ပြည်တွင်းကုန်သွယ်မှုသတင်း

       ဝါးတန်းဆန်စပါးကုန်စည်ဒိုင်သို့ (၆-၈-၂၀၂၄) ရက်နေ့မှ (၁၂-၈-၂၀၂၄) ရက်နေ့အထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၂၇၈၅၈) အိတ်၊ ပေါ်ကျွဲ (၆၆၆၈) အိတ်၊ ဧည့်မထ (၅၉၉၀၄) အိတ်၊ ဆန်ကွဲ (၄၀၃၃) အိတ်ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၆၅၁၂) အိတ်နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၁၅၈၈၀) အိတ်၊ ငစိန် (၁၂၁၀) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ် ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံမြို့နယ်များမှ ဧည့်မထ (၁၇၄၂၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)

       ရန်ကုန်တို်ငးဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာနကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့  နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန် အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်း ချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ ဩဂုတ်လ (၆) ရက်နေ့မှ ဩဂုတ်လ (၁၂) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ မုံရွာ၊ မင်းဘူး၊ တောင်သာဒေသတို့မှ ကြက်သွန်နီ (၆၉၆၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့်ပြန်လည်စီးထွက်မှုရှိ ကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၂၇၈၄၀၀) ကျန်ရှိကြောင်း ကုန်စည်ဒိုင်သတင်းအရသိရှိရသည်။ ဆိပ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၁၅၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၁၀၀၊ ရှယ်မှာ ကျပ်၂၂၀၀၊  မြင်းခြံကြက်သွန်နီ(အသစ်) အချောတစ်ပိဿာလျှင် ကျပ်၁၆၀၀၊ အသန့်မှာ တစ်ပိဿာလျှင် ကျပ်၁၉၀၀၊ အကြီးမှာ ကျပ်၂၀၀၀၊ ရှယ်မှာ ကျပ်၂၁၀၀၊ မုံရွာကြက်သွန်နီ(အသစ်) အချောတစ်ပိဿာလျှင် ကျပ်၁၅၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၁၀၀၊ ရှယ်မှာ ကျပ်၂၂၀၀၊ မင်းဘူးကြက်သွန်နီ(အသစ်) အသန့်မှာ တစ်ပိဿာလျှင် ကျပ်၁၈၀၀၊ အကြီးမှာ ကျပ်၁၉၀၀၊ ရှယ်မှာ ကျပ်၂၂၀၀၊ တောင်သာ ကြက်သွန်နီ(အသစ်) အချောတစ်ပိဿာလျှင် ကျပ်၁၄၅၀၊ အသန့်မှာ တစ်ပိဿာလျှင် ကျပ်၁၇၅၀၊ အကြီးမှာ ကျပ်၁၉၅၀ စသည်ဖြင့် ဈေးနှုန်းအသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

      ဝါဆိုလသည် မြန်မာပြက္ခဒိန်၏ စတုတ္ထမြောက်လဖြစ်ပြီး ရာသီခွင်အားဖြင့် ကရကဋ်ရာသီဟုခေါ်ဆိုပါသည်။ အထိမ်းအမှတ်ပန်းမှာ ပုန်းညက်ပန်းဖြစ်ပါသည်။ ဝါဆိုဟူသောစကားမှာ ပါဠိစကား “ ဝါသ” မှ တိုက်ရိုက်လာသော စကားဖြစ်ပြီး “ နေခြင်း ” ဟုအဓိပ္ပါယ်ရသည်။ “ ဆို ” ဟူသည်မှာ “ရွတ်ဆိုခြင်း” ကိုခေါ်ဆိုပါသည်။ ထို့ကြောင့် ရဟန်းတော်များသည် ကျောင်း၌ နေပါမည်ဟု အဆိုပြုသောလကို ဝါဆိုလ ဟုခေါ်ဆိုသည်။ ဗုဒ္ဓဘာသာတွင် ဝါဆိုလပြည့်ကျော် ၁ရက်နေ့မှ သီတင်းကျွတ်လပြည့်နေ့အထိ ကာလကို ဝါတွင်းသုံးလကာလဟုသတ်မှတ်ထားရှိရာ ရဟန်းတော်များမှာ ဝါဆိုဝါကပ်ခြင်းပြုလုပ်ကြပါသည်။

          ရဟန်းတော်များသည် သီတင်းသုံးရာနေရာတွင် ဝါဆိုလပြည့်ကျော် ၁ရက်နေ့ည၌ စုပေါင်း၍ “ဝါတွင်းသုံးလတာကာလပတ်လုံး တစ်ရပ်တစ်ပါးသို့မသွားဘဲ တစ်ကျောင်းတစ်နေရာတွင် သီတင်းသုံးပါမည်” ဟု ရွတ်ဆိုအဓိဋ္ဌာန်ပြုကြခြင်းအား ဝါဆိုဝါကပ်ခြင်း ဟုခေါ်ပါသည်။

      ဝါဆိုရန် နီးကပ်သည့်အချိန်ဖြစ်စေ၊ ဝါတွင်းကာလတွင်ဖြစ်စေ လှူဒါန်းသည့်သင်္ကန်းကို ဝါဆိုသင်္ကန်းဟုခေါ်ပါသည်။ ဗုဒ္ဓဘာသာဝင်တို့သည် ဝါတွင်းကာလတွင် အခြားကာလများထက်ပိုမို၍ အလှူဒါနပြုလုပ်ခြင်းများ၊ သီလဆောက်တည်ခြင်းနှင့် ဝါဆိုသင်္ကန်းကပ်လှူခြင်းများပြုလုပ်ကြပါသည်။ ဝါဆိုသင်္ကန်းကပ်လှူခြင်းတွင် သင်္ကန်းလှူရခြင်းအကျိုးအပြင် အဝတ်အထည်လှူဒါန်းခြင်း၏ အကျိုးများကိုလည်းရရှိစေနိုင်ကြောင်းသိရှိရပါသည်။ ဝါတွင်းကာလတွင် သင်္ကန်းအမျိုးအစားပေါ်မူတည်၍ သင်္ကန်းတစ်စုံလျှင် ကျပ်၄၅၀၀၀မှ ကျပ်၁၇၀၀၀၀ထိဈေးရှိပြီး အရောင်းအဝယ်သွက်လျက်ရှိကြောင်းသိရှိရပါသည်။

DOCA(ရှမ်း)

      ၁၃-၈-၂၀၂၄ ရက်နေ့၌ ပေါင်မြို့နယ်တွင် စားသုံးသူပြည်သူများ သက်သာသောဈေးနှုန်းဖြင့် ဝယ်ယူစားသုံးနိုင်ရန် ပေါင်မြို့နယ်ရှိ နတ်မှော်ကျေးရွာနှင့် ညောင်ကုန်းလေးကျေးရွာတို့တွင် အခြေခံစားသောက်ကုန်ဖြစ်သော ဆန်နှင့်ဆီအားရောင်းချပေးခဲ့ရာ၌ မြို့နယ်အထွေထွေအုပ်ချုပ်ရေးဦးစီးဌာန၏ ကြီးကြပ်စီမံမှုဖြင့် မြို့နယ်ဆန်စက်လုပ်ငန်းရှင်များအသင်း၊ ဆန်ကုန်သည်အသင်း၊ မြို့နယ်စားသုံးဆီကိုယ်စားလှယ်တို့ပူးပေါင်းပါဝင်၍ ရောင်းချပေးခဲ့ခြင်းဖြစ်ကြောင်းသိရှိရပါသည်။

       ထိုသို့ရောင်းချပေးခဲ့ရာ၌ အိမ်ထောင်စု (၈၀၀/၉၀၀)မှ လောက်ငှစွာဝယ်ယူအားပေးခဲ့ကြပြီး ပေါ်ဆန်း (ဒေသ) တစ်ပြည်လျှင် (၅၀၀၀) ကျပ်၊ ဧည့်မထတစ်ပြည်လျှင် (၃၀၀၀) ကျပ်၊ စားသုံးဆီတစ်ပိဿာလျှင် (၆၄၆၄) ကျပ်ဖြင့်ရောင်းချပေးခဲ့ကြောင်းသိရှိရပါသည်။

DOCA(မွန်)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူပဲဈေးကွက်သို့ နေ့စဉ် ဆီထွက်သီးနှံနှင့်ပဲမျိုးစုံ ဝင်ရောက်အရောင်းအဝယ်ဖြစ်ရာတွင် ပဲတီစိမ်းသေး(ခေါ်)ပဲနောက်သီးနှံများ ၂၀၂၄ခုနှစ်၊ ဩဂုတ်လ (ပထမပတ်)မှစ၍ ဝင်ရောက်အရောင်းအဝယ်ဖြစ်လျက်ရှိသည်။ ပဲနောက်သီးနှံကို တစ်နှစ်လျှင် မိုး၊ ဆောင်းဟူ၍ နှစ်ရာသီစိုက်ပျိုးကြပြီး ပခုက္ကူခရိုင်အတွင်းရှိ စိုက်ပျိုးမှုများသော ပခုက္ကူကျွန်းဒေသများနှင့် မြိုင်မြို့နယ်အတွင်းရှိ ကျေးရွာများမှထွက်ရှိသော ပဲနှောက်သီးနှံများ အများဆုံးဝင်ရောက်ကြောင်း၊ နေ့စဉ် ပိဿာ(၃၀)ဝင်အိတ်(၃၀၀မှ ၅၀၀ထိ)ဝင်ရောက်ကြောင်း၊ သီးနှံပေါ်ချိန်ဖြစ်၍ ဝင်ရောက်မှုများကြောင်း၊ ယခုနှစ်တွင် သီးနှံစိုက်ပျိုးချိန် မိုးရွာသွန်းမှုနည်းခြင်းကြောင့် သီးနှံထွက်ရှိမှုနည်းကြောင်းသိရှိရသည်။

       ဈေးနှုန်းအနေဖြင့် ဩဂုတ်လ(ဒုတိယပတ်)တွင် ပဲတီစိမ်း(ခေါ်)ပဲနှောက်သီးနှံတစ်တင်းလျှင် ကျပ်(၇၆၃၀၀-၇၅၀၀၀)ဈေးနှုန်းဖြင့်အရောင်းအဝယ်ဖြစ်ပြီး ယခင်ဩဂုတ်လ(ပထမပတ်)တွင် တစ်တင်းလျှင် ကျပ်(၇၃၅၀၀ - ၇၂၅၀၀)ဈေးနှုန်းရှိ၍ တစ်ပတ်အတွင်း ပဲတီစိမ်းတစ်တင်းလျှင် ကျပ်(၂၈၀၀)ခန့်ဈေးတက်ပြီး အရောင်းအဝယ်ဖြစ်ကြောင်း၊ ယခင်နှစ် သီးနှံပေါ်ချိန်တွင် ပဲတီစိမ်းသေးတစ်တင်းလျှင် ကျပ်(၅၅၀၀၀-၅၃၀၀၀)ဈေးနှုန်းရှိခဲ့ပြီး ယခင်နှင့် ယခုကာလတူဈေးနှုန်းနှိုင်းယှဉ်ပါက ပဲတီစိမ်းသေးတစ်တင်းလျှင် ကျပ်(၂၁၃၀၀)ခန့်ဈေးနှုန်းမြင့်တက်လာကြောင်း၊ ဈေးကွက်သို့ဝင်ရောက်လာသည့် ပဲတီစိမ်းသေး(ပဲနှောက်)အသစ်များကို ဒေသတွင်းဝယ်ယူစားသုံးမှုအပြင် ရန်ကုန်မြို့သို့တင်ပို့လျက်ရှိပြီး ထိုမှတစ်ဆင့် ပြည်ပပို့ကုန်အဖြစ်လည်း တင်ပို့လျက်ရှိကြောင်း ဈေးကွက်မှသိရှိရပါသည်။

DOCA(မကွေး)