များမှ စပါးအဝယ်လိုက်လာသည့်အတွက်ကြောင့်လည်းကောင်း၊ စားသုံးသူများ အနေဖြင့်လည်း နွေဆန်သစ်များကို ရွေးချယ်ဝယ်ယူစားသုံးနေသည့်အတွက် စပါးဆန်ဈေးမြင့်တက်ခဲ့ရခြင်းဖြစ်ကြောင်း သိရပါသည်။

DOCA(ပဲခူး)