ပြည်တွင်းကုန်သွယ်မှုသတင်း

    ဗုဒ္ဓဘာသာဝင်မြန်မာလူမျိုးများသည် နေ့စဉ် နံနက်မိုးလင်းသည်နှင့်တစ်ပြိုင်နက် ဘုရားဝေယျာဝေစ္စဖြစ်သည့် မျက်နှာသစ်တော်ရေ၊ သောက်တော်ရေချမ်း၊ ပန်း၊ ဆီမီးနှင့် ဆွမ်းတော်၊ အမွှေးတိုင်တို့ကို ယုံကြည်မှုသဒ္ဓါတရားနှင့်အညီ ကပ်လှူပူဇော်ခြင်းဖြင့် ကုသိုလ်ယူလေ့ရှိကြပါသည်။ ထိုသို့ ကုသိုလ်ယူကြရာ ဘုရားပန်းတင်သည့်အခါတွင် အောင်သပြေပန်းမှာ မပါမဖြစ်ကပ်လှူလေ့ရှိသည့်ပန်းဖြစ်ပါသည်။

    မကွေးတိုင်းဒေသကြီးရှိ သရက်မြို့တွင် အများစုစိုက်ပျိုးကြသော သပြေပန်းအမျိုးအစားမှာ အောင်သပြေ၊ အာဆီယံသပြေ (ခေါ်) ပတ္တမြားသပြေများကို အများဆုံးစိုက်ပျိုးကြပါသည်။ တခြားအောင်သပြေများဖြစ်သည့် ငုတ်ပါသောသပြေငုတ်နှင် ကံ့ကော်သပြေများကိုလည်း အနည်းငယ်စိုက်ပျိုးကြပါသည်။ သပြေပင်ကို ရာသီမရွေးစိုက်ပျိုးနိုင်ပြီး နှစ်ရှည်ပင်အမျိုးအစားဖြစ်၍ ရေကြိုက်သောအပင်အမျိုးအစားလည်းဖြစ်ပါသည်။ ထို့ကြောင့် သပြေပန်းပင်များကို စီးပွားဖြစ်စိုက်ပျိုးကြရာတွင် တစ်နေ့လျှင် အနည်းဆုံး (၁) ကြိမ်မှ (၂) ကြိမ်ထိ ရေသွင်း၊ ရေလောင်းပေးရန်လိုအပ်ပြီး မိမိတို့၏ခြံထဲတွင် အလှစိုက်ရန် (သို့မဟုတ်) မိသားစုတစ်နိုင်တစ်ပိုင်စိုက်ပျိုးရန်အတွက် ရေစီးရေလာကောင်းပြီး ရေဓာတ်အမြဲရနေသောနေရာများတွင် ရွေးချယ်စိုက်ပျိုးလျှင် ပိုမိုဖြစ်ထွန်းနိုင်ကြောင်းနှင့် နှစ်ရှည်ပင်အမျိုးအစားဖြစ်သည့်အတွက်ကြောင့် ရေကြိုက်ရခြင်းဖြစ်ကြောင်း၊ သပြေပင်စိုက်ရာတွင် ပင်ကြား၊ တန်းကြားကိုလူဝင်ထွက်နိုင်စေရန်နှင့် သပြေညွန့်များကို ခူးရလွယ်ကူစေရန် အကွာအဝေးကို (၁၅) လက်မမှ (၁၈) လက်မကြားထားရှိစိုက်ပျိုးကြပါကြောင်း၊ တစ်ခါတရံ သပြေပင်များတွင် ပိုးကျရောက်မှုများရှိသဖြင့် ပိုးသတ်ဆေးကို (၁) လလျှင် (၂) ကြိမ် (သို့မဟုတ်) (၃) ကြိမ်သုံးပေးသင့်ပါ ကြောင်း၊ သပြေစိုက်ပျိုးသူများအနေဖြင့် ပြုစုမှုကောင်းရင်ကောင်းသလောက် (၈) လမှ (၁) နှစ်ခွဲ အချိန်ကာလတွင် အညွန့်တလူလူတက်၍ (၁၅) ရက်လျှင် (၁) ခါ ခူးဆွတ်ရန်သင့်တော်သော အနေအထားသို့ရောက်ရှိလာမည်ဖြစ်ကြောင်း၊ ဈေးကွက်အနေဖြင့် သပြေစည်း (၁) စည်းလျှင် ကျပ် (၅၀၀) နှုန်းဖြင့် ဈေးထဲရှိ ပန်းရောင်းချသူများ၊ အလှူပွဲ၊ မင်္ဂလာပွဲအခမ်းအနားများနှင့် ဘုရားပန်းကပ်လှူရန် ခြံအရောက်လာဝယ်မှုများလည်းရှိကြောင်းနှင့် သရက်မြို့ရှိ သပြေပန်းပင်စိုက်ပျိုးသူတို့၏ ပြောကြားချက်အရ အပင် (၁၀၀) ခန့်မျှစိုက်ပျိုးနိုင်လျှင် တစ်လတွင် ပန်းရောင်းရငွေ ကျပ် (၃၅၀၀၀ မှ ကျပ် (၄၀၀၀၀) ထိရရှိနိုင်မည်ဟုလည်း ဒေသခံသပြေပန်းစိုက်ပျိုးသူတို့၏ ပြောပြချက်များအရ သိရှိရပါသည်။ ထို့ကြောင့် ကုသိုလ်လည်းရ ဝမ်းလည်းဝသည့်သပြေပန်းပင်များကို စိုက်ပျိုးသင့်ပါကြောင်း ရေးသားတင်ပြလိုက်ရပါသည်။ 

          DOCA(မကွေး)

    တောင်ငူမြို့၊ ညောင်ပင်ဈေးရှိ သားငါးဆိုင်များတွင် ကြက်သား (အိမ်မွေးကြက်) အကောင်လိုက်ဈေးတစ်ပိဿာလျှင် ၂၀၀၀၀ကျပ်၊ ရင်အုပ်သီးသန့်တစ်ပိဿာလျှင် ၂၅၀၀၀ကျပ်ဖြင့် ဈေးနှုန်းတည်ငြိမ်နေပြီး စီပီကြက်အခြမ်းလိုက်ဈေးမှာ ယခင်အပတ်တွင် တစ်ပိဿာလျှင် ၁၀၀၀၀ကျပ်မှ ၂၀၂၃ခုနှစ်၊ ဇွန်လ၊ ဒုတိယအပတ်တွင် ၁၂၀၀၀ကျပ်၊ အသားသီးသန့်မှာ ယခင်အပတ်တွင် တစ်ပိဿာလျှင် ၁၂၀၀၀ကျပ်မှ ယခုအပတ်တွင် တစ်ပိဿာလျှင် ၁၄၀၀၀ကျပ်ဖြင့် ယခင်အပတ်အတိုင်း ဈေးအနည်းငယ်တက်နေပါသည်။

    ဝက်သား (ရေလွတ်သား) သုံးထပ်သားမှာ တစ်ပိဿာလျှင် ၁၅၀၀၀ကျပ်၊ ပေါင်သားတစ်ပိဿာလျှင် ၁၇၀၀၀ကျပ်၊ အသားသီးသန့်တစ်ပိဿာလျှင် ၁၉၀၀၀ကျပ်ဖြစ်၍ ယခင်အပတ်အတိုင်း ဈေးနှုန်းတည်ငြိမ်နေပါသည်။

    ငါးကြင်းအကောင်လိုက်ဈေးတစ်ပိဿာလျှင် ၁၀၀၀၀ကျပ်၊ အသားသီးသန့်တစ်ပိဿာလျှင် ၁၂၀၀၀ကျပ်၊ ငါးကြင်းဖြူအကောင်လိုက်ဈေးတစ်ပိဿာလျှင် ၁၈၀၀၀ကျပ်၊ အမြီးလွတ်၊ ခေါင်းလွတ်တစ်ပိဿာလျှင် ၂၀၀၀၀ကျပ်ဖြင့် ယခင်အပတ်အတိုင်း ဈေးနှုန်းတည်ငြိမ်နေပါသည်။

    ငါးရံ့အကောင်သေးတစ်ပိဿာလျှင် ၁၃၀၀၀ကျပ်၊ အကောင်လတ်တစ်ပိဿာလျှင် ၁၅၀၀၀ကျပ်နှင့် အကောင်ကြီးတစ်ပိဿာလျှင် ၁၆၀၀၀ကျပ်ဖြင့် ယခင်အပတ်အတိုင်း ဈေးနှုန်းတည်ငြိမ်နေပါသည်။

   ငါးခူမှာ ယခင်အပတ်တွင် အကောင်ကြီးတစ်ပိဿာလျှင် ၁၆၀၀၀ကျပ်၊ အကောင်လတ်တစ်ပိဿာလျှင် ၁၈၀၀၀ကျပ်နှင့် အကောင်ကြီးတစ်ပိဿာလျှင် ၂၀၀၀၀ကျပ်ရှိခဲ့ရာမှ ယခုအပတ်တွင် အကောင်သေးတစ်ပိဿာလျှင် ၁၈၀၀၀ကျပ်၊ အကောင်လတ်တစ်ပိဿာလျှင် ၂၀၀၀၀ကျပ်နှင့် အကောင်ကြီးတစ်ပိဿာလျှင် ၂၂၀၀၀ကျပ်ဖြစ်၍ ဈေးနှုန်းအနည်းငယ်တက်ခဲ့ပါသည်။

 ပုစွန်ဆိတ်မှာ တစ်ပိဿာလျှင် ၈၀၀၀ကျပ်ဖြင့် ဈေးနှုန်းတည်ငြိမ်နေပြီး ယခင်အပတ်တွင် ပုစွန်အသေးမှာ တစ်ပိဿာလျှင် ၂၈၀၀၀ကျပ်၊ အလတ်တစ်ပိဿာလျှင် ၃၂၀၀၀ကျပ်နှင့် အကြီးတစ်ပိဿာလျှင် ၃၅၀၀၀ကျပ်ရှိခဲ့ရာမှ ယခုအပတ်တွင် အသေးတစ်ပိဿာလျှင် ၂၄၀၀၀ကျပ်၊ အလတ်တစ်ပိဿာလျှင် ၂၆၀၀၀ကျပ်နှင့် အကြီးတစ်ပိဿာလျှင် ၃၂၀၀၀ကျပ်ဖြင့် ဈေးနှုန်းအနည်းငယ်ကျဆင်းနေးကြောင်း သိရပါသည်။

DOCA(ပဲခူး)

    ပဲခူးတိုင်းဒေသကြီး၊ တောင်ငူမြို့တွင် ယခင်အပတ်၌ 92 RON တစ်လီတာလျှင် ၂၀၂၀ကျပ်၊ 95 RON တစ်လီတာလျှင် ၂၁၂၀ကျပ်၊ ဒီဇယ်တစ်လီတာလျှင် ၁၉၃၀ကျပ်နှင့် ပရီမီယံဒီဇယ်တစ်လီတာလျှင် ၂၀၁၀ကျပ်တို့ရှိခဲ့ပါသည်။

    ၂၀၂၃ခုနှစ်၊ ဇွန်လ၊ ဒုတိယအပတ်တွင် 92 RON တစ်လီတာလျှင် ၂၀၅၅ကျပ်၊ 95 RON တစ်လီတာလျှင် ၂၁၆၀ကျပ်၊ ဒီဇယ်တစ်လီတာလျှင် ၁၉၈၅ကျပ်နှင့် ပရီမီယံဒီဇယ်တစ်လီတာလျှင် ၂၀၇၀ကျပ်တို့ရှိခဲ့ပါသည်။

    သို့ဖြစ်ပါ၍ စက်သုံးဆီဈေးမှာ ယခင်အပတ်ထက် 92 RON တစ်လီတာလျှင် ၃၅ကျပ်၊ 95 RON တစ်လီတာလျှင် ၄၀ကျပ်၊ ဒီဇယ်တစ်လီတာလျှင် ၅၅ကျပ်နှင့် ပရီမီယံဒီဇယ်တစ်လီတာလျှင် ၆၀ကျပ်ဖြစ်၍ ယခင်အပတ်ထက် ဈေးနှုန်းမြင့်တက်နေကြောင်း တောင်ငူမြို့ရှိ စက်သုံးဆီအရောင်းဆိုင်မှ သိရပါသည်။

DOCA(ပဲခူး)

   မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း၏ အစီအစဉ်ဖြင့် ပဲခူးခရိုင်၊ ဆီကုန်သည်အသင်းမှ ဆီအရောင်းဈေးကားသည် တောင်ငူမြို့သို့လာရောက်၍ အခြေခံလူတန်းစားများအား စားသုံးဆီများကို သက်သာသောဈေးနှုန်းဖြင့် အပတ်စဉ် လာရောက်ရောင်းချပေးလျက်ရှိပါသည်။

   (၇-၆-၂၀၂၃) ရက်နေ့တွင် ဆီအရောင်းဈေးကားသည် တောင်ငူမြို့၊ အမှတ် (၂၁) ရပ်ကွက်၊ ဇေယျာခင်ဦးရှိ အခြေခံစားသုံးသူပြည်သူများနှင့် အခြေခံပညာဦးစီးဌာနမှ ဝန်ထမ်းမိသားစုများအား ၅၀ကျပ်သားဝင်ဆီဘူးများကို လူတစ်ဦးလျှင် နှစ်ဘူး (ဆီတစ်ပိဿာ) နှုန်း၊ တစ်ပိဿာလျှင် ၄၆၀၀ကျပ်နှုန်းဖြင့် ဆီပိဿာချိန် ၅၅၀ကိုရောင်းချပေးခဲ့ပါသည်။

     ၎င်းဆီဈေးကားသည် (၃၁-၅-၂၀၂၃) ရက်နေ့မှစတင်၍ တောင်ငူမြို့သို့ လာရောက်ရောင်းချပေးခဲ့ရာ ဆီပိဿာချိန် ၂၂၀၀ရောင်းချပေးခဲ့ပြီးဖြစ်ကြောင်းနှင့် ဆီဈေးကားလှည့်လည်ရောင်းချရာသို့ စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်နှင့် ဝန်ထမ်းများက ကြီးကြပ်၍ ကူညီဆောင်ရွက်ပေးခဲ့ကြောင်း သိရပါသည်။

DOCA(ပဲခူး)

    ဒေသအစားအစာတစ်မျိုးဖြစ်ပြီး ကရင်ပြည်နယ်တစ်နေရာတည်းတွင်သာရနိုင်ပြီး အသင့်စားသောက်နိုင်သည့် ဒေသထုတ်ကုန်အစားအသောက်အဖြစ် ထုတ်လုပ်ရောင်းချလျက်ရှိသော ကော့ကရိတ်မြို့မှ ဦးချိ (အသင့်စား) ဆိတ်ချေးခါးဟင်းလျာသည် လူကြိုက်များလျက်ရှိပါသည်။  

    ဆိတ်ချေးခါးဟင်းဟု ဆိုလိုက်သည့်နှင့် ဒေသခံမဟုတ်သည့် မစားဖူးသည့်သူတိုင်း ဘာဟင်းပါလိမ့်ဟု စဉ်းစားကြမိပေလိမ့်မည်၊၊ တကယ်တော့ ဆိတ်ချေးခါးဟင်းလျာဆိုသည်မှာ ကရင်ပြည်နယ် တစ်ခုတည်းတွင်သာ ရရှိနိုင်သည့် ကရင်လူမျိုးတို့၏ ဒေသအစားအစာတစ်ခုဖြစ်ပြီး ဆိတ်ခေါင်း၊ ဆိတ်ကလီစာ၊ ဆိတ်နံရိုးနု၊ ဆိတ်ချေးပါ အူနုများကို ဂျင်း၊ စပါးလင်၊ ကြက်သွန်ဖြူ၊ ကြက်သွန်နီ၊ စပါးလင်၊ ရှောက်နုရွက်၊ ရှမ်းနံနံ စသည့်ဟင်းခတ်အမွေးအကြိုင်များနှင့် နူးအိစွာချက်ပြုတ်ထားခြင်း ဖြစ်လေသည်။ ဆိတ်ချေးခါးဟင်းသည် လူမမာများအတွက် အထူးအားဖြစ်စေကာ ခံတွင်းပျက်သူများအတွက် ခံတွင်းမြိန်စေသော အနံအရသာနှင့်ပြည့်စုံခြင်းကြောင့် တစ်ခါစားပြီးလျှင် ထပ်စားချင်သည့်အထိ စွဲငြိနိုင်သည့်အထိ ကောင်းမွန်သောဟင်းလျာဖြစ်ပေသည်။

  ဒေသအစားစားဖြစ်သည့် ဆိတ်ချေးခါးဟင်းလျာကို နယ်မြေဒေသအပေါ်မူတည်၍ ချက်ပြုတ်ပုံခြင်း မတူညီကြသည့်အပြင် စားသောက်ဆိုင်အချို့တွင် ပြုလုပ်ရောင်းချကြသော်လည်း ယခုကဲ့သို့ အသင့်စားအစားအသောက်ထုတ်ကုန်အဖြစ် ရောင်းချနိုင်မှု မရှိသေးပေ။ ဦးချိ အသင့်စား ဆိတ်ချေးခါး ဟင်းအနေဖြင့် အစဉ်အဆက်မိသားစုဟင်းလျာအဖြစ် ချက်ပြုတ်ခဲ့သည့် နည်းစနစ်အတိုင်းချက်ပြုတ် ပြုလုပ်ရောင်းချခြင်းဖြစ်ပြီး အသင့်စား ၃၆၀ ဂရမ်ပါ ဟင်းလျာတစ်ထုပ်လျှင် ဖောက်သည်ဈေး ၄၅၀၀ ကျပ်ဖြင့် ရောင်းချခြင်းဖြစ်ပြီး ဆိတ်ချေးခါးဖောက်သည်ဝယ်ယူလိုသူများအနေဖြင့် အနည်းဆုံးအထုပ် ၁၀၀ မှာယူရမည်ဖြစ်ကြောင်းသိရသည်။ ဈေးကွက်အနေဖြင့်  ကရင်ပြည်နယ်၊မွန်ပြည်နယ် စားသောက်ဆိုင်များမှ အများဆုံးမှာယူကြပြီး ကရင်ပြည်နယ်၊ ဘားအံမြို့ Shopping Malls များတွင် ဝယ်ယူရရှိနိုင်ကြကြောင်းနှင့် ထိုင်းနိုင်ငံ၊ဘန်ကောက်မြို့ကပါ မှာယူစားသောက်ကြသည်အထိ လူကြိုက်များလျက်ရှိကြောင်း သိရသည်။

  လုပ်ငန်းရှင်အနေဖြင့် ဈေးကွက်ဝယ်လိုအားနှင့် လူကြိုက်များမှုအပေါ်အခြေခံကာ ပြည်တွင်း/ ပြည်ပသို့ တင်ပို့နိုင်ရေးအထိ ရည်ရွယ်၍ ဆိတ်ချေးခါး စည်သွတ်ဘူးလုပ်ငန်း တိုးချဲ့ဆောင်ရွက်နိုင်ရေးအတွက် လိုအပ်သည့် မြေနေရာ၊ နည်းပညာ၊ အရင်းအနှီး၊ ကုန်ကြမ်းရရှိနိုင်ရေး ဆောင်ရွက်လျက်ရှိပြီး အစားအသောက်ဘေးကင်းလုံခြုံစိတ်ချရမှုရှိစေရေးအတွက် သက်ဆိုင်ရာဌာနများတွင် စစ်ဆေးခံဆောင်ရွက်လျက်ရှိကြောင်းနှင့်  လူကြိုက်များလာသည့် ကရင်ပြည်နယ် ဒေသအအစားအစာ (အသင့်စား) ဆိတ်ချေးခါးဟင်းလျာ ထုတ်ကုန်အကြောင်း ရေးသားဖော်ပြလိုက်ရပါသည်။

DOCA(ကရင်)