ပြည်တွင်းကုန်သွယ်မှုသတင်း

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ဆီထွက်သီးနှံမြေပဲကို နှစ်စဉ်စိုက်ပျိုးလျက်ရှိသော်လည်း ဒေသတွင်းစားသုံးဆီဖူလုံခြင်းမရှိ၍ အခြားမြို့နယ်များဖြစ်သည့် ချောက်၊ ကျောက်ပန်းတောင်း၊ ဆင်ဖြူကျွန်း၊ စလင်း၊ မကွေးမြို့များမှ ဝယ်ယူတင်သွင်း၍ စားသုံးဆီများကြိတ်ခွဲထုတ်လုပ်လျက်ရှိပါသည်။ ‌

   ဒေသတွင်းမြေပဲဆံဈေးကွက်အနေဖြင့် ၂၀၂၃ခုနှစ်၊ နိုဝင်ဘာလတွင် မြေပဲဆီဆံတစ်ပိဿာလျှင် ကျပ်(၅၈၀၀-၆၀၀၀)ဈေးအနိမ့်ဖြင့် အရောင်းအဝယ်ဖြစ်လျက်ရှိခဲ့ရာမှ ဒီဇင်ဘာလတွင် မြေပဲဈေးနှုန်းမြင့်တက်လာခဲ့ပြီး မြေပဲဆီဆံတစ်ပိဿာလျှင် ကျပ်(၆၃၀၀-၆၅၀၀)၊ မြေပဲဆံအခြမ်း အောက်ကျတစ်ပိဿာလျှင် ကျပ်(၄၆၀၀-၄၈၀၀)ပေါက်ဈေးဖြစ်ကြောင်း၊ ၂၀၂၄ခုနှစ်၊ ဇန်နဝါရီလ (ပထမပတ်)အထိ မြေပဲဈေးကွက်တည်ငြိမ်၍ အရောင်းအဝယ်ဖြစ်လျက်ရှိပြီး ဇန်နဝါရီလ (ဒုတိယပတ်) တွင် မြေပဲဆီဆံဈေးနှုန်းမြင့်တက်လာပြီး တစ်ပိဿာလျှင် ကျပ်(၆၃၅၀-၆၆၀၀)ဈေးနှုန်းဖြင့် အရောင်းအဝယ်ဖြစ်ခဲ့ကြောင်း၊ ဇန်နဝါရီလ(တတိယပတ်)မှ ယခုဖေဖော်ဝါရီလ (ပထမပတ်)ထိ မြေပဲဆီဆံတစ်ပိဿာလျှင် ကျပ်(၆၆၀၀-၆၈၀၀)ဖြင့် ဈေးနှုန်းမြင့်တက်လာပြီး အရောင်းအဝယ်ဖြစ်နေကြောင်း၊ မြေပဲဈေးနှုန်း/ဈေးကွက်မြင့်တက်လာရခြင်းမှာ စိုက်တောင်သူများတွင် မြေပဲလက်ကျန်နည်းခြင်းနှင့် ပဲခွဲစက်ကုန်သည်များတွင်လည်း လှောင်ထားသောမြေပဲများလက်ကျန်နည်းပြီး ဈေးကွက်တွင် မြေပဲဆံအဝင်နည်းခြင်းကြောင့် မြေပဲဆီဆံဈေးနှုန်းမြင့်တက်လာရခြင်းဖြစ်ကြောင်း၊ ပြည်တွင်းမြေပဲဈေးကွက်အတက်အကျပေါ်မူတည်ပြီး မြေပဲဆီဈေးနှုန်းမှာလည်းအတက်အကျရှိကြောင်း၊ မြို့ပေါ်ရှိ ဆီစက်လုပ်ငန်းရှင်ထံမှသိရပါသည်။

      ဒေသတွင်းမြေပဲဆီဈေးကွက်အနေဖြင့် ၂၀၂၄ခုနှစ်၊ ဇန်နဝါရီလတွင် မြေပဲဆီတစ်ပိဿာလျှင် ဆုံဆီ ကျပ်(၁၆၀၀၀)၊ စက်ဆီ ကျပ်(၁၃၅၀၀-၁၄၀၀၀)၊ ပဲရောဆီ ကျပ်(၈၀၀၀-၁၀၀၀၀) ဈေးနှုန်းတို့ဖြင့်အရောင်းအဝယ်ဖြစ်ခဲ့ပြီး ယခုဖေဖော်ဝါရီလ (ပထမပတ်)တွင် မြေပဲဆုံဆီတစ်ပိဿာလျှင် ကျပ်(၁၆၅၀၀)၊ ပဲစက်ဆီတစ်ပိဿာလျှင် ကျပ်(၁၅၀၀၀)၊ ပဲရောဆီတစ်ပိဿာလျှင် ကျပ် (၉၀၀၀-၉၅၀၀) ဖြင့်အရောင်းအဝယ်ဖြစ်လျက်ရှိပြီး ယခုဖေဖော်ဝါရီ(ပထမပတ်)တွင် မြေပဲဆံဈေးနှုန်းအနည်းငယ်မြင့်တက်၍  ဇန်နဝါရီလ(ပထမပတ်)ထက် မြေပဲဆီတစ်ပိဿာလျှင် ကျပ်(၁၀၀၀) ခန့်ဈေးနှုန်းမြင့်တက်ကာ အရောင်းအဝယ်ဖြစ်လျက်ရှိကြောင်းနှင့် ဒေသတွင်းပြည်သူများသည် ကျန်းမာရေးနှင့် ညီညွှတ်သည့် မြေပဲဆီကို ယခင်ထက်ဝယ်ယူစားသုံးမှုများပြားလာ၍ ဆီကြိတ်ခွဲထုတ်လုပ်ရောင်းချဖြန့်ဖြူးသည့် ဆီစက်လုပ်ငန်းရှင်များအနေဖြင့် လုပ်ငန်းများကိုတွင်ကျယ်စွာလုပ်ကိုင်ဆောင်ရွက်လျက်ရှိကြောင်းသိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ဆန်လိုဒေသဖြစ်သောကြောင့် ဆန်စပါးအများဆုံးစိုက်ပျိုးထွက်ရှိရာ ဒေသများဖြစ်သော အခြားတိုင်းဒေသကြီးများနှင့် မြို့နယ်များမှ ဆန်များဝယ်ယူတင်သွင်းလျက်ရှိသော မြို့ဖြစ်ပါသည်။ မကွေးတိုင်းဒေသကြီး၊ ဆင်ဖြူကျွန်း၊ စလင်း၊ ရှောက်တောနှင့် တောင်တွင်းကြီးမြို့များနှင့် ဧရာဝတီတိုင်းဒေသကြီး၊ ပုသိမ်၊ မြောင်းမြမြို့များနှင့် စစ်ကိုင်းတိုင်းဒေသကြီး၊ ရွှေဘိုဒေသများမှလည်း မော်တော်ယာဉ်များဖြင့် ဆန်များဝင်ရောက်လျက်ရှိသည်။ ၂၀၂၄ခုနှစ်၊ ဖေဖော်ဝါရီလ(ပထမပတ်)တွင် ဆန်(အသစ်နှင့်အဟောင်း)များဝင်ရောက်လျက်ရှိပြီး ယခင်ဇန်နဝါရီလ(ပထမပတ်)ထက် ဆန်ဈေးနှုန်းများမြင့်တက်လာသည်ကိုတွေ့ရှိရသည်။

       ဖေဖော်ဝါရီလ(ပထမပတ်)တွင် ဆန်ဈေးနှုန်းများမှာ ဆင်ဖြူကျွန်း ဧရာပဒေသာဆန်တစ်အိတ်လျှင် ကျပ်(၁၆၀၀၀၀)၊ စလင်းဆန် ဒို့ရွှေအိုး(အဟောင်း) တစ်အိတ်လျှင် ကျပ် (၁၆၀၀၀၀)၊ စလင်းဆန် ဒို့ရွှေအိုး(အသစ်) တစ်အိတ်လျှင် ကျပ်(၁၅၀၀၀၀)၊ဆင်ဖြူကျွန်း မနောသုခ ဆန် (အဟောင်း) တစ်အိတ်လျှင် ကျပ်(၁၃၀၀၀၀)၊ ဆင်ဖြူကျွန်း မနောသုခဆန် (အသစ်)  တစ်အိတ်လျှင် ကျပ်(၁၁၀၀၀၀)၊ ဆင်းသုခ ဆင်ဖြူကျွန်း (အဟောင်း) တစ်အိတ်လျှင် ကျပ်(၁၃၀၀၀၀)၊ မနောသုခ ဆင်ဖြူကျွန်းဆန် (အဟောင်း) တစ်အိတ်လျှင် ကျပ်(၁၃၀၀၀၀)၊ မနောသုခ ဆင်ဖြူကျွန်းဆန် (အသစ်) တစ်အိတ်လျှင် ကျပ်(၁၂၀၀၀၀)၊ မြန်မာပြည်အောက်ပိုင်းရှိ မြောင်းမြဧရာပဒေသာဆန် (အဟောင်း) တစ်အိတ်လျှင် ကျပ်(၁၃၀၀၀၀)၊ မြောင်းမြရာပြည့်ဖန်သီးဆန် (အဟောင်း) တစ်အိတ်လျှင် ကျပ်(၁၀၀၀၀၀)၊ မြောင်းမြဆန် စိန်ပုလဲသုခဆန် (အဟောင်း) တစ်အိတ်လျှင် ကျပ်(၁၀၀၀၀၀)၊ ဖန်သီး အောင်တံခွန်ဆန် (အဟောင်း) တစ်အိတ်လျှင် ကျပ် (၁၀၀၀၀၀) တို့ဖြင့်အရောင်းအဝယ်ဖြစ်လျက်ရှိပြီး ရွှေဘိုပေါ်ဆန်းမွှေး(အဟောင်း)တစ်အိတ်လျှင် ကျပ်(၁၈၀၀၀၀)၊ ရွှေဘိုပေါ်ဆန်းမွှေး (အသစ်) တစ်အိတ်လျှင် ကျပ်(၁၆၀၀၀၀)၊ မြောင်းမြပေါ်ဆန်း(အဟောင်း)တစ်အိတ်လျှင် ကျပ်(၁၇၅၀၀၀)၊ မြောင်းမြပေါ်ဆန်း (အသစ်) တစ်အိတ်လျှင် ကျပ်(၁၄၅၀၀၀)၊ ကောက်ညှင်းဆန်(အသစ်)တစ်အိတ်လျှင် ကျပ်(၁၃၀၀၀၀)ဖြင့် ဈေးနှုန်းမြင့်တက်ကာ အရောင်းအဝယ်ဖြစ်နေကြောင်းသိရှိရပါသည်။

       ယခင်ဇန်နဝါရီလ(ပထမပတ်)နှင့် ယခုဖေဖော်ဝါရီလ(ပထမပတ်) ဈေးနှုန်းတို့ကိုနှိုင်းယှဉ်ကြည့်ရာ ဆန်ဈေးနှုန်းများမှာ တစ်အိတ်လျှင် ကျပ်(၉၀၀၀မှ ၁၅၀၀၀)ခန့်အထိ ဈေးနှုန်းမြင့်တက်လာကြောင်း၊ ဆန်ဈေးနှုန်းများမြင့်တက်ရခြင်းမှာ ဆန်တစ်အိတ်လျှင် ယခင်သယ်ယူစရိတ်မှာ ကျပ် (၇၀၀) မှ ယခုအပတ်တွင် ကျပ်(၁၀၀၀)အထိဈေးနှုန်းမြင့်တက်လျက်ရှိပြီး ဆန်(အသစ်)များပေါ်ချိန်တွင် စားသုံးသူများနှင့် လုပ်ငန်းရှင်များ၏ ဝယ်ယူသိုလှောင်မှုများခြင်းကြောင့် ဈေးနှုန်းမြင့်တက်လာရခြင်းဖြစ်ကြောင်း ဆန်ရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(မကွေး)         

      စစ်ကိုင်းတိုင်းဒေသကြီး ၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကအားထားလုပ်ကိုင်သော ဒေသတစ်ခုဖြစ်ပြီး၊ ကန့်ဘလူခရိုင်အတွင်း အဓိကစိုက်ပျိုးသည့် သီးနှံများတွင် တစ်ခုအပါအဝင်ဖြစ်သည့် ပဲစဉ်းငုံများ ရိတ်သိမ်းချိန်ဖြစ်ရာ ဈေးကွက်အတွင်းဈေးကောင်းရသဖြင့် စိုက်ပျိုးသူတောင်သူများ အဆင်ပြေလျက်ရှိကြောင်း သိရသည်။

      ကန့်ဘလူခရိုင်အတွင်းရှိ ကျေးရွာများတွင် ရေမြေသဘာဝနှင့်ပိုမိုကိုက်ညီသည့် ပဲစဉ်းငုံသီးနှံများကို အခြားသီးနှံများထက် ပိုမိုစိုက်ပျိုးလျက်ရှိရာ အထွက်နှုန်းကောင်းမွန်ပြီး ဈေးကွက်အတွင်း ဈေးနှုန်းမြင့်တက်လျက်ရှိရာ ယခုနှစ် ဖေဖော်ဝါရီလ ပထမပတ်အတွင်းဖြစ်ပေါ်ခဲ့သော ပဲစဉ်းငုံဈေးနှုန်းများမှာ ပဲစဉ်းငုံနီ (၁)တင်းလျှင် ကျပ် ၁၂၀၀၀၀ ၊ ပဲစဉ်းငုံဖြူ (၁)တင်းလျှင် ကျပ် ၁၁၀၀၀၀ ဖြင့် အရောင်းအဝယ်ဖြစ်လျက်ရှိကြောင်း ယခင်နှစ်တွင် ပဲစဉ်းငုံနီ (၁)တင်းလျှင်ကျပ် ၆၅၀၀၀၊ ပဲစဉ်းငုံဖြူ (၁)တင်းလျှင် ကျပ် ၅၇၀၀၀ သာရှိခဲ့ပြီး ယခင်နှစ်နှင့်နှိုင်းယှဉ်ကြည့်လျှင် ပဲစဉ်းငုံဈေးနှုန်းများမှာ သိသိသာသာဈေးနှုန်းမြင့်တက်လာခဲ့ပြီး ပဲစဉ်းငုံနီ (၁)တင်းလျှင် ကျပ် ၅၅၀၀၀ နှင့် ပဲစဉ်းငုံဖြူ (၁) တင်းလျှင် ကျပ် ၅၃၀၀၀ ခန့်ပိုမိုရောင်းချရသဖြင့် စိုက်ပျိုးသူတောင်သူများ ဝင်ငွေတိုးကာ မိသားစုအဆင်ပြေလျက်ရှိကြောင်း တောင်သူဦးကျော်မောင်ထံမှ သိရသည်။

DOCA(စစ်ကိုင်း)

     မုံရွာမြို့၊ ချင်းတွင်းရတနာစျေး၌  ရောင်းချနေသော ပုဇွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်ကြောင်းသိရပါသည်။ ပုဇွန်၊ ငါးခြောက်စျေးနှုန်းများမှာ ဝင်ရောက်သည့် ဒေသအ‌ပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိပါသည်။

     ယခုဖေဖော်ဝါရီလ ပထမအပတ်တွင် ရောင်းချနေသော ဈေးနှုန်းများမှာ ပုဇွန်ခြောက် (၁)ပိဿာလျှင် ကျပ်(၆၅၀၀၀)မှ ကျပ်(၈၅၀၀၀)၊ ငါးရံ့ခြောက် (၁)ပိဿာလျှင် ကျပ်(၆၀၀၀၀မှ ၈၀၀၀၀)၊ ငါးပုတ်လုံးခြောက်(၁)ပိဿာလျှင် ကျပ်(၁၆၀၀၀မှ ၁၈၅၀၀)၊  ငါးပုတ်သင်(၁)ပိဿာလျှင် ကျပ်(၁၅၀၀၀မှ ၁၈၀၀၀) ၊ အာပြဲခြောက် (၁)ပိဿာလျှင် ကျပ်(၁၅၀၀၀မှ ၂၂၀၀၀)၊ ငါးကျည်းခြောက် (၁)ပိဿာလျှင် ကျပ်(၃၅၀၀၀မှ ၄၅၀၀၀)၊ ငါးနီတူးခြောက် (၁)ပိဿာလျှင် ကျပ်(၁၂၀၀၀ မှ ၁၄၀၀၀)၊ ငါးဖန့်ဝိုင်း(ငါးပိကောင်) (၁)ပိဿာလျှင် ကျပ်(၁၅၀၀၀မှ ၁၇၅၀၀)ရှိကြောင်း ချင်းတွင်းရတနာဈေးတွင်ရောင်းချနေသော ငါးခြောက်ကုန်သည်များထံမှ သိရပါသည်။

DOCA(စစ်ကိုင်း)

     မကွေးတိုင်းဒေသကြီးအစိုးရအဖွဲ့၏ လမ်းညွှန်မှုဖြင့် မင်းဘူးခရိုင်၊ မင်းဘူးမြို့၊ အမှတ်(၃) ရပ်ကွက်၌ မြို့နယ်ဆီလုပ်ငန်းရှင်များအသင်းအနေဖြင့် (၁-၂-၂၀၂၄)ရက်နေ့၊ နံနက်(၀၉း၀၀)နာရီအချိန်တွင် လူတစ်ဦးလျှင် စားအုန်းဆီတစ်ပိဿာ ကျပ်(၅၀၀၀)နှုန်းဖြင့် စားအုန်းဆီပိဿာ (၅၅၀)ပိဿာရောင်းချပေးခဲ့ကြောင်းသိရှိရပါသည်။

      ထိုသို့ရောင်းချပေးနေမှုအား မြို့နယ်ကြီးကြပ်ရေးကော်မတီဖြစ်သည့် မြို့နယ်အုပ်ချုပ်ရေးမှူး၊ မြို့နယ်ရဲတပ်ဖွဲ့မှူး၊ စားသုံးသူရေးရာဦးစီးဌာန၊ မြို့နယ်တာဝန်ခံနှင့် မြို့နယ်စည်ပင်သာယာရေးအဖွဲ့တို့ပူးပေါင်း၍ စားအုန်းဆီပေပါ (၅) လုံးကုန်အောင်ရောင်းချမှုရှိ/မရှိ၊ အလေးချိန်မှန်ကန်မှုရှိ/မရှိနှင့် သတ်မှတ်ဈေးနှုန်းဖြင့်ရောင်းချမှုရှိ/မရှိတို့ကို သွားရောက်၍ ကွင်းဆင်းကြီးကြပ်ဆောင်ရွက်ခဲ့ပါသည်။ ၎င်းစားအုန်းဆီရောင်းချနေသည့်နေရာသို့ ခရိုင်စီမံအုပ်ချုပ်ရေးမှူးအဖွဲ့ကလည်း လာရောက်အားပေးခဲ့ကြောင်းသိရှိရပါသည်။

DOCA(မကွေး)