ပြည်တွင်းကုန်သွယ်မှုသတင်း

          ပြည်ဈေးကွက်အတွင်း ဆောင်းရာသီ သီးနှံဖြစ်သည့် မုန်လာဥဖြူသီးနှံများ ယခုဇန်နဝါရီလ တတိယပတ်တွင် ဝင်ရောက်မှုရှိလာပြီး ဈေးကောင်းရလျက်ရှိကြောင်း သိရပါသည်။ ပေါ်ဦး ပေါ်ဖျားဖြစ်သည့်အတွက် အရောင်းအဝယ်မှာကောင်းလျက်ရှိပြီး ဈေးကွက်သို့ ဆင်မြီးဆွဲ၊ ပုတီးကုန်း၊ ကင်ပွန်းခြုံ၊ မှုတ်ရှည်ရွာများမှ အဝင်ရှိနေပါသည်။ ဝင်ရောက်မှုမှာ တစ်ကြိမ်လျှင် (၅)လုံးပါအစည်း (၅၀-၆၀)ခန့်ဝင်ရောက်မှုရှိနေပြီး ဈေးကွက်အတွင်းရောင်းချသောဈေးနှုန်းမှာ တစ်စည်းလျှင် (၇၀၀-၈၀၀)နှုန်းဖြင့် ဈေးမြင့်နေသော်လည်း ပေါ်ခါစဖြစ်သောကြောင့် အဝင်ရှိသလောက် အရောင်းအဝယ် ဖြစ်လျက်ရှိကြောင်း သိရပါသည်။

DOCA(ပဲခူး)

           ဆီထွက်သီးနှံဖြစ်သည့်နှမ်းသီးနှံမှာ ပြည်တွင်းစားသုံးခြင်းနှင့် ပြည်ပသို့တင်ပို့သည့်သီးနှံ တစ်မယ်ဖြစ်ပြီး၊မကွေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့မှာ အဓိကစိုက်ပျိုးလျက်ရှိကြောင်းသိရပါတယ်။မန္တလေးတိုင်းဒေသကြီးအတွင်း အောင်မြေသာစံခရိုင်၊ အမရပူရခရိုင်၊ ပြင်ဦးလွင်ခရိုင်၊ ကျောက်ဆည်ခရိုင်၊ မိတ္ထီလာခရိုင်၊ ရမည်းသင်းခရိုင်၊ မြင်းခြံခရိုင်နှင့် ညောင်ဦးခရိုင်တို့တွင် နှမ်းသီးနှံကို နွေနှမ်း၊ မိုးနှမ်းနှင့် ဆောင်းနှမ်း (မိုးနှောင်းနှမ်း) အဖြစ် စိုက်ပျိုး လျက်ရှိကြောင်း သိရပါတယ်။ ပြည်တွင်း၌ နှမ်းသီးနှံအား ဆီကြိတ်ခွဲ၍နှမ်းဆီအဖြစ်စားသုံးခြင်း၊ နှမ်းလှော်ဆီမွှေး၊နှမ်းယို၊နှမ်းဖတ်၊နှမ်းလှော်နှင့် သရေစာမုန့်အမျိုးမျိုးတို့တွင် နှမ်းအားထည့်သွင်း စားသုံးကြောင်း တွေ့ရပါတယ်။ နှမ်းသီးနှံမှာ  ပရိုတင်းဓာတ်များစွာ ပါဝင်ပြီး၊ ဆေးဖက်ဝင်ကြောင်း သိရပါတယ်။ ဆီထွက်သီးနှံ မြေပဲ၊ နှမ်းနှင့် နေကြာသီးနှံများအား  စားသုံးဆီကြိတ်ခွဲ၍ ပြည်တွင်း စားဆီဖူလုံမှုရှိစေရန်နှင့်စားဆီများတင်သွင်းမှုလျော့ချတင်သွင်းနိုင်ရန်အတွက်နိုင်ငံတော်မှတွန်းအား ပေးဆောင်ရွက်လျက်ရှိကြောင်း သိရပါတယ်။နှမ်းသီးနှံမှာ ပြည်တွင်းစားဆီကြိတ်ခွဲသည့် အရေးကြီး ကုန်စည်တစ်မျိုးဖြစ်ပြီး၊ပြည်ပသို့ တင်ပို့သည့်စျေးကွက်ဝင်အမယ် တစ်မျိုးဖြစ်ကြောင်း သိရပါတယ်။ ဒေသအသီးသီးမှ ထွက်ရှိသည့်ပဲ၊ပြောင်း၊နှမ်းသီးနှံမျိုးစုံ ဝင်ရောက်လျက်ရှိသည့်မန္တလေးပွဲစား၊ ကုန်သည်စက်ပိုင်များမဟာကထိန်တော်အသင်းတွင်ဇန်နဝါရီလတတိယပတ်အတွင်း ဖြစ်ပေါ်လျက် ရှိသည့်နှမ်းအမျိုးအစားအလိုက်ပေါက်စျေးများမှာ  ၃တင်းဝင်အိတ်(၄၅ ပိဿာပါ) တစ်အိတ်လျှင် နှမ်းဖြူ(ဗမာ)၃၄၅၀၀ဝိ/- နှင့် ၃၆၀၀၀ဝိ/-၊နှမ်းဖြူ(ဂျပန်) ၄၁၀၀၀ဝိ/-နှင့် ၄၂၀၀၀ဝိ/-၊နှမ်းညို(သစ်) ၃၀၅၀၀ဝိ/-နှင့် ၃၂၀၀၀ဝိ/-၊နှမ်းနက်(စမုံ) ၆၈၀၀၀ဝိ/- နှင့် ၇၇၅၀၀ဝိ/-၊ ပန်းနှမ်း၂၃၀၀၀ဝိ/-နှင့် ၂၄၀၀၀ဝိ/-၊ နှမ်းဖတ်တစ်ပိဿာလျှင် ၄၈၀ဝိ/-နှင့် ၄၉၀ဝိ/-တို့ အသီးသီးဖြစ်ပေါ်လျက်ရှိပြီး၊ စျေးနှုန်း အနေဖြင့် ရက်အလိုက်အနည်းငယ်ပြောင်းလဲမှုရှိနိုင်ကြောင်း သိရပါတယ်။ နှမ်းသီးနှံမှာ စားသုံးဆီ အဖြစ်ကြိတ်ခွဲခြင်းနှင့် သရေစာအမျိုးမျိုးတွင် သုံးစွဲခြင်းတို့ကြောင့် ပြည်တွင်း စျေးကွက်လိုအပ်ချက် များပြီး၊ပြည်ပသို့တင်ပို့သည့် စျေးကွက်ဝင်ဆီထွက်သီးနှံတစ်မယ် ဖြစ်ကြောင်း သိရပါတယ်။  

DOCA(မန္တလေး)

             ဧရာဝတီတိုင်းဒေကြီး၊ မြန်အောင်ခရိုင်၊ ကြံခင်းမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးလျက်ရှိပြီး ရာသီပေါ်သီးနှံများနှင့် စားဖိုဆောင်သုံး သီးနှံများကိုလည်းစိုက်ပျိုးကြကြောင်းသိရသည်။

             ကြံခင်းမြို့နယ်အတွင်းရှိ တစ်ချို့ကျေးရွာများတွင် တနိုင်တပိုင်စီးပွားရေးအဖြစ် ကြံများကိုလည်း စိုက်ပျိုးကြပါသည်။ ကြံခင်းမြို့နယ်တစ်ခုလုံးအနေဖြင့် ၂၈ ဧက စိုက်ပျိုးထားပြီး ထွက်ရှိသည့်ကြံများကို အဝယ်ဒိုင်များမှတစ်ဆင့် မြို့နယ်အတွင်းရှိ အအေးဆိုင်များနှင့် ဒေသတွင်းရောင်းဝယ်မှု ဖြစ်လျက်ရှိပါသည်။ အထွက်နှုန်းအနေဖြင့် တစ်ဧကလျှင် ၂၁.၂၂ တန်ထွက်ရှိပြီး၊ ကြံတစ်ခင်းလျှင် အနည်းဆုံး ၂ နှစ်မှ ၄ နှစ်အထိ ရှင်သန်ကြီးထွားကြောင်း သိရှိရပါသည်။ ကုန်ကျစရိတ်အနေဖြင့် လမိုင်းခင်း (ယခင်နှစ်စိုက်ပျိုးခြင်း) တစ်ခင်းလျှင် ၇၇၀၀၀၀/-ကျပ်ခန့် ကုန်ကျပြီး၊ အခင်းသစ် (ယခု နှစ်စိုက်ပျိုးခြင်း) တစ်ခင်းလျှင် ၉၆၀၀၀၀/-ကျပ်ခန့် ကုန်ကျကြောင်း၊ အမြတ်အနေဖြင့် တစ်ဧက လျှင် ၁၀ သိန်းဝန်းကျပ်ခန့် ကျန်ရှိကြောင်း ကြံစိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(ဧရာဝတီ)

                မြန်မာနိုင်ငံ၏ တောင်ပေါ်မြို့တစ်မြို့ဖြစ်သည့် ပြင်ဦးလွင်မြို့သည် ပင်လယ်ရေမျက်နှာ ပြင်အထက် ပေပေါင်း(၃၅၃၈)ပေမြင့်ပြီး သဘာဝတရားမှချီးမြှင့်ထားသည့် မြေဆီဩဇာကောင်း မွန်မှုနှင့်သင့်တင့်အေးမြသောရာသီဥတုတို့ကို ပိုင်ဆိုင်ထားရှိမှုတို့ကြောင့် သစ်သီးဝလံပန်းမာန် များကိုစိုက်ပျိုးထုတ်လုပ်ရောင်းချသူ ဒေသခံတောင်သူများအတွက် အဖိုးမဖြတ်နိုင်သည့်မြို့တစ်မြို့ ဖြစ်သည်။ ယင်းသို့သစ်သီးဝလံပန်းမာန်များ စိုက်ပျိုးကောင်းမွန်သည့်မြေတွင် မြို့ခံလူအများသည် နှစ်ရှည်သီးနှံပင်နှင့်ရာသီစာသီးနှံပင်များကိုစိုက်ပျိုးခြင်းဖြင့် အသက်မွေးဝမ်းကြောင်း ပြုလျက် ရှိရာ ၎င်းသီးနှံများထဲမှ စတော်ဘယ်ရီသီးနှံကိုလည်း  တစ်နိုင်တစ်ပိုင် စိုက်ပျိုးကြသည်။

                 ‘မန္တလေးနှင့်ထိုးမုန့်’ ဆိုသကဲ့သို့ “ပြင်ဦးလွင်နှင့်စတော်ဘယ်ရီ”မှာလည်း ခွဲခြားမရပါ။ “ စတော်ဘယ်ရီသီး ” အမျိုးအစားသည် ပြင်ဦးလွင်မြို့၏ဆောင်းရာသီ ဒေသထွက်ကုန်တစ်ခု ဖြစ်သည်။ ရုက္ခဗေဒမျိုးစုအမည်ရ ”ဖာဂေးရီးယား” ဟုအမည်တွင်၍ မြန်မာအခေါ်အဝေါ်အရ “ရှမ်းဆီး”အမည်တွင်သော စတော်ဘယ်ရီသီးပင်များသည်အေးမြသောရာသီဥတုကိုအထူးနှစ်သက် ပြီးမြေပေါ်တွင်ကပ်၍ ပေါက်ရောက်သောမြေလျှောက်ပင် (Runner)အမျိုးအစားဖြစ်သည်။ဘောင် များဖြင့်စိုက်ပျိုးနိုင်၍ (၁)ဘောင်လျှင်၁၅၀ပေရှိပြီး (၁)ဘောင်နှင့် (၁)ဘောင်ကြား(၃.၅) ပေခြား   စိုက်ပျိုးပြီး(၁) ဘောင်လျှင်အပင်ရေ (၂၅၀)ခန့်စိုက်ပျိုးနိုင်သည်။ စတော်ဘယ်ရီသီးပင်များကို အောက်တိုဘာလနှင့်နိုဝင်ဘာလတွင် စတင်စိုက်ပျိုးကြပြီးဇန်နဝါရီလမှ ဧပြီလအတွင်း ထွက်ရှိ သည့်သီးနှံဖြစ်ကာ ဈေးကွက်ဝင်ပြီး တောင်သူအကျိုးအမြတ်ရရှိသောသီးနှံဖြစ်ပါသည်။ လက်ရှိ စတော်ဘယ်ရီသီများသည် ဇန်နဝါရီလတွင်ထိုင်ဝမ် ၊Royal-1-၈၀ထိုင်ဝမ် (အကျွတ်)မျိုး ထွက်ရှိပြီး ဖေဖော်ဝါရီလကုန်တွင်ဒေသမျိုးများထွက်ရှိသည်။ အထွက်နှုန်းအနေဖြင့်တစ်ဧကလျှင် ပျမ်းမျှ ပိဿာ(၃၀၀၀-၄၀၀၀)ကြားနှင့် ၁ပိဿာလျှင် (၁၅၀၀၀/-)ကျပ် ၊အလတ်စားဘူးတစ်ဘူးလျှင်  (၅၀၀၀/-)ကျပ်၊ အသေးစားနှီးခြင်းတစ်ခြင်းလျှင်(၂၅၀၀/-)ကျပ် ဖြင့်ရောင်းချလျက်ရှိကြောင်းသိရှိ ရပါသည်။နေရာဒေသနှင့်အရည်အသွေးပေါ်မူတည်၍ ဈေးများမှာလည်း ကွာခြားလျက်ရှိကြောင်း စတော်ဘယ်ရီသီးများမှာလည်း နေ့စဉ်ပုံမှန်ဆွတ်ခူးရောင်းချနိုင်သော်လည်း( ၅ ) ရက်တစ်ကြိမ် ဆွတ်ခူးပါကပိုမိုကောင်းမွန်၍ အသင့်လျော်ဆုံးခူး  ဆွတ်ချိန်မှာ အသီးများအနီရောင်မရင့်မှည့်မှီ အချိန်တွင်ခူးဆွတ်ခြင်းကအရောင်းအသွေးလှပပြီး အရသာပြည့်စုံသော အရည်အသွေးလှပသော အသီးများဖြစ်၍ ဈေးကောင်းများရရှိနိုင်ပါသည်။

                 စတော်ဘယ်ရီသီးနှံမှာ အလွယ်တကူစားသုံးရသောသီးနှံဖြစ်၍ ရောင်းအားသွက်လျက် ရှိသည်။နှစ်စဉ်စတော်ဘယ်ရီသီးထွက်ပေါ်လာချိန်တွင် ဈေးကောင်းရရှိပြီးသီးနှံလှိုင်လှိုင်ထွက်ပေါ် ချိန်တွင်တောင်သူများအပြိုင်အဆိုင်ရောင်းဝယ်မှုကြောင့် ဝယ်လိုအားထက်ရောင်းလိုအား များ၍ ဈေးကွက်သဘာဝအရဈေးနှုန်းများ ကျဆင်းကြောင်းသိရပါသည်။ စားသုံးသူများမှာလည်း နို့ဆီ၊ သကြားမလိုဘဲအရသာကောင်းမွန်ပြီး အချိုဓာတ်ပါဝင်မှုများသည့်အကျွတ်မျိုးကိုသာပိုမို ကြိုက်နှစ် သက်ကြသည်။ ဒေသမျိုးရင်းမှာအချဉ်ဓါတ်ပါဝင်မှုများပြား၍ ပြင်ဦးလွင်ဒေသထွက် ဒေသသီး များကို စတော်ဘယ်ရီဖျော်ရည်၊ စတော်ဘယ်ရီဝိုင်လုပ်ငန်း၊ ယိုလုပ်ငန်းများတွင် တန်ဖိုးမြှင့်ကုန် ချောတစ်ခုအနေဖြင့်ပြည်တွင်းဈေးကွက်တွင် ဖြန့်ဖြူးရောင်းချလျက်ရှိပါသည်။  

                 အားနည်းချက်အနေဖြင့် စတော်ဘယ်ရီသီးနှင့်စတော်ဘယ်ရီဝိုင်သည် ပြည်ပဈေးကွက် သို့တင်ပို့နိုင်ရန်ကြိုးပမ်းလျက်ရှိသေးသော်လည်းအားသာချက်အနေဖြင့် မျိုး၊မြေ၊နည်း ဟူသော စနစ်များဖြင့်ရည်သွေးကောင်းသည့်မျိုး၊ကောင်းမွန်သည့်‌မြေတွင်မြင့်မားသောနည်းပညာများဖြင့် စိုက်ပျိုးမှုကြောင့် အထွက်နှုန်းနှင့်အရည်အသွေးမြင့်မားလာ၍ ပြင်ဦးလွင်ဒေသထွက်စတော်ဘယ်ရီ အသီးများကို ပြည်တွင်းတင်ပို့မှုအနေဖြင့်ရန်ကုန်၊ မန္တလေးနီးစပ်ရာမြို့ကြီးများသို့ ပြည်တွင်း တင်ပို့ရောင်းခြင်းဒေသတွင်းစားသုံးမှုနှင့် ခရီးသွားလက်ဆောင်အဖြစ် ဝယ်ယူသူများပြားခြင်း ကြောင့်တောင်သူများ စီးပွားဖြစ်ထွန်းလျက်ရှိပါသည်။ ခရီးသွားပြည်သူများ အနေဖြင့်လည်း ပြင်ဦးလွင်မြို့စတော်ဘယ်ရီခြံစိုက်ခင်းများတွင် ကိုယ်တိုင်ခူးယူဝယ်ယူနိုင်သလို ပြင်ဦးလွင်မြို့ သဘာဝအလှကိုခံစားနိုင်ရန်အတွက် အလည်လာရန်ဖိတ်ခေါ်လိုက်ရပါသည်။

DOCA(မန္တလေး) 

မြင်းခြံမြို့သည် မြန်မာနိုင်ငံအလယ်ပိုင်းတွင်တည်ရှိပြီး မိုးနည်းရေရှားရပ်ဝန်းဒေသ ဖြစ်သော်လည်း ဧရာဝတီမြစ်ကမ်းဘေးတွင်တည်ရှိ၍ ဆည်မြောင်းများအသင့်အတင့်ရှိပြီး၊   မိုးကောင်းသောက် ယာမြေများတွင် ပဲစဉ်းငုံ ၊ ကုလားပဲ၊ နှမ်း၊ မြေပဲ၊ အစေ့ထုတ်ပြောင်းနှင့် ကြက်သွန်နီ သီးနှံများစိုက်ပျိုးကြပါသည်။ မိုးကြက်သွန်နီကို ဩဂုတ်လ၊ စက်တင်ဘာလနှင့် အောက်တိုဘာလတို့တွင်စိုက်ပျိုးခဲ့ပြီး ဇန်နဝါရီလ၊ ဖေဖော်ဝါရီလနှင့်မတ်လတို့တွင် ထွက်ပေါ်လေ့ ရှိသည်။ မိုးကြက်သွန်နီသည် နွေကြက်သွန်နီ မပေါ်သေးခင် စပ်ကြားစားသုံးရန် အစားထိုး စိုက်ပျိုးသော သီးနှံဖြစ်ပြီးမတ်လကုန်တွင် ရာသီကုန်ပြီးဈေးကွက်မှ ပျောက်ကွယ်သွားပြီဖြစ်သည်။ မြင်းခြံခရိုင်တွင် မိုးကြက်သွန်နီစိုက်ဧက (၁၅၉၂)ဧက၊ စိုက်ပျိုးထားရှိပြီး၊  ထွက်ရှိမှုမှာလည်း ပိဿာ ချိန်သိန်းပေါင်း(၃၂၀)ကျော် ထွက်ရှိသည်။ ယခုတစ်ပတ် မိုးကြက်သွန်နီ  အကြီးစတစ်ပိဿာလျှင် (၂၄၀၀) ကျပ်မှ( ၂၆၀၀) ကျပ်၊ အလတ်စတစ်ပိဿာလျှင်( ၁၉၀၀) ကျပ်မှ (၂၃၀၀) ဖြစ်ပြီး၊ အသေးစ တစ်ပိဿာလျှင် (၇၀၀) ကျပ် (၁၇၀၀) ကျပ် ဖြင့် ပွဲရုံများတွင် အရောင်းအဝယ်ဖြစ်ခဲ့သည်။

          ယခင်တစ်ပတ်မိုးကြက်သွန်နီအကြီးစ တစ်ပိဿာလျှင် (၂၈၀၀) ကျပ်မှ (၃၂၀၀) ကျပ်၊ အလတ်စတစ်ပိဿာလျှင် (၂၀၀၀) ကျပ်မှ (၂၅၀၀) ကျပ် ဖြစ်ပြီး၊ အသေးစ တစ်ပိဿာလျှင် (၇၀၀) ကျပ်မှ (၁၇၀၀)ကျပ် ဖြင့် ဈေးကွက်တွင်အရောင်းအဝယ်များဖြစ်ခဲ့‌ကြောင်းသိရှိရပြီး၊ အကြီးစတစ် ပိဿာလျှင် (၄၀၀) ကျပ်မှ(၆၀၀)ကျပ်၊ အလတ်စတစ်ပိဿာလျှင်(၁၀၀) ကျပ်မှ (၂၀၀)ကျပ်ထိ ဈေးနှုန်း ကျဆင်းခဲ့ပြီး အသေးဈေးမှာပြောင်းလဲမှုမရှိကြောင်းနှင့် ကြက်သွန်နီ၏ အရွယ်အစား၊ အရည်အသွေးပေါ်မူတည်၍ဈေးနှုန်းများ အနည်းငယ်ကျဆင်းခဲ့သည်။ အဓိကဈေးကွက်အနေဖြင့်ရန်ကုန် ဘုရင့်နောင်သို့အများဆုံးတင်ပို့ပြီး တစ်ရက်လျှင်( ၁၂)ဘီးကား (၂ )စီးမှ(၃) စီးအထိတင်ပို့ပြီး၊ ပိဿာ ချိန်အနေဖြင့် (၁၃၄၇၂) ပိဿာမှ (၂၀၂၀၉) ပိဿာကျော် တင်ပို့လေ့ရှိကြောင်းသိရှိရပြီး မန္တလေး၊ နေပြည်တော်နှင့်မော်လမြိုင်မြို့များ သို့လည်း နှစ်ရက်ခြား သုံးရက်ခြားတင်ပို့ကြောင်း ကြက်သွန် အရောင်းအဝယ်လုပ်ကိုင်သူ ကုန်သည်တစ်ဦး၏ပြောပြချက်အရ သိရသည်။

DOCA(မန္တလေး)