ပြည်တွင်းကုန်သွယ်မှုသတင်း

   တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

     ယခု ၂၀၂၃ခုနှစ်၊ ပူအိုက်သောနွေဦးရာသီတွင် ရာသီစာ မန်ကျည်းဖျော်ရည်နှင့် ကြံရည်များအရောင်းသွက်လျက်ရှိပါသည်။ မန်ကျည်းဖျော်ရည်ပြုလုပ်ရာတွင် အဓိကအားဖြင့် မန်ကျည်းမှည့်အနှစ်၊ ထန်းလျက်ရည်၊ ရေခဲနှင့် အမဲရောင်ကျောက်ကျောလေးများပါဝင်ပါသည်။ အဆိုပါ ပါဝင်ပစ္စည်းများကိုရောနှော၍ ရေခဲနှင့် သမအောင်မွှေပြီးလျှင် အရသာချိုချဉ်အေးမြသော မန်ကျည်းဖျော်ရည်တစ်ခွက်ရရှိပြီဖြစ်ပါသည်။

      ကြံရည်အတွက်မူ ကြံရိုးနှင့် ရေခဲသာပါဝင်ပါသည်။ ကြံရည်ကို ကြိတ်စက်တွင်ကြိတ်ပြီး ရေခဲနှင့်သမအောင်မွှေပြီးလျှင် ချိုမြိန်သောကြံရည်အေးအေးလေးတစ်ခွက်ရရှိပြီဖြစ်ပါသည်။ ကြံရည်ထဲတွင် သံပရာသီးစိတ်ကလေးများကိုထည့်ပါက ပို၍လိုက်ဖက်ပြီး အနံ့မှာ အမူးအမော်ပြေစေပါသည်။

      နွေရာသီသည် ပူပြင်း၍ လူများရေဓာတ်ကုန်ခမ်းသောကြောင့် အားအင်ချည်နဲ့မှုများခံစားရသောအခါ ယင်းမန်ကျည်းဖျော်ရည်နှင့် ကြံရည်အေးအေးလေးများကိုသုံးဆောင်လိုက်ရလျှင် လန်းဆန်းမှုများခံစားရခြင်းတို့ကြောင့် ယခု နွေဦးရာသီတွင် မန်ကျည်းဖျော်ရည်နှင့် ကြံရည်များအရောင်းသွက်ရခြင်းဖြစ်ပါသည်။

   မန်ကျည်းဖျော်ရည်ကို လက်တွန်းလှည်းများဖြင့် မြို့အနှံ့လှည့်လည်ရောင်းချကြသည့်အပြင် ဆိုင်ခန်းငယ်များဖြင့်လည်းရောင်းချကြပါသည်။ မန်ကျည်းဖျော်ရည်တစ်ခွက်လျှင် ၅၀၀ကျပ်နှင့် ကြံရည်တစ်ခွက်လျှင် ၇၀၀ကျပ်နှုန်းဖြင့် ရောင်းချလျက်ရှိပါသည်။ ယခု နွေရာသီတွင် တစ်ရက်လျှင် မန်ကျည်းဖျော်ရည်နှင့် ကြံရည်များကို (၅၀၀၀၀ မှ ၁၀၀၀၀၀) ကျပ်ခန့်ထိရောင်းချရကြောင်း  လေ့လာသိရှိခဲ့ရခြင်းအား တင်ပြလိုက်ရပါသည်။

DOCA(ပဲခူး)

     တောင်ငူမြို့နယ်၊ ရှမ်းဝတီးကျေးရွာမှထွက်ရှိသော စားပြောင်းဖူးများကို အခင်းဈေးတစ်ဖူးလျှင် ၂၅၀ကျပ်၊ ၁၀ဖူးလျှင် ၂၄၀၀ကျပ်၊ တောင်ငူမြို့၊ ညောင်ပင်ဈေးတွင် ၁ဖူးလျှင် ၃၀၀ကျပ်ဖြင့် အရောင်းသွက်နေသည်ကို တွေ့ရှိရပါသည်။ ရှမ်းဝတီးရွာမှ တောင်သူများသည် စစ်တောင်းမြစ်ရေကို ရေစုပ်စက်များဖြင့်စုပ်တင်၍ ရှူးဂါးကင်းစားပြောင်းဖူးများနှင့် ပါပယ်ဝွိုက်စားပြောင်းဖူးများကိုစိုက်ပျိုးကြပါသည်။ ပြောင်းဖူးများသည် ပေါ်ဦးပေါ်ဖျားတွင် ဈေးကောင်းရနေပါသည်။

   ယခင်နှစ်၌ အထိုင်ဈေးမှာ ၂၃၀ကျပ်ဖြင့်ရောင်းရကြောင်း၊ ယခုနှစ်၌ ရှူးဂါးကင်းမျိုးတစ်ထုပ်လျှင် ၃၆၀၀၀ကျပ်၊ ပါပယ်ဝွိုက်မျိုးတစ်ထုပ်လျှင် ၂၆၀၀၀ကျပ်ဖြင့် ဝယ်ယူရပါသည်။ တစ်ဧကစိုက်ပျိုးမှုအတွက် မျိုး ၄ထုပ်ဝယ်ရသဖြင့် တစ်ဧကမျိုးဖိုးအနေဖြင့် ရှူးဂါးကင်းတစ်ထုပ်လျှင် ၁၄၄၀၀၀ကျပ်၊ ပါပယ်ဝွိုက်တစ်ထုပ်လျှင် ၁၀၄၀၀၀ကျပ်ကုန်ကျပါသည်။ မြေဩဇာဈေးနှုန်းမှာ ပုလဲဓာတ်မြေဩဇာတစ်အိတ်လျှင် ၈၆၀၀၀ကျပ်၊ အာမို(၁၅:၁၅)ပတ်လည် တစ်အိတ်လျှင် ၁၂၂၀၀၀ကျပ်၊ အပင်ရွက်ဖျန်းအားဆေးတစ်ထုပ်လျှင် ၃၃၀၀၀ကျပ်ရှိပါသည်။

     မြေပြုပြင်ခြင်းအတွက် ထယ်ထိုးခမှာ တစ်ဧကလျှင် ၄၀၀၀၀ကျပ်၊ ပေါင်းမြက်ကောက်ခြင်းအတွက် လုပ်သား ၂ ဦး၏လုပ်သားခမှာ ၁၂၀၀၀ကျပ်၊ ဘောင်ဆွဲရာတွင် လုပ်သား ၈ဦးအတွက် လုပ်သားခမှာ ၄၈၀၀၀ကျပ်၊ ပြောင်းစိုက်လုပ်သား ၅ယောက်အတွက် လုပ်သားခမှာ ၃၀၀၀၀ကျပ်၊ ဆောင်းပြောင်းစိုက်ပျိုးရာတွင် ရေနှစ်ကြိမ်သွင်းရသောကြောင့် ဒီဇယ်ဆီဖိုးမှာ ၆၀၀၀၀ကျပ်၊ ပြောင်းဖူးချိုး၊ ပင်ခုတ်သယ်ယူခြင်းအတွက် လုပ်သားခမှာ ၆၀၀၀၀ ကျပ်၊ ရှမ်းဝတီးရွာမှ တောင်ငူမြို့သို့ သယ်ယူရာတွင် ပြောင်းဖူးတစ်ဧကလျှင် ၃ခေါက်သယ်ယူရသဖြင့် တစ်ခေါက်လျှင် ၂၀၀၀၀ကျပ်နှုန်းဖြင့် သယ်ယူခမှာ ၆၀၀၀၀ကျပ်ကုန်ကျပါသည်။

    စားပြောင်းဖူးမျိုးတစ်ထုပ်လျှင် မျိုးစေ့ ၄၀၀၀ခန့်ပါဝင်ကြောင်း၊ တစ်ဧကလျှင် ၄ထုပ်စိုက်ပျိုးရ၍ ခုနစ်ဆယ်ရာခိုင်နှုန်းအပင်ပေါက်ကြောင်း၊ ကြွက်ဖျက်ဆီးမှုမရှိလျှင် ပြောင်းဖူး ၁၁၂၀၀ဖူးထွက်ရှိကြောင်း၊ အထိုင်ဈေးတစ်ဖူးလျှင် ၂၄၀ကျပ်ရောင်းရလျှင် ၂၆၈၈၀၀၀ကျပ်ရရှိကြောင်း၊ စိုက်ပျိုးစရိတ်ကုန်ကျငွေစုစုပေါင်း ၅၄၉၀၀၀ကျပ်နုတ်လျှင် ပြောင်းဖူးတစ်ဧကအတွက် အကျိုးအမြတ်မှာ ၂၁၃၉၀၀၀ကျပ်ရရှိကြောင်း ပြောင်းဖူးစိုက်တောင်သူတစ်ဦး၏ ပြောပြချက်အရ သိရှိရပါသည်။

DOCA(ပဲခူး)

     ပွင့်လင်းရာသီတွင် ပဲခူးတိုင်းဒေသကြီး၊ တောင်ငူမြို့နယ်ရှိ အုတ်လုပ်ငန်းလုပ်ကိုင်သည့်လုပ်ငန်းရှင်များ၏ မြေအုတ်လုပ်ငန်းများမှာ အရောင်းသွက်နေကြပါသည်။ အုတ်လုပ်ငန်းကို မိုးအကုန်နှင့် ဆောင်းအကူးဖြစ်သော နိုဝင်ဘာလတွင် စတင်လုပ်ကိုင်ကြပါသည်။ သက်ဆိုင်ရာဌာနများ၏ ခွင့်ပြုချက်များရရှိမှသာ လုပ်ငန်းများစတင်ဆောင်ရွက်သည်ဟု သိရှိရပါသည်။

      လုပ်ငန်းခွင်တွင် လုပ်ကိုင်နေကြသည့်လုပ်သားများအတွက် နေထိုင်မှုအဆင်ပြေစေရန် ယာယီတဲများထိုးပေးခြင်း၊ လုပ်သားခများမရရှိမီ လုပ်ငန်းခွင်တွင်အဆင်ပြေစေရန် ဆန်အိတ်၊ ဆီပုံးများကို ကြိုတင်ထုတ်ပေးခြင်းများဆောင်ရွက်ရပါသည်။ လုပ်ငန်းခွင်တွင် အထိုင်ကျလာသည့်အခါ၊ လုပ်သားခများစုမိလာသည့်အချိန်တွင် ကြိုတင်ငွေများကို ပြန်လည်ခုနှိမ်ပါသည်။

     လုပ်ငန်းများစတင်သည်နှင့် ရွှံ့အုတ်များနေလှန်းရန် မြေနေရာရှင်းလင်းခြင်း၊ ထင်းစုဆောင်းခြင်းများဆောင်ရွက်ရပါသည်။ နေလှန်းအုတ်များခြောက်လာသည့်အခါ မီးဖုတ်ရန် အုတ်လုံးရေ ၁၅၀၀၀လုံးခန့်စီ၍ ဖိုဆင်ရပါသည်။ ဖိုဆင်ပြီးလျှင် ထင်းထိုးရန်မီးတင်ရပါသည်။ ထင်းဖြင့် မီးတင်သည့်အုတ်ဖိုများရှိသကဲ့သို့ စပါးခွံဖြင့် မီးတင်သည့်အုတ်ဖိုများလည်းရှိပါသည်။

   ကြယ်သုံးလုံးအုတ်လုပ်ငန်းသည် အုတ်များကိုထင်းမီးဖြင့်သာ ကျက်အောင်ဖုတ်ရပါသည်။  ယခင်နှစ် ၂၀၂၂ခုနှစ်က ထင်းဖောကားတစ်စီးလျှင် ၆၅၀၀၀ကျပ်ပေးရပြီး ယခုနှစ် ၂၀၂၃ခုနှစ်တွင် ၈၀၀၀၀ကျပ်ပေးရပါသည်။ ယခင်နှစ်က အုတ်ဈေးနှုန်းမှာ အထိုင်ဈေးတစ်လုံးလျှင် ၉၀ကျပ်ဖြစ်ပြီး ယခုနှစ်တွင် အထိုင်ဈေးတစ်လုံးလျှင် ၁၀၅ကျပ်ဖြစ်ပါသည်။ တောင်ငူမြို့တွင်း အရောက်ပို့ပေးရလျှင် အုတ်လုံးရေ ၂၀၀၀လုံးအောက်ဖြစ်ပါက တစ်လုံးလျှင် ၁၂၀ကျပ်၊ အုတ်လုံးရေ ၂၀၀၀လုံးအထက်ဖြစ်ပါက တစ်လုံးလျှင် ၁၁၅ကျပ်ဖြင့် ပို့ဆောင်ပေးပါသည်။

     ကြယ်သုံးလုံးအုတ်လုပ်ငန်းတွင် လုပ်သားအင်အား ၁၂၀ဦးခန့်ရှိကြောင်း၊ ပွင့်လင်းရာသီတွင် ဆောက်လုပ်ရေးလုပ်ငန်းများဆောင်ရွက်ကြသည့်အတွက် အရောင်းသွက်ကြောင်း၊ ဧပြီလနောက်ပိုင်းတွင် အုတ်ကျင်းမှမီးဖုတ်အုတ်များကို ဂိုဒေါင်ထဲထည့်ကာ လှောင်ထားကြောင်း၊ မိုးရာသီတွင် အုတ်ဈေးအနည်းငယ်တက်ကြောင်း၊ အကျိုးအမြတ်များစွာမရရှိသော်လည်း လုပ်သားများအား အလုပ်အဆင်ပြေစေရန်ဆောင်ရွက်ပေးနိုင်သည့်အတွက် ကျေနပ်အားရပါကြောင်း လုပ်ငန်းရှင်၏ပြောပြချက်အရ သိရှိရပါသည်။

DOCA(ပဲခူး)

   တောင်ငူမြို့နယ်၊ ညောင်ပင်လေးဈေးတွင် ရာသီချိန်အလိုက် နာနတ်သီးများရောင်းချလျက်ရှိရာ ပေါ်ဦးပေါ်ဖျားတွင် တစ်လုံးလျှင် (၁၃၀၀)ကျပ်မှ (၂၀၀၀)ကျပ်နှုန်းထိ အရောင်းအဝယ်ဖြစ်လျက်ရှိပါသည်။ နာနတ်သီးသည် အရည်ရွှမ်းပြီး အရသာရှိသည့်အသီးတစ်မျိုးဖြစ်၍ ကျန်းမာရေးအတွက် ကောင်းမွန်သောအကျိုးအာနိသင်များစွာပါဝင်ပါသည်။

    နာနတ်သီးတွင် ဗီတာမင်စီ၊ ဖောလိတ်၊ သံဓာတ်၊ မဂ္ဂနီဆီယမ်၊ ကြေးနီနှင့် ဗီတာမင် B6 စသည့် အာဟာရဓာတ်များလည်း ကြွယ်ဝစွာပါဝင်ပါသည်။ နာနတ်သီးစားခြင်းဖြင့် ဗီတာမင်နှင့် သတ္တုဓာတ်များပြည့်ဝစွာရရှိခြင်း၊ အစာကြေညက်စေခြင်း၊ ရောင်ရမ်းခြင်းကိုသက်သာစေခြင်း၊ ကိုယ်ခံစွမ်းအားကောင်းစေခြင်း၊ အဆစ်ရောင်ခြင်းကိုသက်သာစေခြင်း၊ နလန်ထမြန်စေခြင်းနှင့် နှလုံးကျန်းမာရေးကိုကောင်းစေခြင်း စသည့်အကျိုးကျေးဇူးများရရှိပါသည်။

    နာနတ်သီးသည် အရည်ရွှမ်းသောအသီးဖြစ်သောကြောင့် ယခုကဲ့သို့ ပူအိုက်သောရာသီတွင် အသီးအနေဖြင့်လည်းကောင်း၊ ဖျော်ရည်အနေဖြင့်လည်းကောင်း စားသုံးနိုင်ပါသည်။ ယခုရာသီတွင် နာနတ်သီးများအရောင်းသွက်လျက်ရှိကြောင်း သိရှိရပါသည်။

DOCA(ပဲခူး)