ပြည်တွင်းကုန်သွယ်မှုသတင်း

     မြန်မာနိုင်ငံတွင် ကြက်သွန်ဖြူကို ရှမ်းမျိုး၊ ဗမာမျိုးနှင့် ကြူကုတ်မျိုးဟူ၍စိုက်ပျိုးကြသည်။ ရှမ်းမျိုးနှင့် ဗမာမျိုးသည် အနံ့အရသာမှာ မွှေးကြိုင်ပြီး  ကြူကုတ်မျိုးထက်ပို၍ မွှေးပြီး အလုံးအရွယ် အစား ငယ်သည်။ ကြူကုတ်မျိုးသည် ဥကြီးပြီး အထွက်နှုန်းမြင့်မားသည်။ မြင်းခြံမြို့နယ်သည် အပူပိုင်းဒေသဖြစ်သောကြောင့်  အေးသောရာသီဥကိုကြိုက်နှစ်သက်သော ကြက်သွန်ဖြူများကို ဆောင်း ရာသီတစ်ရာသီသာ အောက်ပါစိုက်ပျိုးနည်း အတိုင်းစိုက်ပျိုးကြသည်။

 စိုက်ပျိုးနည်းစနစ်များ

ကြက်သွန်ဖြူသည် အပူအအေးသင့်တင့်သော ရာသီဥတုကို ကြိုက်နှစ်သက်သည်။ နေ့တာရှည် ခြင်းသည် ဥဖြစ်ပေါ်မှုကို အားပေးသည်။ အပင်ကြီးထွားဖွံ့ဖြိုးမှုအတွက် အသင့်တော်ဆုံးအပူချိန်မှာ ဖြစ်ထွန်းကြောင်း၊  ကြက်သွန်ဥဖြူဥဖြစ်ထွန်းရန် အနည်းဆုံးတစ်လမှ နှစ်လအတွင်းဥများ ဖြစ်ထွန်း ပါတယ်။

မြေပြုပြင်ခြင်း

ထယ်ရေးနက်နက်နှင့် ထွန်ရေးညက်အောင်ထွန်ပြီး ကြမ်းတုံးရိုက်၍ ဘောင်ဖော်စိုက်ပျိုးလေ့ ရှိပါသည်။ ရေအလွန်လိုအပ်သော သီးနှံဖြစ်၍ အစိုဓာတ်ရှိပါက မြေအမျိုးအစားအများစုတွင် စိုက်ပျိုးနိုင်ပါသည်။

မျိုးရွေးချယ်ခြင်း

ရေမြေအလိုက် ကိုက်ညီမှုရှိသော မျိုးများကို ရွေးချယ်စိုက်ပျိုးပါ။ ရောဂါကင်းသောမျိုး၊ အမြွှာကြီး သောမျိုးများ ရွေးချယ်ပြီး တစ်ဧကလျှင် မျိုးနှုန်း ပိဿာ ၂၅၀ မှ ပိဿာ ၃၀၀ အသုံးပြုပါ။

စိုက်ပျိုးခြင်း

ထယ်ရေးကောင်းစွာပြင်ထားသော စိုက်ကွက်များတွင် ဘောင်အမြင့် ရှစ်လက်မ၊ အကျယ်သုံး ပေခန့်ထား၍ ဘောင်ဖော် စိုက်ပျိုးလေ့ရှိပါသည်။ ပင်ကြား၊ တန်းကြား နှစ်လက်မ x လေးလက်မ၊ (သို့မဟုတ်) လေးလက်မမှ x လေးလက်မ အကွာအဝေးဖြင့် စိုက်ပျိုးသည်။ ကြက်သွန်ဖြူ စိုက်ရာတွင် ပေါင်းနှိမ်နင်းရန် အလွန်အရေးကြီးသဖြင့် စိုက်ပျိုးသောနည်းမှာ ကြက်သွန်ဖြူ အမြွှာများကို ဘောင်ထဲတွင် လေးပုံသုံးပုံခန့်သာ မြုပ်စိုက်ပြီး အပေါ်မှ ကောက်ရိုးကို ခြောက်လက်မ ခန့်မြင့်ထိ ညီညာစွာဖုံးပေးထားပါ။ ရေလောင်းလိုက်လျှင် ကောက်ရိုးအမြင့် သုံးလက်မခန့်သာ ကျန်ပြီး ကြက်သွန်ပင်များ တိုးထွက်လာနိုင်သည်။ ကောက်ရိုးကြောင့် ပေါင်းသက်သာပြီး အစိုဓာတ်ထိန်းနိုင်၍ ကောက်ရိုးများ ဆွေးသွားပါကလည်း မြေဆွေးဖြစ်သွားသည်။ စိုက်ပျိုးရာတွင် အမြွှာကြီးပါက ဥအမြွှာသေးပါက ဥတစ်လုံးဥသာရရှိတတ်သည်။

မြေသြဇာထည့်သွင်းခြင်း

မြေသြဇာများကို ပေါင်းလိုက်ချိန်နှင့် ဥဆင်းချိန်တို့တွင် ထည့်ပါ။

 အပင်ပြုစုခြင်း

ကြက်သွန်ဖြူ အောင်မြင်ဖြစ်ထွန်းရန်အတွက် ပေါင်းနှိမ်နင်းခြင်း လုပ်ငန်းသည် အထူးအရေး ကြီးသည်။ စိုက်ပြီးတစ်ပတ်ကြာမှ အပင်နှစ်လသား အရွယ်ထိ တစ်ပတ်တစ်ကြိမ် ပေါင်းနှိမ်ပါ။ တစ်ပတ်လျှင် တစ်ကြိမ်ရေသွင်းပြီး ရာသီဥတုပူပြင်းပါက လေးရက်မှ ငါးရက်တစ်ကြိမ် ရေပေးသွင်းရမည်။ အပင်နှစ်လသား အရွယ်တွင် ရေသွင်းခြင်းကို လုံးဝရပ်ရပါမည်။ ပန်းမပွင့်မီ ကြက်သွန်ဖူးများကို မဖြစ်မနေချိုးပေးပါ။ စိုက်ခင်းတွင် အစိုဓာတ် လုံလောက်မှုရှိစေရန် အမြဲဂရုပြုပါ။ ကြက်သွန်ဖြူတွင် ရောဂါပိုးတို့ကျရောက်တတ်၍ သင့်တော်သောဆေးများကို ပက်ဖျန်းကာကွယ်သင့်သည်။

 နုတ်သိမ်းခြင်း

အပင်သက်တမ်း လေးလမှငါးလအကြာ ကြက်သွန်ဖြူပင်စည်နှင့် အရွက်ဝါလာလျှင် အပင်ကို လက်ဖြင့် ဆွဲနုတ်သိမ်းယူနိုင်သည်။ မျိုးထားရန်အတွက် အပင်လိုက် လက်တစ်ဆုပ်စာခန့် စည်း၍ ဝါးတန်းပေါ်တွင် အခြောက်ခံထားပါ။ နုတ်ယူပြီးအပင်များကို အမြိတ်များဖြတ်တောက်၍နေ နှစ်ရက်ခန့်လှမ်းထားပါ။ တစ်ဧကလျှင် ကြက်သွန်ဖြူ ပိဿာချိန် ၁,၅၀၀ မှ ၃,၀၀၀ ထိ ထွက်နိုင်ပါသည်။

DOCA(မန္တလေး)

    မန္တလေးတိုင်းဒေသကြီး၊ မြင်းခြံမြို့နယ်၊ သမုန်းကိုင်းကျေးရွာတွင် မုန်လာဥဖြူစိုက်ပျိုး ထွက်ရှိမှုများမှ ဝင်ငွေရရှိပြီး မိသားစုစားဝတ်နေရေး အဆင်ပြေလျက်ရှိကြောင်း မုန်လာဥဖြူ စိုက်ပျိုး ထားသောတောင်သူများထံမှ သိရသည်။

      မုန်လာဥဖြူသည် စနယ်မြေခေါ် လယ်မြေများတွင် ဖြစ်ထွန်းမှုမရှိကြောင်းနှင့် သဲဆန်သောမြေများ၊ ယာမြေများနှင့်မြစ်ရေဝင်ဒေသများရှိနုန်းတင်မြေနုများတွင်ဖြစ်ထွန်းပြီး မျိုးစေ့ချကာ စိုက် ပျိုးရကြောင်း၊  ရောင်းတန်းဝင်အရွယ်အစားရောက်ရှိပါက မုန်လာဥဖြူပင်ကိုနှုတ်ပြီးနောက် နေပြ ထားရကြောင်း၊ အနည်းငယ်နွမ်းသွားပြီး အကိုင်ခံနိုင်သည့်အဆင့်ရောက်မှသာ ရေဆေးပြီး အစည်း များစည်းကာ အိတ်များတွင်ထည့်သွင်းတင်ပို့ရကြောင်း၊ မုန်လာဥဖြူများ လှိုင်လှိုင်ထွက် ရှိသည်မှာ တစ်လကျော် ကြာမြင့်ပြီဖြစ်ပြီး စတင်ထွက်ပေါ်ချိန်မှစ၍ ကုန်စိမ်းပွဲစားများက စိုက်ခင်း အထိ လာရောက်ဝယ်ယူကြောင်း၊ စိုက်ခင်းဈေး(၃)ဥတွဲပါတစ်စည်းလျှင် (၅၀၀) ကျပ်နှုန်းဖြင့် လည်း ကောင်း၊ ဈေးကွက်သို့အရောက် တင်ပို့ရောင်းချရပါက (၈၀၀/၆၀၀)ကျပ်နှုန်းဖြင့် လက်ကား ရောင်းချ လျက်ရှိကြောင်း၊ ၂၀၂၆ခုနှစ်၊ ဇန်နဝါရီလ၌ မြင်းခြံမြို့၊ အေးမြသီတာဈေး၌ ရောင်းချ လျက်ရှိသော မုန်လာဥလက်လီဈေးကွက်တွင် အကြီး(၃)ဥတွဲပါ တစ်စည်းလျှင် (၁၀၀၀) ကျပ်၊ အသေး(၃)ဥ တွဲပါတစ်စည်းလျှင် (၇၀၀) ကျပ်နှုန်းအထိ ဈေးကောင်းရရှိကြောင်း၊ အရောင်း အဝယ်ဖြစ်လျက် ရှိကြောင်း၊ မျိုး၊သွင်းအားစုနှင့်လုပ်အားခများအပါအဝင် တစ်ဧကလျှင် ကျပ်(၃၆) သိန်းခန့် ကုန်ကျပြီး သီးနှံရောင်းရငွေကျပ်(၄၈)သိန်းခန့်ရရှိကြောင်း မုန်လာဥဖြူစိုက်ပျိုးထားသူ သမုန်းကိုင်းကျေးရွာနေ တောင်သူဦးညွန့်ဝင်း၏ ပြောကြားချက်အရ သိရှိရသည်။

          ယခုနှစ်တွင် မုန်လာဥဖြူသည် တောင်သူများအနေဖြင့် ဈေးကောင်းရရှိ၍ အကျိုးအမြတ် ရရှိကြောင်း၊ မုန်လာဥဖြူစတင်စိုက်ပျိုးချိန်မှ သီးနှံထွက်ပေါ်ချိန်အထိ စိုက်ပျိုးကြာမြင့်ချိန် တစ်လခွဲ၊ (၂)လခန့်အတွင်း ကျပ်(၁၂)သိန်းခန့် အကျိုးအမြတ်ငွေရရှိသည့်အတွက် ဆောင်းရာသီသီးနှံများအနက် စိုက်ပျိုးသင့်ကြောင်း၊ မုန်လာဥဖြူစိုက်ပျိုးသည့် တောင်သူများမှာမိသားစု စားဝတ်နေရေး အဆင်ပြေ လျက်ရှိကြောင်း သိရှိရသည်။

DOCA(မန္တလေး)

   ငါန်းဇွန်မြို့နယ်တွင် စက်သုံးဆီအရောင်းဆိုင် (၁၀) ဆိုင်မှ စက်သုံးဆီများကို နေ့စဉ်ပုံမှန်ဖွင့်လှစ်ရောင်းချလျက်ရှိရာ ၂၀၂၆ ခုနှစ်၊ ဇန်နဝါရီလ(၁၆)ရက်နေ့ စက်သုံးဆီတစ်လီတာ အရောင်း ဈေးနှုန်းများအနေဖြင့် 92 Octance(၂၄၅၀)ကျပ်၊ 95 Octance(၂၅၈၀)ကျပ်၊ ရိုးရိုးဒီဇယ် (၂၃၅၀)ကျပ်၊ ပရီမီယမ် ဒီဇယ်(၂၇၀၀)ကျပ်ဝန်းကျင်ဖြင့် ရောင်းချလျက်ရှိကြောင်း သိရှိရသည်။

     စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ၁၆-၁-၂၀၂၆ရက်နေ့တွင် ထုတ်ပြန်ထားသည့် မန္တလေးတိုင်းဒေသကြီးအတွင်း စက်သုံးဆီတစ်လီတာ၏ သတ်မှတ် ရည်ညွှန်းဈေးများမှာ 92 Octance (၂၄၀၅)ကျပ်၊ 95 Octance(၂၄၅၀)ကျပ်၊ ရိုးရိုးဒီဇယ် (၂၂၈၀)ကျပ်၊ ပရီမီယမ်ဒီဇယ်(၂၆၂၅)ကျပ် ဖြစ်ကြောင်း  သိရှိရသည်။ သတ်မှတ်ရည်ညွှန်းဈေးများ သည် ယခင်အပတ် ထက် တစ်လီတာလျှင် 92 Octance တွင် (၃၅)ကျပ်၊ 95 Octance တွင်(၄၅)ကျပ်နှင့် ပရီမီယမ်ဒီဇယ်တွင် (၃၅) ကျပ်တို့ အသီးသီးဈေးနှုန်းကျဆင်းခဲ့ပြီး ရိုးရိုးဒီဇယ်တွင်(၃၀)ကျပ်ဈေးနှုန်း မြင့်တက်ခဲ့ကြောင်း သိရှိရသည်။

DOCA(မန္တလေး)

   ထားဝယ်မြို့ရှိ စည်ပင်သာယာဈေးကြီး၊ ကမ်းနားဈေးနှင့် ညနေဈေးတို့ရှိ သစ်သီးဆိုင်များ၌ သစ်သီးမျိုးစုံရောင်းချလျက်ရှိရာ ပန်းသစ်တော်သီးမှာလည်း အ‌ရောင်းအဝယ်ဖြစ်လျက်ရှိပြီး လူကြိုက်များကြကြောင်း သိရှိရပါသည်။ ရန်ကုန်၊ မော်လမြိုင်ဘက်မှ ကားများဖြင့် ထားဝယ်မြို့ရှိ သစ်သီးဒိုင်များသို့ တင်ပို့ကြပြီး ထိုမှတဆင့် သစ်သီးဆိုင်များသို့ပြန်လည်ဖြန့်ဖြူးလျက်ရှိကြောင်း  လည်းသိရှိရပါသည်။

          ထားဝယ်ဈေးကွက်၌ ဇန်နဝါရီလအတွင်း ပန်းသစ်တော်သီး ဈေးကောင်းလျက်ရှိပြီး  တစ်လုံးလျှင် (၅၀၀၀)ကျပ်အထိရှိကြောင်း သိရှိရပါသည်။

DOCA(တနင်္သာရီ)

  မြန်မာပြည်တွင် အထင်ရှားဆုံး ဟင်းခတ်အမွှေးအကြိုင်မှာ နံနံပင်ဖြစ်ပြီး အစေ့ကိုလည်း ဟင်းခတ်မဆာလာတွင် သုံးနိုင်သည်။ မြန်မာဟင်းများတွင်သာမက မုန့်ဟင်းခါး၊ အသုပ်စုံတို့ တွင်လည်း တွဲဖက်အသုံးပြုကြသည်။ ဆောင်းရာသီတွင် အထူးဖြစ်ထွန်းပြီး ကျန်ရာသီများတွင် ရှား ပါးကာ စျေးကြီးပေသည်။

           ယခုအခါ ထားဝယ်စျေးကွက်၌ ဇန်နဝါရီလ တတိယပတ်အတွင်း နံနံပင်စျေးကောင်းလျက်ရှိပြီး တစ်စည်းလျှင် (၅၀၀)ကျပ် ခန့်ရှိကြောင်း သိရပါသည်။

DOCA(တနင်္သာရီ)