ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ မုံရွာမြို့နယ်ရှိ တောင်သူများသည် နှမ်း၊ ပဲမျိုးစုံ၊ ပြောင်း၊ ငရုတ်စသည့် သီးနှံများကို အများဆုံးစိုက်ပျိုးကြပြီး ဗုံတို၊ ဘုမ္မနိုးကျေးရွာများတွင် စားဖိုဆောင်သီးနှံဖြစ်သည့် ခရမ်းချဉ်သီးနှံကိုလည်း စီးပွားဖြစ် စိုက်ပျိုးလာကြကြောင်း၊ ဘုမ္မနိုး ကျေးရွာတွင် စိုက်ဧက (၁၀) ဧကခန့် စိုက်ပျိုးထားကြောင်း သိရသည်။

    ခရမ်းချဉ်စိုက်ပျိုးရာတွင် တစ်ဧကကို မျိုးစေ့(၆)ထုပ်ကုန်ကျပြီး တစ်ထုပ်လျှင် ၄၂၀၀၀ ကျပ် နှုန်းဖြင့် ပေးဝယ်ရပါကြောင်း၊ မျိုးစေ့ကို ပျိုးဘောင်ဖြင့် ပျိုးထောင်ပြီး ပျိုးပင် တစ်လသားကျော် အရွယ်တွင် စတင်စိုက်ပျိုးရကြောင်း၊ ခရမ်းချဉ်သီးနှံကို မြေအောက်ရေတင် စနစ်ဖြင့်စိုက်ပျိုး၍ စိုက်ပျိုးပြီး နှစ်လအကြာတွင် အသီးများ စတင်ဆွတ်ခူးနိုင်ကြောင်း၊ စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ မြေပြုပြင်ခ၊ ရေတင်ခ၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်းငွေကျပ် ၂၀ သိန်းခန့် ကုန်ကျကြောင်း သိရသည်။

    အထွက်နှုန်းအနေဖြင့် ခရမ်းချဉ်သီးကို အမှည့်ရောင်းချခြင်းမပြုဘဲ၊ အစိမ်းကောက် ရောင်းချပါကြောင်း၊(၇)ရက်တစ်ပတ် တစ်ကြိမ် ခူးဆွတ်ရပြီး စတင်ခူးဆွတ်ချိန်တွင် ခရမ်းချဉ် သီးအစို ပိဿာချိန် ၃၅၀-၄၀၀ ခန့် ထွက်ရှိ၍ တစ်ပတ်ထက်တစ်ပတ် အထွက်နှုန်း ပိုမိုလာကြောင်း၊ ခရမ်းချဉ်သီးနှံကို စတင်ခူးဆွတ်ချိန်မှစ၍ တစ်ဧကလျှင် စုစုပေါင်း ပိဿာချိန် ၃၅၀၀-၄၀၀၀ ခန့် ထွက်ရှိရာ စိုက်ပျိုးမြေအနေအထား၊ သီးနှံဖြစ်ထွန်းအောင်မြင်မှုအပေါ် မူတည်၍ အထွက်နှုန်း ကွဲပြားမှုရှိကြောင်း၊ ဈေးနှုန်းဈေးကွက်အနေဖြင့် ခရမ်းချဉ်သီးအစိမ်း လက်ကားဈေး တစ်ပိဿာလျှင် ငွေကျပ် ၂၅၀၀-၃၀၀၀၊ လက်လီ တစ်ပိဿာလျှင် ၃၅၀၀ နှုန်းဖြင့် အနီး ပတ်ဝန်းကျင်ရှိ ကျေးရွာများသို့ ရောင်းချမှုများရှိသည့်အပြင် မုံရွာမြို့ရှိ ကုန်စိမ်းဒိုင်များသို့ တင်ပို့ရောင်းချပြီး ထိုမှတစ်ဆင့် မန္တလေးမြို့၊ ကုန်စိမ်းဒိုင်များသို့ တင်ပို့ကြောင်း၊ အကျိုးအမြတ်အနေဖြင့် တစ်ဧကလျှင် ငွေကျပ်  သိန်း (၆၀)ကျော်ခန့် ရရှိကြောင်း သိရသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ မုံရွာမြို့နယ်တွင် သီးနှံမျိုးစုံစိုက်ပျိုးလျက်ရှိရာ နဂါးတွင်းကျေးရွာတွင် အပိုဝင်ငွေရရှိရန်အတွက် ဂန္ဓမာပန်းများကို တစ်နိုင်တစ်ပိုင် စိုက်ပျိုးလျက်ရှိကြောင်း၊ စိုက်ပျိုးမှုပုံစံ အနေဖြင့် မြေဘောင်တင်စနစ်၊ မြေအောက်ရေတင်စနစ်တို့ဖြင့် စိုက်ပျိူးကာ မြေအကျယ်အဝန်း ပေ ၄၀  ပတ်လည်တွင် အပင်အ‌ရေအတွက် ၅၀၀၀ ခန့် စိုက်ပျိုးလျက်ရှိကြောင်း သိရသည်။

    ဂန္ဓမာပန်းကို မေလတွင် စတင်စိုက်ပျိုး၍ စိုက်ပျိုးပြီး ၄လအကြာ အောက်တိုဘာလတွင် ခူးဆွတ် ရောင်းချကြောင်း၊ မျိုးအနေဖြင့် ဂန္ဓမာပန်း(အဝါကြီး)မျိုးကို ယခင်နှစ် စိုက်ပျိုးပြီးအညွန့်ကိုဖြတ်၍ စိုက်ပျိုးခြင်းနှင့် ကိုင်းကိုဖြတ်၍ ကျန်သည့်အမြစ်ပါသော ကိုင်းများကို ပျိုးထောင်၍လည်း စိုက်ပျိုးကြ ကြောင်း၊ စိုက်ပျိုးပြီး ပန်းပင်များကို  ၅ရက်-၇ရက်ခြား တစ်ကြိမ် ပိုးသတ်ဆေး ဖြန်းပေးရပြီး ဂန္ဓမာပန်း စိုက်ပျိုးကုန်ကျစရိတ်အနေဖြင့် မြေဘောင်တင်ခြင်း၊ မြေပြုပြင်ခြင်း၊ သွင်းအားစု၊ ရေတင်သွင်းခြင်း၊ လုပ်သားခအပါအဝင် စုစုပေါင်း ငွေကျပ် ၁၅ သိန်းခန့် ကုန်ကျကြောင်း၊ ဂန္ဓမာပန်း(အဝါကြီး) အရောင်း အဝယ်ဖြစ်သည့်ဈေးအနေဖြင့် ယခင်နှစ်က တစ်စည်းလျှင် ၁၅၀၀ ကျပ် ရရှိခဲ့ပြီး ယခုနှစ်တွင် တစ်စည်းလျှင် ၃၀၀၀ ကျပ်ဖြင့် ရောင်းချရပါကြောင်း၊ ဂန္ဓမာပန်းပင်ကို တစ်ခါစိုက်ပျိုးပြီး ပြစုပျိုး ထောင်မှုကောင်းမွန်လျှင် သုံးသားအထိ ချိုးယူခူးဆွတ်နိုင်ပြီး ပန်းစပွင့်သည်မှ  တပတ်တစ်ကြိမ် ခူးဆွတ် နိုင်ကြောင်း၊ ယခုနှစ်တွင် မိုးများပြီး အရွက်အဖျားများ ပိုးအနည်းငယ်ကျ၍ ပန်းအထွက်နှုန်းနည်းပါး သွားခြင်းဖြစ်၍ ဈေးကောင်းရရှိပြီး အကျိုးအမြတ်အနေဖြင့် ငွေကျပ် ၃၀ သိန်းခန့် ရရှိကြောင်း၊ ပန်းအဝယ်ဒိုင်များက စိုက်ခင်းသို့ လာရောက် ဝယ်ယူကြပြီး ထို့မှတစ်ဆင့် ပန်းဈေးကွက်များသို့ ပြန်လည်၍ တင်ပို့ရောင်းချကြကြောင်း သိရသည်။

DOCA(စစ်ကိုင်း)

          မိတ္ထီလာခရိုင်၊ မလှိုင်မြို့နယ်ရှိ ဆန်ဈေးကွက်တွင် ဒီဇင်ဘာလဆန်း၌ ဆန်ဈေးများငြိမ်နေကြောင်း သိရသည်။ ဒေသတွင်း အရောင်းသွက်နေသော ဆန်အမျိုးအစားအလိုက် ဈေးနှုန်းများမှာ ၂၄ပြည် တစ်အိတ်လျှင် ရွှေဘိုပေါ်ဆန်းမှာ ၁၈၅၀၀၀/-ကျပ်၊ ရန်ကုန်ပေါ်ဆန်းမှာ ၁၄၅၀၀၀/-ကျပ်၊ ရွှေဘိုပဒေသာမှာ ၁၃၀၀၀၀/-ကျပ်၊ မနောသုခဆန်များတွင် အဟောင်းမှာ (၈၀၀၀၀/- ၇၅၀၀၀/-) ကျပ်၊ အသစ်မှာ ၅၅၀၀၀/-ကျပ်၊ ရက်(၉၀)ဆန်များတွင် အဟောင်းမှာ (၇၀၀၀၀/- ၆၅၀၀၀/-)ကျပ်၊ အသစ်မှာ ၅၀၀၀၀/-ကျပ် ဈေးရှိပြီး ယခင်လဈေးများနည်းတူ ဈေးအတက်အကျမရှိ ဈေးငြိမ်နေကြောင်း၊ မလှိုင်မြို့နယ်ရှိ ဆန်ဆိုင်များအနေဖြင့် မိတ္ထီလာမြို့ပေါ်ရှိ ဆန်ပွဲရုံများမှာ ဝယ်ယူကာ မြို့ပေါ်နှင့် မြို့နယ်အတွင်းရှိ ကျေးရွာများမှ လက်လီ ဝယ်ယူသူများသို့ ပြန်လည်ရောင်းချရကြောင်း ဆန်ဆိုင်များမှ သိရှိရပါသည်။

DOCA(ရန်ကုန်)

      မိတ္ထီလာမြို့ရှိ မုန့်ပဲသွားရည်စာဈေးကွက်တွင် မုန့်လေပွေမှာလည်း တစ်မျိုးအပါအဝင်ဖြစ်ပါသည်။ ဆန်ဖြင့်ပြုလုပ်ရသော မုန့်လေပွေမှာ ဈေးကွက်တွင်ရပ်တည်နေသည်မှာ ကာလကာမြင့်စွာကပင်ဖြစ်ပါသည်။ မုန့်လေပွေမှာ ဆန်ဖြင့်ပြုလုပ်ထားသဖြင့် ဆန်၊ စပါးအဓိကစားသုံးသော မြန်မာလူ မျိုးများအတွက် ဘေးထွက်ဆိုးကျိုးနည်းပါးသော သွားရည်စာမုန့်ဖြစ်ပါသည်။ မုန့်လေပွေကို နှမ်းဆီ၊ မြေပဲဆီတို့နှင့် သုပ်လိမ်း၍စားလျှင် ဆိပ့်သောအရသာရှိပြီး၊ ထန်းလျှက်အရည်ဖြင့် ဆမ်းစားလျှင်ချို သောအရသာဖြင့် အစာပြေစားသုံးနိုင်သော ဒေသထွက်သွားရည်စာ၊ စားသောက်ကုန်တစ်မျိုးဖြစ်ပါသည်။ ထိုသို့ ဒေသနေစားသုံးသူများနှစ်သက်သည့် မုန့်လေပွေကို နှီးကြိုးဖြင့် (၁၀) ခုပါ အတွဲတစ်တွဲ လျှင် (၂၀၀၀) ကျပ်ဖြင့် အရောင်းသွက်ကြောင်း သိရှိရပါသည်။

DOCA(မန္တလေး)

         မိတ္ထီလာဆန်ဈေးကွက်အတွင်း ဒေသတွင်းထွက်ရှိသော ဆန်များအပြင် ရွှေဘို၊ ဧရာဝတီ၊ မကွေးတိုင်းဒေသကြီးများမှ ဝင်ရောက်လာသော ဆန်အမျိုးအစား အလိုက်အရောင်း အဝယ်ဖြစ်လျက်ရှိပြီး   ဈေးကွက်တွင် အရပ်ပဒေသာ၊ ကုန်စောင်းပဒေသာ၊ အောက်ပြည် မနောသုခ၊ အရပ်သုခ စသည့် ဆန်အမျိုးအစားများမှာ အရောင်းသွက်လျက်ရှိပါသည်။

     ဒီဇင်ဘာလဆန်း၌ ဖြစ်ပေါ်နေသော ဈေးနှုန်းများမှာ ရန်ကုန်ပေါ်ဆန်း(၂၄)ပြည်တစ်အိတ်လျှင် (၁၃၅၀၀၀)ကျပ်၊ ရွှေဘိုပဒေသာ (၂၄)ပြည်တစ်အိတ်လျှင် (၁၃၀၀၀၀)ကျပ်၊ ကုန်းစောင်းပဒေသာ(၂၄) ပြည်တစ်အိတ်လျှင်(၁၄၀၀၀၀)ကျပ်၊ အောက်ပြည်သုခ(သစ်) (၂၄)ပြည်တစ်အိတ်လျှင်(၅၀၀၀၀)ကျပ်၊ အောက်ပြည်သုခ(ဟောင်း) (၂၄)ပြည်တစ်အိတ်လျှင်(၆၅၀၀၀)ကျပ်၊  မနောသုခ(ဟောင်း) (၂၄)ပြည် တစ်အိတ်လျှင် (၇၅၀၀၀)ကျပ်၊ မနောသုခ(သစ်) (၂၄)ပြည်တစ်အိတ်လျှင် (၅၀၀၀၀)ကျပ်၊ ရက်(၉၀)(ဟောင်း) (၂၄)ပြည်တစ်အိတ်လျှင် (၆၅၀၀၀)ကျပ်၊ ရက်(၉၀)(သစ်) (၂၄)ပြည်တစ်အိတ် လျှင် (၄၅၀၀၀)ကျပ်၊ ရွှေဘိုမဂျမ်းတော(၂၄)ပြည်တစ်အိတ်လျှင်(၆၈၀၀၀)ကျပ်၊ အရပ်သုခ(ဟောင်း) (၂၄)ပြည်တစ်အိတ်လျှင်(၈၀၀၀၀)ကျပ်၊ အရပ်သုခ(သစ်) (၂၄)ပြည်တစ်အိတ် လျှင်(၆၅၀၀၀) ကျပ်ရှိ ပြီး၊ ယခင်လနှင့် ကာလတူနှိုင်းယှဉ်ပါက ဆန်ဈေးနှုန်းများ ငြိမ်နေကြောင်းသိရသည်။ မိတ္ထီလာမြို့ရှိ ဆန်ပွဲရုံများအနေဖြင့် မိတ္ထီလာ၊မလှိုင်၊ သာစည်မြို့နယ်များသို့ ဖြန့်ဖြူးရောင်းချကြကြောင်း ဆန်ပွဲရုံများထံ သိရှိရပါသည်။

DOCA(မန္တလေး)