ပြည်တွင်းကုန်သွယ်မှုသတင်း

      ပဲခူးတိုင်းဒေသကြီး၊ ပြည်မြို့ရှိ ပဲမျိုးစုံဈေးကွက်တွင် နေ့စဉ်အရောင်းအဝယ်ဖြစ်လျက်ရှိသောပဲများအနက် မတ်ပဲ၊ ပဲစင်းငုံသီးနှံများမှာ ဈေးပြိုင်မြင့်တက်လျက်ရှိပြီး ကုလားပဲနှင့်ပဲကြီးသီးနှံများမှာမူ ပြည်ပဝယ်လိုအားကောင်းသော မတ်ပဲ၊ ပဲစင်းငုံသီးနှံများကဲ့သို့ ဈေးကောင်းရရှိမှုမရှိခဲ့ဘဲ ယခု၂၀၂၄ခုနှစ်၌ ဈေးအေးနေသော ပဲသီးနှံများဖြစ်ကြောင်းသိရပါသည်။ ၂၀၂၄ခုနှစ်၊ ဇွန်လတွင် အဆိုပါပဲများအားလုံး၏ ပဲသစ်ပေါ်ချိန်မဟုတ်သဖြင့် ပဲအဝင်အနည်းငယ်နှင့် လက်ကျန်ပဲများသာ အရောင်းအဝယ်ဖြစ်လျက်ရှိနေပါသည်။ ၂၀၂၄ခုနှစ်အတွင်း ဈေးမြင့်တက်မှုရှိခဲ့သော မတ်ပဲ၊ ပဲစင်းငုံသီးနှံနှင့် ယခုနှစ်တွင် ဈေးငြိမ်နေခဲ့သော ပဲကြီး၊ ကုလားပဲသီးနှံများ၏ နှစ်အလိုက် ကာလတူအချိန်တွင် အရောင်းအဝယ်ဖြစ်ခဲ့သည့်ဈေးနှုန်းများကို အောက်ပါအတိုင်းလေ့လာသိရှိရပါသည်-

စဉ်      ပဲအမျိုးအစား  ၂၀၂၀            ၂၀၂၁            ၂၀၂၂            ၂၀၂၃            ၂၀၂၄(တင်းဈေး)

                               ဇွန်               ဇွန်               ဇွန်               ဇွန်               ဇွန်          (ကျပ်)

၁။       မတ်ပဲ            ၃၂၀၀၀          ၃၈၀၀၀         ၅၄၀၀၀         ၇၂၅၀၀          ၁၁၀၀၀၀

၂။       ပဲစင်းငုံ          ၂၆၀၀၀          ၃၄၅၀၀         ၄၈၅၀၀         ၉၈၀၀၀          ၁၄၅၀၀၀

၃။       ကုလားပဲ      ၂၅၃၀၀          ၃၁၀၀၀         ၄၉၅၀၀         ၈၇၀၀၀          ၈၆၅၀၀

၄။       ပဲကြီး(ရွှေကျွန်း)၂၈၀၀၀       ၄၅၀၀၀         ၄၅၀၀၀         ၉၈၀၀၀          ၉၂၀၀၀

                 (ကမ်းနား)၂၅၀၀၀        ၄၀၀၀၀         ၇၀၀၀၀         ၉၃၀၀၀          ၈၅၀၀၀

        မတ်ပဲသီးနှံအနေဖြင့် (၅)နှစ်တာကာလအတွင်း နှစ်အလိုက်ဈေးနှုန်းများနှိုင်းယှဉ်မှုအရ နှစ်စဉ် ပဲဈေးကွက်အတွင်း အခြားပဲများဖြစ်သော ပဲစင်းငုံ၊ ကုလားပဲ စသည့်သီးနှံများထက် ဈေးပိုရနေခဲ့ပြီး ပဲကြီးသီးနှံဈေးထက် ၂၀၂၀ခုနှစ်နှင့် ၂၀၂၄ခုနှစ်များတွင်သာဈေးပိုပြီး ကျန်နှစ်များမှာ ပဲကြီးသီးနှံဈေးထက် လျော့နည်းရောင်းဝယ်မှုဖြစ်ခဲ့ပါသည်။ မတ်ပဲသီးနှံမှာ ယခုမိုးရာသီကာလတွင် ပဲဟောင်းလက်ကျန်များဖြင့်သာ ရောင်းဝယ်နေသည့်အတွက် အိတ်၂၀၀ကျော်ရောင်းဝယ်မှုဖြစ်ခဲ့ပြီး ပဲသစ်ပေါ်ချိန်ကာလများတွင် အရောင်းအဝယ်ဖြစ်မှုပိုများသည့်အတွက် အိတ်ရေအများအပြားဝယ်လက်ပေါ်မူတည်၍ ရောင်းဝယ်မှုဖြစ်ကြောင်းသိရပါသည်။ ယခုနှစ်တွင် ပဲသစ်ပေါ်စကတည်းက ဈေးကောင်းရခဲ့ပြီး ပိဿာ(၂၀)ဝင်တစ်တင်းလျှင် ကျပ်၉သောင်းကျော်ဖြင့်ဈေးဖွင့်ခဲ့ပြီး ပဲအဝင်ပါးချိန် ဇွန်လအတွင်း၌မူ ပဲတစ်တင်းလျှင် ကျပ်၁သိန်းကျော်အထိဈေးဖွင့်ခဲ့ပြီး ပဲအဝင်ပါးချိန် ဇွန်လအတွင်း၌ ပဲတစ်တင်းလျှင် ကျပ်၁သိန်းကျော်အထိ ရောင်းဝယ်မှုဖြစ်နေခဲ့ကြပါသည်။

      ပဲစင်းငုံသီးနှံမှာ ၂၀၂၄ခုနှစ်၌ ပဲဈေးကွက်အတွင်း ဈေးအမြင့်ဆုံးဖြင့် အခြားပဲများထက် ရောင်းဝယ်နေကြပြီး ပြည်ပဝယ်လက်ပဲဈေးကွက်တွင်လည်း စံချိန်တင်မြင့်တက်ခဲ့သည့် သီးနှံတစ်မျိုးဖြစ်ခဲ့ပါသည်။ (၅)နှစ်တာဈေးနှုန်းနှိုင်းယှဉ်မှုအခြေအနေအရ မတ်ပဲသီးနှံထက် နှစ်စဉ် ဈေးလျော့ရောင်းဝယ်ခဲ့ရပြီး ယခင်နှစ်မှစ၍ ပဲဈေးကွက်၌ မတ်ပဲဈေးထက်ဈေးပိုရလာခဲ့ပြီး ယခု၂၀၂၄ခုနှစ်တွင်မူ ပဲစဉ်းငုံသီးနှံဈေးနှုန်းမှာ ပြည်ပဝယ်လိုအားရှိမှုအပေါ်မူတည်၍ ရောင်းဝယ်မှုဖြစ်ခဲ့ကာ ပိဿာ(၂၀) ဝင်တစ်တင်းလျှင် ၁၄၅၀၀၀ကျပ်အထိ ထိပ်ဆုံးမှာရပ်တည်နေလျက်ရှိခဲ့ပါသည်။ ပဲစင်းငုံသီးနှံသည် တစ်နှစ်တာလုံး ပဲဈေးကွက်၌ ရောင်းဝယ်မှုဖြစ်နေသည့် ပဲသီးနှံဖြစ်သော်လည်း   ပဲအထွက်လှိုင်ချိန် ဇန်နဝါရီလ၊ ဖေဖော်ဝါရီကာလများတွင် နေ့စဉ်ပဲဝင်ရောက်နေမှုများရှိခဲ့သလို ဝယ်လိုအားမှာလည်း အဝင်ရှိသလောက် အရောင်းအဝယ်ဖြစ်ခဲ့ပါသည်။ ကျန်ကာလများတွင်မူ လှောင်ပဲလက်ကျန်များဖြင့် ရန်ကုန်ဝယ်လက်ရှိမှုအပေါ်မူတည်၍ ရက်ခြားရောင်းဝယ်မှုဖြစ်ခဲ့ကြပါသည်။

       ကုလားပဲသီးနှံအနေဖြင့် ပဲဈေးကွက်၌ ပြည်တွင်းဝယ်လက်သမားများပါ လက်လီ/ လက်ကားရောင်းဝယ်မှုအဖြစ်များသည့်အတွက် နေ့စဉ်ပဲခွဲစက်သမားများ အဓိကဝယ်ယူမှုရှိသည့်သီးနှံဖြစ်ပြီး ပဲဈေးနှုန်းမှာ (၅)နှစ်တာကာလဖြစ်ပေါ်ခဲ့သည့် ဈေးနှုန်းအရ ၂၀၂၃ခုနှစ်မှစ၍ အခြားပဲများနည်းတူ ပဲဈေးနှုန်းများမြင့်တက်လာပြီး ပိဿာ(၂၀)ဝင်တစ်တင်းလျှင် ၈သောင်းကျပ်ကျော်ဖြင့် ရောင်းဝယ်ခဲ့ကြပါသည်။ ၂၀၂၃ခုနှစ်တွင် ကုလားပဲသီးနှံဈေးသည် မတ်ပဲသီးနှံထက် ဈေးလျော့နေခဲ့သော်လည်း ယခု၂၀၂၄ခုနှစ်တွင် မတ်ပဲသီးနှံဈေးနှုန်းများ ယခင်နှစ်ထက် မြင့်တက်လာမှုကြောင့် ကုလားပဲသီးနှံဈေးနှုန်းမှာ မတ်ပဲသီးနှံဈေးထက် ဈေးလျော့သွားခဲ့ပြီး ယခုနှစ်ကာလတူဈေးနှုန်းထက်လည်း လျော့နည်းနေခဲ့သည်ကိုတွေ့ရပါသည်။ ထို့ကြောင့် ယခု၂၀၂၄ခုနှစ်အတွင်း အဝယ်များအားလုံးလိုလို ဈေးမြင့်မှုများရှိသော်လည်း ပြည်ပစားသုံးမှုရှိသော ကုလားပဲသီးနှံဈေးနှုန်း ဈေးအေးနေသောနှစ်ဖြစ်ခဲ့ပါသည်။

         ပြည်တွင်းပဲဈေးကွက်မှာ အခြားပဲများနှင့်ယှဉ်လျှင် နှစ်စဉ်လိုလို ဈေးကောင်းရသော ပဲကြီးသီးနှံမှာ ယခု၂၀၂၄ခုနှစ်တွင် ပြည်ပဝယ်လိုအားကောင်းသော မတ်ပဲ၊ ပဲစင်းငုံသီးနှံများ ဈေးနှုန်းမြင့်တက်လာမှုများကြောင့် အဆိုပါပဲများထက် ဈေးလျော့နေခဲ့သလို ယခုနှစ်ဈေးနှုန်းထက်လည်း ဈေးလျော့နည်းရောင်းဝယ်နေခဲ့ကြပါသည်။ ပဲကြီးသီးနှံ၏ယခုနှစ်ရရှိသောဈေးမှာ ရွှေကျွန်း ပိဿာ (၂၀) ဝင်တစ်တင်းလျှင် ၉၂၀၀၀ကျပ်၊ ကမ်းနား ပိဿာ(၂၀)ဝင်တစ်တင်းလျှင် ၈၅၀၀၀ကျပ်ဖြင့် အသီးသီး‌ရောင်းဝယ်နေကြသည့်အတွက် ယခင်၂၀၂၃ခုနှစ်၏ ရရှိသောဈေးထက် တစ်တင်းလျှင် ကျပ်၅၀၀၀ကျော်ခန့်စီလျော့နည်း ရောင်းဝယ်နေခဲ့ကြပြီး ပဲကြီးသီးနှံအား ဒေသတွင်းပဲကြော်၊ ပဲလှော်ဖိုလုပ်ငန်းသမားများက အဓိကရောင်းဝယ်မှုဖြစ်ကြပါသည်။ နေ့စဉ်ပဲဈေးကွက်မှာ အိတ် (၂၀၀/၃၀၀) ကျော်ပုံမှန်ရောင်းဝယ်လျက်ရှိပြီး ပဲအဝင်မရှိတော့ဘဲ လက်ကျန်ပဲများဖြင့်သာ အရောင်းအဝယ်ဖြစ်နေကြောင်းသိရပါသည်။

DOCA(ပဲခူး)

       ပြည်ခရိုင်တွင် နွေစပါးစုစုပေါင်းစိုက်ဧကမှာ ၃၂၂၉၀ဧကရှိပြီး ၂၄၄၅ဧကသာရိတ်သိမ်းပြီးဖြစ်ပါသည်။ တစ်ဧကအထွက်နှုန်းအနေဖြင့် ၁၁၂.၆၉တင်းထွက်ရှိကြောင်းသိရပါသည်။ ၂၀၂၄ခုနှစ် နွေစပါးပေါ်ချိန်တွင် စပါး(၄၆)ပေါင်တင်း၁၀၀လျှင် ကျပ်၁၆သိန်းမှ ကျပ်၁၇သိန်းအထိဈေးရှိခဲ့ပြီး ဇွန်လပိုင်း နွေစပါးပေါ်စတွင် ပြည်မြို့နယ်တွင် စပါးတင်း၁၀၀လျှင် ၁၄၇၀၀၀၀ကျပ်၊ ပေါက်ခေါင်းမြို့နယ်တွင် စပါးတင်း၁၀၀လျှင် ၁၅၀၀၀၀၀ကျပ်၊ ရွှေတောင်မြို့နယ်တွင် စပါးတင်း၁၀၀လျှင် ၁၄၇၀၀၀၀ကျပ်နှင့် ပန်းတောင်းမြို့နယ်တွင် စပါးတင်း၁၀၀လျှင် ၁၄၇၀၀၀၀ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိပါသည်။ ဆန်ဈေးနှုန်းများအနေဖြင့် ရွှေတောင်မြို့နယ်တွင် နွေဆန်တစ်အိတ်လျှင် ၇၀၀၀၀ကျပ်၊ ပြည်မြို့နယ်တွင် နွေဆန်တစ်အိတ်လျှင် ၇၀၀၀၀ကျပ်၊ ပေါက်ခေါင်းမြို့နယ်တွင် နွေဆန်တစ်အိတ်လျှင် ၆၈၀၀၀ကျပ်နှင့် ပန်းတောင်းမြို့နယ်တွင် နွေဆန်တစ်အိတ်လျှင် ၆၇၀၀၀ကျပ်တို့ဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ပဲခူး)

       ပြည်မြို့နယ်အတွင်း ငှက်ပျောပင်များအား တစ်နိုင်တစ်ပိုင်စိုက်ပျိုးလျက်ရှိရာ သစ်ချီတင်ရွာ၊ ရှမ်းစုရွာများတွင် အများအပြားစိုက်ပျိုးကြပါသည်။ ငှက်ပျောပင်အားစိုက်ပျိုးရာတွင် တချို့ရွာသားများသည် မိမိတို့ပိုင်ဆိုင်သည့် အိမ်ခြံများ၏ဘေးပတ်လည်၊ နောက်ဖေးဘက် စသည်များတွင် အပင်၂၀မှ ၅၀အထိစိုက်ပျိုးထားကြောင်းသိရပါသည်။ စီးပွားဖြစ်စိုက်ပျိုးသော ဥယျာဉ်ခြံများတွင် တစ်ဧကလျှင် ငှက်ပျောပင်တစ်ပင်နှင့်တစ်ပင်အကွာအဝေးမှာ ၁၀ပေခြားစိုက်ပျိုးရပါသည်။ စိုက်ပျိုးသည့် ငှက်ပျောအမျိုးအစားများမှာ ဒေသအခေါ် ရခိုင်ငှက်ပျော၊ ဖီးကြမ်းငှက်ပျောသီးများဖြစ်ကြပါသည်။ ငှက်ပျောပင်တစ်ပင်စတင်စိုက်ပျိုးပြီး (၆)လအကြာတွင် အသီးများရင့်မှည့်လာပြီး ခုတ်ယူရောင်းချ၍ရပါသည်။ ၂၀၂၄ခုနှစ်၊ ဇွန်လ နောက်ဆုံးပတ်တွင် ငှက်ပျောသီးဈေးများမှာ  ရခိုင်ငှက်ပျောသီးတစ်ဖီးလျှင် ၁၅၀၀ကျပ်၊ ဖီးကြမ်းငှက်ပျောတစ်ဖီးလျှင် ၂၅၀၀ကျပ်ဖြင့် ဈေးကွက်အတွင်းရောင်းချပါသည်။ ပြည်မြို့အနီးရှိ သစ်ချီတင်ရွာနှင့် ရှမ်းစုရွာများမှထွက်ရှိသော ငှက်ပျောများကို ပြည်မြို့နယ်အတွင်းရှိ မြို့မစည်ပင်သာယာဈေး၊ မြို့သစ်ဈေး၊ အောင်မင်္ဂလာဈေးတို့တွင်ရောင်းချကာ ပြည်မြို့မှ ရန်ကုန်၊ နေပြည်တော် စသည့်မြို့များသို့လည်း တင်ပို့ရောင်းချကြောင်းသိရှိပါသည်။

     ရခိုင်ငှက်ပျောသီးမှာ အသီးအမှည့်ကိုစားသုံးရုံသာမက မုန့်ဟင်းခါးချက်ပြုတ်ရာတွင်လည်း ၎င်းကို ငှက်ပျောအူအဖြစ် အသုံးပြုကြောင်းသိရှိရပါသည်။ ရခိုင်ငှက်ပျောဖူးကို ကောက်ညှင်းဆန်မှုန့်ဖြင့် ရောနှောအရသာထည့်သွင်းကာ ရှမ်းဟင်းထုပ်အမည်ဖြင့် အဆာပြေသားရေစာအဖြစ် စားသုံးကြကြောင်းသိရပါသည်။

DOCA(ပဲခူး)

      တောင်ငူမြို့၊ ထီးလှိုင်ရပ်ကွက်တွင်ရှိသော ပြည့်ဖြိုးကျော်အမှတ်တံဆိပ် ပေါင်မုန့်ကြော်လုပ်ငန်းတွင် ပေါင်မုန့်ကြော်ပြုလုပ်ရန်အတွက် လိုအပ်သောကုန်ကြမ်းပစ္စည်းများမှာ ဂျုံ၊ သကြား၊ ကြက်ဥ၊ ပွဆေး၊ ဆားနှင့် ဆီတို့ဖြစ်ကြောင်းသိရပါသည်။

       ပေါင်မုန့်ကြော်ပြုလုပ်ရန်အတွက် ပါဝင်ပစ္စည်းများအားလုံးကို သမအောင်ရောနယ်၍ ကြိတ်လုံးနှင့်ကြိတ်ကာ ဓါးဖြင့်လှီးဖြတ်ပြီး လိုအပ်သောပမာဏအတိုင်း ပေါင်မုန့်အဝိုင်းလေးများဖြစ်အောင်ပုံဖော်ကာ ပွလာစေရန် အချိန်အနည်းငယ်ခန့်စောင့်ဆိုင်းရပါသည်။

      ထို့နောက် ပွလာသောဂျုံအဝိုင်းလေးများအား ဆီဖြင့်ကြော်၍အအေးခံကာ ပါကင်ပိတ်လိုက်ပါက ဈေးကွက်အတွင်းဖြန့်ချိရန်အတွက် အသင့်ဖြစ်နေသော ပေါင်မုန့်ကြော်အထုပ်လေးများရရှိပြီဖြစ်ပါသည်။

         ၂၀၂၄ခုနှစ်၊ ဇူလိုင်လအစပိုင်းတွင် ပြည့်ဖြိုးကျော်အမှတ်တံဆိပ် ပေါင်မုန့်ကြော်ထုပ်များအား တစ်ထုပ်လျှင် ဖောက်သည်ဈေး ၂၄၀ကျပ်ဖြင့် တောင်ငူမြို့ရှိ မုန့်အရောင်းဆိုင်များအား ဖြန့်ချိပေးလျက်ရှိပါသည်။ ပေါင်မုန့်ကြော်ထုပ် လက်လီဈေးနှုန်းအနေဖြင့် တစ်ထုပ်လျှင် (၃၀၀)ကျပ်ဖြင့် ပြန်လည်ရောင်းချလျက်ရှိကြောင်းသိရှိရပါသည်။

               ပြည့်ဖြိုးကျော် ပေါင်မုန့်ကြော်လုပ်ငန်းတွင် ပိုင်ရှင်မိသားစုဝင် (၂) ဦးနှင့် လုပ်သား (၃) ဦးငှားရမ်းကာ လုပ်ငန်းလည်ပတ်လျက်ရှိပါသည်။ တစ်နေ့လျှင် ပေါင်မုန့်ကြော်အထုပ်ပေါင်း (၁၅၀) ခန့်ထုပ်လုပ်ကာ မိသားစုတစ်နိုင်တစ်ပိုင်စီးပွားရေးအနေဖြင့် ပုံမှန်ဝင်ငွေရရှိလျက်ရှိကြောင်း လေ့လာသိရှိရပါသည်။

DOCA(ပဲခူး)

     မော်လမြိုင်ဒေသထွက် ရင်ကွဲသရက်သီးများ ဈေးကောင်းရရှိနေသည်။ သရက်သီးမျိုးနွယ် (၁၂၅) မျိုးအနက် ရင်ကွဲသရက်သီးမှာ လူကြိုက်အများဆုံးနှင့် အသီးထွက်အကောင်းဆုံးဖြစ်သော သရက်မျိုးဖြစ်သည်။ ယခင်မေလနှင့် ဇွန်လတွင် ရင်ကွဲသရက်သီး လှိုင်လှိုင်ထွက်ရှိခဲ့သည်။

       ယခုဇူလိုင်လဆန်းတွင် ရင်ကွဲသရက်သီးဈေးနှုန်းအခြေအနေမှာ ရင်ကွဲသရက်သီး အစိမ်းအချောအကြီးတစ်လုံးလျှင် (၂၅၀) ကျပ်၊ အသေးတစ်လုံးလျှင် (၂၀၀) ကျပ်ဖြစ်သည်။ ရင်ကွဲသရက်သီးအမှည့် အကြီးတစ်လုံးလျှင် (၃၅၀) ကျပ်၊ အသေးတစ်လုံးလျှင် (၂၅၀) ကျပ်ဖြစ်သည်။

      အဆိုပါ ရင်ကွဲသရက်သီးများမှာ ရာသီချိန်ကုန်ဆုံးတော့မည်ဖြစ်သဖြင့် အသီးထွက်နှုန်းနည်းပါးခြင်းကြောင့် ဈေးကွက်အတွင်း ရောင်းချမှုလည်းနည်းပါးကာ ဒေသထွက် ရင်ကွဲသရက်မျိုးများမှာ ဈေးကောင်းရရှိနေကြောင်းသိရှိရပါသည်။

DOCA(မွန်)