ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ ကန့်ဘလူခရိုင်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးကို အဓိကထားလုပ်ကိုင်ကြရာ အိမ်ခြံဝင်းများနှင့် ယာကွက်များတွင် ကန်ဇွန်းဥနှင့် မုန်လာဥဖြူတို့ကို တစ်ပိုင်တစ်နိုင် စိုက်ပျိုးကြပြီး ကန့်ဘလူမြို့မဈေးတွင် ရောင်းချရကြောင်း၊ ကန်စွန်းဥကို အစိမ်းစားတာ၊ ပြုတ်စားတာနှင့် ကန်စွန်းဥပူတင်း စသည်ဖြင့် အမျိုးမျိုးပြုလုပ်စားသုံးကြကြောင်း၊ မုန်လာဥဖြူကို  စားသောက်ဆိုင်၊ ထမင်းဆိုင်နှင့် အိမ်ရှင်မများက ဝယ်ယူလျက်ရှိကြောင်း သိရသည်။

       ၂၀၂၅ ခုနှစ်၊ ဒီဇင်ဘာလ ပထမပတ်အတွင်း ကန့်ဘလူမြို့မဈေးတွင် ရောင်းချနေသော  ကန်ဇွန်းဥဈေးနှုန်းမှာ လက်လီ(၁)ပိဿာလျှင် (၄၁၀၀)ကျပ် လက်က္ကား(၁)ပိဿာလျှင် (၄၀၀၀)ကျပ် နှင့်(၂၅)ကျပ်သားလျှင် (၁၀၀၀)ကျပ်ဈေးနှုန်းဖြင့်လည်းကောင်း၊ မုန်လာဥဖြူအကြီး(၁)တွဲလျှင် (၁၀၀၀)ကျပ်၊ မုန်လာဥဖြူ(အသေး)(၁)တွဲလျှင် (၆၀၀)ကျပ်ဈေးနှုန်းတို့ဖြင့် ရောင်းချလျက်ရှိရာ နိုဝင်ဘာလ စတုတ္ထပတ်၏ ဈေးနှုန်းများနှင့်နှိုင်းယှဉ်ပါက ဒီဇင်ဘာပထမပတ်အတွင်း မုန်လာဥဖြူ (၁)တွဲလျှင်(၃၀၀)ကျပ် ဈေးနှုန်းမြင့်တက်လာကြောင်း ဈေးသည်များထံမှ သိရှိရပါသည်။

DOCA(စစ်ကိုင်း)

    စပါးလင်သည် ရာသီဥတုအေးသောဒေသများတွင် စိုက်ပျိုးလေ့ရှိကြောင်း၊ စိုက်ပျိုးချိန်နှင့် ရိတ်သိမ်းချိန်မှာ မျိုးကွဲပေါ်မူတည်၍ ကွဲပြားလျက်ရှိကြောင်း သိရသည်။ မြင်းခြံဒေသအတွင်း စိုက်ပျိုးထားသော ဆောင်းစပါးလင်များကို စက်တင်ဘာလနှင့် အောက်တိုဘာလတို့တွင် စိုက်ပျိုး၍ ရိတ်သိမ်းချိန်မှာ နွေနှောင်းပိုင်းဖြစ်သော မေလနှင့် ဇွန်လတို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှ ရိတ်သိမ်းချိန်အထိ အပင်ကြီးထွားမှု ကာလမှာ (၈-၉) လကြာမြင့်ကြောင်း၊ ယခု အချိန်မှာ ဒေသတွင်း စပါးလင်များထွက်ပေါ်ချိန်ဖြစ်၍ ဟင်းခက်အမွှေးအကြိုင်အဖြစ် ဈေးနှုန်း သက်သာစွာ စားသုံးရကြောင်း၊ မြင်းခြံမြို့၊ အေးမြသီတာဈေး၌ ရောင်းချနေသော ၂၀၂၅ခုနှစ်၊ ဒီဇင်ဘာလ၌ စပါးလင် ၄ ပင်ပါတစ်စီးလျှင် (၅၀၀) ကျပ်စပါးလင် ၈ ပင်ပါတစ်စီးလျှင် (၁၀၀၀) ကျပ်ခန့် ပေါက်ဈေး များဖြင့်ရောင်းချလျက်ရှိကြောင်း၊ ဈေးကွက်တွင် စားသုံးမှုများသောကြောင့် အရောင်းအဝယ်သွက်လျက်ရှိကြောင်း၊ စပါးလင်ကို အစား အသောက်ချက်ပြုပ်ရာတွင် ဟင်းခက်အမွှေးအကြိုင်အဖြစ် အသုံးပြုခြင်း၊ ကြက်ပေါင်းရည်ပြုလုပ်ရာတွင် စပါးလင်ကို အသုံးပြုခြင်းကြောင့် အာဟာရပြည့်ဝကြောင်း၊ ကျန်းမာရေးအတွက် အာဟာရဆေးဖက်ဝင်ကြောင်း သွေးတွင်း သကြားဓာတ်ကို ထိန်းပေးသောကြောင့် ဆီးချိုရောဂါကို ကာကွယ်ခြင်း၊ ကိုလက်စထရောလျှော့ချပေးသောကြောင့် နှလုံးသွေးကြောကျဉ်းရောဂါကို ကာကွယ်ပေးခြင်း၊ အရေပြား၊ ဆဲလ်ပျက်စီးခြင်းကို ကာကွယ်ပေးခြင်းကြောင့် ဟင်းခက်အမွှေးအကြိုင်အဖြစ် အသုံးပြုသောစပါလင်သည် အာဟာရပြည့်ဝပြီး ကိုယ်ခံမြှင့်တင်ပေးကြောင်းသိရှိရသည်။

DOCA(မန္တလေး)

   စားဖိုဆောင်အုပ်စုဝင်ဖြစ်သော ချင်းသီးနှံကို  ဟင်းခက်အမွှေးအကြိုင်အဖြစ် လူအများ အသုံး ပြုကြကြောင်း၊ မြင်းခြံမြို့နယ်အတွင်းရောင်းချနေသော ချင်းများကို ရှမ်းပြည်နယ်တောင်ပိုင်း၊ အောင်ပန်းမြို့နှင့် မန္တလေးမြို့ကုန်စိမ်းပွဲရုံများမှ တင်သွင်းရောင်းချကြောင်း၊ ၂၀၂၅ခုနှစ်၊ ဒီဇင်ဘာလ၌ အေးမြသီတာဈေးနှင့် စံပြဈေးများတွင်ရောင်းချနေသော ချင်းတစ်အသစ်အခက်ကြီး တစ်ပိဿာလျှင် (၆၅၀၀)ကျပ်၊ ချင်းတက်အလတ် တစ်ပိဿာလျှင်(၅၅၀၀)ကျပ်၊ ချင်းတက်အငယ် တစ်ပိဿာလျှင်(၄၀၀၀)ကျပ်ခန့်ပေါက်ဈေးများဖြင့်အရောင်းအဝယ် ဖြစ်လျက်ရှိကြောင်း၊ ယခင် လနှင့်နှိုင်းယှဉ်ပါက ယခုလတွင် ချင်းတက်အစစုံ တစ်ပိဿာလျှင် (၁၀၀၀)ကျပ်ခန့် ဈေးမြင့်တက် ခဲ့ကြောင်း၊ ဂျင်းတက်အသစ်များ အရည်အသွေးကောင်းပြီး အထားခံသောကြောင့် ဈေးမြင့်တက်ခဲ့ ခြင်းဖြစ်ကြောင်း၊ ချင်းတက်သည် ကိုယ်ခံအားကောင်းသောကြောင့် စားသုံးမှုများပြားပြီး အရောင်း အဝယ်ကောင်းကြောင်း ကုန်စိမ်းရောင်းချသူတစ်ဦး၏ ပြောပြချက်အရသိရှိရသည်။ ဟင်းခက်အမွှေး အကြိုင်အဖြစ် ကြက်သွန်ဖြူ၊ ငရုတ်ကောင်းနှင့်ရောစပ်ကာ ဟင်းလျာများတွင် ချက်ပြုတ်စားသုံးကြကြောင်း၊ စားသောက်ကုန်၊ ဆေးဝါး၊ စက်မှုလုပ်ငန်း စသည့်နယ်ပယ်စုံတွင်အသုံးပြုကြကြောင်း၊ ချင်းသည် သဘာဝဆေးဘက်ဝင် အပင်ဖြစ်သလို စီးပွား‌ရေးအရလည်း အရေးပါသော သီးနှံတစ်ခု ဖြစ်ကြောင်း သိရှိရသည်။

DOCA(မန္တလေး)

          စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့် ဒေသတွင်း စိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ ဈေးကွက်အခြေအနေတို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင်ရောင်းချလျက်ရှိသည့် မြေပဲယိုနှင့် နှမ်းယိုများကို ကန့်ဘလူမြို့နယ်မှထွက်ရှိသလို ရွှေဘိုမြို့ရှိလက္ကားဆိုင်များမှ ဝယ်ယူရောင်းချကြောင်း သိရသည်။

       ၂၀၂၅ ခုနှစ်၊ ဒီဇင်ဘာလ ပထမပတ်အတွင်း ကန့်ဘလူမြို့ကုန်စုံဆိုင်များတွင် ရောင်းချနေသော မြေပဲယိုဈေးနှုန်းမှာ အသင့်ထုတ်ပြီးအကြီး(၁)ထုပ်လျှင် (၁၅၀၀)ကျပ်၊ အသေး(၁)ထုပ်လျှင် (၄၇၀)ကျပ်ဖြင့်လည်းကောင်း၊ နှမ်းယိုအကြီး(၁)ထုပ်လျှင် (၁၅၀၀)ကျပ်နှင့် အသေး(၁)ထုပ်လျှင် (၄၆၀)ကျပ်ဖြင့်လည်းကောင်း ရောင်းချလျက်ရှိရာ နိုဝင်ဘာလ စတုတ္ထပတ်၏ ဈေးနှုန်းများနှင့်  နှိုင်းယှဉ်ပါက ဒီဇင်ဘာလ ပထမပတ်အတွင်း မြေပဲယိုအကြီး(၁)ထုပ်လျှင် (၁၀၀)ကျပ်ဈေးနှုန်း ကျဆင်းလာကြောင်း လက်လီ/လက္ကားကုန်မျိုးစုံဆိုင်များမှ သိရှိရပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ  ကုန်မျိုးစုံရောင်းဝယ်ရေးဆိုင်များ တွင်ရေဦးပေါက်ပေါက်ဆုပ်၊ ကြံသကာ၊ ဇီးထန်းလျက်၊ မြေပဲယို၊ မြေပဲဆားလှော်၊  ပဲကြီးလှော်နှင့် နေကြာစေ့လှော်များကို ရွှေဘိုမြို့နှင့် မန္တလေးမြို့တို့မှ မှာယူရောင်းချလျက်ရှိကြောင်း၊ လူကြီး၊ လူငယ်မရွေး ပဲကြီးလှော်နှင့် နေကြာစေ့လှော်ကို  သရေစာအဖြစ် စားသုံးကြကြောင်း သိရသည်။

           ၂၀၂၅ ခုနှစ်၊ ဒီဇင်ဘာလ ပထမပတ်အတွင်း ကန့်ဘလူမြို့ရှိ ကုန်မျိုးစုံဆိုင်များတွင်  သရေစာနေကြာစေ့လှော် လက္ကားတစ်ပြည်လျှင် (၈၅၀၀)ကျပ်၊ လက်လီတစ်ပြည်လျှင် (၈၈၀၀)ကျပ်၊ နို့ဆီဘူး(၄)ဘူးလျှင် (၄၄၀၀)ကျပ်နှင့် နို့ဆီဘူး(၁)ဘူးလျှင် (၁၁၀၀)ကျပ်၊ ပဲကြီးလှော်(၁)ပြည်လျှင်  (၈၅၀၀)ကျပ်၊ နို့ဆီဘူး(၁)ဘူးလျှင် (၁၁၀၀)ကျပ် ဈေးနှုန်းတို့ဖြင့် ရောင်းချလျက်ရှိရာ နိုဝင်ဘာလ စတုတ္ထပတ်ဈေးနှုန်းများနှင့် နှိုင်းယှဉ်ပါက ဒီဇင်ဘာလ ပထမပတ်အတွင်း နေကြာစေ့(၁)ပြည်လျှင် (၂၀၀) ကျပ်ဈေးနှုန်းကျဆင်းသွားကြောင်း  ကုန်မျိုးစုံရောင်းချသည့် လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)