ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး ၊  သာယာဝတီခရိုင် ၊  အုတ်ဖိုမြို့နယ်အတွင်းတွင် ခရမ်းသီးများ စိုက်ပျိုးကြပါသည်။ ထိုသို့စိုက်ပျိုးထားရှိရာတွင် ခရမ်းသီးမှာအရင်းအနှီးနည်းပြီး အကျိုးအမြတ်များသဖြင့် စီးပွားဖြစ် တိုးချဲ့စိုက်လာပါသည်။ အများစိုက်ပျိုးသော ခရမ်းသီးအမျိုးအစားမှာ ဆင်စွယ်ခရမ်းသီးနှင့် ပြုတ်ခရမ်းသီးမျိုးများကိုသာ စိုက်ပျိုးကြကြောင်း သိရှိရပါသည်။ ခရမ်းသီးကို အုတ်ဖိုမြို့နယ်တွင် ကျေးရွာ အုပ်စု(၇)အုပ်စုမှ ကျေးရွာပေါင်း (၃၂)ရွာက စိုက်ပျိုးကြကြောင်း သိရှိရပါသည်။

    ခရမ်းသီးစိုက်ပျိုးရန် ယာမြေအမျိုးအစားတွင် တစ်ကျိုးလျှင် အပင်ပေါင်း (၄၀၀၀)ခန့် စိုက်ပျိုးရပြီး တစ်ဧကစိုက်ပျိုးမည်ဆိုပါလျှင် အပင်ပေါင်း(၂၀၀၀၀)ခန့် စိုက်ပျိုးနိုင်ပါသည်။ စိုက်ပျိုးရန်အတွက် ပျိုးထား‌သောပျိုးပင်များကို စိုက်ခင်းများတွင် ရွေ့ပြောင်းစိုက်ပျိုးပြီး ရက်‌ပေါင်း ၅၀ခန့်‌‌‌‌ လောက်တွင် စတင်ခူးဆွတ်နိုင်ပါသည်။ ၁၀ ရက်လျှင် တစ်ကြိမ်ခူးဆွတ်နိုင်ပြီး အသီးခူးဆွတ်မှု သက်တမ်းမှာ ၉လခန့် ခူးဆွတ်နိုင်ကြောင်း သိရှိရပါသည်။

      ဆင်စွယ်ခရမ်းသီးမျိုး (F1 violet king) တစ်ဧက စိုက်ပျိုးစရိတ်မှာ မျိုးစေ့ဖိုးတစ်ထုပ်လျှင် ၅၂၀၀ ကျပ် ဖြင့် ၂၀ ထုပ် ၊ မျိုးဖိုး ၁၀၄၀၀၀ကျပ်ခန့် ၊ စုစုပေါင်း ၇၈၀၀၀၀ ကျပ်ခန့် ရှိပြီး ဆင်စွယ်ခရမ်း တစ်ဧကအထွက်နှုန်းမှာ အလုံးရေ ၁၀၀၀၀ ထွက်ရှိကာ ‌ရောင်းဈေးမှာ တစ်လုံးလျှင် ၁၅၀ ကျပ်ဈေးဖြင့် ရောင်းချရကြောင်း သိရပါသည်။  တစ်ဧကဝင်ငွေမှာ ၁၅၀၀၀၀၀/ ကျပ် ဝင်ငွေရရှိနိုင်ပါသဖြင့် တစ်ဧက အမြတ်ငွေ ၇၂၀၀၀၀ ကျပ်ခန့် အမြတ်ရရှိနိုင်ပါသည်။ ခရမ်းပြုတ်သီးမျိုးစေ့ တစ်ထုပ်လျှင် ၄၈၀၀ ကျပ်ဖြင့် ၂၀ ထုပ် ၉၆၀၀၀ ကျပ် ၊ စုစုပေါင်း ကုန်ကျစရိတ်အနေဖြင့် ၈၀၀၀၀၀  ကျပ်ခန့် ကုန်ကျပါသည်။ တစ်ပိဿာလျှင် အဝယ်ဒိုင်သို့ ရောင်းဈေး ၁၈၀၀ ကျပ်ဈေးဖြင့် ရောင်းချရပါသည်။ တစ်ဧကဝင်ငွေ ၁၅၃၀၀၀၀ကျပ် ရရှိနိုင်ပါသဖြင့် တစ်ဧကအမြတ်ငွေ ၇၃၀၀၀၀ ကျပ်ခန့် အမြတ်ရရှိနိုင်ပါသည်။ ခရမ်းစိုက်တောင်သူများ အကျိုးအမြတ်များ ရရှိနေပြီး တွက်ခြေကိုက်နေကြကြောင်း သိရှိရပါသည်။

DOCA(ပဲခူး)

    ပြည်မြို့နယ်တွင် သရက်သီးအမျိုးအစားများစွာထွက်ပေါ်နေပြီဖြစ်ပါသည်။ မြကျောက်၊ ဘုတ်ထုံသရက်သီးများသည် ပေါ်ခါစကပင် ဈေးကောင်းရသောအသီးများဖြစ်ပါသည်။ ယခုအခါ သရက်သီးများလှိုင်လှိုင်ပေါ်နေပြီဖြစ်သောကြောင့် သရက်သီးကြိုက်သူများအနေဖြင့် အကြိုက်စားရနေပြီဖြစ်ပါသည်။ သရက်သီးကို အချိုပွဲအနေဖြင့်စားသုံးသည့်အပြင် သားရေစာအဖြစ်လည်း စားသုံးရန် အတွက် သရက်ပြင်ပြုလုပ်၍ရောင်းချကြောင်း သိရပါသည်။ သရက်ပြင်ပြုလုပ်ရာတွင် ပထမဦးစွာ သရက်သီးမှည့်ကို ရေသေချာဆေးပြီး အခွံခွာထားရပါမည်။ ပြီးလျှင် အစိတ်လေးများစိတ်ပြီး စက်ဖြင့်သော်လည်းကောင်း၊ လက်ဖြင့်သော်လည်းကောင်း ချေပေးရပါမည်။ ထို့နောက် ချေပြီးသောသရက်သီးအနှစ်များကို သကြားနှင့်ရောမွေပြီး မီးဖိုဖြင့်ကျိုပေးရပါမည်။ ပျက်သည့်အနေအထားရောက်ပါက ဆီသုတ်ထားသောဗန်းပေါ်သို့လောင်းထည့်ရပါမည်။ မျက်နှာပြင်ကိုညီအောင်ညှိပြီး ခြောက်သွေ့လာသည်အထိ နေလှန်းပေးရပါမည်။ ခြောက်သွေ့သွားသောအခါ စားသုံးရန် အသင့်ဖြစ်နေသောသရက်ပြင်ရရှိမည်ဖြစ်ပါသည်။ ပြည်မြို့တွင် မြကျောက်နှင့် ဘုတ်ထုံသရက်သီးကို ရွှေဘုံသာဘုရားသို့သွားသော လမ်းမဘေးရှိ ညောင်ပင်သာရွာမှထွက်ရှိသည့်အပြင် သရက်ပြင်ကိုလည်း ညောင်ပင်သာတစ်ရွာလုံး ပြုလုပ်ရောင်းချကြောင်း သိရှိရပါသည်။ သရက်ပြင်ပြုလုပ်ရာတွင် မြကျောက်နှင့် ဘုတ်ထုံသရက်သီးကိုသာ သရက်ပြင်ပြုလုပ်ပြီး သကြားနှင့်ပြုလုပ်သောကြောင့် ဝါဝါဝင်းဝင်းလေးနှင့် အရောင်လှကာ အရသာကောင်းသောကြောင့် အရောင်းအဝယ်ဖြစ်ကြောင်း သိရပါသည်။ ပြည်မြို့ပေါ်ရှိ ဈေးများတွင် (၅၀၀) ကျပ်တန်အထုပ်သေးများထုပ်၍ ရောင်းချကြောင်း သိရပါသည်။ Online ဈေးကွက်တွင် (၅၀) ကျပ်သားလျှင် (၇၀၀၀) ကျပ်နှင့် (၂၅) ကျပ်သားကို (၃၅၀၀) ကျပ်တို့ဖြင့် ရောင်းချကြောင်း သိရပါသည်။

DOCA(ပဲခူး)

    ၂၀၂၂ခုနှစ်၊ အောက်တိုဘာလမှစတင်၍ ပြည်ခရိုင်အတွင်းရှိ ဆန်ကွဲ၊ ဖွဲနုဈေးများမှာ ဆန်ကွဲ (Extra) တစ်အိတ်လျှင် (၃၉၀၀၀) ကျပ်၊ ဆန်ကွဲ (234) တစ်အိတ်လျှင် (၃၇၅၀၀) ကျပ်၊ ဆန်ကွဲ (12) တစ်အိတ်လျှင် (၃၈၅၀၀) ကျပ်နှင့် ဖွဲနုတစ်ပေါင်လျှင် (၂၈၀) ကျပ်ဈေးနှုန်းတို့ဖြစ်ခဲ့ပါသည်။ ၂၀၂၂ခုနှစ်၊ နိုဝင်ဘာလတွင် ဆန်ကွဲ (Extra) တစ်အိတ်လျှင် (၃၈၀၀၀) ကျပ်၊ ဆန်ကွဲ (234) တစ်အိတ်လျှင် (၃၇၀၀၀) ကျပ်၊ ဆန်ကွဲ (12) တစ်အိတ်လျှင် (၃၇၅၀၀) ကျပ်နှင့် ဖွဲနုတစ်ပေါင်လျှင် (၂၅၀) ကျပ်တို့ဖြစ်ခဲ့ပါသည်။ ဒီဇင်ဘာလတွင် ဆန်ကွဲ (Extra) တစ်အိတ်လျှင် (၃၇၅၀၀) ကျပ်၊ ဆန်ကွဲ (234) တစ်အိတ်လျှင် (၃၆၀၀၀) ကျပ်၊ ဆန်ကွဲ (12) တစ်အိတ်လျှင် (၃၇၀၀၀) ကျပ်နှင့် ဖွဲနုတစ်ပေါင်လျှင် (၂၆၀) ကျပ်ဈေးနှုန်းတို့ဖြစ်ခဲ့ပါသည်။

   ၂၀၂၃ခုနှစ်၊ ဇန်နဝါရီလနှင့် ဖေဖော်ဝါရီလတွင် ဆန်ကွဲ (Extra) တစ်အိတ်လျှင် (၄၂၅၀၀) ကျပ်၊ ဆန်ကွဲ (234) တစ်အိတ်လျှင် (၄၁၀၀၀) ကျပ်၊ ဆန်ကွဲ (12) တစ်အိတ်လျှင် (၄၂၀၀၀) ကျပ်နှင့် ဖွဲနုတစ်ပေါင်လျှင် (၂၈၀) ကျပ်ဈေးနှုန်းများမြင့်တက်လာခဲ့ပါသည်။ ၂၀၂၃ခုနှစ်၊ မတ်လနှင့် ဧပြီလတွင် ဆန်ကွဲ (Extra) တစ်အိတ်လျှင် (၄၃၅၀၀) ကျပ်၊ ဆန်ကွဲ (234) တစ်အိတ်လျှင် (၄၂၀၀၀) ကျပ်၊ ဆန်ကွဲ (12) တစ်အိတ်လျှင် (၄၂၅၀၀) ကျပ်၊ ဖွဲနုတစ်ပေါင်လျှင် (၂၉၅) ကျပ်ထိဈေးမြင့်တက်လာခဲ့ပါသည်။ ယခု မေလ၊ နောက်ဆုံးအပတ်တွင် ဆန်ကွဲ (Extra) တစ်အိတ်လျှင် (၄၅၅၀၀) ကျပ်၊ ဆန်ကွဲ (234) တစ်အိတ်လျှင် (၄၃၅၀၀) ကျပ်၊ ဆန်ကွဲ (12) တစ်အိတ်လျှင် (၄၅၀၀၀) ကျပ်၊ ဖွဲနုတစ်ပေါင်လျှင် (၃၂၅) ကျပ်ထိ ဈေးများပိုမိုမြင့်တက်လာခဲ့ပါသည်။ ထိုသို့ဈေးများမြင့်တက်လာရခြင်းမှာ ဆန်၊ စပါးဈေးများမြင့်တက်လာရခြင်းနှင့် မွေးမြူရေးသမားများက အဝယ်လိုက်လာသည့်အတွက် ဈေးနှုန်းများမြင့်တက်လာရခြင်းဖြစ်ကြောင်း သိရှိရပါသည်။

DOCA(ပဲခူး)

     မာလာဖူး၊ တောက်တာဖူး၊ မာလာပန်း စသည်ဖြင့် အမျိုးမျိုးခေါ်ဆိုကြသော တောက်တာဖူးပင်၏အရွယ်အစားမှာ အပင်ပုမျိုး (မြေကပ်ပင်) ဖြစ်ပြီး မြေပြင်အတွင်းမှ ထိုးထွက်လာပြီး တောထဲတွင်သာ အလေ့ကျပေါက်သည့်အပင်များဖြစ်ပါသည်။ တောက်တာဖူး၏အရသာသည် ပူရှိန်းရှိန်းရှတတရှိပါသည်။ ကျန်းမာရေးအတွက် အစာခြေစနစ်ကို ကောင်းမွန်စေပါသည်။ ခံတွင်းပျက်ခြင်း၊ အစာမကြေဖြစ်ခြင်း၊ လေပွခြင်းနှင့်အစာစားချင်စိတ်မရှိခြင်း စသည့်ရောဂါများအတွက် တောက်တာဖူးအားစားသုံးပေးခြင်းဖြင့် သက်သာစေပါသည်။ ထို့ပြင် ရောင်ရမ်းခြင်းနှင့် နာကျင်မှုကိုသက်သာစေပါသည်။

  ယခုအချိန်တွင် ရာသီစာအဖြစ် မိုးများတဖွဲဖွဲရွာသွန်းပြီးလျှင် မြေပြင်အတွင်းမှ တောက်တာဖူးပွင့်လေးများထိုးထွက်လာတက်ကြပါသည်။ ကျေးရွာဓလေ့အရ ညနေပိုင်းတွင် တောထဲသို့ တောက်တာဖူးခူးယူပြီးလျှင် ရေဇလားအတွင်းထည့်၍ ရေစင်စင်ဆေးပြီး တောက်တာဖူးအပွင့် (၃) ခုပါ အချို့မှာနှီးဖြင့်စည်း၍လည်းကောင်း၊ သီတံဖြင့်ထိုး၍လည်းကောင်း ဈေးများ၌ သွားရောက်ရောင်းချရာတွင် တောက်တာဖူးတစ်စည်းလျှင် (၁၅၀-၂၀၀) ကျပ်တို့ဖြင့် ဈေးကွက်တွင်ရောင်းချကြောင်း သိရပါသည်။

    တောက်တာဖူးကို ရာသီစာအဖြစ်စားသောက်ရာတွင် ငါးပိရည်နှင့်တို့စရာအဖြစ်လည်းကောင်း၊ ရေနွေးဖျော၍ မြေပဲ၊ ဆီချက်တို့ဖြင့် အသုပ်သုပ်၍ စားသောက်ကြသည့်အပြင် တောက်တာဖူးအပွင့်အစိမ်းအား ပါးပါးလှီးပြီး တို့ဖူးသုပ်ထဲတွင် ထည့်စားလျှင် အနံမွှေးမွှေးလေးဖြင့် အရသာကောင်းမွန်ပါကြောင်း သိရှိရသည်။

DOCA(ပဲခူး)

    တောင်ငူမြို့ ၊ ညောင်ပင်လေးဈေးရှိ ဟင်းသီးဟင်းရွက်ဈေးတွင် ငရုတ်သီးစိမ်း (မိုးထောင်သီး) တစ်ပိဿာလျှင် ၉၀၀၀ ကျပ်မှ ၁၀၀၀၀ ကျပ်အထိ၊ ကုလားအော်သီး တစ်ပိဿာလျှင် ၁၉၀၀၀ ကျပ်မှ ၂၀၀၀၀ ကျပ်အထိ၊ ခရမ်းသီး (အဖြူ)  တစ်ပိဿာလျှင် ၁၃၀၀ ကျပ်မှ ၁၅၀၀ ကျပ်အထိ၊ ခရမ်းသီး(အညို) တစ်ပိဿာလျှင် ၁၈၀၀ ကျပ်မှ ၂၀၀၀ ကျပ်အထိဖြင့် ယခင်အပတ်ကအတိုင်း ဈေးနှုန်းတည်ငြိမ်နေပါသည်။

    ဒေသသခွားသီးမှာ ယခင်အပတ်က တစ်ပိဿာလျှင် ၁၀၀၀ ကျပ်အထိရှိရာမှ ယခု အပတ်တွင် တစ်ပိဿာလျှင် ၆၀၀ ကျပ်၊ ရှမ်းပြည်သခွားသီးမှာ ယခင်အပတ်က တစ်ပိဿာလျှင် ၁၂၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၇၀၀ ကျပ်မှ ၉၀၀ ကျပ်အထိ၊ ဂေါ်ဖီမှာ ယခင်အပတ်က တစ်ပိဿာလျှင် ၁၆၀၀ ကျပ်အထိ ရှိရာမှ ယခုအပတ်တွင် တစ်ပိဿာလျှင် ၉၀၀ ကျပ်မှ ၁၀၀၀ ကျပ်အထိ၊ ခရမ်းချဉ်သီးမှာ ယခင်အပတ်က တစ်ပိဿာလျှင် ၁၃၀၀ ကျပ်မှ ၁၅၀၀ ကျပ်အထိ ရှိရာမှ ယခုအပတ်တွင် တစ်ပိဿာလျှင် ၁၀၀၀ ကျပ်မှ ၁၃၀၀ ကျပ်အထိဖြင့် ဈေးနှုန်း ကျဆင်းပါသည်။

   ပြောင်းဖူး အကြီး တစ်ဖူးလျှင် ၂၀၀ ကျပ်မှ ၂၅၀ ကျပ်အထိရှိရာမှ ယခုအပတ်တွင် တစ်ဖူးလျှင် ၂၅၀ ကျပ်မှ ၃၀၀ ကျပ်အထိ၊ ပြောင်းဖူးအသေး တစ်ဖူးလျှင် ၁၃၀ ကျပ်မှ ၁၅၀ ကျပ်အထိ ရှိရာမှ ယခုအပတ်တွင် တစ်ဖူးလျှင် ၁၅၀ ကျပ်မှ ၂၀၀ ကျပ်အထိ၊ နံနံပင်မှာ ယခင်အပတ် က တစ်ဆယ်ကျပ်သားလျှင် ၆၀၀ ကျပ်မှ ယခုအပတ်တွင် တစ်ဆယ်ကျပ်သားလျှင် ၈၀၀ ကျပ်မှ ၁၀၀၀ ကျပ်ဖြင့် ဈေးနှုန်းအနည်းငယ် မြင့်တက်ပါသည်။

   ကန်စွန်းရွက်မှာ တစ်စည်း ၅၀ ကျပ်၊ ၁၀ စည်းယူလျှင် ၅၀၀ ကျပ်၊ ချဉ်ပေါင်ရွက်မှာ တစ်စည်း ၁၀၀ ကျပ်၊ ၁၀ စည်းယူလျှင် ၉၀၀ ကျပ်ရှိကြောင်း သိရပါသည်။

DOCA(ပဲခူး)