ပြည်တွင်းကုန်သွယ်မှုသတင်း

      တောင်ငူမြို့ အရှေ့ကျုံးပတ်လမ်းရှိ သစ်သီးဆိုင်များတွင် လိမ္မော်သီး လက်လီဈေး ၂၅ ကျပ်သားလျှင် ၂၀၀၀ကျပ် ၊ ၁ပိဿာ ဈေး ၇၀၀၀ကျပ် ၊ စပျစ်သီး အလုံးသေး လက်လီဈေး ၂၅ ကျပ်သား ၂၀၀၀ကျပ် ၊ ၁ပိဿာဈေး ၇၀၀၀၊ စပျစ်သီး အကြီးအလုံးလှ ၂၅ကျပ်သားလျှင် ၂၅၀၀ကျပ် နှင့် ၁ပိဿာဈေး ၉၀၀၀ကျပ်၊ စတော်ဘယ်ရီသီး ၂၅ ကျပ်သား ၂၀၀၀ကျပ်၊ ၁ ပိဿာဈေး ၇၀၀၀ ကျပ် နှင့် အသင့်ထုပ်ပိုးထားသော ပလတ်စတစ် ၁ဗူးလျှင် ၈၀၀ ကျပ် ဈေးနှုန်းဖြင့် ရောင်းချလျက်ရှိကြောင်း သိရှိရပါသည်။

       သခွားမွှေးသီး ၁ လုံးလျှင် ၃၀၀၀ ကျပ်၊ ရှမ်းပြည် နာနတ်သီး ၁လုံးလျှင် အကြီး၊ အလတ်၊ အသေး ၁၀၀၀၊ ၁၅၀၀၊ ၂၀၀၀ ကျပ်ရှိကြောင်းနှင့် ပန်းသစ်တော် ၁လုံးလျှင် ၃၀၀၀၊ ၃၅၀၀ ကျပ်ခန့် ဖြင့် ပုံမှန်အတိုင်း ရောင်းဝယ်ဖောက်ကားလျက်ရှိနေကြာင်း သိရှိရပါသည်။

DOCA(ပဲခူး)

     ပြည်ခရိုင်၊ ပေါက်ခေါင်းမြို့နယ်တွင် မုန်လာဥနီများ စိုက်ပျိုးထားရှိပြီး ကုန်ကျစရိတ် အကျိုးအမြတ်အား သိရှိနိုင်ပါရန် ကွင်းဆင်းလေ့လာခဲ့ပါသည်။

   စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် ဝန်ထမ်းများ သည် (၆.၄.၂၀၂၃) ရက်နေ့၊ နံနက် (၁၀:၃၀) အချိန်တွင် သဖန်းချိုအုပ်စု၊ လေးကြီးကျေးရွာရှိ မုန်လာဥနီစိုက်ပျိုးသူ ဦးဘိုးမီနှင့် တွေ့ဆုံပြီးမေးမြန်းရာ မုန်လာဥနီကို စက်တင်ဘာလတွင် စိုက်ပျိုးပြီး ဒီဇင်ဘာလတွင် စတင်ထွက်ရှိသည်ဟု သိရှိရပါသည်။ မုန်လာဥနီအပင်သည် (၂)နှစ်ခံ အပင်မျိုးဖြစ်၍ နှစ်ရာသီအသက်ရှင်နေသော အပင်တစ်မျိုးဖြစ်ပါသည်။ ၎င်းသည် မုန်လာဥနီကို တစ်ဧကစိုက်ပျိုး ထားရှိပြီး စိုက်ပျိုးသည့်အခါ မျိုးစေ့ကိုသာစိုက်ပျိုးကြောင်း သိရှိရပါသည်။ တစ်ဧကလျှင် မျိုးစေ့ကို စိုက်ပျိုးကြပါသည်။ တစ်ဧကလျှင် မျိုးစေ့(၃)ထုပ်ကုန်ပြီး စိုက်ပျိုးထုတ်လုပ် ကုန်ကျစရိတ်မှာ (၄၃၂၀၀၀) ကျပ်ခန့် ကုန်ကျသည်ဟု သိရှိရပါသည်။ မုန်လာဥနီ တစ်ဧကလျှင် အထွက်ပိဿာချိန် (၁၀၀၀)ခန့် ထွက်ရှိပြီး ရောင်းဈေးမှာ တစ်ပိဿာလျှင် (၂၅၀၀)ကျပ်နှင့် (၃၀၀၀)ကျပ် အထိ အရောင်းအဝယ်ဖြစ်လျက်ရှိပါသည်။ ထို့ကြောင့် တစ်ဧကစိုက်ပျိုးမှု၏ အသားတင်အကျိုးအမြတ်မှာ (၂၀)သိန်း ခန့် ရရှိသည်ဟု သိရှိရပါသည်။

      မုန်လာဥနီသည် သစ်သီးဝလံအုပ်စုထဲတွင် ပါဝင်ပြီး လူအများ စားသုံးမှုများသဖြင့် ဧကများစွာ တိုးချဲ့ စိုက်ပျိုးလျှင် ဝင်ငွေများစွာရရှိပြီး အကျိုးအမြတ်လည်း ပိုမိုရရှိနိုင်မည်ဖြစ်ပါသည်။ ပေါက်ခေါင်းဒေသမှ ထွက်ရှိသော မုန်လာဥအနီများကို ဒေသတွင်းဈေးများနှင့် ပေါင်းတလည်နှင့် ပြည်မြို့ဈေးများသို့ တင်ပို့ရောင်းချကြောင်း သိရှိရပါသည်။

DOCA(ပဲခူး)

      တောင်ငူမြို့ မြို့မဈေးကြီးနှင့် ညောင်ပင်ဈေးများသို့ တောင်ငူမြို့နှင့်အနီးတဝိုက်မှ ဒေသထွက် ငှက်ပျောသီးများ ဝင်ရောက်လျက်ရှိပါသည်။ ယခုအချိန်ကာလသည် မြန်မာ့ဓလေ့ထုံးတမ်း အစဉ်အလာအရ အလှူပွဲများစည်ကားသိုက်မြိုက်စွာ ပြုလုပ်ကြရာ အလှူတွင် မပါမဖြစ်သော ဘုရားပွဲ၊ နတ်ပွဲများတွင် အဓိကပါဝင်သည့် ရခိုင်ငှက်ပျောသီးသည် ယခင်က တစ်ဖီးလျှင် ၃၀၀ ကျပ် မှ ၄၀၀ ကျပ်အထိသာရှိရာမှာ ယခုအခါတွင် တစ်ဖီးလျှင် ၇၀၀ ကျပ်မှ ၈၀၀ ကျပ်အထိပေးရပြီး အလုံးလှ၍ အနာလွတ်လျှင် တစ်ဖီး ၁၀၀၀ ကျပ်အထိ ဈေးကောင်းရပါသည်။

   အခြားငှက်ပျောသီးများဖြစ်သော သီးမွှေးမှာ တစ်ဖီးလျှင် ၂၀၀၀ ကျပ်မှ ၂၅၀၀ ကျပ်အထိ၊ ဖီးကြမ်းမှာ တစ်ဖီးလျှင် ၁၅၀၀ ကျပ်မှ ၂၀၀၀ ကျပ်အထိ၊ ရွှေနီမှာ တစ်ဖီးလျှင် ၂၅၀၀ ကျပ်မှ ၃၅၀၀ ကျပ်အထိ ဈေးအသီးသီးရှိပြီး ယခင်ကာလကထက် အရောင်းအဝယ်ကောင်းကြောင်း ညောင်ပင်ဈေးရှိ ငှက်ပျောသီးရောင်းချသူတစ်ဦးထံမှ သိရှိရပါသည်။

DOCA(ပဲခူး)

     တောင်ငူမြို့၊ ညောင်ပင်ဈေးရှိ အုန်းသီးအရောင်းဆိုင်တွင် ကြွက်မြီးပါအုန်းသီး အလုံးချောအကြီး ၁လုံးလျှင် ၁၈၀၀ ကျပ်၊ အုန်းသီးအသေး ၁လုံးလျှင် ၁၅၀၀ ကျပ်နှင့် အခွံနွှာထားသော အုန်းသီး ၁လုံးလျှင် ၁၀၀၀ကျပ်ဖြင့် ရောင်းချပါသည်။     

    ကြွက်မြီးပါ အုန်းသီးအလုံးချောအကြီးနှင့် အခွံနွှာထားသောအုန်းသီး ဈေးနှုန်းကွာခြားရခြင်းမှာ မြန်မာ့ဓလေ့ထုံးတမ်းအရ နတ်တင်ရာတွင်လည်းကောင်း၊ ဘုရားပွဲတင်ရာတွင်လည်းကောင်း ကြွက်မြီးပါသော အုန်းသီးအား အသုံးပြုရသောကြောင့် ဖြစ်ပါသည်။ ဘုရားပွဲ၊ နတ်ပွဲ တင်ရာတွင် ဗန်းထဲတွင် အဓိကအားဖြင့် အုန်းသီးနှင့်ငှက်ပျောသီးအား ထည့်၍ တင်ရသောကြောင့် ယင်းအုန်းသီးအရောင်းဆိုင်တွင် နှီးဗန်းလေးများအားလည်း အရံသင့်ရောင်းချပေးလျှက်ရှိပါသည်။ နှီးဗန်းကလေး ၁ ဗန်းလျှင် ၁၀၀၀ ကျပ်ဖြင့် ရောင်းချကြောင်း သိရှိရပါသည်။

 အုန်းသီးအား ဘုရားပွဲ၊ နတ်ပွဲများတွင်သာမက ယခုကဲ့သို့ ပူအိုက်သောရာသီတွင် ရောင်းအားကောင်းလျက်ရှိသော ရွှေရင်အေး၊ မုန့်လက်ဆောင်းနှင့် မြန်မာ့ရိုးရာမုန့်မျိုးစုံများတွင် လည်းထည့်သွင်းအသုံးပြုရသောကြောင့် အုန်းသီးဈေးကွက်မှာ ပုံမှန်အရောင်းအဝယ်ရှိကြောင်း ညောင်ပင်ဈေးရှိ အုန်းသီးအရောင်းဆိုင်ပိုင်ရှင်တစ်ဦး၏ ပြောကြားချက်အရ သိရှိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရံးမှ ပြည်နယ်ဦးစီးမှူးဦးသန်းဦးနှင့် ပြည်တွင်း၊ မူဝါဒဌာနခွဲတာဝန်ခံနှင့် ဝန်ထမ်းများသည် ၉-၄-၂၀၂၃ ရက်နေ့ (၁၀:၀၀) နာရီအချိန်တွင် ကရင်ပြည်နယ်၊ ဘား အံမြို့၊ အမှတ် ၇ ရပ်ကွက်ရှိ ရွှေကံထူး ပဲမျိုးစုံရောင်းဝယ်ရေး ပွဲရုံသို့ ပဲဈေးနှုန်း၊ ဈေးကွက်အခြေအနေများကို ကွင်းဆင်းလေ့လာခဲ့ရပါသည်။

  ကရင်ပြည်နယ်အတွင်း ပဲမျိုးစုံပေါ်ချိန် ရာသီကုန်ဆုံးတော့မည်ဖြစ်သော်လည် ဈေးကွက်အတွင်း ကုန်ပစ္စည်းလက်ကျန်ရှိသေးကြောင်းနှင့် ယခုနှစ်တွင်ပဲမျိုးစုံမှာ ပေါ်ဦးပေါ်စအချိန်တွင် ဈေးမြောက်ခဲ့ပြီး ဈေးကွက်ဝယ်လိုအားများပြားခဲ့သော်လည်း ရာသီပိတ်သိမ်းချိန်နီးခါတွင် အရောင်းအဝယ်အီ၍ တန့်နေခဲ့သောကြောင့် ယခုနှစ် ပဲရာသီပိတ်သိမ်းချိန် နောက်ကျနိုင်ကြောင်း သိရသည်။

      လက်ရှိ ပဲမျိုးစုံ ၁ ပိဿာ ဈေးကွက်ပေါက်ဈေးမှာ   ထောပတ်ပဲ ၄၀၀၀ ကျပ်၊ ပဲကြီး ၃၇၀၀ ကျပ်၊  ပဲလွန်းဖြူ ၁၉၀၀ ကျပ်၊ ဘိုကိတ် ၂၄၀၀ ကျပ်၊ မတ်ပဲ ၃၀၀၀ ကျပ်၊ ရွှေဝါ ၃၂၅၀ ကျပ်၊ ပဲတီစိမ်း ၂၁၀၀ ကျပ်နှင့် ပဲပုပ် ၂၈၀၀ ကျပ်ဖြစ်ကြောင်း သိရသည်။

DOCA(ကရင်)