ပြည်တွင်းကုန်သွယ်မှုသတင်း

        အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၃ခုနှစ်၊ မတ်လ(၂၉)ရက်နေ့မှ ဧပြီလ (၄)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချလျက်ရှိပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(ပိဿာ)ကျပ် ၁၂၀၀ မှ ၁၈၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၁၀၀၀ မှ ၅၀၀၀ အတွင်း၊ ပန်းဂေါ်ဖီ(ထုပ်)ကျပ် ၅၀၀ မှ ၂၁၀၀ အတွင်း၊ အာလူး(ပိဿာ)ကျပ် ၁၃၀၀ မှ ၂၀၀၀ အတွင်း၊ မုန့်လာဉနီ(ပိဿာ) ကျပ် ၁၀၀၀ မှ ၁၆၀၀ အတွင်း ရွှေဖရုံသီး(လုံး)ကျပ် ၁၀၀၀ မှ ၅၀၀၀ အတွင်း၊ ဗူးသီး(လုံး) ကျပ် ၁၀၀၀ မှ ၃၀၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၅၀၀ မှ ၂၀၀၀ အတွင်း၊ ကြက်သွန်နီ(ဆိပ်ဖြူ)ကျပ် ၁၀၀၀ မှ ၁၃၀၀ အတွင်း၊ ကြက်သွန်ဖြူ(ရှမ်း)(ပိဿာ)ကျပ် ၄၀၀၀ မှ ၄၅၀၀ အတွင်း၊ ကြက်သွန်ဖြူ (ကြူကုတ်) (ပိဿာ) ကျပ် ၄၃၀၀ မှ ၄၅၀၀ အတွင်း၊ ချင်း(ပိဿာ)ကျပ် ၂၀၀၀ မှ ၂၅၀၀ အတွင်း၊ ဆလပ်ရွက် (စည်း) ကျပ် ၁၀၀ မှ ၂၅၀ အတွင်း၊ ချဉ်ပေါင်ရွက် (စည်း) ကျပ် ၆၅ မှ ၁၀၀ အတွင်း၊ ခရမ်းသီး  (ရှည်)(ပိဿာ)ကျပ် ၈၀၀ မှ ၁၅၀၀ အတွင်း၊ သံပရာသီး(လုံး)ကျပ် ၈၀ မှ ၃၀၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ)ကျပ် ၁၇၀၀ မှ ၂၃၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၁၀၀၀ မှ ၅၀၀၀ အတွင်းဖြစ်ကြောင်း၊  တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၁၆၇၇၀၀)ကျော်၊ ခရမ်းသီး(ရှည်) (ပိဿာ) (၄၇၇၄၀)ကျော်၊ ဘူးသီးအလုံးပေါင်း (၄၀၂၅)ကျော်၊ ရွှေဖရုံသီးအလုံးပေါင်း(၆၅၀)ကျော်၊ ဂေါ်ဖီထုပ်ပေါင်း (၁၆၇၅၀)ကျော်၊ ပန်းဂေါ်ဖီထုပ်ပေါင်း (၁၁၃၀၀)ကျော်၊ မုန်ညှင်းထုပ်(ပိဿာ)ပေါင်း (၁၀၉၉၀)ကျော်၊ ဖရဲသီးလုံးပေါင်း (၁၃၂၀၀)ကျော်  အသီးသီးကုန်အဝင်ရှိကြောင်း သိရှိရပါသည်။

DOCA (ရန်ကုန်)

          ရန်ကုန်မြို့တော်စည်ပင်သာယာရေးကော်မတီ၏ ကြီးကြပ်မှုအောက်ရှိ ရန်ကုန်အရှေ့ပိုင်းခရိုင်၊ အထက်ပုဇွန်တောင်လမ်း၊ မင်္ဂလာတောင်ညွှန့်မြို့နယ်ရှိ ကြက်/ဘဲဈေးဒိုင်မှ စားသုံးသူပြည်သူများသို့ နေ့စဉ် ကြက်/ဘဲများကို လက်လီ/လက်ကား ရောင်းချပေးလျက်ရှိကြောင်း သိရှိရပါသည်။

         ရန်ကုန်အရှေ့ပိုင်းခရိုင်၊ စားသုံးသူရေးရာဦးစီးမှူးရုံးမှ ဝန်ထမ်းများသည် (၃.၄.၂၀၂၃) ရက်နေ့တွင် မင်္ဂလာတောင်ညွှန့်မြို့နယ်ရှိ ကြက်/ဘဲဈေးဒိုင်သို့ သွားရောက်၍ ရောင်းချလျက်ရှိသော ကြက်/ဘဲဈေးနှုန်းများအား ဈေးကွက်ဈေးနှုန်းများ စုံစမ်းခြင်းများ ပြုလုပ်ခဲ့ရာ ရန်ကုန်တိုင်းဒေသကြီးအတွင်းရှိ မြို့နယ်များမှ ခြံဖမ်းဈေးစနစ်ဖြင့်လည်းကောင်း၊ အခြားတိုင်းနှင့် ပြည်နယ်များမှ အရောက်ပို့စနစ်ဖြင့်လည်းကောင်း တင်ပို့ရောင်းချလျက်ရှိပါသည်။

         ထိုသို့ပြန်လည်ရောင်းချလျက်ရှိသော ကြက်/ဘဲဈေးနှုန်းများမှာ အိမ်မွေးကြက် ၁ ပိဿာလျှင် (၁၃၀၀၀/၁၄၀၀၀)ကျပ်၊ အသားတိုးကြက် ၁ ပိဿာလျှင် (၆၇၀၀/၆၈၀၀) ကျပ်၊ မွေးမြူရေးကြက် (ထီး/မ) ၁ ပိဿာလျှင် (၇၅၀၀/၈၅၀၀) ကျပ်၊ ဘဲ ၁ ပိဿာလျှင် (၇၅၀၀/၇၆၀၀) ကျပ်၊ ချယ်ရီ ဘယ်ရီဘဲ ၁ ပိဿာလျှင် (၉၀၀၀) ကျပ်တို့ဖြင့် ‌ရောင်းချလျက်ရှိကြောင်းနှင့် တစ်ရက်လျှင် ကုန်ချိန် (၇၁၁၀၀) ပိဿာခန့် ရောင်းချနေကြောင်း သိရှိရပါသည်။

DOCA(ရန်ကုန်)

         စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကျွန်းလှမြို့နယ်၊ လယ်လှကျေးရွာတွင် တစ်ပိုင် တစ်နိုင်  အနေဖြင့် လည်းကောင်း ၊ အပိုဝင်ငွေရရှိရန်အတွက် လည်းကောင်း ကွမ်းကို စိုက်ပျိုးကြကြောင်း ၊ ကွမ်းကို စိုက်ပျိုးရာတွင် ဆောင်းရာသီစိုက်နှင့် မိုးရာသီစိုက်ဟူ၍ နှစ်မျိုးခွဲစိုက်ပျိုးကြပြီး မိုးရာသီစိုက်သည် ပိုးကျပျက်စီးလွယ်သည့်အတွက် အစိုက်နည်းပြီး ဆောင်ရာသီကိုသာ ပိုမိုစိုက်ပျိုးကြကြောင်းသိရှိရပါသည်။

         ကွမ်းစိုက်တောင်သူများသည် ကွမ်းအပင်များကို  မြန်မာလအရဆို ဝါဆိုလ(ဇွန်လ)တွင် စိုက်ပျိုး ခြင်းမှာ အကောင်းဆုံးအချိန်ဖြစ်ကြောင်း ၊ ကွမ်းပင်တစ်ပင်လျှင် ကျပ်(၆၀၀)နှုန်းပေး၍ ဝယ်စိုက်ရပြီး တစ်ဧကလျှင် အပင်(၃၀၀၀)ခန့် စိုက်ပျိုးနိုင်ပြီး စတင်စိုက်ပျိုးရန် မြေပြုပြင်ခြင်း၊ မျိုးစိုက်ပျိုးခြင်း၊ သွင်းအားစုနှင့် အလုပ်သမားခများအပါအဝင် ကွမ်းအပင်ရေ (၁၀၀၀)အတွက် စိုက်ပျိုး ထုတ်လုပ်မှုအတွက် ကုန်ကျစရိတ်မှာ သိန်း(၂၅/၃၀)ဝန်းကျင်တွင်ရှိကြောင်း၊ ယခုကွမ်းစိုက်တောင်သူကတော့ အပင်(၂၀၀၀)ကျော်ခန့်သာ စိုက်ပျိုးထားပြီးဖြစ်ကြောင်း ထပ်မံ စိုက်ပျိုးရန် ဆောင်ရွက်နေပါကြောင်း၊ ကွမ်းစိုက်တောင်သူများ အဆင်ပြေသည့်အတွက် ယခုနှစ်တွင် တစ်ရွာလုံးနီးပါး စိုက်ပျိုးလာကြကြောင်း ၊ ကွမ်းစိုက်ပျိုးချိန်မှ (၃)လပြည့်လျှင် စတင်စမ်းသပ် ခူးဆွတ်ရပြီဖြစ်ပြီး ဆောင်းရာသီတွင် (၁)လလျှင် (၂)ကြိမ်ခန့်သာ ခူးဆွတ်ရပြီး၊ မိုးရာသီမှာ ဆိုလျှင် (၁)လကို(၃)ကြိမ် ခူးဆွတ်ရကြောင်း၊ စတင်ခူးဆွတ်ချန်မှာဆိုလျှင် (၁)လလျှင် ပိသာ(၈၀)ခန့် ထွက်ရှိပြီး (၈)လသား အရွယ်တွင် (၁)လျှင် ကွမ်းပိသာ(၂၅၀)လောက်ထိ ထွက်အားပိုကောင်းလာပြီး မိမိတို့ မြေဆီမြေသား ကောင်းမွန်မှုနှင့် ဂရုစိုက်မှုအပေါ် မူတည်၍ ကွမ်းပင်သက်တမ်းမှာ (၂)နှစ် မှ (၅/၇)နှစ်အထိ တာရှည်ခူးဆွတ်နိုင်ပါကြောင်း ။ ယခု လက်ရှိကွမ်းဈေးနှုန်းဟာ တစ်ပိသာလျှင် ကျပ်(၆၅၀၀)နှုန်း ရောင်းချနေရပြီး ဆောင်းရာသီတွင် ဈေး(၂)ဆလောက်ထိ မြင့်တက်လာ တတ်ကြောင်း ၊ ထွက်ရှိသော ကွမ်းများကို ကန့်ဘလူမြို့နှင့် ကျွန်းလှမြို့များရှိ ကွမ်းဒိုင်များမှ လာရောက်သိမ်းယူကြောင်း၊ ကွမ်းခူးအလုပ်သမားခ (၁)ရက်လျှင် ကျပ်(၅၀၀၀)နှုန်း၊ နေ့တစ်ဝက် လျှင် ကျပ်(၃၀၀၀)နှုန်းဖြင့် ငှားရမ်းရကြောင်း၊ ဆောင်းတစ်ရာသီခူးဆွတ်လျှင် အရင်းကျေပြီး ကျန်ရာသီများမှာဆိုလျှင် ကွမ်းခူးဆွတ်အလုပ်သမားခနှင့် ဆေးဖျန်းခ ကျပ်(၁၅၀၀၀၀)လောက် သာကုန်ကျပြီး လစဉ် ကွမ်းရောင်းရငွေ  ကျပ်(၁၅)သိန်းကျော်ဝင်ငွေရရှိပြီး  အရောင်းအဝယ်ဖြစ်ကာ မိသားစု အဆင်ပြေလျှက် ရှိကြောင်း လယ်လှကျေးရွာ ကွမ်းစိုက်တောင်သူ ဦးစံဌေး၏ သမီးထံမှ သိရှိရပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန်စာရင်းတို့ကိုလည်း အပတ်စဉ်၊ လစဉ်တင်ပြလျက်ရှိပါသည်။ ၂၀၂၃ ခုနှစ်၊ မတ်လ(စတုတ္ထပတ်)အတွင်း ရွှေဘိုမြို့ ပဲ၊ နှမ်းကုန်စည်ဒိုင်၏ အရောင်းအဝယ်ဖြစ်သည့် သီးနှံများကို တာဝန်ရှိသူများနှင့် ဆက်သွယ်မေးမြန်းမှုအရ သိရှိရပါသည်။

      ရွှေဘိုခရိုင်အတွင်းရှိ မြို့နယ်များတွင် စိုက်ပျိုးထားသော ကုလားပဲများမှာ ဖေဖော်ဝါရီလ၊ တတိယပတ်မှစတင်၍ ရွှေဘိုဈေးကွက်သို့ဝင်ရောက်လာပြီး မတ်လ(စတုတ္ထပတ်)အထိ အရောင်းအဝယ် ဖြစ်လျက်ရှိကြောင်း၊ ရွှေဘိုဈေးကွက်သို့ မူးမြစ်ဝှမ်းဒေသများဖြစ်သည့် ဝက်လက်မြို့နယ်နှင့် ရွှေဘိုမြို့နယ် အနောက်ဘက်ခြမ်းရှိ ကျေးရွာများမှ အများဆုံးဝင်ရောက်လျက်ရှိပြီး ယခုအပတ်တွင်လည်း ကုလားပဲ(V2) တစ်မျိုးတည်းသာ အရောင်းအဝယ်ဖြစ်လျက်ရှိကြောင်း၊ နောက်ဆုံးပတ်အတွင်း အရောင်းအဝယ်ဖြစ်သည့်ဈေးနှုန်းမှာ ကုလားပဲ(V2)တစ်တင်းလျှင် (၆၈၀၀ဝိ/-)ကျပ်ဖြစ်၍ အရောင်းအဝယ်ဖြစ်မှုမှာ (၁၈၀)တင်း/(၆)တန် ဖြစ်ကြောင်း၊ ကုလာပဲသီးနှံအနေဖြင့် ယခင်နှစ်ကာလတူတွင် အရောင်းအဝယ်ဖြစ်ခြင်း မရှိကြောင်း၊  ယခင်အပတ်နှင့် ယခုအပတ်အရောင်းအဝယ်ဖြစ်သည့်ဈေးနှုန် တို့အား နှိုင်းယှဉ်ပါက ယခင်အပတ်တွင်လည်း ကုလားပဲ(V2)တစ်တင်းလျှင် (၆၈၀၀ဝိ/-)ကျပ်ဖြင့် အရောင်းအဝယ်ဖြစ်ခဲ့သဖြင့် ယခုအပတ်တွင်လည်း ယခင်အပတ်ဈေးအတိုင်းသာ ဈေးငြိမ်ပြီး အရောင်းအဝယ်ဖြစ်ခဲ့သည့်အပြင် တောင်သူလက်ထဲတွင်လည်း လက်ကျန်နည်းပါးနိုင်သည်ဟု သုံးသပ်ရကြောင်း ရွှေဘိုမြို့ ပဲ၊ နှမ်းကုန်စည်ဒိုင်မှ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

           မုံရွာမြို့တွင် ငါးဒိုင်မှ ငါးများကို ရန်ကုန်နှင့်မန္တလေးမြို့တို့မှ ဝယ်ယူ၍လက်လီလက်ကား ရောင်းချလျက်ရှိကြောင်း၊ ငါးများကို သင်္ကြန်အခါရောက်ရှိလာမည်ဖြစ်၍ မုံရွာမြို့ပေါ်အပြင် အထက် ချင်းတွင်း ဟုမ္မလင်း၊ ကလေးဝ၊ နန့်တောရေကြောင်းတစ်လျှောက် ရောင်းချရကြောင်း၊ တစ်နေ့လျှင် ငါး၊ ပုဇွန် ပိသာချိန်ပေါင်း ၁၀၀၀ ကျော်ရောင်းချရကြောင်း၊ ပုဇွန်သေးစျေးနှုန်းမှာ ယခင် တစ်ပတ် (၂၃၀၀၀)ကျပ် ယခုတစ်ပတ်( ၂၅၀၀၀)ကျပ် စျေးမြင့်တက်ခဲ့မှုရှိခဲ့ကြောင်း စျေးအတက်အကျမှာ အရောင်းအဝယ်‌ပေါ်မူတည်၍ အပြောင်းအလဲ အနည်းငယ်ရှိကြောင်း သိရှိရပါသည်။      

        ယခုတစ်ပတ်အရောင်းအဝယ်ဖြစ်လျက်ရှိသော မုံရွာငါးစျေးနှုန်းများမှာ ငါးကြင်းဖြူ(ဗိုက်လုံး) တစ်ပိသာလျှင်(၂၃၀၀၀)ကျပ် ငါးကြင်းဖြူ(ဗိုက်ခွဲ)တစ်ပိသာလျှင် (၂၅၀၀၀)ကျပ်၊ ပုဇွန်ကြီးတစ်ပိသာ လျှင် (၄၅၀၀၀)ကျပ်၊ ပုဇွန်သေးတစ်ပိသာလျှင် (၂၅၀၀၀) ကျပ်၊ ငါးဖယ်ခြစ် တစ်ပိသာလျှင် (၃၂၀၀၀)ကျပ်၊ ငါးမြင်းတစ်ပိသာ(၈၀၀၀)ကျပ် ရှိကြောင်း သိရှိရပါသည်။

DOCA(စစ်ကိုင်း)