ပြည်တွင်းကုန်သွယ်မှုသတင်း

    ယခုနှစ် မိုးဦးကာလတွင် မွန်ပြည်နယ်ထွက် နာနတ်သီးများ ဈေးကွက်အတွင်း အရောင်းအဝယ်သွက်နေကြောင်း မော်လမြိုင်မြို့နယ်ရှိ သစ်သီးဝလံရောင်းချသူများထံမှ သိရှိရသည်။

   နာနတ်သီးများကို ကျိုုက်ထို၊ ဘီးလင်း၊ ကျိုက်မရော၊ မုဒုံ၊ ရေးမြို့နယ်တို့တွင် အများဆုံး စိုက်ပျိုးကြပြီး နာနတ်ပင်များကို စိုက်ပျိုးရန် သီးခြားမြေနေရာမလိုအပ်ပဲ ရော်ဘာပင်တန်း ကြားတွင် သီးညှပ်စိုက်ပျိုးကြကြောင်း ရေးမြို့နယ်ရှိ နာနတ်သီး စိုက်ပျိုးသူထံမှ သိရှိရသည်။ အရင့်မှန်ပြီး သဘာဝအတိုင်း ရင့်မှည့်သည့် နာနတ်သီးများကို ခြံပိုင်ရှင်များထံမှ ဝယ်ယူရောင်းချနေပြီး လက်ရှိဆိုင်ပေါ် ရောင်းဈေးသည် အရွယ်အစားပေါ် မူတည်၍ တစ်လုံးလျှင် ကျပ် ၂၀၀၀ မှ ၃၀၀၀ အထိ ရောင်းချကြောင်း သိရသည်။ မွန်ပြည်နယ်ထွက် နာနတ်သီးများကို မြို့ပေါ်ဈေးများနှင့် ပဲခူး၊ ရန်ကုန်၊ နေပြည်တော်စသည့် မြို့ကြီးများသို့လည်း တင်ပို့ရောင်းချလေ့ရှိကြောင်း သိရသည်။

    နာနတ်သီးကို စားသုံးခြင်းဖြင့် ဆီးပူ၊ ဆီးအောင့်သက်သာခြင်း၊ ဝမ်းသွေးကျခြင်းတို့ကို ပျောက်ကင်းစေသည့်အပြင် ခန္ဓာကိုယ်စွမ်းအားကို မြှင့်တင်ပေးသည့် အသီးတစ်မျိုးဖြစ်ကြောင်း သိရှိရသည်။

DOCA(မွန်)

      ပဲခူးတိုင်းဒေသကြီး၊ ပြည်ခရိုင်အနေဖြင့် မိုးနှမ်းကို မေလနှင့် ဇွန်လတို့တွင် စိုက်ပျိုးပြီး ဆောင်းနှမ်းကို ဒီဇင်ဘာလနှင့် ဇန်နဝါရီလတွင် စိုက်ပျိုးကြကာ နွေနှမ်းကိုမူ ဖေဖော်ဝါရီလနှင့် မတ်လတို့တွင် စိုက်ပျိုးကြပါသည်။ ပြည်မြို့အနီးတဝိုက်ရှိကျေးရွာများရှိ မိုးနှမ်းစိုက်ပျိုးသော တောင်သူများအနေဖြင့်  ယခုအချိန်ဖြစ်သော ဇွန်လတွင် မိုးနှမ်းများစိုက်ပျိုးပြီးစီးပြီဖြစ်ကြောင်း သိရပါသည်။ ယခင်နှစ်ဖြစ်သော ၂၀၂၃-၂၀၂၄ ခုနှစ်တွင် မိုးနှမ်းစိုက်ပျိုးဧကမှာ ၆၆၃၇၁ဧကစိုက်ပျိုးနိုင်ခဲ့ပြီး တစ်ဧကအထွက်နှုန်းအနေဖြင့် (၁၄)တင်းကျော်ထွက်ရှိသည်ဟု စာရင်းအရသိရှိရ ပါသည်။ ယခုနှစ်တွင် မိုးနှမ်းများစိုက်ပျိုးရာတွင် နှမ်းနက်ကိုဦးစားပေး၍ စိုက်ပျိုးကြပြီး နှမ်းနီမှာ အထွက်နှုန်းနည်းပြီး ဈေးမှာ နှမ်းနက်ကဲ့သို့ မကောင်းသဖြင့် စိုက်ပျိုးမှုနည်းကြောင်း သိရပါသည်။ နှမ်းတစ်ဧကစိုက်ပျိုးရာတွင် မျိုးနှမ်းအနေဖြင့် (၂)ပြည်ခန့်လိုအပ်ပြီး စိုက်ပျိုးခကုန်ကျစရိတ်အနေဖြင့် ၁၅၀၀၀၀ကျပ်ခန့်ကုန်ကျကြောင်းသိရပါသည်။ နောက်ပိုင်းတွင် အထွေထွေ ကုန်ကျစရိတ်များလည်း များလာဖြစ်ကြောင်းသိရပါသည်။ ထိုသို့ ကုန်ကျစရိတ်များလာမည်ဆိုသော်လည်း ရိတ်သိမ်းခါနီးတွင် ရာသီဥတုကောင်းမွန်ပြီး ရောဂါကျရောက်မှုမရှိဘဲ ဈေးနှုန်း ကောင်းမွန်မည်ဆိုပါက နှမ်းစိုက်တောင်သူများအဖို့ အမြတ်အစွန်းများစွာရရှိလာနိုင်မည်ဖြစ်ကြောင်း ခန့်မှန်းသိရှိရပါသည်။ နှမ်းဈေးနှုန်းများအနေဖြင့် ယခုဇွန်လဆန်းတွင်  နှမ်းနီတစ်တင်းလျှင် ၁၀၈၀၀၀ကျပ်၊ နှမ်းနက်တစ်တင်းလျှင် ၁၄၅၀၀၀ကျပ်နှင့် စမုံနက်နှမ်းတစ်တင်းလျှင် ၁၅၀၀၀၀ကျပ်ဖြင့် ပြည်ဈေးကွက်တွင် ပစ္စည်းလက်ကျန်နည်း၍ အရောင်းအဝယ်ပါးနေပါသည်။ နှမ်းဆီဈေးမှာ (ဦးဆီ) တစ်ပိဿာလျှင် ၁၅၅၀၀ကျပ်၊ ရိုးရိုးနှမ်းဆီတစ်ပိဿာလျှင် ၁၅၀၀၀ကျပ်ဖြင့် နေ့စဉ်အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ပဲခူး)

       ယခုကဲ့သို့သော မိုးဦးကျကာလတွင် ကျေးလက်ဒေသများ၌ နေအိမ်များ၊ နွားတင်းကုပ်များ၊ ထင်းတဲများအား အမိုးများမိုးကြပါသည်။ အများအားဖြင့် မိုးဦး/ လေဦးကျတွင် ယခင်နှစ်မှမိုးထားသော အမိုးများအား အသစ်ပြန်၍မိုးကြခြင်းဖြစ်ပါသည်။

       ဖြူးမြို့ရှိ ဒေသတွင်းကျေးလက်ဒေသများ၌ အများအားဖြင့် ခေါင်းမိုးမိုးရာတွင် တောင်ထန်းအား အဓိကထား၍မိုးကြပါသည်။ ထို့ကြောင့် ယခုကာလသည် တောင်ထန်းများ အရောင်းသွက်သောကာလဖြစ်ပါသည်။

        ၂၀၂၄ခုနှစ် ဇွန်လအစောပိုင်းတွင် ဖြူးမြို့၊ သပြေလှကျေးရွာရှိ ဦးချစ်ဖြိုးဝင်း၏ တောင်ထန်းအရောင်းဆိုင်၌ တောင်ထန်းအကြီး (ရှယ်) ၁၀၀စည်းပါ တစ်စည်းလျှင် ၆၀၀၀၀ကျပ်၊ တောင်ထန်းကြီး (သင့်) ၁၀၀စည်းပါ တစ်စည်းလျှင် ၅၈၀၀၀ကျပ်၊ တောင်ထန်းသေး (ရှယ်) ၁၀၀စည်းပါ တစ်စည်းလျှင် ၄၀၀၀၀ကျပ်၊ တောင်ထန်းသေး (သင့်) ၁၀၀စည်းပါ တစ်စည်းလျှင် ၃၈၀၀၀ကျပ်ဖြင့်ရောင်းချပေးနေပါသည်။

          ထို့ပြင် ဝါးဈေးနှုန်းအနေဖြင့် အရှင်ဝါး (၁၀) လုံးစည်းပါ တစ်စည်းလျှင် (၄၀၀၀) ကျပ်၊ တင်းဝါး (၁၀) လုံးစည်းပါ တစ်စည်းလျှင် ၁၃၀၀၀ကျပ်၊ ၁၂၀၀၀ကျပ်ဖြစ်ပြီး ကျသောင်းဝါး (ဝါးကြီး) တစ်လုံးလျှင် ၂၅၀၀ကျပ်မှစ၍ ၃၀၀၀ကျပ်ခန့်ထိရောင်းချပေးနေပါသည်။

         သပြေလှကျေးရွာရှိ ဦးချစ်ဖြိုးဝင်း‌ဆိုင်မှ တောင်ထန်းနှင့် ဝါးများအား ညောင်ပင်သာ၊ ကညွတ်ကွင်းနှင့် တောကျွဲအင်းများအထိ ဖြန့်ဖြူးရောင်းချပေးနေကြောင်း ဦးချစ်ဖြိုးဝင်း၏ ပြောကြားချက်အရသိရှိရပါသည်။

DOCA(ပဲခူး)

      တောင်ငူမြို့၊ အမှတ်(၁၁)ရပ်ကွက်၊ ဈေးလမ်းရှိ “ထက်” ဆိုင်ကယ်အရောင်းဆိုင်တွင် ကျောင်းဖွင့်ရာသီ၌ ဆိုင်ကယ်များရောင်းအားကောင်းကြောင်းသိရပါသည်။ ယခင်ကာလများတွင် အရောင်းပါးခဲ့သော်လည်း မေလအတွင်းနှင့်ဇွန်လအစပိုင်းအထိ ရောင်းအားအကောင်းဆုံးဖြစ်ပါသည်။

       ၂၀၂၄ခုနှစ် ဇွန်လအစပိုင်းတွင် ဈေးနှုန်းများအနေဖြင့် တောင်ငူမြို့တွင် လူကြိုက်များသော NCX Wave 100 ဆိုင်ကယ်မှာ တစ်စီးလျှင် ကျပ်၂၅သိန်းမှ  ကျပ်၃၅သိန်းအထိရှိပြီး 125 ကလစ်ဆိုင်ကယ်မှာ တစ်စီးလျှင် ကျပ်သိန်း၅၀မှ ကျပ်သိန်း၇၀အထိရှိပါသည်။

         ကျောင်းဖွင့်ရာသီတွင် ကျောင်းသား/ ကျောင်းသူများအား ကျောင်းပို့/ ကျောင်းကြိုအတွက် ဆိုင်ကယ်မှာ အသင့်လျော်ဆုံးဖြစ်ရာ ဈေးနှုန်းမြင့်မားသော်လည်း အခြားကာလများထက် ပိုမို၍ တစ်လအတွင်း ဆိုင်ကယ်အစီး ၅၀အထိရောင်းချရကြောင်းသိရှိပါသည်။

DOCA(ပဲခူး)

        ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်၏ လမ်းညွှန်ချက်အရ တောင်ငူခရိုင်ဆန်ကုန်သည်နှင့်ဆန်စက်ပိုင်ရှင်များက ဆန်များကိုလည်းကောင်း၊ ဆီကုန်သည်နှင့် ဆီလုပ်ငန်းရှင်များက စားသုံးဆီများကိုလည်းကောင်း ၂၀၂၄ခုနှစ်၊ ဇွန်လ ၂ရက်နေ့မှစ၍ သက်သာသောနှုန်းထားဖြင့် နေ့စဉ် ရပ်ကွက်များသို့ mobile မော်တော်ယာဉ်ဖြင့် လှည့်လည်ရောင်းချပေးလျက်ရှိပါသည်။

         ဇွန်လ ၂ရက်နေ့တွင် တောင်ငူမြို့၊ အမှတ်(၁)ရပ်ကွက်၊ ထီးလှိုင်ရှိ ရွှေဂူကြီးဘုရားဝင်းအတွင်း၌ ဆန် (၁၀)အိတ်နှင့် စားအုန်းဆီ(၁၅၀)ပိဿာကိုလည်းကောင်း၊ ဇူလိုင်လ ၃ရက်နေ့တွင် အမှတ်(၃)ရပ်ကွက်၊ ယိုးဒယားတန်းရှိ ညောင်ဝိုင်းဓမ္မာရုံ၌ ဆန်(၁၀) အိတ်နှင့် ဆီ(၁၄၀) ပိဿာကိုလည်းကောင်း အိမ်ထောင်စုတစ်စုလျှင် ဆန်(၂)ပြည်နှင့် ဆီ(၅၀)ကျပ်သားရောင်းချပေးပါသည်။

        ဆန်တစ်ပြည်လျှင် ၃၀၀၀ကျပ်၊ ဆီတစ်ပိဿာလျှင် ၅၉၀၀ကျပ်နှုန်းဖြင့် ရောင်းချပေးလျက်ရှိရာ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးနှင့်ဝန်ထမ်းများ၊ သက်ဆိုင်ရာရပ်ကွက် အုပ်ချုပ်ရေးမှူးနှင့် အုပ်ချုပ်ရေးအဖွဲ့ဝင်များကကြီးကြပ်လိုအပ်သည်များကို ကူညီဆောင်ရွက်ပေးကြောင်းနှင့် တောင်ငူခရိုင်အတွင်းရှိ ရေတာရှည်၊ အုတ်တွင်းနှင့် ဖြူးမြို့နယ်များတွင်လည်း ဆန်နှင့် စားသုံးဆီများကို သက်သာသောဈေးနှုန်းဖြင့် နေ့စဉ်ရောင်းချပေးနိုင်‌ရေး စီစဉ်ဆောင်ရွက်လျက်ရှိကြောင်းသိရှိရပါသည်။

DOCA(ပဲခူး)