ပြည်တွင်းကုန်သွယ်မှုသတင်း

           မွန်ပြည်နယ်၊ ကျိုက်မရောမြို့နယ် ဥယျာဉ်ခြံမြေများ၌ မိသားစုအပိုဝင်ငွေရရှိစေရန် တစ်နိုင်တစ်ပိုင်စိုက်ပျိုးထားသည့် ဒေသထွက် ငရုတ်သီးတောင့်များ ဆွတ်ခူးချိန် လှိုင်လှိုင်ထွက်ပြီး ဈေးကောင်းများရရှိသဖြင့် မြွေဟောက်ကျေးရွာမှ ငရုတ်သီး တစ်နိုင်တစ်ပိုင် စိုက်ပျိုးသူများ မိသားစုဝင်ငွေတိုးကာစီးပွားရေး အဆင်ပြေလျက်ရှိကြောင်း သိရသည်။

              ကော့ကလော့ကျေးရွာအုပ်စု မြွေဟောက်ကျေးရွာရှိ ခြံစိုက်တောင်သူများက မြေပဲ စိုက်ပျိုးချိန်နှင့် နှမ်း စိုက်ပျိုးချိန်တွင် သီးညှပ်အဖြစ် ငရုတ်သီးကိုပါ ရော၍ စိုက်ပျိုးကြသည်။ ငရုတ်ပင်သည် အများအားဖြင့် မြေအစိုဓာတ်ဖြင့်သာ ကြီးထွားပြီး အပင်သုံးလသား၌ အပင်သန်ဆေး၊ အသီးသန်ဆေး၊ ပိုးသတ်ဆေးတို့ကို ဖြန်းပေးရသည်။ ငရုတ်ခင်းအတွင်း ပေါင်းမြက်ရှိပါက ပေါင်းလိုက်ပေးရသည်။

            မြွေဟောက်ကျေးရွာရှိ စိုက်ပျိုးသည့် ငရုတ်သီးမျိုးမှာ မိုးမျှော်သီး ဒေသခေါ် ကုလားအော်သီးမျိုးများကိုသာ အဓိကထား စိုက်ပျိုးကြပြီး စပ်သည့်အတွက် ဒေသခံ ပြည်သူများ အလွန်ကြိုက်နှစ်သက်ကာ ဈေးကွက်ဝင်ကြောင်း ငရုတ်သီးကို အောက်တိုဘာလ ၌ စတင်စိုက်ပျိုးပြီး နှစ်လကြာလျှင် တစ်ကြိမ် စတင်ခူးဆွတ်ရောင်းချနိုင်ပြီးဖြစ်ကြောင်း ယခုလို ခူးဆွတ်ချိန်တွင် တစ်ပိဿာလျှင် တစ်သောင်းခန့် ဖောက်သည်ပေးရပြီး တစ်ခါ ခူးဆွတ်လျှင် ၆ ပိဿာခန့်ရသဖြင့် တစ်ပတ်ကို ဝင်ငွေ ၆၀၀၀၀ ကျပ် ရရှိကြောင်း ငရုတ်သီး များ စနစ်တကျ စိုက်ပျိုးသူ ဦးစောအုန်း၏ ပြောပြချက်အရ သိရသည်။ ယခုရာသီတွင် ငရုတ်သီးတောင့်များကို လာရောက်ဝယ်ယူသည့်အတွက် ငရုတ်သီးများ ဈေးကောင်းရကာ တစ်ဖက်တစ်လမ်းမှ မိသားစုဝင်ငွေတိုးပြီး အဆင်ပြေလျက်ရှိကြောင်း သိရှိရပါသည်။

DOCA(မွန်)

          မြန်မာနိုင်ငံတစ်ဝှမ်းထင်ပေါ်ကျော်ကြားသော လက်မှု့လုပ်ငန်းများတွင် မန္တလေးမြို့မှ ရွှေချည်ထိုး၊ ငွေချည်ထိုးလုပ်ငန်း၊ ပုဂံမြို့မှ ယွန်းထည်လုပ်ငန်းအပြင် ဧရာဝတီတိုင်းဒေသကြီး ပုသိမ်မြို့မှ ထုတ်လုပ်လျက်ရှိသော မြန်မာ့ရိုးရာလက်မှုအနုပညာ ပုသိမ်ထီးလုပ်ငန်းသည် မြန်မာနိုင်ငံအတွင်းသာမက ကမ္ဘာမှာပင် နာမည်ကျော်ကြား၍ ပြည်တွင်း ပြည်ပဈေးကွက်တွင် လူကြိုက်များလျက်ရှိကြောင်း ထီးလုပ်ငန်းရှင်များထံမှသိရသည်၊၊

          ပုသိမ်ထီးကို အစပထမတွင် ဆီစိမ်စက္ကူဖြင့် ပြုလုပ်ခဲ့သော်လည်း နောက်ပိုင်းတွင် ဖျင်စကိုတည်ရေများသုတ်လိမ်းပြီး ဆီစိမ်ကာ ရေစိုခံအောင်ပြုလုပ်သုံးစွဲခဲ့ပြီး ပြည်တွင်းမှ ထွက်ရှိသော ပိတ်ရောင်စုံ၊ တက်ထရွန် ရောင်စုံဖြင့် ထုတ်လုပ်၍ နိုင်ငံခြားငွေဖြင့် ဝယ်ယူရသော ကုန်ကြမ်းပစ္စည်းများမပါဘဲ ဒေသထွက်ကုန်ကြမ်းများ ဖြစ်သော မအူသစ်၊ ထီးရိုးဝါး၊ သရကူဝါး ၊ မြန်မာပိတ်စများဒေသတွင်းထွက်ရှိသည့် သုတ်ဆေး၊ ဆိုးဆေးများဖြင့် အသုံးပြုကာ ထီးရွက် ပေါ်တွင် ကနုတ်ပန်းချီရေးဆွဲခြင်း ၊ ရှုခင်းပုံများရေးဆွဲခြင်း၊ ရှေးခေတ်ပန်းချီ လက်ရာများ ရေးဆွဲခြင်းများ၊ ဆေးဆိုးခြင်းများ ပြုလုပ်၍ ထီးရွက်ကို အလှဆင်ထားသည့်အတွက် မြန်မာ့လက်မှုအနုပညာကို ဖော်ထုတ်နိုင်သည့် ရိုးရာလုပ်ငန်း တစ်ခုအဖြစ် ထင်ရှားကျော်ကြား လျက်ရှိပါသည်၊၊

          ယခုပွင့်လင်းရာသီပုသိမ်ထီးဈေးကွက်တွင် တန်ဆောင်တိုင်ကထိန်အလှူရာသီမှစ၍ ယခုအချိန်အထိ နေပြည်တော်၊ ရန်ကုန်၊ မန္တလေး၊ စစ်ကိုင်း၊ မြဝတီနှင့်အခြားမြို့များ တိုင်းအတွင်းရှိ မြို့နယ်များတွင် အလှဆောင်းထီး ၁၀ လက်မခွဲ ကျပ် ၁၀၀၀၀၊ ၁၄လက်မထီး ကျပ် ၁၂၀၀၀ ၊ ၁၅လက်မထီး ကျပ် ၁၅၀၀၀ ဈေးဖြင့် ပြည်တွင်းဈေးကွက် သုံးစွဲရန်အမှာစာဖြင့်လည်းကောင်း လူကိုယ်တိုင် သော်လည်းကောင်း လာရောက်ဝယ်ယူ လျက်ရှိပြီး ပုသိမ်ထီးဈေးကွက်မှာ အရောင်းအဝယ် သွက်လျက်ရှိကြောင်း ဟိုတယ်အလှဆင် ရန်နှင့် ကမ်းခြေသုံးထီး ၂'၊ ၃'၊ ၄' ဆိုဒ်ထီးများကိုလည်း ဝယ်ယူလျက်ရှိပြီး ရန်ကုန်မှ တစ်ဆင့် ပြည်ပနိုင်ငံများသို့ တင်ပို့ရန် လာရောက် ချိတ်ဆက်မှုများ ရှိကြောင်း ကုန်ကြမ်းဈေးများ မြင့်တက်မှုရှိသည့်အတွက် ယခင်နှစ်ဈေးထက် ယခုနှစ် ပုသိမ်ထီးတစ်လက်ကို ၂၀၀၀/၃၀၀၀ ဈေးနှုန်းမြင့်တက်မှုရှိကြောင်း  ပုသိမ်မြို့ ဘန့်ဘူးဟောက် ( BAMBOO HOUSE Traditional  Umberlla Work Shop)ထီးလုပ်ငန်းရှင်ထံမှသိရှိရပါသည်၊၊

DOCA(ဧရာဝတီ)

           ၂၀၂၅ ခုနှစ်၊ မတ်လ ၂ ရက်နေ့၊ နံနက် (၀၉း၀၀) နာရီအချိန်တွင် ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ရွှေမြင့်မိုရ်ယာဥ်ရပ်နားစခန်းသို့ မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ စီစဥ်မှုဖြင့် Kaung Hlyan New Asia Co,Ltd မှ တင်ပို့ရောင်းချသည့် စားအုန်းဆီ ၁ ပေပါလျှင် ၁၁၀ ပိဿာပါ စားအုန်းဆီ (၄၉)ပေပါနှင့် Yadanarbon Global Network Distribution Co,Ltd မှ စားအုန်းဆီ ၁ ပေပါလျှင် ၁၁၀ ပိဿာပါ စားအုန်းဆီ (၃၂)ပေပါကို ယာဥ်မောင်း ဦးထွန်းထွန်းမြင့် ၊ ယာဉ်အမှတ် 1I-6178/ FUSO မော်တော်ယာဥ်ဖြင့် တင်ဆောင်ရောက်ရှိလာရာ စားသုံးသူရေးရာ ဦးစီးဌာန၊ တိုင်းဒေသကြီးဦးစီးမှူး ဦးစိုးဦးနှင့်တာဝန်ရှိသူများက သွားရောက် စစ်ဆေးခဲ့ကြောင်း၊ အဆို ပါစားအုန်းဆီ စုစုပေါင်း(၈၁)ပေပါအား ကုမ္ပဏီ၏လက်ကားအ​ရောင်းကိုယ်စားလှယ်မှ တစ်ဆင့် ထားဝယ်မြို့၊ အနောက်ရပ်၊ ဦးကျော်ရင်လမ်းရှိဦးဘိုသစ်၏ ယမုံလှိုင် ကုန်စုံဆိုင် အပါအဝင် လက်လီဆိုင် ၁၅ ဆိုင်မှတစ်ဆင့် သတ်မှတ်ရည်ညွှန်းစျေးအတိုင်း စားသုံးသူများအား ရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများတွင် မိမိတို့ နေအိမ်ဝင်းအတွင်းနှင့်လယ်ယာမြေများထဲတွင် တစ်ပိုင်တစ်နိုင်အနေဖြင့် စားတော်ပဲစိမ်းကို စိုက်ပျိုးပြီး ကန့်ဘလူမြို့မဈေးသို့ လာရောက်ရောင်းချကာ ဈေး‌ကောင်ရရှိ၍ အရောင်းအဝယ်ဖြစ်လျက်ရှိကြောင်း သိရ သည်။

          ၂၀၂၅ ခုနှစ်၊ ယခင် ဖေဖော်ဝါရီလ တတိယပတ်အတွင်း ကန့်ဘလူမြို့၌ ဖြစ်ပေါ်နေသော စားတော်ပဲစိမ်း ဈေးနှုန်းများမှာ စားတော်ပဲစိမ်း တစ်ပြည်လျှင်(၉၅၀၀)ကျပ်၊ စားတော်ပဲစိမ်း နို့ဆီတစ်ဘူး လျှင်(၁၂၀၀)ကျပ်ဈေးနှုန်းရှိခဲ့ပြီး ယခု ၂၀၂၅ ခုနှစ်၊ ဖေဖော်ဝါရီလ စတုထ္ထပတ်အတွင်း ကန့်ဘလူမြို့၌ ဖြစ်ပေါ်နေသော စားတော်ပဲစိမ်း ဈေးနှုန်းများမှာ စားတော်ပဲစိမ်း တစ်ပြည်လျှင်(၈၈၀၀)ကျပ်၊ စားတော် ပဲစိမ်း  နို့ဆီတစ်ဘူးလျှင်(၁၁၀၀)ကျပ်ဈေးနှုန်းဖြင့် ‌အရောင်းအဝယ် ဖြစ်လျက်ရှိသောကြောင့် ယခင်အပတ်နှင့် နှိုင်းယှဉ်ကြည့်မည်ဆိုပါက စားတော်ပဲစိမ်း တစ်ပြည်လျှင်(၇၀၀)ကျပ် ကျဆင်း လျက်ရှိ ကြောင်း  သိရှိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ ကန့်ဘလူခရိုင်အတွင်းရှိ ကျေးရွာများတွင် စပါး၊ ပဲမျိုးစုံနှင့် စားဖိုဆောင် သီးနှံများကို စိုက်ပျိုးရောင်းချကြရာ တောကြက်ဟင်းခါးသီးကိုလည်း ကန့်ဘလူမြို့နယ် အတွင်းရှိ ကျေးရွာများမှ စင်ထိုးစိုက်ပျိုးခြင်းနှင့် ခြံစည်းရိုးပေါ် တင်ပြီးလည်း စိုက်ပျိုးကြပြီး ကန့်ဘလူ မြို့မဈေးသို့ လာရောက်ရောင်းချကာ ဈေး‌ကောင်ရရှိ၍ အရောင်း အဝယ် ဖြစ်လျက်ရှိ ကြောင်းသိရ သည်။

             ၂၀၂၅ ခုနှစ်၊    ယခု ဖေဖော်ဝါရီလ စတုထ္ထပတ်အတွင်း ဖြစ်ပေါ်နေသော ကန့်ဘလူမြို့၏ တောကြက်ဟင်းခါးသီး ဈေးနှုန်းများမှာ တောကြက်ဟင်းခါးသီး တစ်ပြည်လျှင်(၂၀၀၀)ကျပ်၊ တောကြက် ဟင်းခါးသီး နို့ဆီ တစ်ဘူးလျှင်(၃၀၀)ကျပ် နှင့် နို့ဆီ(၂)ဘူးလျှင်(၅၀၀)ကျပ်ဈေးနှုန်းဖြင့် အရောင်းအဝယ် ဖြစ်လျက်ရှိကြောင်း ကန့်ဘလူမြို့၊ မြို့မဈေးတွင် ကုန်စိမ်းသီးနှံမျိုးစုံ  ရောင်းချနေသော ဈေးသည်တစ်ဦးထံမှ သိရှိရပါသည်။

DOCA(စစ်ကိုင်း)